Сульфаргин® (Silver sulfadiazine)
Инструкция
-
русский
-
қазақша
Саудалық атауы
СУЛЬФАРГИН®
Халықаралық патенттелмеген атауы
Сульфадиазин
Дәрілік түрі
Сыртқа қолдануға арналған 10 мг/г жақпамай
Құрамы
1 г жақпамай құрамында
белсенді зат - 10 мг күміс сульфадиазині,
қосымша заттар: вазелин майы, пропиленгликоль, цетостеарил спирті, глицерил моностеарат 40-55, полисорбат 80, метилпарагидроксибензоат, пропилпарагидроксибензоат, тазартылған су 1 г-ге дейін.
Сипаттамасы
Түсі ақ немесе ақ дерлік, өзіне тән иісі бар жақпамай.
Фармакотерапиялық тобы
Микробқа қарсы жергілікті қолдануға арналған препараттар. Сульфаниламидтер. Күміс сульфадиазині
АТХ коды D06BA01
Фармакологиялық қасиеттері
Фармакодинамикасы
Күміс сульфадиазині грамоң және грамтеріс микробтар мен зеңдерге (Candida, Phycomycetes және Aspergillus spp, дерматофиттер) антимикробтық әсер етеді. Препарат белсенділігі жарадағы күміс сульфадиазинінің орташа диссоциациясы нәтижесінде босап шығатын күміс иондарына негізделеді, сол арқылы сульфадиазинмен (сульфаниламид) толығатын ұзақ мерзімдік антимикробтық әсерге қол жеткізіледі. Күміс иондары микроб жасушасының бетінде сіңеді және олигодинамикалық бактериостатикалық және бактерицидтік әсер етеді. Препараттың некроздық және мутагендік әсері жоқ. Жақпамай орташа осмостық белсенділігімен сипатталады.
Фармакокинетикасы
Жергілікті қолданғанда жараға жағылған жақпамайдың жалпы көлемінен 10% сульфадиазинге дейін және 1% күміс ионына дейін сіңуі мүмкін. Сіңген күмістің үлкен бөлігі өтпен бірге бөлініп шығады. Сульфадиазин организмде жинақталмайды және бүйрек арқылы тез бөлініп шығады.
Қолданылуы
- жұқпа жұққан күйік жараларын емдеуге және алдын алуға
- жұқпа жұққан терінің ойық жараларында және тесілулерінде (кешенді ем құрамында)
- ауыстырылып салынған тері бөліктерінің және ауқымды сызаттардың жұқпа жұқтыруының алдын алуға
Қолдану тәсілі және дозалары
Сыртқа.
Некроздық тіндерді алып тастағаннан кейін зақымдалған жердің бетіне жақпамай стерильді таңғыштың астына немесе ашық әдіспен тәулігіне 1-2 рет жұқа қабат етіліп (2-4 мм) жағылады. Бір реттік ең жоғары доза – 300 г. Емдеу ұзақтығы – 3 аптаға дейін. Жақпамайды кең аумақты зақымданған жерге қолданғанда бауыр мен бүйрек функциясына және қанның формалық элементтерінің санына бақылау жасаған жөн. Емделушіге сілтілі суды мол етіп беру керек.
Жағымсыз әсерлері
Жағымсыз әсерлері жүйелер мен ағзалар топтарына, сондай-ақ MedDRA кездесу жиілігіне сәйкес жіктелген: өте жиі (≥1/10), жиі (≥1/100 <1/10 дейін), сиректеу (≥1/1000 <1/100 дейін), сирек (≥1/10 000 <1/1000 дейін), өте сирек (<1/10 000), белгісіз (қолда бар деректер бойынша анықталмайды).
Жергілікті реакциялар
Тері және теріастылық тіндер тарапынан
Сирек: аллергиялық реакциялар (күйдіру сезімі, қышыну, бөрту)
Өте сирек: қысқа мерзімді күйдіру, ауыру түріндегі, 5-10 минуттан соң басылатын жергілікті тітіркендіретін әсері
Жүйелік реакциялар
Қан плазмасында сульфаниламид концентрациясы, егер жараның беткейі үлкен немесе емдеу ұзақ болса, жүйелік емі жағдайындағы сияқты деңгейге жетуі мүмкін. Мұндай жағдайларда сульфаниламидтерге тән жағымсыз әсерлері байқалуы мүмкін:
Қантамыр және лимфалық жүйелер тарапынан
Сирек: лейкопения, тромбоцитопения, эозинофилия
Психика тарапынан
Белгісіз: үрей
Жүйке жүйесі тарапынан
Сирек: бас ауыру, түйілулер
Асқазан-ішек жолы тарапынан
Жиі: жүрек айну, құсу, іш өту, глоссит
Бауыр және/немесе өт шығару жүйесі тарапынан
Сирек: бауыр жеткіліксіздігі
Тері және теріастылық тіндер тарапынан
Сирек: аргирия (тіндерде күмістің жинақталуы нәтижесінде тері күлгін сұр болуы мүмкін). Әдетте жақпамайды ауқымды беткейлерге немесе ұзақ қолданғанда пайда болады.
