Навельбин (10 мг/1 мл)

• русский
• қазақша

• Скачать инструкцию медикамента

Саудалық атауы

Навельбин

Халықаралық патенттелмеген атауы

Винорелбин

Дәрілік түрі

Инфузия үшін ерітінді дайындауға арналған 10 мг/1 мл және 50 мг/5 мл

концентрат

Құрамы

1 мл препараттың құрамында

белсенді зат – 13.85 мг винорелбин тартраты

10 мг винорелбинге баламалы

қосымша зат - инъекцияға арналған су

5 мл препараттың құрамында

белсенді зат – 69.25 мг винорелбин тартраты

50 мг винорелбинге баламалы

қосымша зат - инъекцияға арналған су

Сипаттамасы

Түссіз мөлдір немесе солғын-сары ерітінді.

Фармакотерапиялық тобы

Ісікке қарсы препараттар. Өсімдік текті алкалоидтар. Қабіршөп алкалоидтары және оның аналогтары. Винорелбин.

АТХ коды L01CA04

Фармакологиялық қасиеттері

Фармакокинетикасы

Сіңуі

Көктамыр ішіне енгізгеннен кейін винорельбинді қарқынды және ұзақ мерзімге тіндер қармайды, бұл оның тіндерге ұқсастығының жоғары болуына байланысты.

Таралуы

Таралу көлемі ауқымды, орта есеппен, 21.2 л.кг-¹ (ауқымы: 7.5 – 39.7 л.кг-¹), бұл тіндерде таралу ауқымдылығын көрсетеді.

Қан плазмасының ақуыздарымен байланысуы төмен (13.5%), винорелбин қан жасушаларымен, әсіресе, тромбоциттермен берік байланысады (78%).

Биоөзгерісі

Винорелбин метаболиттерінің бәрі, әдетте карбоксилестеразалармен түзілген 4-О-деацетилвинорелбинді қоспағанда, Р450 цитохромдарының CYP 3A4 изоформасымен түзілген. 4-О-деацетилвинорелбин бірден-бір белсенді метаболит және қанда байқалатын басты метаболиттердің біреуі болып табылады.

Шығарылуы

Организмнен винорелбиннің орташа жартылай шығарылу кезеңі 40 сағатқа жуық құрайды. Бауыр қан ағымына жеткенде қанның тазалануы жоғары болады – 0.72 л/сағ./кг (ауқымы: 0.32-1.26 л/сағ./кг).

Бүйрекпен шығарылуы төмен (<5% қабылданған дозасы). Өтпен шығару негізгі қалпына келуші компонент – өзгермеген винорелбинді және оның метаболиттерін шығарудың басым жолы болып табылады.

Фармакодинамикасы

Навельбин - винкаалкалоидтар тобына жататын ісікке қарсы препарат.

Жасушалық митоз үдерісінде тубулин полимеризациясының тежелісіне байланысты цитостатикалық әсер көрсетеді. Навельбин митозды G2 +M фазасында бөгейді (митоздық өрім ақуызының синтезі, құраушы ақуызы – тубулин болып табылады) және интерфазасында немесе келесі митозда жасушалар ыдырауын туғызады. Препарат көбінесе митоздық ұсақ түтікшелерге әсер етеді; жоғары дозаларда қолданылғанда аксондық ұсақ түтікшелерге де ықпалын тигізеді. Навельбин® препараты туындататын тубулин спирализациясының әсері винкристинге қарағанда әлсіздеу.

Қолданылуы

- ұсақ жасушалы емес өкпе обырында

- метастаздалған сүт безі обырында

Қолдану тәсілі және дозалары

Инфузия үшін ерітінді дайындауға арналған Навельбин концентратын инфузиялық ерітіндімен сұйылтқаннан кейін тек қана көктамыр ішіне енгізеді!

Ұсақ жасушалы емес өкпе обыры және метастаздалған сүт безі обыры

Монотерапияда:

Әдетте 25-30 мг/м2 дозасы аптасына бір рет қолданылады.

Біріктірілген режимде:

Әдетте 25-30 мг/м2 дозасы қолданылады және емдеу хаттамасына сәйкес әрбір 3-ші аптада 1-ші және 5-ші күні немесе әрбір 3-ші аптада 1-ші және 8-ші күні енгізу жиілігі азайғанша демеледі.

Препаратты енгізуге арналған нұсқаулар

Инфузия үшін ерітінді дайындауға арналған Навельбин концентратын медициналық персоналдың сұйылтуы және стационар жағдайында сақталуы тиіс.

