Лизиноприл - КРКА (20 мг)

МНН: Лизиноприл
Производитель: КРКА-Фарма, д.о.о.
Анатомо-терапевтическо-химическая классификация: Lisinopril
Номер регистрации в РК: № РК-ЛС-5№121783
Период регистрации: 30.10.2015 - 30.10.2020

Инструкция

Саудалық атауы

Лизиноприл – КРКА

Халықаралық патенттелмеген атауы

Лизиноприл

Дәрілік түрі

Таблеткалар 5 мг, 10 мг, 20 мг

Құрамы

Бір таблетканың құрамында

5 мг доза үшін:

белсенді зат - лизиноприл дигидраты 5,44 мг

(5 мг лизиноприлге баламалы),

қосымша заттар: маннитол, кальций фосфатының дигидраты, желатинделген крахмал, натрий кроскармеллозасы, магний стеараты

10 мг доза үшін

белсенді зат - лизиноприл дигидраты 10,89 мг

(10 мг лизиноприлге баламалы),

қосымша заттар: маннитол, кальций фосфатының дигидраты, желатинделген крахмал, натрий кроскармеллозасы, пигмент 1 қоспасы (желатинделген крахмал, темірдің қызыл тотығы (Е172), темірдің қара тотығы (Е172), темірдің сары тотығы (Е172)), магний стеараты

20 мг доза үшін

белсенді зат - лизиноприл дигидраты 21,78 мг

(20 мг лизиноприлге баламалы),

қосымша заттар: маннитол, кальций фосфатының дигидраты, желатинделген крахмал, натрий кроскармеллозасы, пигмент 2 қоспасы (желатинделген крахмал, темірдің қызыл тотығы (Е172), темірдің қара тотығы (Е172), темірдің сары тотығы (Е172)), магний стеараты

Сипаттамасы

Дөңгелек пішінді, ақ түсті, жалпақ, екі жақ бетінде сызығы бар (5 мг доза үшін) таблеткалар

Дөңгелек пішінді, ақшыл-қызғылт түсті, екі жағы дөңес, бір жақ бетінде сызығы бар (10 мг доза үшін) таблеткалар

Дөңгелек пішінді, қызғылт түсті, екі жағы дөңес, бір жақ бетінде сызығы бар (20 мг доза үшін) таблеткалар

Фармакотерапиялық тобы

Ренин-ангиотензин жүйесіне әсер ететін препараттар. Ангиотензин- конвертациялаушы фермент (АКФ) тежегіштері. Лизиноприл.

АТХ коды C09AA03

Фармакологиялық қасиеттері

Фармакокинетикасы

Лизиноприл – құрамында сульфгидрил жоқ, ішу арқылы қабылданатын белсенді АКФ тежегіші.

Лизиноприлді ішке қабылдағаннан кейін қан плазмасындағы ең жоғары концентрациясына шамамен 7 сағат ішінде жетеді, жедел миокард инфарктісі бар пациенттерде лизиноприлдің қан сарысуындағы ең жоғары концентрациясына жету уақытының елеусіз іркілу үдерісі байқалады. Лизиноприл сіңуінің орташа көлемі зерттелетін 5–80 мг доза диапазонында 6–60% жекеше аралық ауытқуы бар шамамен 25% құрайды.

Жүрек жеткіліксіздігі бар пациенттерде абсолютті биожетімділігі шамамен 16%-ға төмендейді. Тамақ ішу лизиноприл сіңуіне әсер етпейді.

Таралуы

Лизиноприл қан айналымында жүрген ангиотензин-конвертациялаушы ферменттен (АКФ) басқа қан плазмасындағы ақуыздарымен байланыспайды.

Лизиноприл плацента арқылы өтеді, гематоэнцефалдық бөгет арқылы нашар өтеді.

Шығарылуы

Лизиноприл несеппен өзгермеген түрде толық шығарылады. Дозаны көп рет қабылдағаннан кейін лизиноприлдің тиімді жартылай шығарылу кезеңі - 12,6 сағат құрайды. Дені сау еріктілерде лизиноприл клиренсі шамамен 50 мл/мин. құрайды. Сарысудағы концентрация төмендеуі ұзақ әсер ететін ақырғы фазада болады, ол препарат жинақталуына әсер етпейді. Бұл ақырғы фаза, АКФ қаныққан байланысуда болуы мүмкін, және дозаға пропорционалды емес.

Циррозы бар пациенттердегі бауыр функциясының бұзылуы лизиноприлдің сіңуі азаюына алып келді (шамамен 30%, несеппен шығарылуында анықталған), бірақ бауыры сау пациенттермен салыстырғанда клиренсі төмендеуінен экспозициясы артқан (шамамен 50%).

Бүйрек функциясының бұзылуы бар пациенттерде лизиноприл шығарылуы азаяды, бірақ бұндай азаю тек шумақтық сүзіліс жылдамдығы 30 мл/мин төмен болғанда ғана клиникалық маңызды болады. Жеңіл және орташа дәрежелі бүйрек функциясының бұзылуында (КК 30–80 мл/мин), AUC («концентрация-уақыт» қисығы астындағы аудан) тек 13% ұлғайған, ал бүйрек функциясының ауыр бұзылуында (КК 5–30 мл/мин) AUC орташа артуы 4,5 есе болғаны анықталды.

Лизиноприл диализ көмегімен шығарылуы мүмкін. Диализ клиренсімен 40–55 мл/мин 4 сағаттық гемодиализ кезінде плазмадағы лизиноприл концентрациясы орташа 60% төмендеген.

Жүрек жеткіліксіздігі бар пациенттерде жүрегі сау пациенттермен салыстырғанда лизиноприлдің жоғарырақ экспозициясы (AUC орташа 125% ұлғайған) анықталды, бірақ лизиноприлдің несеппен шығарылуының арқасында дені саулармен салыстырғанда сіңуінің шамамен 16%-ға төмендеуі жүреді.

