Левипил XR (500 мг) (Levetiracetam)

• русский
• қазақша

• Скачать инструкцию медикамента

Саудалық атауы

Левипил XR

Халықаралық патенттелмеген атауы

Леветирацетам

Дәрілік түрі

Ұзақ әсер ететін таблеткалар, 500 мг, 750 мг

Құрамы

Бір таблетканың құрамында:

белсенді зат – леветирацетам 500.000 мг немесе 750.000 мг,

қосымша заттар: повидон К-90, гипромеллоза 2208 (Метоцел К15 М CR Премиум), аминометакрилат сополимері (Эудрагит ЕРО),

сусыз коллоидты кремнийдің қостотығы, магний стеараты, тальк;

Беткі қабаты: микрокристалды кремнийлі целлюлоза (Prosolv SMCC-90), кросповидон (Полипласдон XL), коллоидты кремнийдің қостотығы,

натрий лаурилсульфаты, FD&C көгілдір №1 алюминий лагы (11 – 13 %),

магний стеараты;

Қабығы: этилцеллюлозаның сулы дисперсиясы, дибутилсебацат, триэтилцитрат, полисорбат 20; Опадри II 85F19250 мөлдір:

гидролизденген поливинил спирті (Е1203), тальк (Е 563 b), макрогол/ПЭГ (Е 1521), полисорбат 80 (Е433)

Сипаттамасы

Сопақша пішінді, екі беті дөңес, көк түсті қабаттан және ақ немесе ақ дерлік қабаттан тұратын қос қабатты, бір жағында лазермен және қара сиялармен орындалған «573» өрнегі бар және екінші жағы тегіс таблеткалар (500 мг дозасы үшін).

Сопақша пішінді, екі беті дөңес, көк түсті қабаттан және ақ немесе ақ дерлік қабаттан тұратын қос қабатты, бір жағында лазермен және қара сиялармен орындалған «576» өрнегі бар және екінші жағы тегіс таблеткалар (750 мг дозасы үшін).

Фармакотерапиялық тобы

Жүйке жүйесі ауруларын емдеуге арналған препараттар.

Эпилепсияға қарсы басқа препараттар. Леветирацетам.

ATХ коды N03АX14

Фармакологиялық қасиеттері

• Фармакокинетикасы

• Ұзақ әсер ететін левитирацетам таблеткаларының биожетімділігі тез босап шығатын левитирацетам таблеткаларына ұқсас деп белгіленген және 100 %-ға жуықты құрайды. Ұзақ әсер ететін леветирацетам таблеткаларының 1000 мг, 2000 мг және 3000 мг дозаларын бір рет қабылдаудан кейін дозаға пропорционал фармакокинетикасы (AUC және Cmax) байқалды. Ұзақ әсер ететін леветирацетамның плазмада жартылай шығарылу кезеңі шамамен 7 сағатты құрайды. Леветирацетам ішу арқылы қабылдаған кезде іс жүзінде толық сіңеді. Левитирацетамның фармакокинетикасы дозаға тәуелді және стационарлы болып табылады, төмен интра-дара ауытқымалылығы және пациенттер арасындағы ауытқымалылығы бар. Леветирацетамның және оның негізгі метаболитінің қан плазмасы ақуыздарымен байланысу дәрежесі 10 %-дан аз, ал оның организмде таралу көлемі жасушаішілік және жасушадан тыс сұйықтық көлеміне жақын.

• Сіңуі және таралуы

• Ұзақ әсер ететін левитирацетамның плазмадағы ең жоғарғы концентрациясына шамамен 4 сағаттан кейін жететіні байқалған. Ұзақ әсер ететін левитирацетамның плазмадағы ең жоғарғы концентрациясына жету уақыты тез босап шығатын левитирацетам таблеткаларымен салыстырғанда шамамен үш сағатқа артығырақ.

• Ұзақ әсер ететін левитирацетамның екі таблеткасын (500 мг) күніне бір рет енгізу күніне екі рет ашқарынға қабылданған тез босап шығатын препараттың бір таблеткасын (500 мг) енгізген кездегі уақытқа қатысты плазмадағы салыстырымды ең жоғары концентрацияларына және плзмадағы концентрация астындағы жазықтыққа әкелді. Ұзақ әсер ететін левитирацетам таблеткаларының көп реттік дозаларын қабылдағаннан кейін, экспозиция ұзақтығы (AUC 0-24) тез босап шығатын таблеткаларды көп рет қабылдағаннан кейінгі экспозициясының ұзақтығына ұқсас екені байқалды. Орташа ең жоғары және ең төмен концентрациялары тез босап шығатын препараттың көп реттік дозаларын қабылдаумен салыстырғанда ұзақ әсер ететін леветирацетамның көп реттік дозаларын қабылдаудан кейін 17% және 26% төмен болып шықты. Ұзақ әсер ететін таблеткаларды қабылдауға дейін май құрамы мол жоғары калориялы таңғы асты ішу біршама жоғары концентрация шыңына және шыңға қатысты ұзағырақ уақыт медианасына әкелді. Ең жоғарғы концентрацияға (Tmax) жету уақыты тамақтан кейін қабылдау кезінде 2 сағатқа көбірек болып шықты.

  Метаболизмі

  Левитирацетам адам организмінде қарқынды метаболизмге ие емес. Левитирацетамның (дозаның 24%-ы) негізгі метаболизмдік жолы амид-сірке қышқылы тобының ферменттік гидролизі болып табылады.

  Негізгі, фармакологиялық тұрғыдан белсенді емес метаболиттің (ucb L057) түзілуі бауырда P450 цитохромының қатысуынсыз жүреді. In vitro леветирацетам және оның алғашқы метаболиттері Р450 цитохромының изоформаларымен (CYP3A4, 2A6, 2C9, 2C19, 2D6, 2E1, 1A2), глюкуронидтрансферазалармен (UGT1A1, UGT1A6) және эпоксид гидроксилазамен басылмайды. Леветирацетам вальпрой қышқылының глюкуронидациясына ықпалын тигізбейді.

  Гепатоциттердің жасушалық өсіріндісінде леветирацетамның CYP2B6 және CYP3A4 изоформаларға ықпалы жоқ немесе ықпалы өте төмен дәрежеде болады. Леветирацетам мен ішуге арналған контрацептивтер, варфарин және дигоксин арасында елеулі өзара әрекеттесулер күтілмейді. Сондықтан леветирацетамның басқа субстанциялармен өзара әрекеттесуі екіталай.

  Негізгі метаболиті белсенді емес. 2-оксо-пирролидин сақинасының гидролизденуінің (дозаның 2%-ы) және 2-оксо-пирролидин сақинасының бесінші позицияда ашылуының (дозаның 1%-ы) өнімдері ретінде екі қосалқы метаболиті байқалды. Метболиттерінің белгілі фармакологиялық белсенділіктері жоқ және бүйрек арқылы шығарылады. Левитирацетамның немесе оның негізгі метаболитінің энантиомерлік өзара түрленуі байқалған жоқ.

  Шығарылуы

• Левитирацетамның плазмада жартылай шығарылу кезеңі 7 ± 1 сағатты құрайды, оған доза немесе препаратты қайталап енгізу ықпал етпейді. Левитирацетам жүйелі қан ағымынан бүйректік экскреция арқылы өзгеріссіз түрде шығарылады (енгізілген дозаның 66%-ы). Жалпы клиренсі 0,96 мл/мин/кг құрайды, ал бүйрек клиренсі 0,6 мл/мин/кг құрайды. Левитирацетамның плазмада жартылай шығарылу кезеңі шамамен 6-8 сағатты құрайды. Жартылай шығарылу кезеңі егде пациенттерде (бұл бірінші кезекте бүйрек клиренсінің бұзылуымен байланысты) және бүйрек функциясы бұзылған пациенттерде ұзарады.

  Шығарылу механизмі бүйректегі шумақтық сүзілу және одан кейінгі ішінара өзекшелік реабсорбция арқылы жүреді. Ucb L057 метаболиті бүйректегі шумақтық сүзілу және бүйректік клиренсі 4 мл/мин/кг түрінде болатын белсенді өзекшелік сөлініс көмегімен шығарылады. Левитирацетамның шығарылуы креатинин клиренсімен өзара байланысты. Левитирацетамның клиренсі бүйрек функциясы бұзылған пациенттерде төмен болады.

  Пациенттердің ерекше топтары

  Егде жастағы пациенттер

  Ұзақ әсер ететін леветирацетамды егде жастағы адамдарда пайдаланудың нақты сипатталған фармакокинетикалық деректері жеткіліксіз.

  Тез босап шығатын леветирацетамды 10 күн бойы күніне екі рет ішу арқылы қабылдағаннан кейін, дені сау ересек пациенттермен салыстырғанда жалпы клиренсі, қолда бар деректер бойынша, егде адамдарда 38 % азайды және жартылай шығарылу кезеңі 2,5 сағатқа ұзағырақ болды. Бұл, сірә, осы науқастардағы бүйрек функциясының азаюымен байланысты.

  Балалар

  Фармакокинетикасының зерттеулерінде – ұзақ әсер ететін леветирацетам таблеткаларын (1000 мг және 3000 мг) эпилепсиясы бар балалар (13-тен 16 жасқа дейінгі) және ересектер (18-ден 55 жасқа дейін) күніне бір рет (ең кемі 4 күн және ең көбі 7 күн) қабылдаған кезде, тепе-тең күйдегі дозамен қалпына келетін экспозициялық параметрлері, Cmax және AUC, бала және ересек пациенттер арасында салыстырымды болды.

  Жүктілік

  Жүктілік кезіндегі физиологиялық өзгерістер леветирацетам концентрациясына ықпал етуі мүмкін (қан сарысуындағы деңгейінің төмендеуі).

  Жынысы, нәсілі

  Жынысы мен нәсілі леветирацетамның фармакокинетикасына ықпал етпейді.

  Бүйрек жеткіліксіздігі

  Ұзақ әсер ететін леветирацетам таблеткаларының бүйрек жеткіліксіздігі бар пациенттерге ықпалына баға берілген жоқ. Алайда ұзақ әсер ететін леветирацетам қабылдайтын пациенттерге әсері тез босап шығатын леветирацетам таблеткаларына ұқсас болады деп күтіледі. Бүйрек жеткіліксіздігінің соңғы сатысындағы диализдегі пациенттерге ұзақ әсер ететін леветирацетамның орнына тез босап шығатын леветирацетамды қолдану ұсынылады.

  Тез босап шығатын леветирацетамның шығарылуы бүйрек жеткіліксіздігінің әртүрлі дәрежесіндегі ересек пациенттерде тіркелген. Леветирацетамның жалпы клиренсі бүйрек функциясы бұзылған пациенттерде бұзылуының айқындығы әлсіз топта (КК = 50-80 мл/мин) 40%-ға, ауырлығы орташа бұзылған топта (КК = 30-50 мл/мин) 50 %-ға (КК = 30-50 мл/мин) және ауыр бүйрек жеткіліксіздігі бар топта (КК <30 мл/мин) 60 %-ға төмендеді. Леветирацетамның клиренсі креатинин клиренсімен үйлеседі.

  Ануриямен пациенттерде (бүйрек жеткіліксіздігінің соңғы сатысы) жалпы клиренс, қолда бар деректер бойынша, дені сау тұлғалармен (КК >80 мл/мин) салыстырғанда 70%-ға төмендеді. Леветирацетамның шамамен 50 %-ы организмде стандартты 4 сағаттық гемодиализ емшарасы кезінде шығарылады.

  Бауыр жеткіліксіздігі

  Жеңілден (Чайлд-Пью шкаласы бойынша А класы) орташа (Чайлд-Пью шкаласы бойынша В класы) дәрежеге дейінгі бауыр жеткіліксіздігі бар пациенттерде, леветирацетамның фармакокинетикасы өзгеріссіз болды. Бауыр жеткіліксіздігінің ауыр дәрежесіндегі пациенттерде (Чайлд-Пью шкаласы бойынша С класы) жалпы клиренсі дені сау тұлғалармен салыстырғанда 50% құрады, бірақ бүйрек клиренсі азайып, ол төмендеудің басым бөлігін құрады. Бауыр жеткіліксіздігі бар пациенттерге дозаны түзету қажет емес.

• Фармакодинамикасы

  Леветирацетам құрылымы бойынша эпилепсияға қарсы белгілі препараттардан ерекшеленетін пирролидон туындысы (α-этил-2-оксо-1-пирролидинацетамидтің S-энантиомері) болып табылады. Леветирацетамның әсер ету механизмі толық зерттелген жоқ, бірақ эпилепсияға қарсы қолданыстағы дәрілердің әсер ету механизмінен айырмашылығы айқын.

  Леветирацетамның эпилепсияға қарсы белсенділігіне баға беру жануарлардағы эпилепсиялық ұстамалардың бірнеше модельдерінде жүргізілгені белгілі. Іn vitro және in vivo зерттеулер деректері негізгі жасушалық сипаттамаларға және қалыпты нейротрансмиссияға леветирацетамның ықпалы жоқтығын болжауға мүмкіндік береді. Іn vitro зерттеулерде леветирацетамның N-тип арнасы арқылы Ca2+ ағымына ішінара кедергі келтіре отырып және ішкі нейрональді деподан кальцийдің босап шығуын баса отырып, нейрондардағы Ca2+ иондарының концентрациясына әсер ететіні көрсетілген. Бұдан басқа, леветирацетам мырыш пен β-карболиндер әсерімен басылатын ГАМҚ- және глицин-тәуелді өзекшелер арқылы ағымды ішінара қалпына келтіреді. Гиппокамптың эпилепсия тәрізді белсенділігін in vivo және in vitro зертеулердің жарияланған нәтижелері леветирацетам нейрондардың қалыпты қозғыштығына ықпал етпестен белсенділіктің пайда болуын тежейтінін көрсетті, бұдан леветирацетам эпилепсиялық қозудың пайда болуының және құрысу белсенділігінің таралуының гиперсинхронизациясының талғамалы түрде алдын алуға қабілетті деп қорытынды жасауға болады. Болжамды әсер ету механизмдерінің бірі ми мен жұлынның сұр затында болатын SV2A синапстық везикулалар гликопротеинімен қосылуының дәлелді байланысына негізделеді. Левитирацетамның синапстық везикулалық SV2A протеинмен байланысты молекулярлық маңыздылығы түсініксіз күйде қалғанына қарамастан, левитирацетам және сол сияқты аналогтар SV2A-ға тектестіктің жүйелілігін көрсеткені байқалды. Левитирацетамның SV2A протеинмен өзара әрекеттесуі препараттың эпилепсияға қарсы әсер ету механизміне қатысы бар болуы мүмкін.

  Болжаммен, бұл нейрондық белсенділіктің гиперсинхронизациясының алдын алуда көрінетін құрысуға қарсы әсерімен түсіндіріледі. Бұдан басқа, леветирацетам ГАМҚ- және глицин рецепторларына, оларды түрлі эндогенді қосылыстар арқылы модульдей отырып, әсер етеді. Леветирацетам қалыпты нейротрансмиссияға әсер етпейді, бірақ ГАМҚ агонисі бикукуллинмен индукцияланатын эпилепсия түріндегі нейрональді қозуды, сондай-ақ глутаматтық рецепторлардың қозуын басады. Препараттың белсенділігі фокальді де, жайылған эпилепсиялық ұстамаларға да қатысты дәлелденген (эпилепсия түріндегі көріністер/фотопароксизмальді реакция).

Қолданылуы

- эпилепсиясы бар 12 жастағы және одан үлкен пациенттерде парциальді ұстамаларды емдеуде қосымша ем ретінде.

Қолдану тәсілі және дозалары

Левипил XR таблеткаларын тек қана күніне бір рет қабылдау керек, таблеткаларды тұтастай жұтады, таблеткаларды шайнауға, сындыруға немесе езуге болмайды, жеткілікті мөлшердегі сұйықтықпен ішу қажет.

• Емдеуді күніне бір рет 1000 мг дозадан бастау керек, дозаны күніне бір рет 3000 мг ең жоғарғы ұсынылған дозаға дейін әр 2 апта сайын 1000 мг-ге арттыруға болады.

• Левипил XR дозасы пациенттің бүйрек функциясының жай-күйіне байланысты жекелей таңдап алынуы тиіс. Ересектер үшін ұсынылатын дозалары төмендегі кестеде көрсетілген.

