Метипред (4 мг)

МНН: Метилпреднизолон
Производитель: Орион Корпорейшн
Анатомо-терапевтическо-химическая классификация: Methylprednisolone
Номер регистрации в РК: № РК-ЛС-5№016731
Период регистрации: 04.03.2016 - 04.03.2021
Республиканский центр развития здравоохранения
КНФ (ЛС включено в Казахстанский национальный формуляр лекарственных средств)
Включено в Список бесплатного амбулаторного лекарственного обеспечения
АЛО (Включено в Список бесплатного амбулаторного лекарственного обеспечения)
Включено в Список ЛС в рамках ГОБМП, подлежащих закупу у Единого дистрибьютора
ЕД (Включено в Список ЛС в рамках ГОБМП, подлежащих закупу у Единого дистрибьютора)
Предельная цена закупа в РК: 58.58 KZT

Инструкция

Саудалық атауы

Метипред

Халықаралық патенттелмеген атауы

Метилпреднизолон

Дәрілік түрі

4 және 16 мг таблеткалар

Құрамы

Бір таблетканың құрамында

белсенді зат - 4 мг немесе 16 мг метилпреднизолон,

қосымша заттар: лактоза моногидраты, жүгері крахмалы, желатин, магний стеараты, тальк.

Сипаттамасы

Дөңгелек пішінді, жалпақ беткейлі, шеттері қиғашталған, бір жағында сызығы бар, диаметрі 6.9-дан 7.3 мм дейін ақ немесе ақ дерлік түсті таблеткалар (4 мг доза үшін).

Дөңгелек пішінді, жалпақ беткейлі, шеттері қиғашталған, бір жағында сызығы, сызықтың екі жағында да орналасқан «ORN» және «346» таңбасы бар, диаметрі 8.9-дан 9.3 мм дейін ақ немесе ақ дерлік түсті таблеткалар (16 мг доза үшін).

Фармакотерапиялық тобы

Жүйелі пайдалануға арналған гормональді препараттар (жыныс гормондарын қоспағанда). Жүйелі пайдалануға арналған кортикостероидтер. Глюкокортикостероидтар. Метилпреднизолон

АТХ коды Н02АВ04

Фармакологиялық қасиеттері

Фармакокинетикасы

Метилпреднизолон биожетімділігі ішке қабылдағанда, әдетте, 80%-дан аса құрайды, бірақ үлкен дозаларын тағайындағанда төмен болуы да мүмкін.

Қан сарысуындағы концентрациясының жоғары шегі 1-2 сағаттан соң байқалады, орташа жартылай шығарылу кезеңі – 2-3 сағат.

Метилпреднизолонның плазма протеиндерімен байланысы 77% құрайды, транскортинмен байланысы онша емес. Таралу көлемі – 1-1,5 л/кг. Метилпреднизолон белсенді емес метаболиттерге дейін метаболизденеді. Оның қайта түзілуін қамтамасыз ететін спецификалық CYP-ферменттер белгісіз. Орташа клиренсі 6,5 мл/кг/мин құрайды. Қабынуға қарсы әсерінің ұзақтығы – 18-36 сағат. Препараттың 5% жуығы организмнен несеппен шығарылады.

Фармакодинамикасы

Метипред әсері, басқа глюкокортикоидтар сияқты, цитоплазмада стероидты рецепторлармен өзара әрекеттесу арқылы жүзеге асады. Cтероидрецепторлық кешен жасуша ядросына тасымалданады, ДНҚ-мен бірігеді және ақуыздардың көпшілігі үшін гендер транскрипциясын өзгертеді. Глюкокортикоидтар көптеген ақуыздардың, буындар құрылысын бұзатын (ревматоидты артритте) әртүрлі ферменттердің, сондай-ақ иммундық және қабыну реакцияларында маңызды рөл атқаратын цитокиндер синтезін бәсеңдетеді. Глюкокортикоидтардың нейроэндокриндік өзара әрекеттесуінің негізгі ақуызы – липокортин синтезін индукциялайды, бұл қабыну және иммундық жауабының азаюына әкеледі.

Метипредті қоса, глюкокортикоидтар көптеген жылу, механикалық, химиялық, инфекциялық және иммунологиялық агенттерге тіндік жауаптың дамуын бәсеңдетеді немесе кедергілейді. Осылайша, глюкокортикоидтар аурудың көрініс беруін себебіне әсер етусіз азайта отырып, симптоматикалық әсер етеді. Препараттың қабынуға қарсы әсері гидрокортизон тиімділігінен кем дегенде 5 есе асып кетеді.

