Летроз

• русский
• қазақша

• Скачать инструкцию медикамента

Саудалық атауы

Летроз

Халықаралық патенттелмеген атауы

Летрозол

Дәрілік түрі

Үлбірлі қабықпен қапталған 2.5 мг таблеткалар

Құрамы

Бір таблетканың құрамында

белсенді зат –2.5 мг летрозол,

қосымша заттар: лактоза моногидраты (Pharmatose 200 M), микрокристалды целлюлоза (Avicel pH 101), жүгері крахмалы (Unipure –F), повидон (К-30), натрий крахмалының гликоляты (А типі, рН 5.5 – 7.5), кремнийдің коллоидты сусыз қостотығы, магний стеараты, қабығы: опадри II Сары 31G52301: титанның қостотығы (Е 171), темірдің сары тотығы (Е 172).

Сипаттамасы

Дөңгелек пішінді, екі жақ беті тегіс, дөңес, қою-сары түсті үлбірлі қабықпен қапталған таблеткалар.

Фармакотерапиялық тобы

Ісікке қарсы гормональді препараттар. Гормондардың антагонистері және олардың аналогтары. Ферменттердің тежегіштері. Летрозол

ATХ коды L02BG04

Фармакологиялық қасиеттері

Фармакокинетикасы

Ішке қабылдағаннан кейін летрозол асқазан-ішек жолынан тез және толық сіңеді. Биожетімділігі 99.9%-ды құрайды. Тағам сіңу жылдамдығын аздап төмендетеді. Қанда летрозолдың ең жоғары концентрацияға жету уақыты (Tmax) Летрозды ашқарынға қабылдаған кезде 1 сағатты және аспен бірге қабылдаған кезде 2 сағатты құрайды. Ашқарынға қабылдағанда летрозолдың қандағы ең жоғары концентрациясының (Cmax) орташа мәні 129 ± 20.3 нмоль/л және аспен бірге қабылдағанда 98.7 ± 18.6 нмоль/л құрайды, алайда летрозолдың сіңу дәрежесі (AUC бойынша баға бергенде) өзгермейді, сондықтан Летрозды ас қабылдауға қарамай-ақ қолдана беруге болады. Қан плазмасы ақуыздарымен байланысуы шамамен 60% құрайды, көбіне альбуминмен (55%). Летрозолдың эритроциттердегі концентрациясы – оның плазмадағы концентрациясының 80%-ға жуығы. 2.5 мг летрозолды қолданғаннан кейін шамамен 82%-ы өзгеріске ұшырамаған белсенді заттың үлесіне тиді. Демек, летрозол метаболиттерінің жүйелік әсері көп емес. Летрозол тіндерге тез және кең таралады. Болжаммен алынған таралу көлемі – тепе-тең жағдай кезінде дене салмағының әр кг-на шаққанда 1.87 ± 0.47 л. Летрозол метаболизмге елеулі дәрежеде ұшырап, фармакологиялық тұрғыдан белсенді емес карбинол қосылысын түзеді. Летрозолдың метаболизмдік клиренсі сағатына 2.1 л құрайды, бұл бауырдың қан ағымы шамасынан төмен (сағатына 90 л-ге жуық). Летрозолдың метаболитке айналуы P450 цитохромының 3A4 және 2A6 изоферменттерінің әсер етуімен жүзеге асатыны анықталды. Басқа, әзір идентификациялана қоймаған метаболиттерінің аздаған мөлшерінің түзілуі, сондай-ақ өзгеріске ұшырамаған препараттың несеппен және нәжіспен бірге шығарылуы летрозолдың жалпы элиминациясында азғана рөл атқарады.

Қан плазмасынан жартылай шығарылуының болжаммен алынған ақырғы кезеңі (Т1/2) 2 тәулікке жуықты құрайды. Күн сайын 2.5 мг препаратты қабылдағанда летрозол тепе-тең концентрацияға 2-ден 6 аптаға дейінгі шамада жетеді, мұндайда ол осындай дозаны бір рет қабылдағаннан кейінгіге қарағанда шамамен 7 есе жоғары болады. Осы кезеңдегі тепе-тең концентрацияның мәні препаратты бір рет қабылдағаннан кейін тіркелген шаманы есепке алу негізінде алдын ала болжауға болатын тепе-тең концентрация мәнінен 1.5 - 2 есе артық болады. Бұл летрозолды 2.5 мг дозада күн сайын қолданғанда оның фармакокинетикасының бәрі бірдей дозаға байланысты бола бермейтіндігін көрсетеді. Летрозолдың тепе-тең концентрациясы ұзақ уақыт емдеу барысында сақталатын болғандықтан, летрозолдың бұдан әрі қарай жиналуы жалғаса бермейді деп қорытынды жасауға болады.

Емделушілердің жекелеген топтарындағы фармакокинетикасы

Летрозолдың фармакокинетикасы емделушінің жасына байланысты емес.

Бүйрек қызметі бұзылған немесе бауыр қызметі бұзылған (Чайлд-Пью шкаласы бойынша В класы) науқастарда плазмадағы летрозолдың концентрациясы өзгермейді.

Бауыр циррозы бар және бауыр қызметінің бұзылуы ауыр (Чайлд-Пью шкаласы бойынша С класы) науқастарда AUC 95%-ға және T1/2 187%-ға артады. Осылайша, мұндай емделушілерге летрозолды абайлап және қауіп/пайда арақатынасына баға бергеннен кейін қолданған жөн.

Фармакодинамикасы

Летроз - ароматаза белсенділігін, осы ферменттің суббірлігі – P450 цитохромының гемімен бәсекелі байланысуы арқылы, өзіне тән жоғары тежегіш, бұл барлық тіндердегі эстрогендердің биосинтезін төмендетеді.

Ісік тіндерінің өсуі эстрогендердің қатысуына байланысты болған жағдайларда, олар арқылы стимуляцияланған әсерлерді жою ісіктің өсуін басу үшін алғышарт болып табылады.

Әйелдерде постменопаузада эстрогендер көбіне ароматаза ферментінің қатысуымен түзіледі, ол бүйрекүсті бездерінде синтезделетін андрогендерді (ең алдымен, андростендион мен тестостерон) эстронға және эстрадиолға айналдырады, сондықтан ароматаза ферментін арнайы тежеу арқылы шеткергі тіндерде және ісік түзілген тіндерде эстрогендердің биосинтезін төмендетуге қол жеткізуге болады.

Летрозолдың 0.1, 0.5 және 2.5 мг құрайтын бір реттік дозасы, дені сау әйелдерде қан сарысуындағы эстрон мен эстрадиолдың деңгейін (бастапқы деңгейімен салыстырғанда), тиісінше, 75-78%-ға және 78%-ға төмендетеді. Ең жоғары төмендеуге 48-78 сағаттан соң жетеді.

Қолданылуы

- постменопаузадағы, сүт безінің ерте сатыдағы гормонға-позитивті обыры бар әйелдерде сүт безінің обырын адъювантты емдеуге

- постменопаузадағы, сүт безінің ерте сатыдағы гормонға-позитивті обыры бар, тамоксифенмен алдын ала стандартты адъювантты ем қабылдаған әйелдерде адъювантты емді жалғастыруға

- ауру қайталанғаннан немесе өршігеннен кейін, постменопаузадағы (табиғи немесе жасанды түрде жасалған), бұдан бұрын антиэстрогендермен ем қабылдаған әйелдерде сүт безі обырының кең таралған түрін емдеуге

- постменопаузадағы әйелдерде ерте сатыдағы гормонға тәуелді сүт безі обырын емдеуде бірінші желідегі препарат ретінде

- постменопаузадағы әйелдерде эстрогендерге оң рецепторлары бар сүт безі обырының орныққан түрлерін адъювантты емес жолмен емдеуге, бұдан кейін ағзаларды сақтауға бағытталған, бастапқыда керек деп есептелмеген операциялар жасалады. Операция жасалғаннан кейін әрі қарай Летрозды тағайындау жөніндегі мәселені, емдеудің жалпыға бірдей сызбасын есепке ала отырып, шешкен жөн.

Қолдану тәсілі және дозалары

Ересектерге. Летроздың ұсынылатын дозасы күн сайын тәулігіне бір рет 2.5 мг құрайды. Ауқымды адъювантті емде Летрозбен емдеу ұзақтығы, онколог-дәрігердің бақылауымен немесе аурудың барлық өршу кезеңі ішінде, 5 жылға дейінді құрайды.

Бауыр және/немесе бүйрек қызметі бұзылған емделушілер. Бауыр қызметінің бұзылуы біркелкі және орташа дәрежелі немесе бүйрек қызметі бұзылған (креатинин клиренсі  10 мл/мин) емделушілерде препарат дозасын түзетудің қажеті жоқ. Алайда бауыр қызметінің ауыр дәрежелі жеткіліксіздігінде Летроздың ұсынылатын дозасы күнара тәулігіне бір рет 2.5 мг құрайды.

Жағымсыз әсерлері

Өте жиі (≥1/10)

• тершеңдік

• артралгиялар

• миалгиялар, артралгиялар, остеопороз, сүйектің сынғыштығының артуы

• қан кернеулер, қажығыштық, соның ішінде астения

Жиі ( ≥1/100, <1/10)

• анорексия, тәбеттің жоғарылауы, жүректің айнуы, құсу, диспепсия, іш қату, диарея

• гиперхолестеринемия

• депрессия

• дене салмағының жоғарылауы

• дімкәстік, шеткергі ісінулер

• бас ауыру, бас айналу

• алопеция, бөртпе (соның ішінде эритематозды, дақты-папулезді, псориазға ұқсайтын және везикулярлы)

Жиі емес ( ≥1/1000, <1/100)

• ісіктің орналасқан жерінің ауыруы (адъювантты және ұзақ адъювантты емдеуге келмейді)

• лейкопения

• үрейлену (соның ішінде ашушаңдық), тітіркенгіштік

• ұйқышылдық, ұйқысыздық, жадының нашарлауы, дизестезия (соның ішінде парестезия және гипостезия), дәм сезімінің бұзылуы

• ми қан айналымының бұзылуы

• катаракта, көздің шырышты қабығының тітіркенуі, көру жітілігінің нашарлауы

• жүректің лүпілдеу сезімі, тахикардия

• тромбофлебит (соның ішінде беткейлік және терең тромбофлебит), артериялық гипертензия, жүрек ишемиясы, стенокардия, миокард инфарктісі, жүрек қызметінің жеткіліксіздігі

• диспноэ, жөтел

• стоматит, ауыз ішінің құрғауы, шөлдеу, абдоминальді ауыру

• бауыр ферменттері белсенділігінің жоғарылауы

• терінің қышуы, терінің құрғақтығы, есекжем

• артрит

• несеп шығару жиілігінің артуы, несеп жүйесінің жұқпалары

• қынаптан қан кету, қынаптық бөліністер, қынаптың құрғақтығы, сүт безінің ауыруы

• дене температурасының жоғарылауы

• дене салмағының төмендеуі

Сирек ( ≥1/10000, <1/1000)

• өкпе эмболиясы, артериялар тромбозы, ми инсульті

• анафилактикалық реакция, уытты эпидермальді некролиз

• гепатит

Қолдануға болмайтын жағдайлар

• летрозолға және препараттың басқа да компоненттеріне жоғары сезімталдық

• пременопаузаға тән эндокриндік статус

• жүктілік және лактация кезеңі

• балалар және 18 жасқа дейінгі жасөспірімдер

Дәрілермен өзара әрекеттесуі

Летрозды циметидинмен және варфаринмен бір мезгілде тағайындағанда клиникалық тұрғыдан маңызды өзара әрекеттесулер байқалмайды.

Қазіргі таңда Летрозды ісікке қарсы басқа дәрілермен біріктіріп қолдану жөнінде клиникалық тәжірибе жоқ.

Летроз Р450 цитохромының - 2А6 және 2С19 изоферменттерінің белсенділігін басады (соңғысында – орташа). CYP2A6 изоферменті дәрілік препараттардың метаболизмінде елеулі рөл атқармайды. Плазмадағы тепе-теңдік мәнінен 100 есе жоғары болатын қонцентрацияларда қолданылатын Летроздың диазепамның (CYP2С19 үшін субстрат) метаболизмін едәуір төмендететін қабілеті жоқ. Осылайша, CYP2С19 изоферментімен клиникалық тұрғыдан маңызды өзара әрекеттесуі екіталай. Дегенмен летрозолды және көбіне жоғарыда аталған изоферменттердің қатысуымен метаболизденетін және емдік концентрацияларының диапазоны аз препараттармен біріктіріп қолданғанда сақ болған жөн.

Айрықша нұсқаулар

Постменопауза жағдайы анықталмаған емделушілерде, менопауза статусын нақты анықтау мақсатында, ЛГ, ФСГ және/немесе эстрадиол деңгейлерін емді бастағанға дейін анықтап алған жөн.

Летрозды креатинин клиренсі минутына < 10 мл болатын емделушілерге қолдану жөнінде деректер жоқ. Летрозды осындай емделушілерге тағайындар алдында потенциалды қаупі мен емдеуден күтілетін әсер арасындағы арақатынасты мұқият таразылау керек. Бауыр қызметінің ауыр жеткіліксіздігі бар емделушілерде летрозолдың жартылай шығарылу кезеңі дені сау адамдікінен шамамен 2 есе ұзақ, сондықтан осы емделушілерде Летрозды абайлап және қаупі/пайдасы арақатынасына мұқият баға берілгеннен кейін қолданған жөн.

Сыртартқысында остеопороз және/немесе сынулар болған немесе остеопороз қаупі жоғары әйелдерде, адъювантты немесе ұзаққа созылатын адъювантты емді бастағанға дейін, сүйек денситометриясы жолымен сүйектің минералды тығыздығына дәл баға беру қажет. Летрозды қабылдау кезінде және одан соң остеопороздың пайда болуын бақылаған жөн. Қажет болған кезде остеопорозға ем тағайындау немесе алдын алу керек және оларды мұқият бақылау жасай отырып жүргізген жөн.

Летроз препаратының құрамында лактоза моногидраты бар. Дәрілік затты галактозаға толеранттықтың сирек кездесетін тұқым қуалаған бұзылуымен, тұқым қуалаған саами лактазасы тапшылығы немесе глюкоза-галактозаның сіңбеу синдромымен емделушілерге тағайындамаған жөн.

Жүктілік

Дәрігер жүкті болып қалуы мүмкін әйелдерге (мысалы, перименопауза жағдайында немесе постменопауза басталғаннан кейін көп ұзамай) Летрозды енгізер алдында, постменопауза статусын сенімді түрде нақтылағанға дейін, жүктілікке тест жүргізу жағын талқылауы тиіс.

Дәрілік заттың көлікті немесе қауіпті механизмдерді басқару қабілетіне әсер ету ерекшеліктері

Препараттың жағымсыз әсерлерін ескеріп, көлікті немесе қауіпті механизмдерді басқарғанда сақ болған жөн.

Артық дозалануы

Симптомдары - препараттың жағымсыз әсерлерінің күшеюі.

Емдеу - симптоматикалық. Өзіне тән арнайы у қайтарғысы жоқ.

Шығарылу түрі және қаптамасы

Үлбірлі қабықпен қапталған 2.5 мг таблеткалар.

Поливинилхлоридті үлбірден және алюминий фольгадан жасалған пішінді ұяшықты қаптамаға 5 таблеткадан салынған.

Пішінді ұяшықты 5 қаптамадан медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Құрғақ, жарықтан қорғалған жерде, 30С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Босатылу шарттары

Рецепт арқылы

Өндіруші

Sun Pharmaceutical Industries Ltd.

Заңды мекенжайы:

Acme Plaza, Andheri-Kurla Road,

Andheri (E), Mumbai 400 059, Үндістан

Өндірістің орналасқан мекенжайы:

Halol-Baroda Highway, Halol-389 350, Gujarat, Үндістан.

Тіркеу куәлігі иесінің атауы және елі

Sun Pharmaceutical Industries Ltd., Үндстан

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

050004, Алматы қ-сы, Төлебаев к-сі, 38, 5-қабат

Тел. (727) 250-92-35, факс (727) 250-33-64

sunreports@intelsoft.kz, sunalmaty@intelsoft.kz