Папаверина гидрохлорид (раствор для инъекций, 2 мл)

• русский
• қазақша

• Скачать инструкцию медикамента

Саудалық атауы

Папаверин гидрохлориді

Халықаралық патенттелмеген атауы

Жоқ

Дәрілік түрі

Инъекцияға арналған 2%, 2 мл ерітінді

Құрамы

2 мл ерітінді құрамында

белсенді зат – 40 мг папаверин гидрохлориді,

қосымша заттар: динатрий эдетаты, метионин, инъекцияға арналған су

Сипаттамасы

Мөлдір, сәл сарғыштау реңді сұйықтық.

Фармакотерапиялық тобы

АІЖ функционалдық бұзылыстарын емдеуге арналған препараттар. Папаверин және оның туындылары. Папаверин.

АТХ коды A03AD01

Фармакологиялық касиеттері

Фармакокинетикасы

Тез және толығымен сіңеді. Плазма ақуыздарымен 90%-ға байланысады. Гистогематикалық бөгеттер арқылы жеңіл өтеді. Бауырда биологиялық өзгеріске ұшырайды. Препараттың жартылай шығарылу кезеңі – 0,5-2 сағат. Негізінен бүйрекпен метаболиттер түрінде, болмашы мөлшері (0,5% аздау) өзгермеген түрінде шығарылады.

Фармакодинамикасы

Папаверин гидрохлориді – миотропты спазмолитикалық, гипотензивтік дәрі. Фосфодиэстеразаны тежейді және жасушада циклдік 3, 5 аденозинмонофосфаты жинақталуын және кальций деңгейінің төмендеуін тудырады. Папаверин ішкі ағзалар (асқазан-ішек жолы, тыныс жолдары, несеп-жыныс жүйесі) мен қантамырлары тегіс бұлшықеттерінің босаңсуын және тонусын төмендетеді. Папаверин негізінен артериялық қантамырларды кеңейтеді және қан ағымының, оның ішінде церебральді қан ағымының ұлғаюына ықпал етеді. Үлкен дозаларда жүрек бұлшықетінің қозғыштығын төмендетеді және жүрекішілік өткізгіштікті баяулатады. Папаверинді орташа емдік дозаларда қолданғанда іс жүзінде орталық жүйке жүйесіне әсер етпейді.

Қолданылуы

- артериялық гипертензияда, ми және аяқ-қол қантамырлары түйілуінде (кешенді ем құрамында)

- холециститте, спастикалық колитте, өт-тас ауруында, панкреатитте, пилороспазмда, несептас ауруында (тегіс бұлшықет түйілуінде)

Қолдану тәсілі және дозалары

Тері астына, бұлшықет ішіне немесе көктамыр ішіне енгізеді.

Ересектерге тері астына немесе бұлшықет ішіне 1-2 мл инъекцияға арналған 2 ерітіндіні (енгізулер арасындағы аралық 4 сағаттан кем емес) енгізеді.

Көктамыр ішіне (өте баяу!) 10-20 мл 0,9% натрий хлориді ерітіндісінде алдын ала сұйылтып, 1 мл 2% ерітіндіні енгізеді. Ең жоғары бір реттік доза 100 мг (5 мл 2% ерітінді), тәуліктік доза – 300 мг (15 мл 2% ерітінді).

70 жастан асқан емделушілерде папавериннің бастапқы бір реттік дозасы 10 мг аспайды (0,5 мл 2% ерітінді)

1 жастан 12 жасқа дейінгі балалар үшін бір реттік ең жоғары доза 0,2-0,3 мг/кг құрайды.

Емдеу курсын емдеуші дәрігер белгілейді.

Жағымсыз әсерлері

• ұйқышылдық

• қатты тершеңдік

• артериялық қысымның төмендеуі

• жүрек айну, іш қату

• қанда трансаминазалар деңгейінің артуы

• эозинофилия

• қарыншалық экстрасистолия

Қолдануға болмайтын жағдайлар

- папаверинге және препараттың басқа компоненттеріне жоғары сезімталдық

- тыныс алудың бәсеңдеуі немесе коматоздық жағдай

- бронхтың обструктивті синдромы

- атриовентрикулярлық өткізгіштіктің бұзылуы

- глаукома

- бауыр функциясының бұзылуы

- 75 жастан үлкен егде жастағылар (гипертермия қаупі)

- 1 жасқа дейінгі балалар

Дәрілермен өзара әрекеттесуі

Папаверинді антихолинергиялық дәрілермен бір мезгілде қолданғанда антихолинергиялық әсерлері күшеюі мүмкін.

Леводопаның паркинсонға қарсы әсері мен метилдопаның гипотензивті әсерін төмендетеді.

Үшциклдік антидепрессанттармен, прокаинамидпен, резерпинмен, хинидин сульфатымен бірге қолданғанда гипотензивті әсерінің күшеюі мүмкін.

Барбитураттармен біріктірілімде папаверин гидрохлоридінің спазмолитикалық әсері күшейеді.

Дифенгидрамин (димедрол), метамизол (анальгин) және диклофенак спазмолитикалық әсерін күшейтеді.

Папаверин ерітінділері глюкоза ерітінділерімен фармацевтикалық тұрғыда үйлеспейді (ішінара папавериннің белсенділігін жояды).

Темекі шегетін адамдарда папавериннің метаболизмі жылдамдайды, ал оның қан плазмасындағы концентрациясы мен фармакологиялық әсерлері азаяды.

Бір мезгілде қолданғанда папаверин алкогольдің әсерін күшейтеді.

Айрықша нұсқаулар

Егде және әлсіреген науқастарда, бассүйек-ми жарақаты, бауыр мен бүйрек функциясының бұзылулары, гипертиреозы, бүйрек үсті бездері функциясының жеткіліксіздігі бар адамдарда папавериннің гипотензивті әсері күшейетіндіктен сақтықпен және папавериннің тек аз дозаларын пайдалану керек.

Қуық асты безінің қатерсіз гиперплазиясы бар адамдарда папавериннің жоғары дозалары несептің жедел іркілуінің дамуына түрткі болады

Папаверин гидрохлоридін қолдану кезінде құрамында алкоголь бар сусындарды, сондай-ақ құрамында этил спирті бар дәрілік заттарды қолданбаған дұрыс.

Көктамыр ішіне жылдам енгізгенде, сондай-ақ жоғары дозаларда қолданғанда атриовентрикулярлы бөгеліс, жүрек ырғағының бұзылуы мүмкін.

Жүктілік және лактация

Папаверин гидрохлоридінің жүктілік және лактация кезеңінде қауіпсіздігі мен тиімділігі анықталмаған.

Дәрілік заттың автокөлікті немесе қауіптілігі зор механизмдерді басқару қабілетіне әсер ету ерекшеліктері

Папаверинді қабылдаған уақытта орталық жүйке жүйесі тарапынан жағымсыз әсерлерінің даму ықтималдығын ескере отырып, автокөлікті немесе қауіптілігі зор механизмдерді басқару кезінде сақ болу қажет.

Артық дозалануы

Симптомдары: көрудің бұзылуы, диплопия, әлсіздік, ұйқышылдық, гипотензия.

Емі – симптоматикалық.

Шығарылу түрі және қаптамасы2.0 мл-ден еккішке толтыруға арналған бейтарап шыныдан жасалған ампулаларда немесе сындыру нүктесі немесе сындыру сақинасы бар еккішке толтыруға арналған импортты стерильді ампулаларда.

Әрбір ампулаға заттаңбалық немесе жазба қағазынан жасалған заттаңба жапсырылады.

5 немесе 10 ампуладан поливинилхлоридті үлбірден және алюминий немесе импортты фольгадан жасалған пішінді ұяшықты қаптамаға салынады. Пішінді ұяшықты қаптамалар медициналық қолдану жөніндегі мемлекеттік және орыс тілдеріндегі бекітілген нұсқаулықтармен бірге картоннан немесе гофрланған картоннан жасалған қорапқа салынады. Медициналық қолдану жөніндегі нұсқаулықтар саны қаптамалар санына қарай салынады.

Сақтау шарттары

Құрғақ, жарықтан қорғалған жерде, 30°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші ұйымның атауы және елі

«Химфарм» АҚ, Қазақстан Республикасы,

Шымкент қ-сы, Рашидов к-сі, 81

Тіркеу куәлігі иесінің атауы және елі

«Химфарм» АҚ, Қазақстан Республикасы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы «Химфарм» АҚ, Шымкент қ-сы, Қазақстан Республикасы, 160019

Рашидов к-сі, 81

Телефон нөмірі 7252 (561342)

Факс нөмірі 7252 (561342)

Электронды поштасы infomed@santo.kz