Постинор®

• русский
• қазақша

• Скачать инструкцию медикамента

Саудалық атауы

Постинор

Халықаралық патенттелмеген атауы

Левоноргестрел

Дәрілік түрі

0,75 мг таблеткалар

Құрамы

Бір таблетканың құрамында

белсенді зат - 0,75 мг левоногрестрел,

қосымша заттар: сусыз коллоидты кремнийдің қостотығы, картоп крахмалы, магний стеараты, тальк, жүгері крахмалы, лактоза моногидраты.

Сипаттамасы

Дөңгелек пішінді, жалпақ беткейлі, бір жағында «INOR» таңбасы, ойығы бар, ақ немесе ақ дерлік түсті таблеткалар

Фармакотерапиялық тобы

Жыныс гормондары және жыныс жүйесінің модуляторлары. Жүйелі қолдануға арналған гормональді контрацептивтер. Прогестагендер. Левоноргестрел

АТХ коды G03АС03

Фармакологиялық қасиеттері

Фармакокинетикасы

Ішу арқылы қабылдағанда левоноргестрел тез және іс жүзінде толық сіңеді. Постинордың бір таблеткасын қабылдағаннан кейін 1,6 сағаттан соң препарат қан сарысуында 14,1 нг/мл ең жоғары концентрациясына жетеді. Бұдан кейін препарат концентрациясының екі сатыда төмендеуі жүреді, жартылай шығарылу кезеңі 9-дан 14,5 сағатқа дейінгі шекте ауытқумен болады.

Левоноргестрел несеппен және нәжіспен тең дәрежеде тек қана метаболиттер түрінде шығарылады. Левоноргестрел биоөзгерісі стероидтар метаболизміне сай келеді. Левоноргестрел бауырда гидроксилденеді және метаболиттері конъюгацияланған глюкуронаттар түрінде шығарылады. Левоноргестрелдің фармакологиялық белсенді метаболиттері белгісіз. Левоноргестрел қан сарысуы альбуминімен және жыныс гормондарын байланыстыратын глобулинмен (ЖГБГ) байланысады. Барлық дозадан 1,5 % ғана бос түрде болады, ал 65 % ЖГБГ-мен байланысты. Абсолютті биожетімділігі іс жүзінде түгел 100 % дозаны құрайды.

0,1 % жуық доза ана сүтімен сәби организміне түседі.

Фармакодинамикасы

Левоноргестрел ұсынылған дозада овуляцияны, ал егер жыныстық қатынас овуляцияның алдында болған жағдайда (бұл уақытта ұрықтану ықтималдығы жоғары) ұрықтануды болдырмайды. Бұған қоса левоноргестрелден болатын эндометрий өзгерісі ұрықтанған ұрық жасушасы имплантациясына бөгет болады. Егер имплантация үдерісі басталып қойса, онда препарат тиімсіз болады.

Тиімділігі: Постинор таблеткаларының көмегімен шамамен 85 % жағдайда жүктілікке жол бермеуге болады. Жыныстық қатынас пен препарат қабылдау арасында қанша көп уақыт өтсе, оның тиімділігі сонша төмен (алғашқы 24 сағат ішінде – 95 %, 24-тен 48 сағатқа дейін – 85 % және 48-ден 72 сағатқа дейін - 58 %) болады. Осылайша, Постинор таблеткаларын қабылдауды, егер ешқандай сақтану шаралары қолданылмаса, жыныстық қатынастан кейін мүмкіндігінше тезірек (бірақ 72 сағаттан кешіктірмей) бастау ұсынылады. Ұсынылған дозада левоноргестрел коагуляция жүйесіне және липидтер мен көмірсулар алмасуына мәнді ықпалын тигізбейді.

Қолданылуы

- контрацепция болмағанда немесе қолданылған әдіс сенімділігі жеткіліксіз болғанда жүктіліктен сақтану мақсатындағы шұғыл контрацепцияда (жыныстық қатынастан кейін алғашқы 72 сағатта)

Қолдану тәсілі және дозалары

Препарат ішу арқылы қолданылады. 2 таблетка қабылдау қажет. Аса сенімді әсеріне жету үшін алғашқы таблетканы жыныстық қатынастан кейін мүмкіндігінше ертерек (72 сағат өтуден кешіктірмей) қабылдаған жөн. Екінші таблетканы алғашқы таблетка қабылданғаннан кейін 12 сағаттан соң (бірақ, 16 сағат өтуден кешіктірмей) қабылдау керек.

