Силует®

МНН: Диеногест, Этинилэстрадиол
Производитель: Гедеон Рихтер ОАО
Анатомо-терапевтическо-химическая классификация: Прогестагены и эстрогены (фиксированные комбинации)
Номер регистрации в РК: № РК-ЛС-5№020986
Период регистрации: 14.11.2014 - 14.11.2019

Инструкция

Саудалық атауы

Силует®

Халықаралық патенттелмеген атауы

Жоқ

Дәрілік түрі

Үлбірлі қабықпен қапталған 2 мг/0,03 мг таблеткалар

Құрамы

Бір таблетканың құрамында

белсенді заттар: 100 % 2 мг микрондалған диеногест, 100 % 0,03 мг микрондалған этинилэстрадиол,

қосымша заттар: лактоза моногидраты, жүгері крахмалы, тальк, калий полакрилині, магний стеараты, гипромеллоза 2910 типі

үлбірлі қабық құрамы Опадрай II ақ 85F18422: поливинилді спирт, титанның қостотығы (Е 171), макрогол 3350, тальк

Сипаттамасы

Дөңгелек пішінді, екі беті дөңес, бір жағында «G53» өрнегі бар, ақ немесе ақ дерлік түсті үлбірлі қабықпен қапталған таблеткалар

Фармакотерапиялық тобы

Жыныс гормондары және жыныс жүйесінің модуляторлары. Жүйелі пайдалануға арналған гормональді контрацептивтер. Прогестагендер және эстрогендер (бекітілген біріктірілімдер).

АТХ коды G03AA

 

Фармакологиялық қасиеттері

Фармакокинетикасы

Этинилэстрадиол (30 мкг)

Сіңуі

Этинилэстрадиол ішке қабылдағаннан кейін тез және толық сіңеді. Ішке қабылдағаннан кейін плазмадағы ең жоғары концентрациясына (67 пг/мл) 1,5-4 сағаттан соң жетеді. Этинилэстрадиолдың едәуір бөлігі бауыр арқылы алғаш өту кезінде метаболизденеді. Абсолютті биожетімділігі шамамен 44 % құрайды.

Таралуы

Этинилэстрадиол альбуминмен (98 % жуық) көп мөлшерде, бірақ спецификалық емес байланысады. Ол плазмадағы жыныс гормондарын байланыстыратын глобулин (ЖГБГ) деңгейін арттырады. Болжамды таралу көлемі 2,8-8,6 л/кг құрайды.

Метаболизмі

Этинилэстрадиол ішектің шырышты қабығында және бауырда конъюгацияланады. Этинилэстрадиолдың негізгі метаболикалық жолы хош иісті гидроксилденумен жүзеге асады, бірақ оның метаболизмі бос, глюкуронданған және сульфаттанған түрдегі гидроксилденген және метилденген метаболиттердің көп санының түзілуіне де алып келеді. Клиренс шамамен 2,3-7 мл/мин/кг құрайды.

Шығарылуы

Қан плазмасындағы этинилэстрадиол мөлшері 1 және 10-20 сағат жартылай шығарылу кезеңімен екі сатыда төмендейді. Этинилэстрадиол ешбір мөлшерде өзгермеген күйде шығарылмайды. Этинилэстрадиол метаболиттері 4:6 арақатынасында бүйрекпен және бауырмен шығарылады. Метаболиттерінің жартылай шығарылу кезеңі 1 күнге жуық.

Тепе-тең концентрациясы

Тепе-тең концентрациясына емдеу циклының екінші жартысында жетеді, ал сарысудағы этинилэстрадиол концентрациясы 2 есе артады.

Диеногест

Сіңуі

Диеногест ішке қабылдағаннан кейін тез және толық сіңеді. Плазмадағы ең жоғары концентрациясына (51 пг/мл) 2,5 сағаттан соң жетеді. Этинилэстрадиолмен бір мезгілде қабылдағанда абсолютті биожетімділігі 96 % құрайды.

Таралуы

Диеногест сарысулық альбуминмен байланысады және ЖГБГ немесе кортикостероидты гормондарды байланыстыратын глобулинмен байланыспайды. Плазмадағы бос диеногест фракциясы 10 % құрайды, осы тұста 90 % альбуминмен спецификалық емес байланысқан. Диеногестің болжамды таралу көлемі 37-45 л құрайды.

Метаболизмі

Диеногест негізінен гидроксилденумен метаболизденеді, баламалы жолы глюкурондану болып табылады. Оның метаболиттері белсенді емес және плазмадан жылдам элиминацияланады, сондықтан қан плазмасынан елеулі мөлшерде метаболиттерін табудың сәті түспейді, бұл өзгермеген диеногестке қатысты емес. Бір рет қабылдаудан кейін жалпы клиренсі (Cl/F) 3,6 л/сағат құрайды.

Шығарылуы

Диеногестің жартылай шығарылу кезеңі 9 сағатқа жуық. Бүйрекпен шығарылған өзгеріссіз диеногест фракциясы болымсыз. Ішке 0,1 мг/кг қабылдағаннан кейін нәжіспен және несеппен шығарылуы 3,2 жуық арақатынаста болады. Ішке қабылдағанда 86 % 6 күн ішінде шығарылады, олардан 42 % алғашқы 24 сағат ішінде көбінесе несеппен шығарылады.

Тепе-тең концентрациясы

Плазмадағы ЖГБГ концентрациясы диеногест фармакокинетикасына ықпал етпейді. Плазмадағы диеногест концентрациясы 1,5 есе артады, ал тепе-тең концентрациясына 4 күн ішінде жетеді.

Фармакодинамикасы

Силует® антиандрогенді әсері бар біріктіріп ішуге арналған контрацептив (БІК) болып табылады, құрамында эстроген ретінде этинилэстрадиол және прогестерон ретінде диеногест бар. Силует® препаратының контрацептивтік әсері әртүрлі факторлармен кепілденген, олардың арасындағы ең маңыздысы овуляцияның тежелісі мен эндометрийдің өзгеруі болып табылады.

Этинилэстрадиол мен диеногест біріктірілімінің антиандрогенді әсері негізінен қан плазмасындағы андрогендер деңгейінің төмендеуіне негізделеді. Бір шағын орталықтық зерттеуде этинилэстрадиол мен диеногест біріктірілімін қабылдаудың ауырлығы жеңіл және орташа акне симптомдарының нивелирленуіне әкелді және себореясы бар емделушілерде оң нәтижеге ие болды.

Диеногест, басқа синтетикалық прогестерондармен салыстырғанда, in vitro прогестерон рецепторларына 10-30 есе ең төмен тектестікте болатын норэтистерон туындысы болып табылады. Диеногестің in vivo елеулі андрогенді, минералокортикоидты немесе глюкокортикоидты әсерлері болмайды.

Оқшау қолданғанда диеногест күніне 1 мг дозада овуляцияны тежейді.

Жоғары дозалық БІК (этинилэстрадиол мөлшері - 50 мкг) қолданылғанда эндометрий обырының және аналық бездер обырының даму қаупі төмендейді. Төмен дозалық БІК-те осы әсердің болуы қосымша растауды қажет етеді.

Қолданылуы

- ішу арқылы контрацепцияда

- гормональді контрацепцияны қажет ететін әйелдердегі орташа безеу бөртпесінде

Қолдану тәсілі және дозалары

Таблеткаларды блистер қаптамада белгіленген тәртіпте, қажет болса, аздаған сұйықтық мөлшерімен ішіп, күн сайын шамамен белгілі бір уақытта қабылдау қажет. 21 күн бойы күн сайын күніне бір таблеткадан қабылдайды. Әрбір келесі қаптаманы алдыңғысынан кейін 7 күн өткен соң қабылдай бастайды, әдетте, тоқтату қан кетуі осы 7 күн ішінде пайда болады. Ол, әдетте, кейінгі таблетканы қабылдағаннан кейін 2-3 күні басталып, келесі қаптаманы қабылдаудың басталуына қарай аяқталмауы мүмкін.

Силует® препаратын қабылдауды қалай бастау керек

Егер гормональді контрацепция бұрын (1 ай ішінде) қолданылмаған жағдайда: Силует® препаратын қабылдауды етеккір оралымының 1 күні (соның ішінде, етеккірдің алғашқы күні) бастау қажет.

Басқа біріктірілген гормональді контрацептивтен (біріктіріп ішуге арналған контрацептивтен (БІК), контрацептивтік қынаптық сақинадан немесе трансдермальді бұласырдан) ауысқан жағдайда:

Силует® препаратын қабылдаудағы әдеттегі үзілістен кейінгі келесі күні немесе алдыңғы БІК-тен белсенді таблетка қабылдаған соңғы күннен кейінгі келесі күні, алайда, таблеткалар қабылдаудағы әдеттегі үзілістен кейінгі немесе алдыңғы БІК қаптамасынан плацебо-таблеткалар қабылдау кезеңінен кейінгі келесі күннен кешіктірмей бастаған дұрыс. Контрацептивтік қынаптық сақинадан немесе трансдермальді бұласырдан ауысқанда әйел Силует® препаратын пайдалануды, дұрысы, олар алып тасталған күні, бірақ осы дәрілерді қайта пайдалану қажет болуы мүмкін күннен кешіктірмей бастау керек.

Прогестерон әдісінен ауысқан жағдайда (құрамында тек прогестерон бар таблеткалар, инъекциялық түр, имплантаттар, инъекциялық имплантаттар, прогестерон бөліп шығаратын жатырішілік жүйе):

Құрамында тек прогестерон бар таблеткалар қабылдаудан кез келген күні көшуге болады; имплантаттар немесе прогестерон бөліп шығаратын жатырішілік жүйеден ауысу имплантат алып тасталған күні атқарылады; инъекциялық түрінен ауысқанда келесі инъекция жасалуға тиіс күннен, бірақ бұл жағдайларда препарат пайдаланылған алғашқы 7 күн ішінде контрацепциялық бөгеу әдісін қосымша пайдалану ұсынылады.

Жүктіліктің бірінші триместріндегі аборттан кейін:

Қабылдауды кідіріссіз бастауға болады; бұл жағдайда контрацепцияның қосымша дәрілерін пайдалану қажеттілігі жоқ.

Босанудан немесе жүктіліктің екінші триместріндегі аборттан соң:

Силует® қабылдау босанудан соң немесе жүктіліктің екінші триместріндегі аборттан кейінгі 21-28 күні басталуы тиіс. Егер препарат қабылдау кешірек басталса, әйелге алғашқы 7 күн ішінде қосымша бөгеу әдістерін пайдалану қажет екенін ескерту керек. Алайда, егер жыныстық қатынас болып үлгерсе, БІК қабылдауды бастар алдында жүктіліктің бар-жоғын анықтау немесе етеккірдің басталуын күту қажет.

Өткізіп алған таблеткаларды қабылдау:

Егер препарат қабылдаудағы кешігу 12 сағаттан аз болса, контрацептивтік қорғаныс төмендемейді. Әйел таблетканы мүмкіндігінше тезірек қабылдауы тиіс, келесі таблетка әдеттегі уақытта қабылданады.

Егер таблетка қабылдаудағы кешігу 12 сағаттан көп болса, контрацептивтік қорғаныс төмендеуі мүмкін. Осы орайда, мынадай екі негізгі ережені жетекшілікке алуға болады:

- препарат қабылдау ешқашан 7 күннен көп үзіліп қалмауы тиіс;

- гипоталамды-гипофизарлы-аналық бездер реттелісінің талапқа сай бәсеңдеуіне жету үшін препаратты үздіксіз 7 күн қабылдау қажет.

Осыған сәйкес мынадай кеңестер беруге болады:

Алғашқы апта

Әйел өткізіп алған соңғы таблеткасын, тіпті егер бұл екі таблетканы бір мезгілде қабылдауға тура келсе де, мүмкіндігінше тезірек қабылдауы тиіс. Келесі таблетка әдеттегі уақытта қабылданады. Келесі 7 күн бойы контрацепциялық бөгеу әдісі (мысалы, мүшеқап) қосымша пайдаланылуы тиіс. Егер жыныстық қатынас таблетканы өткізіп алу алдындағы аптаның ішінде орын алса, жүкті болып қалу ықтималдығын ескеру қажет. Қанша көп таблетка өткізіп алынса, әрі бұл өткізіп алу препарат қабылдаудағы 7 күндік үзіліске қаншалықты жақын болса, жүкті болып қалу қаупі соншалықты жоғары.

Екінші апта

Әйел өткізіп алған таблетканы, тіпті егер бұл екі таблетканы бір мезгілде қабылдауға тура келсе де, мүмкіндігінше тезірек қабылдауы тиіс. Келесі таблетка әдеттегі уақытта қабылданады. Егер әйел препаратты өткізіп алғанша 7 күн бойы таблеткаларды дұрыс қабылдаса, контрацепцияның қосымша дәрілері қажет емес. Алайда, егер ол бір таблеткадан да көп қабылдауды өткізіп алса, 7 күн бойы контрацепцияның қосымша әдістерін пайдалану керек.

Үшінші апта

Алда тұрған қабылдаудағы 7 күндік үзіліс салдарынан сенімділігінің төмендеу қаупі кепілді. Алайда, таблеткалар қабылдауды түзеткенде контрацептивтік қорғаныстың әлсіреуіне жол бермеуге болады.

Ұсынылған екі тәсілдің бірі қадағаланғанда, егер әйел препаратты өткізіп алуға дейін 7 күн бойы таблеткаларды дұрыс қабылдаса, контрацепцияның қосымша әдістерін пайдалану қажет емес. Басқаша жағдайда, ол осы екі тәсілдің біріншісіне сүйеніп, сондай-ақ соңғы 7 күн бойы контрацепцияның қосымша әдістерін пайдалануы тиіс.

Әйел өткізіп алған соңғы таблеткасын, тіпті егер бұл екі таблетканы бір мезгілде қабылдауға тура келсе де, мүмкіндігінше тезірек қабылдауы тиіс. Келесі таблетка әдеттегі уақытта қабылданады. Препаратты келесі блистер қаптамадан қабылдау алдыңғысынан препарат қабылдап біткен бойда бірден басталуы тиіс, яғни қабылдаулар арасында әдеттегі үзіліс болмауы тиіс. Бәрінен ықтималдысы, екінші қаптамадағы таблеткалар біткенше тоқтату қан кетуі болмайды, бірақ таблеткалар қабылдаған күндері жағынды қанды бөліністерді немесе жатырдан құйылған қан кетуді байқауға болады.

Бұдан басқа, ағымдағы блистер қаптамадан таблеткалар қабылдауды тоқтатуға болады. Артынша, таблеткаларды өткізіп алған күндерді қоса, таблеткалар қабылдауда 7 күндік үзіліс болуы тиіс, артынша жаңа қаптамадан таблеткалар қабылдауды бастау қажет.

Егер әйел таблеткалар қабылдауды өткізіп алса, ал артынан өзінде препарат қабылдау арасындағы алғашқы қалыпты аралықта тоқтату қан кетуі болмаса, жүктіліктің бар-жоғын анықтау қажет.

Асқазан-ішек бұзылыстарында

Егер әйелде таблетка қабылдаудан кейін 3-4 сағат шегінде құсу немесе ауыр диарея болса, сіңуі толық болмауы мүмкін, әрі контрацепцияның қосымша шараларын қабылдауы тиіс. Бұл жағдайларда келесі (бұрын қабылданғанының орнына) таблетканы мүмкіндігінше тезірек қабылдау керек. Бұл таблетка, мүмкіндігінше, әдеттегі қабылдау уақытынан кейін 12 сағат ішінде қабылдануы тиіс. Егер 12 сағаттан көп уақыт өтсе, таблеткаларды өткізіп алу кезіндегі нұсқауларды қадағалау керек. Егер әйел таблеткалар қабылдаудың қалыпты режимін өзгерткісі келмесе, ол басқа блистер қаптамадан қосымша таблетканы пайдалануы тиіс.

Тоқтатудан болатын қан кетуді қалай шегеруге болады

Етеккірдің басталуын кейінге шегеру үшін әйел жаңа қаптамадан Силует® препаратын қабылдауды, алдыңғысынан барлық таблеткалар қабылданып біткеннен кейін бірден қабылдаудағы үзіліссіз жалғастыруы тиіс. Жаңа қаптамадан препарат қабылдау аясында әйелде жағынды бөліністер немесе жатырдан құйылған қан кетулер білінуі мүмкін. Жаңа қорапшадан Силует® препаратын қабылдауды әдеттегі 7 күндік үзілістен соң жаңғыртқан жөн.

Етеккір басталатын күнді аптаның келесі күніне ауыстыру үшін, әйелге таблеткалар қабылдаудағы жуық үзілісті ол қанша қаласа, сонша күнге қысқартуды ұсынуға болады. Аралық қанша қысқа болса, тоқтату қан кетуінің болмау қаупі сонша жоғары, ал әріқарай, келесі қаптамадан таблеткалар қабылдау кезінде жағынды бөліністер және құйылған қан кетулер (әйел етеккірдің басталуын кейінге шегергісі келетін жағдайдағы сияқты) пайда болады.

Жағымсыз әсерлері

Жиі (≥1/100-ден <1/10 дейін)

- бас ауыру

- іштің ауыруы

- сүт бездерінің ауыруы, сүт бездеріндегі ауырсыну

Жиі емес (≥1/1000-нан <1/100 дейін)

- тәбеттің артуы

- көңіл-күйдің өзгеруі (депрессияны қоса), бас сақинасы, қатты қозу

- артериялық қысымның көтерілуі және төмендеуі, көктамырлардың варикозды кеңеюі

- жүрек айну, құсу

- акне, акне пішінді дерматит, экзантема, терінің аллергиялық реакциялары, хлоазма, алопеция

- вагинит, қынаптық кандидоз

- несеп шығару жолдарының жұқпалары

- жүйесіз қан кетулер, дисменорея, сүт бездерінің үлкеюі, аналық бездер кисталары, диспареуния, қынаптық секрет өзгерістері

- қатты шаршау/жайсыздану, денеге салмақ қосу, ісінулер

Сирек (≥1/10000-нан <1/1000 дейін)

- аллергиялық реакциялар

- тәбеттің төмендеуі, анорексия

- либидо өзгерісі, озбырлық, апатия, психикалық бұзылулар, ұйқысыздық, ұйқының бұзылуы

- көрудің нашарлауы, конъюнктивит, көздің құрғауы, көздің тітіркенуі, осциллопсия, жанаспалы линзалардың жақпаушылығы

- естудің нашарлауы, кенеттен естімей қалу, тинниттер, вертиго

- тахикардия, кардиоваскулярлық бұзылулар

- тромбофлебит, тромбоз/өкпе артериясының тромбоэмболиясы, гематома, ми қан айналымының бұзылуы, ишемиялық инсульт, дистония, ортостатикалық айналымдық дисрегуляция, ысынып кету

- көктамырлардың варикозды кеңеюі, көктамырлардағы өзгерістер, көктамырлардың ауыруы

- синусит, бронх демікпесі, бронхит

- диарея

- гипергидроз, мультиформалы эритема, терінің қышынуы, гипертрихоз, вирилизм

- гипоменорея, мастит, фиброз-кистозды мастопатия, сүт бездерінде секреттің пайда болуы, лейомиома, эндометрит, сальпингит, цервикальді дисплазия

- ауыздың шырышты қабығының ұшығы

- тұмау тәрізді симптомдар

- анемия

- арқаның ауыруы, бұлшықет-қаңқа жайсыздануы, миалгиялар, аяқ-қолдың ауыруы

БІК қолданатын әйелдерде мынадай күрделі жағымсыз құбылыстар болуы мүмкін:

- көктамырлық тромбоэмболиялық бұзылулар

- артериялық тромбоэмболиялық бұзылулар

- бауыр ісіктері

- гипертриглицеридемия

- глюкозаға төзімділіктің бұзылуы немесе шеткергі инсулинге төзімділік әсерлері

- БІК қабылдаумен байланысы дәлелденбеген жай-күйлердің болуы немесе өршуі: Крон ауруы, ойық жаралы колит, порфирия, жүйелі қызыл жегі, жүктілер герпесі, Сиденгам хореясы, гемолитика-уремиялық синдром, холестаздық сарғаю

- хлоазма

Қолдануға болмайтын жағдайлар

- препарат компоненттеріне жоғары сезімталдық

- қазіргі уақыттағы немесе сыртартқыдағы көктамыр тромбоздары (терең көктамырлар тромбозы, өкпе артериясының тромбоэмболиясы)

- қазіргі уақыттағы немесе сыртартқыдағы артериялық тромбоздар (мысалы, миокард инфарктісі) немесе соның алдындағы жай-күйлер (мысалы, стенокардия немесе транзиторлы ишемиялық шабуылдар)

- артериялық тромбоздың ауыр немесе көптеген қауіп факторларының болуы (тамыр асқынуларымен қант диабеті, ауыр артериялық гипертензия, ауыр дислипопротеинемия)

- көктамырлық немесе артериялық тромбоздарға туа біткен немесе жүре пайда болған бейімділік, мысалы, белсенділенген С протеиніне төзімділік, антитромбин III жеткіліксіздігі, С протеині жеткіліксіздігі, S протеині жеткіліксіздігі, гипергомоцистеинемия және фосфолипидтерге антиденелердің болуы (кардиолипинге антиденелер, жегілік антикоагулянт)

- көктамырлық немесе артериялық тромбоздарды дамытатын күрделі немесе көптеген қауіп факторлары

- қазіргі уақытта немесе сыртартқыда функционалдық «бауыр» тестілері қалыпты мәндерге оралмаған жағдайда бауырдың ауыр ауруларының болуы, бауыр ісіктерінің (қатерсіз немесе қатерлі) болуы

- белгілі немесе күдік тудыратын гормонға тәуелді қатерлі аурулар (мысалы, жыныс ағзаларының немесе сүт безінің)

- шығу тегі түсініксіз қынаптан қан кету

- жүктілік және лактация кезеңі

- сыртартқыда ошақтық неврологиялық симптоматикамен бас сақинасының болуы

- тұқым қуалайтын фруктозаны көтере алмаушылық, Lapp-лактаза ферментінің тапшылығы, глюкоза – галактоза мальабсорбциясы

Дәрілермен өзара әрекеттесуі

Ішуге арналған контрацептивтер мен басқа дәрілік препараттар арасындағы микросомалық ферменттер индукциясымен байланысты өзара әрекеттесулер құйылған қан кетулерге және/немесе контрацепция тиімділігінің төмендеуіне әкелуі мүмкін. Бұл әсерлер гидантоин, фенобарбитал, примидон, карбамазепин және рифампицинге тән көрсетілген. Осындай әсерлер, сонымен бірге, рифабутин, эфавиренз, невирапин, оксикарбазепин, топирамат, фелбамат, ритонавир, гризеофульвин және Шілтерленген шайқурай (Hypericum perforatum) өсімдік дәрілік затына тән бола алады. Осы өзара әрекеттесулер механизмі аталған препараттардың бауырдың микросомалық ферменттерін индукциялау қабілетіне негізделген.

Клиникалық бақылаулар деректері бойынша кейбір антибиотиктермен (ампициллин және тетрациклин сияқты) бір мезгілде тағайындау контрацепция тиімділігінің төмендеуіне әкелуі мүмкін, бұл құбылыстың себебі белгісіз.

Жоғарыда аталған дәрілік препараттар қабылдайтын әйелдер ұзаққа созылмайтын уақыт кезеңінде (аптаға дейін), мысалы, қабылдау кезеңінің ішінде жоғарыда аталған дәрілік препараттардың біреуін және оларды тоқтатқаннан кейін 7 күн БІК қабылдаумен қосымша контрацепциялық бөгеу әдістерін уақытша пайдалануы тиіс.

Рифампицин қабылдайтын әйелдер рифампицин қабылдау кезеңінде және оны тоқтатқаннан кейін 28 күн контрацепциялық бөгеу әдістерін пайдалануы тиіс. Егер қатарлас препарат қабылдау осы қаптамадан таблеткалар қабылдаудың соңына тура келсе, келесі қаптамадан қабылдауды әдеттегі үзіліссіз бірден бастау керек.

Бауыр ферменттерін индукциялауға қабілетті қатарлас препаратты ұзақ уақыт қолданғанда, дәрігер контрацептивтік стероидтар дозаларын арттыру қажеттілігін қарастыра алады. Егер осы ұстаным жағымсыз құбылыстардың (мысалы, жүйесіз қан кетулердің) пайда болуына немесе тиімділігінің төмендеуіне әкелетін болса, контрацепцияның басқа әдісін пайдалану қажет.

Ішуге арналған контрацептивтер кейбір дәрілік препараттардың метаболизмін бұзуы мүмкін. Сондықтан, бұл препараттардың плазмадағы және тіндердегі концентрациясы жоғарылаған да (мысалы, циклоспорин), төмендеген де (ламотриджин) болуы мүмкін.

Зертханалық зерттеулер

Контрацептивтік стероидтар қолдану бауыр функциясының, қалқанша бездің, бүйрек үсті бездері мен бүйректің биохимиялық көрсеткіштерін қоса, кейбір зертханалық зерттеулердің нәтижелеріне, сондай-ақ плазмадағы тасымалдаушы ақуыздар, мысалы, кортикостероид – байланыстырушы глобулин деңгейіне және липидтер/липопротеиндер фракцияларына, көмірсу алмасу параметрлеріне, сондай-ақ коагуляция мен фибринолизге ықпал етуі мүмкін. Өзгерістер, әдетте, қалыпты мәндер шегінде қалады.

Айрықша нұсқаулар

Егер төменде көрсетілген қандай да бір жай-күйлер/қауіп факторлары қазіргі уақытта бар болса, әрбір нақты жағдайда емдеудің зор қатері мен күтілетін пайдасын тиянақты таразылап, оны әйелмен ол БІК қабылдай бастауды шешкенше талқылап алу керек. Осы жай-күйлердің немесе қауіп факторларының кез келгені өршіген, асқынған немесе алғаш білінген жағдайда әйел БІК тоқтату шешімін қабылдай алатын өз дәрігерімен кеңесуі тиіс.

Айналымдық бұзылулар

Тромбоэмболиямен байланысты ауыр жай-күйлер болуы мүмкін екеніне байланысты, қауіп факторларының (көктамырлардың варикозды кеңеюі, кешеуілді сатыдағы тромбофлебит және тромбоз, жүрек аурулары, едәуір шамадан тыс салмақ, қан ұюдың бұзылуы сияқты) болуы БІК қабылдауды бастар алдында аса мұқият тексеруді талап етеді.

Біріктіріп ішуге арналған контрацептивтер қолдану, БІК қабылдамайтын тұлғалармен салыстырғанда, көктамырлық тромбоэмболия (КТЭ) қаупінің жоғарылауына алып келеді. Ең жоғары КТЭ қаупі біріктіріп ішуге арналған контрацептив қолданған бірінші жылы болады. БІК-пен байланысты КТЭ қаупі жүктілікпен байланысты қауіптен азырақ, ол 100000 жүктілікке 60 жағдайдан келеді. КТЭ 1-2% жағдайда өліммен аяқталады.

Құрамына 30 мкг этинилэстрадиол кіретін левоноргестрелі бар БІК қабылдаумен байланысты КТЭ қаупі жылына 100000 әйелге шамамен 20 жағдайдан келеді.

Клиникалық зерттеулер, шолулар және постмаркетингтік зерттеулер диеногест пен этинилэстрадиол біріктірілімін қолданғанда, құрамында левоноргестрел бар БІК-пен салыстырғанда, қауіптің аса жоғары екенін көрсетті.

Контрацептивтер қолданатын әйелдерде басқа қан тамырларының, мысалы, бауыр тамырларының, мезентериальді, бүйрек тамырларының, ми немесе көз торқабығы көктамырлары мен артерияларының аса сирек дамуының тіркелгені хабарланған. Осы құбылыстардың гормональді контрацептивтер қабылдаумен байланысына қатысты ортақ пікір жоқ.

Артериялық немесе көктамырлық тромбоздық немесе тромбоэмболиялық асқынулар симптомдары мыналарды қамтуы мүмкін:

- аяқтың әдеттен тыс біржақты ауыруы және/немесе ісінуі

- сол жақ қолға иррадиациялануы мүмкін кеуденің кенеттен қатты ауыруы

- кенеттен ентігу

- күрт жөтел ұстамасы

- кез келген әдеттен тыс, қатты және ұзаққа созылатын бас ауыру

- кенеттен жартылай немесе толық көрмей қалу

- диплопия

- түсініксіз сөйлеу немесе афазия

- бас айналу

- парциальді эпилепсиялық ұстамамен қатар жүретін немесе онсыз естен тану жағдайы

- кенеттен әлсіреу немесе дененің бір жағының немесе бір бөлігінің едәуір ұюы

- қозғалыс бұзылулары

- «іштеспе»

Көктамырлық тромбоэмболиялық асқынулар қаупі артады:

- жас ұлғаюымен

- отбасылық сыртартқы болғанда (жақын туыстарының немесе ата-анасының салыстырмалы жас уақытында бір кездері орын алған көктамырлық тромбоэмболия); егер тұқым қуалайтын бейімділігі бар болса, әйелді БІК пайдалану шешімін қабылдау үшін маманға жолдау қажет)

- ұзаққа созылатын иммобилизацияда, күрделі хирургиялық араласудан, аяққа жасалатын кез келген хирургиялық араласудан кейін немесе күрделі жарақаттан соң. Бұл жағдайларда таблеткалар қабылдауды тоқтатып (жоспарлы операциялар кезінде кем дегенде төрт апта бұрын), қозғалыс белсенділігі толық қалпына келгеннен кейін екі апта өткенше оларды қабылдауды жаңғыртпаған дұрыс. Егер препарат мерзімінен бұрын тоқтатылмаса, тромбозға қарсы ем тағайындау керек

- семіздікте (дене салмағы индексі 30 кг/м² көп)

Көктамыр тромбозының пайда болуы мен дамуындағы көктамырлардың варикозды кеңеюінің немесе беткейлік көктамырлар тромбофлебитінің рөліне қатысты ортақ пікір жоқ.

БІК қолданатын әйелдерде артериялық тромбоэмболиялық асқынулар қаупі немесе инсульттің даму қаупі артады:

- жас ұлғаюымен

- дислипопротеинемия болғанда

- артериялық гипертензия болғанда

- бас сақинасы болғанда

- семіздікте (дене салмағы индексі 30 кг/м² көп)

- отбасылық сыртартқы ауырлап кеткенде (ағалары, апаларының немесе ата-анасының салыстырмалы жас кездеріндегі артериялық тромбоэмболия). Егер тұқым қуалайтын бейімділігі орын алса, әйелге БІК қолдану мүмкіндігіне қатысты маманмен кеңесу керек:

- жүрек клапандарының ақауында

- жүрекшелер фибрилляциясында

- темекі тартқанда (шылымқорларда БІК миокард инфарктісі, инсульт сияқты ауыр жүрек-қантамырлық асқынулардың пайда болу қаупін арттырады, қауіп жас ұлғаюымен және тартылған темекілер санымен арта түседі).

Егер олар БІК қолдануды көздесе, 35 жастан асқан әйелдерге табанды түрде темекі тартпауға кеңес беріледі. Егер әйел шылым шегуді тастай алмаса, әсіресе, басқа қауіп факторлары болғанда контрацепцияның басқа әдісін пайдалану керек.

Көктамырлық немесе артериялық ауруларды дамытатын бір ауыр немесе бірнеше қауіп факторларының болуы, тиісінше, қарсы көрсетілімді болуы да мүмкін.

Сонымен қатар, антикоагулянттық ем қолдану мүмкіндігін қарастыру қажет. Тромбоз симптомдарының барына күдік туындаған жағдайда БІК қолданатын әйелдердің назарын дәрігермен кеңесу қажеттілігіне аудару керек. Тромбоз күдік тудырған немесе расталған жағдайда БІК қабылдау тоқтатылуы тиіс, осы орайда әйелдерге контрацепцияның сай келетін басқа әдістерін пайдалану қажет. Босанудан кейінгі кезеңде тромбоэмболия туындайтын жоғары қауіп болатынына көңіл бөлу қажет.

Жайсыз жағымсыз тамырлық реакциялармен байланысты басқа жай-күйлер қант диабетін, жүйелі қызыл жегіні, гемолитика-уремиялық синдром мен ішектің созылмалы қабыну ауруын (Крон ауруы немесе ойық жаралы колит) қамтиды.

БІК қабылдау кезінде бас сақинасы ұстамаларының жиілігі мен ауырлық дәрежесінің артуы (бұл ми қан айналымы бұзылуының хабаршысы болуы мүмкін) БІК қабылдауды дереу тоқтатуға себеп бола алады.

Көктамырлық немесе артериялық тромбоздарға туа біткен немесе жүре пайда болған бейімділікті көрсетуі мүмкін биохимиялық факторларға: белсенділенген С протеиніне төзімділік, гипергомоцистеинемия, антитромбин III жеткіліксіздігі, С протеин жеткіліксіздігі, S протеин жеткіліксіздігі, фосфолипидтерге антиденелердің болуы (кардиолипинге антиденелер, жегілік антикоагулянт) жатады.

Ісіктер

Кейбір фармако-эпидемиологиялық зерттеулерде БІК ұзақ уақыт (5 жылдан астам) қолданылғанда жатыр мойны обырының жоғары даму қаупі хабарланды. Алайда, осы жағдайлардың жыныстық мінез-құлық ерекшеліктерімен және басқа да факторлармен, мысалы, адам папилломасы вирусымен (АПВ) қандай дәрежеде байланысты екеніне қатысты қайшылықтар сақталуда.

54 фармако-эпидемиологиялық зерттеулердің мета-талдауында зерттелген тұста БІК пайдаланатын әйелдерде диагностикаланған сүт безі обырының салыстырмалы даму қаупінің (RR=1,24) болымсыз жоғарылауы болатыны көріністелді. Сүт безінің обыры гормонға тәуелді ісік болып табылады. Сүт безі обырын дамытатын ерте менархе, кешеуілді менопауза (52 жастан кешірек), босанудың болмауы, ановуляторлық циклдардың болуы және т.б. сияқты қауіп факторлары осы аурудың дамуындағы гормондардың рөлін көрсетеді. БІК қабылдайтын әйелдерде сүт безі обырының пайда болу жиілігі өте мардымсыз артады. Сүт безінің обыры 40 жасқа толмаған әйелдерде сирек пайда болатындықтан, бұл басымдық сүт безі обырының жалпы даму қаупіне қатысты өте аз. Гормондарға рецепторлар сүт безі обырының жасушалық биологиясында шешуші рөл атқарады, эстрогендер өсу факторларын (мысалы, TGF-альфа) күшейтуге қабілетті. Эстрогендер мен прогестагендер сүт безіндегі обыр жасушаларының өсуіне ықпал етеді. Басқаларының арасында бұл биологиялық байланыстар менапаузадан кейінгі кезеңдегі рецептор-позитивті сүт безінің обырын емдеуге фармакологиялық негіз болып табылады.

Эпидемиологиялық зерттеулер жас кездегі ұзақ уақыт БІК қабылдау мен орта жастағы сүт безі обырының дамуы арасындағы cебептік байланыс болуы мүмкін екенін көрсетті. Алайда, БІК қолдану көп қауіп факторларының біреуі ғана болып табылады. Қауіптің жоғарылауы БІК тоқтатылған соң 10 жыл бойы біртіндеп төмендейді.

БІК қолдану аясында сирек жағдайларда бауырдың қатерсіз, ал одан да сирек жағдайларда қатерлі ісіктерінің дамуы байқалды. Жекелеген жағдайларда бұл ісіктер өмірге қатер төндіретін құрсақішілік қан кетулерге алып келді. БІК қабылдайтын әйелдерде іштің жоғарғы бөлігінде қатты ауырулар, бауырдың ұлғаюы болғанда және құрсақішілік қан кету белгілерінде бауыр ісігінің бар-жоғын анықтау керек.

Басқа жай-күйлер

Гипертриглицеридемиясы немесе отбасылық сыртартқыдағы гипертриглицеридемиясы бар әйелдерде БІК қолданғанда панкреатиттің даму қаупінің жоғарылауы болады.

БІК қабылдайтын көп әйелдерде артериялық қысымның (АҚ) аздап жоғарылауы сипатталса да, клиникалық мәнді АҚ көтерілуі сирек білінген. Осы сирек жағдайларда ғана препарат қабылдауды дереу тоқтату ақталған. Соның өзінде, егер бұрын артериялық гипертензиясы (сыртартқыдағы) орын алған әйелдерде БІК қабылдау кезінде АҚ тұрақты жоғарыласа немесе гипотензиялық емге жауап бермейтін айқын АҚ көтерілуі байқалса, БІК қабылдау тоқтатылуы тиіс. Мүмкіндігінше, егер гипотензиялық ем көмегімен қалыпты АҚ мәндеріне жеткізілсе, қабылдауды жалғастыруға болады.

Жүктілік кезінде де, БІК қабылдау кезінде де мынадай жай-күйлер дамиды немесе өршиді, бірақ олардың БІК қабылдаумен байланысы дәлелденбеген: холестазбен байланысты сарғаю және/немесе қышыну; өт қабында тастардың түзілуі; порфирия; жүйелі қызыл жегі; гемолитикалық-уремиялық синдром; Сиденгам хореясы; жүктілер герпесі; отосклерозбен байланысты естімей қалу.

Бауыр функциясының жедел немесе созылмалы бұзылуларында бауыр функциясының көрсеткіштері қалпына келгенше БІК қабылдауды тоқтату қажет болуы мүмкін. Жүктілік немесе жыныс стероидтарын алдыңғы қабылдау кезінде алғаш дамитын қайталанатын холестаздық сарғаю БІК қабылдауды тоқтатуды талап етеді.

БІК тіндердің инсулинге төзімділігіне және глюкозаға төзімділікке ықпалын тигізуі мүмкін болса да, әдетте, БІК қолданатын қант диабетімен науқастарда емдеу сызбасын түзету қажет емес. Соның өзінде, қант диабеті бар әйелдер БІК қабылдау кезінде дәрігердің мұқият қадағалауында болуы тиіс.

БІК қолдану кезінде Крон ауруы мен ойық жаралы колит ағымының өршуі білінген.

Мезгіл-мезгіл, әсіресе, сыртартқысында жүктілер хлоазмасы бар әйелдерде хлоазма пайда болуы мүмкін. БІК қабылдау кезінде хлоазмаға бейімділігі бар әйелдер күн астында ұзақ уақыт болудан және УК сәулеленуден аулақ болуы тиіс.

Медициналық тексеру/кеңес

Силует® препаратын, үлбірлі қабықпен қапталған таблеткалар қабылдауды бастау немесе жаңғырту алдында сыртартқы жинау (отбасылық сыртартқыны қоса) қажет, сондай-ақ жүктіліктің бар-жоғын анықтау қажет. Қарсы көрсетілімдер мен сақтандыруларды ескере отырып, артериялық қысымды өлшеу және жалпы тексеруден өту керек. Әйелге қолданылуы жөніндегі нұсқаулықты ұқыпты зерттеу, оның ұсынымдарын орындау қажеттілігін түсіндіру керек. Тексерулер жиілігі мен сипаты белгіленген нұсқауларға негізделіп, әркімге жеке таңдалуы тиіс.

Әйелге ішуге арналған контрацептивтердің АИВ жұқпасын (ЖИТС) немесе жыныс жолымен берілетін кез келген басқа ауруды жұқтырудан қорғамайтынын ескерткен жөн.

Тиімділігінің төмендеуі

БІК тиімділігінің төмендеуі таблеткалар қабылдауды өткізіп алған жағдайда, асқазан-ішек бұзылыстарында немесе қатарлас ем қабылдау кезінде болады.

Айналымдық бақылаудың төмендеуі

Кез келген БІК қолданылғанда, әсіресе, БІК қолданудың алғашқы айларында әдеттен тыс қан кету (жағынды қанды бөліністер немесе жатырдан құйылған қан кетулер) пайда болуы мүмкін. Осылайша, атипиялық қан кетулерді бағалау үш циклға тең дағдылану кезеңі өткен соң ғана жүргізіледі.

Егер жүйесіз қан кетулер тұрақты байқалса немесе алдыңғы қалыпты жүйелі циклдардан кейін білінсе, осы құбылыстардың гормональді емес себептерін қарастырып, қатерлі жаңа түзілімдер мен жүктіліктің бар-жоғын анықтау үшін диагностикалық шаралар атқарылу керек. Оларда диагностикалық қырнау қамтылуы мүмкін.

Кейбір әйелдерде тоқтату қан кетулері препараттарды қабылдау арасындағы үзілісте болмауы мүмкін. Егер әйел қабылдау ережелеріне сәйкес БІК қабылдаса, жүкті болып қалу ықтималдығы аз. Алайда, егер тоқтату қан кетуінің бірінші болмауына дейін БІК осы ережелерге сәйкес қабылданбаса немесе егер тоқтату қан кетуін екі рет өткізіп алу орын алса, БІК қабылдауды жалғастырмас бұрын жүктіліктің бар-жоғын анықтау керек.

Жыныс стероидтарының клиренсін күшейтетін препараттардың өзара әрекеттесулері жатырдан құйылып қан кетуге және контрацепция тиімділігінің төмендеуіне әкелуі мүмкін..

Құрамында шайқурай (Hypericum perforatum) бар шөптер негізіндегі медициналық препараттар олардың қан плазмасындағы препарат концентрациясын азайтуға және диеногест пен этинилэстрадиол біріктірілімінің тиімділігін төмендетуге қабілеттілігі себепті Силует® препаратымен бір мезгілде қолданылмауы тиіс.

Аталған препараттың әр таблеткасының құрамында 47.66 мг лактоза моногидраты бар. Сирек тұқым қуалайтын галактозаны көтере алмаушылығы, Лапп лактазалық жеткіліксіздігі немесе глюкоза-галактоза мальабсорбциясы бар, лактоза алып тасталған емдәм ұстанатын емделушілер осы лактоза мөлшерін есептеуі тиіс.

Жүктілік және лактация кезеңі

Егер Силует® препаратын қабылдау кезінде жүктілік басталса, препарат қолдану дереу тоқтатылуы тиіс. Ауқымды эпидемиологиялық зерттеулер жүктілікке дейін аналары БІК қабылдаған балаларда туа біткен аномалиялар қаупінің жоғарыламайтынын да, жүктілік кезінде БІК алдын ала көздеусіз қабылданғанда тератогенді әсерінің болмайтынын да көрсетті. Мұндай зерттеулерде Силует® препараты қамтылмаған. Силует® препаратының жүктілікке, ұрықтың және жаңа туған нәрестенің денсаулығына теріс әсер етуі туралы қорытындылар жасау үшін жүктілік кезінде Силует® препаратын қолдануға қатысты қолда бар ақпарат тым шектеулі. Қазіргі уақытта ондай ақпарат жоқ.

БІК лактацияға ықпал ете алады, өйткені олар емшек сүтінің мөлшерін азайтып, құрамын өзгертуі мүмкін. БІК қолдану кезінде контрацептивтік стероидтардың және/немесе олардың метаболиттерінің аздаған мөлшері емшек сүтімен бөлінуі мүмкін. Бұл мөлшерлер сәбиге әсерін тигізуі мүмкін. Осылайша, емшекпен қоректендіру кезінде Силует® препаратын қолдану көрсетілмеген.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Силует® көлік құралдарын басқару және механизмдермен жұмыс істеу қабілетіне ықпалын тигізбейді.

Артық дозалануы

Симптомдары: жүрек айну, құсу, жас қыздардағы болымсыз қынаптық қан кету.

Емі: симптоматикалық.

Шығарылу түрі және қаптамасы

21 таблеткадан ПВХ/ПЭ/ПВДХ үлбірінен және алюминий фольгадан жасалған пішінді ұяшықты қаптамада.

1 немесе 3 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен және картон футлярмен бірге картон қорапшаға салынады.

Сақтау шарттары

Түпнұсқалық қаптамасында, жарықтан қорғалған жерде, 15 0С-ден 25 0С-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды

Дәріханалардан босатылу шарттары

Рецепт арқылы

Өндіруші ұйымның атауы және елі

«Гедеон Рихтер» ААҚ, Венгрия

1103 Будапешт, Дёмрёи к-сі, 19-21, Венгрия

Тіркеу куәлігі иесінің атауы және елі

«Гедеон Рихтер» ААҚ, Венгрия

Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы

«Гедеон Рихтер» ААҚ ҚР өкілдігі

E-mail: info@richter.kz

Телефон: 8-(727)-258-26-22, 8-(727)-258-26-23

 

 

16

 

Прикрепленные файлы

649186581477976637_ru.doc 129.5 кб
439882641477977789_kz.doc 176.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники