НАПРОФФ (Напроксен)

НАПРОФФ

Напроксен

Сыртқа қолдануға арналған гель 10 %

Сүйек-бұлшықет жүйесі. Буын және бұлшықет ауыруы кезінде жергілікті қолдануға арналған препараттар. Жергілікті қолдануға арналған қабынуға қарсы, стероидты емес препараттар. Напроксен.

ATХ коды M02AA12

НАПРОФФ гелін мына жағдайда жергілікті қолданады:

- бұлшықеттер мен буындардағы жарақаттан кейінгі ауыруларда;

- буындардың дегенеративтік ауруларында.

Қолдануды бастағанға дейін қажетті мәліметтер тізбесі

- белсенді затқа немесе препараттың кез келген қосымша компоненттеріне аса жоғары сезімталдық;

- салицилаттарға (оның ішінде ацетилсалицил қышқылына) және басқа да қабынуға қарсы стероидты емес препараттарға (ҚҚСП) аса жоғары сезімталдық;

- салицилаттарды, напроксен немесе басқа ҚҚСП қабылдағаннан кейін пайда болған анамнездегі демікпе ұстамалары;

- 15 жасқа дейінгі балалар;

- жүктіліктің үшінші триместрі және лактация кезеңі;

- терінің тұтастығын бұзу, ашық жаралар, терінің тітіркенуі немесе қабынуы.

Қолданған кездегі қажетті сақтандыру шаралары

НАПРОФФ гелін тек зақымдалмаған теріге жағу керек. Емдеу кезінде және емдеу тоқтатылғаннан кейінгі екі апта ішінде тікелей күн сәулесінің әсерінен немесе солярийге барудан аулақ болу керек.

Препаратты сақтықпен қолдану керек:

- анамнезінде ҚҚСП тобының препараттарымен емдеу кезінде туындаған аллергиялық реакциялар (бөртпе, қышыну, терінің қызаруы) болған жағдайда;

- препаратты терінің ауқымды аумақтарында ұзақ уақыт бойы қолданғанда, өйткені жүйелік жағымсыз реакциялардың пайда болу қаупі бар;

- бауыр жеткіліксіздігі, бүйрек жеткіліксіздігі, қан айналымының бұзылулары бар пациенттерді емдеу кезінде.

Препарат ішке қабылдауға арналмаған. Препаратты таңғыш (бандаждар, бұласырлар) астына қолдануға болмайды. Препараттың шырышты қабықтарға және көзге түсуін болдырмау керек. Гель көзге немесе шырышты қабыққа түскен жағдайда, оларды көп мөлшерде сумен жуу керек.

Балалардағы қауіпсіздік туралы мәліметтердің болмауына байланысты препарат ересектер мен 15 жастан асқан жасөспірімдерде қолдануға арналған.

Қосымша заттар

Препараттың құрамында метилпарагидроксибензоат бар, ол аллергиялық реакцияларды тудыруы мүмкін (кейінге қалдырылған болуы мүмкін).

Препараттың құрамында терінің тітіркенуін тудыруы мүмкін пропиленгликоль бар.

Басқа дәрілік препараттармен өзара әрекеттесуі

Напроксеннің қанға аздап сіңуіне байланысты (шамамен 1%) клиникалық маңызды өзара әрекеттесу ықтималдығы аз.

Алайда, препаратты терінің үлкен бөліктерінде ұзақ уақыт қолданған жағдайда, басқа препараттармен әрекеттесуін толығымен жоққа шығаруға болмайды.

Напроксен анионы ақуыздармен тектестігі жоғары болғандықтан, байланысу аумақтарынан альбуминмен байланысты басқа дәрілерді алмастыра алады және осылайша олардың әсеріне ықпал етеді. Напроксен фенитоиннің, гидантоиннің, сульфонамидтердің, пероральді гипогликемиялық дәрілердің және кумарин тәрізді антикоагулянттардың әсерін күшейтеді. Бұл препараттар напроксеннің әсерін арттыруы мүмкін.

Напроксенді калий жинақтайтын диуретиктермен бір мезгілде қабылдау гиперкалиемияға әкелуі мүмкін.

Напроксенді пероральді қолданғаннан кейін келесі өзара әрекеттесулер байқалды:

- метотрексат пен литийдің өзекшелік секрециясы төмендейді;

- глюкокортикоидтарды, басқа ҚҚСП немесе ацетилсалицил қышқылын бір мезгілде қабылдау асқазан-ішек асқынуларының жоғары қаупіне әкелуі мүмкін;

- напроксен фуросемидтің натрийуретикалық әсерін тежейді;

- пробенецид плазмадағы напроксен деңгейін жоғарылатады;

- алкоголь напроксеннің жағымсыз реакцияларын күшейтеді.

Ацетилсалицил қышқылы

Фармакодинамикалық деректер бір күннен астам уақыт бойы напроксенді бір мезгілде пайдалану ацетилсалицил қышқылының төмен дозасының тромбоциттер белсенділігіне әсерін дәйекті түрде тежеуі мүмкін екенін және бұл тежелу напроксенмен ем тоқтатылғаннан кейін бірнеше күн бойы сақталуы мүмкін екенін көрсетеді. Бұл өзара әрекеттесудің клиникалық маңызы белгісіз.

Зертханалық өзара әрекеттесулер

Напроксен тромбоциттердің агрегациясын азайтып, қан кету уақытын арттыруы мүмкін.

Арнайы ескертулер

Жүктілік

Жүкті әйелдерде напроксенді қолдану қауіпсіздігі анықталған жоқ.

Ана үшін күтілетін пайдасы шарана үшін ықтималды қауіптен асатын жағдайларды қоспағанда, препаратты жүктіліктің алғашқы екі триместрінде қолдануға болмайды.

Препаратты жүктіліктің үшінші триместрінде қолдануға болмайды, өйткені напроксен жатырдың бұлшықеттерінің жиырылуын тежейді; напроксеннің шаранаға әсері артериялық түтіктің мерзімінен бұрын жабылуына, босанудың ауыр немесе ұзаққа созылуына әкелуі мүмкін.

Лактация

Препаратты лактация кезінде қолдануға болмайды, өйткені напроксен емшек сүтіне бөлінеді.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препараттың автокөлік жүргізу және механизмдерді басқару қабілетіне теріс әсері байқалмады.

Қолдану жөніндегі нұсқаулар

Дозалау режимі

Препарат сыртқа қолдануға арналған. НАПРОФФ гелі күніне 4-5 рет, әдетте бірнеше сағат аралықпен қолданылады. Емдеу ұзақтығы аурудың ағымына және емдеу тиімділігіне байланысты.

Енгізу әдісі мен жолы

Құрғақ және таза теріге гель жолағы зақымдалған аймақтың мөлшеріне байланысты қолданылады (әдетте шамамен 4 см), зақымдалған аумаққа біртекті жағылады және толық сіңгенше мұқият ысқылайды.

Препаратты қолданғаннан кейін қолды жуу керек.

Емдеу ұзақтығы

Препаратты 4 аптадан артық қолдануға болмайды, егер ауыру мен ісіну сақталса немесе жағдай 1 аптадан кейін нашарласа, дәрігерге қаралу қажет.

Жағу орнында терінің қызаруы және тітіркенуі жағдайында емдеуді тоқтату керек.

Артық дозаланған жағдайда қабылдануы тиіс шаралар

Сыртқа қолдану кезінде напроксеннің жүйелі сіңуі өте төмен болғандықтан, артық дозалану ықтималдығы аз. Кездейсоқ ішке қабылдаған кезде препарат напроксеннің пероральді түрлеріне тән жағымсыз реакцияларды тудыруы мүмкін. Бұл жағдайда ҚҚСП интоксикациясы кезінде ұсынылатын іс-шараларды жүргізу қажет.

Артық дозаланғаннан кейінгі бірінші сағат ішінде асқазанды босатып, белсендірілген көмірді қабылдау керек.

Дәрілік препараттың қолдану тәсілін түсіндіру үшін медициналық қызметкерге кеңес алуға жүгіну жөніндегі ұсынымдар

Препаратты қолданар алдында қосымша-парақты мұқият оқып шығыңыз.

Егер сізде қосымша сұрақтар туындаса, емдеуші дәрігерге хабарласыңыз.

ДП стандартты қолданған кезде байқалатын жағымсыз реакциялардың сипаттамасы және осы жағдайда қабылдауға тиісті шаралар

Препарат әдетте жақсы көтерімді.

Егер препарат ұзақ уақыт бойы терінің үлкен бөліктеріне пайдаланылса, жүйелі жағымсыз реакцияларды жоққа шығаруға болмайды.

Жағымсыз реакциялар жиілігінің параметрлері мынадай түрде анықталады: өте жиі (≥ 1/10), жиі (≥1/100-ден <1/10 дейін), жиі емес (≥1/1000-нан <1/100 дейін), сирек (≥1/10000-нан <1/1000 дейін), өте сирек (<1/10000), жиілігі белгісіз (қолда бар деректер негізінде бағалау мүмкін емес).

Сирек

- емдеуді тоқтатқаннан кейін жойылатын терінің жергілікті тітіркенуі (эритема, ашыту, қышыну). Фотосенсибилизация реакциясы болуы мүмкін.

Өте сирек

- аса жоғары сезімталдық (аллергиялық реакциялар).

Жиілігі белгісіз

- ұйқышылдық, бас ауруы, жүрек айнуы, диарея.

Жүйелі жағымсыз реакциялар пайда болған жағдайда дәрігерге хабарлау қажет. Ентігу немесе дерматит пайда болған жағдайда емдеуді дереу тоқтату керек.

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

1 г препараттың құрамында

белсенді зат –110 мг натрий напроксені (100 мг напроксенге баламалы),

қосымша заттар: гидроксиэтилцеллюлоза, пропиленгликоль, этанол 96%, метилпарагидроксибензоат, «Раушан» хош иістендіргіші, тазартылған су.

Сыртқы түрінің иісінің, дәмінің сипаттамасы

Спирт пен раушанның әлсіз иісі бар мөлдір түссіз біртекті гель.

Шығарылу түрі және қаптамасы

45 г гель препараттан эпоксидті жабыны бар алюминий сықпаларға салынған. Әрбір сықпа медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады

3 жыл

Жарамдылық мерзімі өткеннен кейін қолдануға болмайды.

Жарықтан қорғалған жерде 25°С-ден аспайтын температурада сақтау керек.

Балалардың қолы жетпейтін жерде сақтау керек!

Рецептісіз

Өндіруші туралы мәлімет

«Уорлд Медицин Илач Сан. ве Тидж. А.Ш.»

15 Теммуз Мах., Джами Йолу Джад. №50, Гюнешли / Багджылар, Стамбул, Түркия

Тел.: +90 (212) 474 70 50

Факс: +90 (212) 474 09 01

е-mail: info@worldmedicine.com.tr

Тіркеу куәлігінің ұстаушысы

«УОРЛД МЕДИЦИН ЛТД»

Бербути к-сі, 10 / Алмасиани к-сі, 19-21, 26 кеңсе (корп. II), Тбилиси қ., Грузия

Тел.: + 995 32 2 21 28 12, факс + 995 32 2 21 28 13

е-mail: worldmedicine.llc.geo@gmail.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері (телефон, факс, электронды пошта)

«WM Pharma Alliance» ЖШС, ҚР, Алматы, Түріксіб ауданы, Сүйінбай даңғ, 222 б

Тел/факс: 8 (7272) 529090

е-mail: wm_pharma@mail.ru

Қазақстан Республикасы аумағында тұтынушылардан дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«TROKA-S PHARMA» ЖШС, Алматы, Сүйінбай даңғ 222-б

Ұялы тел +7 701 786 33 98.

е-mail: pvpharma@worldmedicine.kz