Проанес 1%

• русский
• қазақша

• Скачать инструкцию медикамента

Саудалық атауы

Проанес 1%

Халықаралық патенттелмеген атауы

Пропофол

Дәрілік түрі

Көктамыр ішіне енгізуге арналған эмульсия, 20 мл

Құрамы

1 мл препараттың құрамында

белсенді зат – 10 мг пропофол,

қосымша заттар: соя майы, триглицеридтер, жұмыртқа лецитині, глицерин, олеин қышқылы, натрий гидроксиді, инъекцияға арналған су.

Сипаттамасы

Ақ сұйық эмульсия

Фармакотерапиялық тобы

Басқа да жалпы анестетиктер

АТХ коды N01AX10

Фармакологиялық қасиеттері

Фармакокинетикасы

Пропофол плазма ақуыздарымен 97% байланысады. Көктамырішілік инфузиядан кейін жартылай шығару кезеңі 277-ден 403 минутқа дейінді құрайды. Көктамырішілік болюсті инъекциядан кейін пропофолдың кинетикасы үш фазадан тұратын модель түрінде беріледі: жылдам таралу фазасы (жартылай шығару кезеңі 2 – 4 минут), элиминациялану ß-фазасы (жартылай шығару кезеңі 30 – 60 минут) және элиминациялану γ-фазасы (жартылай шығару кезеңі 200 – 300 минут). γ-фазасы барысында терең бөліктерден, мүмкін май тіндерінен баяу қайта таралуы салдарынан препараттың концентрациясының төмендеуі баяу жүреді. Клиникалық жағдайда бұл фаза ояну уақытына әсер етпейді. Пропофол негізінен бауырда клиренс 2 л/мин жуық болған кезде конъюгация жолымен метаболизденеді, бірақ метаболизм бауырдан тыс жерде де жүреді. Белсенді емес метаболиттер көбіне бүйректер арқылы (88% жуық) шығарылады. Анестезияны әдеттегі режимде демеу кезінде, ұзақтығы 5 сағатқа дейінгі хирургиялық емшаралардан кейін пропофолдың елеулі жинақталуы байқалған жоқ.

Фармакодинамикасы

1% Проанес наркозға енгізуге және жалпы анестезияны демеуге арналған, сондай-ақ қарқынды ем кезінде емделушілерді тыныштандыру үшін жылдам әсер ететін көктамырішілік анестетик болып табылады. Емделушілердің көпшілігінде жалпы анестезия 30-60 секундтан кейін басталады. Анестезияның ұзақтығы дозаға және қатар жүретін препараттарға байланысты 10 минуттан 1 сағатқа дейінді құрайды. Анестезиядан емделуші тез және есі анық болып оянады. Көзін ашу мүмкіндігі 10 минуттан кейін пайда болады. Спецификалық рецепторлық бөліктер анықталмаған. Жалпы пікірге сәйкес, анестетиктер липидті жарғақшалар деңгейінде спецификалық емес әсер туындатады.

Қолданылуы

- наркозға енгізу және жалпы анестезияны демеу үшін

- қарқынды терапия бөлімінде өкпелеріне жасанды желдету (ӨЖЖ) жасалатын емделушіні тыныштандыру үшін

- диагностикалық және хирургиялық емшара жасаған кезде тыныштандыру үшін монотерапия ретінде немесе жергілікті немесе аймақтық анестезияға арналған басқа препараттармен бірге.

Қолдану тәсілі және дозалары

Препарат көктамыр ішіне тағайындалады. Препаратты қарқынды ем жүргізу бөлімінде, немесе күндізгі стационардың талапқа сай жабдықталған бөлімдерінде науқастарды күту үшін арнайы оқытылған қызметкер ғана енгізуге тиіс. Тыныс алу қызметі және қан айналымы үнемі мониторда бақыланып отыру керек (ЭКГ, тамыр соғысын анықтайтын оксиметр). Тыныс жолдарының еркін өткізгіштігін демеу, жасанды тыныс алдыру, және басқа да реанимациялық шаралар үшін жабдықтар кез келген уақытта дайын болуы керек.

Хирургиялық және диагностикалық емшара кезінде тыныштандырғыш әсерді қамтамасыз ету үшін препаратты хирургиялық немесе диагностикалық емшара жүргізетін дәрігер тағайындамауға тиіс.

1 % Проанес препаратының дозасы жекелей таңдалады.

Ампуланы ашқаннан кейін препаратты жылдам енгізу керек. Асептика ережесі 1 % Проанес препаратын құюдың барлық кезеңі ішінде сақталуы тиіс.