Егер кез келген таблетканы қабылдағаннан кейін үш сағат ішінде құсу болса, онда тағы бір таблетка қабылдаған дұрыс.

Постинор таблеткаларын етеккір оралымының кез келген күні, бірақ алдыңғы етеккір қалыпты болған жағдайда ғана қолдануға болады.

Шұғыл ұрықтануға қарсы дәрі қабылдағаннан кейін келесі етеккірге дейін ұрықтануға қарсы жергілікті бөгеу әдістерін (мысалы, мүшеқап) қолдану керек. Постинор таблеткаларын қолданғаннан кейін ұрықтануға қарсы ішуге арналған дәрілерді тұрақты қолдану қарсы көрсетілімді емес.

Жағымсыз әсерлері

Өте жиі (> 1/10)

- жүрек айну, іштің төменгі бөлігінің ауыруы

- етеккірмен байланыссыз қан кетулер

- қажу

Жиі (1/100-ден <1/10-ға дейін)

- бас ауыру, бас айналу

- жүрек айну, диарея

- сүт бездерін басқан кездегі ауырсыну

- етеккірдің 7 күннен артық кідіруі

- жүйесіз қан кетулер және қан аралас бөліністер

Етеккір сипаты уақытша өзгеруі мүмкін, бірақ көптеген әйелдерде келесі етеккірлер күтілген сәтінен бастап 7 күн ішінде уақтылы келеді. Егер етеккір 5 күннен көп кідірсе, онда жүкті болу мүмкіндігін анықтау қажет.

Қолдануға болмайтын жағдайлар

- препарат компоненттеріне аса жоғары сезімталдық

- жыныстық жетілу кезеңіне дейінгі қыз балалар

- cирек тұқым қуалайтын галактоза көтере алмаушылық аурулары, Лапп лактаза тапшылығы немесе глюкоза-галактозалық мальабсорбция синдромы бар емделушілер

Дәрілермен өзара әрекеттесуі

- бауыр ферменттерінің индуктор-препараттарын бір мезгілде қабылдағанда левоноргестрел метаболизмінің жеделдеуі жүреді

- левоноргестрел тиімділігін төмендететіндер: барбитураттар, примидон, фенитоин және карбамазепинді қоса, құрамында шайқурай (Hypericum perforatum) бар препараттар, сондай-ақ рифампицин, ритонавир, рифабутин, гризеофульвин.

Осы препараттарды қабылдайтын әйелдер дәрігерге қаралу керек.

- құрамында левоноргестрел бар препараттар циклоспориннің уыттылық қаупін оның метаболизмін төмендету нәтижесінде арттыруы мүмкін.

Айрықша нұсқаулар

Ұрықтануға қарсы дәріні тек қана «шұғыл» жағдайларда қолдану керек. Препарат ұдайы қолданылатын ұрықтануға қарсы дәрілерді алмастыра алмайды.

Шұғыл ұрықтануға қарсы дәрі жүкті болудан үнемі сақтандыра бермейді.

Ұрықтануға қарсы дәрі қолданылмаған жыныстық қатынастан кейін Постинор таблеткаларының тиімділігі уақыт өте төмендейді:

Егер сақтанбаған жыныстық қатынасқа қатысты күдіктер болса немесе егер сақтанбаған қатынас осы етеккір оралымы бойына 72 сағат бұрын орын алса, ұрықтану болып үлгеру ықтималдығы бар. Осыған орай, қайталанған жыныстық қатынас кезінде Постинор препаратын қолдану жүктілікті болдырмауға қатысты тиімсіз болуы мүмкін. Егер етеккір оралымы 5 күннен көп кідірсе немесе егер етеккір күтілген күні әдеттен тыс қан кету орын алса, немесе егер жүктілікті жорамалдауға басқа негіздемелер бар болса, жүктіліктің бар-жоғын анықтау керек.