Егде жастағы пациенттерде жас пациенттермен салыстырғанда қандағы жоғарырақ деңгейі және плазмадағы AUC жоғарырақ мәні (ұлғаюы шамамен 60%) анықталады

Фармакодинамикасы

Лизиноприл - КРКА - пептидилдипептидаза тежегіші. Ол ангиотензин I-дің тамыр тарылтатын пептид - ангиотензин II-ге қайта түзілуін катализдейтін ангиотензин-конвертациялаушы ферментті (АКФ) тежейді. Ангиотензин II сондай-ақ альдостерон сөлінісін бүйрек үсті безінің қыртыстық затымен стимуляциялайды. АКФ тежеу ангиотензин II концентрациясының төмендеуіне алып келеді, бұл өз кезегінде тамыр тарылтатын белсенділіктің төмендеуіне және альдостерон секрециясы азаюына алып келеді. Альдостерон секрециясының азаюы қан сарысуындағы калий концентрациясының жоғарылауына алып келуі мүмкін.

Артериялық қысымның лизиноприлмен төмендеуінің механизмі бірінші кезекте ренин-ангиотензин-альдостеронды жүйені бәсеңдетумен жүретіндіктен лизиноприл гипертензияны тіпті ренин төмен гипертензиялы пациенттерде де емдейді. АКФ брадикинин деңгейін төмендететін киназа II –ферментке бара бар. Лизиноприлдің емдік әсерінде тамырды қатты кеңейтетін пептид – брадикинин деңгейінің жоғарылығының қаншалықты маңызды екені анықталмаған.

Гипергликемиялы пациенттерде лизиноприл эндотелийдің шумақтық функциясының бұзылуы қалыпқа келуіне ықпал етеді.

Қолданылуы

  • артериялық гипертензияда (монотерапия түрінде немесе басқа гипертензияға қарсы дәрілермен біріктірілімде), оның ішінде вазоренальді артериялық гипертензияда

  • іркілісті жүрек жеткіліксіздігінде (жүрек гликозидтерін және/немесе диуретиктерді қабылдайтын пациенттерді емдеу үшін біріктірілген емде).

  • оларды демеу үшін сол жақ қарынша дисфункциясының және жүрек жеткіліксіздігінің профилактикасында, тірі қалу қабілетінің коэффициентін жоғарылату мақсатында тұрақты гемодинамикалы жедел миокард инфарктісінің алғашқы 24 сағаты ішінде

  • диабеттік нефропатия (1 типті қант диабеті бар және артериялық қысымы қалыпты, сондай-ақ артериялық гипертензиясы бар 2 типті қант диабеті бар пациенттерде альбуминурияны төмендету үшін).

Қолдану тәсілі және дозалары

Лизиноприл - КРКА ішке бір рет тәуліктік дозада қабылдайды. Күніне бір рет қабылданатын басқа да дәрілер сияқты, Лизиноприл - КРКА күн сайын шамамен бір ғана уақытта қолдану ұсынылады. Тамақ ішу Лизиноприл – КРКА таблеткаларының сіңуіне әсер етпейді. Дозаны пациенттің жай-күйіне және артериялық қысым көрсеткіштеріне қарай жеке таңдау керек

Бастапқы артериялық гипертензия

Артериялық гипертензиясы бар гипертензияға қарсы басқа препараттар қабылдамайтын пациенттерде стандартты ұсынылатын бастапқы доза 10 мг құрайды. Стандартты тиімді тәулігіне бір рет қабылдайтын демеуші доза - 20 мг. Артериялық қысым көрсеткіштеріне байланысты дозаны күніне 40 мг дейін арттыруға болады. Жеткіліксіз клиникалық әсерде препаратты басқа гипотензиялық дәрілермен біріктіру мүмкіндігі бар.

Дозаны арттырғанда қажетті гипертензияға қарсы тиімділікке әдетте ем басталғаннан кейін 2-4 аптадан соң қол жететінін ескеру керек.

Ренин-ангиотензин-альдостеронды жүйенің жоғары белсенділігіне байланысты жай-күймен бірге жүретін реноваскулярлық гипертензия немесе артериялық гипертензия

Ұсынылатын бастапқы доза күніне 2,5 мг - 5 мг құрайды, артериялық қысымға, бүйрек функциясына, қан сарысуындағы калий деңгейіне қатаң бақылау керек. Демеуші доза артериялық қысымның параметрлеріне тәуелді, және олардың тағайындалуы осындай тұрақты мониторингпен бірге жүруі тиіс.

Диуретиктер қабылдайтын пациенттер

Симптоматикалық гипотензия Лизиноприл – КРКА препаратымен ем бастағаннан кейін байқалуы мүмкін. Бұл диуретиктер қабылдайтын пациенттер үшін ықтималдау. Сондықтан мұндай пациенттерге жасуша аралық сұйықтық және/немесе тұздар көлемінің төмендеуі ықтималдығынан препаратты сақтықпен қолдану ұсынылады. Мүмкіндігінше, лизиноприлмен ем бастағанға дейін 2-3 күн бұрын диуретиктерді қабылдауды тоқтату керек.

Артериялық гипертензиясы бар диуретиктерді тоқтатуға болмайтын науқастарда Лизиноприл – КРКА препаратымен емдеуді 5 мг дозадан бастау керек. Бауыр функциясын және қан сарысуындағы калий деңгейін бақылау ұсынылады. Лизиноприл – КРКА кейінгі дозаларын артериялық қысымның көрсеткіштеріне сәйкес таңдау керек. Қажет болғанда диуретиктермен емді жаңғыртуға болады.

Жүрек жеткіліксіздігі

Жүрек жеткіліксіздігі симптоматикалары бар пациенттерде Лизиноприл – КРКА диуретиктермен қосымша ем ретінде және қажет болғанда оймақгүл препараттарымен немесе бета-блокаторларымен қолданады.

Лизиноприл – КРКА қабылдауды емге жауапты анықтау үшін медициналық бақылаумен күніне бір рет 2,5 мг дозада бастауға болады (артериялық қысымға әсері). Дозаны пациенттер реакциясына қарай әдеттегі демеуші дозаға дейін біртіндеп жоғарылату керек (5-20 мг). Дозаны бұлай түзетуді екі-төрт апта ішінде, немесе клиникалық көрсетілімдер болғанда жылдамырақ жүргізуге болады.