• Бүйрек жеткіліксіздігі бар пациенттерге ұсынылған дозаны есептеу үшін, дене бетінің ауданын ескере отырып түзетілген креатинин клиренсін есептеу керек. Ол үшін әуелі мына формуланы пайдаланып, пациенттің креатинин клиренсін (КК) мл / мин бойынша бағалау қажет:

•  

• [140 - жасы (жыл)] x салмағы (кг) (x 0.85 әйелдер үшін)

• КК= ----------------------------------------

• 72 x сарысудағы креатинин (мг/дл)

• Содан соң КК дене бетінің ауданы (ДБА) бойынша былай түзетеді:

• КК (мл/мин)

• КК (мл/мин/1.73м2)= ---------------------------- x 1.73

• пациенттің ДБА (м2)

•  
• Кесте: Бүйрек функциясының бұзылуы бар ересек пациенттер үшін дозаны түзету сызбасы

  Топ	Креатинин клиренсі (мл/мин/1.73м2)	Доза (мг)	Жиілігі
  Қалыпты	> 80	1000 - 3000	Әр 24 сағатта
  Жеңіл	50 – 80	1000 - 2000	Әр 24 сағатта
  Орташа	30 – 50	500 -1500	Әр 24 сағатта
  Ауыр	< 30	500 - 1000	Әр 24 сағатта

  Егде пациенттер

  Леветирацетам бүйрекпен шығарылады, және бұл препаратқа қолайсыз реакциялар қаупі бүйрек функциясы бұзылған пациенттерде жоғары болуы мүмкін. Егде пациенттердің бүйрек функциясының төмен болу ықтималдығы зор болғандықтан, дозаны таңдағанда сақ болу керек, бүйрек функциясын бақылау қажет.

  Бүйрек функциясы бұзылған жағдайда дозаны түзеткен жөн.

Жағымсыз әсерлері

Тез босап шығатын леветирацетам таблеткаларын басқа ЭҚП біріктіріп қабылдаған парциальді ұстамалары бар 4-тен 16 жасқа дейінгі балаларда ең жиі хабарланған жағымсыз реакциялар шаршау, озбырлық, мұрынның бітелуі, тәбеттің төмендеуі және ашушаңдық болды.

Тез босап шығатын леветирацетам таблеткаларын басқа ЭҚП біріктіріп қабылдаған 2% балаларда хабарланған жағымсыз реакциялар: бас ауыруы, назофарингит, құсу, ұйқышылдық, шаршау, озбырлық, іштің жоғарғы тұсының ауыруы, жөтел, мұрынның бітелуі, тәбеттің төмендеуі, патологиялық мінез-құлық, бас айналуы, ашушаңдық, фаринголарингеальді ауыру, диарея, сылбырлық, ұйқысыздық, қозу, анорексия, бассүйек-ми жарақаты, іш қату, контузия, депрессия, әлсіздік, тұмау, көңіл-күйдің өзгеруі, аффективті лабильділік, мазасыздық, артралгия, сананың шатасуы, конъюнктивит, құлақтың ауыруы, гастроэнтерит, бұлшықет созылуы, көңіл-күйдің нашарлауы, мойынның ауыруы, ринит және седация болды. Бұдан басқа, тез босап шығатын леветирацетам таблеткаларын қабылдаған балаларда да мынадай жағымсыз реакциялар тіркелген: тепе-теңдіктің бұзылуы, зейін нашарлауы, экзема, гиперкинезия, жадының нашарлауы, миалгия, жеке бас бұзылысы, қышыну, анық көрмеу.

Жағымсыз реакциялар әдетте жеңілден орташаға дейінгі ауырлық дәрежесінде болды.

Постмаркетингтік есептер

Келесі жағымсыз реакциялар тез босап шығатын леветирацетам таблеткаларын тіркеуден кейінгі қолдану кезінде тіркелген. Бұл реакцияларды тұрғындар ерікті түрде хабарлағандықтан, олардың пайда болу жиілігін сенімді түрде бағалау немесе препаратты қолданумен себеп-салдарлық байланысын анықтау әрдайым мүмкін бола бермейді.

