Мидримакс

• русский
• қазақша

• Скачать инструкцию медикамента

Саудалық атауы

Мидримакс

Халықаралық патенттелмеген атауы

Жоқ

Дәрілік түрі

Көз тамшы дәрісі

Құрамы

1 мл препараттың құрамында

белсенді заттар: 50 мг фенилэфрин гидрохлориді, 8 мг тропикамид,

қосымша заттар: натрий метабисульфиті, бензалконий хлориді, динатрий эдетаты, гипромеллоза, натрий гидроксиді, хлорлысутек қышқылы, инъекцияға арналған су.

Сипаттамасы

Түссізден ақшыл қоңырлау-сары түске дейінгі мөлдір ерітінді.

Фармакотерапиялық тобы

Көз ауруларын емдеуге арналған препараттар. Мидриатиктер. Басқа препараттармен біріктірілген тропикамид.

АТХ коды S01FA56

Фармакологиялық қасиеттері

Фармакокинетикасы

Фенилэфрин көз тіндеріне оңай өтеді, плазмадағы концентрациясының ең жоғарғысы жергілікті қолданғаннан кейін 10-20 минуттан соң туындайды. Фенилэфрин бүйрекпен өзгеріссіз күйде (<20%) немесе белсенді емес метаболиттер түрінде шығарылады.

Тропикамид көз тіндеріне оңай өтеді және қан ағымына жылдам сіңеді. Модификацияланған радиорецепторлық талдауды пайдаланғанда тропикамидтің плазмада анықталуының төменгі шегі 240 пг/мл аз, ауқымы — 240 пг/мл – 10 нг/мл құраған. Плазмадағы орташа ең жоғарғы концентрациясы енгізгеннен кейінгі бесінші минутта 2,8 ±1,7 нг/мл құраған. 60-ыншы минутта тропикамидтің плазмадағы концентрациясы 0,46  0,51 нг/мл, ал 120-сыншы минутта — 240 пг/мл төменді құраған.

Фармакодинамикасы

Фенилэфрин – симпатомиметик, айқын альфа-адренергиялық белсенділікке ие. Офтальмологияда жергілікті қолданылғанда қарашықтың кеңеюін туғызады, көзішілік сұйықтықтың ағып шығуын жақсартады және конъюнктива тамырларын тарылтады. Фенилэфриннің постсинапстық альфа-адренорецепторларға айқын стимуляциялағыш әсері бар, бета1-адренорецепторларға әсер етуі өте әлсіз. Норэпинефриннің (норадреналиннің) әсеріне ұқсас вазоконстрикторлық әсері бар, сонымен қатар жүрекке хронотроптық және инотроптық әсері мүлдем жоқ деуге болады. Фенилэфриннің вазопрессорлық әсері норадреналинге қарағанда әлсізірек, бірақ ұзағырақ болып табылады. Инстилляциядан кейін фенилэфрин қарашық дилататорын және конъюнктива артериолаларының тегіс бұлшықеттерін жиырады, сол арқылы қарашықтың кеңеюін туғызады. Мидриаз бір рет тамызғаннан кейін 10–60 минут ішінде басталады және 4–6 сағат бойы сақталады. Фенилэфрин тудырған мидриаз, циклоплегиямен қатар жүрмейді. Фенилэфрин аккомодация үдерісіне әсер ете отырып, аккомодацияны «алысқа» стимуляциялайды. Сонымен қатар анық көрудің алыс нүктесі жоғалады, ал жақындағы қалып өзгермейді. Фенилэфрин тропикамидтің әсерін толықтырады, өйткені олардың әсер ету механизмдері өзгеше. Тропикамидпен бірге фенилэфринді енгізу тропикамидтің көзішілік қысымды жоғарылату қабілетін төмендетеді немесе қайтарады.

Тропикамид - М-холиноблокатор, қарашық сфинктері мен цилиарлық бұлшықеттің м-холинорецепторларын бөгей отырып, қысқа мерзімді мидриаз бен аккомодация салдануын туғызады. Көзішілік қысымды елеусіз жоғарылатады. Тропикамидті қолдану аясындағы мидриаз 5-10 минуттан соң дамиды және ең жоғарғы деңгейіне 20-45 минутта жетеді. Қарашықтың ең жоғарғы кеңеюі 1 сағат бойы сақталады және 6 сағаттан соң қалпына түседі.