Әдетте, 1 % Проанес тағайындау қосымша ауыруды басатын дәрілерді пайдалануды қажет етеді.

Ересектер

Наркозға енгізу

• 1 % Проанес дозасын емделушінің реакциясына байланысты жекелей титрлеу керек (әрбір 10 секунд сайын 20-40 мг пропофол). Жасы 55 тен төмен ересек емделушілердің көпшілігіне бәлкім препаратты әр кг дене салмағына 1,5 - 2,5 мг пропофол дозасында енгізу қажет болуы мүмкін.

• Егделеу және физикалық жағдайы 3 және 4 дәрежелі емделушілерге (Америкалық анестезиологтар қоғамының ASA (American Society of Anestesiologists) классификациясына сәйкес), әсіресе жүрек қызметі әлсіреген кезде төмендеу доза керек болуы және 1 % Проанес дозасы ең төменгі шамаға әр кг дене салмағына 1 мг препаратқа дейін қысқаруы тиіс. Мұндай емделушілерге препаратты азырақ жылдамдықпен енгізу керек (әр10 секундта шамамен 20 мг).

Жалпы анестезияны демеу

• Ұзаққа созылатын инфузия немесе болюсті инъекцияны қайталау арқылы 1% Проанес енгізу анестезияны демейді. Қайталанған болюсті инъекцияны пайдаланған кезде, клиникалық көрсетілімге байланысты дозаны 25 мг – ден (2,5 мл 1% Проанес (10 мг/мл)) 50 мг (5.0 мл 1% Проанес (10 мг/мл)) дейін арттыруға болады. Ұзаққа созылатын инфузия жүргізгенде енгізу жылдамдығы жекелей анықталады. Жалпы анестезияны демеу үшін ұзаққа созылатын құю тәсілімен 1% Проанес 4-12 мг/кг/сағ дозада тағайындалу керек. Дозаны сағатына әр кг дене салмағына 4 мг пропофолға дейін төмендету күрделі емес хирургиялық ем-шаралар жүргізу кезінде жеткілікті болуы мүмкін.

Егде жастағы емделушілер, әлсіреген емделушілер, сондай-ақ ASА классификациясы бойынша 3 және 4 дәрежедегі және гиповолемияға шалдыққан емделушілер үшін препарат дозасы емделуші жағдайының ауырлық дәрежесіне және жасалған анестезия әдісіне байланысты төмендетіледі.

Ересектер

Қарқынды емдеу кезінде жасанды тыныс алушы емделушілердегі тыныштандырғыш әсерді қамтамасыз ету

Қарқынды ем кезінде емделушілерді тыныштандыру үшін 1 % Проанес ұзаққа созылатын инфузия түрінде енгізу ұсынылады. Инфузияның енгізу жылдамдығы қажетті седация тереңдігіне сәйкес анықталады. Емделушілердің көпшілігінде седацияның жеткілікті деңгейіне препараттың 0,3 – 4 мг/кг/сағ дозасында жетуге болады. Сағатына әр кг дене салмағына 4 мг дозадан асыру ұсынылмайды. («Айрықша нұсқаулар» қара). 1% Проанестің тұрақты инфузиясының ұзақтығы 7 күннен аспауы керек. Седацияны қамтамасыз ету үшін 1% Проанесті қарқынды емдеу бөлімінде TCI жүйесінің көмегімен енгізуге болмайды (Мақсатты бақыланатын инфузия).

• Парентеральді қоректенудегі емделушілер 1% Проанес (10 мг/мл) құрамындағы майдың мөлшерін есептеуі қажет: 1.0 мл Пропофолдың құрамында 0,1 г май бар.

Ересектер

Хирургиялық және диагностикалық ем-шаралар кезіндегі тыныштандыру

Хирургиялық және диагностикалық ем-шаралар кезіндегі тыныштандыру әсерін қамтамасыз ету үшін дозасы және енгізу жылдамдығы науқастағы клиникалық көрініске байланысты анықталады.

Тыныштандыру әсері басталуы үшін (1 ден 5 минутқа дейін) емделушілердің көпшілігіне әр кг дене салмағына шаққанда, 0.5 – 1 мг пропофол қажет етіледі. Емделушілерде тыныштандырғыш әсер пропофолды седацияның қажетті деңгейіне жеткенге дейін титрлеу әдісімен сақталады. Емделушілердің көпшілігіне сағатына әр кг дене салмағына шаққанда 1.5-4.5 мг пропофол қажет етіледі. Емделушілерде седацияның керекті дәрежесіне тез жету үшін пропофол препаратын 10-20 мг (1-2 мл 1 Проанес) болюсті инъекция түрінде енгізеді. 55 жастан асқан емделушілер және АSА классификациясы бойынша 3 және 4 дәрежедегі емделушілер үшін доза мен енгізу жылдамдығы төмендетілуге тиіс.

Бірнеше препаратты бір инфузиялық жүйеде пропофолмен бірге енгізген кезде бұл препараттарды көктамырішілік канюляға жақын енгізу қажет. Пропофол микробиологиялық сүзгілері бар инфузиялық жинақ арқылы енгізу үшін қолданылмайды.

Препаратты ұзаққа созылатын енгізу кезінде, енгізу жылдамдығын бақылау үшін бюреткалар, тамшылатқыш реттеуіштер, еккіштік сорғылар немесе волюметриялық инфузиялық сорғылар пайдалану ұсынылады. Бір инфузиялық жүйе арқылы енгізу ұзақтығы 12 сағаттан аспауға тиіс, ол майлы эмульсиялардың барлық түрін парентеральды түрде енгізу үшін көпшілікке танымал. Препараттың пайдаланудан кейін қалған кез келген мөлшерін тастау керек.

Жағымсыз әсерлері

Пропофолды енгізу кезінде гипотензия, тыныс алудың бәсеңдеуі, өтпелі апноэ пайда болуы мүмкін. Кейде гипотензия 1% Проанестің енгізу жылдамдығын төмендетуді керек етеді, қажет болса орын басу емін (қантамырларын тарылтатын препараттар) жүргізу керек. Жағымсыз әсерлері пропофолдың дозасына, премедикация типіне және басқа да қатар жүретін дәрілерге байланысты. Оның ішінде, мынадай жағымсыз әсерлері байқалды:

Өте жиі

- инъекция орнының ауыруы

1% Проанесті алғаш рет енгізу кезінде пайда болатын жергілікті ауыруларды, лидокаинмен бірге енгізу немесе препаратты білектегі немесе шынтақ ойығындағы ірі көктамырлардың біріне енгізу арқылы азайтуға болады.

Жиі

- өздігінен қозғалу, миоклония, кіріспе наркоз кезіндегі гипотензия, ықылық, қан тебу, брадикардия, кіріспе наркоз кезіндегі тахикардия

- гипервентиляция, өткінші апноэ, жөтел (анестезия кезінде және қалпына келу кезеңінде)

- препаратты бастапқы енгізе бастағанда болатын жергілікті ауыру

- әлсіз немесе орташа гипотензия

Жиі емес

- дистония және басқа да еріксіз қозғалыстар

- демеуші наркоз кезіндегі жөтел

- айқын гипотензия

Сирек

- асқын сезімталдық реакциялары (анафилаксия), оның ішінде Квинке ісінуі, бронхтың түйілуі, эритема, гипотония

- эйфория, қалпына келу кезеңінде сексуальді мінез құлқындағы өзгерістер

- қалпына келу кезеңінде бас ауыруы, бас айналуы, діріл және суықты сезіну, жөтел, жүрек айнуы, құсу

- эпилептиформды құрысулар, опистотонус

- наркоздан қалпына келу кезеңінде естен айрылу жағдайы және сана-сезімнің қалпына келуінің кідіруі

- жүрек аритмиясы

- пропофолды ұзақ енгізуге байланысты несептің түссізденуі

- операциядан кейінгі қызба

- тромбоз, флебит

- айқын артериялық гипотензия

Бұл препараттың енгізу жылдамдығын төмендетуді қажет етуі мүмкін. Коронарлық немесе церебральді қан айналымының бұзылуы бар немесе гиповолемиямен науқастарда артериялық қысымның қатты төмен түсіп кету мүмкіндігін ескеру керек.

Пропофолды пайдалану аясында брадикардия пайда болуы және кейбір жағдайларда жүректің тоқтап қалуы мүмкін (асистолия).

Өте сирек

- кейінге қалған эпилептиформды ұстамалар, кідіру кезеңі бірнеше сағаттан бірнеше күнге дейін ауытқуы мүмкін

- өкпенің ісінуі

- панкреатит

- кездейсоқ экстраваскулярлы енгізуде айқын білінетін тіндік реакциялар

- симптомдар кешені: рабдомиолиз, метаболиялық ацидоз немесе алкалоз, гиперкалиемия, кейде өліммен аяқталатын жүрек жеткіліксіздігі

Берілген жағымсыз әсерлер науқастарда препаратты сағатына әр кг дене салмағына 4 мг –ден жоғары дозада енгізгенде байқалды.

- бас айналуы, құсу, ұйқышылдық, құрысулар, брадикардия, жүрек аритмиясы, пропофолды лидокаинмен біріктіріп енгізгеннен кейінгі болатын шок

Қолдануға болмайтын жағдайлар

- лидокаинге, пропофолға немесе эмульсия құрамындағы препараттың қосымша компоненттеріне аса сезімталдық

- соя бұршағына немесе арахиске аллергиялық реакция

- балалар және 18 жасқа дейінгі жасөспірімдер (тиімділігі және қауіпсіздігі анқталмаған)

- жүктілік және лактация кезеңі

- босану кезіндегі анестезия (абортты қоспағанда)

Дәрілермен өзара әрекеттесуі

1 Проанесті анестезияға арналған басқа медициналық препараттармен (премедикацияға арналған препараттармен, ингаляциялық анестетиктермен, анальгетиктермен, бұлшықет релаксанттарымен, жергілікті анестетиктермен) бірге қолдануға болады. Пропофолды осы препараттармен біріктірген кезде қандай да болсын ауыр жағымсыз әсерлер жөнінде күні бүгінге дейін ешқандай мәлімдемелер болған жоқ. Орталыққа әсер ететін осы препараттардың кейбіреулері тыныс алу жүйесін және оларды пропофолмен бір мезгілде қолданған кезде күшеюі мүмкін қан айналымының жеткіліксіздігін бәсеңдетуі мүмкін.

1 Проанестің төмендеу дозаларын жергілікті анестезияға арналған дәрілерге қосымша ретінде пайдаланғанда жеткілікті болып шығуы мүмкін.

Анестезияны ұзарту және тыныс алу жиілігін төмендету үшін бензодиазепиндерді, парасимпатикалық заттарды немесе ингаляциялық анестетиктерді қатар жүргізе қолданған жағдайлар жөнінде мәлімделді.

Егер профолмен премедикацияға апиындар бірге қолданылған болса, онда тыныс алудың тоқтап қалуы жиі әрі көп ұзақтығымен ерекшеленеді.

Пропофолды премедикацияға арналған препараттармен, ингаляциялық енгізуге арналған дәрілермен немесе ауыруды басатын дәрілермен қоса қабаттастыра қолдану анестезия әсерін дәл жүрек-қан тамыр жүйесі тарапынан болатын жағымсыз әсерлердей күшейтуі мүмкін. Орталық жүйке жүйесін бәсеңдететін дәрілерді, мысалы, спиртті, жалпы анестетиктерді, есірткілік анальгетиктерді қоса қабаттастыра қолдану олардың тыныштандырғыш әсерінің күшеюіне әкеп соқтырады.

1% Проанесті ОЖЖ депрессанттарымен бір мезгілде қолдану Пропофолдың жансыздандырғыш әсерін күшейтуі мүмкін, оның жүрек қантамырлары мен тыныс алу жүйесіне әсерін жоғарылатуы мүмкін.

Фентанилді қолданғаннан кейін, пропофолдың қандағы деңгейі апноэның ұзақтығының артуымен бірге уақытша жоғарылауы мүмкін.

Брадикардия және жүректің тоқтап қалу жағдайы суксаметониймен және неостигминмен емдеуден кейін пайда болуы мүмкін. Пропофол сияқты құрамында липидтер бар эмульсияларды енгізген кезде, циклоспорин қабылдап жүрген емделушілерде кейбір жағдайларда лейкоэнцефалопатия байқалған.

Айрықша нұсқаулар

Жүрек және тыныс алу қызметтері бұзылған, бүйрек немесе бауыр қызметінің жеткіліксіздігі бар емделушілерге, гиповолемияға, эпилепсия ауруына шалдыққан, сондай-ақ әлсіреген егде, ақыл-ес бұзылыстары бар емделушілерге қолданғанда ерекше сақ болған жөн.

Эпилепсия ауруына шалдыққан науқастарға анестезия жасар алдында науқасқа эпилепсияға қарсы қажетті дәрілердің берілгеніне көз жеткізген жөн.

1% Проанесті жүрек жеткіліксіздігі бар науқастарға тағайындауға болмайды. Кардиологиялық ауыр сипатты аурулары бар науқастарға препаратты ерекше сақтықпен және мұқият бақылаумен қолдану керек.

Пропофолды қолданар алдында антихолинергиялық дәрілерді, әсіресе кезбе жүйкесінің тонусы басым болған жағдайларда немесе препаратты брадикардия тудыруға бейім дәрілермен біріктіріп қолданған кезде, көктамыр ішіне енгізген дұрыс.

Сағатына әр кг дене салмағына шаққанда 5 мг-нан астам дозадағы пропофолды 58 сағаттан астам бойы енгізгенде ересек науқастарда метаболикалық ацидоз, рабдомиолиз, гиперкалиемия және/немесе тез өршитін жүрек жеткіліксіздігі пайда болғаны жөнінде (кейбір жағдайларда өлім-жітіммен аяқталған) өте сирек жағдайлар мәлімделген. Бұл қазіргі таңда қарқынды терапия бөлімінде седация жасау үшін тиісті, сағатына әр кг дене салмағына шаққанда пропофолдың 4 мг-нан астам болатын ең жоғары дозасынан асып кетеді. Осындай жағдайлардағы жүрек қызметінің жеткіліксіздігі әдетте инотропты, қалпына келтіру емінің әсеріне берілмейді. Емдеуші дәрігер-терапевт, мүмкіндігінше, сағатына әр кг дене салмағына шаққанда пропофол дозасын 4 мг-нан арттырмау қажет екендігін ескергені жөн. Рецептуралық препараттарды тағайындайтын медицина қызметкерлері препараттың жағымсыз әсерлеріне сақ болғандары және дозаны төмендету немесе симптомдардың алғашқы белгілері пайда болған кезде альтернативті тыныштандырғыш дәріге ауысу керектігін ескергені жөн. Бассүйекішілік қысымы жоғары науқастар емдеудегі осындай өзгерістер кезінде бас ми перфузиясының қысымын демеу үшін тиісті ем қабылдағаны жөн.

Электрошокпен емдеу кезінде пропофолды пайдалану керек емес. Май алмасуы бұзылған немесе май эмульсияларын қолдануды жоғары дәрежеде шектеуді қажет ететін аурулары бар емделушілерге ерекше көңіл бөлген жөн.

Парентеральды түрде тамақтанып жүрген емделушілер үшін 1 (10 мг/мл) Проанес құрамындағы май мөлшерін есептеу қажет: 1,0 мл Пропофол құрамында 0,1 г май бар.

Липидтер деңгейін қарқынды емдеу бөлімінде емді бастағаннан кейін 3 күннен соң жүргізген жөн.

Әдетте дене салмағы шамадан тыс емделушілерге енгізілетін дозалардың жоғары болуына байланысты пайда болатын кері гемодинамикалық әсер қаупінің жоғары екендігін назарда ұстау қажет.

Бассүйекішілік қысымы жоғары немесе артериялық төмен қысымы бар емделушілерге ерекше көңіл бөлген жөн, өйткені бассүйекішілік қысымның елеулі түрде төмендеу қаупі бар.

Тұқым қуалаған жедел ағымды порфириясы бар емделушілерге қолданғанда препаратты лидокаин ерітіндісімен сұйылтуға болмайды.

Проанесті тек анестезиолог немесе қарқынды емдеу жөніндегі маман ғана енгізе алады.

1% Проанесті хирургиялық немесе диагностикалық ем-шаралар жүргізуші дәрігер енгізуге болмайды. Жекелеген жағдайларда науқастарда бұлшық ет тонусының жоғарылауымен қатарлас жүретін операциядан кейінгі естен тану фазасы байқалуы мүмкін. Мұндай жағдайдың пайда болуы емделуші сергек пе, жоқ па оған байланысты емес. Емделушілерде сананың өздігінен қалпына келетініне қарамастан, ессіз күйде жатқан емделушілер мұқият бақылауда болуға тиіс.

Балаларда қолданылуы

Наркозға енгізу және жалпы анестезияны демеу кезінде 1% Проанес препаратының тиімділігі мен қауіпсіздігі балаларда анықталған жоқ. Препарат педиатриялық тәжірибеде реанимация (қарқынды емдеу) жағдайында ұсынылмайды.

Себеп-салдарының өзара байланысуының дәлелінің жоқтығына қарамастан, балаларды тыныштандыру кезінде препаратты лицензияланбай қолданғанда ауыр жағымсыз әсерлер (өліммен аяқталуын қоса алғанда) тіркелген. Жағымсыз әсерлері, бәрінен бұрын қарқынды емдеу бөлімінде тыныштандыру үшін препаратты ересектер үшін ұсынылатын шегінен жоғары дозада қабылдаған, тыныс жолдарының жұқпалары бар балаларда жиі байқалды.

1% Проанес және оны енгізу үшін қажетті кез келген жабдық әрбір емделушіге асептиканы сақтай отырып, жекелей арналады. Пропофолды микробиологиялық сүзгілер арқылы енгізуге болмайды. Пропофолға қосылған кез келген дәрі немесе сұйықтық канюляға жақын енгізілуі тиіс.

Жүктілік және лактация кезеңі

1% Проанесті жүктілік және лактация кезінде, сондай-ақ жүктілікті тоқтату кезеңін қоспағанда, босану кезінде анестезия үшін жоғары дозаларда қолдануға болмайды.

Үйлесімсіздік

Инъекция кезінде ауыруды азайту үшін, 1% Проанесті құрамында консерванты жоқ, инъекцияға арналған лидокаиннің 1% ерітіндісімен араластыруға болады және тез арада пайдалану керек (1% Проанестің 20 бөлігін 1% лидокаин ерітіндісінің 1 бөлігімен араластырады). Миорелаксанттарды (атракурий және мивакуриум) 1% Проанесті пайдаланғаннан кейін ғана қолдануға болады. 1% (10 мг/мл) Проанестен кейін сол көктамырішілік құю жүйесі арқылы миорелаксанттарды атракуриум немесе мивакуриумді енгізер алдында мұндай жүйені жуып-шаю ұсынылады. Препаратты басқа ерітінділермен және инфузиямен араластыруға болмайды. Пропофолды Y-өткізгіш арқылы 5% декстроза, 0,9% натрий хлориді немесе 4% декстрозаға 0,18% натрий хлориді қосылған инфузияға инъекция орнына жақын енгізуге болады.

Дәрілік заттың көлік құралын және қауіптілігі зор механизмдерді басқару қабілетіне әсер ету ерекшеліктері

1% Проанесті енгізгеннен кейін науқастарды ұзақ уақыт бойы мұқият бақылау қажет. Емделушілердің көлік құралдарын және механизмдерді басқарудан бас тартқаны жөн және мұқият қадағалаумен жұмыс істеуі керек. Емделушілерді ауруханадан шыққаннан кейін үйіне біреудің жеткізгені жөн, сондай-ақ алкогольді қолдануға болмайтыны жөнінде нұсқау берілуге тиіс.

Артық дозалануы

Симптомдары: артық дозалану тыныс алу және жүрек-қантамырлары жүйесі қызметінің басылуын туындатуы мүмкін.

Емі: тыныс алу жүйесі бәсеңдеген кезде жасанды тыныс алдыру ұсынылады, жүрек-қантамырлары жүйесі бәсеңдеген кезде науқастың қалпын бас жағы - жоғары, ал аяқтары – төмен болатындай етіп өзгерту керек. Қажет болса, вазопрессорлы және плазма алмастыратын дәрілер немесе Рингер ерітіндісі тәрізді электролиттер ерітіндісін пайдалануға болады.

Шығарылу түрі және қаптамасы

Түссіз шыныдан жасалған ампулада 20 мл-ден.

Полистиролдан жасалған ұяшықты қаптамаға 5 ампуладан салынған.

1 ұяшықты қаптамадан мемлекеттік және орыс тіліндегі қолдану жөніндегі нұсқаулықпен бірге картон қорапқа салады.

Сақтау шарттары

Құрғақ, жарықтан қорғалған жерде, 25 ºС–ден аспайтын температурада сақтау керек.

Мұздатып қатыруға болмайды!

Балалардың қолы жетпейтін жерде сақтау керек!

Сақтау мерзімі

2 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Санбе Фарма

ЖИ. Таман Сари No.10

Бандунг, Индонезия

Тел: +62 22 686 7966

Факс: +62 22 686 7969

www.sanbe-farma.com 

Тіркеу куәлігінің иесі

Санбе Фарма

ЖИ. Таман Сари No.10

Бандунг, Индонезия

Тел: +62 22 686 7966

Факс: +62 22 686 7969

www.sanbe-farma.com 

Тұтынушылардан өнімнің сапасына қатысты шағымдарды Қазақстан Республикасы аумағында қабылдайтын ұйымның мекенжайы:

«NF Pharma» ЖШС

Алматы қ, Желтоқсан к-сі 118, 430 кеңсе

тел/факс: +7(727) 250 55 37, +(727)258 10 57