Мынадай жағымсыз реакциялар туралы хабарланған: бауыр сынамалары көрсеткіштерінің ауытқуы, бүйректің жедел зақымдануы, хореоатетоз, препаратқа эозинофилиямен және жүйелі симптомдармен реакциялар (DRESS), дискинезия, мультиформалы эритема, бауыр жеткіліксіздігі, гепатит, гипонатриемия, бұлшықет әлсіздігі, панкреатит, панцитопения (осы жағдайлардың кейбіреуінде анықталған сүйек кемігі қызметінің бәсеңдеуімен), үрейлі шабуылдар, тромбоцитопения және салмақ жоғалту. Сонымен қатар алопеция туралы хабарланған; емдеу тоқтатылған кезде көп жағдайда сауығып кеткендері туралы хабарланған.

Препаратты қабылдауды тоұқтатуға әкеліп соққан және ұзақ әсер ететін леветирацетам таблеткаларымен ем алған пациенттерде жиірек байқалған жағымсыз реакциялар астения, эпилепсия, ойық жаралы стоматит, бөртпе және тыныс алудың бұзылуы болды.

Тез босап шығатын леветирацетам таблеткаларын қабылдаған эпилепсиясы бар ересек пациенттердің кем дегенде 1%-да байқалған жағымсыз реакциялар астения, ұйқышылдық, бас ауыруы, инфекция, бас айналуы, ауыру, фарингит, депрессия, ашушаңдық, ринит, анорексия, атаксия, бас айналуы, амнезия, үрейлену, қатты жөтел, диплопия, эмоциональді лабильділік, өшігу, парестезия және синусит болды.

Тез босап шығатын леветирацетам таблеткаларын басқа ЭҚП-ға қосымша ем ретінде қабылдаған парциальді ұстамалары бар ересектерде ең көп таралған жағымсыз реакциялар ұйқышылдық, астения, инфекциялар және бас айналуы болды.

Қолдануға болмайтын жағдайлар

- леветирацетамға, пирролидонның басқа туындыларына немесе препараттың кез келген қосмыша компонентіне аса жоғары сезімталдық

- 12 жасқа дейінгі балалар (12 жасқа дейінгі балалардағы қауіпсіздігі мен тиімділігі анықталмаған)

- жүктілік кезеңі

Дәрілермен өзара әрекеттесуі

Леветирацетам плазмада басқа ЭҚП (карбамазепин, габапентин, ламотриджин, фенобарбитал, фенитоин, примидон және вальпроат) концентрациясына ықпал етпейтіні және бұл ЭҚП леветирацетамның фармакокинетикасына ықпал етпейтіні хабарланған. Ересектердегі сияқты, балалар популяциясында препаратты тағйындаған кезде дәрілік препараттардың елеулі өзара әрекеттесулері байқалған жоқ. Эпилепсиясы бар балалар мен жасөспірімдерде (4-17 жас) фармакокинетикасы көрсеткіштерін бағалау леветирацетам препаратымен қосымша ем ішке қабылдаған кезде леветирацетаммен бір мезгілде қабылданатын карбамазепин және вальпроат препараттарының концентрациясына әсер етпейтінін растады. Әйтсе де, эпилепсияға қарсы ферментпен индукцияланатын дәрілер қабылдаған балаларда леветирацетам клиренсі мұндай препараттар қабылдамаған балаларға қарағанда 20% жоғары болды. Дозаны түзету қажет емес.

• Фенитоин

• Леветирацетам, қолда бар мәліметтер бойынша, рефрактерлік эпилепсиясы бар пациенттерде фенитоин фармакокинетикасының көрсеткіштеріне ықпал етпейді. Фенитоин да леветирацетам фармакокинетикасына ықпал етпейді.

• Вальпроат

• Леветирацетам дені сау еріктілерде вальпроаттың фармакокинетикасын өзгертпейтіні хабарланған. Вальпроатты 500 мг дозада күніне екі рет қабылдау да леветирацетамның сіңірілу жылдамдығы мен дәрежесін немесе оның плазмалық клиренсін немесе несеппен шығарылуын өзгертпейді. Сол сияқты бастапқы метаболиттің, ucb L057 әсері мен экскрециясы кезінде де әсері байқалмаған.

