Ретровир® (100 мг)
Инструкция
-
русский
-
қазақша
Саудалық атауы
Ретровир®
Халықаралық патенттелмеген атауы
Зидовудин
Дәрілік түрі
100 мг капсулалар
Құрамы
Бір капсуланың құрамында
белсенді зат – 100 мг зидовудин,
қосымша заттар: жүгері крахмалы, микрокристалды целлюлоза, А типті натрий крахмалы гликоляты, магний стеараты,
қабықтың құрамы: титанның қостотығы Е171, желатин,
сия құрамы Opacode 10А1 немесе 10А2 қара: шеллак, темірдің қара тотығы (Е 172), пропиленгликоль, аммоний гидроксиді 28% (Opacode 10А1 үшін), концентрацияланған аммоний ерітіндісі (Opacode 10А2 үшін), калий гидроксиді (Opacode 10А2 үшін).
Сипаттамасы
Капсула корпусында қара түсті «GSYJU» коды бар, №3 ақ түсті қатты, мөлдір емес желатинді капсулалар. Капсула ішіндегісі – ақ немесе ақ дерлік ұнтақ.
Фармакотерапиялық тобы
Вирустарға қарсы жүйелі қолдануға арналған препараттар. Нуклеозидтер – кері транскриптаза тежегіштері. Зидовудин.
АТХ коды J05AF01
Фармакологиялық қасиеттері
Фармакокинетикасы
Ересектердегі фармакокинетикасы
Сіңуі
Зидовудин ішектен жақсы сіңеді. Биожетімділігі 60-70% құрайды. Зидовудин капсуласының 200 мг дозасын әрбір 4 сағат сайын ішке қабылдағаннан кейін орташа тепе-теңдік ең жоғарғы (Css max және Css min, тиісінше) 4,5 мкМ (немесе 1,2 мкг/мл) және 0,4 мкМ (немесе 0,1 мкг/ мл) құрайды.
Зидовудин вируспен зақымданған және зақымданбаған жасушаларда жасушалық тимидинкиназаның жәрдемімен монофосфаттық (МФ) туындыларға дейін фосфорланады.
Таралуы
Ересектерде ішке қабылдағаннан кейін 2-4 сағат өткеннен соң жұлын сұйықтығы мен қан плазмасындағы зидовудин концентрациясының арақатынасы 0,5 құрайды, ал балаларда 0,5-4 сағаттан соң ол 0,52-0,85-ке теңеседі. Зидовудин плацента арқылы өтіп, амниотикалық сұйықтықтан және ұрықтың қанынан табылады. Зидовудин сондай-ақ спермадан және емшек сүтінінен табылды. Егер 200 мг зидовудинді бір рет қабылдағаннан кейін препараттың ана сүтіндегі орташа концентрациясы қан плазмасындағы концентрацияға сәйкес болады. Препараттың плазма ақуыздарымен байланысуы – 34 - 38%, тиісінше орын басу механизмі бойынша басқа препараттармен бәсекелес байланысуы болжанбайды.
Метаболизм
5'-глюкуронид зидовудиннің негізгі метаболиті болып саналады, ол плазмадан да және несептен де табылады, оның мөлшері препарат дозасының шамамен 50-80%-ын құрайды, ол бүйрек арқылы шығарылады.
Шығарылуы
Жартылай шығарылудың орташа кезеңі, орташа жалпы клиренсі және таралу көлемі, тиісінше, 1,1 сағат, 27,1 мл/мин/кг және 1,6 л/кг құрайды.
Зидовудиннің бүйректік клиренсі креатинин клиренсінен әлдеқайда жоғары, бұл оның шығарылуы негізінен өзекшелік секреция жәрдемімен жүретіндігін көрсетеді.
Балалардағы фармакокинетикасы
Жасы 5-6 айлықтан асқан балалардағы фармакокинетикалық көрсеткіштері ересектердегі осындай көрсеткіштерге ұқсас.
Зидовудин ішектен жақсы сіңеді, биожетімділігі 60-74%, орташа алғандағы мәні 65% құрайды.
Негізгі метаболиті 5'-глюкуронид болып табылады. Зидовудиннің бүйректік клиренсі креатинин клиренсінен әлдеқайда жоғары, бұл оның шығарылуы негізінен өзекшелік секрецияның жәрдемімен жүретіндігін көрсетеді. Жасы 14 күнге толмаған жаңа туған нәрестелерде зидовудиннің глюкуронизациялануы төмендеп, бұдан әрі оның биожетімділігінің артуына, клиренсінің төмендеуіне және жартылай шығарылу кезеңінің ұзаруына ұласады. Жасы 14 күннен асқан нәрестелерде зидовудиннің фармакокинетикасы ересектердікіне ұқсас.
Егде жастағылар
65 жастан асқан емделушілерде фармакокинетикасын зерттеу бойынша жұмыстар жүргізілмеген.
Бүйрек функциясы бұзылуы
Бүйрек қызметінің ауыр жеткіліксіздігіне шалдыққан емделушілерде зидовудиннің қан плазмасындағы ең жоғарғы концентрациясы бүйрек қызметі бұзылмаған емделушілердікімен салыстырғанда 50%-ға жоғарылаған. Препараттың жүйелік экспозициясы (уақыт-концентрация арақатынасы қисығы астындағы аудан арқылы анықталады) 100%-ға жоғарылаған, препараттың жартылай шығарылу кезеңі елеулі өзгермейді. Бүйрек қызметінің жеткіліксіздігі жағдайында негізгі метаболит глюкуронидтің едәуір жиналып қалғаны байқалады, бірақ мұндайда уытты әсер ету белгілері білінбейді. Гемодиализ және перитонеальді диализ зидовудиннің шығарылуына ықпал етпейді, дегенмен мұндайда глюкуронидтердің шығарылуы күшейеді.
Бауыр функциясы бұзылуы
Бауыр қызметінің жеткіліксіздігі кезінде глюкуронизацияның төмендеуі салдарынан зидовудиннің жинақталып қалғаны байқалады, бұл препараттың дозасын өзгертуді қажет етеді, бірақ деректердің шектеулі болуына байланысты емделушілердің бұл категорияларына нақты ұсыныстар жоқ.
Жүкті әйелдерде
Жүктіліктің соңғы триместріндегі әйелдерде зидовудин фармакокинетикасы бойынша деректер бар. Жүктіліктің үдеуі барысында зидовудин жинақталу әсері байқалмаған. Зидовудин фармакокинетикасы жүкті емес әйелдердегі деректерге сәйкес болды. Зидовудиннің плацента арқылы өтуінің пассивті механизміне байланысты оның ұрық плазмасындағы концентрациясы анасының плазмасындағы концентрацияға сәйкес болды.
Фармакодинамикасы
Ретровир® – адамдағы иммунитет тапшылығы вирусын (АИВ) қоса есептегенде, ретровирустарға қатысты өте белсенді, вирустарға қарсы препарат.
Зидовудин-монофосфатының зидовудин ди- және трифосфатына (ТФ) дейін одан әрі фосфорлануы жасушалық тимидинкиназамен және спецификалық емес киназалармен тиісінше катализденеді.
Зидовудин трифосфаты (ТФ) вирустың кері транскриптазасы үшін тежегіш және субстрат ретінде әсер етеді. Вирустың ДНҚ-сының түзілуі оның тізбегіне зидовудин-ТФ енуі арқылы бөгеледі, бұл тізбектің үзілуіне әкеледі. АИВ кері транскриптазасы үшін зидовудин-ТФ бәсекелесуі адамның жасушалық ДНҚ α-полимеразасымен салыстырғанда шамамен 100 есе күшті. Ретровирдің® вирусқа қарсы басқа препараттарға (ламивудин, диданозин, интерферон-альфа, абакавир) қатысты антагонизмі жоқ.
АИВ қатынастан кейінгі профилактика
АИВ жұқпаланған қанның кездейсоқ әсерінен, мысалы инені кіргізіп алудан, АИВ жұқпасы берілудің алдын алу бойынша Халықаралық басшылық зидовудин және ламивудиннің (Эпивир™) біріктірілген емін әсер етуден кейін 1-2 сағат ішінде бастауды ұсынады.
Жұқтырудың жоғарырақ қаупі жағдайында емдеу режиміне протеаза тежегіштерін қосу керек. Төрт апта бойына антиретровирусты профилактиканы жалғастыру ұсынылады. Бұл ұсыныстарды демеу үшін бақыланатын клиникалық зерттеулер шектеулі. Тиісті антиретровирусты препараттармен емдеуге қарамастан, сероконверсия болуы мүмкін.
Қолданылуы
- балалар мен ересектерде АИВ-жұқпасын емдеу үшін біріктірілген антиретровирустық ем құрамында
- АИВ-тің АИВ-позитивті жүкті анадан ұрыққа трансплацентарлы берілу жиілігін азайту үшін
Қолдану тәсілі және дозалары
Ретровир® препаратымен емдеуді АИВ жұқтырған емделушілерді емдеу тәжірибесі бар дәрігер жүргізуі тиіс.
Дозаны толық қабылдауға кепілдік мақсатында, капсуланы аздаған мөлшердегі сумен іше отырып, бүтіндей жұту ұсынылады. Капсуланы тұтас жұта алмайтын емделушілер үшін капсуланы ашып, оның ішіндегі ұнтақты сұйық тамаққа немесе жартылай сұйық тамаққа қосып, дереу қабылдау керек.
Ересектер және салмағы 30 кг-дан жоғары жасөспірімдер
Басқа ретровирустарға қарсы препараттармен біріктірілімде ұсынылатын доза 300 мг-ден (3 капсула) тәулігіне екі рет.
Салмағы 21 кг-дан 30 кг дейін болатын балалар
Ұсынылатын доза тәулігіне екі рет 100 мг-ден екі капсуланы құрайды
Салмағы 21 кг-дан аз және 6 жастан кіші балалар
Берілген когорта үшін ішке қабылдауға арналған ерітінді түріндегі препаратты қолдану ұсынылады.
АИВ жұқпасының анадан ұрыққа берілуінің алдын алуға
Аурудың алдын алудың 2 сызбасы тиімді.
-
Жүкті әйелдерге Ретровир® препаратын жүктіліктіктің 14 аптасынан бастап босану басталғанға дейін тәулігіне 500 мг дозада (100 мг-ден тәулігіне 5 рет) ішуге тағайындау керек. Босану кезінде Ретровир® препаратын көктамыр ішіне 1 сағат бойына дене салмағының әр кг-на 2 мг дозада тағайындайды, содан соң кіндікке қысқыш салған кезге дейін 1мг/кг/сағат дозасында көктамырішілік инфузияны жалғастыру керек.
Жаңа туған балаларға туылғаннан кейін алғашқы 12 сағаттан 6 аптаға дейін әрбір 6 сағатта Ретровир® ерітінді түрінде 2 мг/кг есебімен ішке қабылдауға тағайындалады.
Дозаны дәл анықтау үшін дозалағыш еккіштің қолайлы өлшемін пайдалану керек. Егер жаңа туған балалар Ретровир® препаратын ішке қабылдай алмаса, онда оларға Ретровирді® әрбір 6 сағатта дене салмағына 1.5 мг/кг дозада көктамыр ішіне 30 минуттық инфузия түрінде тағайындау керек.
-
Жүктіліктің 36 аптасынан бастап босану басталғанға дейін Ретровир® препаратының дозасын 300 мг-ден тәулігіне 2 рет беріп, содан соң босану аяқталғанға дейін әрбір 3 сағат сайын 300 мг-ден қолдану ұсынылады.
Бүйрек қызметінің жеткіліксіздігінде
Бүйрек қызметінің ауыр жеткіліксіздігінде тәулігіне ұсынылатын доза 300-400 мг құрайды. Шеткергі қан тарапынан болатын реакцияларға және клиникалық әсерлеріне байланысты дозаға бұдан әрі де түзету енгізілуі мүмкін. Гемодиализ және перитонеальді диализ зидовудиннің элиминациясына әсер етпейді, сонымен бірге глюкуронидтің шығарылуы күшейеді. Бүйрек қызметі жеткіліксіздігінің терминальді сатысындағы, гемодиализде немесе перитонеальді диализдегі емделушілер үшін Ретровирдің®ұсынылатын дозасы – әрбір 6-8 сағат сайын 100мг-ден.
Бауыр қызметінің жеткіліксіздігінде
Бауыр циррозы бар емделушілерден алынған деректер глюкуронизация төмендеуі салдарынан зидовудин жинақталуы мүмкіндігін болжайды, бұл препарат дозасын түзетуді талап етуі мүмкін, бірақ деректердің шектеулі болуына байланысты емделушілердің аталған категориясы үшін нақты ұсыныстар жоқ. Егер плазмада зидовудиннің деңгейіне мониторинг жасау мүмкін болмаса, онда дәрігер аурудағы препарат жақпауының клиникалық белгілеріне ерекше көңіл бөлгені жөн және қажет болған жағдайда дозаға түзету енгізу және/немесе дозаларды енгізу аралығын ұзарту керек.
Қан түзу ағзалары тарапынан болатын жағымсыз реакциялар.
Ретровир® препаратының дозасын өзгерту немесе оны қабылдауды тоқтату қан түзу ағзалары тарапынан болатын жағымсыз реакциялары бар, мысалы, гемоглобин мөлшері 75-90 г/л-ге (4,65-5,59 ммоль/л) азайған немесе нейтрофилдердің саны 0,75-1,0 х 109/л-ге дейін төмендейтін емделушілерде қажет етілуі мүмкін.
Егде жастағы емделушілерде
65 жастан асқан емделушілерде зидовудиннің фармакокинетикасы зерттелген жоқ. Алайда жасқа байланысты бүйрек қызметінің төмендеуін, шеткергі қан көрсеткіштерінде болатын өзгерістерді есепке ала отырып, мұндай емделушілерге Ретровирді® тағайындаған кезде аса сақтық танытып, препаратпен емдеуді бастарда және емдеу кезінде оларға тиісті бақылау жасалуы керек.
Жағымсыз әсерлері
Жағымсыз әсерлерінің профилі ересектер мен балаларда ұқсас.
Өте жиі (>1/10), жиі (>1/100, <1/10), жиі емес (>1/1,000, <1/100), сирек (>1/10,000, <1/1,000), өте сирек (<1/10,000).
Өте жиі
- бас ауруы
- жүрек айнуы
Жиі
- анемия (гемотрансфузияны қажет етуі мүмкін), нейропения және лейкопения; бұл жағдайлар Ретровирдің® жоғарғы дозасын қабылдаған кезде (тәулігіне 1200-1500 мг) және ауыр дәрежелі АИВ жұқпасын жұқтырғандарда (әсіресе, емді бастар кезде сүйек кемігінің қоры азайған емделушілерде), көбіне CD4 жасушаларының саны 100/мм3 кем болғанда; мұндай жағдайда Ретровирдің® дозасын төмендету немесе қабылдауды тоқтату талап етілуі мүмкін; нейропенияның даму жиілігі емдеудің басында сарысудағы нейтрофильдер санының, гемоглобин мен B12 витамині мөлшерінің азаюы байқалған емделушілерде арта түседі.
- гиперлактатемия
- бас айналуы, дімкәстік
-құсу, іш аумағының ауыруы, диарея
- билирубин деңгейінің және бауыр ферменттерінің жоғарылауы
- миалгия
Жиі емес
- тромбоцитопения және панцитопения (сүйек кемігінің гипоплазиясымен)
- ентігу
- метеоризм
-тері бөртпесі, тері қышымасы
- миопатия
-қызба, ауыру синдромы, астения
Сирек
- қызыл өскіннің аплазиясы
- сүт қышқылды ацидоз
- анорексия
- май қабаттарының жинақталуы/ қайта таралуы (мультифакторлық этиологиясы бар, ішінара, антиретровирустық прерпараттармен біріктірілген емді пайдалану)
- ұйқысыздық, парестезиялар, ұйқышылдық, ойлау жылдамдығының төмендеуі, құрысулар
- кардиомиопатия
- ауыз қуысының шырышты қабатының пигментациясы, дәм сезінудің бұзылуы, диспепсия, панкреатит
- стеатозды айқын гепатомегалия
- тырнақтардың және терінің пигментациясы, есекжем және терлеудің күшеюі
- кіші дәреттің жиілеуі
- гинекомастия
-қалтырау, кеудедегі ауырулар, тұмауға ұқсас симптомдар
- жөтел
-мазасыздық, депрессия
Өте сирек
- апластикалық анемия
Бірнеше апта емдеуден кейін Ретровирге жүректің айнуы және өте кең таралған басқа да жағымсыз әсерлердің пайда болуы азаяды.
АИВ жұқпасының анадан ұрыққа берілуінің алдын алу үшін Ретровирді® қолданғанда пайда болатын жағымсыз реакциялар
Балаларда гемоглобиннің төмендегені байқалады, алайда бұл гемотрансфузия жүргізуді қажет етпейді. Ретровир® препаратымен емдеуді аяқтағаннан кейін 6 апта ішінде анемия жоғалады. Ретровир® препаратын қолданудың in utero және жаңа туған нәрестелердегі кейіннен болатын салдарлары белгісіз.
Қолдануға болмайтын жағдайлар
- зидовудинге немесе препараттың кез келген компонентіне өте жоғары сезімталдық
- нейтропения (нейтрофилдер саны 0,75х 109/ л-ден аз болса)
- гемоглобин деңгейінің төмендеуі (75 г/дл немесе 4,65 ммоль/ л-ден аз болса)
- дене салмағы 21 кг төмен 6 жасқа дейінгі балаларға
- лактация кезеңі
Сақтықпен: бауыр жеткіліксіздігінде
Дәрілермен өзара әрекеттесуі
Зидовудин көбіне белсенді емес метаболит түрінде бауыр метаболизмі арқылы шығарылатындықтан әсер ету механизмі (глюкоронизация) осыған ұқсас препараттар Ретровир® метаболизмін потенциалды бәсеңсіте алады.
Төменде көрсетілген препараттардың өзара әрекеттесуі тізімінен бәрі де көрсетілді деп санамаған жөн, алайда олар зидовудинмен бірге қолданылғанда сақтық танытуды қажет ететін препараттарға тән.
Атоваквон: зидовудин атоваквонның фармакокинетикасын бұзбайды. Алайда, фармакокинетика деректері атоваквон зидовудиннің оның метаболитіне метаболизмдену жылдамдығын төмендететінін көрсетеді (AUC зидовудиннің мақсатты концентрациясына жетуде 33% жоғарылады, глюкуронидтің плазмалық шыңдық концентрациясы 19% төмендеді). Зидовудинді тәулігіне 500 немесе 600 мг дозада жедел пневмоцистік пневмонияны емдеу үшін атоваквонмен бір уақытта үш апталық емге қолдану зидовудиннің плазмалық концентрациясының жоғарылауына байланысты жағымсыз реакциялар жылдамдығын жоғарылатуға алып келу ықтималдығы аз. Атоваквонмен ұзақ уақыт емдеу аясында аса сақ болу керек.
Кларитромицин: кларитромицин таблеткалары зидовудин сіңуін төмендетеді. Зидовудин мен кларитромицинді кемінде екі сағаттық аралықпен жеке-жеке қабылдау жолымен бұны болдырмауға болады.
Ламивудин: ламивудинмен бірге тағайындағанда зидовудиннің Сmax (28%) орташа жоғарылайды, алайда жалпы экспозициясы (AUC) мұндайда бұзылмайды. Зидовудин ламивудиннің фармакокинетикасына ықпалын тигізбейді.
Фенитоин: қанда фенитоинның концентрациясын төмендетеді, (фенитоин концентрациясы жоғарылауының бірлі-жарым жағдайлары бақыланған) бұл оны Ретровирмен® бірге тағайындағанда қандағы фенитоинның деңгейін бақылап отыруды қажет етеді.
Пробеницид: Зидовудиннің глюкуронизациясын төмендетеді және оның AUC мен орташа жартылай шығарылу кезеңін арттырады. Пробеницидтің қатысуымен глюкуронидтің және зидовудиннің өзінің бүйрек арқылы шығарылуы төмендейді.
Рифампицин: Рифампицинмен біріктіру зидовудиннің AUC 48%+34% төмендетеді, бірақ бұл өзгерістің клиникалық мәні белгісіз.
Ставудин: зидовудин ставудиннің жасушаішілік фосфорлануын төмендетуі мүмкін, осыған байланысты препараттарды бірге қолдану ұсынылмайды.
Басқалары: мынандай дәрілік заттар: аспирин, кодеин, метадон, морфин, индометацин, кетопрофен, напроксен, оксазепам, лоразепам, циметидин, клофибрат, дапсон, изопринозин, бауырда глюкуронизацияны бәсекелі түрде тежеу немесе микросомальді метаболизмді тікелей басу арқылы, зидовудиннің метаболизмін бұзуы мүмкін.
Осы препараттарды Ретровирмен® бірге қолдану мүмкіндігіне, әсіресе ұзақ уақыт қолданғанда, сақтық танытқан жөн.
Ретровирді® әсіресе нефроуытты және миелоуытты деп саналатын препараттармен (мысалы, пентамидинмен, дапсонмен, пириметаминмен, ко-тримоксазолмен, амфотерицинмен, флюцитозинмен, ганцикловирмен, интерферонмен, винкристинмен, винбластинмен, доксорубицинмен) бірге жедел жағдайларды емдеу кезінде біріктіру Ретровирге® жағымсыз реакциялардың даму қаупін арттырады. Бүйрек функциясын, қан көрсеткіштерін қадағалап, егер керек болса, препараттың дозасын төмендету қажет.
Оппортунистік жұқпаларды ко-тримоксазол, пентамидин, аэрозоль түрінде пириметамин және ацикловир препараттарымен емдеу Ретровирдің® жағымсыз реакцияларының пайда болу жиілігінің елеулі қаупімен қатар жүрмейді.
Резистенттілігі
Тимидин аналогтарына (зидовудин – олардың бірі) резистенттіліктің дамуы АИВ кері транскриптазаның 6 кодонындағы (41, 67, 70, 210, 215 и 219) спецификалық мутацияның біртіндеп пайда болуы нәтижесінде жүреді. Вирустар 41 және 215 кодондарындағы мутация біріктірілімі немесе ең кемі 6 мутацияның 4 бойынша жинақталу нәтижесінде тимидин аналогтарына фенотиптік резистенттілікке ие болады. Мутациялар басқа нуклеозидтарға айқаспалы резистенттілік туындатпайды, бұл АИВ жұқпаларын емдеу үшін кері транскриптазаның басқа тежегіштерін қолдануға мүмкіндік береді.
Мутацияның екі түрі көптеген дәрілік резистенттілік дамуына алып келеді.
Мутацияның бір жағдайында 62, 75, 77,116 және 151кодондарында АИВ кері транскриптазасы жүреді, және екінші жағдайда сөз азотты негіздің 6-шы жұбы қалпына осы позицияға сәйкес кірістірмесі бар T69S мутация туралы, бұл зидовудинге, сондай-ақ кері транскриптазаның басқа нуклеозидті тежегіштеріне фенотиптік резистенттілік пайда болуымен қатарлас жүреді.
Осы мутациялардың екі түрі де АИВ жұқпасындағы емдеу мүмкіндіктерін елеулі шектейді. Зидовудинге сезімталдықтың төмендеуі Ретровирмен® АИВ жұқпасын ұзақ емдеуде байқалды. Қолда бар деректер АИВ жұқпасының ерте сатыларында сезімталдықтың жиілігі мен дәрежесі төмендеуі аурудың кешеуілдеген сатыларына қарағанда in vitro едәуір аздығын көрсетеді.
Қазіргі кезде зидовудинге in vitro сезімталдығы мен емнің клиникалық әсері арасындағы байланыс әлі зерттелмеген. Зидовудинді ламивудинмен біріктірілімде қолдану, егер емделушіге бұрын антиретровирусты терапия жүргізілмесе, сондай жағдайда ғана зидовудинге вирустың резистентті штамдарының пайда болуын іркеді. Зидовудин біріктірілген антиретровирусты терапияда кері транскриптазаның басқа нуклеозидты тежегіштерімен және басқа топтың препараттарымен (протеаза тежегіштерімен, кері транскриптазаның нуклеозидты емес тежегіштерімен ) бірге қолданылады.
Айрықша нұсқаулар
Емделушілер Ретровирді® емдеуші дәрігерді хабардар етпей басқа препараттармен бірге қолданудың қауіптілігі жөнінде және Ретровирді® қолдану АИВ жұқпасының жыныстық қатынас немесе жұқпаланған қан арқылы жұғуының алдын ала алмайтындығы жөнінде хабардар болуы тиіс. Мұндайда тиісті қауіпсіздік шаралары қажет болады.
Ретровир® АИВ жұқпасын емдеп жаза алмайды және емделушілер арасында иммунитеті төмендейтін және оппортунистік жұқпалар мен қатерлі ісіктер пайда болатын аурудың толық көрінісінің даму қаупі сақталады. Препараттың оппортунистік жұқпалардың даму қаупін төмендететіні көрсетілген, алайда лимфоманы қоса, жаңа түзілімдер дамуы бойынша деректер шектеулі. АИВ жұқпасының кеш сатысында ем қабылдаған емделушілер туралы деректер лимфоманың даму қаупі емделмеген емделушілердегіге ұқсас екенін көрсетеді. Ұзақ уақыттық терапияда жүрген АИВ ауруының ерте сатысындағы емделушілерде лимфома дамуының қаупі белгісіз.
Халықаралық нұсқауларға сай, АИВ-ті қан арқылы абайсызда жұқтырған кезде шұғыл түрде, жұқтырғаннан кейінгі алғашқы 1-2 сағаттың ішінде, Ретровирмен® және Эпивирмен біріктірілген ем тағайындау керек. Жұқтыру қаупі жоғары болған жағдайда емдеу үлгісіне протеаза тежегіштері тобына жататын препараттар енгізілуі тиіс. Алдын алу емін 4 апта бойы жүргізу керек. Емнің осындай антиретровирустық препараттармен тез басталғанына қарамай-ақ, сероконверсия бәрібір болуы мүмкін.
Ретровирдің® жағымсыз реакциялары ретінде қабылданатын симптомдар негізгі аурулардың белгісі немесе АИВ жұқпаларын емдеу үшін қолданылатын басқа препараттарды қабылдағанға реакциялар болуы мүмкін. Дамыған симптомдар мен Ретровирдің® әсерінің өзара байланысын, әсіресе АИВ жұқпаларының клиникалық толық картинасында анықтау өте қиын. Бұндай жағдайларда препараттың дозасын төмендету немесе оны тоқтату керек.
Қан тарапынан болатын жағымсыз реакцялар
Анемия (әдетте Ретровирді® бастап қолданғаннан кейін 6 аптадан соң байқалады, бірақ кейде одан да ерте пайда болуы мүмкін); нейтропения (әдетте Ретровирмен® емдеуді бастағаннан кейін 4 аптадан соң дамиды, кейде одан да ерте пайда болады); лейкопения Ретровирді®, әсіресе жоғарғы дозада (тәулігіне 1200 мг - 1500 мг), қабылдап жүрген және емді бастағанға дейін сүйек кемігінде қанның түзілуі төмендеген, АИВ жұқпасының клиникалық көрінісі толық емделушілер арасында кездесуі мүмкін.
Ретровирді® қабылдау кезінде АИВ жұқпасының толық клиникалық көрінісі бар емделушілерде емнің алғашқы 3 айы ішінде 2 аптада кем дегенде бір рет, содан кейін ай сайын қан талдауларын қадағалап отыру қажет. ЖИТС-тің бастапқы сатыларында (сүйек кемігінің қан түзуі әлі де қалыпты жағдайда болғанда) қан тарапынан жағымсыз реакциялардың дамуы сирек, сондықтан қан талдауы емделушінің жалпы жағдайына байланысты сирек, 1-3 айда бір рет жүргізіледі. Егер гемоглобиннің мөлшері 75-90 г/л-ге (4,65-5,59 ммоль/л) дейін төмендесе, нейрофильдер саны 0,75x109/л -1,0x109/л төмендейді, онда Ретровирдің® тәуліктік дозасы қан көрсеткіштері қалпына келгенше азайтылуы тиіс, немесе Ретровир® қабылдауды қан көрсеткіштері қалпына келгенше 2-4 аптаға тоқтатылады. Әдетте қан көрінісі 2 аптадан кейін қалпына келеді, одан соң Ретровирдің® төмен дозалары қайтадан тағайындалуы мүмкін. Ретровирдің® дозасын төмендеткенге қарамастан, айқын анемиясы бар емделушілер қан құюды қажет етеді.
Сүтқышқылды ацидоз және стеатозды айқын гепатомегалия.
Сүтқышқылды ацидоз және бауырдың майлы дистрофиясы бар айқын гепатомегалия, оның ішінде өліммен аяқталатыны бар, нуклеозидтардың антиретровирустық аналогтарын монотерапия режимінде, сондай-ақ және Ретровирмен® біріктірілімде тіркелген. Бұл асқынулардың даму қаупі әйелдерде басым болып келеді. Ретровирді® сүт қышқылы ацидозының гепатиті бар немесе гепатиті жоқ зертханалық (бұнда тіпті маркер-трансаминаза деңгейі жоғарыламаған жағдайда да гепатомегалия және стеатоз болуы мүмкін) немесе клиникалық (жалпы әлсіздік, анорексия, кенеттен және түсініксіз салмақ жоғалту, гастроинтестинальді симптомдар, ентігу, тахипноэ) белгілері білінуінің барлық жағдайларында тоқтату керек.
Бауыр жеткіліксіздігі дамуы үшін белгілі қауіп факторлары бар емделушілерге Ретровир® препаратын сақтықпен қолдану керек.
Май шөгінділерінің қайта таралуы
Біріктірілген антиретровирусты ем қабылдаушыларда май шөгінділерінің жинақталуы/қайта таралуы, орталықтық семіруді қоса алғанда, дорсоцервикальді типті (буйвол өркеші) семіру, бет аумағын қоса шеткергі жиналуы, гинекомастия, қанда липидтер және глюкоза деңгейінің жоғарылауы кейбір емделушілерде жеке түрде немесе бірге бақыланды.
Сонымен қатар протеаза тежегіштері және кері нуклеозид транскриптаза тежегіштері тобының барлық препараттары липодистрофияның жалпы синдромына біріктірілетін жоғарыда аталған жағымсыз әсерлердің біреуінің және одан көп пайда болуымен ассоцияланатындықтан, деректер тиісті терапевтік кластардың жеке топтары емделушілері арасында липодистрофия туындау қаупінде айырмашылық бар екенін көрсетеді.
Бұдан басқа, липодистрофия синдромына көп факторлық тән: АИВ ауруы сатысы, жасының үлкендеу болуы және антиретровирусты терапия жүргізілу уақытының ұзақтығы, бәрі жиналып синергетикалық рөл атқаруы мүмкін.
Қазіргі уақытта бұл әсерлердің ұзақ мерзімдік салдары анықталмаған. Майдың қайта таралу белгілерін физикальді бағалау клиникалық зерттеуге қамтылуы тиіс. Қандағы сарысулық липидтер мен глюкоза деңгейін анықтау туралы мәселені шешу керек. Липидтер деңгейінің бұзылуы тиісті клиникалық шешімді талап етеді.
Иммунитетті қалпына келтірудің қабыну синдромы
Күрделі иммунитет тапшылығы бар АИВ жұқтырған емделушілерде антиретровирусты терапия (АРТ) басында симптомсыз немесе қалдық шартты-патогенді жұқпаларға қабыну реакциялары қатарлас аурулардың клиникалық симптомдарының төмендеуін туындатуы мүмкін. Әдетте АРТ басталған бастапқы бірнеше апта немесе ай ішінде цитомегаловирусты ринит, жайылған және/немесе ошақты микобактериялық жұқпа және пневмоцистті пневмония байқалған. Кез келген қабыну симптомдарын мезгілінде анықтау керек және қажет болғанда қабынуға қарсы тиісті терапия жүргізілгені жөн. Иммунитетті қалпына келтірудің қабыну синдромында аутоиммундық бұзылудың (полимиозит, Джуллиан-Барр синдромы, диффузды уытты зоб) туындау жағдайлары туралы хабарланған, алайда аурудың басы біршама ауытқымалы – ем басталғаннан бастап бірнеше айға дейін және типке жатпайтын симптомдармен қатар жүруі мүмкін.
Қатарлас жүретін С гепатиті вирусты жұқпасы бар емделушілер
АИВ емдеуде АРТ құрамында Ретровирмен® үйлестіре емдеу аясында рибавирин қабылдауға байланысты анемия асқынуы бақыланған; өзара әрекеттесудің дәл механизмі анықталмаған. Рибавирин мен Ретровирді® бір мезгілге тағайындау ұсынылмайды, бұл арада АРТ құрамында зидовудин болған жағдайда оны алмастыру туралы мәселені шешу керек. Бұл сыртартқысында зидовудинмен емдеу аясында анемиясы болған емделушілерде ерекше маңызды.
Жүктілік және лактация кезеңі
Фертильділік
Ретровир® препаратының әйелдің бала туу функциясына әсері туралы деректер жоқ. Еркектерде Ретровир® препаратын қабылдау шәуһет құрамына, морфологиясына және сперматозоидтардың қозғалғыштығына әсер етпейді.
Жүктілік
Зидовудин плацента арқылы өтеді. Егер анаға келетін пайда ұрыққа келетін зияннан басым болса ғана, Ретровирді® жүктіліктің 14 аптасына дейін қолдануға болады.
Жүктілік кезінде АИВ ұрыққа берілуінің алдын алу үшін Ретровир® қолдануды ойластырған жүкті әйелдер жүргізілген емге қарамастан ұрықтың жұқпалану қаупі болатыны туралы хабардар болуы тиіс.
АИВ жұқпасының анадан ұрыққа берілуінің алдын алу
Ретровирді жүктіліктің 14 аптасынан кейін қолдану, содан соң жаңа туған нәрестеге тағайындау АИВ жұқпасының анадан балаға берілу жиілігін төмендетеді. Ұрық сарысуында сүт қышқылы деңгейінің елеусіз және өтпелі жоғарылауы анықталды, бұл митохондриальді дисфункциядан туындауы мүмкін. Бұл фактінің клиникалық мәні белгісіз. Сондай-ақ аналары Ретровир® қабылдаған балаларда өте сирек жағдайларда дамуында іркіліс, құрысулар дамуы және басқа да неврологилық бұзылулар туындауы туралы деректер бар, алайда препарат қабылдау мен аталған патология арасында тікелей өзара байланыс анықталмаған. Алынған деректер АИВ жұқпасының вертикальді берілуін болдырмау үшін Ретровирді® қолдану ұсыныстарына әсер етпейді. Ретровирді® жатыр ішінде немесе неонатальді кезеңде қабылдаған балаларда оның кейінгі зардаптары белгісіз. Канцерогендік әсерін толық жоққа шығаруға болмайды, жүкті әйелдер бұдан хабардар болуы тиіс.
Лактация
АИВ жұқпасы бар әйелдерге бала емізу ұсынылмайды, алайда басқаша тамақтандыру мүмкін болмағанда антиретровирусты емде жүрген әйелдердің бала емізу мүмкіндігін қарастыруда ресми ұсыныстарға жүгіну керек.
Ретровир® препаратын 200 мг дозада тағайындауда емшек сүтіндегі зидовудин концентрациясы плазма сарысуындағыға сәйкес болатынын ескеру керек.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Ретровир® препаратының автомобильді және басқа да механизмдерді басқару қабілетіне ықпалы зерттелген жоқ. Алайда осы қабілеттерге жағымсыз ықпалын тигізуі неғайбыл. Сонда да, автомобилді және басқа да механизмдерді басқару жөнінде мәселені шешкен кезде, Ретровир® препаратын қабылдаған кездегі емделушінің жағдайын және жағымсыз әсерлердің (бас айналу, ұйқышылдық, есеңгіреу, құрысулар) пайда болуы мүмкін екендігін ескерген жөн.
Артық дозалануы
Симптомдары: Ретровир® препаратымен артық дозалануда белгіленген қажығыштық, бас ауыруы, құсу және қан көрсеткіштері тарапынан сирек өзгерістер сияқты жағымсыз реакциялардан басқа спецификалық симптомдары немесе белгілері анықталмады.
Емдік концентрациялармен салыстырғанда зидовудиннің плазмадағы деңгейінің 16 есе артуы тіркелген, бұл қандай да бір клиникалық, биохимиялық немесе гематологиялық салдарлармен қатарлас жүрмеген.
Емі: емделушіде уыттану белгілерінің дамуына бақылау жасау және симптоматикалық демеуші ем. Зидовудинді ағзадан шығару үшін гемодиализ бен перитональді диализдің тиімділігі жоғары емес, бірақ оның метаболиті глюкуронидтің шығарылуын күшейтеді.
Шығарылу түрі және қаптамасы
Поливинилхлоридті үлбірден және алюминий фольгадан жасалған пішінді ұяшықты қаптамаға 10 капсуладан салынған.
10 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.
Сақтау шарттары
Құрғақ, жарықтан қорғалған жерде, 300С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
5 жыл
Жарамдылық мерзімі өткеннен кейін пайдалануға болмайды.
Дәріханалардан босатылу шарттары
Рецепт арқылы
Өндіруші
S.C. Europharm S.A., Румыния
(2 Panselelor str., 500419, Brasov)
Қаптаушы
S.C. Europharm S.A., Румыния
(2 Panselelor str., 500419, Brasov)
Тіркеу куәлігінің иесі
ViiV Healthcare UK Limited, Ұлыбритания
(980 Great West Road, Brentford, TW8 9GS)
Ретровир ViiV Healthcare компаниясы тобының тіркелген сауда белгісі болып табылады
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы
Қазақстандағы ГлаксоСмитКляйн Экспорт Лтд өкілдігі
050059, Алматы қ-сы, Фурманов к-сі, 273
Телефон нөмірі: +7 7019908566, +7 727 258 28 92, +7 727 259 09 96
Факс нөмірі: + 7 727 258 28 90
Электрондық поштасы: kaz.med@gsk.com