Құйылатын доза физиологиялық ерітіндімен (20-50 мл) немесе 5% глюкоза ерітіндісімен (мысалы, 50 мл) сұйылтылуы және көктамыр ішіне қысқа уақыт ішінде (6-10 мин) енгізілуі тиіс. Препаратты құю көктамырды физиологиялық ерітіндімен (250 мл) мол мөлшерде шаюмен қатар жүруі тиіс.

Навельбин препаратын құяр алдында иненің көктамырға дұрыс енгізілгеніне нақты сенімді болу керек. Егер Навельбин құю кезінде қоршаған тіндерге енетін болса, мұның салдарынан айқын тітіркенудің болуы мүмкін. Мұндай жағдайда препаратты құюды тоқтатып, көктамырды шаяды және қалған дозаны басқа көктамырға енгізу керек.

Дайын ерітіндіні препаратты физиологиялық ерітіндімен немесе 5% глюкоза ерітіндісімен қосымша сұйылтқаннан кейін қатаң сақталатын асептикалық жағдайда 24 сағатқа дейін (бөлме температурасында) тұмшаланып жабылған бейтарап шыныдан жасалған құтыда немесе инфузияға арналған пакетте (ПВХ), жарықтан қорғалған жерде сақтауға болады.

Жағымсыз әсерлері

Инфекциялық және паразиттік аурулар

Жиі

• кейіннен дұрыс емделгенде қайтымды болатын әр қилы орналасудағы

орташадан күрделіге дейінгі бактериялық, вирустық немесе зеңдік инфекциялар (респираторлық, несеп-жыныс, асқазан-ішек жолының)

Жиі емес

- висцеральді бұзылумен күрделі сепсис

- септицемия

Өте сирек

- кейбір жағдайда өлімге әкелетін асқынған септицемия

Белгісіз

- нейтропениялық сепсис

Қан түзу жүйесі және лимфалық жүйе тарапынан бұзылулар

Өте жиі

- нейтропениямен сүйек кемігі функциясынын бәсеңдеуі

- анемия

Жиі

- тромбоцитопения

Белгісіз

- дене температурасының 38 ºС-ден жоғары көтерілуімен байланысты нейтропения, фебрильді нейтропенияны қоса

Иммун жүйесі тарапынан бұзылулар

Белгісіз

- жүйелі аллергиялық реакциялар (анафилаксия, анафилактикалық шок немесе анафилактикалық типті реакциялар)

Эндокриндік жүйе тарапынан

Белгісіз

- антидиуретикалық гормонның талапқа сай емес өндірілуі

Зат алмасу және тамақтану тарапынан бұзылулар

- гипонатриемия

Белгісіз

- анорексия

Жүйке жүйесі тарапынан бұзылулар

- нейросенсорлық бұзылулар (сіңірлік рефлекс)

- ұзақ уақыт емделуден кейін аяқ бұлшықеттерінің қатты шаршағыштығы байқалуы мүмкін

Жиі емес

- жүйке-қимыл-қозғалыстық бұзылу (парестезия)

Жүрек-қантамыр жүйесі тарапынан бұзылулар

Сирек

- ауру тарихында жүрек аурулары бар пациенттердегі миокард инфарктісі немесе жүрекке әсер ететін қауіп факторлары бар пациенттер

Өте сирек

- такихардия, жүрек қағуының жиілеуі және жүрек ырғағының бұзылуы

Қантамыр жүйесі тарапынан бұзылыстар

Жиі емес

- артериялық гипертензия

- артериялық гипотензия

- гиперемия және шеткергі мұздау

Сирек

- күрделі гипотензия, коллапс

Тыныс алу мүшелері тарапынан бұзылулар

Жиі емес

- диспноэ және бронхтың түйілуі

Сирек

- интерстициальді пневмония

Ас қорыту жүйесі тарапынан бұзылулар

Өте жиі

- жүрек айну, құсу, іш қату

- стоматит

Жиі

- диарея

Сирек

- салданған ішек бітелісі

- панкреатит

Бауыр және өт шығару жолдары тарапынан болатын бұзылулар

Өте жиі

- бауыр функциясын зерттеу кезінде бауыр трансаминазалары белсенділігінің транзиторлық артуы

