Пирэф-3

• русский
• қазақша

• Скачать инструкцию медикамента

Саудалық атауы

ПИРЭФ-3

Халықаралық патенттелмеген атауы

Жоқ

Дәрілік түрі

Үлбірлі қабықпен қапталған таблеткалар

Құрамы:

Бір таблетканың құрамында:

белсенді заттар: 400 мг пиразинамид, 75 мг изониазид, 150 мг рифампицин;

қосымша заттар: микрокристалды целлюлоза, кросповидон, прежелатинделген крахмал, натрий кроскармелозасы, сусыз коллоидты кремнийдің қостотығы (аэросил), магний стеараты, желатин, бифендат, аскорбин қышқылы.

қабықша - Opadry 80 W Brown 56578 (поливинил спирті, тальк, макрогол/ПЭГ 3000, титанның қостотығы Е171, темірдің тотығы Е172).

Сипаттамасы

Үлбірлі қабықпен қапталған, сызығы мен ойығы бар қызыл-қоңыр немесе бозғылт-қызыл түсті капсула тәріздес таблеткалар.

Фармакотерапиялық тобы

Туберкулезге қарсы біріктірілген препараттар.

АТЖ коды J04AМ05

Фармакологиялық қасиеттері

Туберкулезге қарсы қолданылатын біріктірілген препарат. Құрамында туберкулезге қарсы І қатардағы препараттар (рифампицин, изониазид пен пиразинамид) бар. Туберкулезге қарсы препараттардың аталған біріктірілімі (оның ішінде персистирленетін микобактериялар жөнінде) туберкулоцидті әсерді, сондай-ақ туберкулез микобактериялары төзімділігінің едәуір баяу дамуын қамтамасыз етеді.

Фармакокинетикасы

Рифампицин асқазан-ішек жолынан жақсы сіңеді. Ішу арқылы қабылдаған кезде препарат плазмадағы ең жоғары концентрациясына 2 - 4 сағат өткеннен кейін жетеді, ол орташа алғанда 10 мкг/мл (4 - тен 32 мкг/мл дейін) құрайды, жартылай шығарылу кезеңі 3 - 5 сағат аралығында ауытқып отырады және бауыр қызметінің бұзылуында арта түседі. Организмнің көптеген тіндері мен сұйықтықтарына тарайды. Плацентарлық бөгет арқылы өтеді. Бауырда метаболизденеді. Рифампицин несеппен, нәжіспен және өтпен, ішінара сілекеймен және көз жасы сұйықтығымен бірге шығарылады, осы мөлшердің жартысынан азы өзгермеген антибиотик түрінде көрініс беруі мүмкін.

Изониазид асқазан-ішек жолынан жылдам сіңеді және барлық биологиялық сұйықтықтар мен тіндерге оңай өтеді. Тамақпен қабылдаған кезде сіңуі мен биожетімділігі төмендейді. Плазмадағы 3 - 5 мкг/мл құрайтын ең жоғары концентрациясына 1 - 2 сағат өткенде жетеді, одан кейінгі 6 сағаттың ішінде 50 % -ға және одан да көбірек төмендейді. Дегенмен, қан мен тіндерде тиімді концентрациялары 12 - 24 сағат бойы сақталуы ықтимал.

Препарат организмде біркелкі тарайды, жасушаларға, оның ішінде макрофагтарға, сондай-ақ некроз аймағына өтеді. Бауырда метаболизденеді.

Организмнен негізінен бүйрек арқылы, көбінесе белсенділігі жойылған метаболиттер түрінде 24 сағаттың ішінде шығарылады.

Пиразинамид ішу арқылы қабылдаудан кейін асқазан-ішек жолынан жылдам сіңеді. Қан плазмасындағы ең жоғары концентрациясына 2 сағат өткеннен кейін жетеді және 1.5 г дозада 35 мкг/мл жуық және 2 г дозада 66 мкг/мл құрайды. Пиразинамид тіндерде және организмнің сұйық ортасында кеңінен тарайды, гематоэнцефалдық бөгет арқылы өтеді.

Біртіндеп 5-гидроксипиразин қышқылына дейін гидроксилденетін негізгі метаболит – пиразин қышқылын түзе отырып, негізінен бауырда метаболизденеді.

Қан плазмасынан жартылай шығарылу кезеңі 9 - 10 сағатқа жуық құрайды.

Шумақтық сүзілу жолымен негізінен бүйрек арқылы шығарылады. Енгізілген дозаның 70 % жуығы 24 сағаттың ішінде негізінен метаболиттер түрінде және 4 – 14 % - өзгермеген зат түрінде несептен табылады.

Фармакодинамикасы

Рифампицин бактериостатикалық, ал жоғары концентрацияларда бактерицидті әсер етеді. Оның әсер ету механизмі M.tuberculosis рибонуклеин қышқылын тежеуімен сипатталады.

M.tuberculosis жөнінде белсенділігі жоғары, туберкулезге қарсы қолданылатын бірінші қатардағы препарат болып табылады. E. coli, Pseudomonas, Indole-оң және Indole-теріс, Proteus, Klebsiella, St.aureus, Coagulase-теріс staphylococci, N. meningitides, H. influenzae, Legionella түрлері, M. tuberculosis, M. kansassi, M. scrofulaceum, M. intracellulare және M. аvium-ге қатысты белсенді.

Туберкулезге қарсы басқа препараттармен айқаспалы төзімділігі байқалмаған.

Изониазид M. tuberculosis белсенді бөлінетін жасушаларына бактерицидті әсер етеді. Оның әсер ету механизмі микобактериялар жасушалары қабырғаларының компоненті болып табылатын микол қышқылдарының синтезін бәсеңдетумен айқындалады. Препараттың қандағы ең жоғары концентрациясы ішу арқылы қабылдаудан кейін 1 - 4 сағат өткенде байқалады, бір реттік дозаны қабылдаудан кейін 6 - 24 сағат бойы ол қанда бактериостатикалық концентрацияда болады. Жұқпалық аурулардың басқа кең таралған қоздырғыштарына ол айқын химиотерапиялық әсер етпейді.

Пиразинамид Оның концентрациясына және микроорганизмнің сезімталдығына байланысты, әсіресе макрофагтардың ішінде және қабыну ошағында M.tuberculosis-ке бактериостатикалы немесе бактерицидті, «стерильдеуші» әсер етеді. Туберкулезді зақымдану ошағына жақсы өтеді. Баяу көбейетін, оның ішінде жасуша сыртында-және жасуша ішінде орналасқан микобактерияларға әсер етеді. Персистирленуші түрлерге қышқылды ортада көбірек әсер етеді.

Қолданылуы

Туберкулезде (өкпеде және өкпеден тыс үдерістердің бастапқы сатысында).

Қолдану тәсілдері және дозасы

ПИРЭФ-3 емдеу курсы: 2 ай бойы күн сайын. Тамақтануға дейін 1 - 2 сағат бұрын аш қарынға қабылдайды. Барлық тәуліктік дозаны бір рет қабылдау арқылы ішкен дұрыс.

Ең жоғары емдік тиімділігіне қол жеткізу үшін аш қарынға қабылдау керек. Препаратты тамақтан кейін тағайындау көптеген жағдайларда олардың фармакологиялық белсенділігіне әсер етеді. Емделушілер препаратты нашар көтерген жағдайда ғана жеңілдікке жол беріледі. Осы себептерге байланысты препаратты тамақтан кейін 1 - 2 сағат өткенде қабылдауға болады.

Дәрігердің тағайындауы бойынша қолдану керек.

Жағымсыз әсерлері

Рифампицин тудыратын ықтимал жағымсыз әсерлері

Ас қорыту жүйесі тарапынан: қыжыл, эпигастрий аймағының ауыруы, тәбеттің болмауы, жүрек айнуы, құсу, газдардың түзілуі, ішектің шаншуы, диарея.

ОЖЖ тарапынан: жекелеген жағдайларда бас ауыруы, ұйқышылдық, қажу, бас айналуы, көру қызметінің бұзылуы, бұлшық ет әлсіздігі, аяқ-қолдың ауруы мен жалпы ұю (жансыздану).

Бауыр тарапынан: бауыр тексерістері көрсеткіштерінің уақытша ауытқуы (билирубиннің, сарысу трансаминазасының және сілті фосфатазасының артуы) ықтимал. Жекелеген жағдайларда – гепатит немесе бауырды қамтыған шокқа ұқсас синдром және бауыр қызметі тексерістеріндегі ауытқулар.

Бүйрек тарапынан: жекелеген жағдайларда – сарысудағы несеп қышқылының жоғарылауы, гемолиз, гемоглобулинурия, гематурия, интерстициальді нефрит, бүйрек қызметінің бұзылуы мен бүйректің жедел жеткіліксіздігі. Бұлар жоғары сезімталдық туындатқан реакциялар болып есептеледі. Бұл реакциялар Рифампицинді қолдануды тоқтатқаннан кейін және сол реакцияларды тиісінше емдеуден кейін кетеді.