Метипредтің эндокриндік әсерлері АКТГ секрециясын бәсеңдетуді, эндогендік кортизол өнімін тежеуді қамтиды, ұзақ уақыт қолданғанда бүйрек үсті бездері қыртысының ішінара атрофиясын туындатады. Кальций, D витамині метаболизміне, көмірсу, ақуыз және липидтік алмасуға әсер етеді, сондықтан ұзақ уақыт қолданғанда қандағы глюкоза мөлшерінің артуын, сүйек тіні тығыздығының азаюын, бұлшықет атрофиясы мен дислипидемия құбылыстарын байқауға болады. Препарат артериялық қысымның және мінез-құлық пен көңіл-күй модуляциясының жоғарылауына ықпал етеді. Метипредтің іс жүзінде минералокортикоидтық белсенділігі жоқ.

 

Қолданылуы

- ревматоидты артрит, соның ішінде ювенильді ревматоидты артрит, шорбуынданатын спондилит

- жүйелі қызыл жегі, ревматизм ауруы, соның ішінде жедел ревмокардит, жүйелі дерматомиозит (полимиозит), түйінді периартериит

- сулы бөртпе

- әдеттегі ем тиімсіз болатын ауыр, мүгедектікке ұшырататын аллергиялық жағдайлар: бронх демікпесі, жанаспалы дерматит, атопиялық дерматит, сарысу құю ауруы, маусымдық немесе тұрақты аллергиялық ринит, дәрілік затқа аса жоғары сезімталдық реакциясы

- ирит, иридоциклит, артқы увеит және ретробульбарлы неврит

- ойық жаралы колит, Крон ауруы

- өкпе саркоидозы, аспирациялық пневмонит

- жүре пайда болған (аутоиммундық) гемолиздік анемия, идиопатиялық тромбоцитопениялық пурпура

- лейкемия (жедел және лимфалық), лимфосаркома, лимфома, қатерлі миеломалы ауру

- трансплантаттың қабылданбай ажырау реакциясын бәсеңдету үшін

Қолдану тәсілі және дозалары

Бастапқы доза ауруға және оның ауырлық дәрежесіне байланысты. Ересектерге ішуге арналған старттық доза, әдетте, күніне 8-ден 96 мг дейін құрайды. Доза оң клиникалық жауапқа жеткенде азайтылуы тиіс. Ішуге арналған демеуші дозасы ең азы болуы тиіс, әдетте, ересектер үшін тәулігіне бір рет таңертеңгі сағаттарда 4-12 мг. Балалар үшін ең төмен дозалары ұсынылады. Ұзақ емдеу кезінде препаратты күнара бір рет таңертең қабылдау талапқа сай болады.

4 мг метилпреднизолон 5 мг преднизолон, 4 мг триамцинолон және 0,75 мг дексаметазонға баламалы болады.

Қолданылуы

Балаларға: бүйрек үсті бездері жеткіліксіздігінде ішке 0,14 мг/кг немесе тәулігіне 4 мг/м2 3 қабылдауға, басқа көрсетілімдері бойынша — ішке 0,417-1,67 мг/кг немесе 12,5-50 мг/м2 үш бөлінген дозаларда

Жағымсыз әсерлері

Ауыр жағымсыз реакциялардың дамуы дозаның шамасына және емдеу ұзақтығына байланысты. Жағымсыз реакциялар, әдетте, препаратпен ұзақ уақыт емдегенде дамиды, қысқа кезең ішінде олардың пайда болу ықтималдығы аз.

- бактериялық, вирустық және зеңдік инфекциялардың дамуы және өршуі, туберкулездің қайталануы, иммуносупрессия

- эозинофильдер, моноциттер және лимфоциттер саны төмендегенде лейкоциттердің жалпы санының жоғарылауы, тромбоцитоз

- гиперкоагуляция, тромбоз

- гипоталамусты-гипофизарлы-бүйрекүстілік без жүйесінің бәсеңдеуі, балалардағы өсудің баяулауы, жыныстық даму кідірісі, етеккір оралымының бұзылуы, жыныс гормондары өндірілуінің бұзылуы (аменорея), Кушинг синдромы, гирсутизм