  Пробенецид

  Пробенецид, бүйректік-өзекшелік сөліністің бөгеуші дәрісі, 500 мг дозада күніне төрт рет қабылдаған кезде күніне екі рет 1000 мг леветирацетам фармакокинетикасын өзгертпейтіні хабарланған. Метаболиттің, ucb L057 Сmax, пробенецидтің қатысуында екі есе дерлік артты, ал бұл кезде несеппен өзгеріссіз күйде шығарылған препарат үлесі бұрынғы қалпында қалды. ucb L057 бүйрек клиренсі пробенецидтің қатысуында 60% төмендеді, бұл ucb L057 өзекшелік сөлінісінің бәсекелес тежелуімен байланысты болуы ықтимал. Леветирацетамның, тез босап шығатын таблеткалардың пробенецидке әсері туралы хабарланбаған. Леветирацетамның пробенецид пен қабынуға қарсы стероидты емес дәрілер, сульфонамидтер және метотрексат сияқты белсенді секрецияланатын басқа препараттардың фармакокинетикасына әсері белгісіз.

  Пероральді контрацептивтер

  Леветирацетам құрамында 0,03 мг этинилэстрадиол және 0,15 мг левоноргестрел бар пероральді контрацептивтердің фармакокинетикасына немесе лютеинизациялаушы гормонның және прогестеронның деңгейіне ықпал етпейді, бұл контрацептивтік тиімділіктің нашарлау ықтималдығы аз екенін көрсетеді. Осы пероральді контрацептивтерді бірге қолдану леветирацетамның фармакокинетикасына ықпал етпейді.

  Препарат 2000 мг тәуліктік дозада дигоксин мен варфариннің фармакокинетикасына әсер етпейді.

  Дигоксин, пероральді контрацептивтер мен варфарин леветирацетамның фармакокинетикасына әсер етпейді.

  Антацидтер

  Антацидтердің леветирацетамның сіңірілу үдерісіне әсер етуі жөнінде деректер жоқ.

  Іш жүргізетіндер

  Осмостық іш жүргізгіш макроголмен бір мезгілде қабылдағанда леветирацетамның тиімділігі төмендейді, осыған байланысты макроголды леветирацетам препаратын қабылдағанға дейін 1 сағат бұрын немесе қабылдағанннан кейін 1 сағаттан соң қабылдау керек.

  Тағам және алкоголь

  Ас ішу леветирацетамның сіңу дәрежесіне ықпал етпейді, дегенмен сіңу жылдамдығы біршама баяулайды. Препараттың алкогольмен өзара әрекеттесуі жөнінде деректер жоқ.

Айрықша нұсқаулар

Мінез-құлық бұзылулары және психоздық симптомдар

Леветирацетам мінез-құлық бұзылуларын және психоздық симптомдарды тудыруы мүмкін. Леветирацетам қабылдаған пациенттерде психиатриялық белгілер мен симптомдардың бар-жоғын тексеру керек.

Мінез-құлық бұзылулары

Психоздық емес мінез-құлық бұзылыстары (ашушаңдық және озбырлық) ұзақ әсер ететін леветирацетам таблеткаларын қабылдаған кезде тіркелген. Қолда бар мәліметтер бойынша, осы жағымсыз реакциялардың нәтижесінде бірде-бір пациент емдеуді тоқтатқан жоқ немесе дозаны төмендеткен жоқ.

Психоздық емес мінез-құлық симптомдары (озбырлық, қозу, ашу, үрейлену, апатия, өзін-өзі танымау, депрессия, эмоциональді тұрақсыздық, өшігу, гиперкинез, ашушаңдық, жүйке тозуы, невроз және тұлғалық бұзылыстар) тез босап шығатын леветирацетам таблеткаларын қабылдаған ересек пациенттер мен балаларда (4-тен 16 жасқа дейінгі) тіркелген.

Бұл мінез-құлық симптомдары ересек пациенттер мен балаларда дозаны тоқтатумен немесе төмендетумен байланысты болды.

Озбыр мінез-құлықтың өршуі тез босап шығатын леветирацетам таблеткаларын қосымша ем ретінде балаларға (4-тен 16 жасқа дейінгі) тағайындаған кезде тіркелді.

Психоздық симптомдар

Психоздық симптомдар (паранойя, сананың шатасуы) тез босап шығатын леветирацетам таблеткаларын қабылдаған кезде ересек пациенттерде және 4-тен 16 жасқа дейінгі балаларда тіркелді.

