Линкур

• русский
• қазақша

• Скачать инструкцию медикамента

Саудалық атауы

Линкур

Халықаралық патенттелмеген атауы

Клопидогрел

Дәрілік түрі

Үлбірлі қабықпен қапталған 75 мг таблеткалар

Құрамы

Бір таблетканың құрамында

белсенді зат - 111.86 мг (75.00 мг) клопидогрел бесилаты (клопидогрелге шаққанда),

қосымша заттар: прежелатинделген жүгері крахмалы, микрокристалды целлюлоза, кросповидон, коллоидты кремнийдің қостотығы, стеарин қышқылы,

қабығы: лактоза моногидраты, гипромеллоза, титанның қостотығы (E171), триацетин, темірдің (III) қызыл тотығы (E172), карнауб балауызы

Сипаттамасы

Бір жақ бетінде "75" таңбасымен бедерленген қызғылт түсті, дөңгелек түрдегі, екі беті дөңес, үлбірлі қабықпен қапталған таблеткалар.

Фармакотерапиялық тобы

Антикоагулянттар. Тромбоциттер агрегациясын тежегіштер.

АТЖ коды B01AC04

Фармакологиялық қасиеттері

Фармакокинетикасы

Сіңірілуі және биожетімділігі жоғары, плазмадағы концентрациясы төмен, қабылдағаннан кейін 2 сағаттан соң өлшем шегіне жетпейді (0,25 мкг/л). Клопидогрел және негізгі айналымдағы метаболит қан плазмасының ақуыздарымен қайтымды байланысады (тиісінше, 98% және 94%).

Клопидогрел бауырда метаболизденеді. Негізгі метаболит – карбоксил қышқылының белсенді емес туындысы, 75 мг препараттың қайталанған дозаларын ішке қабылдағаннан кейінгі Cmax 3 мг/л-ге жуық құрайды және 1 сағаттан соң жетеді.

Клопидогрелдің белсенді метаболиті – тиол туындысы, клопидогрелдің 2-оксо-клопидогрелге тотығуы және әріқарай гидролизденуі арқылы түзіледі. Тотығу үдерісі алғашқы кезекте P450 цитохромының 3A4 және 2B6 және аз дәрежеде 1А1, 1А2 және 2С19 изоферменттерімен реттеледі. Белсенді метаболит плазмадан табылмайды.

Препараттың 50%-ы бүйрекпен, 46%-ы ішекпен (енгізгеннен кейін 120 сағат ішінде) шығарылады. Бір рет және қайталап қабылдағаннан кейін негізгі метаболиттің жартылай шығарылу кезеңі (T½) – 8 сағат.

Ауыр сипатты бүйрек аурулары бар емделушілерде (креатинин клиренсі 5-15 мл/мин), орташа ауырлықтағы бүйрек аурулары бар науқастармен (креатинин клиренсі минутына 30-дан 60 мл-ге дейін) және дені сау тұлғалармен салыстырғанда, тәулігіне 75 мг қабылдағаннан кейін плазмадағы негізгі метаболиттің концентрациясы төмен.

Бауыр циррозымен науқастарда препаратты 10 күн бойы тәуліктік 75 мг дозада қабылдау қауіпсіз және жақсы көтерімді болды.

Фармакодинамикасы

Клопидогрел метаболиттерінің біреуі тромбоциттер агрегациясының тежегіші болып табылатын әсер етуші заттың ізашары болып саналады. Клопидогрел AДФ-тың өзінің тромброцитарлық P2Y рецепторымен байланысқа түсуін және әріқарай АДФ-пен шартталған GPIIb/IIIa гликопротеин кешенінің белсенділенуін, сол арқылы тромбоциттер агрегациясын бәсеңдете отырып, іріктеп тежейді.

Препарат басқа агонистер туындатқан тромбоциттер агрегациясын азайтып, олардың босатылған АДФ-пен белсенділенуін болдырмайды. Тіршілік айналымының бойында АДФ-тың көтермелеуіне қатыссыз қалатын тромбоциттердің АДФ-рецепторларымен қайтымсыз байланысады (7 күнге жуық).

