Нуклеобувир

Нуклеобувир

Софосбувир

Үлбірлі қабықпен қапталған таблеткалар, 400 мг

Жүйелі қолдануға арналған инфекцияға қарсы препараттар. Жүйелі қолдануға арналған вирусқа қарсы препараттар. Тікелей әсер ететін вирусқа қарсы препараттар. С гепатиті вирусын емдеуге арналған вирусқа қарсы препараттар. Нуклеобувир

АТХ коды J05AP08

- ересек пациенттердегі созылмалы С вирусты гепатитін басқа вирусқа қарсы препараттармен біріктірілімде емдеу.

Қолдануды бастағанға дейін қажетті мәліметтер тізбесі

• белсенді затқа немесе препараттың кез келген қосымша заттарына жоғары сезімталдық

• ауырлығы ауыр дәрежедегі бүйрек жеткіліксіздігі (ШСЖ < 30 мл/мин/1.73 м2) немесе гемодиализ жүргізу қажет болатын бүйрек жеткіліксіздігінің терминальді сатысы (қауіпсіздігі анықталмады)

• декомпенсацияланған бауыр циррозы (тиімділігі мен қауіпсіздігі анықталмады)

• ішекте Р-гликопротеиннің (P-gp) күшті индукторларымен (рифампицин, рифабутин, шілтер жапырақты шайқурай [Hypericum perforatum], карбамазепин, фенобарбитал және фенитоин) және ішекте P-gp орташа индукторларымен (окскарбазепин және модафинил) бірге қолдану. Оларды бірге қолдану қан плазмасында софосбувирдің концентрациясын едәуір төмендетеді және Нуклеобувир препаратының тиімділігі жоғалуына әкелуі мүмкін.

• софосбувирді телапревирмен немесе боцепревирмен бірге қолдану

• емдеу кезінде контрацепцияны сақтамау

• жүктілік және лактация кезеңі

• 18 жасқа дейінгі балалар мен жасөспірімдер

Сақтықпен:

- амиодаронды софосбувир + ТӘВҚП біріктірілімімен бірге қолданғанда

Қолданған кездегі қажетті сақтандыру шаралары

Нуклеобувирді үнемі С гепатитін емдеуге арналған басқа дәрілермен қабылдайды. Сіз қабылдауға дейін дәрігермен немесе фармацевтпен сөйлесіңіз, егер сіз:

- Қазіргі уақытта сіз жүректің тұрақсыз соғуын емдеу үшін амиодарон препаратын қабылдап жүрсеңіз немесе соңғы бірнеше ай ішінде қабылдасаңыз (егер сіз осы дәрілік затты қабылдасаңыз, Сіздің дәрігеріңіз баламалы емді қарастыра алады)

- С гепатитінен басқа бауыр проблемалары болса, мысалы, бауыр трансплантациясын күтіп жүрсеңіз;

- сізде В гепатиті вирусының ағымдағы немесе алдында инфекциясы болса, өйткені сіздің дәрігеріңіз сізді мұқият бақылағысы келеді

- сізде бүйрек проблемалары болса. Егер сізде бүйрекпен ауыр проблемалар болса немесе бүйрек диализінде болсаңыз, дәрігермен немесе фармацевтпен сөйлесіңіз, өйткені Нуклеобувирдің әсері ауыр бүйрек жеткіліксіздігі бар пациенттерде толық тексерілмеген;

- сізде диабет болса және Нуклеобувирді қабылдауды бастағаннан кейін сізге қандағы глюкоза деңгейін мұқият бақылау және/немесе диабеттен сіздің дәрі-дәрмектеріңізді түзету қажет болуы мүмкін болса. Қант диабеті бар кейбір пациенттер Нуклеобувир сияқты дәрі-дәрмектермен емдеу басталғаннан кейін қандағы қант деңгейінің төмендігін (гипогликемияны) бастан өткерген.

Егер сіз жүрек проблемаларынан кез келген дәрі қабылдасаңыз және емдеу кезінде:

- Ентігу немесе егер ентігу бар болса нашарлау

- сандырақтау

- жүректің соғуы

- естен тануды бастан өткерсеңіз, дереу дәрігерге хабарлаңыз.

Басқа дәрілік препараттармен өзара әрекеттесуі

ДП әсеріне ықпал етуге қабілетті ДП өзара әрекеттесу түрлері (алкогольмен, темекімен, тағаммен)

Софосбувир Р-гликопротеин тасымалдағышының және сүт безі обырының резистенттілігі ақуызының (BCRP) субстратына жатады, ал оның белсенді емес метаболиті GS-331007 ондай болып табылмайды.

Бірге тағайындалатын дәрілік заттар софосбувирдің негізінен төмен аффинді және белсенділігі жоғары гидролаза арқылы жүретін жасушаішілік метаболизмдік белсенділену сатысына және нуклеотидтік фосфорлану сатыларына ықпал етпейді деп болжанады.

К дәруменінің антагонистерін алатын пациенттер

Халықаралық қалыптасқан қатынас (ХҚҚ) көрсеткіштерінің мұқият мониторингі ұсынылады, өйткені софосбувирмен емдеген кезде бауыр функциясы өзгеруі мүмкін.

Басқа да өзара әрекеттесулері

Cофосбувирдің қатар қолданылуы мүмкін препараттармен дәрілік өзара әрекеттесулері туралы ақпарат 4-кестеде келтірілген (онда фармакокинетикалық параметрлердің орташа геометриялық арақатынасының (GLSM – ең кіші квадраттар әдісімен есептелген орташа геометриялық мәні) 90% сенімді аралығы (СА) алдын ала анықталған баламалылық шектерімен салыстырғанда өзгермеген "↔", ұлғайған "↑", немесе азайған "↓" болды).

4-кесте. Софосбувир мен басқа дәрілік препараттар арасындағы өзара әрекеттесулер

NA = қол жетімді емес/қолданылмайды.

Арнайы ескертулер

Нуклеобувирді монотерапия түрінде қолдану ұсынылмайды, оны созылмалы С гепатитін емдеуге арналған басқа дәрілік заттармен біріктірілімде тағайындау керек. Нуклеобувирмен біріктірілімде тағайындалатын басқа дәрілік препараттарды қабылдауды тоқтатқанда Нуклеобувирді қабылдауды да тоқтату керек. Нуклеобувир препаратын қолдануды бастар алдында бірге тағайындалатын дәрілік препараттарды медициналық қолдану жөніндегі нұсқаулықтармен танысу керек.

Айқын брадикардия және жүрек блокадасы

Софосбувирді вирусқа қарсы тікелей әсер ететін басқа препаратпен (ТӘВҚП, даклатасвир, симепревир және ледипасвирді қоса) біріктіріп қолданған кезде және жүректің жиырылу жиілігін азайтатын басқа препараттармен немесе оларсыз амиодаронмен қатарлас емдегенде айқын брадикардия және жүрек блокадасы жағдайлары байқалды. Бұл өзара әрекеттесудің механизмі анықталмады.

Амиодаронды софосбувир + ТӘВҚП біріктірілімімен бірге қолдану соңғыларының тәжірибеге жақында енгізілуіне орай шектеулі болды. Бұлай бірге қолдану өмірге әлеуетті қауіп төндіреді, сондықтан амиодаронды софосбувир және басқа ТӘВҚП біріктірілімін алатын пациенттерде тек аритмияға қарсы емнің баламалы басқа әдістері жағымсыз болғанда немесе қарсы көрсетілім болғанда ғана қолдану керек. Бета-блокаторларды да қабылдап жүрген, немесе қатарлас жүрек аурулары және/немесе бауырдың үдемелі аурулары бар пациенттер амиодаронды бірге қолданған кезде симптоматикалық брадикардия туындауының жоғары қаупіне ұшырайды.

Егер амиодаронды бір мезгілде қолдану қажет деп саналса, онда софосбувир мен басқа ТӘВҚП қабылдауды бастайтын пациенттерге мұқият бақылау жүргізу керек. Брадиаритмияның жоғары қаупі бар пациенттер тиісті клиника жағдайларда 48 сағат бойы үздіксіз бақылауда болуы тиіс.

Амиодаронның жартылай шығарылу кезеңі ұзақ болуына байланысты, соңғы бірнеше ай ішінде амиодаронмен емделуді тоқтатқан және софосбувирді басқа ТӘВҚП біріктіріп қолдануды жоспарлаған пациенттерге тиісті бақылау жүргізу керек.

