Ротазар Плюс
Инструкция
-
русский
-
қазақша
Саудалық атауы
Ротазар Плюс
Халықаралық патенттелмеген атауы
Жоқ
Дәрілік түрі
Үлбірлі қабықпен қапталған 150 мг/12,5 мг таблеткалар
Құрамы
Бір таблетка құрамында
белсенді заттар: 150 мг ирбесартан, 12,5 мг гидрохлоротиазид,
қосымша заттар: лактоза моногидраты, микрокристалды целлюлоза, ішінара желатинденген жүгері крахмалы 1500, натрий кроскармеллозасы, сусыз коллоидты кремнийдің қостотығы, магний стеараты, тазартылған су,
қабық құрамы: Опадри II қызғылт 85F240091 (поливинил спирті, титанның қостотығы (Е171), полиэтиленгликоль/макрогол, тальк, темірдің қызыл тотығы (Е172)).
Сипаттамасы
Сопақша пішінді, екі беті дөңес, қызғылт түсті үлбірлі қабықпен қапталған таблеткалар
Фармакотерапиялық тобы
Ренин-ангиотензин жүйесіне әсер ететін препараттар. Диуретиктермен біріктірілген ангиотензин II антагонистері. Диуретиктермен біріктірілген ирбесартан.
АТХ коды С09DА04
Фармакологиялық қасиеттері
Фармакокинетикасы
Сіңуі
Ротазар Плюсті ішке қабылдаудан кейін ирбесартан абсолютті биожетімділігі 60-80%, ал гидрохлоротиазидте 50-80% құрайды. ішке қабылдаудан кейін қан плазмасындағы ең жоғары концентрациясына ирбесартан 1,5-2 сағаттан соң, гидрохлоротиазид 1-2,5 сағаттан соң жетеді.
Таралуы
Ирбесартанның қан плазмасы ақуыздарымен байланысуы шамамен 96% құрайды. Ирбесартан таралу көлемі 53-93 л құрайды.
Гидрохлоротиазидтің плазма ақуыздарымен байланысуы 68%, таралу көлемі 0,83-1,14 л/кг құрайды.
Қан сарысуындағы концентрациялары ем басталған соң 3 күн ішінде тұрақты мәніне жетеді. Тәулігіне 1 рет сызба бойынша қайталап қабылдау кезінде қан плазмасында ирбесартанның шектеулі жиналуы (< 20%) байқалады.
Ирбесартанның фармакокинетикалық көрсеткіштеріне 10 мг-ден 600 мг дейінгі дозалар диапазонында дозаға желілі тәуелділікте болу тән. Гидрохлоротиазид плацентарлық бөгет арқылы өтеді, емшек сүтімен бөлінеді, гистогематикалық бөгет арқылы өтпейді.
Метаболизмі
Ирбесартан глюкурон қышқылымен конъюгациялану және тотығу арқылы бауырда метаболизденеді. Негізгі айналымдағы метаболиті - ирбесартан глюкурониді (шамамен 6%). Іn vitro зерттеулерінде ирбесартанның CYP2C9 қатысуымен тотығу арқылы метаболизденетіні айғақталады.
Гидрохлоротиазид метаболизденбейді.
Шығарылуы
Жалпы және бүйректік клиренсі, тиісінше, 157-176 мл/мин және 3,0-3,5 мл/мин құрайды. Ирбесартанның жартылай шығарылу кезеңі – 11-15 сағат.
Ирбесартан және оның метаболиттері өтпен және несеппен шығарылады. Ішке қабылдаудан немесе вена ішіне енгізуден кейін 14С-ирбесартан 20% радиобелсенділігі несептен және іздері нәжістен табылады. Өзгермеген ирбесартанның 2%-дан азы несеппен бөлінеді.
Гидрохлоротиазидтің жартылай шығарылу кезеңі 5-15 сағат шегінде ауытқиды. Гидрохлоротиазид бүйрекпен тез шығарылады. Ішке қабылданған, кем дегенде, 61% доза 24 сағат ішінде өзгеріссіз күйде шығарылады.
Ерекше клиникалық жағдайлардағы фармакокинетикасы
Қан сарысуындағы ирбесартанның бірнеше аса жоғары концентрациялары, ерлерге қарағанда, артериялық қысымы жоғары әйелдерде анықталды. Алайда, ирбесартанның жартылай шығарылу кезеңінде және жиналуында өзгешелік болмаған. Сондықтан әйелдерде ирбесартан дозасын түзету қажет емес.
Қан плазмасындағы ирбесартан ең жоғары концентрациясы мен AUC мәндері, ирбесартанның жартылай шығарылу кезеңінде елеулі айырмашылық болмайтын жасырақ (65 жасқа дейінгі) адамдарға қарағанда, егде жастағы (65 жастан асқан) пациенттерде біршама жоғары болды. Сондықтан егде жастағы пациенттерде дозаны түзету қажет емес.