Доза түзету әр пациенттің жеке клиникалық реакциясына негізделуі тиіс.

Артериялық қысым, бүйрек функциясы, натрий және калий концентрациясының тұрақты мониторингі бұндай пациенттер үшін әдеттегі медициналық практиканың бір бөлігі болуы тиіс.

Жедел миокард инфарктісі

Қажет болғанда пациенттер тромболитиктермен, ацетилсалицил қышқылымен және бета-блокаторлармен ұсынылатын стандартты емді өтуі тиіс. Глицерилтринитратты Лизиноприл - КРКА ішке қабылдаумен бір уақытта вена ішіне немесе тері астына енгізуге болады

Лизиноприл – КРКА емін симптомдар пайда болған сәттен бастап 24 сағат ішінде бастауға болады.

Егер систолалық артериялық қысым көрсеткіштері 100 мм сын. бағ. төменді құраса емді бастауға болмайды. Лизиноприл – КРКА бастапқы дозасы ішке 5 мг, содан кейін 24 сағаттан соң 5 мг, 48 сағаттан соң 10 мг және одан әрі қарай күніне бір рет 10 мг құрайды. Систолалық АҚ төмен (120 мм сын. бағ. немесе одан аз) пациенттерге ем уақытында немесе инфарктан кейінгі алғашқы 3 күн ішінде - 2,5 мг төмендеу дозасын тағайындау керек.

Гипотензия дамыған жағдайда (систолалық артериялық қысым аз немесе 100 мм сын. бағ. тең) күніне бір рет 5 мг демеуші доза тағайындауға болады, қажет болғанда дозаны 2,5 мг дейін біртіндеп азайту керек. Ұзақ уақытқа созылған гипотензия жағдайында (90 мм сын. бағ. төмен систолалық артериялық қысым 1 сағаттан астам сақталады) Лизиноприл – КРКА тоқтату керек. Ең жоғары дозасы күніне бір рет - 10 мг Лизиноприл – КРКА.

Емді 6 апта бойы жалғастыруға болады, содан кейін пациенттің жай -күйіне қайта бағалау керек. Жүрек жеткіліксіздігі симптомдары бар пациенттерге Лизиноприл – КРКА емін одан әрі жалғастыру керек.

Диабеттік нефропатия

Инсулинге тәуелді емес пациенттерде ұсынылатын стандартты бастапқы доза күніне бір рет 10 мг құрайды.

Артериялық қысымның оңтайлы бақылауына қол жеткізу үшін оны күніне бір рет 20 мг дейін арттыру керек.

Бүйрек жеткіліксіздігі бар науқастарда доза таңдау

Бүйрек жеткіліксіздігі бар науқастарды дозалау кестеде көрсетілгендей креатинин клиренсіне негізделуі тиіс:

Креатинин клиренсі, мл/мин

Бастапқы доза, мг/сут

10 мл/мин төмен (диализдегі пациенттерде қоса)

2,5 мг*

10-30 мл/мин

2,5-5 мг

31-80 мл/мин

5-10 мг

*Дозаны және/немесе қабылдау жиілігін артериялық қысымның көрсеткіштеріне қарай есептеу керек.

Дозаны артериялық қысым қалыпқа түскенге дейін немесе тәулігіне ең жоғары доза – 40 мг дейін жеткенше жоғарылата беруге болады. Егде жастағы пациенттерге доза таңдау талап етілмейді.

Жағымсыз әсерлері

Лизиноприлмен және басқа да АКФ тежегіштерімен емдеген уақытта байқалған келесі жағымсыз әсерлер туралы хабарланды, олардың біліну жиілігі төмендегі критерийлерді пайдаланумен бағаланды: өте жиі (≥ 1/10), жиі (≥ 1/100 - <1/10 дейін), жиі емес (≥ 1/1000 - <1/100 дейін), сирек (≥ 1/10000 - <1/1000 дейін), өте сирек (<1/10000), белгісіз (қолда бар деректер бойынша бағалау мүмкін емес).

Қан және лимфа жүйесінің бұзылуы

сирек: гемоглобин төмендеуі, гематокрит азаюы

өте сирек: сүйек кемігінің депрессиясы, анемия, тромбоцитопения, лейкопения, нейтропения, агранулоцитоз, гемолиздік анемия, лимфаденопатия, аутоиммундық бұзылулар

Зат алмасуының және қоректену бұзылуы

өте сирек: гипогликемия

Жүйке жүйесі және психикалық бұзылыстар

жиі: бас айналуы, бас ауыруы

жиі емес: көңіл-күй өзгерісі, парестезиялар, бас айналуы, дәм бұзылуы, ұйқы бұзылуы, елестеулер

сирек: сананың шатасуы, иіс сезудің жиі бұзылуы

белгісіз: депрессия симптомдары, естен танулар

Жүрек-қан тамыр бұзылулары

жиі : ортостатикалық әсерлері (гипотензияны қоса)

жиі емес: миокард инфарктісі немесе инсульт, қауіптің жоғары деңгейі бар пациенттердегі шамадан тыс гипотензияға қатысты салдарлы болуы мүмкін; жиілеген жүрек қағуы, тахикардия, Рейно синдромы

Тыныс алу ағзаларының, кеуде және көкірек ортасы ағзаларының бұзылуы

жиі: жөтел

жиі емес: ринит

өте сирек: бронх түйілуі, синусит, аллергиялық альвеолит/эозинофильді пневмония

Асқазан-ішек бұзылыстары

жиі : диарея, құсу

сирек: жүрек айнуы, іштің ауыруы және асқазан бұзылыстары

сирек: ауыздың құрғауы

өте сирек: панкреатит, ішек ангиодистрофиясы, гепатоцеллюлярлық немесе холестаздық гепатит, сарғаю және бауыр жеткіліксіздігі

