Ремедиа (500 мг)

• русский
• қазақша

• Скачать инструкцию медикамента

Саудалық атауы

Ремедиа

Халықаралық патенттелмеген атауы

Левофлоксацин

Дәрілік түрі

Үлбірлі қабықпен қапталған 250 мг, 500 мг, 750 мг таблеткалар

Құрамы

Бір таблетканың құрамында:

белсенді зат: 256.0 мг, 512.0 мг немесе 768.0 мг левофлоксацин гемигидраты, бұл сәйкесінше 250 мг, 500 мг, немесе 750 мг левофлоксацинге баламалы,

қосымша заттар: микрокристалды целлюлоза, повидон (К30), кросповидон, коллоидты кремнийдің қостотығы, магний стеараты, натрий лаурилсульфаты,

қабығының құрамы: қаптауға арналған сары зат (гипромеллоза, тальк, титанның қостотығы Е171, темірдің (ΙΙΙ) сары тотығы Е172), пропиленгликоль.

Сипаттамасы

Сопақша пішінді, екі беті дөңес, сары түсті үлбірлі қабықпен қапталған, бір жағында сындыру сызығы бар таблеткалар.

Фармакотерапиялық тобы

Бактерияға қарсы жүйелі пайдалануға арналған препараттар. Микробқа қарсы препараттар. Фторхинолондар. Левофлоксацин

АТХ коды J01MA12

Фармакологиялық қасиеттері

Фармакокинетикасы

Сіңуі

Левофлоксацин гемигидратын ішке қабылдағанда тез әрі түгелдей дерлік сіңеді. Тамақтану левофлоксациннің сіңуіне болымсыз ғана әсер етеді. Абсолюттік биожетімділігі 100%-ға жуықты құрайды. 500 мг левофлоксациннің бір реттік дозасын қабылдағаннан кейінгі ең жоғарғы концентрациясы 5,2-6,9 мкг/мл, ең жоғарғы уақыты - 1,3 сағатты құрайды. Левофлоксацин гемигидратының фармакокинетикасының сызықтық сипаты бар және препараттың 50 мг-ден 600 мг-ге дейінгі бір реттік және көптеген дозасын енгізуде алдын-ала болжанады.

Таралуы Левофлоксациннің 30-40%-ға жуығы қан плазмасының ақуыздарымен байланысады. Ағза мүшелеріне, тіндеріне және сұйықтықтарына: өкпе, бронхтардың шырышты қабықтарына, қақырыққа, сүйек тініне, несеп-жыныс жүйесі мүшелеріне, полиморфты-ядролық лейкоциттерге, альвеолярлы макрофагтарға жақсы өтеді. 500мг левофлоксацинді қабылдағаннан кейінгі Сmax бронхтардың шырышты қабықтарында 1 сағаттан кейін 8,3мкг/г, өкпе тінінде 4-6 сағаттан кейін – 11,3мкг/г, қуықта 2-4 сағаттан кейін – 4,0мкг/г шамасына жетеді. Левофлоксацин жұлын сұйықтығына әлсіз өтеді. 150 мг, 300 мг немесе 500 мг левофлоксацин қабылдағаннан кейін несептегі орташа концентрациясы 8-12 сағаттан соң сәйкесінше 44 мг/л, 91 мг/л және 200 мг/л болды.

Метаболизмі Бауырда азғантай бөлігі тотығады және/немесе десмезил-левофлоксацин және левофлоксацин N-тотығы метаболиттерін түзе отырып, дезацетилденеді.

Шығарылуы

Бір рет және бірнеше рет енгізгеннен кейінгі жартылай шығарылу кезеңі (Т1/2) - 6,4±0,7 сағат. Ағзадан көбінесе бүйрекпен (шумақтық сүзіліс және өзекшелік сөлініс жолымен) және ішекпен шығарылады. Левофлоксациннің 5%-дан аз бөлігі метаболиттер түрінде сыртқа шығарылады. Өзгеріссіз күйде несеппен 24 сағат ішінде 70% және 48 сағат ішінде - 87%-ы шығарылады; нәжісте 72 сағат ішінде ішке қабылданған дозасының 4%-ы табылады. Бүйрек жеткіліксіздігінде препарат клиренсінің азаюы және оның бүйрек арқылы шығарылуы креатинин клиренсінің (КК) төмендеу дәрежесіне байланысты болады. КК 50-80 мл/мин болғанда Т1/2 – 9 сағат, КК 20-40 мл/мин болғанда Т1/2 – 27 сағат, КК 20 мл/минутан аз болғанда Т1/2 – 35 сағат.

Көктамыр ішіне енгізілгеннен және ішке қабылдағаннан кейінгі левофлоксациннің фармакокинетикасында күрделі айырмашылық жоқ, ішке қабылдау мен көктамырішілік енгізу жолдары өзара ауыстырымды болып табылады деп саналады.

Фармакодинамикасы

Ремедиа – белсенді заты - левофлоксацин – офлоксациннің солға бұралатын изомері болып табылатын, әсер ету ауқымы кең микробқа қарсы бактерицидті зат. Левофлоксацин ДНҚ- гиразаны (II топоизомеразаны) және IV топоизомеразаны бөгейді, ДНҚ үзілуінің суперспиралдануын және қабысуын бұзады, ДНҚ синтезін тежейді, цитоплазмада, жасуша қабырғасында және бактериялардың жарғақшаларында терең морфологиялық өзгерістер туғызады.

Левофлоксацин in vitro жағдайындағы сияқты, in vivo жағдайында да, микроорганизмдер штамдарының көпшілігіне қатысты белсенді.

in vitro белсенділігі:

Сезімтал микроорганизмдер (ең төменгі басатын концентрациясы 2 мг/л-ден төмен)

Аэробты грамоң микроорганизмдер: Enterococcus faecalis, Staphylococcus coagulase-negative methi-S(I) [метициллин-сезімтал (метициллин-орташа сезімтал)], Staphylococcus aureus methi-S, Staphylococcus epidermidis methi-S, Staphylococcus spp (CNS), Streptococci С және G топтары, Streptococcus agalactiae, Streptococcus pneumoniae peni I/S/R (пенициллин-сезімтал/-орташа сезімтал/-резистентті), Streptococcus pyogenes, Viridans streptococci peni-S/R, Streptococcus faecalis.

Аэробты грамтеріс микроорганизмдер: Acinetobacter baumannil, Acinetobacter calcoaceticus, Enterobacter aerogenes, Enterobacter agglomerans, Enterobacter cloacae, Enterobacter spp, Escherichia coli, Haemophilus ducreyi, Haemophilus influenzae ampi-S/R (ампициллин-сезімтал/-резистентті), Haemophilus parainfluenzae, Klebsiella oxytoca, Klebsiella pneumoniae, Klebsiella spp, Moraxela catarrhalis/?+//?-, Proteus mirabilis, Proteus vulgaris, Pseudomonas aeruginosa, Serratia marcescens.

Анаэробты микроорганизмдер: Bacteroides fragilis, Bifidobacterium spp, Clostridium perfringens, Fusobacterium spp, Peptostreptococcus, Propionibacterum spp, Veilonella spp.

Басқа микроорганизмдер: Chlamydia pneumoniae, Chlamydia psittaci, Chlamydia trachomatis, Legionella pneumophila, Mycoplasma hominis, Mycoplasma pneumoniae, Ureaplasma urealyticum.

Орташа және әлсіз сезімтал микроорганизмдер (ең төменгі басатын концентрациясы >4-8 мг/л)

Аэробты грамоң микроорганизмдер: Corynebacterium urealiticum, Corynebacterium xerosis, Enterococcus faecium, Staphylococcus epidermidis methi-R (метициллин-резистентті), Staphylococcus haemolyticus methi-R.

Аэробты грамтеріс микроорганизмдер: Burkholderia cepacia, Campilobacter jejuni/coli.

Анаэробты микроорганизмдер: Bacteroides thetaiotaomicron, Bacteroides vulgatus, Bacteroides ovaius, Prevotella spp, Porphyromonas spp.

Сезімтал емес микроорганизмдер (ең төменгі басатын концентрациясы >8 мг/л)

Аэробты грамоң микроорганизмдер: Corynebacterium jeikeium, Staphylococcus aureus methi-R, Staphylococcus coagulase-negative methi-R.

Аэробты грамтеріс микроорганизмдер: Alcaligenes xylosoxidans.

Басқа микроорганизмдер: Mycobacterium avium.

In vitro левофлоксацин мен басқа фторхинолондар арасында түйіспелі төзімділік болуы мүмкін. Левофлоксацин мен бактерияға қарсы дәрілердің басқа кластары арасындағы түйіспелі төзімділік жоққа шығарылған.

Қолданылуы

Ересектердегі сезімтал микроорганизмдер туғызатын ауырлығы жеңіл және орташа дәрежедегі жұқпаларды емдеу:

• төменгі тыныс жолдарының жұқпалары: ауруханадан тыс пневмонияда, созылмалы бронхиттің асқынуында

• жедел синуситте

• несеп шығару жолдарының асқынған жұқпаларында, пиелонефритті қосқанда

созылмалы бактериялық простатитте

• тері мен жұмсақ тіндердің жұқпаларында

Қолдану тәсілі және дозалары

Ремедиа таблеткаларын ересектерге күніне 1-2 реттен тағайындайды.

Дозалануы жұқпаның түрі мен ауырлық дәрежесіне, болжамды немесе аурудың қоздырғышы болып табылатын бөлінген микроорганизмнің сезімталдығына байланысты. Емдеу ұзақтығы ауруға байланысты өзгеріп тұрады, ең жоғарғы ұзақтығы 14 күн, бактериялық простатитте 28 күнге дейін болуы мүмкін.

Бактерияға қарсы емдеудің жалпы принциптеріне сәйкес, Ремедиа таблеткаларын қабылдау дене температурасы қалпына түскеннен кейін немесе теріс бактериологиялық талдау алынғаннан кейін кемінде 48-72 сағаттан кейін жалғастырылуы керек.

Ремедиа таблеткаларын ішке, шайнамай, жеткілікті сұйықтық мөлшерімен қабылдайды. Ұсынылған дозалануы үшін таблеткалар сындыру сызығынан бөлінуі мүмкін. Таблеткаларды тамақ ішкен кезде немесе тамақтану аралығында қабылдауға болады. Ремедиа таблеткалары, сіңірілуінің төмендеуі мүмкіндігіне байланысты, темір тұздарын, антацидтер және сукральфаттарды қабылдағанға дейін 2 сағат бұрын қабылдануы керек. Бүйрек қызметі қалыпты науқастарға арналған Ремедианы қабылдау сызбасы (Креатинин клиренсі > 50 мл/мин)

Қолданылуы

Бүйрек қызметі бұзылған науқастарға арналған Ремедианы қабылдау сызбасы (Креатинин клиренсі ≤ 50 мл/мин)

* - гемодиализден кейін немесе тұрақты амбулаториялық перитонеальді диализден (ТАПД) кейін ұсынылатын қосымша дозасын енгізу қажет емес.

Жағымсыз әсерлері

Жиі (%)

• ұйқысыздық, бас ауыруы, бас айналуы

• жүрек айнуы, диарея

• бауыр ферменттері деңгейінің жоғарылауы (мысалы, АЛТ, АСТ)

Жиі емес (0,1-1%)

• асқорытудың бұзылуы, тәбеттің төмендеуі, іштің ауыруы

• әлсіздік, ұйқышылдық, ұйқысыздық, есінен айырылу

• мазасыздық

• сананың шатасу жай-күйі, жоғары қозғыштық

• анорексия

• вертиго, дисгевзия, пирексия

• бассүйекішілік гипертензия

• эозинофилия, лейкопения

• қышыну, бөртпе

• билирубиннің жоғарылауы, қан сарысуындағы креатинин деңгейінің жоғарылауы

• зеңдік флораның көбеюі және басқа резистентті микроорганизмдердің таралуы, дисбактериоз

Сирек (0,01-0,1%)

• есекжем, бронх түйілуі/ ентігу

• өте сирек жағдайларда энтероколиттен соның ішінде жалған жарғақшалы колиттен хабар беретін қан араласқан диарея

• тахикардия, артериялық гипотензия

• жүрек тоқтауына алып келуі мүмкін қарыншалық тахикардия.

• қарыншалық аритмия және қарыншалық дірілдеу-жыпылықтау (негізінен QT аралығының ұзару қаупі факторы бар емделушілерде байқалады), ЭКГ –де QT аралығының ұзаруы

• артралгиялар, миалгиялар, сіңірлердің зақымдануы, соның ішінде тендиниттер (мысалы, ахилл сіңірінің зақымдануы)

• нейтропения, тромбоцитопения

• тремор, мазасыздық, парестезиялар, қорқыныш, елестеулер, сананың шатасуы, депрессия, қимыл-қозғалыстың бұзылуы, құрысулар

Өте сирек (0,01%-дан аз)

• тамыр коллапсы

• жалған жарғақшалы колит

• гепатит

• интерстициальді нефрит, жедел бүйрек жеткіліксіздігі

• асқын сезімталдық реакциялары: фотосенсибилизация, терінің және шырышты қабықтардың ісінуі, ангионевротикалық ісіну, анафилактикалық шок, аллергиялық пневмонит

• көрудің, естудің, иіс пен дәм сезудің және тактильді сезімталдықтың бұзылуы

• тиннитус

• аносмияны қоса алғандағы паросмия

• гипогликемия (тәбеттің жоғарылауы, қатты тершеңдік, дірілдеу), әсіресе, қант диабетімен ауыратындарда

• гипергликемия

• сіңірлердің үзілуі (мысалы, ахилл сіңірінің), басқа фторхинолондарды қолданғандағы сияқты, бұл жағымсыз әсер емдеуді бастағаннан кейін 48 сағат ішінде болуы мүмкін және екіжақты болуы мүмкін

• миастениясы бар науқастарда ерекше маңызды болуы мүмкін миалгия, бұлшықеттің әлсіздігі

• агранулоцитоз

• қызба

Бірен-саран жағдайлар

• терідегі Стивенс-Джонсон синдромы, уытты эпидермальді некролиз (Лайелл синдромы) және мультиформалы экссудативті эритема сияқты күлдіреуік түзілімі бар ауыр бөртпелер

• аутоагрессивті мінез-құлықты психикалық реакциялар, соның ішінде суицидальді ойлар немесе әрекеттер

• рабдомиолиз

• гемолитикалық анемия, панцитопения

• Q-T аралығының ұзаруы

Фторхинолондарды қолданумен байланысты басқа да жағымсыз әсерлер

• көңіл-күйдің бұзылуының жедел қарауытуы және депрессивті жағдайлары сияқты психикалық реакциялар (бұл реакциялар алғашқы дозасын қабылдағаннан-ақ туындауы мүмкін)

• экстрапирамидтік симптомдар және бұлшықет үйлесімінің басқа бұзылыстары

• асқын сезімтал васкулит

• порфириямен ауыратын науқастардағы порфирия ұстамалары

• шеткергі сенсорлық нейропатия

• шеткергі сенсомоторлық нейропатия

• сарғаю және негізгі ауруы ауыр, негізінде өліммен аяқталатын жедел бауыр жеткіліксіздігі жағдайын қоса бауырдың ауыр зақымдануы

Қолдануға болмайтын жағдайлар

• левофлоксацинге, басқа хинолондарға немесе қосымша заттардың кез- келгеніне асқын сезімталдық

• эпилепсия

• фторхинолондарды тағайындаумен байланысты сыртартқыдағы сіңірлердің зақымдалуы

• 18 жасқа дейінгі балалық және жасөспірімдік кезең

• жүктілік және лактация кезеңі

Дәрілермен өзара әрекеттесуі

QT аралығының ұзаруын туындататын дәрілік заттар

Левофлоксацинді, басқа да фторхинолондар сияқты, QT аралығының ұзаруын туындататын препараттар қабылдаушы емделушілерде сақтықпен қолдану керек (мысалы, IA және III класының аритмияға қарсы препараттары, үшциклдық антидепрессанттар, макролидтер, нейролептиктер) («Айрықша нұсқауларды» қараңыз QT аралығының ұзаруы).

Темір тұздары, құрамында магний немесе алюминий бар антацидтер

Левофлоксациннің сіңірілуі темір тұздарын, құрамында магний немесе алюминий бар антацидтерді Ремедиа таблеткалармен бір мезгілде қолданғанда едәуір төмендейді. Темір тұздары немесе құрамында магний немесе алюминий бар антацидтер сияқты құрамында екі валентті катионы бар препараттарды Ремедиа таблеткаларын қабылдағанға дейін 2 сағат бұрын немесе кейін қабылдау ұсынылады. Кальций карбонатымен өзара әрекеттесуі табылған жоқ.

Сукральфат

Ремедиа таблеткаларының биожетімділігі сукральфатпен бір мезгілде қабылданғанда едәуір азаяды. Егер науқас сукральфат пен Ремедианы бір мезгілде қабылдап жүрсе, сукральфатты Ремедиа таблеткаларын қабылдағаннан кейін 2 сағаттан соң қабылдаған дұрыс.

Теофиллин, фенбуфен немесе ұқсас стероидты емес қабынуға қарсы препараттар

Клиникалық зерттеулерде левофлоксациннің теофиллинмен фармакокинетикалық өзара әрекеттесуі табылған жоқ. Алайда, фторхинолондарды теофиллинмен, стероидты емес қабынуға қарсы препараттармен немесе құрысуға әзірлік шегін төмендететін басқа заттармен бір мезгілде қабылдағанда, церебральді сезімталдық шегінің айқын төмендеуі болуы мүмкін.

Бір ғана Ремедиа препаратын қабылдағанға қарағанда, фенбуфен бар кездегі левофлоксациннің концентрациясы, 13%-ға жуық немесе жоғары болды.

Пробенецид және циметидин

Пробенецид пен циметидин левофлоксациннің элиминациясына статистикалық маңызды әсерін тигізеді. Левофлоксациннің бүйрек клиренсі циметидинмен (24%) және пробенецидпен (34%) қабылдағанда төмендеді. Бұл екі препараттың да бүйрек өзекшелеріндегі левофлоксацин сөлінісін бөгеуге қабілетті екендігімен түсіндіріледі. Дегенмен, зерттеуде сыналған дозаларында статистикалық маңызды кинетикалық айырмашылықтардың клиникалық маңызы жоқ.

Левофлоксацинді әсіресе, бұйрек қызметі бұзылған науқастарға пробенецид пен циметидин сияқты бүйректің шумақтық сөлінісіне әсер ететін препараттармен бір мезгілде тағайындағанда, сақ болу керек.

Циклоспорин Циклоспориннің жартылай ыдырау кезеңі левофлоксацинмен бір мезгілде тағайындалғанда, 33%-ға артты.

К витаминінің антагонистері

Коагуляциялық тестілердің (PT/INR) және/немесе ауыр болуы мүмкін қан кетудің артуы К витаминінің антагонистерімен (мысалы, варфарин) біріктіріп левофлоксацинмен емделген науқастарда тіркелген. Сондықтан К витаминінің антагонистерін бір мезгілде қабылдайтын науқастарда коагуляциялық тестілердің мониторингі жүргізілуі тиіс.

Айрықша нұсқаулар

Ремедиа таблеткалары сыртартқысында эпилепсиясы бар науқастарға қарсы көрсетілімді. Басқа фторхинолондарды тағайындағандағы сияқты, құрысуға бейім науқастарда, бұрыннан орталық жүйке жүйесінің бұзылулары бар науқастарда фенбуфен мен баламалы стероидты емес қабынуға қарсы препараттарды немесе теофиллин сияқты құрысуға әзірліктің церебральді шегін төмендететін препараттарды бірге қабылдағанда, ерекше сақтықпен пайдалану керек.

Барлық хинолондарды қабылдағандағы сияқты, гипо-, сондай-ақ гипергликемияны қоса, қандағы глюкоза мөлшерінің бұзылуы туралы мәлімделген, әдетте бұл пероральді гипогликемиялық препараттарды (мысалы, глибенкламид) немесе инсулинді қолдану арқылы қатарлас емді өтіп жүрген диабеті бар емделушілерде байқалды. Гипогликемиялық кома жағдайлары туралы хабарланған. Диабеті бар емделушілерде қандағы глюкоза деңгейін мұқият бақылау ұсынылады.

Латентті немесе нақты глюкозо-6-фосфат дегидрогеназа жеткіліксіздігі бар науқастар бактерияға қарсы фторхинолондар тобының дәрілерімен емделген кезде гемолитикалық реакцияларға ұшырауы мүмкін, сондықтан Ремедианы сақтықпен пайдалану керек.

Фотосенсибилизацияланудың дамуын болдырмау үшін, науқастардың өздеріне қатты күн сәулесіне немесе жасанды ультракүлгін сәулелендіруге (мысалы, кварц шамы, солярий) шалдықпауды ұсынады.

Левофлоксацинді қоса, хинолонды қабылдаушы емделушілерде психоздық реакциялар туындау жағдайлары туралы хабарланған. Өте сирек жағдайларда тіпті левофлоксацинді бір рет қолданғаннан кейін суицидтік ойлар және емделушінің өзіне қауіпті мінез-құлық пайда болуына дейін жеткен осыған ұқсас реакциялар үдеген («Жағымсыз әсерлерін» қараңыз).

Осыған ұқсас реакциялар пайда болған жағдайда левофлоксацин қабылдауды тоқтату және тиісінше шаралар қолдану керек. Психозы бар науқастарда немесе сыртартқысында психиатриялық аурулары бар науқастарда левофлоксацинді сақтықпен қолдану керек.

Левофлоксацинді қоса, фторхинолондарды төмендегідей QT аралығының ұзаруы қаупінің белгілі факторлары бар емделушілерде сақтықпен қолдану керек:

- QT аралығы ұзаруының туа біткен синдромы

- QT аралығы ұзаруын туындататын дәрілік заттарды қатарлас қолдану, (мысалы, IA және III класты аритмияға қарсы препараттар, үшциклды антидепрессанттар, макролидтер, нейролептиктер)

- электролиттер балансының түзетілмеген бұзылулары (мысалы, гипокалиемия, гипомагниемия)

- жүрек аурулары (мысалы, жүрек жеткіліксіздігі, миокард инфарктісі, брадикардия).

Егде жастағы науқастар және әйелдер QT аралығы ұзаруын туындататын препараттарға сезімталдау болуы мүмкін. Демек, левофлоксацинді қоса, фторхинолондарды емделушілердің аталған тобында сақтықпен қолдану керек.

Левофлоксацинді қоса, фторхинолондар нейробұлшықетті бөгегіш белсенділікке ие және гравис миастениясынан зардап шегуші емделушілерде бұлшықет әлсіздігін күшейтуі мүмкін. Өлім жағдайын қоса алғандағы күрделі қолайсыз реакциялар және постмаркетингтік кезеңдегі бақылауда туындаған өкпені қосымша жасанды желдету қажеттігі гравис миастениясынан зардап шегуші емделушілерде фторхинолондар қолдануға байланысты болды. Сыртартқысында гравис миастениясы бар емделушілерде левофлоксацин қолдану ұсынылмайды.

Жалған жарғақшалы колит болуына күдік болса, Ремедианы дереу тоқтату және сәйкесінше емдеуді бастау керек. Бұл жағдайларда ішек моторикасын бәсеңдететін дәрілік заттарды қолдануға болмайды.

Фторхинолондарды қолдануда сирек байқалатын тендинит (ең алдымен, ахилл сіңірінің қабынуы) сіңірлердің үзілуіне әкелуі мүмкін. Егде жастағы науқастар тендинитке бейімірек келеді. Глюкокортикостероидтармен емдеу сіңірлердің үзілу қаупін арттырады. Тендинитке күдіктенген жағдайда, Ремедиа препаратымен емдеуді дереу тоқтату және үзілген сіңірлерді тиісінше емдеуді, мысалы, оған тыныштық жағдайын жасау арқылы бастау керек.

Көрудің бұзылуы туындағанда немесе препаратты қабылдаудың көзге әсері пайда болғанда дереу офтальмологке қаралу керек.

Левофлоксацинді қолдану, әсіресе ұзақ уақыт бойы қолдану сезімтал емес микроорганизмдердің шамадан тыс өсуіне алып келуі мүмкін. Емдеу кезеңінде асқын жұқпалар туындағанда тиісті шаралар қолдану керек.

Левофлоксацинді қолданумен ем қабылдаушы емделушілерде несептегі апиындарды анықтауға арналған талдау жалған оң нәтижелер беруі мүмкін.

Талдаулар нәтижесінде апиындар болуын спецификалық жетілдірілген әдістерді пайдаланумен растау талап етілуі мүмкін.

Левофлоксацин Mycobacterium tuberculosis өсуін бәсеңдетуі мүмкін, тиісінше, туберкулездің бактериологиялық диагностикасының жалғантеріс нәтижесінің себебі болуы мүмкін.

Педиатрияда қолданылуы

Препаратты буын шеміршектерін зақымдауы мүмкін болғандықтан, балалар мен жасөспірімдерді емдеу үшін қолдануға болмайды.

Бауыр және өт шығару жолдары тарапынан бұзылулар

Ауыр негізгі ауруы бар, мысалы сепсис сияқты, емделушілерде левофлоксацинді қабылдауда өліммен аяқталатын бауыр жеткіліксіздігіне дейін болатын бауыр некрозы жағдайлары туралы хабарланған. Емделушілерге анорексия, сарғаю, несеп күңгірттенуі, қышыну және іштің ауыруы сияқты бауыр ауруларының симптомдары мен белгілері пайда болғанда емдеуді тоқтатып және емдеуші дәрігермен байланысу ұсынылады.

Егде жастағы емделушілерге қолданылуы

Егде жастағы емделушілер үшін, креатинин клиренсінің төмен жағдайын қоспағанда дозалау режимін өзгерту талап етілмейді.

Дәрілік заттың көлік құралдарын немесе қауіпті механизмдерді басқару қабілетіне әсер ету ерекшеліктері

Препарат нұсқаулық бойынша пайдаланылса да, бұл реакцияны машина жүргізу немесе басқару қабілеті бұзылғанға дейін өзгертуі мүмкін. Ремедиа препаратының бас айналуы немесе есінен айырылу, ұйқышылдық пен көрудің бұзылуы сияқты жағымсыз әсерлері реакцияға қабілеттілік пен зейін шоғырландыру қабілетін нашарлатуы мүмкін. Бұның соңы автокөлік басқарудағы, машиналар мен механизмдерге қызмет көрсетуде, тұрақсыз жағдайда жұмыс жасаудағы белгілі бір қауіпке соқтыруы мүмкін. Бұл көбінесе препараттың алкогольмен өзара әрекеттесуіне қатысты болады.

Артық дозалануы

Симптомдары: жүрек айнуы, АІЖ шырышты қабықтарының эрозиялық зақымданулары, Q-T аралығының ұзаруы, сананың шатасуы, бас айналуы, құрысулар.

Емі: белгілеріне қарай, диализ тиімсіз.

Шығарылу түрі және қаптамасы

5 немесе 10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамада.

1 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапшаға салады.

Сақтау шарттары

Балалардың қолы жетпейтін жерде сақтау керек!

Жарықтан қорғалған жерде, 25 ºС-ден аспайтын температурада.

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Симпекс Фарма Пвт. Лтд.

C-7 to C-13 & C-59 to C-64, Sigaddi Growth Center (SIDCUL),

Sigaddi, Kotdwar-246149, Distt. Pauri Garhwal,

Uttarakhand, India

Үндістан.

Тіркеу куәлігінің иесі

Симпекс Фарма Пвт. Лтд.

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

«Корал-Мед Қазақстан» ЖШС

Алматы қ., Әуезов көшесі, 3

Тел./факс + 7 727 266 95 50

E-mail: coralmedkz@mail.ru