Бүйрек жеткіліксіздігі бар немесе гемодиализде жүрген пациенттерде ирбесартан фармакокинетикалық параметрлері болымсыз өзгереді. Ирбесартан гемодиализ арқылы шығарылмайды. Креатинин клиренсі <20 мл/мин пациенттерде жартылай шығарылу кезеңінің 21 сағатқа дейін ұзаруы байқалған.
Бауыр функциясының жеңіл және орташа дәрежедегі бұзылулары бар пациенттерде ирбесартан фармакокинетикалық параметрлері болымсыз өзгереді. Бауыр жеткіліксіздігінің ауыр түріне шалдыққан пациенттерде зерттеулер жүргізілмеген.
Фармакодинамикасы
Құрамында ангиотензин II рецепторларының антагонисі (ирбесартан) және тиазидті диуретик (гидрохлоротиазид) бар гипертензияға қарсы біріктірілген препарат. Осы ингредиенттер біріктірілімі аддитивті гипотензиялық әсерге ие болып, әрқайсысын бөлек алуға қарағанда, артериялық қысымды едәуір жоғары дәрежеде төмендетеді.
Ішке қабылдағанда ирбесартан ангиотензин II рецепторларының қуатты іріктелген антагонисі (AT1 тип) болып табылады. Ол, ангиотензин II синтезінің көзіне немесе жолдарына қарамастан, ангиотензиндік AT1-рецепторлары арқылы жүзеге асатын физиологиялық маңызды ангиотензин II әсерлерінің бәрін бөгейді. Ангиотензиндік AT1-рецепторларына қатысты іріктелген антагонистік әсері ренин және ангиотензин II плазмалық концентрацияларының ұлғаюына және альдостерон плазмалық концентрациясының төмендеуіне әкеледі. Ибесартанмен монотерапияда ұсынылатын дозаларында электролиттік теңгерім бұзылуларына бейім емес пациенттерде калий иондарының сарысулық концентрациясы елеулі өзгермейді. Ирбесартан ангиотензин II түзілуін және брадикининнің белсенді емес метаболиттерге дейін ыдырауын жүзеге асыратын кининаза-II (ангиотензин өзгертуші фермент (АӨФ)) тежелісін туындатады.
Ирбесартан қан сарысуында несеп қышқылының концентрациясына және оның бүйрекпен бөлінуіне ықпал етпейді.
Гидрохлоротиазид тиазидті диуретик болып табылады. Тиазидті диуретиктер шамамен баламалы мөлшерлердегі натрий және хлор иондарының экскрециясын арттырып, электролиттердің бүйректе кері сіңірілу механизмдеріне ықпал етеді. Гидрохлоротиазид қан плазмасының көлемін азайтады, қан плазмасында ренин белсенділігін және альдостерон секрециясын арттырып, кейіннен несептегі калий иондары мен бикарбонаттар мөлшерін көбейтеді және қан сарысуында калий иондары мөлшерін азайтады. Жорамалды түрде, ренин-ангиотензин-альдостерон жүйесін (РААЖ) бөгеу арқылы ирбесартанды бірге қолдану қан сарысуында осы диуретик туындататын калий иондарын жоғалтуға жол бермейді. Гидрохлоротиазид ішке қабылданғанда диурездік әсері алғашқы 2 сағат ішінде басталады, диурез шамамен 4 сағаттан соң жоғары шегіне жетеді және 6-12 сағатқа жуық сақталады.
Емдік дозалар диапазонында гидрохлоротиазид пен ирбесартан біріктірілімі дозаға тәуелді аддитивті гипотензиялық әсер көрсетеді.
Гидрохлоротиазидпен біріктірілген ирбесартанның гипотензиялық әсері препараттың бірінші дозасын қабылдаудан кейін көрініс беріп және 1-2 апта қабылдау барысында сақталып, біртіндеп күшеюге және 6-8 аптада ең жоғары әсерінің дамуына ұласады. Ротазар Плюс препаратының тиімділігі жас және жыныс ерекшеліктеріне байланысты емес.
Қолданылуы
- эссенциальді артериялық гипертензия
Қолдану тәсілі және дозалары
Ротазар Плюс тәулігіне 1 рет ас ішуге байланыссыз қабылданады.
Ротазар Плюс ирбесартанмен немесе гидрохлоротиазидпен монотерапияда артериялық қысымының бақылануы жеткіліксіз пациенттерге тағайындалады.
Гидрохлоротиазидпен (тәулігіне 12,5 мг) немесе ирбесартанмен (тәулігіне 150 мг) монотерапияда артериялық қысымы жеткіліксіз бақыланатын пациенттерге Ротазар Плюс 150 мг/12,5 мг тағайындауға болады.
Артериялық қысымы препаратпен жеткіліксіз бақыланатын пациенттерде қолдану қажет болса, біріктірілген препараттар дозаларын тәулігіне 300 мг ирбесартан мен 25 мг гидрохлоротиазидке дейін арттыруға болады: Ротазар Плюс 150 мг/12,5 мг препаратының 2 таблеткасы.
