Метозан (7.5 мг)

• русский
• қазақша

• Скачать инструкцию медикамента

Саудалық атауы

Метозан

Халықаралық патенттелмеген атауы

Мелоксикам

Дәрілік түрі

7,5 мг және 15 мг таблеткалар

Құрамы

Бір таблетканың құрамында

белсенді зат - 7,5 мг немесе 15 мг мелоксикам

қосымша заттар: жүгері крахмалы, желатинделген крахмал, сусыз коллоидты кремнийдің қостотығы, натрий цитраты, лактоза моногидраты, микрокристалды целлюлоза, магний стеараты.

Сипаттамасы

Дөңгелек пішінді, жиектері қиғашталған және бір жағында сындыру сызығы бар бозғылт-сары түсті таблеткалар.

Фармакотерапиялық тобы

Қабынуға қарсы стероидты емес препараттар. Оксикамдар. Мелоксикам.

АТХ коды М01АС06

Фармакологиялық қасиеттері

Фармакокинетикасы

Мелоксикам асқазан-ішек жолынан жақсы сіңеді, оның ішу арқылы қабылдағаннан кейінгі биожетімділігі 89%. Мелоксикам дара дозасын қабылдағаннан кейін плазмадағы орташа ең жоғары концентрациясына 5-6 сағаттан соң жетеді.

Бірнеше дозаларында тұрақтанған жағдайға 3-5 күннен кейін жетеді. Ішу арқылы қабылдағаннан кейінгі мелоксикамның сіңу деңгейіне бір мезгілде тамақтану әсер етпейді.

Мелоксикам плазма протеиндерімен, әсіресе альбуминдермен өте берік (99%) байланысады. Мелоксикам синовиальді сұйықтыққа өтеді, бұл шамамен плазмадағы концентрациясының жартысын құрайды.

Мелоксикам бүйрек арқылы биоөзгеріске ұшырайды, метаболиттері белсенді емес.

Мелоксикам ағзадан, негізінен, метаболиттер түрінде несеппен және нәжіспен тең мөлшерлерде шығарылады. Тәуліктік дозасының 5%-дан азы өзгермеген күйде нәжіспен шығады. Орташа шығарылу кезеңі 20 сағатқа жуық құрайды. Плазманың жалпы клиренсі, орташа алғанда, минутына 8 мл құрайды.

Орташа дәрежелі бауыр немесе бүйрек жеткіліксіздігі мелоксикамның фармакокинетикалық қасиеттеріне елеулі ықпалын тигізбейді. Айқын бүйрек жеткіліксіздігінде таралу көлемінің ұлғаюы мелоксикамның еркін концентрацияларының көбірек жоғарылауына алып келеді.

Фармакодинамикасы

Метозан қабынуға қарсы, ауыруды басатын және ыстық түсіретін қасиеттері бар оксикамдар тобының қабынуға қарсы стероидты емес дәрілік препараты болып табылады.

Әсер ету механизмі простагландиндердің, қабыну медиаторларының биосинтезінің бәсеңдеуімен байланысты.

Қолданылуы

Симптоматикалық емдеу үшін:

- остеоартроз кезіндегі ауыру синдромында

- ревматоидты артритте

- шорбуынданатын спондилоартритте

Қолдану тәсілі және дозалары

Остеоартроздың асқынуы

Күніне 7,5 мг, дозаны күніне 15 мг-ге дейін арттыруға болады.

Ревматоидты артрит, шорбуынданатын спондилоартрит

Күніне 15 мг. Емдік реакциясына сай, дозаны күніне 7,5 мг-ге дейін кемітуге болады. Ең жоғарғы тәуліктік дозасы - 15 мг.

Таблеткаларды тәулігіне бір рет, ас ішкен кезде және сумен ішіп қабылдау керек.

Бүйрек жеткіліксіздігі бар науқастар

Жедел бүйрек жеткіліксіздігінен зардап шегетін диализде жүрген емделушілерде доза күніне 7,5 мг-ден аспауға тиіс. Орташа немесе әлсіз дәрежелі бүйрек жеткіліксіздігі бар емделушілер үшін (яғни, креатинин клиренсі минутына 25мл-ден көп емделушілер) дозаны түзету қажет емес.

Бауыр жеткіліксіздігі бар науқастар

Орташа немесе әлсіз дәрежелі бауыр ауруы бар емделушілер үшін дозаны түзету талап етілмейді.

15 жастан асқан жасөспірімдерде қолданылуы

Ең жоғары доза 0,25 мг/кг құрайды.

Емдеу курсының ұзақтығын емдеуші дәрігер белгілейді.

Жағымсыз әсерлері

Жиі

- анемия

- бас ауыруы

- диспепсия, жүрек айнуы және құсу, іш қуысының ауырулары, іш қату, метеоризм, диарея

- бөрту

- аяқтардың ісінуін қоса, ісіну

Жиі емес

- лейкоцитопения, тромбоцитопения, агранулоцитоз

- бас айналуы, құлақтағы шыңыл, ұйқышылдық

- жүректің қатты соғуы

- қан қысымының жоғарылауы, бетке қан тебу

- асқазан-ішектен қан кету, пептикалық ойық жаралар, эзофагит, стоматит

- бауыр қызметінің транзиторлық бұзылулары (трансаминазалар немесе билирубин деңгейінің жоғарылауы)

- уртикария

- бүйрек қызметінің бұзылулары (креатинин немесе мочевина деңгейінің жоғарылауы)

Сирек

- анафилактикалық / анафилактоидтық реакциялар

- көңіл-күйдің құбылуы, ұйқысыздық және қорқыныш-үрей сезімдері

- сананың шатасуы

- көрудің бұзылыстары, бұлыңғырлануды қоса

- аспириндік аллергиясы бар емделушілердегі демікпе ұстамасы

- асқазан-ішек жолының тесілуі, гастрит, колит

- гепатит

- ангионевротикалық ісіну, буллездік реакциялар (мультиформалы эритема, күн сәулесіне сезімталдық)

- жедел бүйрек жеткіліксіздігі, интерстициальді нефрит

Өте сирек

- ісіну, гипертензия және жүрек жеткіліксіздігі

- пептикалық жаралар, асқазан-ішектік тесілу немесе қан кету

- мелена, қан аралас құсу, ойық жаралы стоматит, колиттің асқынуы және Крон ауруы

- буллездік реакциялар, Стивенс-Джонсон синдромын және уытты эпидермалық некрозды қоса

Айрықша жағдайларда

- тромб түзілуінің жоғарылауы (жоғары дозаларын ұзақ уақыт қолданғанда)

Қолдануға болмайтын жағдайлар

- мелоксикамға немесе толтырғыштардың біреуіне жоғары сезімталдық немесе басқа қабынуға қарсы стероидты емес дәрілерге жоғары сезімталдық

- аспириндік демікпе

- асқазан және он екі елі ішектің өршу сатысындағы ойық жара ауруында немесе таяуда болған ойық жаралануы/тесілуі

- ішектің өршу барысындағы қабыну аурулары (Крон ауруы, спецификалық емес ойық жаралы колит)

- бауыр қызметінің ауыр жеткіліксіздігі

- бүйрек қызметінің ауыр жеткіліксіздігі – креатинин клиренсі 30 мл/мин төмен (егер гемодиализ жүргізілмейтін болса)

- асқазан-ішектен қан кету, таяуда өрбіген цереброваскулярлық қан кету немесе басқа да геморрагиялық аурулар

- декомпенсация сатысындағы жүрек жеткіліксіздігі

- коронарлық шунттау операциясынан кейінгі ауыру синдромы (айналма анастомоздар салу)

- жүктілік және лактация кезеңі

- 15 жасқа дейінгі балалар

Дәрілермен өзара әрекеттесуі

Басқа да ҚҚСП, салицилаттарды қоса (ацетилсалицил қышқылы):

Кейбір ҚҚСП бірге қабылдау синергетикалық әсер арқылы асқазан-ішектік ойық жараның және қан кетудің қаупін арттыруы мүмкін.

Несеп айдайтын препараттар:

ҚҚСП қабылдау, әсіресе сусыздануы бар емделушілерде жедел бүйрек жеткіліксіздігін туғызуы мүмкін.

Метозан мен диуретиктер қабылдайтын емделушілер жеткілікті мөлшерде сұйық ішуге тиіс және олардың бүйрек қызметі емдеуді бастар алдында қадағалауда болуға тиісті.

Ішу арқылы қабылданатын антикоагулянттар:

Тромбоцитарлық қызметтің бәсеңдеуінен және гастродуоденальді шырышты қабықтың зақымдалуынан қан кету қаупі жоғары.

Метозан мен ішу арқылы қабылданатын антикоагулянттарды бір мезгілде қабылдау ұсынылмайды.

Тромболитикалық препараттар және антитромбоцитарлық заттар:

Тромбоцитарлық қызметтің бәсеңдеуінен және гастродуоденальді шырышты қабықтың зақымдалуынан қан кету қаупі жоғары.

АӨФ тежегіштері және ангиотензин-II рецепторларының антагонистері:

ҚҚСП мен ангиотензин-II рецепторларының антагонистері бүйректегі шумақтық сүзілудің төмендеуіне синергетикалық әсерін тигізеді, бұл бүйрек қызметі өзгерген жағдайда асқынуы мүмкін. Препараттарды егде жастағы және/немесе сусыздануы бар емделушілер қабылдағанда, бұл біріктірілім бүйректегі шумақтық сүзілуге тікелей әсер ете отырып, жедел бүйрек жеткіліксіздігіне әкелуі мүмкін. Емдеудің басында бүйрек қызметінің мониторингі, сондай-ақ емделушіні мерзім сайын гидратациялау ұсынылады. Оның үстіне, препараттарды бір мезгілде қабылдау АӨФ тежегіштерінің және ангиотензин-II рецепторлары антагонистерінің гипертензияға қарсы әсерін төмендете алады, бұл тиімділіктің ішінара жоғалуына (тамыр кеңейткіш әсер ететін простагландиндердің бәсеңдеуімен байланысты) алып келеді.

Басқа гипертензияға қарсы препараттар (бета-блокаторлар):

Бета-блокаторлардың гипертензияға қарсы әсерінің төмендеуі (тамыр кеңейткіш әсер ететін простагландиндердің бәсеңдеуімен байланысты) байқалуы мүмкін.

Циклоспориндер:

ҚҚСП циклоспориннің нефроуыттылығын күшейтіп жібереді. Біріктіріп емдеу кезінде бүйрек қызметі бақылануға тиіс. Әсіресе, егде жастағы тұлғаларда бүйрек қызметінің тиянақты мониторингін жасау ұсынылады.

Жатырішілік ұрықтануға қарсы дәрілер:

Метозан жатырішілік ұрықтануға қарсы дәрілердің әсерін төмендетеді.

Кортикостероидтар:

Асқазан-ішектік ісік түзілуінің немесе қан кетудің қаупі жоғары.

Серотонинді қайта қармайтын іріктеуші тежегіштер:

Асқазан-ішектен қан кету қаупі жоғары.

Литий:

Метозан қандағы уытты шамаларға жетуі мүмкін литий деңгейін (литийдің бүйрекпен шығарылу қызметін төмендету арқылы) ұлғайтады. Литий мен метозанды бір мезгілде қабылдау ұсынылмайды. Егер бұл біріктірілім қажет болса, метозанды қабылдау басталғанда, өзгерген және тоқтатылған кезде плазмадағы литий концентрацияларына қатаң мониторинг жасалуы тиіс.

Метотрексат:

Метозан плазмадағы метотрексан концентрациясын арттыра алады. Осы себептен, метотрександы үлкен дозаларда (аптасына 15 мг-ден көп) қабылдайтын емделушілерге метозанды бір мезгілде қабылдау ұсынылмайды.

Холестирамин:

Холестерамин метозанның бөлініп шығуын жеделдетеді және метозан клиренсі 50%-ға өседі, ал жартылай ыдырау кезеңі 13+3 сағатқа дейін қысқарады.

CYP3A4 және CYP2С9 тежегіштері, индукторлар және субстраттар:

Метаболикалық өзара әрекеттесулер болуы мүмкін.

Антацидтерді, циметидинді және дигоксинді бір мезгілде қабылдаумен байланысты ешқандай фармакокинетикалық маңызды дәрілік өзара әрекеттесулер табылған жоқ, бірақ ол сарысудағы дигоксин деңгейлерінің ұлғаюын туғызуы мүмкін.

Айрықша нұсқаулар

Жағымсыз әсерлердің туындау қаупін азайту мақсатында метозанды ең аз деген тиімді дозада тағайындау ұсынылады.

Метозанды басқа қабынуға қарсы стероидты емес дәрілермен (ҚҚСП) бір мезгілде қолданудан қашық болу керек.

Егде жастағы адамдар жағымсыз әсерлердің туындау қаупіне көбірек ұшырайды.

Жағымсыз әсерлердің туындау қаупі жоғары емделушілерді протондық помпа тежегіштерімен біріктіріп емдеу ұсынылған.

Жағымсыз әсерлер алғаш білінген бойда метозанды қабылдауды тоқтату керек.

Бақыланбайтын гипертензиясы, іркілісті жүрек жеткіліксіздігі, жүректің ишемиялық ауруы, шеткергі артериялар ауруы және/немесе цереброваскулярлық ауруы бар емделушілер метозанды тек мұқият тексеруден өткеннен кейін ғана қабылдауға тиіс. Осыған ұқсас шаралар жүрек-қан тамырлары ауруы (гипертензия, гиперлипидемия, қант диабеті, шылым шегу) туындауының қауіп факторлары бар емделушілерде ұзақ уақыт емдеуді бастамас бұрын қабылдануы тиіс.

ҚҚСП бүйрек перфузиясын ұстап тұруға қатысатын бүйрек простагландиндерінің синтезін бәсеңдетеді. Бүйректік қан ағымы және қан көлемі төмен емделушілерде метозанды қабылдау жасырын бүйрек жеткіліксіздігінің қалпына келмеуіне алып келуі мүмкін. Бұл қауіп егде жастағы барлық емделушілерде, іркілісті жүрек жеткіліксіздігі, циррозы, нефротикалық синдромы немесе бүйрек жеткіліксіздігі бар емделушілерде, сондай-ақ диуретиктер қабылдайтын немесе гиповолемия белгілері бар емделушілерде кездеседі. Мұндай емделушілер емдеу кезінде диурездің және бүйрек қызметінің мұқият мониторингін жүргізуді қажет етеді.

Метозан жұқпалы аурулардың белгілерін бүркемелеуі мүмкін.

Метозанды бронх демікпесі бар емделушілерге тағайындағанда ерекше сақ болу қажет.

Сирек кездесетін тұқым қуалайтын галактозаны көтере алмаушылығы, Лапп лактаза тапшылығы бар немесе глюкоза-галактоза сіңуі нашар емделушілер бұл препаратты қабылдамауы тиіс.

Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Метозан бұл қабілеттерге әсер етпейді. Дегенмен, көру нашарлаған немесе бас айналған кезде немесе орталық жүйке жүйесінің басқа да проблемаларында, автокөлік жүргізуді және құрылғы-жабдықтармен жұмыс істеуді қоя тұруға кеңес беріледі.

Артық дозалануы

Симптомдары: ұйқышылдық, жүрек айнуы, құсу және асқазанның ауырулары, асқазан-ішектік қан кету орын алуы мүмкін.

Жедел улану гипертензияға, жедел бүйрек жеткіліксіздігіне, бауыр қызметінің бұзылуына, тыныстың тарылуына, комаға, құрысуларға, жүрек-қантамыр коллапсына және жүректің тоқтап қалуына әкеп соғуы мүмкін.

Емі: симптомаикалық.

Шығарылу түрі және қаптамасы

10 таблеткадан мөлдір емес ақ түсті поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамада.

3 пішінді ұяшықты қаптамадан (7.5 мг доза үшін) немесе 1 пішінді ұяшықты қаптамадан (15 мг доза үшін) медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады.

Сақтау шарттары

Құрғақ, жарықтан қорғалған жерде, 25С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Препаратты жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

«G.L. Pharmа GmbH.», Industriestraße 1, A-8502 Lannach, Австрия

Тіркеу куәлігінің иесі

«Валеант» ЖШҚ, Мәскеу, Ресей

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы:

Телефон 3 111 516 Факс 3 111 517

Электронды поштасы Office.KZ@valeant.com