Гематологиялық реакциялар: тромбоцитопения, уақытша лейкопения, гемолитикалық анемия, эозинофилия мен гемоглобиннің азаюы.

Аллергиялық реакциялар: қышыма, есекжем, бөртпе, пемфигоидты реакциялар, ауыз бен тілдің қабынуы, экссудатты конъюнктивит.

Басқа реакциялар: қызба, етеккірдің бұзылуы.

Изониазид тудыратын ықтимал жағымсыз реакциялар

Ас қорыту жүйесі тарапынан: жүрек айнуы, құсу, эпигастрия аймағының ауыруы, дәрілік гепатит.

ОЖЖ тарапынан: эйфория, ұйқының бұзылуы, бас ауыруы, бас айналуы, өте сирек – жадыда сақтаудың әлсіреуі бұдан сирегірек – елестеулер; ұзақ қабылдағанда емделушілердің 3.5 – 17 % - да – шеткергі нейропатия (қол мен аяқ саусақтары ұштарының парестезиялары мен гипостезиялары), жекелеген жағдайларда – моторлық бұзылулар (қол саусақтарымен жұдырық жұмудың, аяқтың ұшымен тұрудың қиындауы), бұлшықет атрофиялары, парездер. Препараттың баяу инактиваторларының әсерінен көбінесе нейропатия байқалады.

Бауыр тарапынан: бауырдың уытты зақымдануы едәуір елеулі асқыну болып табылады. Бастапқыда аланинді және аспарагинді трансаминоферазалар, тимол сынамасы мен қандағы сілтілік фосфотаза көреткіштері жоғарылайды. Билирубин мөлшері жоғарылайды, одан кейін сарғаю, бауырдың ұлғаюы, тәбеттің нашарлауы мен диспепсиялық құбылыстар болатын дәрілік уытты гепатиттің толық көрініс беруі байқалады.

Гематологиялық реакциялар: агранулоцитоз, гемолитикалық сидеропластикалық немесе апластикалық анемия, тромбоцитопения мен эозинофилия.

Аллергиялық реакциялар: қызба, тері бөртпесі (қызылша тәрізді, макулезді-папулезді, пурпуралы немесе эксфолиативті түрі), лимфаденопатия мен васкулит.

Басқа реакциялар: еркектерде гинекомастия, әйелдерде меноррагия.

Пиразинамид туғызатын ықтимал жағымсыз әсерлер Бауыр тарапынан: жиі – бауырдың симптомсыз бұзылулары, олар тек зертханалық жолдармен анықталады; сирек – қызба, дімкәстік және бауыр аймағының ауырумен орташа бұзылулар; кейде – сары ауру, бауырдың өлім-жітіммен аяқталатын жедел сарыаурулық атрофиясы.АІЖ тарапынан: анорексия, жүрек айнуы, құсу; бейім науқастарда – асқазан мен он екі елі ішек ойық жара ауруының асқынуы.Аллергиялық және иммунопатологиялық реакциялар: есекжем, қызба, артралгия.Қан түзілу жүйесі тарапынан: сидероахрестикалық анемия.Қан ұйыту жүйесі тарапынан: қан ұюдың төмендеуі (қан кету уақытының артуы); тамыр қабырғалары бүтіндігінің бұзылулары.Басқа реакциялар: дизурия; жалпы дімкәстік.

Қолдануға болмайтын жағдайлар

• препараттың компоненттеріне асқын сезімталдық

• эпилепсия, психоздар, құрысу ұстамалары, сыртартқыдағы полиомиелит

• көру жүйкесінің невриті, көздің қабыну ауруы

• жүрек жеткіліксіздігі, жүректің ишемиялық ауруы

• тромбофлебит, жайылған атеросклероз

• псориаз, асқыну сатысындағы экзема

• бауырдың ауыр зақымдануы

• подагра

• бүйрек жеткіліксіздігі

• жүктілік, лактация кезеңі

• 13 жасқа дейінгі балаларға

Дәрілермен өзара әрекеттесуі

Рифампицин ішетін антикоагулянттардың, диабетке қарсы ішетін дәрілердің, гормональді контрацептивтердің, хинидиннің белсенділігінің төмендеуіне ықпал етеді. Құрамында бетонит (алюминий гидросиликаты) бар парааминосалицил қышқылының препараттарын рифампицинді қабылдауды тоқтатқаннан кейін кемінде 4 сағат өткен соң тағайындау керек.

Пиразинамид туберкулезге қарсы бірінші қатардағы препараттардың тиімділігін күшейтіп, подаграға қарсы дәрілердің әсерін төмендетеді.

Изониазид қажет болғанда туберкулезге қарсы басқа препараттармен – антибиотиктермен, сульфаниламидтермен (циклосериннен басқасымен) біріктіріп тағайындайды. Изониазидті гепатоуытты қасиеті бар препараттармен бір мезгілде тағайындағанда – гепатоуытты реакциялар пайда болу ықтималдығы жоғарылайды. Рифампицинмен бір мезгілде қолданған кезде (әсіресе бауырының қызметі бұзылған және алкоголизммен ауыратын адамдарда) сол реакциялардың өршу қаупі артады. Алкогольді бір мезгілде тұтынғанда гепатоуытты реакциялардың күшеюіне ықпал етеді. Парацетамолмен бір мезгілде қолданғанда гепатоуытты реакциялардың өршу қаупі артады. Изониазидті карбамазепинмен немесе фенитоинмен бір мезгілде қолданғанда соңғысының метаболизмі бәсеңдейді, бұл олардың қан плазмасындағы концентрациясының жоғарылауына және уытты әсерінің күшеюіне алып келеді. Осы құбылыстардың өршуін болғызбау үшін пиридоксинді және глютамин қышқылын тағайындайды.

Айрықша нұсқаулар

Бауыр ауруларында, подаграда, қант диабетінде, сондай-ақ егде емделушілерге абайлап тағайындайды. Емдеу үдерісінде бауыр қызметіне, несеп қышқылының деңгейіне бақылау жасау керек. Препараттың құрамына енетін рифампицин несептің, сілекейдің, қақырықтың, көз жасы сұйықтығының, сондай-ақ жанаспалы жұмсақ линзалардың қызыл түске боялуын туындатады.

Препараттың көруге жағымсыз әсер ететінін ескере отырып, емдеудің алдында емделушіні толық офтальмологиялық тексеруден өткізу керек.

Дәрілік заттың көлік құралдарын немесе қауіпті механизмдерді басқару қабілетіне әсер ету ерекшеліктері

Емеу кезеңінде жоғары назар аударуды және психомоторлық реакция жылдамдығын талап ететін қауіпті қызмет түрлерімн айналысудан іркіле тұру керек.

Артық дозалануы

Белгілері: тыныс алудың бұзылулары, гипергликемия, метаболикалық кетоацидоз; ауыр жағдайларда – команың дамуы.Емдеуі: асқазанды шаю; тыныс алу және жүрек-қан тамыр жүйелерінің қызметін демеуге бағытталған симптоматикалық ем жүргізу; пиридоксинді (B6 витаминін) инъекция түрінде енгізу.

Шығарылу түрі және қаптамасы

10 таблеткадан повинилхлоридті немесе ұқсас импорттық үлбірден және баспалы лакталған немесе ұқсас импорттық алюминий фольгадан жасалған пішінді ұяшықты қаптамада.

№ 30, 500 таблеткадан тартылатын және ашылуы бақыланатын, бұралатын пластмасса қақпағымен дәрілік затқа арналған полимер материалдан жасалған контейнерлерге салынған.

Біріншілік қаптамалар медицинада қолданылуы жөніндегі мемлекеттік және орыс тілдеріндегі нұсқаулықтардың сәйкесінше санымен бірге гофрланған картон жәшікке салынған.

Сақтау шарттары

Құрғақ, жарықтан қорғалған жерде, 25 ºС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды

Босатылу шарттары

Рецепт арқылы.

Өндіруші

«Павлодар фармацевтикалық зауыты» ЖШС.

Қамзин көшесі, 33, Павлодар қаласы, Қазақстан Республикасы, 140011.

Тіркеу куәлігінің иесі

«Павлодар фармацевтикалық зауыты» ЖШС, Қазақстан Республикасы

Қазақстан Республикасы аумағында тұтынушылардан өнім сапасына қатысты шағымдары қабылдайтын ұйымның мекенжайы

«Павлодар фармацевтикалық зауыты» ЖШС.

Қамзин көшесі, 33, Павлодар қаласы, Қазақстан Республикасы, 140011.

Тел./факс: 8 (7182) 50-04-01/50-10-25, farmzavod@romat.kz