Лемоксол® (1 г)

• русский
• қазақша

• Скачать инструкцию медикамента

Саудалық атауы

Лемоксол®

Халықаралық патенттелмеген атауы

Цефтазидим

Дәрілік түрі

Инъекция үшін ерітінді дайындауға арналған ұнтақ, 1 г және 2 г

Құрамы

белсенді зат – 1160 мг және 2320 мг цефтазидим пентагидраты

(1000 мг және 2000 мг цефтазидимге баламалы)

қосымша зат - натрий карбонаты.

Сипаттамасы

Ақ немесе ақ дерлік кристалды ұнтақ

Фармакотерапиялық тобы

Бактерияға қарсы басқа да бета-лактамды препараттар. Үшінші буынның цефалоспориндері. Цефтазидим.

АТX коды J01DD02

Фармакологиялық әсерлері

Фармакокинетикасы

Цефтазидимнің сіңуі және клиренсі қабылданатын дозаға тура пропорционал. Көктамыр ішіне енгізгеннен кейін жартылай ыдырау кезеңі 1,9 сағатқа жуық құрайды. Қан плазмасының ақуыздарымен байланысуы 10%-дан аз және препарат концентрациясына байланысты емес. Препаратты 10 күн бойы әр 8 сағат сайын 1 г және 2 г дозада көктамыр ішіне қайталап енгізгеннен кейін жинақталуы байқалмаған; препарат ренальді жүйе қызметіне ықпалын тигізбейді. 500 мг және 1 г препарат 6 және 8 сағат бойы бұлшықет ішіне енгізілгеннен кейін сарысулық концентрациясы өзгермеген күйде қалады және 4 мг/л құрайды. Цефтазидим бұлшықет ішіне енгізілгеннен кейін жартылай ыдырау кезеңі 2 сағатқа жуық құрайды.

Бауыр дисфункциясы болуы цефтазидим фармакокинетикасына әсер етпейді, сондықтан бауыр жеткіліксіздігі бар науқастарға дозаны реттеу қажет емес. Бұлшықет ішіне немесе көктамыр ішіне енгізілгеннен кейін цефтазидимнің 80-90 дозасы организмнен 24 сағаттан аса уақыт ішінде бүйрекпен өзгермеген күйде бөлініп шығады. 500 мг немесе 1 г препараттың бір реттік дозасын көктамыр ішіне енгізгенде дозаның 50%-ға жуығы алғашқы 2 сағат ішінде несептен табылады. Препараттың 20%-ы енгізілгеннен кейін организмнен 2-4 сағат ішінде шығарылады, 12%-ы 4-8 сағаттан соң несептен табылады. Цефтазидимнің ренальді шығарылуы несептегі препараттың жоғары деңгейінің нәтижесі болып саналады. Цефтазидимнің бүйректік клиренсінің орташа мәні минутына 100 мл жуық құрайды. Плазмадан алынған клиренс жылдамдығы минутына 115 мл жуық құрайды, бұл препараттың бүйрекпен толық шығарылытынын білдіреді.

Фармакодинамикасы

Цефтазидим парентеральді қолдануға арналған кең ауқымды әсер ететін β-лактамды жартылай синтетикалық антибиотик (үшінші буынның цефалоспоринді антибиотигі). Цефтазидим гентамицинге және басқа аминогликозидтерге төзімді штаммдарды қоса, грамоң және грамтеріс микроорганизмдерге қатысты белсенді. Препарат микроорганизмдердің β-лактамазаларына төзімді, сондықтан ампициллинге және басқа цефалоспориндерге төзімді көптеген штаммдарға қатысты белсенді.

Цефтазидим келесі микроорганизмдерге қатысты белсенді:

Грамтеріс: Pseudomonas spp. (Pseudomonas aerugіnosa қоса), Klebsіella spp. (Klebsіella pneumonіae қоса), Proteus mіrabіlіs, Proteus vulgarіs, Escherіchіa сolі, Enterobacter spp. (Enterobacter cloacae және Enterobacter aerogenes қоса), Cіtrobacter spp. (Cіtrobacter freundіі және Cіtrobacter dіversus қоса), Serratіa spp., Haemophіlus іnfluenzae (ампициллинге төзімді штаммдарды қоса) және Neіsserіa menіngіtіdis.