Қолданылуы

Мидриатикалық дәрі ретінде пайдаланылады:

- диагностикалық офтальмологиялық емшаралар кезінде

- хирургиялық және лазерлік операциялар алдында

- аккомодация түйілуін басу және алыстан көрмеудің өршуін емдеу үшін (кешенді ем құрамында)

Қолдану тәсілі және дозалары

Диагностикалық офтальмологиялық және операциялық араласулар кезінде қарашықты кеңейту үшін емшараға немесе операцияға дейін 15-30 минут бұрын конъюнктива қуысына 1-2 тамшыдан тамызады.

Аккомодация бұзылуларын түзету үшін –2-4 апта бойы күн ара түнде әр көзге 1 тамшыдан тамызу керек

Жағымсыз әсерлері

Жергілікті:

- аллергиялық реакциялар

- көзішілік қысымның жоғарылауы

- өтпелі ауыру, көздің шымылдатып ауыруы және жарықтан қорқу

- көрудің өтпелі нашарлауы

- көзішілік қысымның уақытша жоғарылауымен сулы ылғалға пигменттің босап шығуы

- алдыңғы камерасы бұрышының бөгелуі (бұрышы тарылған кезде)

- қабақ үсті доғасы аймағының ауыруы

- көзден жас парлау, конъюнктива гиперемиясы, кератит

Сирек

– қолданғаннан кейінгі келесі күнгі реактивтік миоз (препараттың қайталанған инстилляциялары бұл кезде алдындағыға қарағанда айқындығы аз мидриаз туғызуы мүмкін; бұл әсер көбінесе егде жастағы емделушілерде білінеді).

Жүйелік:

- бозару, ауыздың құрғауы, терінің қызаруы және құрғауы

- жанаспалы дерматит

- бас ауыруы

- брадикардия

- тахикардия және аритмия

- артериялық қысымның жоғарылауы

- коронарлық артериялардың қарыншалық окклюзиясы

- өкпе артериясының эмболиясы

- ОЖЖ тарапынан болған бұзылулар және бұлшықет сіресуі

- жиі несеп шығарғысы келу

- жүрек айнуы, құсу, несеп шығарудың қиындауы, асқазан-ішек жолы тонусы мен перистальтикасының іш қатуына алып келетін төмендеуі

Сирек

- жүрек айнуы және бас айналуы

- жүрек-қантамыр жүйесінің аурулары бар егде жастағы емделушілерде – қарыншалық аритмиялар, миокард инфарктісі

Қолдануға болмайтын жағдайлар

- препарат компоненттерінің кез-келгеніне аса жоғары сезімталдық

- тар бұрышты және жабық бұрышты глаукома

- жүрек-қантамыр жүйесінің аурулары (соның ішінде, коронаросклероз, стенокардия, аритмия, гипертониялық криз)

- тиреотоксикоз

- моноаминооксидаза (МАО) тежегіштерін бір мезгілде қабылдау (сондай-ақ, оларды тоқтатқаннан кейінгі 3 апта)

- 12 жасқа дейінгі балаларға

- жүктілік және лактация кезеңі

Дәрілермен өзара әрекеттесуі

Бета-адренорецепторлардың блокатортарын тағайындағанда, олардың вазодилятацияны бәсеңдетуінің есебінен фенилэфриннің тамырды тарылтатын әсері күшеюі мүмкін.

Жедел гипертензияның туындау қаупіне байланысты, фенилэфрин мен гуанетидинді, сондай-ақ кез-келген басқа адренергиялық нейрондар блокаторын немесе кері нейрональді қармау тежегішін бірге пайдалану ұсынылмайды.

Моноаминоксидаза тежегіштерімен үйлестіріп пайдалану және оларды қабылдауды тоқтатқаннан кейінгі үш апта бойы жүйелі адренергиялық әсерлерінің қаупі артады.

Адренергиялық дәрілік заттардың вазопрессорлық әсері үшциклдық антидепрессанттармен, пропранололмен, гуанетидинмен, метилдопамен және м-холиноблокаторлармен бірге қолданғанда да күшеюі мүмкін.

Жергілікті анестетиктердің алдын-ала инстилляциялануы жүйелік сіңірілуін арттыруы және мидриазды ұзартуы мүмкін.