Тері және тері асты тіндері тарапынан бұзылулар

Өте жиі

- алопеция

Жиі

- тері реакциясы

- аяқ-қолдың эритемасы

Қаңқа-бұлшықет және дәнекер тіндер тарапынан бұзылулар

Жиі

- артралгия, жақсүйегі ауыруын қоса

- миалгия

Жалпы бұзылулар және препарат енгізілген жердің жағдайы

Өте жиі

- препарат енгізілген жердегі реакциялар (инъекция орнының ауыруы/шымылдауы, қызаруы, тамыр бояуының өзгеруі, флебит)

Жиі

- астения, қажығыштық

- температураның көтерілуі

- ісік шектелген жердің ауыруын, кеуденің ауыруын қоса, орналасуы әр түрлі ауыру

Сирек

- көктамыр ішіне дұрыс енгізбеуден болған препаратты енгізген орындағы қоршаған тіндер некрозы

Қолдануға болмайтын жағдайлар

- винорелбинге немесе басқа да қабіршөп алкалоидтарына немесе қосымша заттардың біріне аса жоғары сезімталдық

- нейтрофильдер саны < 1500/мм³

- тромбоциттер саны < 100000/мм³

- бауыр функциясының күрделі бұзылулары

- жүктілік және лактация кезеңі

- айқын нейтропения

- соңғы екі апта ішіндегі жедел инфекциялық ауру

- ұзақ мерзімді оттегімен емдеуді қажет ететін пациенттерге

- гепатитке қарсы вакцинамен үйлестіріп

Дәрілермен өзара әрекеттесуі

Барлық цитоуытты препараттарға ортақ дәрілік өзара әрекеттесулер:

Ісік аурулары жағдайында тромбоз қатерінің жоғарылауына орай антикоагулянттар жиі қолданылады. Ауру кезінде қан ұюының ішкі жекелей өзгергіштігінің және ішке қабылданатын антикоагулянттар мен химиялық ем арасындағы өзара әрекеттесу ықтималдығының деңгейі жоғары, егер пациентті ішке қабылданатын антикоагулянттармен емдеу шешімі қабылданған жағдайда ХҚҚ (халықаралық қалыптасқан қатынас) мониторинг жасау жүйелілігін арттыру қажет.

Вакцинадан болатын өліммен аяқталу қатеріне орай, гепатитке қарсы вакцинамен бір мезгілде қолдану қарсы көрсетілімді.

Вакцина туындататын аурулардың даму қаупімен және өліммен аяқталу мүмкіндігімен байланысты құрамында тірі әлсіретілген микроорганизмдер бар вакциналармен бір мезгілде қолдану ұсынылмайды. Қауіп қатарлас жүретін иммунодепрессиялық аурулары бар пациенттерде жоғарылайды. Белсенділігі жойылған вакциналар қолдануға кеңес беріледі (полиомиелит).

Фенитоин: цитоуытты препаратпен фенитоиннің көп сіңірілуінен болатын құрысулардың өршу қаупі немесе уыттылығының арту қатері немесе бауырдағы фенитоин метаболизмінің ұлғаюы салдарынан цитоуытты препарат тиімділігінің төмендеуі.

Мағлұмат үшін, бір мезгілде қолданылуы:

Циклоспорин, такролимус: лимфопролиферация қатерімен иммундық тапшылықтың жоғарылауы.

Қабіршөп алкалоидтарына тән дәрілік өзара әрекеттесулер:

Бауыр метаболизмінің төмендеуі салдарынан қабіршөп алкалоидтары нейроуыттылығының артуына орай, итраконазолмен біріктіру ұсынылмайды.

С митомицинімен бір мезгілде қолданғанда бронх түйілуі және ентігу қатерінің артатынын назарға алу қажет, сирек жағдайларда интерстициальді пневмонит сипатталған.

Винка-алкалоидтар Р-гликопротеинге тән субстрат ретінде белгілі болғандықтан, және толық зерттеудің болмауына орай, Навельбинді осы жарғақшалық тасымалдағыштың күшті модуляторларымен бір мезгілде қабылдағанда сақтандыру шаралары қабылдануы тиіс.

Винорелбинге тән дәрілік өзара әрекеттесулер:

Навельбин сүйек кемігіне уытты әсер ететіні белгілі басқа дәрілік заттармен бірге қабылданғанда миелосупрессиялық жағымсыз әсері өршуі мүмкін.

Навельбинді цисплатинмен біріктіріп қабылдағанда бірнеше рет қолдану циклдары ішінде екіжақты фармакокинетикалық өзара әрекеттесу байқалмайды. Дегенмен де, Навельбинді цисплатинмен біріктіріп қабылдаумен байланысты гранулоцитопенияның пайда болу жағдайлары Навельбинмен монотерапия кезіндегіден жоғары.

Навельбинді кейбір басқа да химиялық ем препараттарымен (ішке қабылдауға арналған паклитаксел, доцетаксел, капецитабин және циклофосфамид) біріктіріп қабылдағанда елеулі фармакокинетикалық өзара әрекеттесулер болмаған.

3А4 цитохромы винорелбин метаболизмінде әрекет ететіндіктен, осы изоферменттің күшті тежегіштерімен (кетоконазол, итраконазол сияқты) бір мезгілде қолдану қандағы винорелбин концентрациясының ұлғаюына апарады және осы изоферменттің күшті индукторларымен (рифампицин, фенитоин сияқты) бір мезгілде қолдану қандағы винорелбин концентрациясының төмендеуіне әкеледі.

Құсуға қарсы дәрілік заттар, 5НТ3 антагонистері (ондансетрон, гранисетрон сияқты) Навельбин® жұмсақ капсулаларының фармакокинетикасын өзгертпейді («Айрықша нұсқаулар» бөлімін қараңыз).

Айрықша нұсқаулар

Навельбин препаратын цитоуытты дәрілерді бақылау үшін арнайы құрал-жабдықпен химиялық ем қолдану тәжірибесі бар дәрігер тағайындауы тиіс.

Препарат ерітіндісі тітіркендіретін әсер береді, және де жанасқан кезде теріге, шырышты қабыққа немесе көзге зиян келтіруі мүмкін. Егер сұйықтықпен жанасу орын алса, тиіп кеткен жерді дереу сумен немесе физиологиялық ерітіндімен мұқият жуып-шаю қажет.

Препарат қабылдағаннан кейін бірнеше сағат ішінде құсу орын алған жағдайда оны қолдануды тоқтату қажет. 5НТ₃ антагонистері сияқты құсуға қарсы дәрілермен (мысалы, ондансетрон, гранисетрон) демеуші емдеу винорелбин әсерін төмендетуі мүмкін (Дәрілермен өзара әрекеттесуі бөлімін қараңыз).

Ішке қабылданатын Навельбин® жұмсақ капсулалары инфузия үшін ерітінді дайындауға арналған Навельбин концентратын көктамыр ішіне енгізу кезіндегіге қарағанда жиірек жүрек айну/құсуды туындатады. Алдын алу мақсатында құсуға қарсы дәрілер қабылдауға кеңес беріледі.

Зертханалық көрсеткіштерді бақылау

Навельбин препаратымен емделу кезінде толық гематологиялық бақылау (әр кезекті инъекция немесе ішке қабылдау алдында гемоглобин деңгейін, лейкоциттер, нейтрофильдер және эритроциттер санын анықтау) жүргізу қажет.

Препарат дозасы гематологиялық бақылау нәтижелері бойынша белгіленуі тиіс.

Егер нейтрофильдер саны 1500 /мм³ төмен және/немесе эритроциттер саны 100000/мм³ төмен болса, онда емдеуді қан көрсеткіштері қалпына келгенше кейінге қалдыру қажет.

Егер пациентте инфекциялық ауруды айғақтайтын белгілер немесе симптомдар пайда болса, шұғыл түрде тексеруден өту керек.

Пациентте қолдану кезіндегі айрықша сақтандыру шаралары

Препарат тағайындалған кезде мынадай:

- сыртартқыдағы ишемиялық жүрек ауруын есепке алып (Жағымсыз әсерлері бөлімін қараңыз)

- қанның гематологиялық көрінісі қанағаттанарлықсыз

пациенттерде айрықша сақтандыру шаралары қабылдануы тиіс.

Егер сәулелену аумағына бауыр кіретін болса, Навельбин препараты мен сәулемен емдеуді бір мезгілде тағайындауға болмайды.

Навельбин препаратын гепатитке қарсы вакцинамен бір мезгілде тағайындау қарсы көрсетілімді, әрі құрамында тірі әлсіретілген микроорганизмдер бар вакциналармен бір мезгілде қолдану ұсынылмайды.

Навельбин препаратын CYP3A4 күшті тежегіштерімен немесе индукторларымен бір мезгілде қолданған кезде сақтану шараларын қабылдау қажет (Дәрілермен өзара әрекеттесуі бөлімін қараңыз).