Қаңқа-бұлшықет және қатар жүретін жүйелер тарапынан
Белгісіз: буынның ауыруы
Бүйрек және несеп шығару жүйесі тарапынан
Сирек: кристаллурия, бүйрек жеткіліксіздігі
Кез келген жағымсыз әсерлердің байқалуы туралы дәрігерге хабарлаңыз.
Қолдануға болмайтын жағдайлар
- күміс сульфадиазиніне немесе препараттың кез келген қосымша заттарына жоғары сезімталдық
- сульфаниламидтерге жоғары сезімталдық
- глюкозо-6-фосфатдегидрогеназаның генетикалық тапшылығында: ауқымды жерге қолданғанда гемолиз пайда болуы мүмкін
- баланың ертерек жасында (жаңа туған, 3 айлыққа дейінгі балаларға), ядролық сарғаюдың пайда болу қаупіне байланысты шала туған балалар
- порфирия
- жүктілік, лактация кезеңі
- терең іріңді жараларды және экссудациясы мол күйік жараларын емдеу үшін қолданбаған жөн
Дәрілермен өзара әрекеттесуі
Күміс сульфадиазині жараларды тазалауға арналған ферментті препараттарды әсерсіздендіруі мүмкін, сондықтан бұл препараттарды бір мезгілде қолдануға болмайды.
Айрықша нұсқаулар
Препаратты бүйрек және бауыр жеткіліксіздігінде сақтықпен тағайындайды. Егер ұзақ уақыт бойы емделсе немесе препаратты күйген ауқымды жерге жақса, онда лейкопенияның, тромбоцитопенияның немесе эозинофилияның пайда болу қаупіне байланысты қан лейкоциттерінің санын жүйелі түрде анықтап отырған жөн.
Микробқа қарсы жергілікті қолданылатын басқа да препараттарды қолданған кездегідей, күміс сульфадиазинін қолданғанда да асқынжұқпа пайда болуы мүмкін.
Педиатрияда қолданылуы
Күміс сульфадиазинін шала туған балаларға және жасы 3 айға дейінгі балаларға ядролық сарғаюдың туындау қаупіне байланысты қолдануға болмайды.
Жүктілік және лактация кезеңі
Жүктілік кезінде күміс сульфадиазинін қолдану қауіпсіздігі туралы деректер жоқ, сондықтан жүктілік және лактация кезеңінде жақпамай қолдануға болмайды.
Жақпамайдың құрамында қосымша заттар ретінде метилпарагидроксибензоат, пропилпарагидроксибензоат бар, олар аллергиялық реакцияларды (сондай-ақ баяу типті), жекелеген жағдайларда бронхтың тарылуын туындатуы мүмкін. Жақпамайдың құрамында цетостеарил спирті, ол жергілікті тері реакцияларын (мысалы, жанаспалы дерматит), және пропиленгликоль бар, ол теріні тітіркендіруі мүмкін.
Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері
Препарат көлікті басқару және техникалық қондырғылармен жұмыс жасау қабілетіне ықпалын тигізбейді.
Артық дозалануы
Симптомдары. Күйген жердің ауқымды бетін ұзақ уақыт емдегенде сульфаниламидтер жүйелік әсер етуі мүмкін: жүректің айнуы, құсу, іш өту, глоссит, буындардың ауыруы, бауыр жеткіліксіздігі, бас ауыру, сананың шатасуы, құрысу спазмдары, кристаллурия, бүйрек жеткіліксіздігі, үрей, лейкопения, тромбоцитопения, эозинофилия.
Емі: симптоматикалық.
Шығарылу түрі және қаптамасы
50 г-ден ішкі беткейі лакпен жабылған, мойнында қорғаныш алюминий жарғақшасы және бұралатын пластмасса бушонда жарғақшаны тесуге арналған конус тәрізді құралы бар алюминий сықпада. Сықпа медицинлық қолдану жөніндегі мемлекеттік және орыс тілдеріндегі нұсқаулықпен бірге қораптық картон қорапшаға салынған.
Сақтау шарттары
25 0С-ден аспайтын температурада сақтау керек.
Мұздатып қатыруға болмайды!
Балалардың қолы жетпейтін жерде сақтау керек!
Сақтау мерзімі
2 жыл
Қаптамасында көрсетілген жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецептісіз
Өндіруші
«Гриндекс» АҚ. Крустпилс к-сі, 53, Рига, LV-1057, Латвия
Тіркеу куәлігінің иесі
«Гриндекс» АҚ, Латвия
ҚР аумағында шағымдарды қабылдайтын ұйым
«Гриндекс» АҚ өкілдігі
050010, Алматы қ., Достық д-лы, Бөгенбай батыр көшесінің бұрышы, 34а/87а үй, №1 кеңсе
т./ф. 291-88-77, 291-13-84
эл. поштасы: grindeks.asia.kz@mail.ru