Айрықша нұсқаулар

Қарашық дилататорының айтарлықтай жиырылуы салдарынан, инстилляциядан кейін 30-45 минуттан соң көздің алдыңғы камерасының ылғалында нұрлы қабықтың пигменттік жапырақшасының пигмент бөлшектері анықталуы мүмкін. Камера ылғалындағы жүзіндіні увеит көріністерімен немесе қанның формалық элементтерінің алдыңғы камера сұйықтығына түсуімен дифференциациялау қажет.

Препараттың құрамындағы консерванттарды жұмсақ жанаспалы линзалар сіңіріп алуы мүмкін. Препарат жанаспалы линзаларды тағу кезінде көзге тітіркендіргіштік әсер беруі мүмкін, сондықтан кез-келген жанаспалы линзаны тамызар алдында шешіп алу және тамызғаннан кейін 15 минуттан ерте тақпау керек.

Тамшы дәріні төменгі конъюнктива қалтасына тамызу керек. Жүйелі жағымсыз әсерінің даму қаупін азайту үшін, тамызғаннан кейін 1-2 минут бойы көздің ішкі бұрышында көз жасы қалтасы проекциясының тұсын саусақпен жайлап басу ұсынылады.

Жанаспалы линзаларды пайдаланып жүрген емделушілер препаратты қолданар алдында линзаларды шешіп қоюы және оларды препаратты тамызғаннан кейін 15 минуттан ерте тақпауы керек.

Сақтықпен

2 типті қант диабетінде, егде жастағыларға (жүрек-қантамыр жүйесінің аурулары бар емделушілер үшін қарыншалық аритмиялар мен миокард инфарктісінің даму қаупі).

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері.

Препаратты қолданғаннан кейін аккомодация мен қарашық ауқымының өзгеруі салдарынан көру жітілігі төмендеуі мүмкін, сондықтан көлік құралдарын жүргізуде және жоғары зейін шоғырландыру мен психомоторлық реакциялардың жылдамдығын қажет ететін қауіпті қызмет түрлерімен шұғылданғанда препаратты пайдалану ұсынылмайды.

Артық дозалануы

Симптомдары: препарат ішке шамадан тыс қабылданған жағдайда – тері мен шырышты қабықтардың құрғауы, гипертермия, тахикардия, мидриаз, қозу, құрысулар, кома, тыныс алудың салдануы.

Емі: асқазанды шаю, белсендірілген көмірді қабылдау, у қайтарғы ретінде – физостигмин салицилаты (көктамыр ішіне баяу 0,03 мг/кг), бензодиазепиндер, гипертермияны басу үшін – салқын компрестер. Фенилэфриннің жүйелі әсерін басу үшін – α-адреноблокаторлар (көктамыр ішіне 5-10 мг фентоламин, қажет болса инъекцияны қайталайды).

Шығарылу түрі және қаптамасы

Көз тамшы дәрісі.

5 мл препараттан пластик тамшылатқыш-құтыларда.

1 тамшылатқыш-құтыдан ішінде құтыны ашуға арналған құрылғысы бар бұралатын қалпақшасымен және медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салады.

Сақтау шарттары

Жарықтан қорғалған жерде, 25 С-ден аспайтын температурада сақтау керек.

Мұздатып қатыруға болмайды.

Балалардың қолы жетпейтін жерде сақтау керек!

Сақтау мерзімі

2 жыл

Құтысын ашқаннан кейінгі қолданылу кезеңі 1 ай.

Қаптамасында көрсетілген жарамдылық мерзімі өткеннен кейін пайдалануға болмайды!

Дәріханалардан босатылу шарттары

Рецепт арқылы

Өндіруші

СЕНТИСС ФАРМА ПВТ. ЛТД.

212/Д-1, Грин Парк, Нью Дели, Үндістан

Зауытта: Виллидж Кхера Нихла, Техсил Налагарх, р-н Солан, Химачал Прадеш 174 101, Үндістан

Тіркеу куәлігі иесінің атауы және елі

СЕНТИСС ФАРМА ПВТ.ЛТД., Үндістан

Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы:

Қазақстан Республикасы, 050000, Алматы қ., Бөгенбай батыр к-сі 132, 309 кеңсе

Тел./факс: +7 (7272) 96-45-99

Email: sentiss_kz@land.ru