Ризэф 150/75

• русский
• қазақша

• Скачать инструкцию медикамента

Саудалық атауы

РИЗЭФ 150/75

Халықаралық патенттелмеген атауы

Жоқ

Дәрілік түрі

Үлбірлі қабықпен қапталған таблеткалар

Құрамы

Бір таблетканың құрамында

қосымша заттар: кросповидон, желатинделген крахмал, желатин, микрокристалды целлюлоза, аскорбин қышқылы, бифендат, қант, сусыз коллоидты кремнийдің қостотығы (аэросил), магний стеараты;

қабығы - Opadry 80W 56578 Brown (поливинил спирті, тальк, макрогол/ПЭГ 3000, титанның қостотығы Е171, темірдің қызыл тотығы Е172).

Сипаттамасы

Бір жақ бетінде сызығы бар, екі жағы дөңес, қызғылт-қоңыр түсті үлбірлі қабықпен қапталған таблеткалар.

Фармакотерапиялық тобы

Туберкулезге қарсы біріктірілген препараттар. Рифампицин басқа препараттармен біріктірілімде.

АТХ коды J04AМ02

Фармакологиялық қасиеттері

Фармакокинетикасы

Рифампицин

Рифампицин асқазаннан және он екі елі ішектен жақсы сіңеді. Ашқарынға қабылдаған кезде препарат плазмадағы ең жоғары концентрациясына 2-4 сағаттан кейін жетеді.

Рифампициннің жартылай ыдырау кезеңі орта есеппен сарысуда 600 мг дозадан кейін шамамен 3 сағатты құрайды және 900 мг дозадан кейін 5,1 сағатқа дейін артады. Қайталап енгізген кезде, жартылай ыдырау кезеңі төмендейді және шамамен 2-3 сағаттан соң орташа мәндеріне жетеді. Күніне 600 мг дейінгі дозада, бүйрек жеткіліксіздігі бар науқастарда жартылай ыдырау кезеңінің өзгешелігі жоқ, сондықтан, дозаны түзетудің ешқандай қажеті жоқ.

Рифампицин өтпен және несеппен шығарылады. Осы үдеріс барысында рифампицин үдемелі дезацетилденуге ұшырайды, сөйтіп дәрілік зат толығымен дерлік өтте осындай түрде шамамен 6 сағат болады. Бұл метаболит бактерияға қарсы белсенділігін толық сақтайды. Доза 30%-ға дейін несеппен шығарылады, оның жартысына жуығы өзгермеген күйде болады. Препарат организмге тамақпен бірге түскен кезде рифампициннің сіңірілуі азаяды.

Рифампицин бүкіл организмге кеңінен таралады. Ол тиімді концентрацияларда организмнің көптеген ағзалары мен сұйықтықтарында, оның ішінде жұлын сұйықтығында болады. Рифампициннің 80%-ға жуығы организмдегі ақуыздармен байланысады.  Байланыспаған фракцияның басым бөлігі иондалмайды, сондықтан да тіндерде еркін диффузияланады.

Изониазид

Ішу арқылы енгізгеннен кейін изониазид қандағы ең жоғары концентрациясына 1 - 2 сағаттан кейін жетеді.  Изониазидті ішке тамақпен бірге қабылдау оның сіңірілуінің төмендеуіне әкелуі мүмкін. Ол организмнің барлық биологиялық сұйықтықтарына (жұлын, плевралық және асциттік), тіндер мен ағзаларға оңай өтеді, сілекеймен, қақырықпен және нәжіспен шығарылады.  50%-дан 70%-ға дейінгі изониазид дозасы 24 сағаттың ішінде несеппен шығарылады.

Фармакодинамикасы

Препарат құрамында туберкулезге қарсы екі препараттың біріктірілімі бар: рифампицин және изониазид, оны пайдаланған кезде микобактерияның төзімділігі баяу дамиды. Рифампицин, рибонуклеин қышқылының синтезін тежейтін бактерицидті антибиотик ретінде, M.tuberculosis-ке қатысты белсенділігі жоғары, туберкулезге қарсы бірінші қатардағы препарат болып табылады. E.coli, Pseudomonas, Proteus, Klebsiella, St.aureus, сoagulase-теріс staphylococci, N.meningitides, H.influenzae, Legionella түрлеріне, M.kansassi, M.scrofulaceum, M.intracellulare және M.avium-ге қатысты алғанда белсенді. Изониазид - изоникотин қышқылының гидразині, туберкулезге қарсы антибиотиктерге төзімді штаммдарды қоса, M.tuberculosis-ке қатысты спецификалық белсенділігі жоғары. Микобактериялардың жасуша қабырғасының маңызды компонентіне жататын микол қышқылдарының синтезін бәсеңдетеді. Туберкулезге қарсы бактерицидті белсенділігі бар. Бұл біріктірілген препарат постантибиотиктік әсерге ие, соның нәтижесінде туберкулездің микобактериялары монопрепараттардың әсеріне неғұрлым сезімтал бола түседі де, көбею қабілетін белгілі бір уақытқа жоғалтады.

Қолданылуы

• өкпе және басқа ағзалардың туберкулезі (біріктірілген емнің құрамында).

Қолдану тәсілі және дозалары

Емдеу курсын және препараттың дозасын аурудың сипаты мен түріне қарай емдеуші дәрігер жекелей тағайындайды.

РИЗЭФ 150/75 ересектерге және дене салмағы 30 кг-ден кем емес балаларға қарқынды емдеу фазасында 2 ай бойы күн сайын, демеуші емдеу фазасында – үзіліспен емдеу режимі бойынша (аптасына 2 рет) 4 ай бойы тағайындайды.

Рифампициннің тәуліктік дозасы 750 мг-ден аспауы тиіс. Бүкіл тәуліктік дозаны бір рет қабылдау ұсынылады.

Ең жоғары емдік әсерге жету үшін РИЗЭФ 150/75 ашқарынға қабылдайды - тамақ ішуден 1 сағат бұрын, немесе тамақтан кейін 2 сағат өткенде.

Препаратты қабылдауды өткізіп алса, өткізілген дозаны мүмкіндігінше тезірек, бірақ келесі дозаны қабылдауға дейін 6 сағаттан кем емес уақыт қалғанда қабылдау керек. Өткізіп алған жеке дозаның орнын толтыру үшін препараттың екі есе дозасын қабылдамау керек. Дәрігердің тағайындауы бойынша қолдану керек.

Жағымсыз әсерлері

Рифампицин

Рифампицинге күнделікті немесе үзіліспен емдеу кезіндегі реакцияларға мыналар жатады:

Тері реакциялары, олар спецификалы емес және аллергиялық реакцияларға ұқсамайды. 

- қышынумен немесе онсыз бөртпе

- есекжем

сирек:

- эксфолиативті дерматит, пемфигоид, эритема

- Стивенс-Джонсон синдромы, васкулит

Асқазан-ішек реакциялары: 

- тәбеттің жоғалуы, анорексия, жүрек айну, құсу

- ішектің шаншуы, іштегі жайсыздық, метеоризм, диарея

- жалған жарғақшалы колит

- гепатит

Орталық жүйке жүйесі:

- бас ауыруы, бас айналу, қажу, ұйқышылдық

- эйфория, елестеулер

сирек:

- психоздар

- тромбоцитопения пурпурамен және пурпурасыз

Егер пурпура пайда болғаннан кейін рифампицинді қабылдау тоқтатылмаса немесе қайта жалғастырылса, онда миға қан құйылуы немесе өліммен аяқталуы ықтимал.

- диссеминацияланған тамыр ішілік қан ұюы

- эозинофилия, лейкопения

- ісінулер, бұлшық ет әлсіздігі, миопатия

өте сирек:

- агранулоцитоз

сирек:

- бүйрекүсті безі жеткіліксіздігі

- несептің, тердің, қақырықтың, көз жасының, жанаспалы линзалардың қызыл түске боялуы

Үзіліспен емдеу кезінде болатын, және шығу тегі иммунологиялық болуы ықтимал реакциялар мыналарды қамтиды:

• қызбадан, қалтыраудан, бас ауыруынан, бас айналудан және сүйектердің ауыруынан тұратын "грипп синдромы", көбінесе емнің 3- 6 айлары кезінде пайда болады.  Синдромның жиілігі ауытқып тұрады, бірақ 25 мг/кг немесе одан көп рифампицинді екі аптада бір реттен артық қабылдаған пациенттердің 50%-на жетуі мүмкін.

• ентігу және қырыл

• қан қысымының төмендеуі, шок

• анафилаксия

• жедел гемолиздік анемия

• жедел бүйрек жеткіліксіздігі, әдетте, жедел тубулярлық некроздың немесе жедел интерстициальді нефриттің салдарынан.

Егер күрделі асқынулар туындаса, мысалы, бүйрек жеткіліксіздігі, тромбоцитопения немесе гемолиздік анемия, онда рифампицинді қабылдауды тоқтату және ешқашанда қайта жалғастырмау керек.

Туберкулезге қарсы құрамында рифампицин бар ұзақ мерзімдік ем алушы әйелдерде етеккір оралымының жекелеген бұзылыстары туындауы мүмкін.

Изониазид

Аллергиялық реакциялар:

- қызба, анафилаксиялық реакциялар, бөртпе, қышыну

Жүйке жүйесі:

- бас айналу

- полиневрит, парестезия, бұлшық ет әлсіздігі, сіңір рефлекстерінің жоғалуы

сирек:

- конвульсиялар, уытты энцефалопатия

- көру жүйкесінің невриті және атрофия

- жадының нашарлауы, уытты психоз

Эпилепсиясы бар пациенттерде ұстамалардың жиілігі артуы мүмкін

Тері реакциялары:

- есекжем, акне

- Стивенс-Джонсон синдромы, эксфолиативті дерматит, күлдіреуік

сирек:

- уытты эпидермалық некролиз, эозинофилия

Тамыр аурулары:

- васкулит

Гематологиялық:

- эозинофилия, агранулоцитоз, тромбоцитопения

- анемия, апластикалық анемия, гемолиздік анемия

Асқазан-ішек бұзылыстары:

- іш қату, ауыздың құрғауы, жүрек айну, құсу, панкреатит

Гепатобилиарлық жүйе: 

- гепатит, кейде өліммен аяқталатын

Ұрпақ өрбіту жүйесінің және кеуденің бұзылыстары: 

- гинекомастия

Метаболизм:

- гипергликемия

әртүрлі:

- пеллагра, жүйелі қызыл жегі

Қолдануға болмайтын жағдайлар

• препарат компоненттеріне жоғары сезімталдық

• көрудің бұзылуы (диабеттік ретинопатия, көру жүйкесінің зақымдануы)

• эпилепсия, құрысу ұстамаларына бейімділік

• полиомиелиттің анамнезде болуы

• инфекциялық гепатиттің анамнезде болуы, сарғаю

• тромбофлебит

• айқын атеросклероз

• бауыр функциясының бұзылуы

• бүйрек функциясының бұзылуы

• дене салмағы 30 кг-ден аз балалар

• жүктілік және лактация кезеңі

• 18 жасқа дейінгі балалар және жасөспірімдер

Дәрілермен өзара әрекеттесуі

Изониазидтің кейбір тежегіштік белсенділігі бар моноаминоксидазалары болатындықтан, құрамында тирамин бар өнімдермен (ірімшік, қызыл шарап) өзара әрекеттесу жүруі мүмкін. Құрамында гистамин бар тамақ өнімдеріндегі (мысалы, тунец және басқа тропиктік балықтар) диаминоксидазалар да бөгеліп, күшейген реакция тудыруы мүмкін (мысалы, бас ауыруы, тершеңдік, жүректің қағуы, гипотония). РИЗЭФ 150/75 қабылдайтын пациенттер құрамында тиамин және гистамин бар өнімдерден бас тартуы керек.

Басқа дәрілік заттармен өзара әрекеттесуі

P-450 цитохромы ферментімен өзара әрекеттесуі

Рифампицин Р-450 цитохромы ферментін индукциялайды, ал изониазид тежейді. Р-450 цитохромы ферментімен метаболизденетін препараттармен РИЗЭФ 150/75 бірге тағайындаған кезде сақ болу керек.

Рифампицинмен өзара әрекеттесуі

Р-450 цитохромы ферментімен метаболизденетін дәрілік заттарға мыналар мысал болып табылады:

• Аритмияға қарсы дәрілер (мысалы, дизопирамид, мексилетин, хинидин, пропафенон, токаинид)

• Эпилепсияға қарсы (мысалы, фенитоин)

• Гормон антагонисі (антиэстрогендер, мысалы тамоксифен, торемифен)

• Нейролептиктер (мысалы, галоперидол, арипипразол)

• Антикоагулянттар (мысалы, кумариндер)

• Имидазол (мысалы флуконазол, итраконазол, кетоконазол, вориконазол)

• Вирусқа қарсы (мысалы, саквинавир, индинавир, эфавиренц, ампренавир, нелфинавир, атазанавир, лопинавир, невирапин)

• Барбитураттар

• Бета-блокаторлар (мысалы, бисопролол, пропранолол)

• Анксиолитиктер және ұйықтататындар (мысалы, диазепам, бензодиазепиндер, зопиклон, золпидем)

• Кальций өзекшелерінің блокаторлары (мысалы, дилтиазем, нифедипин, верапамил, нимодипин, израдипин, никардипин)

• Бактерияға қарсылар (мысалы, хлорамфеникол, кларитромицин, дапсон, доксициклин, фторхинолондар, телитромицин)

• Кортикостероидтар

• Жүрек гликозидтері (мысалы, дигитоксин, дигоксин)

• Клофибрат

• Жүйелі гормондық контрацептивтер

• Эстроген

• Диабетке қарсы (мысалы, хлорпропамид, толбутамид, сульфонилмочевиналар, розиглитазон)

• Иммунодепрессанттар (мысалы, циклоспорин, сиролимус, такролимус)

• Қалқанша без гормондары (мысалы, левотироксин)

• Лозартан

• Анальгетиктер (мысалы, метадон, есірткілік анальгетиктер)

• Празиквантел

• Прогестагендер

• Хинин

• Рилузол

• 5-HT3 рецепторларының іріктелген антагонистері (мысалы, ондансетрон)

• CYP 3A4 метаболизденетін статиндер (мысалы, симвастатин)

• Теофиллин

• Үшциклдік антидепрессанттар (мысалы, амитриптилин, нортриптилин)

• Цитоуыттылар (мысалы, иматиниб)

• Диуретиктер (мысалы, эплеренон)

Ішілетін контрацептивтерді қолданатын пациенттерге, РИЗЭФ 150/75-пен ем жүргізу кезінде бала тууды бақылаудың гормондық емес әдістерін пайдалануды ұсыну керек. Бұдан бөлек, диабеті бар пациенттерге ерекше назар аударған жөн.

Рифампицинді саквинавир/ ритонавир біріктірілімімен қатар қолданған кезде гепатоуыттылық потенциалы ұлғаяды. Осылайша, РИЗЭФ 150/75-ті саквинавир/ ритонавир біріктірілімімен бір мезгілде қолдануға болмайды.

Басқа да өзара әрекеттесулер

Рифампицин мен атовахонды бір мезгілде қолданған кезде, атовахон концентрациясы төмендейді және рифампицин концентрациясы жоғарылайды.

Кетоконазол мен рифампицинді бір мезгілде пайдалану екі препараттың да қан сарысуындағы концентрациясының төмендеуіне әкелді.

Рифампицин мен эналаприлді бір мезгілде қолдану эналаприлаттың - эналаприл белсенді метаболитінің концентрациясының төмендеуіне әкелді. Егер пациенттің клиникалық жай-күйі көрсетілген болса, онда дозаға түзету жасалуы тиіс.

Бір мезгілде қолдану кезінде антацид рифампициннің сіңуін азайтуы мүмкін. Рифампициннің күнделікті дозасы антацидтерді қабылдаудан кемінде 1 сағат бұрын болуы тиіс.

Рифампицин галотанның немесе изониазидтің көмегімен немесе бір мезгілде берілсе, гепатоуыттылықтың ықтималдығы арта түседі. Рифампицин мен галотанды қатар қолданудан аулақ болу керек.  Рифампицин және изониазид алатын пациенттерде гепатоуыттылықты мұқият қадағалау керек.

Егер рифампицин пара-аминосалицил қышқылымен (PAS) бір мезгілде қабылданса, рифампициннің сарысудағы деңгейі азаюы мүмкін. Осылайша, препараттарды бір-бірінен кем дегенде сегіз сағат аралықпен қабылдау керек.

Изониазидпен өзара әрекеттесуі

Келесі препараттар изониазидпен өзара әрекеттесуі мүмкін:

Эпилепсияға қарсы (мысалы, карбамазепин және фенитоин).

Изониазидпен бір мезгілде ставудинді қабылдайтын пациенттерде дистальді сенсорлық невропатия қаупінің жоғарылауы байқалуы мүмкін.

АИТВ-жұқтырған пациенттерде зальцитабинді изониазидпен бір мезгілде қолдану бүйрек клиренсінің деңгейін шамамен екі есе ұлғайтады.

Изониазидтің және оның метаболиті ацетил изониазидтің метаболизмі алкогольді қабылдаған кезде өзгерген жоқ.  Изониазидтің метаболизмі созылмалы алкоголизммен ауыратындарда ұлғаюы мүмкін.

Бұл препараттарға тиісті түзетулер жасалуы тиіс.

Басқа да өзара әрекеттесулері

Парааминосалицил қышқылы изониазидтің және ацетилденуге бәсекелес ферменттердің плазмадағы концентрациясын және жартылай шығарылу кезеңін арттыруы мүмкін.

Жалпы анестетиктер изониазидтің гепатоуыттылығын ұлғайтуы мүмкін.

Изониазидтің сіңірілуі антацидтерді қабылдаған кезде төмендейді.

ОЖЖ уыттылық қаупі жоғарылайды, изониазидті бір мезгілде қабылдаған кезде циклосеринмен бірге беріледі.

Изониазид кетоконазолдың плазмадағы концентрациясының төмендеуіне және теофиллиннің плазмадағы концентрациясының ұлғаюына әкелуі мүмкін.

Зертханалық және диагностикалық тестілер

Рифампицинмен емдеу кезеңінде қан сарысуындағы фолий қышқылы мен В12 дәруменінің концентрацияларын анықтаудың микробиологиялық әдістерін қолдануға болмайды. Осылайша, талдаудың баламалы әдістерін қарастыру керек.  БСС және сарысудағы билирубиннің транзиторлық жоғарылауы ықтимал. Рифампицин өт шығару үшін бәсекелестік салдарынан, өт қабын қарап көру үшін пайдаланылатын контрастылы заттардың өттің шығарылуын нашарлатуы мүмкін. Осылайша, бұл сынақтар рифампициннің таңертеңгі дозасына дейін жүргізілуі тиіс.

Айрықша нұсқаулар

РИЗЭФ 150/75 белсенді 2 заттың бірігуінен тұрады, олардың әрқайсысының бауыр дисфункциясымен байланысы бар.

Туберкулезі бар науқастардың барлығында РИЗЭФ 150/75-пен емдеуді бастар алдында және бүкіл емдеу барысында бауыр функциясы бақылануы тиіс.

РИЗЭФ 150/75-пен ем алатын ересек пациенттерде бауыр ферменттерінің, билирубиннің, сарысудағы креатининнің базалық өлшемдері жүргізілуі, сондай-ақ қанға толық талдау жүргізілуі және тромбоциттер саны бақылануы тиіс.

Ем барысында пациенттерде қолайсыз реакцияларға байланысты симптомдардың бар-жоғын, кем дегенде, айына бір рет тексеріп тұру керек.

Бұзылыстары бар пациенттердің бәрі қажет болған жағдайда зертханалық тестілеуден өтуі тиіс. Алайда, 35 жастан асқан адамдар арасында изониазидпен астасқан гепатиттің жиілігі жоғары болғандықтан, трансаминазаны өлшеу осы жас тобына бастапқы деңгейінде және ем барысында, кем дегенде, айына бір рет жүргізілуі тиіс.  Гепатиттің жоғары қаупіне байланысты басқа факторларға күнделікті алкоголь тұтыну, бауырдың созылмалы аурулары және есірткілерді вена ішіне қолдану жатады.

Фруктоза жақпаушылығының тұқым қуалайтын сирек жағдайлары, глюкоза-галактоза мальабсорбциясы немесе сахараза-изомальтаза тапшылығы бар пациенттер бұл дәріні қабылдамауы тиіс.

Рифампицин

Рифампицинді білікті дәрігердің бақылауымен қабылдау керек.

Бауыр функциясының бұзылуы бар пациенттер рифампицинді қажет болған жағдайда ғана, сақтықпен және мұқият медициналық бақылау аясында қабылдауы керек. Бұл науқастарда рифампициннің төменірек дозалары және бауыр функциясына, әсіресе глутаминді пирожүзім трансаминаза сарысуына (SGPT) және глутаминді қымыздық-сірке трансаминаза сарысуына (SGOT) мұқият мониторинг жасау ұсынылады. Осы талдаулар ең алдымен емге дейін, екі апта бойы күн сайын, ал содан соң келесі апта бойы әр екі апта сайын жүргізілуі тиіс. Егер гепатоцеллюлярлық зақымдану белгілері байқалса, онда рифампицин тоқтатылуы тиіс.

Рифампицин сондай-ақ бауыр функциясында клиникалық елеулі өзгерістер жүрген жағдайда да доғарылуы тиіс.  Туберкулез саласындағы маманнан кеңес алу керек. Егер рифампицинді қабылдау бауыр функциясы қалыпты көрсеткіштеріне қайта оралғаннан кейін жалғастырылса, бауыр функциясы күн сайын бақылануы тиіс.

Бауыр функциясы бұзылған науқастарда, егде жастағы пациенттерде, әлсіреген пациенттерде және екі жасқа дейінгі балаларда рифампицинді изониазидпен бір мезгілде қабылдаған кезде сақ болу қажет.

Кейбір пациенттерде гипербилирубинемия емдеудің алғашқы күндерінде пайда болуы мүмкін. Бұл рифампицин және бауыр жасушаларының билирубинді экскрециялауы арасындағы бәсекелестік нәтижесінде туындайды. Билирубин деңгейінің және/немесе трансаминазалар деңгейінің орташа жоғарылауын көрсететін есеп өз алдына емдеуді тоқтатарлықтай көрсеткіш болып табылмайды. Деңгейлердегі өзгерістерді белгілеп және оларды пациенттің клиникалық жай-күйімен ұштастыра ескере отырып, тестілерді қайталағаннан кейін шешім қабылдануы тиіс.

Үзіліспен емдеу кезінде (кемінде аптасына 2-ден 3 ретке дейін) иммунологиялық реакция, анафилаксияны қоса, мүмкін болғандықтан, пациенттерді мұқият бақылау керек. Пациенттер дәрілік сызбаны үзіліспен алудан аулақ болғаны жөн, өйткені осындай реакциялар туындауы мүмкін.

Рифампицинде бүйрекүсті бездері гормондарын, қалқанша без гормондарын және D дәруменін қоса, эндогендік субстраттардың метаболизмін жоғарылатуы мүмкін индукция ферменттерінің қасиеттері бар.

Изониазид

Изониазидтің пайдаланылуын бауырдың ағымдағы созылмалы аурулары немесе бүйректің ауыр дисфункциясы бар пациенттерде мұқият бақылау керек. Изониазидпен ем жүргізуге байланысты, кейде өліммен аяқталатын гепатит, тіпті ұзақ айлар бойы емдегеннен кейін де пайда болуы және дамуы мүмкін.  Гепатиттің даму қаупі жасқа байланысты. Осылайша, пациенттерде шаршау, әлсіздік, дімкәстік, тәбеттің жоғалуы, жүрек айну немесе құсу сияқты гепатиттің хабаршы симптомдарының бар-жоғын бақылау жүзеге асырылуы тиіс. Егер осы симптомдар пайда болса немесе бауырдың зақымдануын білдіретін белгілер анықталса, онда изониазидпен ем жүргізу дереу тоқтатылуы тиіс, өйткені препаратты әрі қарай пайдалану мұндай жағдайларда бауыр зақымдануының одан да ауыр түрлерін туындатуы мүмкін.

Изониазидпен емдеумен бір мезгілде В6 дәрумені қажет болуы мүмкін егде немесе әлсіреген пациенттерді емдегенде сақ болу керек.

Изониазидтің пайдаланылуын баяу ацетилденуі, эпилепсиясы, психоз тарихы, шеткері невропатия тарихы, диабеті, алкогольге тәуелділігі, АИТВ-инфекциясы немесе порфириясы бар пациенттерде мұқият бақылау керек.

Дәрілік заттың көлік құралдарын немесе қауіптілігі зор механизмдерді басқару қабілетіне ықпал ету ерекшеліктері

Емдеу кезеңінде ерекше зейін қоюды және психомоторлық реакциялардың шапшаңдығын талап ететін қауіптілігі зор әрекет түрлерімен шұғылданудан тартыну керек.

Артық дозалануы

Рифампицин

Жүрек айну, құсу, іштің ауыруы, қышыну, бас ауыруы және сылбырлық ішке қабылдағаннан кейін аз уақыттың ішінде пайда болады, бауырдың ауыр сырқаты бар болса естен тануы мүмкін. Бауыр ферменттерінің және/немесе билирубин деңгейінің уақытша жоғарылауы мүмкін. Терінің, несептің, тердің, сілекейдің және нәжістің қоңыр-қызыл немесе қызғылт-сары түске боялуы ықтимал, оның қарқындылығы желінген мөлшеріне пропорционал. Гипотония, синустық тахикардия, қарыншалық аритмия, құрысулар және жүректің тоқтауы, кей жағдайларда өліммен аяқталуы ықтимал.

Өлімге ұшырататын немесе уытты ең аз дозасы анықталмаған. Әйтсе де, 9-дан 12 г дейінгі ауқымдағы рифампицин дозаларымен ересектерде фатальді емес артық дозалану тіркелген. Өлімге әкелетін жедел артық дозалану ересектерде 14-тен 60 г дейін рифампицин қабылдаған кезде тіркелген. Алкогольді шектен тыс тұтыну да өліммен аяқталуға дейінгі күрделілігі әртүрлі жағымсыз салдарлар тудырады.  1-ден 4 жасқа дейінгі педиатриялық науқастарда бір жыл ішінде 100 мг/кг дозада рифампицинді қабылдаған кезде артық дозаланудың күрделі емес жағдайлары болуы ықтимал.

Изониазид

Изониазидпен артық дозаланған кезде белгілер мен симптомдар қабылдағаннан кейін 30 минуттан 3 сағатқа дейінгі аралықта пайда болады. Жүрек айну, құсу, бас айналу, сөйлеудің бұзылуы, анық көрмеу, және көзге көрінетін елестеулер (жарқын түстер мен түсініксіз конструкцияларды қоса) ең ерте білінетін көріністердің біріне жатады. Айқын артық дозалану кезінде респираторлық дистресті және ОЖЖ депрессиясын күту керек. Ауыр метаболизмдік ацидоз, ацетонурия және гипергликемия зертханалық зерттеулердің типтік нәтижелері болып табылады.

Емі:

РИЗЭФ 150/75-пен артық дозаланған жағдайларда асқазанды шаюды мүмкіндігінше тезірек жүзеге асыру керек. Асқазанның ішіндегісін шығарғаннан кейін, белсенділендірілген көмірді қабылдау керек, ол қалған препаратты асқазан-ішек жолынан сіңірілуіне көмектесуі мүмкін. Қатты жүрек айну мен құсуды бақылауға алу үшін құсуға қарсы дәрілер қажет болуы мүмкін.

Изониазидпен артық дозалануға күдік туған кезде, тіпті симптомсыз науқастарда да, пиридоксинді (B6 дәрумені) вена ішіне енгізу қажет. Ұстамалары бар науқастарда құрысуға қарсы ем жүргізілуі тиіс. Күрделі жағдайлар үшін гемодиализ ұсынылады, егер ол мүмкін болмаса, қарқынды диурезбен бірге перитонеальді диализді пайдалануға болады.

Шығарылу түрі және қаптамасы

10 таблеткадан поливинилхлоридті немесе ұқсас импорттық үлбірден және баспалы лакталған алюминий немесе ұқсас импорттық фольгадан жасалған пішінді ұяшықты қаптамаға салынған.

Бірінші қаптамалар медициналық қолдану жөніндегі мемлекеттік және орыс тілдеріндегі нұсқаулықтың тиісті санымен бірге гофрланған картон жәшікке салынады.

Сақтау шарттары

Құрғақ, жарықтан қорғалған жерде, 25°C-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

«Павлодар фармацевтикалық зауыты» ЖШС.

Қазақстан, Павлодар қ., 140011, Қамзин к-сі, 33.

Қаптаушы

«Павлодар фармацевтикалық зауыты» ЖШС.

Қазақстан, Павлодар қ., 140011, Қамзин к-сі, 33.

Тіркеу куәлігінің иесі

«Павлодар фармацевтикалық зауыты» ЖШС, Қазақстан

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы

«Павлодар фармацевтикалық зауыты» ЖШС,

Қазақстан, Павлодар қ., 140011, Қамзин к-сі, 33.

Тел./факс: 8 (7182) 61-79-63/61-79-62, pfz.registration01-pp@romat.kz.