Неомицин-Опти®
Инструкция
-
русский
-
қазақша
Саудалық атауы
НЕОМИЦИН-ОПТИ®
Халықаралық патенттелмеген атауы
Неомицин
Дәрілік түрі
0,5% көз тамшылары 10 мл
Құрамы
1 мл ерітіндінің құрамында
белсенді зат – неомицин (неомицин сульфаты түрінде) 5.0 мг,
қосымша заттар: динатрий фосфатының додекагидраты (ерітіндінің рН түзету үшін), инъекцияға арналған су 1 мл-ге дейін.
Сипаттамасы
Түссіз немесе сары мөлдір сұйықтық
Фармакотерапиялық тобы
Көз ауруларын емдеуге арналған препараттар. Микробтарға қарсы препараттар. Антибиотиктер. Неомицин
АТХ коды S01АA03
Фармакологиялық қасиеттері
Фармакокинетикасы
Конъюнктивалық қабына тамызғанда неомицин қанға іс жүзінде сіңбейді және мөлдір қабық стромасында, алдыңғы камера ылғалында, шыны тәрізді денеде 6 сағат бойы анықталады. Неомицин метаболизденбейді, шумақтық сүзілу жолымен өзгермеген түрде несепте жоғары концентрациясын тудырып, бүйрекпен шығарылады. Сыртқа шығарылуы емделушінің жасына, бүйрек функциясына және қатар жүретін патологиясына байланысты болады. Бүйрек функциясы қалыпты ересектерде неомициннің жартылай шығарылу кезеңі 2-4 сағатты, балаларда - 2,5-4 сағатты құрайды. Бүйрек жеткіліксіздігі кезінде жартылай шығарылу кезеңі 70 сағатқа дейін және одан артыққа ұзаруы мүмкін.
Фармакодинамикасы
Неомицин – аминогликозидтер тобының антибиотигі, сәулелі Streptomyces fradiae зеңінің тіршілік әрекеті үдерісінде түзілетін неомициндердің А, В және С қоспасын білдіреді. Рибосомаларға тікелей әсерімен және бактериялық жасушалар ақуыздары синтезін бәсеңдетумен байланысты бактерицидті әсер етеді. Бактерияға қарсы әсер ету ауқымы кең, Staphylococcus aureus, Streptococcus pneumonie, Escherichia coli, Klebsiella pneumoniae, Haemophilus influenzae, Proteus spp., Shigella spp қоса, көптеген грамтеріс және грамоң микроорганизмдерге қатысты белсенді; Pseudomonas aeruginosa және Streptococcus spp қатысты белсенділігі аз; патогенді зеңдер, вирустар, анаэробты флораға қатысты белсенділігі жоқ.
Микроорганизмдердің неомицинге төзімділігі баяу және аз дәрежеде дамиды.
Қолданылуы
Неомицинге сезімтал микроорганизмдер туындатқан көз алмасының алдыңғы бөлігінің жеделге жуық, жедел және созылмалы жұқпалы-қабыну үдерістерінде:
-блефарит
-конъюнктивит
-кератит
-иридоциклит
-мейбомит (теріскен).
Көз хирургиясында жұқпалы-қабыну асқынуларының алдын алуда.
Қолдану тәсілі және дозалары
Ересектерге: конъюнктивалық қабына 1 күн бойы әр 1-2 сағат сайын 1-2 тамшыдан, дозасын біртіндеп 1-2 тамшыға дейін төмендете отырып, күніне 3-4 рет.
Емдеу ұзақтығы 7 күннен аспайды.
6 жастан асқан балаларға: конъюнктивалық қабына 2-3 күн бойы әр 3 сағат сайын 1-2 тамшыдан, дозасын біртіндеп 1-2 тамшыға дейін төмендете отырып, күніне 2-3 рет.
Емдеу ұзақтығы 7 күннен аспайды.
Хирургиялық операциядан кейінгі алдын алу: дәрігердің нұсқауымен ұсынылатын дозалар.
Жағымсыз әсерлері
- аллергиялық реакциялар: күйдіру, көзден жас ағу, қышыну және қабақтың домбығуы, конъюнктиваның қызаруы
- көзде бөгде денені сезіну
- салдарлы (зеңдік) жұқпаның дамуы
Қолдануға болмайтын жағдайлар
- неомицинге және басқа аминогликозидтер тобының антибиотиктеріне аса жоғары сезімталдық
- жүктілік және лактация кезеңі
- 6 жасқа дейінгі балаларға
Дәрілермен өзара әрекеттесуі
Жергілікті қолданғаннан кейін неомициннің жүйелі сіңірілуі төмен болатыны соншалық, кез келген өзара әрекеттесулер қаупі аз. Басқа да жергілікті офтальмологиялық препараттарды қатар қолдана отырып емдеуде оларды қолдану арасында 10-15 минут аралықты ұстанған жөн.
Аминогликозидті (неомицин) және басқа да жүйелі, пероральді немесе жергілікті қолданылатын нейроуытты, отоуытты немесе нефроуытты әсерлері бар дәрілік препараттарды бірлескен және/немесе бірінен кейін бірін қолдану аддитивті уыттылыққа әкелуі ықтимал, мүмкіндігінше қолданылмауы тиіс.
Айрықша нұсқаулар
Неомицин-Опти® көз тамшыларын ұзақ уақыт қолдануға болмайды, өйткені бұл антибиотиктерге төзімді микроорганизмдердің, сонымен бірге зеңдердің өсуін күшейтуге әкелуі мүмкін.
Препаратты қолданған уақытта жоғары сезімталдық реакциялары, сондай-ақ басқа аминогликозидтерге айқаспалы сезімталдық байқалуы мүмкін. Күрделі аса жоғары сезімталдық реакциялары пайда болған жағдайда препарат пайдалануды тоқтатқан жөн.
Құрамында неомицин сульфаты бар препараттарды қолданған кезде көздің ауыруы, қызаруы, ісінуі, тітіркенуі тұрақты байқалып немесе күшейген жағдайда дәрігерге қаралу қажет.
Препаратпен емдеу кезеңінде жұмсақ жанаспалы линзаларды тағуға тыйым салынады, өйткені олар жұқпаның таралуына ықпал етеді және оларды емдеу курсы аяқталғаннан кейінгі 24 сағат ішінде тақпау керек.
Егер 3 күндік емдеу курсынан кейін жақсару байқалмаса, емдеуші дәрігермен кеңесу қажет. Ерітінді ластануын болдырмас үшін құтыны тығыз жауып сақтау керек және тамшуырдың ұшын қандай да бір беткейге тигізбеу керек.
Педиатрияда қолданылуы
Қазіргі кезде 6 жасқа дейінгі балаларға препаратты қолданудың тиімділігі мен қауіпсіздігі анықталмаған.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Препаратты көзге тамызғаннан кейін күйдіруі және жас ағуы мүмкін екендігін ескере отырып, оны тікелей көлік құралдарын басқару немесе механикалық жабдықтармен қызмет көрсетудің алдында қолдануға болмайды.
Артық дозалануы
Симптомдары: жағымсыз әсерлердің күшеюі.
Емі: препаратты тоқтату және симптоматикалық ем жүргізу.
Шығарылу түрі және қаптамасы
10 мл-ден алғашқы ашылуы бақыланатын бұрандалы қақпақтармен герметикалық тығындалған полиэтилен тамшылатқыш-құтыға құйылған.
1 құтыдан медицинада қолданылуы жөніндегі мемлекеттік және орыс тіліндегі нұсқаулықпен бірге картон қорапшаға салынады.
Сақтау шарттары
Жарықтан қорғалған жерде, 15 оС-ден 25оС-ге дейінгі температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл Құтыны ашқаннан кейін препараттың сақталу мерзімі – 4 апта. Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші
«ЛеКос» ЖШС
050000, Алматы қ., Қабанбай батыр к-сі, 114-13, тел.: 308-10-67.
Тіркеу куәлігінің иесі
«ЛеКос» ЖШС, Қазақстан Республикасы
050000, Алматы қ.,Қабанбай батыр к-сі, 114-13.
Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы
050000, Алматы қ., Қабанбай батыр к-сі, 114-13, тел.: 308-10-67.
e-mail: lecos1@mail.ru; www.lecos.kz