Препаратты қолданудың алғашқы күнінен тромбоциттер агрегациясының елеулі тежелуі байқалады. Тромбоциттер агрегациясын тежеуші әсер күшейеді, әрі тұрақты жай-күйге 3-7 күннен кейін жетеді. Бұл орайда агрегацияның тәуліктік 75 мг дозаның әсерімен бәсеңдеу деңгейі, орташа алғанда, 40-60% құрайды.

Тромбоциттер агрегациясы және қан кету уақыты бастапқы деңгейге емдеу аяқталғаннан кейін, орташа алғанда, 5 күннен соң оралады.

Қолданылуы

Миокард инфарктісін, ишемиялық инсультті өткерген немесе шеткергі артерияларының диагностикаланған окклюзиялық ауруы бар емделушілерде атеротромботикалық асқынулардың алдын алу.

Жедел коронарлық синдромы бар емделушілерде атеротромботикалық жағдайларды болдырмау (ацетилсалицил қышқылымен біріктіріп):

- ST сегментінің көтерілуінсіз (тұрақсыз стенокардия немесе Q тісінсіз миокард инфарктісі), тері арқылы коронарлық араласу кезінде стенттеу жүргізілген емделушілерді қоса;

- ST сегментінің көтерілуімен (жедел миокард инфарктісі) дәрі-дәрмекпен емдегенде және тромболиз жүргізу мүмкін болғанда.

Қолдану тәсілі және дозалары

Линкурды ас ішуге байланыссыз ішке қабылдау керек. Препаратты ересектерге тәулігіне 1 рет 75 мг-ден тағайындайды. Емдеуді миокард инфарктісінен кейінгі науқастарда бірнеше күннен бастап 35 күнге дейінгі, ишемиялық инсульттен кейінгі науқастарда 7 күннен 6 айға дейінгі мерзімдерде бастаған дұрыс.

ST сегментінің көтерілуінсіз жедел коронарлық синдромда (тұрақсыз стенокардия немесе Q тісінсіз миокард инфарктісі) емдеу 300 мг құрайтын жүктеме дозасын бір дүркін қабылдаудан басталуға, сосын тәулігіне 1 рет 75 мг дозаны қабылдаумен жалғастырылуға (тәулігіне 75-325 дозадағы ацетилсалицил қышқылымен қосып) тиіс. Ацетилсалицил қышқылының аса жоғары дозаларын қолдану қан кетудің үлкен қаупімен байланысты болғандықтан, осы көрсетілімде ұсынылған ацетилсалицил қышқылының дозасы 100 мг-ден аспайды.

Ең жоғары қолайлы әсер емдеудің үшінші айына қарай байқалады. Емдеу курсы – 1 жылға дейін.

ST сегментінің көтерілуімен жедел коронарлық синдромда (ST сегментінің көтерілуімен жедел миокард инфарктісі) препарат ацетилсалицил қышқылымен және тромболитиктермен біріктірілген (немесе оларсыз) жүктеме дозасын бастапқы бір дүркін қабылдаумен тәулігіне 1 рет 75 мг дозада бір дүркін тағайындалады. Біріктірілген емді белгілер білінгеннен кейін мүмкіндігінше ертерек бастап, кем дегенде, 4 апта жалғастырады.

75 жастан асқан емделушілерде Линкур препаратымен емдеу оның жүктеме дозасын қабылдамай-ақ басталуға тиіс.