Егер жүктілік Постинор препаратын қолданудан кейін басталса, эктопиялық жүктіліктің болуы мүмкін екенін ескеру қажет. Әсіресе, іштің қатты ауыруы немесе естен тану ахуалдары болатын әйелдерде, сондай-ақ сыртартқысында эктопиялық жүктілік, жатыр түтіктеріне жасалған операциялар немесе кіші жамбас мүшелерінің қабыну аурулары болғанда эктопиялық жүктілік орын алуынан күдіктенуге болады.

Препаратты бауыр функциясы күрделі бұзылған емделушілерде қолдану ұсынылмайды.

Постинор препаратының тиімділігіне мальабсорбция синдромының ауыр түрлері (мысалы, Крон ауыруы) кері ықпал етуі мүмкін. Осындай аурулардан зардап шегетін әйелдер шұғыл контрацепция қолдану қажет болғанда дәрігерге көрінуі тиіс.

Осы дәрілік препарат құрамында лактоза моногидраты бар, сондықтан оны cирек тұқым қуалайтын галактоза көтере алмаушылық аурулары, Лапп лактаза тапшылығы немесе глюкоза-галактозалық мальабсорбция синдромы бар емделушілерге қолдануға болмайды.

Постинор препаратын қабылдағаннан кейін етеккір әдетте қалыпты өтеді және мерзімінде келеді. Кейде етеккір бірнеше күн ертерек немесе кешірек басталуы мүмкін. Әйелдерге жүйелі контрацепция әдістерінің бірін таңдап алу және пайдалана бастау үшін дәрігерге қаралуға кеңес беру керек. Егер келесі оралымда Постинор препаратын қолданғаннан кейін және жүйелі гормональді контрацепция кезінде етеккір келмесе, жүктіліктің бар-жоғы анықталуы тиіс.

Бір етеккір оралымы ішінде, оралымның бұзылуы мүмкін екеніне байланысты, препаратты қайта қолдану ұсынылмайды.

Постинор контрацепцияның стандартты жүйелі әдісі ретінде тиімсіз және оны шұғыл шара ретінде ғана пайдалануға болады. Шұғыл контрацепцияның қайталау курстары жөнінде жүгінетін әйелдерге ұзақ мерзімді контрацепция әдістерін пайдалануға кеңес берілу керек.

Шұғыл контрацепция қолдану жыныс жолымен берілетін аурулардан қорғанумен байланысты қажетті алдын-ала сақтану шараларын алмастыра алмайды.

16 жасқа дейінгі жыныстық жетілген қыз балаларда медициналық бақылаусыз Постинор таблеткаларын қолдану ұсынылмайды.

Жүктілік және лактация

Жүктілік кезінде Постинор таблеткаларын қолдануға болмайды, өйткені бұл препарат болып қойған жүктілікті үзе алмайды. Эпидемиологиялық зерттеулер деректері бойынша, прогестагеннің ұрыққа жайсыз әсер етуі (шұғыл контрацепция әдісін кездейсоқ қолданғанда) анықталмаған.

Левоноргестрел ана сүтіне өтеді. Егер ана емізгеннен кейін бірден екі таблетканы да қабылдаса, ал таблеткалар қабылдағаннан кейін емізуді қоя тұрса, препараттың сәбиге әсер ету әлеуетін күрт төмендетуге болады.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препараттың автокөлік басқару немесе механизмдермен жұмыс істеу қабілетіне әсер етуі зерттелмеген.

Артық дозалануы

Ұрықтануға қарсы ішуге арналған препараттың үлкен дозаларын қабылдағаннан кейін ауыр қолайсыз әсерлерінің дамуы жөнінде деректер жоқ.

Cимптомдары: жүрек айну, лақылдап қан кету.

Емі: симптоматикалық. Препараттың арнайы у қайтарғысы жоқ.

Шығарылу түрі және қаптамасы

2 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салады.

1 пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапқа салынады.

Сақтау шарттары

15 °С-ден 25 °С-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін препаратты пайдалануға болмайды.

Дәріханалардан босатылу шарттары

Рецепт арқылы

Өндіруші

«Гедеон Рихтер» ААҚ,

1103 Будапешт, Дёмрёи к-сі, 19-21, Венгрия

Тіркеу куәлігі иесінің атауы және елі

«Гедеон Рихтер» ААҚ, Венгрия

Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы:

«Гедеон Рихтер» ААҚ ҚР өкілдігі

E-mail: info@richter.kz

Телефон: 8-(727) 258-26-22, 8-(727) 258-26-23