Софосбувир және басқа ТӘВҚП біріктірілімін амиодаронмен бір мезгілде жүректің жиырылу жиілігін азайтатын басқа препаратармен немесе оларсыз қабылдайтын барлық пациенттерге брадикардия мен жүрек блокадасы симптомдары болуы мүмкін екені туралы ескертілуі тиіс, және олар пайда болған жағдайда шұғыл медициналық көмекке жүгінуі қажет.

Бұрын ем қабылдаған, 1, 4, 5 және 6 генотипті СВГ-С бар пациенттер

Бұрын ем қабылдаған, 1, 4, 5 және 6 генотипті СВГ-С бар пациенттерде софосбувирді қолдану зерттелмеген. Сондықтан пациенттердің бұл тобында емдеудің оңтайлы ұзақтығы анықталмаған («Қолдану тәсілі және дозалары» бөлімін қараңыз).

Бұл пациенттерді емдеу тактикасын және софосбувирмен, альфа пегинтерферонмен және рибавиринмен емді 12 аптадан астамға және 24 аптаға дейін ұзарту мүмкіндігін талқылау керек; әсіресе тарихында интерферонға негізделген емге төменірек жауап деңгейімен байланысы бар (мысалы, айқын бауыр фиброзы/циррозы, бастапқы жоғары вирустық жүктеме, қара нәсіл, IL28B генотипі СС емес) бір немесе бірнеше факторлары бар пациенттердің қосалқы топтары үшін.

5 немесе 6 генотипті СВГ-С бар пациенттерді емдеу

5 немесе 6 генотипті СВГ-С бар пациенттерде софосбувирді қолдану мүмкіндігін растайтын деректер өте шектеулі.

1, 4, 5 және 6 генотипті СВГ-С интерферонсыз емдеу

1, 4, 5 және 6 генотипті СВГ-С бар пациенттерде интерферонсыз емдеу сызбаларында софосбувирді қолдану зерттелмеген.

Емдеудің оңтайлы режимі және ұзақтығы анықталмаған. Ондай режимдерді интерферонмен емдеу жақпайтын немесе қарсы көрсетілімі бар, бірақ шұғыл емдеуді қажет ететін пациенттерде ғана қолдану керек.

СВГ-С емдеуге арналған вирусқа қарсы тікелей әсер ететін басқа препараттармен бірге қолдану

Қолда бар деректерге сәйкес софосбувирді басқа ТӘВҚП бірге, пайдасы қаупінен асатын болған жағдайда ғана қолдану керек. Софосбувирді телапревирмен немесе боцепревирмен бірге қолдану мүмкіндігін растайтын деректер жоқ. Бұлай бірге қолдану ұсынылмайды («Қолдануға болмайтын жағдайлар» бөлімін қараңыз).

Жүктілік және рибавиринмен бірге қолдану

Софосбувирді рибавиринмен немесе альфа пегинтерферонмен /рибавиринмен біріктіріп қолданған жағдайда, ұрпақ өрбіту жасындағы әйелдер немесе олардың жұптас еркектері емдеу кезінде және емдеу аяқталғаннан кейін рибавириннің қолдану жөніндегі нұсқаулығына сәйкес белгілі бір уақыт ішінде контрацепцияның тиімді әдістерін пайдалануы қажет. Қосымша ақпарат үшін рибавириннің медициналық қолдану жөніндегі нұсқаулығымен танысыңыз.

P-гликопротеиннің орташа индукторларымен қолдану

Ішектегі P-gp орташа индукторлары болып табылатын дәрілік препараттар (мысалы, окскарбазепин және модафинил) софосбувирдің қан плазмасындағы концентрациясын төмендетуі мүмкін, бұл софосбувирдің емдік тиімділігінің азаюына әкеледі. Бұндай дәрілік заттарды бірге қолдану ұсынылмайды («Қолдануға болмайтын жағдайлар» бөлімін қараңыз).

Бүйрек жеткіліксіздігі

Софосбувирдің қауіпсіздігі бүйректің ауыр жеткіліксіздігі бар (ШСЖ<30 мл/мин/1.73 м2) немесе гемодиализ жүргізуді талап ететін бүйрек жеткіліксіздігінің терминальді сатысындағы пациенттерде бағаланбаған. Бұдан басқа, софосбувирдің тиісті дозасы анықталмаған.

Софосбувирді креатинин клиренсі (КК) <50 мл/мин пациенттерде рибавиринмен немесе альфа пегинтерферонмен/рибавиринмен біріктіріп қолданғанда да рибавириннің медициналық қолдану жөніндегі нұсқаулығымен танысу керек.

Қант диабеті бар пациенттерде қолдану.

С вирусты гепатитін тікелей әсер ететін вирусқа қарсы дәрілік заттармен емдеу басталғаннан кейін қант диабеті бар пациенттер глюкоза деңгейін бақылауды жеңілдетілгенін сезінуі мүмкін, бұл симптоматикалық гипогликемияға әкелуі мүмкін. Тікелей әсер ететін вирусқа қарсы препараттарды қабылдауды бастаған қант диабеті бар пациенттерде қандағы глюкоза мөлшерінің деңгейін, әсіресе алғашқы үш ай ішінде неғұрлым мұқият бақылау, сондай-ақ қажет болған жағдайда диабетті емдеуді түзету қажет. Қант диабеті бар пациентке ем тағайындайтын дәрігерді тікелей әсер ететін вирусқа қарсы препараттарды тағайындау туралы хабардар ету қажет.

СГВ/ВГВ (В гепатиті вирусы) ко-инфекциясы

Вирусқа қарсы тікелей әсер ететін препараттармен емдеу кезінде немесе емдеуден кейін СВГ-В өршіген жағдайлары туралы хабарланған, олардың кейбіреулері өліммен аяқталған. Сондықтан вирусқа қарсы емді бастар алдында барлық пациенттерде ВГВ жұқтырғанына скрининг жүргізу қажет. СВГ-В өршу қаупіне бейім СГВ/ВГВ ко-инфекциясы бар пациенттер бекітілген клиникалық ұсынымдарға сәйкес мұқият бақылануы тиіс.

Балалар

12 жасқа толмаған балалардағы софосбувирдің қауіпсіздігі мен тиімділігі анықталмаған, 12 жастан асқан балаларға қатысты деректер шектеулі.

Нуклеобувирді таблетка қабығының құрамында балалар жасында қолдануға тыйым салынған индигокармин бояғышы (Е132) болуына байланысты 18 жасқа дейінгі балалар мен жасөспірімдерде қолдану ұсынылмайды.

Ұрпақ өрбіту функциясы, жүктілік және лактация кезеңі

Ұрпақ өрбіту жасындағы әйелдер / еркектер мен әйелдердегі контрацепция

Софосбувирді рибавиринмен немесе альфа пегинтерферонмен/рибавиринмен біріктіріп қолданғанда пациент-әйелдерде немесе инфекция жұқтырған еркектердің жұптас әйелдерінде жүктілікті болдырмау үшін ерекше сақтық таныту қажет. Рибавиринді қолданған кезде елеулі тератогендік және/немесе эмбриоуыттылық әсерлерінің даму ықтималдығы жоққа шығарылмайды.

Ұрпақ өрбіту жасындағы әйелдер немесе олардың жұптас еркектері емдеу кезінде және емдеу аяқталғаннан кейін рибавириннің қолдану жөніндегі нұсқаулығына сәйкес белгілі бір уақыт ішінде контрацепцияның тиімді әдістерін пайдалануы қажет. Қосымша ақпарат алу үшін рибавириннің медициналық қолдану жөніндегі нұсқаулығымен танысыңыз.

Жүктілік

Жүкті әйелдерде софосбувирді қолдану туралы деректер жоқ немесе шектеулі (300-ден аз жүктілік нәтижелері). Сондықтан жүктілік кезінде софосбувирді қолдану ұсынылмайды.

Егер софосбувирмен бірге рибавирин қолданылса, жүктілік кезінде рибавиринді қолданудың қарсы көрсетілімдерін ескеру қажет (Рибавирин қолдану жөніндегі нұсқаулықты қараңыз).

Лактация кезеңі

Софосбувир мен оның метаболиттерінің әйел сүтіне өтетіні белгісіз.

Жаңа туған нәрестелер мен сәбилер үшін қаупін жоққа шығаруға болмайтындықтан, софосбувирді емшек емізу кезеңінде қолдануға болмайды.

Ұрпақ өрбіту функциясы

Софосбувирдің адамның ұрпақ өрбіту функциясына әсері туралы деректер жоқ.

Дәрілік препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Пациенттерге софосбувирді альфа пегинтерферонмен және рибавиринмен біріктірілімде қолдану кезінде қажығыштық, зейін қоюдың бұзылуы, бас айналуы және анық көрмеудің пайда болуы мүмкіндігі туралы ескерту керек («Жағымсыз әсерлері» бөлімін қараңыз). Бұл симптомдар туындағанда пациенттерге автомобиль басқарудан және жоғары зейін қою мен психомоторлық реакциялардың жылдамдығын талап ететін басқа да қауіптілігі зор қызмет түрлерімен айналысудан бас тарту ұсынылады.

Қолдану жөніндегі нұсқаулар

Дозалау режимі

Нуклеобувир препаратымен емдеуді СВГ-С емдеуде тәжірибесі бар дәрігер тағайындауы және бақылауы тиіс.

Ұсынылатын дозасы – тамақ ішу кезінде күніне бір рет ішке 400 мг бір таблетка.

Нуклеобувир препараты басқа дәрілік препараттармен біріктіріп қолданылуы тиіс. Нуклеобувир препаратымен монотерапия ұсынылмайды. Нуклеобувирмен біріктіріп қолданылатын препараттардың медициналық қолдану жөніндегі нұсқаулықтармен танысу керек. Нуклеобувирмен бірге қолдануға ұсынылған препараттар және біріктірілген емнің ұзақтығы 1-кестеде берілген.

1-кесте. Нуклеобувирмен бірге қолдануға ұсынылған препараттар және біріктірілген емнің ұзақтығы

*- адам иммун тапшылығы вирусымен (АИТВ) ко-инфекцияланған пациенттерді қоса.

Нуклеобувирмен біріктірілімде қолданғанда рибавирин дозасын пациенттің дене салмағына қарай есептейді (<75 кг = 1,000 мг және ≥75 кг = 1,200 мг) және ішке тамақ уақытында екі рет бөліп қабылдайды.

СВГ қарсы тікелей әсер ететін басқа вирусқа қарсы препараттармен бірге қолдану туралы деректерді «Айрықша нұсқаулар» бөлімінен қараңыз.

Дозаны түзету

Нуклеобувирдің дозасын азайту ұсынылмайды.

Егер софосбувир мен альфа пегинтерферон біріктірілімін қолданған кезде пациентте альфа пегинтерферонмен байланысты болуы ықтимал күрделі жағымсыз реакция пайда болса, онда соңғысының дозасын азайту керек немесе оны қолдануды тоқтату керек. Дозасын азайту және/немесе альфа пегинтерферонмен емді тоқтату туралы қосымша ақпарат алу үшін альфа пегинтерферонын медициналық қолдану жөніндегі нұсқаулықпен танысыңыз.

Егер пациентте рибавиринмен байланысты болуы ықтимал күрделі жағымсыз реакциялар пайда болса, онда егер қажет болса, жағымсыз реакциялар жойылғанша немесе оның ауырлығы азайғанша рибавирин дозасын азайту керек немесе оны қолдануды тоқтату керек. 2-кестеде гемоглобин деңгейіне және пациенттің жүрек-қантамыр жүйесінің жай-күйіне байланысты рибавирин дозасын өзгерту және оны тоқтату бойынша ұсыныстар келтірілген.

2-кесте. Рибавиринді Нуклеобувирмен бірге қолданғанда оның дозасын өзгерту жөніндегі ұсыныстар

Зертханалық көрсеткіштері қалыптан ауытқуы немесе клиникалық симптомдар дамуы салдарынан рибавиринді тоқтатқаннан кейін рибавиринмен күніне 600 мг дозада, одан әрі қарай дозасын күніне 800 мг дейін ұлғайтумен емді жаңғыртуды байқап көруге болады. Алайда рибавирин дозасын бастапқы тағайындалған дозаға дейін (күніне 1000 - 1200 мг) жоғарылату ұсынылмайды.

Емді тоқтату

Егер Нуклеобувирмен біріктірілімде тағайындалған басқа дәрілік препараттарды қолдану тоқтатылса, онда Нуклеобувир препаратымен емдеуді де тоқтату керек.

Пациенттердің ерекше тобы

Егде жастағы пациенттер

Егде жастағы пациенттерде дозаны түзету талап етілмейді

Бүйрек жеткіліксіздігі

Ауырлығы жеңіл немесе орташа дәрежедегі бүйрек жеткіліксіздігі бар пациенттерде Нуклеобувир дозасын түзету талап етілмейді. Бүйректің ауыр жеткіліксіздігі (ШСЖ < 30 мл/мин/1.73 м2) бар немесе гемодиализ жүргізуді талап ететін бүйрек жеткіліксіздігінің терминалды сатысындағы пациенттерде софосбувирдің қауіпсіздігі және тиісті дозасы анықталмаған.

Бауыр жеткіліксіздігі

Ауырлығы жеңіл, орташа немесе ауыр дәрежедегі (Чайлд-Пью-Туркотт бойынша A, B немесе C кластары) бауыр жеткіліксіздігі бар пациенттерде Нуклеобувир дозасын түзету талап етілмейді. Декомпенсацияланған бауыр циррозы бар пациенттерде софосбувирдің қауіпсіздігі мен тиімділігі анықталмаған.

Бауыр трансплантациясын күтуші пациенттер

Бауыр трансплантациясын күтудегі пациенттерде Нуклеобувирді қолдану ұзақтығын анықтау әрбір жеке пациент үшін әлеуетті қауіптері мен пайдаларына баға беруге негізделуі тиіс.

Бауыр трансплантациясынан кейінгі пациенттер

Бауыр рецепиенттерінде 24 апта бойы рибавиринмен біріктіріп Нуклеобувирді қолдану ұсынылады. Рибавириннің ұсынылатын бастапқы тәуліктік дозасы 400 мг, ол тамақ ішу кезінде екіге бөліп қабылданады. Егер рибавириннің бастапқы дозасы жағымды болса, дозаны күніне ең жоғары 1000-1200 мг дейін (дене салмағы <75 кг пациенттер үшін 1000 мг және дене салмағы ≥75 кг пациенттер үшін 1200 мг) біртіндеп арттыруға болады. Егер рибавириннің бастапқы дозасы жағымсыз болса, онда дозаны гемоглобин деңгейіне байланысты азайту керек.

Балалар

12 жасқа толмаған балалардағы софосбувирдің қауіпсіздігі мен тиімділігі анықталмаған, 12 жастан асқан балаларға қатысты деректер жоқ.

Препаратты қабылдау жөніндегі ұсынымдар

Нуклеобувир препаратын тамақ ішу кезінде ішке қабылдайды. Таблетканы сумен іше отырып, тұтас жұту керек. Белсенді заттың ащы дәмі болғандықтан, үлбірлі қабықпен қапталған таблеткаларды сындыруға немесе шайнауға болмайды.

Егер пациентте Нуклеобувир қабылдағаннан кейін 2 сағат ішінде құсу туындаса, препараттың тағы бір дозасын (бір таблеткасын) қабылдау керек.

Егер пациентте Нуклеобувир препаратын қабылдағаннан кейін 2 сағаттан соң құсу туындаса, препараттың тағы бір дозасын қабылдаудың қажеті жоқ. Бұл ұсынымдар дозаның көп бөлігінің сіңуі препаратты қабылдағаннан кейін 2 сағат ішінде жүреді деп болжанатын софосбувирдің және GS-331007 метаболитінің сіңу кинетикасына негізделген.

Препараттың кезектің дозасын қабылдауды өткізіп алған жағдайда 18 сағаттан аз уақыт өтсе, пациент өткізіп алған дозаны мүмкіндігінше тезірек қабылдауы керек, содан кейін келесі дозаны әдеттегі уақытта қабылдауы керек екенін пациенттерге түсіндіру қажет. Егер дозаны өткізіп алған жағдайда препаратты жоспарлы қабылдау уақытынан кейін 18 сағаттан асса, пациент бұл дозаны қабылдауды өткізіп жіберуі және емнің бастапқы режиміне сәйкес келесі дозаны қабылдау уақытын күтуі керек. Пациенттерге қосарлы дозаны қабылдауға болмайтынын хабарлау қажет.

Артық дозаланған жағдайда қабылдануы тиіс шаралар

(симптомдар, шұғыл емшаралар)

Софосбувирдің құжатта бекітілген ең жоғары дозасы емдіктен өте жоғарғы бір реттік 1,200 мг дозасы болды. Осы дозаның аясында күтпеген ЖР байқалған жоқ, барлық анықталған ЖР жиілігі мен ауырлығы бойынша плацебо және софосбувирді 400 мг дозада қолданғанда байқалғандарға ұқсас болды. Одан жоғары дозалардың әсері белгісіз.

Софосбувирдің артық дозалануының спецификалық антидоты жоқ. Артық дозаланған жағдайда улану белгілерін дер кезінде анықтау үшін пациентті бақылауға алу қажет. Софосбувирдің артық дозалануын емдеу организмнің өмірлік маңызды функциясы көрсеткіштеріне және пациенттің клиникалық жағдайына мониторинг жүргізуді қоса, жалпы демеуші емшараларды қамтиды. Гемодиализ айналымдағы GS-331007 метаболитті тиімді түрде шығаруы мүмкін (шығарылу коэффициенті 53%). 4 сағаттық гемодиализ сеансы препараттың қабылданған дозасының шамамен 18%-ын шығарады.

ДП стандартты қолданған кезде байқалатын жағымсыз реакциялардың сипаттамасы және осы жағдайда қабылдауға тиісті шаралар (қажет болған жағдайда)

Қауіпсіздік бейінінің түйіндемесі

Софосбувирді рибавиринмен немесе альфа пегинтерфероны және рибавиринмен біріктіріп емдеген кезде, ең жиірек хабарланған жағымсыз реакциялар (ЖР) рибавириннің және альфа пегинтерферонының қауіпсіздік бейінімен астасты, бұл ретте күтілген ЖР жиілігі мен ауырлығы артқан жоқ.

Софосбувирдің қауіпсіздігін негізінен рибавиринмен, альфа пегинтерферонмен немесе онсыз бірге қолдану кезінде зерттеген. Осы біріктірілген ем аясында софосбувир үшін спецификалы жағымсыз реакциялардың ешбірі идентификацияланбаған. Софосбувир мен рибавиринді, немесе софосбувир, рибавирин және альфа пэгинтерферонды қабылдаған пациенттерде ең жиі ЖР қажығыштық, бас ауыру, жүректің айнуы және ұйқысыздық болды.

Софосбувирді рибавиринмен немесе альфа пегинтерферонмен және рибавиринмен біріктірілімде қолданғанда анықталған ЖР 3-кестеде берілген. ЖР жүйе және ағзалар класына және туындау жиілігіне сәйкес топтастырылған. Жағымсыз құбылыстардың жиілігін анықтау мынадай критерийлерге сәйкес жүргізіледі: өте жиі (>1/10), жиі (> 1/100 - < 1/10 дейін), жиі емес (> 1/1000 - < 1/100 дейін), сирек (> 1/10 000 -< 1/1000 дейін), және өте сирек (< 1/10 000).

3-кесте. Софосбувирді рибавиринмен немесе альфа пегинтерферон және рибавиринмен біріктіріп қолданғанда анықталған жағымсыз реакциялар

Пациенттердің басқа да ерекше топтары

АИТВ/СГВ ко-инфекциясы

СВГ/АИТВ ко-инфекциясы бар пациенттердегі софосбувир мен рибавириннің қауіпсіздігі бейіні тек СВГ инфекцияланған пациенттердегі осындайға ұқсас болды.

Бауыр трансплантациясын күтуші пациенттер

Бауыр трансплантациясын күтудегі, СВГ-С бар пациенттердегі софосбувир мен рибавириннің қауіпсіздік бейіні бауырын ауыстыруды қажет етпейтін, СВГ-С бар пациенттердегі осындайға ұқсас болды.

Бауыр реципиенттері

СВГ-С бар бауыр рецепиенттерінде софосбувир мен рибавириннің қауіпсіздік бейіні бауырын ауыстыруды қажет етпейтін, СВГ-С бар пациенттердегі осындайға ұқсас болды. Емдеу кезінде гемоглобиннің төмендеуі өте жиі ЖР болды, 32,5% пациенттерде гемоглобин деңгейінің <10 г/дл дейін төмендегені бақыланды, 20% пациенттер эпоэтин және/немесе қан препараттарын алған. 12,5 % пациенттерде ЖР салдарынан емге түзету жасалған немесе тоқтатылған.

Балалар

Софосбувир мен рибавириннің шектеулі зерттеулері 12-ден 18 жасқа дейінгі балалар мен жасөспірімдерде байқалған ЖР софосбувир және рибавирин қабылдаған ересектердегі ЖР ұқсас болғанын айғақтайды.

Кейбір жағымсыз реакциялар сипаттамасы

Жүрек аритмиясы

Күдік тудырған жағымсыз реакцияларды хабарлау

Дәрілік препаратты тіркеуден кейін күдік тудырған жағымсыз әсерлері жөнінде хабарлаудың маңызы зор. Ол дәрілік препараттың пайда/қауіп арақатынасына ұдайы мониторинг жүргізуге мүмкіндік береді. Дәрігерлерден және басқа да денсаулық сақтау саласы мамандарынан кез келген күмәнді жағымсыз әсерлер туралы ұлттық есеп беру жүйесі арқылы хабарлау сұралады.

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

Қазақстан Республикасы Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитетінің «Дәрілік заттар мен медициналық бұйымдарды ұлттық сараптау орталығы» ШЖҚ РМК

http://www.ndda.kz

«Galamat Integra» ЖШС, Қазақстан Республикасы, 010000, Нұр-Сұлтан, Есіл ауданы, Мәңгілік ел даңғылы 20/2 ,+7(7172) 308727, e-mail: info@galamat.com

Қосымша мәліметтер

Дәрілік препараттың құрамы

Бір таблетканың құрамында

белсенді зат - 400 мг софосбувир,

қосымша заттар: микрокристалды целлюлоза (рH 112), маннитол, натрий кроскармеллозасы, коллоидты кремнийдің қостотығы, магний стеараты,

қабығының құрамы: Опадрай сары 200F220011 (поливинил спирті, тальк, титанның қостотығы (Е 171), полиэтиленгликоль/макрогол, темірдің (III) сары тотығы (Е 172), метакрил қышқылының сополимері, тағамдық бояғыш көк №2/ индигокармин алюминий лагы (Е 132), натрий гидрокарбонаты).

Сыртқы түрінің иісінің, дәмінің сипаттамасы

Ұзынша пішінді, екі беті дөңес, күңгірт-сары түсті үлбірлі қабықпен қапталған, бір жағында өндіруші фирманың оңға қарай түсетін екі қатарлас толқын тәрізді сызығымен, ал сызықтар арасындағы ортада – шар бейнеленген логотипі бар таблеткалар.

Шығарылу түрі және қаптамасы

7 таблеткадан алюминий фольгадан жасалған пішінді ұяшықты қаптамаға салынады.

4 пішінді қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

2 жыл

Жарамдылық мерзімі өткеннен кейін қолдануға болмайды!

Құрғақ жерде, 30°C-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәлімет

Eva Pharma for pharmaceuticals and medical appliances S.A.E.,

Кафр Эль Габаль – Харам Гиза, Египет.

Тел: +202 239 92700, Факс: +22 239 92771, e-mail: mail@evapharma.com

Тіркеу куәлігінің ұстаушысы

Eva Pharma for pharmaceuticals and medical appliances S.A.E.,

Кафр Эль Габаль – Харам Гиза, Египет.

Тел: +202 239 92700, Факс: +22 239 92771, e-mail: mail@evapharma.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта):

«Galamat Integra» ЖШС, Қазақстан Республикасы, 010000, Нұр-Сұлтан, Есіл ауданы, Мәңгілік ел даңғылы 20/2,+7(7172) 308727, e-mail: info@galamat.com