- тәбеттің артуы, дене салмағының артуы, көмірсуларға төзімділіктің төмендеуі, инсулинге және ішуге арналған қант төмендететін препараттарға қажеттіліктің жоғарылауы, гиперлипидемия, теріс азот теңгерімі, гипокальциемия, гипокалиемия, гипокалиемиялық алкалоз, организмдегі натрий және сұйықтық кідірісі

- бас ауыру, бас айналу, ашушаңдық, үрейлену, көңіл-қүйдің құбылуы, ұйқысыздық, эйфория, депрессия, суицидке бейімділік, мания, елестеулер, психикалық тәуелділік, психоздар, шизофренияның өршуі, деменция, құрысу ұстамалары, когнитивтік дисфункция (амнезия мен сананың шатасуын қоса), бассүйекішілік қысымның көтерілуі

- көзішілік қысымның көтерілуі, глаукома, көру жүйкесі дискісінің ісінуі, катаракта, көздің мөлдір қабығы мен ақ қабығының жұқаруы, көздің вирусты және зеңді инфекциялық өршулері, экзофтальм

- миокард инфарктісі, артериялық гипо- немесе гипертензия, брадикардия, қарыншалық аритмия, асистолия (препаратты тез енгізу нәтижесінде), атеросклероз, тромбоз, васкулит, жүрек жеткіліксіздігі

- өліммен аяқталатын анафилаксиялық шокты қамтитын аллергиялық реакциялар, тері сынамаларына реакциялардың өзгеруі

- жүрек айну, құсу, ауыздан жағымсыз иіс шығу, метеоризм, эзофагит, өңештің ойық жарасы, өңеш кандидозы, тесілумен және қан кетумен болатын асқазанның және он екі елі ішектің ойық жарасы, панкреатит, өт қалтасының тесілуі, жергілікті илеит, ойық жаралы колит

- АЛТ, АСТ және сілтілік фосфатаза белсенділігінің жоғарылауы

- регенерацияның баяулауы, тері атрофиясы, петехиялар, гематомалар, жолақтар, телеангиэктазия, безеу бөртпесі, экхимоз, пурпура, гипер- немесе гипопигментация, препаратты тоқтатудан кейін 2 апта ішінде эритематоздың, ыстық теріастылық қалыңдаудың пайда болуымен сипатталатын стероидтан кейінгі панникулит

- Капоши синдромы

- остеопороз, омыртқа бағанының және ұзық сүйектердің сынуы, асептикалық остеонекроз, миопатия, бұлшықет әлсіздігі, бұлшықеттер атрофиясы, сіңірлердің үзілуі

- уролиттердің туындау қаупінің жоғарылауы, лейкоцитурия, бүйректің бұрыннан бар зақымдануларынсыз эритроцитурия, никтурия

- дімкәстану, препаратты жоғары дозаларда қолдану кезіндегі тұрақты ықылықтау

- егер Метипред дозасы арттырылмаса, хирургиялық араласу, жарақат немесе инфекция сияқты стресс жағдайларында өлім оқиғаларына әкелуі мүмкін бүйрек үсті бездерінің жеткіліксіздігі

- препаратты күрт тоқтатқанда тоқтату синдромы болуы мүмкін. Симптомдардың ауырлығы бүйрек үсті бездерінің атрофия дәрежесіне байланысты: бас ауыру, бас айналу, анорексия, жүрек айну, құрсақ қуысының ауыруы, әлсіздік, көңіл-күйдің өзгеруі, летаргия, ысыну, миалгия, артралгия, ринит, конъюнктивит, ауырсынулы тері қышынуы, салмақ жоғалту. Ауырлау жағдайларда – ауыр психикалық бұзылулар және бассүйекішілік қысымның көтерілуі, ревматизмге шалдыққан пациенттердегі стероидтық жалған ревматизм, өлім.

Қолдануға болмайтын жағдайлар

- препарат компоненттеріне аса жоғары сезімталдық

- туберкулез, басқа да жедел және созылмалы бактериялық немесе вирустық инфекциялар (тиісті химиялық еммен қорғалусыз)

- жүйелік зеңді инфекциялар

Дәрілермен өзара әрекеттесуі

Антикоагулянттар: глюкокортикоидтармен бірге қолданғанда антикоагулянттар әсерінің күшеюі мен азаюы білінуі мүмкін. Метипредті парентеральді енгізу К витамині антагонистерінің (флуиндион, аценокумарол) тромболитикалық әсерін қатаң түрде күшейтеді.

