Раеном® (5 мг)
Инструкция
-
русский
-
қазақша
Дәрілік затты медициналық қолдану жөніндегі нұсқаулық
Раеном®
▼ «Осы дәрілік препарат қосымша мониторинг жүргізілетін топқа жатады. Бұл оның қауіпсіздігі жөнінде жаңа ақпаратты тез анықтауға мүмкіндік береді. Біз денсаулық сақтау саласының қызметкерлерінен байқалған кез келген күмәнді жағымсыз реакциялар туралы мәлімдеп отыруды өтінеміз».
Саудалық атауы
Раеном®
Халықаралық патенттелмеген атауы
Ивабрадин
Дәрілік түрі
Үлбірлі қабықпен қапталған таблеткалар, 5 мг және 7,5 мг
Құрамы
Үлбірлі қабықпен қапталған бір таблетканың құрамында:
5 мг доза
белсенді зат: ивабрадин гидробромиді – 5,863 мг (5 мг ивабрадинге баламалы),
қосымша заттар: лактоза, маннитол, мальтодекстрин, натрий кроскармеллозасы, сусыз коллоидты кремнийдің қостотығы, магний стеараты,
үлбірлі қабықтың құрамы: Опадрай 200F240001 қызғылт: поливинил спирті, тальк, титанның қостотығы (Е171), макрогол / ПЕГ 3350, метакрил қышқылы – этилакрилат сополимері (1:1), темірдің сары тотығы (Е172), темірдің қызыл тотығы (Е172), натрий гидрокарбонаты.
7,5 мг доза
белсенді зат: ивабрадин гидробромиді – 8,795 мг (7,5 мг ивабрадинге баламалы),
қосымша заттар: лактоза, маннитол, мальтодекстрин, натрий кроскармеллозасы, сусыз коллоидты кремнийдің қостотығы, магний стеараты,
үлбірлі қабықтың құрамы: Опадрай 200F240001 қызғылт: поливинил спирті, тальк, титанның қостотығы (Е 171), макрогол / ПЕГ 3350, метакрил қышқылы – этилакрилат сополимері (1:1), темірдің сары тотығы (Е172), темірдің қызыл тотығы (Е172), натрий гидрокарбонаты.
Сипаттамасы
5 мг доза
Ақшыл-қызыл сары түсті үлбірлі қабықпен қапталған, сопақша пішінді, екі жақ беті дөңес, бүйір жағында бөлуге арналған екі V тәріздес сызықтары бар, бір жақ бетінде «CK3» өрнегі түсірілген, басқа жақ беті тегіс таблеткалар.
7,5 мг доза
Ақшыл-қызыл сары түсті үлбірлі қабықпен қапталған, дөңгелек пішінді, екі жақ беті дөңес, бір жақ бетінде«CK4» өрнегі бар, басқа жақ беті тегіс таблеткалар.
Фармакотерапиялық тобы
Жүрек-қантамыр жүйесі. Жүрек ауруларын емдеуге арналған препараттар. Кардиологиялық басқа да препараттар. Ивабрадин.
АТХ коды C01EB17
Фармакологиялық қасиеттері
Фармакокинетикасы
Физиологиялық жағдайларда ивабрадин таблеткадан тез босап шығады және суда (>10 мг/мл) жақсы ериді. Ивабрадин биоконверсия белгілерінсіз S-энантиомер болып табылады (in vivo зерттеу деректері бойынша). Негізгі белсенді метаболиті ивабрадиннің N-десметилденген туындысы болып табылатындығы анықталды.
Сіңуі және биожетімділігі
Ивабрадин ішке қабылдағаннан кейін тез және толық дерлік сіңеді, аш қарынға қабылдағанда қан плазмасында ең жоғары концентрацияға шамамен 1 сағаттан соң жетеді. Үлбірлі қабықпен қапталған таблеткалардың абсолюттік биожетімділігі, ішек және бауыр арқылы «алғаш өтуі» салдарынан 40%-ға жуықты құрайды.
Тамақ ішу сіңуді шамамен 1 сағатқа баяулатады және қан плазмасындағы концентрацияны 20-30%-ға арттырады. Концентрациялардың ішкі жекелей құбылмалылығын төмендету үшін, таблетканы тамақ ішу кезінде қабылдау ұсынылады («Қолдану тәсілі және дозалары» бөлімін қараңыз).
Таралуы
Ивабрадин қан плазмасының ақуыздарымен шамамен 70%-ға байланысады, және пациенттерде тепе-тең жағдайда таралу көлемі 100 л-ге жуық. Тәулігіне екі рет ұсынылған 5 мг дозасын үнемі қолданғанда ең жоғары концентрация (Cmax) 22 нг/мл (құбылу коэффициенті (CV) = 29%). Қан плазмасындағы орташа концентрациясы 10 нг/мл (CV = 38%) құрайды.
Биотрансформациясы
Ивабрадин көбінесе бауырда және ішекте P450 3A4 (CYP3A4) цитохромының қатысуымен тотығу арқылы метаболизденеді. Негізгі белсенді метаболиті N-десметилденген туынды (S 18982) болып табылады, оның концентрациясы ивабрадин дозасының шамамен 40%-ын құрайды. Осы белсенді метаболиттің метаболизміне CYP3A4 изоферменті қатысады. Ивабрадиннің CYP3A4 изоферментімен аздаған ұқсастығы бар, клиникалық маңызды көзқарас тұрғысынан ол CYP3A4 изоферментін индукцияламайды және тежемейді, сондықтан препараттың метаболизмді немесе қан плазмасындағы CYP3A4 изоферменті субстраттарының концентрациясын өзгертуге қабілетті болуы екіталай. Және, керісінше, изоферменттің күшті тежегіштері және индукторлары қан плазмасында ивабрадиннің концентрациясына елеулі дәрежеде ықпалын тигізуі мүмкін («Дәрілермен өзара әрекеттесуі» бөлімін қараңыз).
Шығарылуы
Қан плазмасынан ивабрадиннің негізгі жартылай шығарылу кезеңі 2 сағатты (70-75% AUC), ал тиімді жартылай шығарылу кезеңі 11 сағатты құрайды. Жалпы клиренсі шамамен минутына 400 мл, бүйректік клиренсі минутына 70 мл-ге жуықты құрайды. Метаболиттердің шығарылуы несеппен және нәжіспен бірдей дәрежеде жүреді. Пероральді дозаның 4%-ға жуығы несеппен өзгермеген күйінде бөлініп шығады.
Дозаға тәуелділігі/тәуелді еместігі
Ивабрадиннің кинетикасы 0,5-тен 24 мг-ге дейінгі пероральді дозалар ауқымында дозаға байланысты болып табылады.
Пациенттердің ерекше топтарындағы фармакокинетикасы
Егде жастағы пациенттер
Егде жастағы (≥ 65 жас) немесе өте егде жастағы (≥ 75 жас) пациенттер топтарында және пациенттердің жалпы популяциясында фармакокинетикалық көрсеткіштердің (AUC және Cmax) айырмашылықтары жоқ («Қолдану тәсілі және дозалары» бөлімін қараңыз).
Бүйрек функциясының бұзылуы
Бүйрек функциясы жеткіліксіздігінің (креатинин клиренсі минутына 15-тен 60 мл-ге дейін) ивабрадиннің фармакокинетикасына ықпалы өте шектеулі, бұл ивабрадиннің және оның негізгі метаболитінің S 18982 жалпы шығарылуында бүйрек клиренсі (20%-ға жуық) қатысуының төмендігімен байланысты («Қолдану тәсілі және дозалары» бөлімін қараңыз).
Бауыр функциясының бұзылуы
Бауыр функциясының жеңіл жеткіліксіздігі (Чайлд-Пью шкаласы бойынша 7 балға дейін) бар пациенттерде бос ивабрадиннің және негізгі белсенді метаболиттің AUC мәні, бауыр функциясы қалыпты пациенттерге қарағанда, шамамен 20%-ға жоғары. Бауыр функциясының орташа жеткіліксіздігі бар пациенттерде препаратты қолдану жөніндегі деректер шектеулі. Бауыр функциясының ауыр жеткіліксіздігі бар пациенттерде препаратты қолдану жөнінде деректер жоқ («Қолдану тәсілі және дозалары» және «Қолдануға болмайтын жағдайлар» бөлімдерін қараңыз).
Балалар
Жүрек функциясының созылмалы жеткіліксіздігі бар, 6 айлықтан 18 жасқа дейінгі балаларда ивабрадиннің фармакокинетикалық бейіні, титрлеу сызбасы жасқа және дене салмағына негізделген ересек пациенттерде сипатталған фармакокинетикаға ұқсас болады.
Фармакодинамикасы
Әсер ету механизмі
Ивабрадин – жүректің ырғағын баяулататын дәрілік препарат, оның әсер ету механизмі синустық түйінде кездейсоқ диастолалық деполяризацияны бақылайтын және ЖЖЖ-ні реттейтін синустық түйін If өзектерінің таңдау түскен және спецификалық тежелуі болып табылады. Препарат жүрекшеішілік, жүрекше-қарыншалық және қарыншаішілік өткізгіш жолдар бойымен импульстардың жүру уақытына, сондай-ақ миокардтың жиырылу қабілетіне және қарыншалардың реполяризациялануына ықпалын тигізбей, синустық түйінге таңдап әсер етеді.
Ивабрадин сондай-ақ жүректің If өзектерінің құрылысы бойынша ұқсас көздің торқабығының Ih өзектерімен де өзара әрекеттесуі мүмкін. Олар жарқыраған жарық стимулдарына торқабықтың реакциясын өзгерту жолымен көру сезімі жүйесінің уақытша бейімделу механизмдеріне қатысады. Белгілі бір жағдайларда (мысалы, жарық қарқындылығы күрт өзгергенде) ивабрадин Ih өзектерін ішінара тежейді, бұл кейде кейбір пациенттерде жарықты қабылдау өзгерістерінің феноменіне әкеледі. Мұндай жарықты қабылдау өзгерістерінің феномендері (фосфендер) үшін көру аясының шектеулі аймағында жарқыраған жарықты қысқа мерзімдік сезіну тән («Жағымсыз әсерлері» бөлімін қараңыз).
Фармакодинамикалық әсерлері
Адамда ивабрадиннің негізгі фармакодинамикалық қасиеті ЖЖЖ-нің спецификалық, дозаға тәуелді сиреуі болып табылады. Тәулігіне екі рет 20 мг-ге дейінгі дозаларда ЖЖЖ-нің сиреуін талдау «плато» әсеріне қол жеткізуге тенденцияны анықтады, бұл айқын брадикардияның (минутына 40 соғ. азырақ) даму қаупін төмендетеді.
Ивабрадинді ұсынылған дозаларда қолданғанда ЖЖЖ сиреу дәрежесі тыныш кезде де, сонымен қатар физикалық жүктеме кезінде де шамамен минутына/10 соғу. құрайды. Бұл жүрекке түсетін жүктеменің төмендеуіне және миокардта оттегіге қажеттіліктің азаюына әкеледі. Ивабрадин жүрекішілік өткізгіштікке, жиырылғыштық қабілетіне (теріс инотроптық әсер бермейді) және қарыншалардың рполяризациясына ықпалын тигізбейді:
- клиникалық электрофизиологиялық зерттеулер ивабрадиннің жүрекше-қарыншалық немесе қарыншаішілік өткізгіш жолдар арқылы импульстің өту уақытына, сондай-ақ түзетілген QT аралықтарына ықпалын тигізбейді;
- сол жақ қарыншаның дисфункциясы бар (сол жақ қарыншадан лықсу фракциясы (СҚЛФ) 30-дан 45%-ға дейін) пациенттерде ивабрадин СҚЛФ-ке жағымсыз әсерін тигізген жоқ.
Фармакокинетикасы (ФК) және фармакодинамикасы (ФД) арасындағы өзара байланыс
ФК және ФД арасындағы өзара байланысты талдау жүректің жиырылу жиілігінің (ЖЖЖ) сиреуі тәулігіне екі рет 15-20 мг-ге дейінгі дозаларды қабылдағанда қан плазмасындағы ивабрадин және S 18982 концентрацияларының артуына тура пропорционалды дерлік тәуелділікте болатындығын анықтауға мүмкіндік берді. Жоғарырақ дозаларда ЖЖЖ сиреуінің қан плазмасындағы ивабрадин концентрациясына пропорционалды тәуелділігі жоқ және «платоға» жетуге беталысымен сипатталады. CYP3A4 изоферментінің күшті тежегіштерімен бір мезгілде қолданғанда жетуге болатын ивабрадиннің жоғары концентрациялары ЖЖЖ-нің айқын сиреуіне әкелуі мүмкін, алайда бұл қауіп CYP3A4 изоферментінің орташа тежегіштерімен біріктірген кезде төмен болады («Қолдануға болмайтын жағдайлар», «Айрықша нұсқаулар» және «Дәрілік өзара әрекеттесулер» бөлімдерін қараңыз).
Жүрек функциясының созылмалы жеткіліксіздігі бар педиатриялық популяциядағы 6 айлықтан 18 жасқа дейінгі пациенттерде ивабрадиннің ФК/ФД өзара байланысы ересектерде сипатталған ФК/ФД параметрлерінің өзара байланысына ұқсас.
Қолданылуы
Тұрақты стенокардия
Жүректің ишемиялық ауруы (ЖИА) бар, синустық ырғағы қалыпты және жүректің жиырылу жиілігі (ЖЖЖ) минутына ≥ 70 соғатын (мин/соғ.) ересек пациенттерде созылмалы тұрақты стеокардияны симптоматикалық емдеу үшін:
- бета-адреноблокаторларды қолдану жақпағанда немесе қарсы көрсетілімдері бар болғанда;
- бета-адреноблокатордың оңтайлы дозасының аясында тұрақты стенокардия симптомдары адекватты емес бақыланған пациенттерде бета-адреноблокаторлармен біріктіріп.
Жүрек функциясының созылмалы жеткіліксіздігі
Жүрек функциясының NYHA (Нью-Йорк кардиологиялық ассоциациясы) бойынша II-IV функциональді класқа жататын созылмалы жеткіліксіздігінде систолалық дисфункциясы және ЖЖЖ минутына ≥ 75 соғ. синустық ырғағы бар пациенттерде бета-адреноблокаторлармен емдеуді қоса, стандартты еммен біріктіріп, немесе бета-адреноблокаторлармен емдеу жақпаған немесе қарсы көрсетілімдері бар болған жағдайда.
Қолдану тәсілі және дозасы
Қолдану тәсілі
Таблетканы тәулігіне екі рет, яғни тамақ ішу кезінде таңертең бір рет және кешке бір рет қабылдау қажет.
Дозалар
Созылмалы тұрақты стенокардияны симптоматикалық емдеу
Емдеуді бастау немесе дозаларды титрлеу жөніндегі шешім ЖЖЖ-ні ұдайы өлшеп отыруды жүзеге асырғанда, ЭКГ жүргізгенде немесе 24 сағаттық амбулаторлық мониторинг жүргізген кезде ұсынылады.
Раеном® препаратының бастапқы дозасы 75 жастан кіші пациенттерде тәулігіне екі реттік 5 мг-ден аспауы тиіс. 3-4 апта емдегеннен кейін, егер пациентте тұрақты стенокардияның клиникалық көрініс беруі әлі де байқалса, бастапқы дозаның жағымдылығы жақсы және тыныш күйде ЖЖЖ тұрақты түрде минутына/60 соғу болса, дозасы тәулігіне екі рет 2,5 мг немесе тәулігіне екі рет 5 мг қабылдап жүрген пациенттерде келесі өте жоғары дозаға дейін арттырылуы мүмкін.
Демеуші доза тәулігіне екі рет 7,5 мг-ден аспауы тиіс.
Егер емдеуді бастағаннан кейін стенокардия симптомдары 3 ай бойы сақталса, Раеном® препаратымен емдеуді тоқтату қажет.
Бұдан басқа, тыныш күйде 3 ай бойы ЖЖЖ клиникалық тұрғыдан маңызды төмендеуінің болмауы аясында аздаған симптомдық жауап болған жағдайда Раеном® препаратымен емдеуді тоқтату жөніндегі мәселені қарастыру керек.
Егер емдеу кезінде ЖЖЖ тыныш кезде минутына 50 соғ. азырақ мәнге дейін сиресе, немесе пациентте брадикардиямен байланысты (бас айналу, қатты қажу немесе артериялық гипотензия сияқты) симптомдар пайда болса, дозаны тәулігіне екі рет 2,5 мг тиімді ең төмен дозаға (тәулігіне екі рет 5 мг 1/2 таблеткаға) дейін төмендету қажет. Дозаны төмендеткеннен кейін ЖЖЖ бақылауды жалғастыру қажет («Айрықша нұсқаулар» бөлімін қараңыз). Егер дозаны төмендеткенге қарамастан, ЖЖЖ минутына 50 соғ.азырақ күйінде қалса немесе брадикардия симптомдары сақталса, Раеном® препаратымен емдеуді тоқтату қажет.
Жүрек функциясының созылмалы жеткіліксіздігін (ЖЖЖ) емдеу
Емдеуді тұрақты ЖСЖ бар пациенттерде ғана бастау қажет. Емдеуші дәрігердің ЖСЖ емдеу тәжірибесі болуы керек.
Раеном® препаратының әдетте ұсынылатын бастапқы дозасы тәулігіне екі рет 5 мг құрайды. Екі апта емдегеннен кейін доза, егер тыныш кезде ЖЖЖ тұрақты түрде минутына 60-тан көбірек соқса, тәулігіне екі рет 7,5 мг-ге дейін арттырылуы мүмкін, немесе егер тыныш кезде ЖЖЖ тұрақты түрде минутына 50-ден азырақ соқса, немесе брадикардиямен байланысты бас айналу, қатты қажу немесе артериялық гипотензия сияқты симптомдар көрініс берген жағдайда, доза тәулігіне екі рет 2,5 мг-ге (тәулігіне екі рет 5 мг 1/2 таблетка) дейін төмендетілуі мүмкін. Егер ЖЖЖ минутына 50-ден 60 соғ.дейінгі ауқымда болса, тәулігіне екі реттік 5 мг дозаны сақтаған жөн.
Егер емдеу кезінде ЖЖЖ тыныш кезде тұрақты түрде минутына 50 соғ. азырақ болса, немесе тәулігіне екі рет 7,5 мг немесе тәулігіне екі рет 5 мг қабылдап жүрген пациенттерде брадикардиямен байланысты симптомдар байқалса, дозаны келесі өте төмен дозаға дейін төмендету қажет. Егер тыныш кезде ЖЖЖ тұрақты түрде минутына 60 соғ.көбірек болса, тәулігіне екі рет 2,5 мг немесе тәулігіне екі рет 5 мг қабылдап жүрген пациенттерде дозаны келесі өте жоғары дозаға дейін арттыруға болады.
Егер ЖЖЖ минутына 50 соғ. азырақ күйінде қалса немесе брадикардия симптомдары сақталса, емдеуді тоқтату керек («Айрықша нұсқаулар» бөлімін қараңыз).
Пациенттердің ерекше топтары
Егде жастағы пациенттер
75 және одан жоғары жастағы пациенттерде, дозаны арттыру қажеттілігінен бұрын, бастапқы төмендеу дозаны (тәулігіне екі рет 2,5 мг, яғни тәулігіне екі рет 5 мг 1/2 таблетка) қолдану мәселесін қарастырған жөн.
Бүйрек функциясының бұзылуы
Бүйрек функциясының жеткіліксіздігі бар және креатинин клиренсі минутына 15 мл-ден жоғары болатын пациенттерде дозаны түзету қажет емес («Фармакокинетикасы» бөлімін қараңыз).
Креатинин клиренсі минутына 15 мл-ден төмен болатын пациенттер үшін деректер жоқ. Сондықтан мұндай пациенттерде ивабрадинді сақтықпен қолдану керек.
Бауыр функциясының бұзылуы
Бауыр функциясының жеңіл дәрежедегі жеткіліксіздігі бар пациенттерде дозаны түзету қажет емес. Бауыр функциясының орташа жеткіліксіздігі бар пациенттерде Раеном® препаратын қолданғанда сақтық танытқан жөн. Бауыр функциясының ауыр жеткіліксіздігі бар пациенттерге Раеном® препаратын қолдануға болмайды, өйткені осы популяцияда препаратты қолдануға зерттеулер жүргізілген жоқ және жүйелік әсер едәуір артады деп болжам жасалады («Қолдануға болмайтын жағдайлар» және «Фармакокинетикасы» бөлімдерін қараңыз).
Балалар
18 жастан кіші балаларда жүрек функциясының созылмалы жеткіліксіздігін емдеген кезде ивабрадинді қолданудың қауіпсіздігі және тиімділігі анықталған жоқ.
Қолжетімді деректер «Фармакокинетика» бөлімінде берілген, алайда дозалауға қатысты нұсқауларды жасау мүмкіндігі жоқ.
Жағымсыз әсерлері
Ивабрадиннің өте жиі болатын жағымсыз әсерлері, жарықты сезінудің өзгеру феномендері (фосфендер) және брадикардия дозаға тәуелді сипатқа ие және оның фармакологиялық әсерінің механизмімен жүзеге асырылады.
Клиникалық зерттеулер барысында келесі жағымсыз реакциялар тіркелді:
Өте жиі (≥ 1/10)
- жарықты сезінудің өзгеру феномендері (фосфендер).
Жиі ( ≥ 1/100-ден <1/10 дейін)
- бас ауыру, негізінен емдеудің алғашқы айы ішінде;
- бас айналу, брадикардиямен байланысты болуы мүмкін;
- көздің анық көрмеуі;
- брадикардия;
- І дәрежедегі AV-блокада (ЭКГ-де PQ аралығының ұзаруы);
- қарыншалық экстрасистолалар;
- жүрекшелердің фибрилляциясы;
- бақыланбайтын артериялық қысым.
Жиі емес ( ≥ 1/1 000-нан <1/100 дейін)
- эозинофилия;
- гиперурикемия;
- естен тану, брадикардиямен байланысты болуы мүмкін*;
- диплопия*;
- көрудің бұзылуы*;
- вертиго;
- жүректің қағуын сезіну, қарыншаүстілік экстрасистолия;
- артериялық гипотензия, брадикардиямен байланысты болуы мүмкін*;
- ентігу;
- жүректің айнуы, іш қату, диарея, іштің ауыруы*;
- ангионевроздық ісіну*, тері бөртпесі*;
- бұлшықет спазмдары;
- астения, брадикардиямен байланысты болуы мүмкін*;
- қатты қажу, брадикардиямен байланысты болуы мүмкін*;
- қандағы креатинин концентрациясының жоғарылауы;
- ЭКГ-де QT аралығының ұзаруы.
Сирек (≥ 1/10 000-нан <1/1 000 дейін)
- эритема*, қышыну*, есекжем*;
- дімкәстік, брадикардиямен байланысты болуы мүмкін*.
Өте сирек (<1/10 000)
- II дәрежедегі AV-блокада, IIІ дәрежедегі AV-блокада;
- синустық түйіннің әлсіздігі синдромы.
* Кездейсоқ мәлімдемелерде және сонымен қатар ивабрадинді тіркегеннен кейін қолдану барысында байқалған жағымсыз құбылыстар, алайда олардың даму жиілігі тек клиникалық зерттеу деректерінің негізінде есептелген.
Жекелеген жағымсыз реакциялардың сипаттамасы
Пациенттердің 14,5%-да жарықты қабылдаудың өзгеру феноменінің (фосфендер) туындау жағдайлары жөнінде мәлімделді; көру ауқымының шектеулі аймағында жарықтың жарқырауын өткінші сезіну ретінде сипатталады. Әдетте олар жарықтың қарқындылығы күрт өзгерген кезде туындайды. Фосфендер ореол, бейненің ыдырауы (стробоскопиялық немесе калейдоскопиялық) түрлі түсті жарықтың жарқ етуі немесе бейненің көбеюі (ретинальді персистенция) ретінде де сипатталуы мүмкін. Фосфендер әдетте емдеудің алғашқы екі айында пайда болып, кейіннен қайталанады. Әдеттегідей, фосфендердің жеңіл немесе орташа дәрежеде болатындығы мәлімделді. Барлық фосфендер емдеу кезінде немесе оны аяқтағаннан кейін тоқтайды, көбісі (77,5%) емдеу кезінде тоқтады. Фосфендер күнделікті өмірдің өзгеруіне немесе пациенттердің 1% дан азында емдеуді тоқтатуға әкелді.
Пациенттердің 3,3% да емдеуді бастағаннан кейін алғашқы 2 3 айда брадикардия байқалды. Пациенттердің 0,5% да ЖЖЖ минутына/40 соғ. ауыр брадикардия байқалды.
Егер нұсқаулықта көрсетілген жағымсыз әсерлер өршісе, немесе Сіз нұсқаулықта көрсетілмеген кез келген басқа жағымсыз әсерлерді байқасаңыз, мұны емдеуші дәрігерге мәлімдеңіз.
Қолдануға болмайтын жағдайлар
- әсер етуші затқа немесе қосымша заттардың кез келгеніне жоғары сезімталдық («Құрамы» бөлімін қараңыз).
- емдеуді бастағанға дейін тыныш кездегі ЖЖЖ минутына 70 соғудан төмен.
- кардиогендік шок.
- жедел миокад инфарктісі.
- артериялық ауыр гипотензия (АҚ < 90/50 мм с. б.).
- бауыр функциясының ауыр жеткіліксіздігі.
- синустық түйін әлсіздігі синдромы.
- синоатриальді блокада.
- жүрек функциясының тұрақсыз немесе жедел жеткіліксіздігі.
- жасанды ырғақ жетекшісінің болуы (ЖЖЖ жасанды ырғақ жетекшісі жәрдемімен ғана сақталады).
- тұрақсыз стенокардия.
- ІІІ дәрежедегі атриовентрикулярлық (AV) блокада.
- Р450 3A4 цитохромы жүйесінің зеңге қарсы азолдар тобының дәрілері (кетоконазол, итраконазол); макролидтер тобына жататын антибиотиктер (кларитромицин, ішке қабылдауға арналған эритромицин, джозамицин, телитромицин); АИТВ-протеаза тежегіштері (нелфинавир, ритонавир) және нефазодон сияқты күшті тежегіштерімен біріктіріп қолдану («Дәрілермен өзара әрекеттесуі» және «Фармакокинетикасы» бөлімдерін қараңыз).
- верапамилмен немесе дилтиаземмен бріктіріп қолдану, олар ЖЖЖ төмендететін CYP3A4 изоферментінің орташа тежегіштері болып табылады («Дәрілермен өзара әрекеттесуі» бөлімін қараңыз).
- жүктілік, емшек емізу кезеңі, сондай-ақ контрацепцияның сенімді әдістерін пайдаланбай жүрген, ұрпақ өрбіту жасындағы әйелдерге қолдану («Жүктілік кезінде және емшек емізу кезеңінде қолдану» бөлімін қараңыз).
- лактаза тапшылығы, лактоза жақпаушылығы, глюкоза-галактоза мальабсорбциясы синдромы
- 18 жасқа дейінгі балаларға (деректер жоқ болғандықтан).
Дәрілермен өзара әрекеттесуі
Фармакодинамикалық өзара әрекеттесулер
Бір мезгілде қолдану ұсынылмайды
QT аралығын ұзартатын мыналар сияқты препараттармен бірге:
- QT аралығын ұзартатын, аритмияға қарсы дәрілер (мысалы, хинидин, дизопирамид, бепридил, соталол, ибутилид, амиодарон);
- QT аралығын ұзартатын аритмияға қарсы дәрілер болып табылмайтын препараттар (мысалы, вена ішіне енгізуге арналған пимозид, зипразидон, сертиндол, мефлокин, галофантрин, пентамидин, сизаприд, эритромицин).
Ивабрадинді аритмияға қарсы дәрілермен және QT аралығын ұзартатын, аритмияға қарсы дәрілер болып табылмайтын препараттармен бір мезгілде қолдануға жол бермеген жөн, өйткені ЖЖЖ сиреуі QT аралығының қосымша ұзаруын туындатуы мүмкін. Мұндай біріктірілімді қолдану қажет болған кезде жүректің жұмысына мұқият мониторинг жүргізу керек («Айрықша нұсқаулар» бөлімін қараңыз).
Бір мезгілде қолданған кездегі сақтандырулар
Калий жинақтайтын диуретиктер (тиазидтер тобының диуретиктері және «ілмектік» диуретиктер): гипокалиемия аритмияның даму қаупін арттыруы мүмкін. Ивабрадин брадикардияның туындатуы мүмкін болғандықтан, гипокалиемияның және брадикардияның біріктірілуі, әсіресе QT аралығының туа біткен де, сонымен қатар қандай да болсын заттардың әсерінен туындаған ұзару синдромы бар пациенттерде аритмияның ауыр түрінің дамуы үшін бейімдегіш фактор болып табылады.
Фармакокинетикалық өзара әрекеттесулер
P450 3A4 (CYP3A4) цитохромы
Ивабрадин тек CYP3A4 цитохромы изоферменттерінің қатысуымен ғана метаболизденеді. Бұдан басқа, препарат осы цитохромның өте әлсіз тежегіші болып табылады. Ивабрадин плазмадағы CYP3A4 изоферментінің басқа субстраттарының (әлсіз, орташа және күшті тежегіштерінің) метаболизміне және концентрациясына ықпалын тигізбейтіндігін көрсетті. CYP3A4 изоферменті тежегіштерінің және индукторларының ивабрадинмен өзара әрекеттесуге түсуі және оның метаболизміне және фармакокинетикасына клиникалық тұрғыдан маңызды ықпалын тигізуі мүмкін. Дәрілер арасындағы өзара әрекеттесуге жүргізілген зерттеулер барысында CYP3A4 изоферментінің тежегіштері қан плазмасындағы ивабрадинннің концентрациясын арттыратыны, ал индукторлары оның төмендеуіне әкелетіні анықталды. Қан плазмасындағы ивабрадин концентрациясының жоғарылауы айқын брадикардияның даму қаупінің туындауымен байланысты болуы мүмкін («Айрықша нұсқаулар» бөлімін қараңыз).
Бір мезгілде қолдануға болмайтын жағдайлар
CYP3A4 изоферментінің зеңге қарсы азолдар тобының дәрілері (кетоконазол, итраконазол); макролидтер тобына жататын антибиотиктер (кларитромицин, ішке қабылдауға арналған эритромицин, джозамицин, телитромицин); АИТВ-протеаза тежегіштері (нелфинавир, ритонавир) және нефазодон сияқты күшті тежегіштерімен бірге қолдануға болмайды («Қолдануға болмайтын жағдайлар» бөлімін қараңыз). CYP3A4 изоферментінің күшті тежегіштері – кетоконазол (тәулігіне бір рет 200 мг) немесе джозамицин (тәулігіне екі рет 1 г) – қан плазмасындағы ивабрадиннің орташа концентрацияларын 7-8 есеге арттырды.
CYP3A4 изоферментінің орташа тежегіштері: дені сау ерікті адамдардың және пациенттердің қатысуымен өзара әрекеттесуге жүргізілген арнайы зерттеулер ивабрадинді ЖЖЖ сирететін препараттармен, дилтиаземмен немесе верапамилмен біріктіріп қолдану, қан плазмасындағы ивабрадин концентрациясының артуымен («концентрация-уақыт» қисығы астындағы ауданның (AUC) 2 – 3 есе артуымен), сондай-ақ ЖЖЖ минутына 5 соғуға қосымша төмендеуімен қатар жүрді. Ивабрадинді осы дәрілік препараттармен бірге қолдануға болмайды («Қолдануға болмайтын жағдайлар» бөлімін қараңыз).
Бір мезгілде қолдану ұсынылмайды
Грейпфрут шырыны: грейфрут шырынымен бір мезгілде қолданғаннан кейін қан плазмасындағы ивабрадин концентрациясы 2 есеге артты. Раеном® препаратымен емдеу кезеңінде грейфрут шырынын пайдалануға жол бермеген жөн.
Бір мезгілде қолданған кездегі сақтандырулар
- CYP3A4 изоферментінің орташа тежегіштері: тыныш кезде ЖЖЖ минутына 70 соғудан көбірек болған жағдайда ивабрадинді CYP3A4 изоферментінің орташа басқа тежегіштерімен (мысалы, флуконазолмен) бір мезгілде қолдану мәселесін қарастыруға болады. Ивабрадиннің ұсынылатын бастапқы дозасы – тәулігіне екі рет 2,5 мг, ЖЖЖ-ні бақылау қажет.
- CYP3A4 изоферментінің индукторлары: CYP3A4 изоферментінің индукторлары (мысалы, рифампицин, барбитураттар, фенитоин, Hypericum perforatum [Шілтерлі шайқурай]) ивабрадиннің қан плазмасындағы концентрациясының және белсенділігінің төмендеуіне әкелуі мүмкін. CYP3A4 изоферментін индукциялайтын дәрілік заттарды бір мезгілде қолдану ивабрадин дозасын түзету қажеттілігіне әкеледі. Ивабрадинді 10 мг дозада тәулігіне екі рет Шілтерлі шайқураймен біріктіріп қолданғанда ивабрадиннің AUC мәнінің екі есе төмендегені білінді. Ивабрадинмен емдеу кезінде Шілтерлі шайқурайды қабылдауды шектеген жөн.
Басқа дәрілік заттармен бірге қолдану
Дәрілік өзара әрекеттесулерге жүргізілген арнайы зерттеу нәтижелері бойынша келесі дәрілік препараттар ивабрадиннің фармакокинетикасына және фармакодинамикасына клиникалық тұрғыдан маңызды ықпалын тигізбейді: протонды помпа тежегіштері (омепразол, лансопразол), силденафил, гидроксиметилглутарил-кофермент A (ГМГ-КоА) редуктаза тежегіштері (симвастатин), кальций өзектерінің дигидропиридиндер тобының блокаторлары (амлодипин, лацидипин), дигоксин және варфарин. Бұдан басқа, симвастатиннің, амлодипиннің, лацидипиннің фармакокинетикасына, дигоксиннің, варфариннің фармакокинетикасына және фармакодинамикасына және аспириннің фармакодинамикасына ивабрадиннің клиникалық тұрғыдан маңызды ықпалын тигізбейтіндігі анықталды.
Әдеттегі іс-тәжірибе аясында төменде берілген дәрілік препараттар ивабрадинмен біріктіріп қолданылды, бұл жүргізілген емнің қауіпсіздік бейінінің өзгеруімен қатар жүрген жоқ: ангиотензинөзгертетін фермент тежегіштері, ангиотензин II рецепторларының антагонистері, бета-адреноблокаторлар, диуретиктер, альдостерон антагонистері, әсер етуі қысқа және ұзаққа созылатын нитраттар, ГМГ-КоА редуктаза тежегіштері, фибраттар, протонды помпа тежегіштері, ішке қабылдауға арналған гипогликемиялық дәрілер, аспирин және басқа да антиагрегантты дәрілер.
Балалар
Өзара әрекеттесуіне зерттеулер тек ересектердің қатысуымен ғана жүргізілді.
Айрықша нұсқаулар
Симптоматикалық созылмалы тұрақты стенокардиясы бар пациенттерде клиникалық нәтижесіне ықпалының болмауы
Раеном® препараты созылмалы тұрақты стенокардияны ғана емдеу үшін қолданылады, өйткені ол жүрек-қантамырлық нәтижеге (мысалы, миокард инфарктісі немесе жүрек-қантамыр ауруларынан болатын өлім) оң ықпалын тигізбейді.
ЖЖЖ бақылау
Тәулік бойы ЖЖЖ-нің құбылуына назар аудара отырып, Раеном® препаратымен емді бастар алдында тыныш кезде ЖЖЖ-ні анықтағанда, сондай-ақ ивабрадинмен ем қабылдап жүрген пациенттерде дозаны титрлеу қажет болған кезде, ЖЖЖ-ні, ЭКГ-ні мезгіл-мезгіл өлшеу және 24 сағаттық мониторинг жүргізу мәселесін қарастырған жөн. Бұл сондай-ақ ЖЖЖ сирек, атап айтқанда, ЖЖЖ минутына 50 соғ.-дан сирек болған немесе дозаны төмендеткен пациенттерге қатысты («Қолдану тәсілі және дозалары» бөлімін қараңыз).
Жүрек ырғағының бұзылулары
Раеном® аритмияларды емдеу немесе профилактика жүргізу үшін тиімді емес. Тахиаритмияның (мысалы, қарыншалық немесе қарыншаүсті тахикардиясы) даму аясында оның тиімділігінің төмендеу ықтималдылығы жоғары. Сондықтан Раеном® препараты жүрекшелер фибрилляциясы бар немесе синустық түйін функциясымен байланысты жүрек аритмияларының басқа түрлері бар пациенттерге ұсынылмайды.
Раеном® препаратымен ем қабылдап жүрген пациенттерде жүрекшелер фибрилляциясының даму қаупі жоғары. Жүрекшелер фибрилляциясы ивабрадинмен бір мезгілде амиодарон немесе аритмияға қарсы І класс препараттарын қабылдаған пациенттер арасында жиі кездесті. Раеном® препаратымен ем қабылдап жүрген пациенттерге жүрекшелер фибрилляциясын (тұрақты немесе пароксизмальді) анықтау тұрғысында ұдайы клиникалық бақылау жүргізу ұсынылады, ол клиникалық көрсетілімдер бар болған кезде (мысалы, стенокардия барысы нашарлаған, жүректің қағуы сезілген, тамырдың соғуы жүйесіз болған жағдайда) сондай-ақ ЭКГ мониторинг жүргізуді қамтуы тиіс.
Пациенттер жүрекшелер фибрилляциясының белгілері мен симптомдарынан хабардар болуы тиіс, сондай-ақ мұндай симптомдар пайда болған жағдайда дәрігерге қаралу қажеттілігі алдын ала ескертілуі тиіс.
Егер емделу кезінде жүрекшелер фибрилляциясы туындаса, онда Раеном® препаратымен әрі қарай емдеудің пайда-қаупінің арақатынасына баға беру қажет.
ЖСЖ бар және жасушаішілік өткізгіштігі бұзылған (сол жақ Гисс бумасының блокадасы, оң жақ Гисс бумасы сабағының блокадасы) және қарыншалық диссинхрониясы бар пациенттер қалтқысыз бақылануы тиіс.
II дәрежедегі AV-блокада
ІІ дәрежедегі AV-блокадасы бар пациенттерге Раеном® препаратын тағайындау ұсынылмайды.
Брадикардиясы бар пациенттерде қолдану
Раеном® препаратын пациенттерге, егер емдеуді бастағанға дейін тыныш кезде ЖЖЖ-нің соғуы 70-тен азды құраса, тағайындамаған жөн («Қолдануға болмайтын жағдайлар» бөлімін қараңыз).
Егер емдеу аясында тыныш кездегі ЖЖЖ минутына 50 соғ.-дан азырақ мәнге дейін сиресе немесе пациентте брадикардиямен байланысты (бас айналу, қатты қажу немесе артериялық гипотензия сияқты) симптомдар пайда болса, препарат дозасын азайту қажет. Егер ЖЖЖ минутына 50 соғ.-дан азырақ күйінде қалса немесе брадикардия симптомдары сақталса, препарат қабылдауды тоқтату қажет («Қолдану тәсілі және дозалары» бөлімін қараңыз).
Баяу кальций өзектері блокаторларымен біріктіріп емдеу
Раеном® препаратын ЖЖЖ сирететін верапамил немесе дилтиазем сияқты баяу кальций өзектерінің блокаторларымен (БКӨБ) біріктіріп қолдануға болмайды («Қолдануға болмайтын жағдайлар» және «Дәрілік өзара әрекеттесулер» бөлімдерін қараңыз). Раеном® препаратын нитраттармен және дигидропиридин қатарының амлодипин сияқты БКӨБ-мен біріктіріп қолданған кезде қауіпсіздік бейінінде өзгерулер байқалған жоқ. БКӨБ-мен бір мезгілде қолдану ивабрадиннің тиімділігін арттыратындығы анықталмаған.
Жүрек функциясының созылмалы жеткіліксіздігі
Раеном® препаратын қолдану жөніндегі мәселені тұрақты ЖСЖ жағдайында ғана қарастыру керек. NYHA бойынша функциональді IV класқа жататын ЖСЖ бар пациенттерге Раеном® препаратын қолданған кезде, пациенттердің осы тобында препаратты қолдану жөнінде деректер шектеулі болғандықтан, оны сақтықпен қолдану қажет.
Инсульт
Инсультті бастан кешіргеннен кейін Раеном® препаратын қолдану ұсынылмайды, өйткені мұндай жағдайларда препаратты қолдану жөнінде деректер жоқ.
Көру сезімінің функциясы
Ивабрадин көз торқабығының функциясына ықпалын тигізеді. Ивабрадинмен емдеу торқабыққа ұзақ мерзімдік уытты әсер ететіндігіне айғақтамалар жоқ. Осы нұсқаулықта сипатталмаған зерттеу функцияларының бұзылулары туындаған жағдайда препарат қабылдауды тоқтату жөніндегі мәселені шешу керек. Торқабықтың пигменттік дегенерациясы бар пациенттерге Раеном® препаратын тағайындағанда сақтық танытқан жөн.
Қолданған кездегі сақтандыру шаралары
Артериялық гипотензия
Жеңіл немесе орташа артериялық гипотензиясы бар пациенттерде қолдану жөнінде деректер жеткіліксіз, сондықтан мұндай пациенттерге Раеном® препаратын тағайындағанда сақтық танытқан жөн. Раеном® препаратын артериялық ауыр гипотензиясы бар пациенттерге АҚ <90/50 мм с. б. кезінде қолдануға болмайды («Қолдануға болмайтын жағдайлар» бөлімін қараңыз).
Жүрекшелердің фибрилляциясы – жүрек аритмиялары
Фармакологиялық кардиоверсия жүргізу жолымен синустық ырғақты қалпына келтірген кезде ивабрадинді қабылдау аясында айқын брадикардияның даму қаупі байқалған жоқ. Дегенмен, жеткілікті деректер жоқ болғандықтан, мүмкіндігінше, жоспарлы электрлік кардиоверсияны кейінге қалдыру, оны жүргізуден 24 сағат бұрын Раеном® препаратын қабылдауды тоқтату керек.
QT аралығы ұзаруының туа біткен синдромы немесе QT аралығын ұзартатын препараттармен емдеу
QT аралығы ұзаруының туа беткен синдромы бар пациенттерге немесе QT аралығын ұзартатын препараттарды қабылдап жүрген пациенттерге Раеном® препаратын тағайындауға жол бермеген жөн («Дәрілермен өзара әрекеттесуі» бөлімін қараңыз). Осындай біріктірілімді қолдану қажет болғанда жүрек жұмысына мұқият мониторинг жүргізу керек.
Ивабрадиннің әсерінен ЖЖЖ сиреуі QT аралығының ұзаруын өршітуі мүмкін, бұл ауыр аритмияның, атап айтқанда, «пируэт» типті полиморфты қарыншалық тахикардияның дамуына себеп болуы мүмкін.
Гипотензиялық емді түзетуді қажет ететін, артериялық гипертензиясы бар пациенттер
Артериялық қысымның жоғарылау жағдайлары ивабрадин қабылдаған пациенттер тобында (7,1%), плацебо тобымен салыстырғанда (6,1%), жиі кездесті. Бәрінен бұрын бұл жағдайлар гипотензиялық емді өзгерткеннен кейін бірден байқалды, олар уақытша сипатқа ие болды және ивабрадиннің тиімділігіне ықпалын тигізген жоқ. Ивабрадин қабылдап жүрген, ЖСЖ бар пациенттерде гипотензиялық емді өзгерткен кезде, тиісті уақыт аралығынан кейін артериялық қысымға мониторинг жүргізу қажет («Жағымсыз әсерлері» бөлімін қараңыз).
Үлбірлі қабықпен қапталған Раеном® таблеткаларының құрамында лактоза бар.
Препаратты қабылдау лактаза тапшылығы, лактоза жақпаушылығы, глюкоза-галактоза мальабсорбциясы синдромы бар пациенттерге ұсынылмайды.
Жүктілік және емшек емізу кезеңі
Ұрпақ өрбіту жасындағы әйелдер
Ұрпақ өрбіту жасындағы әйелдер Раеном® препаратымен емделу кезінде контрацепцияның сенімді әдістерін қолданулары тиіс («Қолдануға болмайтын жағдайлар» бөлімін қараңыз).
Жүктілік
Жүкті кезінде әйелдерде ивабрадинді қолдану жөнінде деректер жеткіліксіз немесе жоқ.
Жануарларға жүргізілген зерттеулер репродукциялық уыттылықты көрсетеді. Бұл зерттеулер эмбриоуытты және тератогендік әсерлерді анықтады. Адамдарға қолданған кездегі потенциалды қаупі белгісіз, сондықтан жүктілік кезінде Раеном® препаратын қолдануға болмайды («Қолдануға болмайтын жағдайлар» бөлімін қараңыз).
Емшек емізу кезеңі
Жануарларға жасалған тәжірибелер емшек сүтіне ивабрадиннің өтетіндігін көрсетеді. Сондықтан емшек емізу кезеңінде Раеном® препаратын қабылдауға болмайды («Қолдануға болмайтын жағдайлар» бөлімін қараңыз).
Ивабрадинмен емдеу қажет ететін әйелдер емшек емізуді тоқтатуы және нәрестені қоректендірудің басқа тәсілін таңдауы тиіс.
Фертильділік
Егеуқұйрықтарға жүргізілген зерттеулерде оның еркегіне де, ұрғашысына да әсері байқалған жоқ.
Көлік құралдарын және потенциалды қауіпті механизмдерді басқару қабілетіне дәрілік препараттың ықпал ету ерекшеліктері
Автомобильді басқару қабілетіне ивабрадиннің ықпалына баға беруге қатысты арнайы зерттеу дені сау ерікті адамдардың қатысуымен жүргізілді. Оның нәтижесі бойынша автомобильді басқару қабілеті өзгерген жоқ. Алайда тіркеуден кейінгі кезеңде, көрудің бұзылуымен байланысты, автомобильді басқару қабілетінің нашарлау жағдайлары кездесті. Ивабрадин көбіне фосфендер түрінде жарықты қабылдаудың уақытша өзгеруін туындатуы мүмкін («Жағымсыз әсерлері» бөлімін қараңыз). Жарықты қабылдаудың осындай өзгерулерінің туындауы мүмкін екендігіне, жарық кенет қарқынды түрде өзгергенде, әсіресе түнгі уақытта автокөлікті немесе басқа механизмдерді басқарған кезде көңіл бөлінуі тиіс.
Ивабрадин механизмдермен жұмыс жасау қабілетіне ықпалын тигізбейді.
Артық дозалануы
Симптомдары
Артық дозалануы айқын және ұзаққа созылатын брадикардияға әкеп соғуы мүмкін.
Емі
Айқын брадикардияны емдеу симптоматикалық болуы және мамандандырылған бөлімдерде жүргізілуі тиіс. Гемодинамика көрсеткіштерінің бұзылуларымен біріккен брадикардия дамыған жағдайда изопреналин сияқты бета-адреномиметиктер вена ішіне енгізілетін симптомдық ем қолданылады. Қажет болған жағдайда жасанды ырғақ жетекшісі орнатылуы мүмкін.
Шығарылу түрі және қаптамасы
ПА/Ал/ПВХ/Ал жасалған пішінді ұяшықты қаптамаға 14 таблеткадан салынған. Пішінді ұяшықты 2 немесе 4 қаптама медициналық қолдану жөнінде мемлекеттік және орыс тілдеріндегі нұсқаулықпен бірге картон қорапшаға салынған.
Сақтау шарттары
30°С-ден аспайтын температурада сақтау керек.
Балалардың қол жетпейтін жерде сақтау керек!
Сақтау мерзімі
3 жыл.
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы.
Өндірушінің атауы және мекенжайы
Гедеон Рихтер Румыния А.Қ.,
540306, Тыргу-Муреш, Куза Водэ к-сі, 99 – 105, Румыния
Тіркеу куәлігі ұстаушысының атауы және мекенжайы
«Гедеон Рихтер» ААҚ
1103 Будапешт, Дёмрёи к-сі, 19-21, Венгрия
Қазақстан Республикасы аумағында тұтынушылардан дәрілік заттың сапасы жөніндегі шағымдарды (ұсыныстарды) қабылдайтын ұйымның атауы, мекенжайы және байланыс жасау деректері:
«Гедеон Рихтер» АҚҚ ҚР өкілдігі, Алматы қ., Төле би к-сі, 187
E-mail: info@richter.kz
Телефон: 8-(7272)-58-26-22, 8-(7272)-58-26-23
Қазақстан Республикасы аумағында тіркеуден кейін дәрілік заттың қауіпсіздігін бақылауға жауапты ұйымның атауы, мекенжайы және байланыс жасау деректері:
«Гедеон Рихтер» АҚҚ ҚР өкілдігі, Алматы қ., Төле би к-сі, 187
E-mail: pv@richter.kz
Телефон: 8-(7272)-58-26-22, 8-(7272)-58-26-23, 8-701-787-47-01