Тері және тері асты шелінің аурулары

сирек: бөртпе, қышыну

сирек: есекжем, алопеция, псориаз, аса жоғары сезімиталдық/ ангионевроздық ісіну: беттің, аяқ-қолдың, еріннің, тілдің, дауыс саңылауының және/немесе көмекейдің ангионевроздық ісінуі

өте сирек: тершеңдік, сулы бөртпелер, уытты эпидермальді некролиз, Стивенс-Джонсон синдромы, мультиформалы эритема, терінің жалған лимфоцитомасы

Ішінде төмендегілердің біреуі немесе бірнешеуі болатын симптомдар кешені туралы хабарланды: қызба, васкулит, миалгия, артралгия/артрит, оң антинуклеарлық антидене (ОАА), эритроциттер шөгуінің жоғары жылдамдығы (ЭШЖ), эозинофилия және лейкоцитоз, бөртпе, фотосенсибилизация, сондай-ақ басқа да дерматологиялық белгілері туындауы мүмкін.

Бүйрек және несеп шығару бұзылуы

жиі : бүйрек функциясы бұзылуы

сирек: уремия, жедел бүйрек жеткіліксіздігі

өте сирек: олигурия/анурия

Эндокриндік бұзылулар

сирек: Пархон синдромы (диурезге қарсы гормон секрециясының адекватты емес синдромы (SIADH))

Ұрпақ өрбіту жүйесінің және сүт безінің бұзылулары

сирек: импотенция

сирек: гинекомастия.

Жалпы бұзылулар және енгізу орнындағы бұзылулар

сирек: қажығыштық, астения

Зертханалық зерттеулер

Жиі емес: қандағы мочевина ұлғаюы, қан сарысуындағы креатинин артуы, бауыр ферменттері белсенділігінің жоғарылауы,

гиперкалиемия

сирек: сарысулық билирубин жоғарылауы, гипонатриемия.

Қауіпсіздігіне жүргізілген клиникалық зерттеулердің деректері бойынша лизиноприл әдетте артериялық гипертензиясы бар педиатриялық науқастарда жақсы жағымды, сондай-ақ бұл жастағы топтағы қауіпсіздік бейіні ересектердегі осындаймен салыстырарлық болатындығын айғақтайды.

Қолдануға болмайтын жағдайлар

  • белсенді заттарына немесе қосымша заттарының кез келгеніне немесе басқа да ангиотензин-конвертациялаушы фермент (АКФ) тежегіштеріне аса жоғары сезімталдық

  • ангионевроздық ісіну, АКФ тежегіштерін қолдануға байланысты анамнезінде тұқым қуалайтын немесе идиопатиялық Квинке ісінуі

  • жүктіліктің екінші және үшінші триместрлері

  • Лизиноприл-КРКА препаратын құрамында алискирен бар препараттармен бір мезгілде қолдану қант диабеті немесе бүйрек функциясы бұзылуы бар пациенттерге қарсы көрсетілімде (шумақтық сүзіліс жылдамдығы < 60 мл/мин/1,73 м2).

Дәрілермен өзара әрекеттесуі

Гипертензияға қарсы препараттар

Лизиноприл – КРКА препаратын және басқа да гипертензияға қарсы дәрілерді (мысалы, нитроглицерин және басқа нитраттар немесе басқа да тамыр кеңейтетін дәрілер) бір мезгілде қолдану артериялық қысымның одан әрі төмендеуіне әкелуі мүмкін.

Клиникалық сынақтардың деректері АКФ тежегіштерін, ангиотензин II рецепторлары блокаторларын немесе алискиренді біріктірілімде пайдаланылған ренин-ангиотензин-альдостеронды жүйесінің (РААЖ) қосарлы блокадасының әсер етуші агенттің - РААЖ біреуін ғана пайдаланумен салыстырғанда гипотензия, гиперкалиемия және бүйрек функциясы төмендеуі сияқты (оның ішінде жедел бүйрек жеткіліксіздігі) жағымсыз әсерлерінің жиілігі жоғарырақ болуымен байланыстылығын көрсетті.

Диуретиктер

Лизиноприл – КРКА қабылдайтын пациенттерді емдегенде диуретиктерді қосу әдетте гипотензиялық әсерін күшейтеді.

Диуретиктер қабылдайтын, әсіресе препарат қабылдауды жаңа ғана бастаған пациенттер Лизиноприл – КРКА емін бастағаннан кейін кейде артериялық қысымның шамадан тыс төмендеуін өткеруі мүмкін. Лизиноприл – КРКА қабылдау нәтижесінде симптоматикалық гипотензиясы пайда болу ықтималдығын, егер Лизиноприл – КРКА емін бастағанға дейін диуретик қабылдауды тоқтатса, төмендетуге болады.

Калий қоспалары, калий жинақтаушы диуретиктер немесе құрамында калий бар тұз алмастырғыштары.

Клиникалық сынақтарда қан плазмасындағы калий деңгейі әдетте қалып шегінде қалса да кейбір пациенттерде гиперкалиемия бақыланды. Гиперкалиемия дамуына ықпал ететін қауіп факторы бүйрек жеткіліксіздігі, қант диабеті және калий жинақтаушы диуретиктерді (мысалы спиронолактон, триамтерен немесе амилоридті), құрамында калий бар тағамдық қоспаларды немесе құрамында калий бар тұз алмастырғыштарын бір мезгілде қолдану болып табылады. Калий қоспаларын, калий жинақтаушы диуретиктерді немесе құрамында калий бар тұз алмастырғыштарын, әсіресе бүйрек функциясы бұзылуы бар пациенттерде пайдалану қан плазмасындағы калий деңгейінің елеулі ұлғаюына әкелуі мүмкін. Егер Лизиноприл-КРКА калийуретикалық диуретиктермен қабылданса, гипокалиемия әсері жұмсартылуы мүмкін.

Литий

Литий және АКФ тежегіштерін бір мезгілде қолданғанда қан плазмасындағы литий концентрациясының қайтымды ұлғаюы және уыттылығы артқаны анықталды. Тиазидті диуретиктерді АКФ тежегіштерімен бір мезгілге тағайындағанда литий уыттылығы қаупі ұлғаюы және литий уыттылығының осыған дейін артқан қаупін күшейтуі мүмкін. Лизиноприл – КРКА және литийді бір мезгілде қолдану ұсынылмайды, бірақ оларды бірге қолдану қажет болса қан плазмасындағы литий деңгейінің мұқият мониторингін жүргізу керек.

Қабынуға қарсы стероидты емес дәрілік препараттар (ҚҚСП), ацетилсалицил қышқылын қоса 3 г / тәулік

АКФ тежегіштерін қабынуға қарсы стероидты емес препараттармен (мысалы, ацетилсалицил қышқылы дозалаудың қабынуға қарсы сызбасында, ЦОГ-2 тежегіштері және селективті емес ҚҚСП) бір мезгілде тағайындағанда гипертензияға қарсы әсері азаюы мүмкін. АКФ тежегіштерін және ҚҚСП бір мезгілде қолдану әсіресе бүйрек функциясы бұрыннан бұзылуы бар пациенттерде жедел бүйрек жеткіліксіздігі даму мүмкіндігін қоса, және қан плазмасындағы калий деңгейінің жоғарылауына, бүйрек функциясы нашарлауының қаупі жоғарылауына әкелуі мүмкін. Бұл әсер әдетте қайтымды. Бұл біріктірілімді әсіресе егде пациенттерде сақтықпен қолдану керек. Пациенттердің жеткілікті гидратациясын қамтамасыз ету керек, сондай-ақ бірге ем басталғаннан кейін және мезгіл-мезгіл ем жалғастырылғанда бүйрек функциясының мониторингін қамтамасыз ету керек.

Құрамында алтын бар препараттар

Нитритоидты реакциялар басталғаны туралы (өте ауыр болуы мүмкін, бет терісінің гиперемиясын, жүрек айнуын, бас айналуын және гипотензияны қоса, қан тамырларының кеңею симптомдары) көбіне бір мезгілде АКФ тежегіштерін қабылдайтын алтын инъекцияларымен (натрий ауротиомалатпен) ем алып жүрген пациенттерде хабарланды.

Үшциклды антидепрессанттар/нейролептиктер / анестетиктер

Белгілі бір анестетиктерді, үшциклды антидепрессанттарды және психозға қарсы дәрілерді АКФ тежегіштерімен бір мезгілде қолдану артериялық қысымның одан әрі қарай төмендеуіне әкелуі мүмкін.

Симпатомиметиктер

Симпатомиметиктер АКФ тежегіштерінің гипертензияға қарсы әсерін азайтуы мүмкін.

Диабетке қарсы препараттар

Эпидемиологиялық зерттеулер АКФ тежегіштерін және диабетке қарсы препараттарды (инсулиндерді, ішу арқылы қабылданатын гипогликемиялық дәрілерді) бір мезгілде қабылдаудың гипогликемия туындау қаупі бар қандағы глюкоза деңгейінің қатты төмендеуін туындатуы мүмкіндігін көрсетеді. Бұл әсер көбіне біріктірілген емнің бірінші аптасында және бүйрек функциясы бұзылуы бар пациенттерде бақыланады.

Плазминогеннің тіндік белсендіргіші

Плазминогеннің тіндік белсендіргішімен бірге емдеу ангионевроздық ісіну даму қаупін ұлғайтуы мүмкін.

Ацетилсалицил қышқыл, тромболитиктер, бета-блокаторлар, нитраттар.

Лизиноприл – КРКА ацетилсалицил қышқылымен (кардиологиялық дозаларда), тромболитиктермен, бета-блокаторлармен және/немесе нитраттармен бірге қолдануға болады.

Айрықша нұсқаулар

Симптоматикалық гипотензия

Симптоматикалық артериялық гипотензия асқынбаған АГ бар науқастарда сирек байқалады. Лизиноприл қабылдаған АГ бар пациенттерде сұйықтық көлемінің тапшылығы жағдайында, мысалы диуретиктермен емнен, тұзсыз диетадан, диализден, диарея немесе құсудан туындаған гипотензия бақылануы мүмкін немесе ренинге тәуелді гипертензия дамығаны бақыланды. Бүйрек жеткіліксіздігімен астасқан немесе астаспаған жүрек жеткіліксіздігі бар пациенттерде симптоматикалық гипотензия дамуы байқалды.

Бұл негізінен ілмекті диуретиктердің жоғары дозаларын қабылдаушы ауыр жүрек жеткіліксіздігі бар пациенттерде, гипонатриемиялы немесе бүйрек функциясы бұзылуы бар пациенттерде бақыланды. Симптоматикалық гипотензия даму қаупі жоғары пациенттерде емнің басын және доза түзетуді мұқият бақылау керек. Осыған ұқсас шаралар жүректің ишемиялық ауруы бар пациенттер үшін де қолданылады, шамадан тыс төмендеген артериялық қысымы миокард инфарктісіне немесе инсультке алып келуі мүмкін.

Артериялық гипотензия дамығанда пациентті шалқасынан жатқызу керек және қажет болғанда физиологиялық ерітіндінің инфузиясын тағайындау керек. Организмде сұйықтық көлемінің артуынан болатын АҚ жоғарылауынан кейін әдетте асқынусыз қолдануға болатын дозаны одан әрі қолдануға қысқа мерзімді гипотензиялық реакция қарсы көрсетілім болып табылмайды.

Артериялық қысымы қалыпты немесе төмен жүрек жеткіліксіздігі бар пациенттерде лизиноприл қабылдағанда артериялық жүйелік қысымының одан әрі төмендеуі мүмкін. Бұл әсер күтіледі және әдетте емді тоқтатуға себеп емес. Егер гипотензия симптоматикалық болса, дозаны азайту керек немесе лизиноприл қабылдауды тоқтату керек.

Жедел миокард инфарктісіндегі гипотензия

Жедел миокард инфарктісі бар пациенттерге вазодилататорларды қолданғаннан кейін одан әрі қарай күрделі гемодинамикалық бұзылулар туындау қаупінен лизиноприлмен ем бастауға болмайды. Бұл систолалық артериялық қысымы 100 мм сын. бағ. немесе одан аз, немесе кардиогенді шок болған пациенттерге қатысты. Миокард инфарктісінен кейін, егер систолалық артериялық қысымы 120 мм сын. бағ. аспаса, бастапқы 3 күн ішінде препарат дозасын азайту керек. Егер систолалық артериялық қысымның көрсеткіші 100 мм сын. бағ. аспаса демеуші дозаны 5 мг дейін немесе уақытша 2,5 мг дейін төмендету керек. Егер ұзартылған артериялық гипотензия анықталса (1 сағаттан астам уақыт бойына систолалық артериялық қысым 90 мм сын. бағ. төмен) лизиноприлмен емді тоқтату керек.

Аорталық және митралдық стеноз/гипертрофиялық кардиомиопатия

Басқа да АКФ тежегіштері сияқты, Лизиноприл-КРКА митралдық клапан стенозымен және сол жақ қарыншадан ағынның обструкциясы бар, мысалы аорта стенозы немесе гипертрофиялық кардиомиопатиясы бар пациенттерді емдегенде сақтықпен тағайындау керек.

Бүйрек функциясы бұзылуы

Бүйрек жеткіліксіздігінде (креатинин клиренсі <80 мл/мин) лизиноприлдің бастапқы дозасын пациенттің креатинин клиренсі көрсеткішіне сәйкес («Қолдану тәсілі және дозалары» бөліміндегі кестені қараңыз), ал содан соң пациенттің емге реакциясына қарай таңдау керек. Калий және креатинин деңгейіне тұрақты бақылау бұл пациенттердегі әдеттегі медициналық практиканың бір бөлігі болып табылады.

Жүрек жеткіліксіздігі бар пациенттерде АКФ тежегіштерімен ем басталғаннан кейін туындаған гипотензия бүйрек функциясының одан әрі бұзылуына алып келуі мүмкін. Бұндай жағдайларда әдетте қайтымды болатын жедел бүйрек жеткіліксіздігі бақыланады.

АКФ тежегіштерін қабылдаған, бүйрек артериясының екі жақты стенозы немесе жалғыз бүйректің артериясының стенозы бар кейбір пациенттерде

әдетте емді тоқтатқаннан кейін қайтымды болатын қандағы мочевинаның және сарысудағы креатининнің деңгейі жоғарылауы байқалды. Бұл әсіресе бүйрек жеткіліксіздігі бар пациенттерде ықтимал. Егер сондай-ақ реноваскулярлық гипертензия болса, ауыр гипотензияның және бүйрек жеткіліксіздігінің жоғары даму қаупі бар. Бұл науқастарда емді дәрігердің мұқият бақылауымен ең төмен дозада және оны біртіндеп жоғарылата отырып бастау керек. Диуретиктермен ем елеулі фактор болуы мүмкіндігінен оларды қабылдауды тоқтату керек, бүйрек функциясын лизиноприл қабылдаудың бірінші аптасы ішінде бақылау керек.

Бұрын байқалмаған вазоренальді гипертензиясы бар артериялық гипертензиялы кейбір пациенттерде әдетте елеусіз және өтпелі болатын, әсіресе лизиноприлді диуретиктермен бір уақытта қабылдағанда қандағы мочевинаның және сарысудағы креатининнің деңгейі жоғарылауы байқалды. Бұның анамнезінде бүйрек жеткіліксіздігі бар пациенттерде болуы ықтималдау. Дозаны төмендету және/немесе диуретиктер және/немесе лизиноприлді қабылдауды тоқтату талап етілуі мүмкін.

Жедел миокард инфарктісінде сарысудағы креатининнің концентрациясы 177 мкмоль/л астам болса және/немесе 500 мг/24 сағаттан асатын протеинуриясы бар бүйрек дисфункциясының белгілері бар пациенттерге лизиноприлмен емді бастауға болмайды.

Егер лизиноприлмен ем уақытында бүйрек функциясы бұзылса (сарысудағы креатининнің концентрациясы 265 мкмоль/л астам болса немесе екі есе артса), дәрігер лизиноприлмен емді тоқтатуды қарастыруы керек.

Гемодиализдегі пациенттердегі анафилактоидты реакциялар 

Жоғары ағымдағы жарғақша (мысалы, АN-69) пайдаланумен диализ өткерген және бір уақытта АКФ тежегіштерін қабылдаған пациенттердегі анафилаксиялық реакциялар туралы хабарланған. Бұл пациенттерге диализдік жарғақшаны басқа типті жарғақшаға ауыстыру керек немесе гипертензияға қарсы басқа класты препаратты қолдану керек.

Тығыздығы төмен липопротеиндер (ТТЛП) аферезі емшарасын жүргізгендегі анафилактоидты реакциялар:

Декстрансульфат көмегімен ТТЛП аферезі емшарасы кезінде АКФ тежегіштерін қабылдаған пациенттерде өмірге қауіп төндіретін сирек анафилактоидты реакциялар дамыды. Бұл реакцияларды әрбір аферез емшарасы алдында АКФ тежегіштерін қабылдауды уақытша тоқтату жолымен болдырмауға болады.

Гиперкалиемия

Пациенттердің қан плазмасындағы калий деңгейінің жоғарылауы лизиноприлді қоса, АКФ тежегіштерімен ем өткерген кейбір пациенттерде анықталды. Гиперкалиемия дамуының қаупі жоғары топқа бүйрек жеткіліксіздігі бар, қант диабетімен науқастар немесе бір уақытта калий бар тамақ қоспаларын, калий жинақтаушы диуретиктер немесе құрамында калий бар тұз алмастырғыштарын қабылдайтындар немесе қан плазмасындағы калий деңгейін жоғарылататын басқа да препараттарды (мысалы, гепарин) қабылдайтын пациенттер жатады. Егер жоғарыда көрсетілген препараттарды бір уақытта қабылдау дұрыс деп табылса, қан плазмасындағы калий деңгейіне ұдайы бақылау ұсынылады.

Аса жоғары сезімталдық/Квинке ауруы

Лизиноприлді қоса, АКФ тежегіштерімен ем өткерген пациенттерде бет, аяқ-қол, ерін, тіл, дауыс саңылауы және/немесе көмекейде ангионевроздық ісінуі туралы сирек жағдайларда хабарланды. Ангионевроздық ісіну емдеу кезеңінің кез келген уақытында пайда болуы мүмкін. Бұндай жағдайларда Лизиноприл қабылдауды дереу тоқтату керек, пациент ауруханадан шыққанға дейін симптомдардың толық жойылуын қамтамасыз ету үшін бақылау орнатып және тиісті емді бастау керек. Ісіну бет, ерін, тіл аумағында шектелген жағдайда, жай-күйі одан әрі қарай емдеусіз жақсаруы мүмкін, өйткені антигистаминдік дәрілермен емдеу симптомдарды әлсіретуге көмектесуі мүмкін. Бұндай пациенттерге ісіну толық жойылғанша медициналық бақылау талап етіледі. Алайда ісіну тыныс алу бұзылуын туындатуға ықпалды тіл, дауыс саңылауы немесе көмекейге таралғанда дереу тиісті ем (тері астына эпинефрин (адреналин) (0,5 мл 1:1000) қоса болуы мүмкін және/немесе тыныс алу жолдары өткізгіштігінің еркіндігін қамтамасыз ету бойынша шаралар) тағайындау керек.

АКФ тежегіштерімен ем қабылдаған пациенттерде сондай-ақ АІЖ шырышының ангионевроздық ісінуі өте сирек анықталды және іш ауырғанда АКФ тежегіштерімен ем қабылдаған науқастарда дифференциалды диагностикалау қажет.

АКФ тежегіштерін қабылдаған қара нәсілді пациенттерде ангионевроздық ісіну туындау жағдайы еуропа нәсілді пациенттерге қарағанда жиі анықталды.

Анамнезінде АКФ тежегіштерін қабылдауға байланыссыз ангионевроздық ісінуі бар пациенттер АКФ тежегіштерін қолдануда ангионевроздық ісіну даму қаупі жоғары тобына жатуы мүмкін (сондай-ақ "Қолдануға болмайтын жағдайларды" қараңыз).

Десенсибилизация

Жарғаққанатты жәндіктер уына (мысалы, араның немесе жабайы араның уы) десенсибилизация уақытындағы АКФ тежегіштерін қабылдаған пациенттерде өмір үшін қауіпті анафилактоидты реакциялар сирек анықталды. Бұл реакциялардан әрбір десенсибилизация алдында АКФ тежегіштерін қабылдауды уақытша тоқтату жолымен аулақ болуға болады.

Бауыр функциясы бұзылуы

АКФ тежегіштерін қабылдау өте сирек жағдайларда холестаздық сарғаюмен басталып және бауырдың фульминантты некрозына дейін үдейтін және (кейде) өліммен аяқталатын синдроммен бірге жүрген. Бұл синдромның механизмі әзірге түсініксіз. Лизиноприл-КРКА қабылдайтын сарғаю дамыған немесе бауыр ферменттері деңгейі елеулі жоғарылаған пациенттер Лизиноприл-КРКА қабылдауды тоқтатуы керек және медициналық мұқият зерттеулерден өту керек.

Нейтропения/агранулоцитоз

АКФ тежегіштерін қабылдау уақытындағы гипертензиясы бар пациенттерде нейтропения/агранулоцитоз, тромбоцитопения және анемия дамуы мүмкін. Пациенттерде бүйрек функциясы қалыпты және басқа күрделендіретін фактор болмаған жағдайда бұндай патаологиялар сирек білінеді. Нейтропения және агранулоцитоз АКФ тежегіштерін қабылдауды тоқтатқаннан кейін қайтымды сипатта болады. Лизиноприлді бүйрек функциясы бұзылуы бар пациенттерге, әсіресе бүйректің тамыр жүйесіне және дәнекер тіндеріне (мысалы жүйелік қызыл жегі немесе склеродермия) әсер ететін ауруларда, сондай-ақ қатарлас иммуносупрессиялық ем уақытында (мысалы, кортикостероидтар, цитостатиктер, антиметаболиттер) аса сақтықпен тағайындау керек. Кейбір жағдайларда антибиотиктермен қарқынды емге жауап бермейтін жедел инфекциялар бақылануы мүмкін.

Бұндай пациенттерде лизиноприлмен ем кезінде қандағы лейкоциттер санына мезгіл-мезгіл бақылау жүргізу ұсынылады, сондай-ақ пациенттерге олардың кез келген инфекция белгілері туралы хабарлауы жөнінде нұсқау беру керек.

Ренин-ангиотензин-альдостеронды жүйесінің қосарлы блокадасы (РААЖ)

АКФ тежегіштерін, ангиотензин II рецепторлары блокаторлары немесе алискиренді бір мезгілде қолданудың гипотензия, гиперкалиемия және бүйрек функциясы төмендеуінің (оның ішінде жедел бүйрек жеткіліксіздігі) даму қаупін ұлғайтатынының дәлелі бар. Сондықтан АКФ тежегіштерін, ангиотензин II рецепторлары блокаторлары немесе алискиренді біріктірілімде қолдану арқылы РААЖ қосарлы жүйесі ұсынылмайды.

Қосарлы блокадамен ем аса қажет болса бұны тек бүйрек функциясын, су- электролиттік теңгерімін және артериялық қысымды ұдайы мұқият мониторингтеу жағдайында тек маман бақылауымен жүруі тиіс. Диабеттік нефропатиясы бар пациенттерде АКФ тежегіштерін және ангиотензин II рецепторларының блокаторларын бір мезгілде қолдануға болмайды.

Нәсілі

АКФ тежегіштері басқа нәсілді пациенттерге қарағанда, көбіне қара нәсілді пациенттерде ангионевроздық ісінуді туындатады. Басқа да АКФ тежегіштері сияқты, Лизиноприл – КРКА басқалармен салыстырғанда қара нәсілді пациенттерде артериялық қысымы төмендегенде тиімділігі аз болуы мүмкіндігі бұл популяцияның артериялық гипертензиясы бар пациенттерде рениннің төмен деңгейінің көп таралуынан болуы ықтимал.

Жөтел

АКФ тежегіштерін қолданғанда жөтел туралы хабарланған. Әдетте жөтел өнімсіз және ем тоқтағаннан кейін жойылады. АКФ тежегіштерінен туындаған жөтелді жөтелге дифференциалды диагностика жүргізілуінің бір бөлігі ретінде қарастыру керек.

Қант диабеті бар пациенттерге

Ішу арқылы қабылданатын диабетке қарсы дәрілер немесе инсулин алатын

Дәрілермен өзара әрекеттесуі

Хирургиялық араласымдар /жансыздандыру

Жалпы хирургиялық араласымдарды немесе гипотензия туындататын жансыздандыратын дәрілермен араласымдарды өткерген пациенттерде лизиноприл рениннің компенсаторлық сөлінісінің салдарынан ангиотензин II түзілуін бөгеуі мүмкін. Егер осы механизмге байланысты туындаған артериялық гипотензия анықталса, бұны сұйықтық көлемін арттыру жолымен қалпына келтіру керек.

Балаларда қолданылуы

Артериялық гипертензиясы бар 6 жастан үлкен жастағы балаларға препарат қолданудың қауіпсіздігі мен тиімділігі туралы ақпарат өте аз, басқа көрсетілімдерде қолдану тәжірибесі жоқ. Лизиноприл-КРКА тек артериялық гипертензиясы бар балаларда қолдану үшін ұсынылады.

Лизиноприл-КРКА 6 жастан кіші балаларға немесе ауыр бүйрек жеткіліксіздігі (ШСЖ <30 мл / мин /1,73m2) бар балаларға ұсынылмайды.

Егде жастағы пациенттерде

Клиникалық зерттеулерде препараттың қауіпсіздігі мен тиімділігі бейінінде пациенттердің жасына байланысты өзгерістер болмады. Лизиноприл-КРКА бастапқы дозасын анықтау үшін егде пациенттерде бүйрек функциясы төмендегенде 1 кестеде берілген нұсқауды пайдалану керек. Содан кейін дозаны артериялық қысымның реакциясына сәйкес түзету керек.

Литий

Литий және Лизиноприл-КРКА әдетте бір мезгілде қабылдау ұсынылмайды.

Жүктілік

Жүктілік кезінде АКФ тежегіштерін тағайындауға болмайды. АКФ тежегіштерімен емді ұзарту қажет болғанда жүктілікті жоспарлаған әйелдерге жүктілік кезінде қолдану үшін қауіпсіздік бейіні анықталған баламалы препараттар қабылдауға көшу керек. Жүктілік анықталғанда АКФ тежегіштерімен емді дереу тоқтату керек және қажет болғанда баламалы препараттар қолдануға көшу керек.

Лактация кезеңі

Бала емізу кезеңінде Лизиноприл-КРКА қолдану туралы ақпарат жоқ болуына байланысты Лизиноприл-КРКА препаратын бұл кезеңде пайдалану ұсынылмайды, бала емізу кезеңіндегі, әсіресе жаңа туған нәрестені немесе мерзімінен бұрын туған баланы емізгендегі қауіпсіздік бейіні жақсырақ анықталған баламалы ем пайдаланған дұрыс.

Дәрілік заттардың көлік құралын және механизмдерді басқару қабілетіне әсер ету ерекшеліктері

Лизиноприл - КРКА әсіресе ем басында, көлік құралдарын немесе қауіптілігі аса зор механизмдерді басқару қабілетіне әсер етпейді немесе елеусіз әсер етеді. Соның салдарынан, доза және дозалау режимі жеке анықталуы тиіс және автомобиль басқару және қауіптілігі зор жұмыстарды орындау қабілетіне теріс әсер етпеуі тиіс. Пациентті қажығыштық және бас айналуы дамуы мүмкіндігі барына ескерту керек.

Артық дозалануы

Симптомдары: артериялық қысымның айқын төмендеуі, ауыз құрғауы, ұйқышылдық, несеп шығару іркілуі, іш қатуы, мазасыздану, қатты ашушаңдық.

Емі: симптоматикалық ем, вена ішіне сұйықтық енгізу, артериялық қысымды бақылау, дегидратацияны және су-тұз теңгерімі бұзылуын түзетуге бағытталған ем. Қан сарысуындағы мочевинаны, креатинин және электролиттерді, сондай-ақ диурезді бақылау.

Шығарылу түрі және қаптамасы

Поливинилхлоридті үлбірден және алюминий фольгадан жасалған пішінді ұяшықты қаптамаға 10 таблеткадан салынған.

2, 3 немесе 6 пішінді ұяшықты қаптамадан медициналық қолдану жөнінде мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

250С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

КРКА-ФАРМА, д.о.о., Хорватия

Радничка цеста 48, 10000 Загреб, Хорватия

Қаптаушы

КРКА-ФАРМА, д.о.о., Хорватия

Радничка цеста 48, 10000 Загреб, Хорватия

Тіркеу куәлігінің иесі

КРКА, д.д. Ново место, Словения

Шмарьешка 6, 8501 Ново место, Словения

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын және дәрілік заттың қауіпсіздігіне тіркеуден кейінгі бақылауға жауапты ұйымның мекенжайы

«КРКА Қазақстан» ЖШС, ҚР, 050059, Алматы қ., Әл-Фараби даңғ. 19,

корпус 1 б, 2 - қабат, 207 кеңсе

тел.: +7 (727) 311 08 09

факс: +7 (727) 311 08 12

info.kz@krka.biz

Прикрепленные файлы

970474821477976405_ru.doc 177 кб
854059461477977618_kz.doc 144.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники