Римекор МВ

• русский
• қазақша

• Скачать инструкцию медикамента

Саудалық атауы

Римекор МВ

Халықаралық патенттелмеген атауы

Триметазидин

Дәрілік түрі

Үлбірлі қабықпен қапталған, ұзақ әсер ететін таблеткалар, 35 мг

Құрамы

Үлбірлі қабықпен қапталған бір таблетканың құрамында

белсенді зат - триметазидин дигидрохлориді (100 % затқа шаққанда) – 35 мг,

қосымша заттар:

ядро: маннитол, микрокристалды целлюлоза, гликольді тау балауызы (монтан балауызы), метилметакрилат, триметиламмониоэтилметакрилат хлориді және этилакрилат сополимері (1 : 2 : 0,1) (Eudragit RS PO), магний стеараты

қабық: Опадрай II қызғылт (Opadry II Pink): темірдің қызыл тотығы (Е 172), полиэтиленгликоль, темірдің сары тотығы (Е 172), поливинил спирті, тальк, титанның қостотығы (Е 171), темірдің қара тотығы (Е 172)

Сипаттамасы

Дөңгелек пішінді, екі беті дөңес, қызғылт түсті қабықпен қапталған таблеткалар. Көлденең қимасында екі қабаты көрінеді.

Фармакотерапиялық тобы

Жүрек ауруларын емдеуге арналған препараттар. Басқа да кардиотоникалық препараттар. Триметазидин.

АТХ коды С01ЕВ15

Фармакологиялық қасиеттері

Фармакокинетикасы

Препаратты ішке қабылдағаннан кейін триметазидин асқазан-ішек жолында жылдам және толық дерлік сіңіріледі. Тамақтану препараттың фармакокинетикалық қасиеттеріне әсер етпейді. Биожетімділігі 90 % құрайды. Қан плазмасындағы ең жоғары концентрациясына жету уақыты – 3-5 сағат. Қан плазмасындағы концентрациясы тәулік бойы концентрацияның 75 %-нан асатын деңгейде қалады, ол препараттың бір таблеткасын қабылдағаннан кейін 11 сағаттан соң анықталады. Қан плазмасында тепе-тең концентрациясына ем басталғаннан бастап шамамен 60 сағаттан соң жетеді. Таралу көлемі 4,8 л/кг, қан плазмасы ақуыздарымен байланысуы 16 % құрайды. Гистогематикалық кедергілер арқылы жеңіл өтеді. Негізінен бүйрек арқылы, өзгермеген түрде (60 % жуық) шығарылады. Жартылай шығарылу кезеңі – 7 сағатқа жуық, 65 жастан асқан емделушілерде – 12 сағатқа жуық. Триметазидиннің бүйрек клиренсі креатинин клиренсімен (КК) тікелей байланысты болады, бауыр клиренсі жас келген сайын төмендейді.

Фармакодинамикасы

Римекор МВ гипоксияға қарсы әсер етеді. Гипоксияға немесе ишемияға ұшыраған жасушалардың энергетикалық метаболизмін қалыпқа келтіреді. Кардиомиоциттерге және ми нейрондарына тікелей әсер ете отырып, олардың метаболизмін және қызметін оңтайлы етеді. Цитопротекторлы әсері энергетикалық потенциалдың жоғарылауынан, тотығып декарбоксилденуді күшейту және оттегіні тұтынуды рационализациялау (аэробты гликолиздің күшеюі және ұзын тізбекті 3-кетоацил-КоА-тиолазаны селективті тежеу есебінен май қышқылы тотығуының баяулауы) арқылы іске асады.

Триметазидин миокардтың жиырылуын демейді, жасушаішілік аденозинтрифосфор қышқылы (АТФ) және креатинфосфат құрамының төмендеуін болдырмайды. Ацидоз жағдайында жарғақшалардың ион өзекшелерінің қызметін қалпына келтіреді және кардиомиоциттерде кальций мен натрий иондарының жинақталуына кедергі болады, калий иондарының жасушаішілік концентрациясын қалыпқа келтіреді.

Миокард ишемиясы және реперфузиядан болған жасушаішілік ацидозды және фосфаттар құрамының жоғарылауын азайтады. Бос радикалдардың зақымдайтын әсеріне кедергі болады, жасуша жарғақшаларының бүтіндігін сақтайды, ишемия аймағындағы нейтрофилдер белсенділігін қайтарады, қуаттық потенциалдың ұзақтығын арттырады, жасушадан креатинфосфокиназаның шығуын және миокардтың ишемиялық зақымдану айқындылығын азайтады.

Стенокардия кезінде ұстама жиілігін қысқартады, нитраттар қабылдау қажеттілігін азайтады, 2 апталық емнен кейін физикалық жүктемеге төзімділік артады, артериялық қысымның күрт ауытқулары төмендейді. Этиологиясы ишемиялық бас айналу мен құлақ шуылдауын жақсартады. Көздің қантамырлық патологиясы кезінде көз торқабығының қызметтік белсенділігін қалпына келтіреді.

Қолданылуы

- жеткілікті бақыланбайтын немесе бірінші желідегі антиангинальді препараттарды көтере алмайтын тұрақты стенокардиясы бар науқастарды симптоматикалық емдеу үшін ересектерге қосымша ем ретінде

Қолдану тәсілі және дозалары

Ішке, тамақтану кезінде.

Римекор МВ тәулігіне 2 рет (таңертең және кешке) 1 таблеткадан қолданады. Бір қабылдауды өткізіп алғанда, келесі қабылдауда препарат дозасын екі еселеуге болмайды. Бір реттік дозасы 35 мг, тәуліктік – 70 мг құрайды.

Емдеу курсын дәрігер анықтайды.

Жағымсыз әсерлері

Жиі (≥1/100 ≤1/10):

• іштің ауыруы, диарея, диспепсия, жүрек айнуы, құсу

• бас айналуы, бас ауыруы, астения

• тері бөртпесі, қышыну, есекжем

Сирек (≥1/10000 ≤1/1000):

• ұйқының бұзылуы (ұйқысыздық, ұйқышылдық)

• жүрек қағуы, экстрасистолия, тахикардия

• артериялық гипотензия

• емделушінің, әсіресе антигипертензивті препараттар қабылдайтын науқастардың дімкәстігіне, басы айналуы немесе құлауына байланысты болуы мүмкін ортостатикалық гипотензия

• бет терісіне «қан тебулер»

Өте сирек (<1/10000, оның ішінде жекелеген хабарламалар):

• паркинсонизм симптомдары (тремор, бұлшықеттің сіресуі, акинезия, бұлшықет тонусының жоғарылауы), орнықсыз жүріс, мазасыз аяқ синдромы, әдетте препарат қабылдауды тоқтатқаннан кейін қайтымды болатын басқа да қозғалыстық бұзылыстар

• іш қатуы

• жедел жайылған экзантематозды пустулез, Квинке ісінуі

• агранулоцитоз, тромбоцитопения, тромбоцитопениялық пурпура

• гепатит

Қолдануға болмайтын жағдайлар

• препараттың қандай да бір компонентіне жоғары сезімталдық

• ауыр бүйрек жеткіліксіздігі (креатинин клиренсі 15 мл/мин аздау)

• бауыр қызметінің айқын бұзылуы

• Паркинсон ауруы, паркинсонизм симптомдары, тремор, мазасыз аяқ синдромы және басқа да қозғалыстық бұзылыстар

• жүктілік және лактация кезеңі

• 18 жасқа дейінгі балалар және жасөспірімдер

Дәрілермен өзара әрекеттесуі

Басқа препараттармен өзара әрекеттесуі туралы деректер жоқ.

Айрықша нұсқаулар

Триметазидин, әсіресе егде емделушілерде ұдайы бақылануы тиіс паркинсонизм белгілерін туындатуы немесе нашарлатуы мүмкін (тремор, акинезия, бұлшықет тонусының жоғарылауы). Күдікті жағдайларда, емделушілер тиісінше тексеру үшін неврологқа жіберілуі тиіс.

Паркинсонизм, мазасыз аяқ синдромы, тремор, орнықсыз жүріс сияқты қозғалыстық бұзылыстар пайда болғанда препарат қабылдауды тоқтату керек.

Бұл жағдайлардың жиілігі төмен және әдетте препарат қабылдауды тоқтатқаннан кейін қайтымды. Көптеген емделушілерде қалпына келу триметазидинді тоқтатқаннан кейін 4 ай бойы жүреді.

Егер паркинсонизм симптомдары препаратты қабылдауды тоқтатқан соң 4 айдан астам уақыт сақталса, неврологқа қаралу керек.

Орнықсыз жүріс-тұрысқа немесе гипотензияға байланысты, ішінара антигипертензивті препараттар қабылдайтын емделушілерде, емделуші құлауы мүмкін.

Триметазидиннің организмнен шығарылу уақыты ұлғайған емделушілер препарат қабылдағанда сақ болуы керек:

• бүйрек қызметінің орташа бұзылуы

• 75 жастан асқан егде жастағы емделушілер.

Римекор МВ стенокардия ұстамаларын басуға және тұрақсыз стенокардияны немесе миокард инфарктісін емдеудің бастапқы курсына, сондай-ақ госпитализацияға дайындауға немесе оның алғашқы күндеріне арналмаған!!!

Стенокардия ұстамасының дамуы жағдайында емдеуді қайта қарап, бейімдеу керек.

Лактация кезеңі

Римекор МВ препаратын лактация кезеңінде қолдану қажет болғанда бала емізуді тоқтата тұру керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Көлік құралын немесе жоғары зейін қоюды және психомоторлы реакциялар жылдамдығын қажет ететін қауіптілігі зор механизмдерді басқару кезінде сақ болу керек.

Артық дозалануы

Артық дозалану жағдайлары туралы деректер шектеулі.

Емі: симптоматикалық.

Шығарылу түрі және қаптамасы

Поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамаға 20 таблеткадан салынған.

3 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады.

Сақтау шарттары

15 °С-ден 25 °С-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Фарма СТАРТ» ЖШҚ, Украина

03124, Киев қ., И. Лепсе бул., 8

тел.: (380-44) 404-85-05

факс: (380-44) 404-79-03

Тіркеу куәлігі иесінің атауы мен елі

«Нижфарм» ААҚ, Ресей Федерациясы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«Нижфарм» ААҚ Өкілдігі

050043, Қазақстан Республикасы,

Алматы қ., Хан-Тәңірі ы/а, 55б

тел.: (727) 398-64-91, 398-64-92, 398-64-93, 243-45-03, 243-45-04

факс: (727) 398-64-95

e–mail: almaty@stada.kz

.