Фенитоинмен (барлық цитоуытты препараттар сияқты) және итраконазолмен (барлық қабіршөп алколоидтары сияқты) біріктіріп қолдануға болмайды.

Егде жастағы пациенттерге қолдану

Клиникалық тәжірибе нәтижелерді ескере отырып, егде жастағы пациенттер арасында айтарлықтай айырмашылықтарды анықтамаған, дегенмен бұл науқастар ішінде кейбіреулерінің жоғары сезімталдығын жоққа шығаруға болмайды. Жас ерекшелігі винорелбиннің фармакокинетикасын өзгертпейді.

Бауыр функциясы бұзылған пациенттерде қолдану

Навельбиннің фармакокинетикасы бауыр функциясы орташа немесе ауыр бұзылған пациенттерде өзгермейді. Дегенмен сақтандыру шарасы ретінде ондай пациенттерге ұсынылатын доза 20 мг/м2 құрайды және бауыр функциясы ауыр бұзылған пациенттерде гематологиялық параметрлерін мұқият бақылау ұсынылады.

Бүйрек функциясы бұзылған пациенттерде қолдану

Фармакокинетика тұрғысынан бүйрекпен шығарылу деңгейі жоғары болмағандықтан, бүйрек функциясы бұзылған пациенттерге Навельбин® препаратының дозаларын азайтуға ешқандай негіздеме жоқ (Фармакокинетика бөлімін қараңыз).

Педиатрияда қолданылуы

Навельбин препаратын балаларда қолданудың қауіпсіздігі мен тиімділігі зерттелмеген, сондықтан препаратты балаларда қолдануға болмайды.

Бала туу жасындағы әйелдер

Бала туу жасындағы әйелдерге емделу кезінде және ем аяқталғаннан кейін 3 ай ішінде контрацепция әдістерін пайдалану қажет.

Фертильділікке әсері

Навельбин препаратымен емдеу курсынан өтетін ерлерге емдеу курсынан кейін кемінде үш ай ішінде әке болуға кеңес берілмейді.

Емдеу курсы басталғанша винорелбинмен емделуден кейін болашақ сәбиге теріс әсері болмау үшін келесі ұрықтандыруға дейін шәһуетті консервациялау ұсынылады.

Дәрілік заттың автокөлікті және қауіптілігі зор механизмдерді басқару қабілетіне әсер ету ерекшеліктері

Препараттың автокөлікті және қауіптілігі зор механизмдерді басқару қабілетіне әсер етуіне зерттеулер жүргізілмеген. Фармакодинамикалық қасиеттерінің негізінде винорелбин көлік құралын жүргізу және механизмдерді басқару қабілетіне ықпалын тигізбейді. Алайда, винорелбинмен емдеу жағымсыз әсерлерге алып келетіндіктен, алдын ала сақтандыру шараларын қабылдауға болады.

Артық дозалануы

Симптомдары: жедел артық дозалану жұқпа жұқтырудың, қызба және ішек парезі қаупі жоғары болатын сүйек кемігі гипоплазиясын туындатады.

Емі: қан құюмен және әсер ету ауқымы кең антибиотиктер қолданумен қатар жүргізілетін жалпы демеуші емді дәрігер белгілейді.

Шығарылу түрі және қаптамасы

1 мл немесе 5 мл препараттан шыны (I типті) құтыға құяды. Құты бромбутилді резеңкеден жасалған тығынмен тығындалған және көк түсті пластик қорғаныш қақпағы бар алюминийден жасалған қақпақшамен қаусырылған.

Құтыға және термоконтейнерге өздігінен желімделетін заттаңба жапсырылады.

Пенопласттан жасалған термоконтейнерде 10 құтыдан, медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапқа салынады.

Сақтау шарттары

Жарықтан қорғалған жерде, 2 ºС-ден 8 ºС-ге дейінгі температурада сақтау керек.

Мұздатып қатыруға болмайды.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндірушінің атауы және елі

Пьер Фабр Медикамент Продакшн, Франция

Тіркеу куәлігінің иесі

Пьер Фабр Медикамент Продакшн

45 пл. Абель Ганс 92100 Булонь, Франция

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы

«EUROMEDEX» өкілдігі

050009, Алматы қ, Абай даңғылы 155, 37 кеңсе Тел./Факс: +7(727) 338 52 61 e-mail: office.kz@euromedex.com