Ең жоғары тәуліктік дозасы - Ротазар Плюс 150 мг/12,5 мг препаратының 2 таблеткасы.
Ілмекті диуретиктерді қолданған дұрыс.
Бүйрек функциясы бұзылған пациенттерде (креатинин клиренсі ≥30 мл/мин) препарат дозасын түзету қажет емес.
Ауырлығы жеңіл және орташа дәрежедегі бауыр жеткіліксіздігінде (Чайлд-Пью шкаласы бойынша 5-6 және 7-9 балл) препарат дозасын азайту қажет емес.
Егде жастағы пациенттерде препарат дозасын түзету қажет емес.
Жағымсыз әсерлері
Жиі (>1/100-ден <1/10 дейін)
- қандағы мочевина азоты (ҚМА), креатинин және креатинкиназа мөлшерінің артуы, қан плазмасында калий мен натрий деңгейінің азаюы
- бас айналу
- жүрек айну, құсу
- несеп шығаруда қиналу
- шаршау
Жиі емес (>1/1 000-нан <1/100 дейін)
- ортостаздық гипотензия
- диарея
- бүйрек функциясының бұзылуы, қауіп тобында болатын пациенттерде бүйрек жеткіліксіздігінің жекелеген жағдайларын қоса
- аяқ-қол ісінуі
- гиперемия
- жыныс функциясының бұзылуы, либидо өзгеруі
Жиілігі белгісіз (қолда бар деректер негізінде бағалау мүмкін емес)
- бас ауыру
- құлақтың шыңылдауы
- жөтел
- диспепсия, дисгевзия
- артралгиялар, миалгиялар
- гиперкалиемия
- аса жоғары сезімталдық реакцияларының ангионевроздық ісінуі, бөртпе, есекжем сияқты жағдайлары
- гепатит, бауыр функциясының бұзылуы
Ирбесартанмен монотерапияны қолданғанда тіркелген жағымсыз реакциялар:
Жиі емес (>1/1 000-нан <1/100 дейін)
- кеуденің ауыруы
Гидрохлоротиазидпен монотерапия кезінде тіркелген жағымсыз реакциялар (дәрілік затқа қатысына қарамастан):
Жиілігі белгісіз
- электролитті теңгерімсіздік (соның ішінде гипокалиемия және гипонатриемия, гиперурикемия, глюкозоурия, гипергликемия, холестерин және триглицеридтер деңгейінің көтерілуі)
- жүрек ырғағының бұзылуы
- апластикалық анемия, сүйек кемігі қызметінің бәсеңдеуі, нейтропения/агранулоцитоз, гемолиздік анемия, лейкопения, тромбоцитопения
- бас айналу, вибрациялық сезімталдық, сандырақтау, мазасыздық
- көрудің уақытша бұлыңғырлануы, ксантопсия
- тыныстың тарылуы (пневмонит пен өкпе ісінуін қоса)
- панкреатит, анорексия, диарея, іш қату, асқазан шырышты қабығының тітіркенуі, сиаладенит, тәбет жоғалту
- интерстициальді нефрит, бүйрек функциясының бұзылуы
- анафилаксиялық реакциялар, уытты эпидермалық некролиз, некроздық ангинит (васкулит, тері васкулиті), қызыл жегіге ұқсас тері реакциялары, қызыл жегінің қайталануы, фотосезімталдық реакциялары, тері бөртпесі, есекжем
- әлсіздік, бұлшықеттердің түйілуі
- постуральді гипотензия
- қызба
- сарғаю (бауырішілік холестаздық сарғаю)
- депрессия, ұйқының бұзылуы
Қолдануға болмайтын жағдайлар
- сульфонамидтің басқа туындыларына жоғары сезімталдық (гидрохлоротиазид сульфонамид туындысы болып табылады)
- ауыр дәрежедегі бүйрек жеткіліксіздігі (креатинин клиренсі 30 мл/мин аз), анурия (препарат құрамында гидрохлоротиазид болуына байланысты)
- рефрактерлі гипокалиемия, гипомагниемия, гиперкальциемия (препарат құрамында гидрохлоротиазид болуына байланысты)
- бауырдың ауыр жеткіліксіздігі (Чайлд-Пью шкаласы бойынша С класы/9 баллдан аса), билиарлы бауыр циррозы, холестаз (препарат құрамында гидрохлоротиазид болуына байланысты, өйткені су-электролит теңгерімінің аздаған бұзылулары ондай пациенттерде бауыр комасына түрткі болуы мүмкін)
- галактозаның тұқым қуалайтын жақпаушылығы, лактаза жеткіліксіздігі немесе глюкоза мен галактоза сіңуінің бұзылулары
- жүктілік және лактация кезеңі
- 18 жасқа дейінгі балаларға (тиімділігі мен қауіпсіздігі анықталмаған)
- препарат компоненттеріне жоғары сезімталдық
Препаратты сақтықпен қолдану керек:
- қолқа немесе митральді клапан стенозы; гипертрофиялық обструкциялық кардиомиопатияда
- дегидратация, гипонатриемия, диарея, құсуда, ас тұзын тұтыну шектелетін диета қадағаланғанда, диуретиктермен емдеуде (айқын артериялық гипотензияның даму қаупі)
- бүйрек артериясының екі жақты немесе бір жақты стенозы, NYHA жіктеуі бойынша III-IV функционалдық класты созылмалы жүрек жеткіліксіздігінде (РААЖ-ға ықпал ететін басқа дәрілерді қолдану кезіндегідей, артериялық гипотензия, олигурия және/немесе азотемия және үдемелі жедел бүйрек жеткіліксіздігінің даму қаупінің болуын жоққа шығаруға болмайды);
- ишемиялық жүрек ауруында және/немесе ми тамырларының атеросклероздық зақымдануында (артериялық қысым шектен тыс төмендеп кеткенде миокард инфарктісінің немесе инсульттің дамуына дейін апаратын миокард немесе ми ишемиясының күшею қаупі)
- ауырлығы жеңіл және орташа дәрежедегі бүйрек жеткіліксіздігінде (креатинин клиренсі 60-тан 30 мл/мин дейін), гемодиализде (препарат құрамында гидрохлоротиазид болуына байланысты, азотемияның артуы мен препарат құрамында ирбесартан болуына байланысты гиперкалиемияның даму қаупі)
- бүйрек трансплантациясынан кейін (клиникалық қолдану тәжірибесінің болмауы)
- бауыр жеткіліксіздігінде (Чайлд-Пью жіктеуі бойынша А және В кластары /5-6 балл және 7-9 балл)
- қант диабетінде (препарат құрамында гидрохлоротиазид болуына байланысты, глюкозаға төзімділік төмендеуі мүмкін);
- қандағы холестерин және триглицеридтер деңгейінің жоғары деңгейінде (препарат құрамында гидрохлоротиазид болуына байланысты, өйткені тиазидті диуретиктер, әсіресе, жоғары дозаларда қандағы холестерин және триглицеридтер деңгейін арттыруы мүмкін)
- подаграда (препарат құрамында гидрохлоротиазид болуына байланысты, қанда ураттар концентрациясы жоғарылауы мүмкін)
- гиперкалиемияда, калий жинақтаушы және/немесе құрамында калий бар препараттарды, тұз алмастырғыштарын бір мезгілде қабылдағанда (гиперкалиемия қаупі)
- жүйелі қызыл жегіде (препарат құрамында гидрохлоротиазид болуына байланысты, осы ауру өршуі мүмкін)
- басқа гипотензиялық дәрілерді бір мезгілде қабылдағанда (олардың гипотензиялық әсерінің күшею мүмкіндігі)
- жасырын өтетін гиперпаратиреозда (препарат құрамында гидрохлоротиазид болуына байланысты, тиазидті диуретиктер, әсіресе, жоғары дозаларда гиперкальциемияның даму немесе күшею қаупін арттырады);
- симпатэктомиядан кейін (гидрохлоротиазидтің гипотензиялық әсерінің күшею қаупі)
- литий тұздарын бір мезгілде қабылдағанда (гидрохлоротиазид литийдің уытты әсер ету қаупін арттырады).
Дәрілермен өзара әрекеттесуі
Ротазар Плюс препаратының гипотензиялық әсері басқа гипотензиялық дәрілерді, әсіресе, ганглиоблокаторлар, бета-адреноблокаторлар, диазоксидті бір мезгілде қолданумен күшеюі мүмкін. Ирбесартан мен гидрохлоротиазид, баяу кальций өзекшелерінің блокаторлары мен бета-адреноблокаторларды қоса, басқа гипотензиялық дәрілермен біріктіріліп қауіпсіз қолданылды. Жоғары дозалардағы диуретиктермен алдын ала емдеу гиповолемия мен артериялық гипотензия қаупіне әкелуі мүмкін.
Диуретиктер литийдің бүйрек клиренсін азайтады және литиймен уыттану әсерлерінің даму қаупін арттырады. Ротазар Плюс препаратының литий препараттарымен біріктірілімін қолдану ұсынылмайды. Егер бұл біріктірілім бәрібір қажет болса, литийдің сарысулық концентрацияларына мониторинг өткізу керек.
Гидрохлоротиазидті қабылдау кезінде калийдің шығарылуы ирбесартанның калий жинақтау әсеріне орай азаяды. Алайда гидрохлоротиазидтің осы әсері калий жоғалуын және гипокалиемияны туындататын басқа дәрілік заттармен (мысалы: диуретиктер, іш жүргізгіштер, амфотерицин, карбеноксолон, пенициллин G натрий тұзы, салицил қышқылының туындыларымен) күшеюі мүмкін.
Ротазар Плюс препаратымен жүрек гликозидтерін, аритмияға қарсы дәрілерді бірге қолданғанда оның құрамына кіретін тиазидті диуретик туындататын гипокалиемия мен гипомагниемия пайда болған жағдайда аритмиялардың, соның ішінде өмірге қауіп төндіретін түрлерінің туындау қауіптілігі артады. Осындай біріктірілімдерді қолданғанда қан сарысуындағы калий деңгейін жүйелі бақылап отыру талап етіледі.
Бір мезгілде ангиотензин II антагонистерін және қабынуға қарсы стероидты емес препараттарды (ҚҚСП) қолданғанда (мысалы, циклооксигеназа-2 іріктелген тежегіштері, ацетилсалицил қышқылы тәулігіне 3 г-ден көп және іріктелмеген ҚҚСП) гидрохлоротиазид тиімділігінің төмендеуі есебінен Ротазар Плюс препаратының гипотензиялық әсері әлсіреуі мүмкін.
АӨФ тежегіштерімен болған жағдайдағы сияқты, ҚҚСП мен ангиотензин II антагонистерін бірге қолдану, жедел бүйрек жеткіліксіздігі ықтималдығын қоса, бүйрек функциясының бұзылу қаупін арттырып, әсіресе, бүйрек функциясының бұзылуы бұрыннан бар пациенттерде қан сарысуында калий мөлшерінің көбеюіне әкелуі мүмкін. Осы біріктірілімді, әсіресе, егде жастағы пациенттерде абайлап қолдану керек. Осы біріктірілімді қолданғанда пациенттерде сусыздану болмауы тиіс.
Ирбесартан фармакокинетикасы ол гидрохлоротиазидпен және нифедипинмен біріктірілгенде өзгермейді. Ирбесартан негізінен CYP2C9 арқылы және аз дәрежеде глюкурондану жолымен метаболизденеді. Ирбесартан CYP2C9 арқылы метаболизмге ұшырайтын препарат – варфаринмен бірге қолданылғанда елеулі фармакокинетикалық және фармакодинамикалық өзара әрекеттесу байқалмаған. Рифампицин сияқты CYP2C9 индукторларының ирбесартан фармакокинетикасына әсері бағаланбаған. Дигоксин фармакокинетикасы ирбесартанмен бірге қолданғанда өзгермеген.
Тиазидті диуретиктермен бір мезгілде этанол, барбитураттар немесе наркозға арналған дәрілер қолданылғанда ортостаздық гипотензияның күшеюін байқауға болады.
Гидрохлоротиазид қолданылғанда гипогликемиялық дәрі дозасын түзету қажет болуы мүмкін, өйткені гидрохлоротиазид қандағы глюкоза деңгейін арттыруы мүмкін.
Гидрохлоротиазид және глюкокортикостероидтар немесе адренокортикотропты гормонды бір мезгілде қолданғанда электролитті теңгерімнің айқынырақ бұзылуы, атап айтқанда, гипокалиемия күшеюі мүмкін.
Гидрохлоротиазидтің әсер етуімен катехоламиндер (мысалы, норэпинефрин) тиімділігі азаюы мүмкін.
Гидрохлоротиазид жете поляризацияламайтын миорелаксанттар әсерін күшейтуі мүмкін.
Ротазар Плюс препараты мен подаграға қарсы дәрілерді бір мезгілде қолданғанда подаграға қарсы дәрілер дозасын арттыру қажет болуы мүмкін, өйткені гидрохлоротиазид қан сарысуындағы несеп қышқылының деңгейін арттыруға қабілетті. Пробенецид немесе сульфинпиразон дозаларын арттыру қажет болуы мүмкін. Тиазидті диуретиктермен бірге қолдану аллопуринолға аллергиялық реакциялар жиілігін арттыруы мүмкін.
Тиазидті диуретиктер шығарылуының төмендеуі салдарынан қан сарысуында кальций деңгейін арттыруға қабілетті. Егер кальций қоспалары немесе кальций деңгейіне ықпал ететін препараттар (мысалы, D дәруменімен емдеуде) тағайындалуы тиіс болса, қан сарысуында кальций деңгейін бақылау және кальций препаратының дозасын тиісінше түзету қажет.
Тиазидті диуретиктер бета-адреноблокаторлар мен диазоксидтің гипергликемиялық әсерін күшейтеді.
Холинергияға қарсы дәрілер (мысалы, атропин) асқазан-ішек жолы моторикасын төмендету салдарынан тиазидті диуретиктер биожетімділігін арттыруы мүмкін.
Тиазидтер амантадиннің жағымсыз әсерлерінің даму қаупін арттыруы мүмкін.
Тиазидтер циклофосфамид пен метотрексаттың несеппен бөлінуін төмендетіп, олардың миелосупрессиялық әсерін күшейтуі мүмкін.
Айрықша нұсқаулар
Гипотензия – айналымдағы қан көлемі төмендеген пациенттер: Ротазар Плюс осы жай-күйді дамытатын басқа қауіп факторлары болмағанда симптоматикалық гипотензияны сирек туындатады. Симптоматикалық гипотензия қарқынды несеп айдау емі, тұзды диеталық шектеу, іш өту немесе құсу нәтижесінде тамырішілік көлемі азайған және (немесе) натрий деңгейі төмендеген пациенттерде болуы мүмкін. Ротазар Плюс препаратымен емдеуге кіріспес бұрын осындай жағдайларды түзетіп алу қажет.
Ұйқы артериясы стенозы - реноваскулярлы гипертензия: бүйрек артериясының екі жақты стенозы немесе жалғыз жұмыс істейтін бүйрек артериясының стенозы бар пациенттерде АӨФ тежегіштерімен немесе ангиотензин II рецепторларының антагонистерімен емделген жағдайда ауыр гипотензия мен бүйрек жеткіліксіздігінің жоғарылау қаупі бар. Ротазар Плюспен құжатталған жағдайлардың болмауына қарамастан осындай әсер болуы мүмкін екенін ұмытпау керек.
Бүйрек жеткіліксіздігі және бүйрек трансплантациясы: бүйрек функциясы бұзылған пациенттер Ротазар Плюс қолданған жағдайда сарысудағы калий, креатинин және несеп қышқылы деңгейлерін мезгіл-мезгіл бақылау керек. Таяуда бүйрек трансплантациясы жасалған пациенттерге Ротазар Плюс тағайындау тәжірибесі жоқ. Ротазар Плюс ауыр бүйрек жеткіліксіздігі (креатинин клиренсі <30 мл/мин) жағдайында қолданылмауы тиіс. Бүйрек функциясының бұзылуында тиазидті диуретиктер қолданумен байланысты азотемия дамуы мүмкін. Креатинин клиренсі >30 мл/мин бүйрек жеткіліксіздігі жағдайында дозаны түзету қажет емес. Алайда, ауырлығы жеңіл және орташа дәрежедегі бүйрек жеткіліксіздігінде (креатинин клиренсі ≥30 мл/мин, бірақ <60 мл/мин) осы біріктірілген препарат сақтықпен тағайындалуы тиіс.
Ренин-ангиотензин-альдостерон жүйесінің (РААЖ) қосарлы бөгелісі: Ротазар Плюс және алискиренді бірге қолдану ұсынылмайды, өйткені гипотензия, гиперкалиемияның дамуы мен бүйрек функциясының бұзылу қаупі артады. Қант диабетіне шалдыққан пациенттерде және бүйрек жеткіліксіздігінің ауырлығы жеңіл және орташа дәрежедегі (шумақтық сүзіліс жылдамдығы <60 мл/мин/1,73 м2) пациенттерде құрамында алискирен бар препараттармен біріктірілген Ротазар Плюс препаратын қолдану қарсы көрсетілімді.
Бауыр жеткіліксіздігі: бауыр функциясының бұзылуы немесе үдемелі бауыр ауруы бар пациенттерде тиазидті диуретиктер сақтықпен қолданылу керек, өйткені су және электролит теңгерімінің аздаған өзгерістері бауыр комасына түрткі болуы мүмкін. Бауыр жеткіліксіздігі бар пациенттерде Ротазар Плюс қолданудың клиникалық тәжірибесі жоқ.
Қолқа және митральді клапандар стенозы, обструкциялық гипертрофиялық кардиомиопатия: басқа вазодилататорлар жағдайындағы сияқты, препарат қолқа немесе митральді клапан стенозынан немесе обструкциялық гипертрофиялық кардиомиопатиядан зардап шегетін пациенттерге тағайындалғанда ерекше сақтану қажет.
Алғашқы альдостеронизм: алғашқы альдостеронизмі бар пациенттер, әдетте, ренин-ангиотензин жүйесін бәсеңдететін гипертензияға қарсы дәрілік заттарға реакция бермейді. Демек, Ротазар Плюс қолдану ұсынылмайды.
Метаболизмдік және эндокриндік әсерлері: тиазидтермен ем глюкозаға төзімділікті төмендетуі мүмкін. Диабеті бар пациенттерде инсулин мен ішуге арналған диабетке қарсы дәрілік заттар дозаларын түзету қажет болуы мүмкін. Тиазидтермен емдеу жасырын қант диабетінің манифестациясын туындатуы мүмкін.
Тиазидті диуретиктермен емдеу холестерин және триглицеридтер деңгейлерінің жоғарылауымен қатар жүруі мүмкін; бірақ препарат құрамындағы 12,5 мг дозасы тұсында тым аз әсерлері немесе олардың болмауы тіркелген.
Кейбір пациенттерде тиазидтермен емделгенде гиперурикемия немесе тіпті подагра дамуы мүмкін.
Электролитті теңгерім бұзылуы: несеп айдау емін алатын кез келген пациент жағдайындағы сияқты тиісті аралықтарды қадағалаумен қан сарысуында электролиттерді мезгіл-мезгіл қадағалап отыру қажет.
Тиазидтер, гидрохлоротиазидті қоса, су және электролит тепе-теңдігінің бұзылуын (гипокалиемия, гипонатриемия және гипохлоремиялық алкалоз) туындатуы мүмкін. Су және электролит тепе-теңдігінің бұзылуын көрсететін белгілер: ауыздың кеберсуі, шөлдеу, әлсіздік, летаргия, мүлгіген хал, мазасыздық, бұлшықеттердің ауыруы немесе құрысуы, бұлшықет әлсіздігі, гипотензия, олигурия, тахикардия және асқазан-ішек бұзылыстары, мысалы, жүрек айну және құсу.
Тиазидті диуретиктер қолданғанда гипокалиемия болуы мүмкін екеніне қарамастан, ирбесартанмен бір мезгілде емделу диуретиктер себебінен болатын гипокалиемияны азайтуы мүмкін. Диурезбен күшейген бауыр циррозына шалдыққан, электролиттер ішу арқылы талапқа сай енгізілмеген пациенттерде және кортикостероидтармен немесе адренокортикотропты гормонмен бір мезгілде жүргізілген емде гипокалиемия қаупі аса жоғары. Керісінше, Ротазар Плюс құрамында ирбесартан бар болғандықтан, әсіресе, бүйрек жеткіліксіздігі және/немесе жүрек жеткіліксіздігі мен қант диабетінде гиперкалиемия дамуы мүмкін. Қауіп тобы пациенттерінде сарысудағы калий деңгейіне тиісті мониторинг өткізу керек. Калий жинақтаушы диуретиктер, калий қоспалары немесе құрамында калий бар тұз алмастырғыштар Ротазар Плюспен бірге тағайындалғанда сақтық шарасы қадағалану керек.
Ирбесартанның диуретиктер себебінен болатын гипонатриемия дамуын төмендету немесе болдырмау дәлелдері жоқ. Хлорид жетіспеушілігі, көбіне орташа болады және әдетте емдеуді талап етпейді.
Тиазидтер несеппен кальций шығарылуын төмендетіп, кальций алмасудың белгілі бұзылулары болмағанда сарысудағы кальций деңгейінің мезгіл-мезгіл және аздап артуын туындатуы мүмкін. Айқын гиперкальциемия жасырын гиперпаратиреозды көрсетуі мүмкін. Қалқанша маңы бездерінің функциясын зерттемес бұрын тиазидті диуретиктерді тоқтату керек.
Тиазидтердің магнийді несеппен шығаруы көріністелген, бұл гипомагниемияға әкелуі мүмкін.
Литий: литийді Ротазар Плюспен біріктіру ұсынылмайды.
Допингке тест: осы дәрілік препарат құрамында болатын гидрохлоротиазид допинг анықталатын зертханалық тестінің оң нәтижесіне себеп болуы мүмкін.
Жалпы нұсқаулар: тамыр тонусы және бүйрек функциясы, негізінен, ренин-ангиотензин-альдостерон жүйесінің белсенділігіне тәуелденетін пациенттерде (мысалы, ауыр іркілісті жүрек жеткіліксіздігі немесе бүйрек ауруы, соның ішінде, бүйрек артериясының стенозы бар пациенттерде) АӨФ тежегіштерімен немесе ангиотензин II рецепторлары антагонистерімен емдеу жедел гипотензия, азотемия, олигуриямен, ал сирек жағдайларда, жедел бүйрек жеткіліксіздігімен қатар жүреді. Кез келген гипертензияға қарсы дәрілік зат жағдайындағы сияқты, артериялық қысымның шектен тыс төмендеуі ишемиялық кардиопатиясы немесе облитерациялаушы жүрек-қантамыр аурулары бар пациенттерде миокард инфарктісін немесе инсультті туындатуы мүмкін.
Гидрохлоротиазидке жоғары сезімталдық реакциялары анамнезде аллергия немесе бронх демікпесі бар болғанда да, оларсыз да болуы мүмкін, дегенмен, олар осындай қатарлас аурулары бар пациенттерде көбірек ықтимал.
Тиазидті диуретиктер қолданылғанда жүйелі қызыл жегінің белсенділік дәрежесінің өршуі немесе күшеюі тіркелген.
Тиазидті диуретиктер пайдаланылғанда жарыққа сезімталдық реакциялары жағдайлары орын алған. Емдеу барысында осындай реакция дамыған жағдайда емдеуді тоқтату ұсынылады. Диуретиктерді қайта тағайындау қажет болған жағдайда терінің ашық жерлерін күн сәулесінің әсерінен және жасанды ультракүлгін сәулеленуден қорғауға кеңес беріледі.
Лактоза: Ротазар Плюс құрамында лактоза бар, сондықтан галактоза жақпаушылығының сирек тұқым қуалайтын бұзылулары, лактаза тапшылығы болғанда және глюкоза мен галактоза сіңуінің бұзылу синдромында қолданылмауы тиіс.
Жедел миопия және салдарлы өткір жабық бұрышты глаукома: сульфаниламидтер немесе сульфонамид туындылары өтпелі миопияның және жедел жабық бұрышты глаукоманың дамуына әкелетін идиосинкразия реакциясын туғызуы мүмкін. Гидрохлоротиазидтің сульфонамид туындысы екеніне қарамастан, қазіргі уақытқа дейін оны қабылдаумен өзара себеп-салдарлы байланысы анықталмайтын жедел жабық бұрышты глаукоманың жекелеген жағдайлары жөнінде ғана хабарланған. Жедел жабық бұрышты глаукома симптомдары: препарат қабылдау басталған соң, әдетте, бірнеше сағаттан бастап бірнеше аптаға дейінгі кезең ішінде туындайтын көру өткірлігінің жедел төмендеуі немесе көз ауруы. Емдеусіз қалдырылған жедел жабық бұрышты глаукома тұрақты көрмей қалуға әкелуі мүмкін. Осы симптомдар туындағанда мүмкіндігінше тезірек препарат қабылдауды тоқтату керек. Егер бұл орайда көзішілік қысымды қалыпқа түсірудің сәті түспесе, шұғыл терапиялық немесе хирургиялық ем қажет болуы мүмкін. Жедел жабық бұрышты глаукоманы дамытатын қауіп факторлары анамнездегі сульфаниламидтер мен пенициллиндерге аллергиялық реакцияларға көрсетілімдер болып табылады.
Педиатрияда қолдану
Препарат 18 жасқа дейінгі балаларға тағайындауға ұсынылмайды.
Жүктілік және лактация
Жүктілік және лактация кезеңінде Ротазар Плюс препаратын қолдану қарсы көрсетілімді.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Ротазар Плюс препаратының жоғары зейін қоюды талап ететін қызмет түрлерімен айналысу қабілетіне әсері зерттелмеген, алайда, оның фармакодинамикалық қасиетттері негізге алынғанда, препарат бұл қабілетке ықпалын тигізбеуі тиіс. Автокөлік жүргізгенде емделу кезінде бас айналу және қатты шаршау болуы мүмкін екенін ескеру қажет.
Артық дозалануы
Симптомдары: Ирбесартан артық дозаланғанда: артериялық қысымның айқын төмендеуі, тахикардия, брадикардия; гидрохлоротиазид артық дозаланғанда: гипокалиемия, гипонатриемия, шамадан тыс диурез нәтижесінде сусыздану болуы көбірек ықтимал. Артық дозаланудың ең көп жалпы белгілері мен симптомдары – жүрек айну және ұйқышылдық. Гипокалиемия оймақгүл гликозидтері мен аритмияға қарсы дәрілерді қатарлас қолданған жағдайда құрысуларға және/немесе аритмиялардың күшеюіне әкелуі мүмкін.
Емі: Артық дозалану жағдайында пациенттің жай-күйін мұқият бақылау талап етіледі, ем симптоматикалық және демеуші сипатта болуы тиіс. Емдеу дәрілік затты қабылдау сәтінен бері өткен уақытқа және симптомдар ауырлығына байланысты. Ұсынылатын шаралар – құстыру және/немесе асқазанды шаю, белсендірілген көмір қолдану, пациенттің жай-күйін мұқият бақылау, симптоматикалық және демеуші ем жүргізу. Қан сарысуындағы электролиттер мен креатинин мөлшерін жүйелі бақылап отыру керек. Артериялық гипотензия жағдайында пациентты аяқ жағын сәл көтеріп, шалқасынан жатқызу және мүмкіндігінше тезірек тұз және сұйықтық орнын толтыру қажет.
Ирбесартан гемодиализ кезінде шығарылмайды.
Шығарылу түрі және қаптамасы
Поливинилхлорид үлбірінен және алюминий фольгадан жасалған пішінді ұяшықты қаптамаға 14 таблеткадан салады.
Пішінді ұяшықты 2 қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.
Сақтау шарттары
25ºС-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші/Қаптаушы
«Уорлд Медицин Илач Сан. ве Тидж. А.Ш.», Түркия
(Багджылар Илчеси, Гюнешли, Эврен Махаллеси, Джами Йолу Джад. №50 К. 1В Земин 4-5-6, Стамбул)
"World Medicine İlaç San. ve Tic. А.Ş.", Turkey
Тіркеу куәлігінің иесі
«РОТАФАРМ ИЛАЧЛАРЫ ЛИМИТЕД ШИРКЕТИ», Түркия
Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы
ҚР, Алматы, «TROKA-S PHARMA» ЖШС, Түріксіб ауданы,
Сүйінбай д-лы, 222б
Тел./факс: 8 (7272) 529090
Дәрілік заттың тіркеуден кейінгі қауіпсіздігін қадағалауға жауапты ұйымның мекенжайы
«TROKA-S PHARMA» ЖШС Төлеуішева Сандуғаш атынан, Алматы, Сүйінбай д-лы, 222б
Ұялы тел. +7 701 786 33 98, (24-сағаттық қолжетімділік).
е-mail: pvpharma@worldmedicine.kz