Жағымсыз әсерлері

Өте жиі (>1/10)

- мұрыннан қан кетулер

Жиі (>1/100, <1/10)

- гематома

- диарея, іштің ауыруы, диспепсия, АІЖ-нан қан кетулер

- теріастылық қан құйылу

- инъекция орнында қан кетулер

Жиі емес (>1/1000, <1/100)

- тромбоцитопения, лейкопения, эозинофилия

- бас ауыруы, бас айналуы, парестезиялар, бассүйекішілік қан кетулер, оның ішінде өліммен аяқталатын

- конъюнктиваға, көзге, торқабыққа қан құйылуы

- асқазанның және 12-елі ішектің ойық жарасы, гастрит, құсу, жүрек айнуы, іш қатуы, метеоризм

- тері бөртпесі, қышыма, пурпура

- гематурия

- қан кету уақытының ұзаруы

Сирек (>1/10000, <1/1000)

- нейтропения, оның ішінде айқын білінуі

- вертиго

- ішпердесінен қан кетулер

Өте сирек (<1/10000, жекелеген хабарларды қоса)

- тромботикалық тромбоцитопениялық пурпура, анемия оның ішінде апластикалық, панцитопения, агранулоцитоз, ауыр тромбоцитопения, гранулоцитопения

- анафилактикалық реакция, қан сарысуының ауруы

- сананың шатасуы, галлюцинация, дәм сезудің бұзылуы

- ауыр қан кетулер, операциялық жарадан қан кетулер, васкулит, АҚ төмендеуі

- бронхтық түйілу, интерстициальді пневмонит, өкпеден қан кетулер, қанды қақырық

- панкреатит, колит, оның ішінде ойық жаралы немесе лимфоцитарлық, стоматит, жедел бауыр жеткіліксіздігі, гепатит, бауырдың функциональдық сынамасының бұзылуы, өліммен аяқталатын АІЖ-нан қан кетулер

- ангионевротикалық ісінулер, есекжем, эритематозды бөртпе, көптүрдегі

эритема, Стивенс-Джонсон синдромы, уытты эпидермальді некролиз, экзема, қызыл тегіс теміреткі

- гемартроз, артрит, артралгия, миалгия

- гломерулонефрит, гиперкреатининемия

- қызба.

Қолдануға болмайтын жағдайлар

- клопидогрелге немесе препараттың басқа да компоненттеріне жоғары сезімталдықта

- ауыр бауыр жеткіліксіздігінде

- жедел қан кетулерде (мысалы, пептикалық ойық жара немесе бассүейкішілік қан құйылулар)

- жүктілікте және лактация кезеңінде

- балаларға және 18 жасқа дейінгі жасөспірімдерге

Дәрілермен өзара әрекеттесуі

Ішуге арналған антикоагулянттар: Линкурды ішуге арналған антикоагулянттармен бір мезгілде қолдану ұсынылмаған, өйткені бұл қан кетуді күшейтуі мүмкін.

Клопидогрел гепариннің, тікелей емес антикоагулянттардың, қабынуға қарсы стероидты емес препараттардың агрегантқа қарсы әсерін күшейтеді, асқазан-ішек жолынан қан кетудің даму қаупін жоғарылатады.

Ацетилсалицил қышқылы (АСҚ): АСҚ Линкурмен шартталған, АДФ-пен индукцияланған тромбоциттер агрегациясының бәсеңдеуін өзгертпейді, бірақ клопидогрел АСҚ-ның коллагенмен индукцияланған тромбоциттер агрегациясына әсер етуін күшейтеді. Дегенмен де, АСҚ-ын 1 күн ішінде тәулігіне екі мәрте 500 мг-ден бір мезгілдік қабылдау Линкурды қабылдаудан болған қан кету уақытының елеулі ұзаруын туындатқан жоқ. Клопидрогрел мен ацетилсалицил қышқылының арасында қан кету қаупінің жоғарылауына апаратын фармакодинамикалық өзара әрекеттесу болуы мүмкін. Сондықтан, бұл препараттарды бір мезгілде қолдануды абайлап жүргізу керек. Бұған қарамастан, Линкур мен АСҚ бір жылға дейінгі кезеңде бірге тағайындалды.

Гепарин. Гепаринді бір мезгілде қолдану Линкур туындатқан агрегацияның бәсеңдеуіне ықпал еткен жоқ. Линкур мен гепариннің арасында фармакодинамикалық өзара әрекеттесу болуы мүмкін, ол жоғары қан кету қаупіне апарады. Сондықтан, бұл препараттарды бір мезгілде қолданғанда сақ болу қажет.

Омапразол, эзомепразол, флувоксамин, флуоксетин, моклобемид, вориконазол, флуконазол, тиклопидин, ципрофлоксацин, циметидин, карбамазепин, окскарбамазепин және хлорамфеникол: Линкурмен бірге қолдану клопидогрелдің белсенді метаболитінің дәрілік концентрациясының төмендеуіне және оның клиникалық тиімділігінің клопидогрелдің өзінің белсенді метаболитіне дейін метаболизденуіне көмектесетін CYP2С19 ферментінің бәсеңдеуіне байланысты азаюына әкеледі. Линкурды аталған препараттармен бір мезгілде қолданудан бас тарту керек.

Тромболитикалық дәрілер: жедел миокард инфарктісі бар науқастарда клиникалық мәні бар қан кетулер жиілігі тромболитикалық дәрілер мен гепаринді АСҚ-мен бірге қолданған кезде байқалған жағдайға ұқсас.

Протон помпасының тежегіштері: протон помпасының тежегіштері класының ішінде CYP2С19 бәсеңдеуінің айырмашылығына қарамастан, клопидогрел мен осы кластың барлық мүшелерінің арасында өзара әрекеттесу болуы мүмкін. Протон помпасының тежегіштері мен Линкурды бір мезгілде қолданудан қашық болған дұрыс.

IIb/IIIa гликопротеинінің тежегіштерін Линкур препаратымен бірге тағайындау қан кету дамуының жоғары қаупі бар емделушілерде сақ болуды талап етеді (жарақаттануда және хирургиялық араласуларда немесе басқа патологиялық жай-күйлерде).

Линкур препаратын атенололмен, нифедипинмен, фенобарбиталмен, циметидинмен, эстрогендермен, дигоксинмен, теофиллинмен, фенитоинмен, толбутамидпен және антацидтік дәрілермен қолданғанда клиникалық мәні бар фармакодинамикалық өзара әрекеттесулер болған жоқ.

Несеп айдағыштар, β-бөгегіштер, АПЭ тежегіштері, кальций антагонистері, холестеринді төмендететін дәрілер, коронарлық вазодилататорлар,диабетке қарсы дәрілер (соның ішінде инсулин), эпилепсияға қарсы дәрілер және GPIIb/IIIa антагонистері: Линкурмен біріктіріп қабылдау клиникалық тұрғыда елеулі ұнамсыз өзара әрекеттесулерді туындатпайды.

Айрықша нұсқаулар

Линкур препаратымен емдегенде, әсіресе емдеудің алғашқы аптасы кезінде және/немесе инвазивті кардиологиялық емшаралардан/хирургиялық араласулардан кейін емделушілерге қан кетудің, соның ішінде жасырын түрінің нышандарын жоққа шығару тұрғысында мұқият қадағалау жүргізу қажет. Емдеу барысында қан кетудің пайда болуына күдік тудыратын клиникалық белгілер пайда болған жағдайда қан кетудің даму қаупімен және гематологиялық ұнамсыз әсерлермен байланысты шұғыл түрде жалпы қан талдауын жасау, ішінара белсенділенген тромбопластин уақытын, тромбоциттер мөлшерін, тромбоциттердің қызметтік белсенділігінің көрсеткіштерін анықтап, басқа қажетті зерттеулерді жүргізген жөн.

Линкур препараты, басқа антитромбоцитарлық препараттар сияқты, жарақаттанулармен, хирургиялық араласулармен немесе басқа патологиялық ахуалдармен байланысты қан кету дамуының жоғары қаупі бар науқастарда, сондай-ақ ацетилсалицил қышқылын, қабынуға қарсы стероидтық емес препараттарды, соның ішінде ЦОГ-2 тежегіштерін, гепарин немесе IIb/IIIa гликопротеинінің тежегіштерін алатын науқастарда сақтықпен қолдану керек.

Линкур препаратын варфаринмен бірге қолдану қан кету қарқынын күшейтуі мүмкін, сондықтан ерекше сирек клиникалық оқиғаларды қоспағанда (сол жақ қарыншада флотирлейтін тромбтың болуы, жыпылықтағыш аритмиясы бар емделушілердегі стенттеу) Линкур препараты мен варфаринді бірге қолдану ұсынылмайды.

Линкур препараты қан кету уақытын ұзартады және қан кету дамуына бейім аурулары (әсіресе, асқазан-ішектік және көзішілік) бар науқастарда абайлап қолданылуға тиіс.

Линкур препаратын қолданғаннан кейін (кейде тіпті ұзаққа созылмаған) неврологиялық бұзылыстармен, бүйрек қызметінің бұзылуымен және қызбамен қатар жүрген тромбоцитопениямен және микроангиопатикалық гемолитикалық анемиямен сипатталған тромботикалық тромбоцитопениялық пурпураның (ТТП) даму жағдайлары байқалды. ТТП өмірге зор қауіп төндіретін ахуал болып саналып, плазмаферезді қоса, дереу емдеуді талап етеді. Емдеу кезеңінде бауырдың қызмет атқару белсенділігін бақылауға алу қажет. Бауырдың ауыр зақымдануы кезінде геморрагиялық диатездің даму қаупі барын есте ұстау керек.

Клопидогрелді 7 күннен аз уақытта болған жедел инсульт кезінде қабылдау ұсынылмайды (өйткені, оны осы жай-күй кезінде қолдану жөніндегі деректер жоқ).

Линкур құрамында лактоза бар. Сирек кездесетін тұқым қуалаған галактозаны көтере алмаудың, Лапп лактазасының тапшылығы және глюкоза мен галактоза мальабсорбциясының синдромы бар науқастарда бұл препаратты қабылдамау керек.

Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Емделу кезеңінде автокөлікті жүргізгенде және жоғары зейін шоғырландыруды және психомоторлық реакциялар жылдамдығын талап ететін басқа қауіптілігі зор қызмет түрлерімен айналысқанда сақтық шараларын қадағалау қажет.

Артық дозаланғанда

Симптомдары: клопидогрелдің артық дозалануы қан кету уақытының ұзаруына және асқыну салдарына әкелуі мүмкін.

Емдеу: клопидогрелдің у қайтарғысы анықталмаған. Егер қан кету уақытының ұзарғандығын жылдам түзету қажет болса, тромбоцитарлық масса құю ұсынылады.

Шығарылу түрі және қаптамасы

ОПА/Ал/ПВХ және алюминий фольгадан жасалған пішінді ұяшықты қаптамаға 14 таблеткадан салынған.

1 немесе 2 пішінді ұяшықты қаптамадан мемлекеттік және орыс тілдерінде жазылған медицинада қолданылуы жөніндегі нұсқаулықпен бірге картоннан жасалған пәшкеге салынған.

Сақтау шарттары

Түпнұсқалық қаптамасында, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін препараты қолдануға болмайды.

Дәріханалардан босатылу шарттары

Рецепт арқылы

Өндіруші

Специфар АҚ, Греция

Тіркеу куәлігінің иесі

«Химфарм» АҚ, Қазақстан

Тұтынушылардан өнім (тауар) сапасы туралы түскен шағымдарды Қазақстан Республикасы аумағында қабылдайтын ұйымның және мекенжайы:

«Химфарм» АҚ, Шымкент қаласы, ҚАЗАҚСТАН РЕСПУБЛИКАСЫ,

Рашидов көшесі, н/ж, т/ф: 560882

Телефон: 7252 (561342)

Факс: 7252 (561342)

Электронды поштасы: standart@santo.kz