Грамоң: Staphylococcus aureus (пенициллиназаны өндіретін штаммдарды қоса), Streptococcus pyogenes (А тобының β-гемолитикалық стрептококкы), Streptococcus agalactіae (В тобының стрептококкы), Streptococcus pneumonіae және Streptococcus mіtіs.

Анаэробты микроорганизмдер: Bacteroіdes spp. (Bacteroіdes fragіlіs штаммдарының көпшілігі төзімді).

Қолданылуы

• ауыр инфекциялар (септицемия, бактериемия, перитонит, менингит, иммунитеті төмендеген пациенттердегі инфекциялар, инфекция жұқтырған күйіктер)

• тыныс алу жолдарының инфекциялары, муковисцидозбен науқастардағы инфекцияны қоса

• ЛОР-мүшелерінің инфекциялары

• несеп шығару жолдарының инфекциялары

• терінің және жұмсақ тіндердің инфекциялары

• асқазан-ішек жолының, өт шығару жолдарының инфекциялары, сондай-ақ абдоминальді (құрсақ) инфекциялар

• сүйектер мен буындардың инфекциялары

• диализ жүргізумен байланысты инфекциялар

• гинекологиялық инфекциялар (эндометрит және әйелдің жыныс ағзаларының басқа инфекциялары)

• клиникалық сынақтарда штаммдардың бірінші және екінші буын цефалоспориндеріне төзімділігі расталған жағдайда операция алдындағы профилактика.

Препарат тағайындар алдында инфекция туындататын патогенді микроорганизмдерді анықтау бойынша бірқатар емшаралар және соңынан цефтазидимге сезімталдыққа бақылау жүргізу қажет. Кейбір жағдайларда инфекцияларды Лемоксолмен® емдеуді сезімталдыққа бақылау жүргізер алдында бастауға болады, мұндай жағдайда емдеу нәтижелері стандарт бойынша бағаланады. Лемоксол® диагностикаланған септицемия жағдайында монотерапия түрінде тағайындалады. Ауыр инфекцияларды, мысалы, иммунитеті тапшы жай-күйі бар пациенттердегі инфекцияларды емдегенде цефтазидимді аминогликозидтер, ванкомицин, клиндамицин сияқты басқа антибиотиктермен біріктіріп тағайындауға болады. Осындай біріктірілген ем тағайындау қажет болатын жағдайларда басқа антибиотиктерді қолдану жөніндегі нұсқаулықты қатаң қадағалау қажет.

Қолдану тәсілі және дозалары

Аурудың ауырлығына, патогенді микроорганизмдер сезімталдығына, инфекция типіне, науқастың жасы мен бүйрегінің жай-күйіне байланысты дозаланады.

Ересектер үшін: көктамыр ішіне немесе бұлшықет ішіне әр 8 немесе 12 сағат сайын 0,5-2 г Лемоксол®. Несеп жолдарының инфекцияларында және басқа ауырлығы аздау инфекцияларда әр 12 сағат сайын 500 мг немесе 1 г тағайындалады. Көптеген инфекциялар үшін препараттың дозалануы әр 8 сағат сайын 1 г немесе әр 12 сағат сайын 2 г құрайды. Ауыр сипатты ауруларда, ең алдымен, нейтропениясы бар науқастарды қоса, иммунитет тапшылығы бар науқастар үшін препараттың дозалануы әр 8 сағат сайын 2 г құрайды. Кистозды фиброзы бар науқастар және көк іріңді таяқша туғызған өкпе инфекциялары бар науқастар үшін – күн сайын күн ішінде 3 қабылдауға бөлінген дене салмағына 100-150 мг/кг.

Балалар және 2 айдан асқан жаңа туған нәрестелер үшін: күні бойы 2-3 қабылдауға бөлінген дене салмағына күнделікті 30-100 мг/кг. Балаларға арналған препараттың ең жоғары тәуліктік дозасы күн бойы 3 қабылдауға бөлінген дене салмағына - 150 мг/кг-ден (бұл орайда ең жоғары тәуліктік дозаcы 6 г болуы тиіс) иммунитет тапшылығы, кистозды фиброзы немесе менингиті бар балаларға тағайындауға болады.

2 айлық және одан да кіші жастағы жаңа туған нәрестелер үшін: күнделікті дене салмағына 25-60 мг/кг, доза күн ішінде 2 қабылдауға бөлінеді. Жаңа туған нәрестелердің қан сарысуындағы цефтазидимнің жартылай ыдырау кезеңі ересектердегіден 3-4 есе ұзақ болуы мүмкін.

Егделер үшін: Жедел инфекциялары бар егде науқастарға, әсіресе, 80 жастан үлкен науқастарға ұсынылатын күнделікті доза цефтазидимнің әлсіреген клиренсінен болатын 3 г-ден аспауы тиіс.

Бүйрек жеткіліксіздігі: Цефтазидим шығарылуы бүйрек арқылы жүзеге асады. Бүйрек функциясы бұзылған науқастарға цефтазидим дозасын азайту ұсынылады. Бастапқы тағайындалатын Лемоксол® дозасы 1 г құрайды. Демеуші доза гломерулярлық сүзілу жылдамдығына байланысты таңдалады.

Ауыр инфекциялары бар науқастар үшін дозалау бірлігі 50% және одан да көп арттырылуы тиіс, сондай-ақ препарат қолдану жиілігін көбейту керек. Бұл орайда мұндай науқастардың қан сарысуында 40 мг/л-ден аспауы тиіс препарат концентрациясы қатаң бақыланады. Келесі формуланы (Кокрофт теңдеуі) креатинин клиренсін есептеу үшін пайдалануға болады. Сарысулық креатинин бүйрек функциясының тұрақты жай-күйін көріністейді.

Дене салмағы (кг)·(140 – жас)

Ерлерде: Креатинин клиренсі (мл/мин) = -----------------------------

72 · сарысулық креатинин (мг/л)

Әйелдерде: Алынған нәтижені 0,85-ке көбейтеді.

Балаларда: Креатинин клиренсінің мәні дене салмағына немесе дене беткейіне сәйкес реттелуі тиіс, ал бүйрек функциясының бұзылуы болған жағдайда препараттың дозалануын ересектердегідей азайту керек.

Гемодиализ: Гемодиализ кезінде цефтазидимнің сарысудағы жартылай шығарылу кезеңі 3-5 сағат аралығында ауытқиды. Лемоксолдың® ұсынылатын демеуші дозасын қолдану әр гемодиализден кейін төменде келтірілген кестеге сәйкес қайталануы тиіс.

Перитонеальді диализ: Лемоксол® перитонеальді диализ және үздіксіз амбулаторлық перитонеальді диализ барысында қолданылады. Көктамыр ішіне енгізуден басқа, Лемоксол® 2 л диализдеуші сұйықтықтағы 125-250 мг концентрациялы диализ арқылы қолданылады. Бүйрек жеткіліксіздігі бар науқастар үшін, сондай-ақ үздіксіз артериялық-көктамырлық гемофильтрация кезінде немесе гемодиализ жылдамдығы жоғары болғанда препараттың күнделікті дозасы 1 г құрайды, оны бір реттік доза түрінде де, бірнеше қабылдауға бөліп те тағайындауға болады. Төмен жылдамдықтағы гемофильтрациядағы пациенттерге де препараттың бүйрек функциясының бұзылуы кезіндегі сияқты дозасы ұсынылады. Көктамыр-көктамырлық гемофильтрация немесе көктамыр-көктамырлық гемодиализ алып жүрген науқастарға мынадай дозалар ұсынылады:

*Демеуші доза әр 12 сағат сайын тағайындалуы тиіс.

*Демеуші доза әр 12 сағат сайын тағайындалуы тиіс.

Қолдану тәсілі: 1 г Лемоксол® көктамырішілік немесе бұлшықетішілік инъекциялар түрінде (препаратты бөксенің жоғарғы төрттен бір бөлігіне немесе санның латеральді (бүйірлі) бөлігіне) қолданылады. 2 г Лемоксол® көктамырішілік инъекциялар түрінде қолданылады.

Препаратты бұлшықетішілік инъекциялар түрінде қолдану: Қолданар алдында препаратты инъекцияға арналған суда немесе инъекцияға арналған 0,5% лидокаин гидрохлоридінің ерітіндісінде немесе инъекцияға арналған 1% лидокаин гидрохлоридінің ерітіндісінде еріту қажет. Лидокаинді еріткіш ретінде педиатриялық практикада пайдаланбайды.

Препаратты көктамырішілік инъекциялар түрінде қолдану: Препаратты көктамыр ішіне енгізу бактериялық септицемиясы, бактериялық менингиті, перитониті немесе басқа да ауыр және өмірге қауіпті инфекциялары бар науқастарға ұсынылады. Енгізудің осындай жолы жеткіліксіз тамақтану, соғылулар нәтижесінде, хирургиялық операциялардан кейін, диабетте, жүрек жеткіліксіздігінде немесе обыр ауруларында, әсіресе болжамды немесе жедел катаплексия жағдайында естен тану күйінде болатын науқастарға ұсынылады.

Препаратты үздіксіз немесе мезгіл-мезгіл көктамыр ішіне енгізу түрінде қолдану: Лемоксол® қолданар алдында инъекцияға арналған сумен сұйылту қажет. Ерітіндіні көктамырға тікелей 3-5 минут бойы немесе канюля арқылы баяу енгізеді. Лемоксол® ерітіндісін, β-лактамдар тобына жататын көптеген антибиотиктердің ерітінділері сияқты, олардың үйлеспеуіне орай, аминогликозидтер ерітінділерімен араластыруға болмайды. Лемоксолмен® және аминогликозидтермен біріктірілген ем тағайындалған жағдайда осы препараттардың ерітінділерін бөлек енгізу керек.

Ерітінді дайындау жөнінде нұсқау:

Лемоксол® 1 г/құты б/і немесе к/і енгізуге арналған және Лемоксол®

2 г/құты к/і енгізуге арналған:

• Еріткішті құтыға енгізіп, ерігенше сілкиді.

• Еріту барысында көмірқышқылды газ көпіршіктерінің бөлінуі байқалады. Ерітінді 1-2 минут ішінде мөлдір болуы тиіс.

• Құтыны төңкереді.

• Еккіштің инесімен құтының қақпағын теседі және ерітіндінің бүкіл көлемін сорып алады (құтыдағы қысым ерітіндінің алынуын оңайлатады).

• Алынған ерітіндінің ішінде әсері болмайтын көмірқышқыл газының кішкентай көпіршіктері болуы мүмкін.

  Лемоксол® 1 г/құты және Лемоксол® 2 г/құты көктамырішілік тамшылатып инфузиялауға арналған:

• Еккіштің инесімен құтының қақпағын теседі де, 10 мл еріткіш енгізеді.

• Инені шығарып, ерігенше сілкиді. Ерітінді 1-2 минут ішінде мөлдір болуы тиіс.

• Газды шығару үшін инемен құтының қақпағын теседі, осылайша ішкі қысымын азайтады.

• Газды шығаруға арналған ине арқылы 40 мл еріткіш қосады. Газды шығаруға арналған инені шығарып, құтыны сілкиді және инфузиялық жолмен енгізу үшін оны бекітеді.

  1-ден 40 мг/мл дейінгі концентрациясы бар цефтазидим ерітіндісін алу үшін Лемоксол® көктамыр ішіне енгізуге арналған мына сұйықтықтармен үйлеседі: 0,9% натрий хлориді ерітіндісі; М/6 натрий лактаты; натрий лактатының қоспасы (Hartmann ерітінді); 5% декстроза ерітіндісі; 0,225% натрий хлориді ерітіндісі және 5% декстроза ерітіндісі; 0,45% натрий хлориді ерітіндісі және 5% декстроза ерітіндісі, 0,9% натрий хлориді ерітіндісі және 5% декстроза ерітіндісі; 0,18% натрий хлориді ерітіндісі және 4% декстроза ерітіндісі; 10% декстроза ерітіндісі; 0,9% натрий хлориді ерітіндісіндегі 10% декстран 40; 5% декстроза ерітіндісіндегі 10% декстран 40; 0,9% натрий хлориді ерітіндісіндегі 6% декстран 70; 5% декстроза ерітіндісіндегі 6 % декстран 70.

  0,05-ден 0,25 мг/мл дейінгі концентрациясы бар цефтазидим ерітіндісін алу үшін Лемоксол® перитонеальді диализге арналған ерітіндімен (сүт ерітіндісі) үйлеседі.

  Бұлшықет ішіне енгізуге арналған ерітіндіні 0,5% немесе 1% лидокаин гидрохлориді ерітіндісін пайдаланумен дайындайды.

  Цефтазидим басқа препараттармен біріктірілген жағдайда, егер цефтазидим концентрациясы 4 мг/мл болса, екі препарат тиімділігінің сақталу шартымен: 0,9% натрий хлориді ерітіндісіндегі немесе 5% декстроза ерітіндісіндегі 1 мг/мл гидрокортизон (гидрокортизон натрий фосфаты); 0,9% натрий хлориді ерітіндісіндегі 3 мг/мл цефуроксим (цефуроксим-натрий); 0,9% натрий хлориді ерітіндісіндегі 4 мг/мл клоксациллин (клоксациллин-натрий); 0,9% натрий хлориді ерітіндісіндегі 10 ӘБ/мл немесе 50 ӘБ/мл гепарин; 0,9% натрий хлориді ерітіндісіндегі 10 mEq/Lt немесе 40 mEq/Lt калий хлориді.

  500 мг цефтазидим 1,5 мл инъекцияға арналған суда ерітілгенде және алынған ерітіндіге метронидазол ерітіндісін (100 мл-дегі 500 мг) қосқанда екі препараттың да тиімділігі байқалады.

  Ескерту: Препарат ерітіндісі, құты және парентеральді енгізуге арналған құрал-жабдықтар қарап тексерілуі тиіс.

Жағымсыз әсерлері

- көктамыр ішіне енгізген кездегі флебит немесе тромбофлебит, бұлшықет ішіне енгізген кездегі инъекция орынының ауыруы, ашытуы, тығыздануы

- дақты және папулезді бөртпе, есекжем, қызба, қышыма, ангионевроздық ісіну, бронх түйілуін қоса, артериялық қысымның төмендеуі, экссудативті мультиформалы эритема (Стивенс-Джонсон синдромы), уытты эпидермалық некролиз (Лайелл синдромы)

- диарея, бас айналу, құсу, абдоминальді ауырулар, орофарингеальді кандидоз, колит, жалған жарғақшалы колит

- кандидозды вагинит

- бүйрек функциясының бұзылуы

- сарғаю

- бас ауыру, бас айналу, елестеулер, дәм сезудің бұзылуы, парестезиялар, тремор, миоклония, құрысулар, энцефалопатия, кома

- эозинофилия, жалған оң тіке Кумбс реакциясы, тромбоцитоз, «бауыр» ферменттері - AЛT, AСT, ЛДГ, ГГТ және сілтілі фосфатаза белсенділігінің артуы, мочевина, мочевина азоты және/немесе қандағы креатинин деңгейінің жоғарылауы

- лейкопения, нейтропения, агранулоцитоз, тромбоцитопения, лимфоцитоз, гемолитикалық анемия

- гипопротромбинемия

Қолдануға болмайтын жағдайлар

- цефтазидимге немесе препараттың кез келген басқа компонентіне аса жоғары сезімталдық

- басқа цефалоспоринді антибиотиктерге, пенициллиндерге аса жоғары сезімталдық

Бүйрек жеткіліксіздігінде, асқазан-ішек жолының ауруларында (соның ішінде сыртартқыдағы колитте), жүктілікте, лактация кезеңінде және жаңа туған нәрестелерде, «ілмекті» диуретиктермен және аминогликозидтермен біріктіргенде сақтықпен қолдану керек.

Дәрілермен өзара әрекеттесуі

Лемоксол® көктамыр ішіне енгізуге арналған ерітінділердің көпшілігімен үйлесімді. Алайда натрий бикарбонаты ерітіндісінде тұрақтануы аз, сондықтан оны еріткіш ретінде пайдалану ұсынылмайды.

Лемоксол® гепаринмен, ванкомицинмен, хлорамфениколмен үйлеспейді. Хлорамфеникол цефтазидимнің және басқа цефалоспориндердің антагонисті сияқты әсер етеді. Бұл деректің клиникалық мәні белгісіз, бірақ бәсекелес тағайындау қажет болған кезде антагонизм мүмкіндігін ескеру керек.

Лемоксол® ерітіндісіне ванкомицинді қосқанда шөгіндінің түзілуі болады, сондықтан осы екі препаратты енгізу арасында инфузиялық жүйені жуып-шаю ұсынылады.

Цефтазидим мен нефроуытты препараттардың жоғары дозаларын бір мезгілде енгізу бүйрек функциясына жайсыз әсер етеді.

Ілмекті диуретиктер, аминогликозидтер, ванкомицин, клиндамицин клиренсті төмендетеді, соның нәтижесінде нефроуытты әсерінің қаупі артады. Бактериостатикалық антибиотиктер (соның ішінде хлорамфеникол) бета-лактамды антибиотиктер әсерін төмендетеді.

Лемоксол® ішек флорасына әсер етеді де, эстрогендердің кері сіңірілуінің төмендеуіне әкеліп, сол арқылы біріктіріп ішуге арналған контрацептивтер тиімділігін төмендетеді.

Цефтазидим энзимді тестілер көмегімен глюкозаны анықтау тестілерінің нәтижелеріне ықпал етпейді, бірақ мысты қалпына келтіру әдістеріне (Бенедикт, Фехлинг, Клинитест әдістері) мардымсыз әсерін тигізеді.

Айрықша нұсқаулар

Препаратын тағайындар алдында пациенттердің сыртартқысында цефтазидимге, цефалоспориндерге, пенициллиндерге немесе басқа препараттарға аса жоғары сезімталдық реакциялары барын анықтау керек.

Препаратты пенициллиндерге және бета-лактамдық антибиотиктерге белгілі аса жоғары сезімталдығы бар пациенттерде қолдануда ерекше сақтық жасау керек.

Лемоксолға® аллергиялық реакция болған кезде препаратты дереу тоқтату керек, ауыр жағдайларда адреналин, гидрокортизон, антигистаминді препараттар қолдану және басқа да шұғыл шаралар жүргізу қажет болады. Жоғары дозадағы Лемоксолды® аминогликозидтер мен диуретиктер (фуросемид) сияқты нефроуытты препараттармен бір мезгілде қабылдағанда бүйрек функциясына бақылау қажет. Алайда Лемоксолдың® емдік дозаларда бүйрек функциясын бұзатыны жөнінде деректер жоқ. Лемоксол® бүйрек арқылы шығарылатындықтан, бүйрек жеткіліксіздігі бар пациенттерде оның дозасын бүйрек функциясының бұзылу дәрежесімен сәйкес азайту керек.

Әсер ету ауқымы кең антибиотиктерді пайдаланғанда жалған жарғақшалы колиттің (іштің ауыру ұстамаларымен және нәжіспен шырыштың көп мөлшерде бөлінуімен сипатталатын ішек шаншуы) дамуы жиі байқалады. Осы препаратпен емдеу кезінде диарея байқалатын пациенттерде бұған ерекше көңіл бөлу қажет. Ара-тұра, әсіресе, тиісті дозалау режимі сақталмаған жағдайларда, конвульсиялар, тремор, миоклония энцефалопатия және команы қоса алғандағы (бүйрек функциясы бұзылуы бар пациенттердегі препараттың дозасы талапқа сай төмендетілмегенде) сияқты неврологиялық реакциялар да кездесуі мүмкін.

Цефалоспориндер әсері протромбин тежелуімен байланысты болуы ықтимал. Осындай қатерге бүйрек және бауыр жеткіліксіздігі бар науқастар, жеткіліксіз тамақтанатын науқастар немесе антибиотиктердің жоғары дозаларын алатын науқастар көбірек ұшырайды. Мұндай пациенттерге К витаминін қатарлас тағайындап, протромбин деңгейін ұдайы бақылау қажет.

Кең ауқымда әсер ететін антибиотиктерді, соның ішінде Лемоксолды® ұзақ уақыт қолдану сезімтал емес микроорганизмдердің (мысалы, Candіda, Enterococcі) көп өсуіне әкеледі, осы тұста емдеуді тоқтату немесе тиісті ем жүргізу қажет болады. Емдеу кезінде науқастың ахуалын үнемі бағалау қажет.

Кейбір бастапқыда сезімтал болатын Enterobacter және Serratіa штаммдарын Лемоксолмен® емдегенде төзімділік дамуы мүмкін, сондықтан осы микроорганизмдер туғызған инфекцияларды емдегенде антибиотиктерге сезімталдыққа мезгіл-мезгіл зерттеу жүргізген жөн.

Лемоксол® несептегі глюкозаны ферменттік әдістер көмегімен анықтау нәтижелеріне әсер етпейді, бірақ мысты қалпына келтіруге негізделген әдістермен (Бенедикт, Фелинг, Клинитест) әлсіз өзара әрекеттесу болуы мүмкін.

Жүктілік және лактация кезеңі

Эмбриоуытты немесе тератогенді әсерін растайтын деректер жоқ. Жүктілік кезінде Лемоксолмен® емдеу жүкті әйелдер үшін пайдасы ұрыққа төнетін қатерден артық болатын жағдайларда ғана көрсетілген және әйелдерге жүктіліктің алғашқы айларында ерекше сақтықпен тағайындалады.

Цефтазидим аз мөлшерлерде ана сүтіне өтеді, сондықтан препарат бала емізетін аналарға тағайындалғанда емшекпен қоректендіруді тоқтату керек.

Дәрілік заттардың көлік құралын және қауіптілігі зор механизмдерді басқару қабілетіне әсер ету ерекшеліктері

Лемоксол® көлік құралдарын жүргізу және қозғалыстағы механикалық құрылғыларды қызметпен қамту қабілетіне әсер етпейді.

Артық дозаланғанда

Симптомдары: энцефалопатия мен құрысулар дамитын неврологиялық асқынулар.

Емі: симптоматикалық, демеуші ем, гемодиализ, перитонеальді диализ.

Шығарылу түрі және қаптамасы

1 г немесе 2 г препараттан резеңке тығындармен тұмшалана тығыздалған, алюминий қалпақшалармен және «flip-off» пластик қақпақтарымен қаусырылған шыны құтыларға (ІІІ класс) салады.

Әр құтыға өздігінен желімденетін заттаңба жапсырылады.

1 құтыдан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Сақтау шарттары

Жарықтан қорғалған жерде, 150С-ден 250С-ге дейінгі температурада сақтау керек. Дайындалған ерітіндіні тоңазытқышта (2 - 8 °С) 7 күннен асырмай немесе 24 сағат бөлме температурасында (25 °С-ден асырмай) сақтау керек.Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

DEMO S.A. Pharmaceutical Industry,

21 Km National Road Athens-Lamia,

14568 Афина. Греция,

тел.: + 30 210 8161802

факс: + 30 210 8161802

Тіркеу куәлігінің иесі

«DEMO S.A. Pharmaceutical Industry», Греция

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы

«Медсервис Плюс ҚФК» ЖШС

ҚР, Алматы қ., Мәметова к-сі, 54

тел.: +7 (727) 233 41 54