Строфантин К
Инструкция
-
русский
-
қазақша
Саудалық атауы
Строфантин К
Халықаралық патенттелмеген атауы
Жоқ
Дәрілік түрі
Инъекцияға арналған 0,25 мг/мл ерітінді
Құрамы
1 мл ерітіндінің құрамында
белсенді зат: 0,25 мг строфантин К,
қосымша заттар: 96% этанол, инъекцияға арналған су.
Сипаттамасы
Мөлдір түссіз немесе сарғыш түсті сұйықтық.
Фармакотерапиялық тобы
Жүрек ауруларын емдеуге арналған препараттар. Жүрек гликозидтері. Строфант гликозидтері. Строфантин.
АТХ коды С01АС01
Фармакологиялық қасиеттері
Фармакокинетикасы
Емдік әсері көктамыр ішіне енгізгеннен кейін 5-10 минуттан соң-ақ байқалады және ең жоғары мәніне 15-30 минуттан соң жетеді. Строфантин К препаратының қан плазмасынан жартылай шығарылу кезеңі орташа алғанда – 23 сағат. Жинақталу әсері іс жүзінде жоқ.
Фармакодинамикасы
Строфантин К Strophathus Kombe Oliver тропикалық лиана ұрығынан алынған жүрек гликозидтерінің (К - строфантин -β, К - строфантозид және т.б..) қоспасы болып табылады және липидтерде аз еритін және асқазан-ішек жолынан нашар сіңетін полярлық (гидрофильді) жүрек гликозидтері тобына жатады.
Әсер ету механизмі миокардтың жиырылу қабілеттілігін жақсартатын Na+-K+-АТФ-аза блокадасымен, Na+-Ca2+алмасуына әсерімен байланысты. Препарат жүректің жиырылу күші мен жылдамдығын күшейтеді, диастоланы ұзартады, жүрек қарыншаларына қанның ағып келуін жақсартады, соғу көлемін ұлғайтады, n. Vagus қызметіне аз әсер етеді.
Қолданылуы
- жүрек-қантамырларының жедел жеткіліксіздігінде
- ІІ Б - ІІІ сатыдағы созылмалы жүрек жеткіліксіздігінде (қарыншаүстілік аритмиялар, жүрекшелердің жыпылықтауы мен дірілдеуі).
Қолдану тәсілі және дозалары
Строфантин К көктамыр ішіне (кейде – бұлшықет ішіне) қолданылады. Көктамыр ішіне енгізу үшін препаратты 10-20 мл натрий хлоридінің изотониялық ерітіндісінде сұйылтылады. Препарат баяу, 5-6 минут бойына енгізіледі. Алғашқы 2 күнде тәулігіне 2 рет енгізуге болады.
Строфантин К ерітіндісін көктамыр ішіне тамшылатып енгізуге де болады (100 мл натрий хлоридінің изотониялық ерітіндісінде), өйткені енгізудің бұл түрінде уыттану әсері сирек болады. Строфантин К препаратын көктамырға енгізу мүмкін болмаса, онда оны бұлшықет ішіне тағайындайды. Бұл енгізу жолында препарат дозасын 1,5 есе арттырады.
Ересектер үшін көктамыр ішіне Строфантин К-ның ең жоғары дозалары: бір реттік – 0,0005 г (0,5 мг), тәуліктік – 0,001 г (1 мг).
0, 25 мг/мл Строфантин К ерітіндісін қолданғандағы тәуліктік дозалары, қанығу дозалары да - осылар: туған сәттен бастап 2 жасқа дейін – тәулігіне 0,01 мг/кг (0,04 мл/кг); 2 жастан бастап – тәулігіне 0,007 мг/кг (0,03 мл/кг).
Демеуші доза қанығу дозасының ½ - ⅓ -ін құрайды.
Жағымсыз әсерлері
Асқазан-ішек жолы тарапынан: тәбеттің төмендеуі, жүрек айнуы, құсу, диарея.
Жүрек-қантамыр жүйесі тарапынан: қарыншалық аритмиялар, брадикардия, атриовентрикулярлық блокада.
Жүйке жүйесі тарапынан: бас ауыру, бас айналу, ұйқының бұзылуы, шаршағыштық, сирек – түсті қабылдаудың бұзылуы, депрессия, психоздар.
Басқалары: аллергиялық реакциялар, есекжем, тромбоцитопения, тромбоцитопениялық пурпура, мұрыннан қан кету, петехиялар, гинекомастия
Қолдануға болмайтын жағдайлар
-
жүрек пен қантамырлардың органикалық зақымдалуы
-
жедел миокардит, эндокардит
-
айқын кардиосклероз
-
жедел миокард инфарктісі
-
II – III дәрежелі атриовентрикулярлық блокада
-
айқын брадикардия
-
гипертрофиялық обструктивтік кардиомиопатия
-
констриктивтік перикардит
-
гиперкальциемия
-
гипокалиемия
-
каротидті синус синдромы
-
қолқаның кеуде бөлігінің аневризмасы
-
синустық түйіннің әлсіздік синдром
-
WPW-синдромы
-
гликозидтік уыттану
-
жүктілік және лактация кезеңі
Дәрілермен өзара әрекеттесуі
Строфантин К барбитураттармен (фенобарбитал, этаминал-натрий және басқалар) бірге қолданғанда гликозидтің кардиотонустық әсері төмендейді. Строфантин К препаратын симпатомиметиктермен, метилксантиндермен, резерпинмен және үшциклді антидепрессанттармен бір мезгілде қолданғанда аритмияның даму қаупі артады. Хинидинді, амиодаронды, каптоприлді, кальций антагонистерін, эритромицинді және тетрациклинді бір мезгілде қолданғанда қан плазмасындағы Строфантин К препаратының концентрациясы артады. Магний сульфатының аясында жүрек өткізгіштігінің төмендеуі және атриовентрикулярлық блокадасының туындау мүмкіндігі артады.
Салуретиктер, адренокортикотропты гормондар, глюкокортикостероидтар, инсулин, кальций препараттары, іш жүргізгіштер, карбеноксолон, В амфотерицині, бензилпенициллин, салицилаттар гликозидтік уыттанудың даму қаупін арттырады. Аритмияға қарсы заттар, оның ішінде бета-адренорецепторларының блокаторлары да, гликозидтердің теріс хроно- және дромотропты әсерін күшейтеді. Бауырдың микросомалық ферменттерінің индукторлары (фенитоин, рифампицин, фенобарбитал, фенилбутазон, спиронолактон), сондай-ақ неомицин мен цитостатикалық заттар қан плазмасындағы Строфантин К концентрациясын төмендетеді. Кальций препараттары жүрек гликозидтеріне сезімталдықты арттырады.
Айрықша нұсқаулар
Гипомагниемияда, гипернатриемияда, гипотиреозда, жүрек қуыстарының айқын дилатациясында, «өкпелік» жүректе, миокардитте, семіздік кезінде және егде жаста препаратты сақтықпен тағайындау керек, өйткені мұндай жағдайда уыттанудың туындау ықтималдылығы артады.
Препаратты көктамыр ішіне жылдам енгізгенде брадиаритмия, қарыншалық тахикардия, атриовентрикулярлық блокада дамуы және жүректің тоқтап қалуы мүмкін. Барынша жоғары әсер еткен кезде экстрасистолия, кейде бигемения түрінде пайда болуы мүмкін. Бұл әсердің пайда болуының алдын алу үшін дозаны көктамырішілік 2-3 енгізуге бөлуге немесе алғашқы дозаны бұлшықетке енгізуге болады. Бұрын жүректің басқа гликозидтерімен емделген жағдайда Строфантин К препаратын көктамыр ішіне қолданар алдында үзіліс жасайды (әйтпесе, гликозидтер әсерінің қосындысынан уыттылық әсер пайда болуы мүмкін). Үзілістің ұзақтығы – алдыңғы дәрілік заттың жинақталу қасиеттерінің көрінуіне байланысты 5 күннен 24 күнге дейін.
Препараттың айқын кардиотроптық әсерінің және оның тез әсер етуінің салдарынан дозалауда және қолдану үшін көрсетіліміне барынша дәлдік қажет.
Емді ұдайы ЭКГ-ні қадағалай отырып жүргізеді.
Педиатрияда қолданылуы
Туғаннан бастап қатаң көрсетілімдер бойынша қолданады.
Жүктілік және лактация кезеңі
Препаратты жүктілік немесе бала емізу кезеңінде қолданудың қауіпсіздігі туралы мәліметтер болмауына байланысты қолдануға болмайды.
Дәрілік заттың көлікті немесе қауіптілігі зор механизмдерді басқару қабілетіне ықпал ету ерекшеліктері
Строфантин К қолдану кезінде психомоторлық реакциялар жылдамдығын қажет ететін қызмет түрлерімен айналысу ұсынылмайды.
Артық дозалануы
Артық дозалану симптомдары әр түрлі.
Жүрек-қантамыр жүйесі тарапынан: аритмиялар, соның ішінде брадикардия, атриовентрикулярлық блокада, қарыншалық тахикардия немесе экстрасистолия, қарыншалар фибрилляциясы.
Асқазан-ішек жолы тарапынан: анорексия, жүректің айнуы, құсу, диарея.
Орталық жүйке жүйесі және сезім мүшелері тарапынан: бас ауыруы, қатты шаршағыштық, өте сирек – сананың шатасуы, синкопалық жағдай.
Емі: препаратты тоқтату немесе келесі дозаларды азайту және енгізулер арасындағы уақыт аралығын арттыру, у қайтарғылар енгізу (унитиол, ЭДТА), симптоматикалық ем (аритмияға қарсы препараттар – лидокаин, фенитоин, амиодарон; калий препараттары; холиноблокаторлар – атропин сульфаты).
Шығарылу түрі және қаптамасы
1 мл препараттан шыны ампулада.
10 ампуладан медицинада қолданылуы жөніндегі мемлекеттік және орыс тілдеріндегі нұсқаулықпен және ампулаға арналған скарификатормен бірге гофрланған аралығы бар қорапқа салынады. Қорапты бандероль- заттаңбамен желімдейді. Немесе 10 ампуладан пішінді ұяшықты қаптамаға салынады.
1 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен және ампулаға арналған скарификатормен бірге пәшкеге салынады.
Нүктесі немесе сындыру сақинасы бар ампулаларды пайдаланғанда скарификаторлар салынбайды.
Сақтау шарттары
Жарықтан қорғалған жерде, 25 оС-ден аспайтын температурада сақтау керек.
Балалардан сақтау керек!
Сақтау мерзімі
3 жыл.
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы.
Өндіруші
«Галичфарм» АҚ.
Украина, 79024, Львов қ., Опрышковская к-сі, 6/8.
Тіркеу куәлігінің иесі
«Галичфарм» АҚ, Украина.
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы
050060, Алматы қ., Әл-Фараби даңғ. 97, 3 подъезд, 54 кеңсе.
Телефон/ факс 8(727)315-82-09, 8(727)315-82-10.
Электронды поштасы: office@arterium.kz.