Ретинола ацетат (3.44%)

• русский
• қазақша

• Скачать инструкцию медикамента

Саудалық атауы

Ретинол ацетаты

Халықаралық патенттелмеген атауы

Ретинол

Дәрілік түрі

Ішуге және сыртқа қолдануға арналған 3,44% және 8,60% майлы ерітінді, 10 мл, 50 мл

Құрамы

1 литр препараттың құрамында

белсенді зат: 34.4 г немесе 86.0 г ретинол ацетаты немесе 1500000 ХБ/г 66.67 г немесе 166.67 г майлы концентрат немесе 2800000 ХБ/г 35.72 г немесе 89.29 г майлы концентрат,

қосымша заттар: бутилокситолуол (2,6-дитретбутил-п-крезол, рафинирленген иіссіздендірілген күнбағыс майы.

Сипаттамасы

Ақшыл сарыдан күңгірт сарыға дейінгі, қышқыл иісі жоқ мөлдір майлы ерітінді.

Фармакотерапиялық тобы

Витаминдер. А және Д витамині және олардың біріктірілімі. А витамині. Ретинол.

АТХ коды А11СА01

Фармакологиялық қасиеттері

Фармакокинетикасы

Асқазан-ішек жолынан тез сіңіріледі (негізінен 12 елі ішек пен аш ішектен), өт қышқылдарының, панкреатиптік липазаның, ақуыздар мен майлардың болуы қажет. Плазма ақуыздарымен (липопротеиндермен) байланысы қалыптыда – 5%-дан аз; А витаминін тамақпен шамадан тыс пайдаланғанда және олармен бауыр депосының толып кетуінде, оның плазма липопротеиндермен байланысы 65%-ға дейін жетуі мүмкін. Липопротеиндермен байланысқан А витаминінің мөлшері гиперлипопротеинемия кезінде артуы мүмкін. Бауыр депосынан босап шыққан кезде А витамині ретинол-байланыстырғыш ақуызбен кешен түзеді, осы күйінде қан айналымында болады. Азғантай мөлшерде ана сүтіне және плацента арқылы өтеді. Бауырда (ересек организмінің шамамен екі жылдық қажеттілігі мөлшерінде), азғантай мөлшерлерде – бүйректе, өкпеде жинақталады. А витаминін деподан мобилизациялау үшін құрамында мырыш бар заттар қажет.

Бауырда метаболизденеді. Тік ішек арқылы (сіңбеген бөлігі) және бүйрекпен шығарылады.

Фармакодинамикасы

А витамині жалпылама нығайтқыш әсер береді, тіндік алмасуды қалыпқа түсіреді; мукополисахаридтердің, ақуыздардың, липидтердің синтезінде, минерал алмасуында, холестерин түзілу үдерістерінде (көп мөлшердегі қанықпаған байланыстардың салдарынан) тотығу-тотықсыздану үдерістеріне қатысады. Липаза мен трипсин өндірілуін күшейтеді, миелопоэзді, жасушалық бөлініс үдерістерін күшейтеді. Организмінің жұқпаға төзімділігін арттырады. Терінің эпителий жасушаларының бөлінуін күшейтеді, кератинизация үдерістерін тежейді, гликозаминогликандар синтезін күшейтеді. Фоторецепция үдерістеріне қатысады (қараңғылыққа көру арқылы бейімделуді жақсартады).

Қолданылуы

• А гиповитаминоз, авитаминозында

А витаминіне жоғары қажеттілікпен қатар жүретін жағдайларда кешенді емдеуде:

• жұқпалы-қабыну ауруларында (соның ішінде созылмалы) және «суық тию» ауруларында

• тері зақымданулары мен аурулары (I дәрежелі үсікте, 1 дәрежелі күйіктер, ихтиоз, гиперкератоз, себореялық дерматит, псориаз, нейродерматит, экземаның кейбір түрлері)

• көз ауруларында (пигменттік ретинит, гемералопия, ксерофтальмия, кератомаляция, қабақтың экзематоздық зақымдануы)

• ретинолдың сіңуінің бұзылуымен байланысты (гастроэктомия, диарея, стеаторея, целиакия, Крон ауруы, мальабсорбция синдромы) асқазан-ішек ауруларында

Қолдану тәсілі мен дозалары

90000-нан 110000 ХБ дейінгі 1 мл майлы ерітіндідегі ретинол ацетатының мөлшері 3,44 % және 225000-нан 275000 ХБ дейінгі 1 мл майлы ерітіндіде – 8,6 % .

Препаратты қолдануды, әсіресе көп дозаларда қолданылуын дәрігердің қадағалауымен жүргізу қажет. Препаратты таңертең ерте немесе кешке (тамақтан кейін 10-15 минуттан соң) ішеді.

Ересектерге арналған ең жоғары бір реттік емдік дозасы – 50000 ХБ, тәуліктік дозасы – 100000 ХБ; балалар үшін сәйкесінше – 5000 ХБ және 20000 ХБ.

Жеңіл және орта дәрежелі авитаминоздарда емдік мақсатта ересектерге тәулігіне 33000 ХБ дейін (ретинол ацетаты, 3,44 % майлы ерітінді - 6 тамшы), 7 жастан асқан балаларға – тәулігіне 5000 ХБ (1 тамшы ретинол ацетаты, 3,44 % майлы ерітіндісі) тағайындайды.

Көз ауруларында ересектерге тәулігіне 50000 – 100000 ХБ (3,44% ретинол ацетатының майлы ерітінді - 10-20 тамшы) және бір мезгілде 0,02 г рибофлавин тағайындайды. Балаларға жас шамасына байланысты тәулігіне 1000-нан 5000 ХБ дейін береді.

Тері аурулары кезінде ересектерге тәулігіне 50000-100000 ХБ ретинол ацетатын және балаларға 5000-10000-20000 ХБ тағайындайды.

Емдеу ұзақтығын аурудың сипаты мен ауырлығына байланысты дәрігер анықтайды.

Үсігенде, күйіктерде сыртқа тағайындайды. Зақымдалған жерді тазартқаннан кейін ерітіндімен майлайды және дәке таңғышпен жауып қояды (тәулігіне 5–6 ретке дейін, тыртықтануы мен эпителиленуіне қарай майлау жиілігін тәулігіне 1 ретке дейін қысқартады), бір мезгілде ретинолды ішке немесе бұлшықет ішіне тағайындайды.

Жағымсыз әсерлері

- аллергиялық реакциялар

А витаминін ұзақ уақыт бойы күн сайын қабылдау уыттану, А гипервитаминозын тудырады. Ересектердегі А гипервитаминозы симптомдары – бас ауыруы, ұйқышылдық, енжарлық, бет гиперемиясы, жүрек айнуы, құсу, аяқ сүйектерінің ауыруы, жүріс-тұрыстың өзгеруі. Балаларда: температура жоғарылауы, ұйқышылдық, тершеңдік, құсу, тері бөртпелері байқалуы мүмкін.

Қолдануға болмайтын жағдайлар

• • препарат компоненттеріне жоғары сезімталдық

  • А гипервитаминозы

  • өттас ауруы

  • созылмалы панкреатит

  • терінің жедел қабыну аурулары

  • 7 жасқа дейінгі балалар

• жүктілік

Сақтықпен: нефрит, II-III дәрежелі жүрек жеткіліксіздігі, маскүнемдік, бауыр циррозы, вирустық гепатит, бүйрек жеткіліксіздігі, егде жастағылар.

Дәрілермен өзара әрекеттесуі

Тетрациклиндермен ұзақ уақыт емдеу кезінде А витаминін тағайындау ұсынылмайды (бассүйекішілік гипертензияның даму қаупі артады).

Салицилаттар мен глюкокортикостероидтар жағымсыз әсерлердің даму қаупін азайтады. Ретинол глюкокортикоидтардың қабынуға қарсы әсерін төмендетеді.

Колестирамин, колестипол, нитраттар, минералды майлар, неомицин А витаминінің сіңірілуін азайтады (дозасын арттыру қажет болуы мүмкін).

Ішу арқылы қабылданатын контрацептивтер плазмадағы А витаминінің концентрациясын ұлғайтады.

Изотретиноин уытты әсерінің туындау қаупін арттырады.

D гипервитаминозының қауіптілігін (өзара) азайтады.

Кальций препараттарының әсерін әлсіретеді, гиперкальциемияның даму қаупін арттырады.

Ретинолдың әсерін токоферол мен оның препараттары күшейтеді.

Айрықша нұсқаулар

Жекелеген жағдайларда қолданудың алғашқы күні қышитын таңдақты-папулездік бөртпелер туындауы мүмкін, бұл препаратты тоқтатуды қажет етеді.

Дозасын азайтқанда немесе препаратты уақытша тоқтатқанда жағымсыз әсерлері өздігінен кетеді.

А витаминінің көп дозаларын қабылдаған жағдайда өттас ауруының және созылмалы панкреатит өршуі байқалуы мүмкін.

Жүктілік және лактация

Қазіргі кезде препаратты жүктілік кезінде күнделікті ұсынылған дозаларында қабылдағандағы жағымсыз әсерлері туралы деректер жоқ (А витамині азғантай мөлшерде плацента арқылы өтеді). Алайда ұсынылған дозаларынан асырған кезде ұрықта несеп шығару жүйесі дамуының ақауы, жатырішілік даму тежелісі, эпифизарлық өсу аймақтарының ерте жабылып қалуы туындауы мүмкін. А витамині препараттарын жүктілік кезінде қолдану ұсынылмайды. Ретинолдың артық дозаларының тератогендік әсері оны қабылдауды тоқтатқаннан кейін сақталады, сондықтан препаратты қолданып жүргенде жүктілікті тек 6-12 айдан кейін ғана жоспарлау ұсынылады. Фетоуытты әсерлер қаупін болдырмас үшін, жүкті әйелдер мен бала емізетін әйелдерге ұсынылған ең жоғарғы дозасын – 1,8 мыңRE/тәул (6мыңХБ/тәул.) асырмауы тиіс.

Артық дозалануын болдырмас үшін, құрамында А витамині бар басқа поливитаминдік кешендермен бір мезгілде қолдануға болмайды.

Дәрілік заттың көлік құралдарын немесе қауіптілігі зор механизмдерді басқару қабілетіне ықпал ету ерекшеліктері

Мәлімет жоқ.

Артық дозалануы

Жедел артық дозалану симптомдары (қабылдағаннан кейін 6 сағаттан соң дамиды), А гипервитаминозының ересектердегі білінуі: ұйқышылдық, енжарлық, қосарланып көріну, бас айналуы, қатты бас ауыруы, жүрек айнуы, тоқтаусыз құсу, диарея, ашушаңдық, қызыл иектің қанағыштығы, ауыз қуысы шырышты қабығының құрғауы мен ойық жаралануы, еріннің, терінің қабыршықтануы (әсіресе алақандардың), сананың шатасуы, бассүйекішілік қысымның жоғарылауы емшек жасындағы балаларда – гидроцефалия, еңбегінің томпаюы.

Сазылмалы уыттану симптомдары: тәбеттің жоғалуы, сүйектердің ауыруы, терінің жарылуы мен құрғауы, ауыз қуысы шырышты қабығының, еріннің құрғауы, гастралгия, құсу, гипертермия, астения, қатты қажығыштық, бас ауыруы, фотосезімталдық, поллакиурия, никтурия, полиурия, ашушаңдық, шаштың түсуі, табандағы, алақандардағы, ауызмұрын үшбұрышы аймағындағы сары-қызғылт дақтар, гепатоуыттылық құбылыстар, көзішілік гипертензия, олигоменорея, порталды гипертензия, гемолитикалық анемия, сүйек рентгенограммаларындағы өзгерістер, құрысулар.

Емі: препаратты тоқтату, симптоматикалық ем.

Антагонист ретінде L-тироксин, сондай-ақ аскорбин қышқылын, маннит (бассүйекішілік қысымды төмендетеді және менингизм симптомдарын жояды), глюкокортикоидтарды тағайындайды (А витаминінің бауырдағы метаболизмін жеделдетеді).

Шығарылу түрі мен қаптамасы

Ішуге және сыртқа қолдануға арналған 3,44% немесе 8.60% майлы ерітінді.

50 мл-ден полиэтилен тығындармен тығындалған және пластмасса қақпақтармен немесе алюминий қалпақшалармен бұралған қызғылт-сары шыны құтыларда.

Немесе 10, 50 мл-ден тамызғыш-тығындармен тығындалған және қақпақтармен немесе конус тығыздауышы бар қалпақшалармен қоныр шыны құтыларда.

1 құтыдан мемлекеттік және орыс тілдеріндегі медицинада қолданылуы жөніндегі нұсқаулықпен бірге картоннан жасалған қорапшаға салады.

Сақтау шарттары

Жарықтан қорғалған жерде, 10°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Қаптамасында көрсетілген күнінен асырмай пайдалану керек.

Дәріханалардан босатылу шарттары

Рецептісіз

Өндіруші

«Марбиофарм» ААҚ

Ресей Федерациясы, 424006, Марий Эл Республикасы, Йошкар-Ола қ-сы,

К.Маркс к-сі, 121.

Тел.: (8362) 42-03-12, факс: (8362) 45-00-00

e-mail: marbiopharm@marbiopharm.ru

Тіркеу куәлігінің иесі

«Марбиофарм» ААҚ, Ресей Федерациясы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«Марбиофарм» ААҚ

Ресей Федерациясы, 424006, Марий Эл Республикасы, Йошкар-Ола қ-сы,

К.Маркс к-сі, 121.

Тел.: (8362) 42-03-12, факс: (8362) 45-00-00

e-mail: marbiopharm@marbiopharm.ru