Салицилаттар және басқа да қабынуға қарсы стероидты емес препараттар: салицилаттар, индометацин және басқа да қабынуға қарсы стероидты емес препараттарды бір мезгілде тағайындау асқазан шырышты қабығының ойық жаралану ықтималдығын арттыруы мүмкін. Метипред қан сарысуындағы салицилаттар деңгейінің азаюына ықпал етіп, олардың бүйректік клиренсін арттыруы мүмкін. Бір мезгілде ұзақ уақыт қолданғанда Метипред дозасын азайту кезінде сақ болу қажет.

Гипогликемиялық препараттар: Метипред ішуге арналған диабетке қарсы дәрілер мен инсулиннің гипогликемиялық әсерін ішінара бәсеңдетуі мүмкін.

Бауыр микросомалық ферменттерінің индукторлары: мысалы, барбитураттар, фенитоин, примидон, карбамазепин және рифампицин метилпреднизолонның жүйелік клиренсін арттырып, сол арқылы метилпреднизолон әсерлерін 2 есе дерлік азайтады.

CYP3A4 тежегіштері: мысалы, эритромицин, кларитромицин, кетоконазол, дилтиазем, апрепитант, итраконазол және тролеандомицин қан плазмасында метилпреднизолон элиминациясы мен деңгейін арттырады, бұл Метипредтің емдік және жағымсыз әсерлерінің күшеюіне әкелуі мүмкін.

Эстрогендер: Метипред әсерлерін, оның метаболизмін баяулата отырып, күшейте алады. Метипредтің жартылай шығарылу кезеңін ұзартуға ғана емес, атипиялық иммуносупрессиялық әсерлерінің дамуына ықпал ете алатын ішуге арналған контрацептивтер қабылдайтын әйелдерге Метипред дозасын реттеуге кеңес берілмейді.

Фторхинолондар: бір мезгілде қолдану сіңірлердің зақымдануына әкелуі мүмкін.

Амфотерицин, диуретиктер және жеңіл іш жүргізгіш дәрілер: осы препараттарды бір мезгілде алатын пациенттерде Метипред организмнен калий шығарылуын арттыра алады.

Иммунодепрессанттар: Метипредтің аддитивті иммуносупрессиялық әсері бар, бұл басқа иммунодепрессанттармен бірге қабылдағанда емдік әсерлерін немесе әртүрлі жағымсыз реакциялардың даму қаупін арттыруы мүмкін. Осы әсерлердің кейбіреулерін ғана фармакокинетикалық өзара әрекеттесулермен түсіндіруге болады.

Глюкокортикоидтар, соның ішінде Метипред обырға қарсы құстыратын препараттармен ем кезінде қатар пайдаланылатын құсуға қарсы басқа да препараттардың құсуға қарсы тиімділігін жақсартады.

Глюкокортикоидтар, соның ішінде Метипред оларды бірге қолданғанда плазмадағы такролимус концентрациясын арттыра алады, кортикостероидтарды тоқтатқанда плазмадағы такролимус концентрациясы жоғарылайды.

Иммунизация: препарат вакциналардың иммунизациялау тиімділігін редукциялап, неврологиялық асқынулар қаупін арттыруы мүмкін. Глюкокортикоидтардың емдік (иммуносупрессиялық) дозаларын тірі вирустық вакциналармен бірге қолдану вирустық аурулардың даму қаупін арттыруы мүмкін.

Антихолинэстеразалық дәрілер: миастениямен науқастарда препаратты және антихолинэстеразалық дәрілерді қолдану бұлшықет әлсіздігін тудыруы мүмкін.

Басқалары: доксакариум хлориді мен метилпреднизолонды жоғары дозаларда алатын егде жастағы пациенттерде жедел миопатияның күрделі екі жағдайы хабарланған. Ұзаққа созылатын ем кезінде глюкокортикоидтар соматотропин әсерін азайтуы мүмкін.

Жүйке-бұлшықет берілісінің блокаторларымен (мысалы, панкурониум) бір мезгілде ем алатын науқастарда кортикостероидтар қолдану кезінде жедел миопатия туындаған жағдайлар сипатталған.

Метипред пен циклоспорин бір мезгілде қолданылғанда құрысулар туындаған жағдайлар болған. Осы препараттарды бір мезгілде енгізу метаболизмнің өзара тежелісін тудыратындықтан, құрысулар және басқа да жағымсыз әсерлер осы препараттардың әрқайсысын монотерапия ретінде қолданумен байланысты болуы ықтимал, оларды бірге қолданғанда жиірек туындауы мүмкін.

Айрықша нұсқаулар

Препарат қолдануды біртіндеп тоқтату керек.

Препарат артериялық гипертензиямен, іркілісті жүрек жеткіліксіздігімен, психикалық бұзылыстармен науқастарда, қант диабетімен (немесе отбасылық сыртартқыдағы диабеті), панкреатитпен, асқазан-ішек жолы ауруларымен (пептидті ойық жара, жергілікті илеит, ойық жаралы колит немесе ішек жолының басқа да қабыну аурулары немесе қан кету және тесілу қаупі жоғарылайтын дивертикулиттер) науқастарға, остеопорозбен, миастениямен, көз герпесімен, гипотиреоидизммен, сыртартқыдағы кортикостероид-индукцияланған миопатиямен, бауыр және бүйрек жеткіліксіздігімен, бауыр циррозымен, эпилепсиямен, абсцесс немесе басқа да пиогенді инфекциялармен, глаукомамен науқастарға, тромбофлебитке бейім пациенттерге сақтықпен және дәрігерлік бақылаумен қолданылуы тиіс. Таяуда миокард инфарктісін бастан өткерген пациенттерге препаратты тағайындау кезінде сақ болу қажет.

Глюкокортикоидтар ауыру синдромының азаюын туындатады, сондықтан олар асқазан-ішек жолы асқынуларының диагностикасын қиындатып, сондай-ақ гиперпаратиреоидизмнің жасырын кезеңін бүркемелеуі мүмкін.

Метипред салицилаттардың және басқа да қабынуға қарсы стероидты емес препараттардың ульцерогенді әсерін күшейтуі мүмкін.

Қан ұюының бұзылуы бар пациенттер дәрігерлік бақылауда болуы тиіс. Метипред пен антикоагулянттар бірге қолданғанда асқазанның ойық жаралану және қан кету қаупін арттырады. Глюкокортикоидтар антикоагулянттар әсерін де азайтуы мүмкін. Антикоагулянттарды дозалау режимі протромбин уақытын, атап айтқанда: халықаралық қалыптасқан индексті (ХҚИ) бақылаумен міндетті түрде қатар жүруі тиіс.

Метипред, басқа да глюкокортикоидтар сияқты, инфекциялық аурулардың өршуіне ықпал етуі мүмкін. Туберкулез қайталануының және желшешек пен белдемелі герпестің асқыну қаупі бар.

Иммуносупрессия индукциясы кезеңінің ішінде үлкен дозаларда жүйелі қолдануға арналған кортикостероидтар қабылдайтын пациенттерге тірі вакциналар қолдануға болмайды. Вакциналардың басқа түрлеріне емдік реакциясы да әлсіреуі мүмкін. Вакцинацияға дейін және одан кейін 8 апта бойы, БЦЖ екпесінен кейінгі лимфаденитте, иммунитет тапшылығы жағдайларында, соның ішінде ЖИТС немесе АИТВ инфекциясын жұқтырғанда абайлап қолдану керек.

Метипредпен ұзақ уақыт емдегенде остеопорозы немесе оны дамытатын қауіп факторлары бар науқастарға бифосфонаттар тағайындау мәселесін қарастыру қажет. Остеопороздың қауіп факторлары 65 жастан асқандар, сыртартқыдағы немесе отбасылық сыртартқыдағы жиі сынулар, ерте менопауза (45 жасқа дейінгі), менопауза алдындағы аменорея және шағын дене салмағы болып табылады. Остеопороздың даму қаупін Метипред дозасын реттеп, оны өте төмен емдік деңгейге дейін төмендету арқылы азайта түсуге болады.

Глюкокортикоидтарды ұзақ уақыт қабылдау гипофизарлы-бүйрек үсті безі жүйесін бәсеңдетеді, бұл кортикоадреналдық жауаптың салдарлы жеткіліксіздігінің дамуын туындатады, ол әртүрлі жағдайларда, мысалы, жедел жарақаттануларда, ауруларда немесе хирургиялық араласуда аурулардың өршуіне және асқынулардың дамуына әкелуі мүмкін. Метипредтің жоғары дозалары атап көрсетілген асқынулардың даму қаупін едәуір төмендетеді.

Жағымсыз әсерлерін азайта түсу үшін Метипредтің толық тәуліктік дозасын кортизолды эндогендік өндірудің циркадты ырғағына сәйкес таңертең қабылдау керек.

Гипотиреоз немесе бауырдың ауыр ауруларына шалдыққан науқастарға Метипред дозасын азайту керек.

Егде жастағы пациенттерге препарат, жағымсыз әсерлерінің (пептидті ойық жара, остеопороз және терінің ойық жаралануы) жоғары даму қаупіне орай, сақтықпен тағайындалуы тиіс.

Глюкокортикоидтар ұзақ уақыт қолданылғанда тоқтату синдромын және, өлімге ұшырауды қоса, күрделі асқынуларды болдырмау үшін емді бірнеше апта ішінде біртіндеп тоқтату керек. Ұзақ мерзімді ем жүктілік жағдайында да күрт тоқтатылмауы тиіс.

Препарат құрамында лактоза моногидраты бар, оны лактозаны көтере алмаушылығы бар науқастар ескеру керек.

Жүктілік және лактация кезеңі

Препарат плацента арқылы өтеді және бала емізу кезеңінде сүтке бөлінеді.

Жүктілік кезінде ана үшін Метипредпен емнің пайдасы мен ұрыққа төнетін әлеуетті қаупін мұқият саралау қажет. Жүктілік кезінде ұзақ уақыт қолдану ұрық өсуінің бұзылуын туындатады. Ұрықта бүйрек үсті бездерінің қыртысы атрофиясының даму қауіптілігі болады, бұл жаңа туған нәрестеде орын басу емінің жүргізілуін талап етуі мүмкін. Глюкокортикоидтар іштен өлі туу қаупін де арттыруы мүмкін.

Метипредпен ұзаққа созылатын жүйелі ем кезінде бала емізбеу қажет.

Педиатрияда пайдалану

Балаларда қабылдағанда доза мен емдеу ұзақтығын дәрігер жас шамасына және аурудың өту ауырлығына қарай әркімге жеке белгілейді.

Ұзақ уақыт қабылдағанда балаларда өсудің баяулауы және жыныстық даму кідірісі болуы мүмкін.

Дәрілік заттың көлік құралдарын және механизмдерді басқару қабілетіне әсер ету ерекшеліктері

Препараттың жағымсыз әсерлерін (көңіл-күй, психика бұзылуының туындау қаупі, құрысулар, бас ауыру) ескеріп, препаратты қолданғанда автокөлікті немесе басқа да аса қауіпті механизмдерді басқарудан бас тарту керек.

Артық дозалануы

Симптомдары: препарат жедел уыттануды тудырмайды. Бүйрек үсті безі супрессиясымен көрініс беретін созылмалы уыттану кезінде препараттың жағымсыз әсерлері күшеюі мүмкін.

Емі: дозаны біртіндеп азайту қажет, асқазанды шаю және белсендірілген көмір қабылдау, симптоматикалық емдеу ұсынылады.

Арнайы у қайтарғысы жоқ.

Шығарылу түрі және қаптамасы

Кездейсоқ ашылудан қорғалған, алғашқы ашылуы бақыланатын ТЖПЭ бұралатын қақпағы бар ақ түсті тығыздығы жоғары полиэтилен (ТЖПЭ) құтыларға 30 таблеткадан салады.

Медициналық қолдану жөніндегі мемлекеттік және орыс тілдерінде жазылған нұсқаулықпен бірге 1 құтыдан картон қорапқа салынады.

Сақтау шарттары

15 C-ден 25 C-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін пайдалануға болмайды

Дәріханалардан босатылу шарттары

Рецепт арқылы

Өндіруші

Орион Корпорейшн,

Орионинтие 1, 02200 Эспоо,

Финляндия

Тіркеу куәлігінің иесі

Орион Корпорейшн,

Орионинтие 1, 02200 Эспоо,

Финляндия

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы:

«ВИВА Фарм» ЖШС

2-ші Остроумов к-сі, 33, Алматы қ., ҚР

тел.: +7 (727) 383 74 63, факс: +7 (727) 383 74 56;

e-mail: PV@vivapharm.kz

 

Прикрепленные файлы

580529671477976264_ru.doc 92.5 кб
410557801477977459_kz.doc 131.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники