Роноцит (500 мг)
Инструкция
-
русский
-
қазақша
Дәрілік затты медициналық қолдану жөніндегі нұсқаулық
Роноцит
Саудалық атауы
Роноцит
Халықаралық патенттелмеген атауы
Цитиколин
Дәрілік түрі
Үлбірлі қабықпен қапталған таблеткалар 250 және 500 мг
Құрамы
Бір таблетканың құрамында
белсенді зат - натрий цитиколині 261.258 және 522.516 мг (250 және 500 мг цитиколинге баламалы)
қосымша заттар: жүгері крахмалы, тальк, гидроксипропилцеллюлоза, микрокристалды целлюлоза, натрий кроскармеллозасы, сусыз коллоидты кремнийдің қостотығы, магний стеараты
қабықтың құрамы: Опадри® II ақ 85F18422 (ішінара гидролизденген поливинил спирті, титанның қостотығы (Е 171), макрогол, тальк)
Сипаттамасы
Дөңгелек пішінді, екі беті дөңес, ақ түсті үлбірлі қабықпен қапталған таблеткалар (250 және 500 мг доза)
Фармакотерапиялық тобы
Психоаналептиктер. Психостимуляторлар және ноотроптар. Басқа психостимуляторлар және ноотроптар. Цитиколин.
ATХ коды N06BX06
Фармакологиялық қасиеттері
Фармакокинетикасы
Цитиколин организм құрамында бар табиғи қосылыс болып табылады. Асқазан-ішек жолынан толық сіңеді, қабылдағаннан кейін 5 күн бойы дозаның <1 %-ы нәжісте айқындалған. Организмнен өте баяу көбіне тыныс алу ағзалары арқылы және несеппен шығарылады.
Фармакодинамикасы
Цитиколин, жасушалық жарғақшаның негізгі ультрақұрылымдық компоненттері ізашары бола отырып (негізінен фосфолипидтер), кең ауқымды әсерге ие - жасушалардың зақымданған жарғақшаларының қалпына келуіне ықпал етеді, фосфолипаза әсерін тежейді, бос радикалдардың артық түзілуіне кедергі етіп, сондай-ақ апоптоз механизміне әсер етіп жасушалардың қырылуының алдын алады. Инсульттің жедел кезеңінде цитиколин ми тіндерінің зақымдану көлемін азайтады, холинергиялық берілісті жақсартады. Бас сүйек-ми жарақатында жарақаттан кейінгі команың ұзақтығын және неврологиялық симптомдар айқындығын азайтады.
Мидың созылмалы гипоксиясы жағдайында Роноцит жадының нашарлауы, жігерсіздік, күнделікті әрекеттер жасаудағы және өзіне-өзі қызмет көрсету кезінде туындайтын қиындықтар сияқты когнитивті бұзылыстарды емдеуде тиімді.
Қолданылуы
- инсульт және оның салдарлары
- бассүйек ми жарақаты және оның салдарлары
- дегенерациялық өзгерістерден және қан тамырларының бұзылуынан туындаған когнитивті, сезімталдық және қимыл-қозғалыстың неврологиялық бұзылыстары
Қолдану тәсілі және дозалары
Препаратты ішке қабылдайды.
Ұсынылатын доза тәулігіне 500 мг бастап 2000 мг дейінді құрайды.
Препараттың дозасы және емдеу ұзақтығы ми зақымдануының ауырлығына байланысты және оны дәрігер белгілейді.
Егде жастағы пациенттерге дозаны түзету қажет етілмейді.
Жағымсыз әсерлері
Өте сирек (<1/10,000) (жекелей реакцияны қоса)
- аллергиялық реакциялар, есекжем, экзантема, терінің күрең қызылға дейін боялуы, терінің қышынуы, ісінулер, анафилаксиялық шоктың дамуы мүмкін
- бас ауыруы, бас айналуы, елестеулер, қозу, ұйқысыздық, температураның көтерілуі, ысынуды сезіну, тремор
- диспноэ
- жүрек айнуы, құсу, диарея
- артериялық қысымның жоғарылауы немесе қысқа мерзімді төмендеуі
Қолдануға болмайтын жағдайлар
- препараттың компоненттеріне жоғары сезімталдық;
- ваготония (вегетативті жүйке жүйесі парасимпатикалық бөлігі тонусының басымдығы)
- 6 жасқа дейінгі балалар
Дәрілермен өзара әрекеттесуі
Цитиколин леводопаның әсерін күшейтеді.
Құрамында меклофеноксат бар дәрілік заттармен бір мезгілде тағайындамау керек.
Роноцитті қан тоқтататын дәрілермен, бассүйекішілік антигипертензиялық дәрілермен және кәдімгі перфузиялық сұйықтықтармен бір мезгілде қолдануға болады.
Айрықша нұсқаулар
Педиатрия қолдану
Балалар тәжірибесінде дәрілік препаратты, егер күтілетін емдік пайдасы ықтимал қауіптен асып түскенде ғана тағайындайды. Жасы және дозалау режимін емдеуші дәрігер жекелей анықтайды.
Жүктілік және лактация кезеңі
Препаратты жүктілік кезінде немесе лактация кезеңінде қолдану қаупіне айғақтар болмағанымен, препаратта күтілетін пайдасы шарана мен балаға төнетін қауіптен асып түскенде тағайындайды.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Цитиколин көлік құралдарын басқару және механизмдерді пайдалану қабілетіне әсер етпейді.
Артық дозалануы
Препараттың төмен уыттылығымен байланысты артық дозалану жағдайлары сипатталмаған.
Шығарылу түрі және қаптамасы
10 таблеткадан алюминий фольгадан жасалған пішінді ұяшықты қаптамаға салынады.
1 және/немесе 2 пішінді қаптамадан медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынады.
Сақтау шарттары
25°С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші
Уорлд Медицин Илач Сан. ве Тидж. А.Ш. (World Medicine İlaç San. ve Tic. А.Ş.), Стамбул, Түркия
Тіркеу куәлігінің иесі
Уорлд Медицин Лтд (World Medicine Ltd), Тбилиси, Грузия
Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері
«РИН Фарм» ЖШС, Алматы, Түрксіб ауданы, Сүйінбай даңғ., 222б
тел/факс: 8 (727) 252 90 90
Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері
«TROKA-S PHARMA» ЖШС, Алматы, Сүйінбай даңғылы 222-б
моб. тел. +7 701 786 33 98, (24 сағат бойы қол жетімді)
е-mail: pvpharma@worldmedicine.kz