Тез босап шығатын леветирацетам таблеткаларын қабылдаған ересек пациенттер ауруханаға жатқызылғаны және психозға байланысты оларды емдеу тоқтатылғаны хабарланды. Психоз ретінде тіркелген бұл жағдайлар емдеудің алғашқы аптасының ішінде дамыды және емдеуді тоқтатқаннан кейін 1-2 аптаның ішінде басылды.

Депрессия/суицидтік ойлар

Эпилепсияға қарсы препараттар (ЭҚП), оның ішінде леветирацетам осы препараттарды кез келген көрсетілімдер бойынша қолданатын пациенттерде суицидтік ойлардың немесе мінез-құлықтың қаупін арттырады. Пациенттер, олардың қамқоршылары және отбасы ЭҚП суицидтік ойлардың және мінез-құлықтың пайда болу қаупін арттыратынынан хабардар етілуі және оларға депрессия белгілері мен симптомдарының пайда болуына немесе нашарлауына, көңіл-күйдің немесе мінез-құлықтың басқа да кез келген әдеттен тыс өзгерістеріне, немесе суицидтік ойлардың, мінез-құлықтың, немесе өзіне-өзі зиян келтіру туралы ойлардың пайда болуына дайын болу қажеттігі туралы айтылуы тиіс, оларға депрессияның немесе суицидтік ниеттердің, және/немесе көңіл-күйдегі немесе мінез-құлықтағы кез келген басқа әдеттен тыс өзгерістердің қандай да бір симптомдары пайда болғаны туралы емдеуші дәрігерге хабарлау қажеттігін ескерту керек. Пациенттер суицидтік ниеттердің және суицидке әрекеттенудің пайда болуына қатысты медициналық бақылауда болуы тиіс, әйтсе де эпилепсияға қарсы препараттарды қабылдау аясында бұл бұзылыстардың ұлғаю қаупіне берілген баға қауіп дәрежесінің елеусіз артатынын көрсетті. Бұл қауіптердің пайда болу механизмі белгісіз. ЭҚП қабылдаған кезде суицидтік ойлардың және мінез-құлықтың қаупі жоғарылауы ЭҚП емдеуді бастағаннан кейін бірінші аптаның өзінде-ақ тіркелді және емдеу барысында сақталды.

Қауіптің жасқа байланысты (5-100 жас) елеулі айырмашылығы жоқ.

Ұйқышылдық және шаршағыштық

Леветирацетам ұйқышылдықты және шаршағыштықты тудыруы мүмкін. Пациенттер осы белгілер мен симптомдарды бақылауы керек, олар өздерінің автокөлік жүргізу немесе механизмдерді басқару қабілетіне мұның ықпалы бар-жоғына баға беретіндей леветирацетам қабылдаудың жеткілікті тәжірибесіне ие болғанға дейін оларға автокөлік жүргізу немесе механизмдерді басқару ұсынылмайды. Тез босап шығатын леветирацетам таблеткаларын қабылдайтын пациенттер ұйқышылдықтың пайда болуы салдарынан емделуді тоқтатқаны туралы хабарланған. Олардың кейбіреулеріне дозаны төмендету қажет болған, ал басқалары ұйқышылдықтың нәтижесінде ауруханаға жатқызылған. Емдеуді тоқтату (тез босап шығатын леветирацетам таблеткалары) және дозаны азайту эпилепсиямен ауыратын ересек пациенттерде астенияға байланысты да тіркелген.

Ұйқышылдық және астения емдеудің алғашқы 4 аптасында жиірек орын алған.

Күрделі дерматологиялық реакциялар

Күрделі тері реакциялары, Стивенс-Джонсон синдромын (СДС) және уытты эпидермалық некролизді (УЭН) қоса, леветирацетам қабылдаған пациенттерде тіркелді. Аурудың басталуының орташа уақыты 14-тен күнге дейін болды, бірақ мұндай жағдайлар, кем дегенде, емдеуді бастағаннан кейін төрт айдан соң тіркелген. Сондай-ақ леветирацетам препаратын қайта тағайындағаннан кейін күрделі тері реакцияларының қайталануы тіркелді. Бөртпенің алғашқы белгілерінде, егер бөртпе препаратты қабылдаумен байланысты еместігі айқын болса, леветирацетам қабылдауды тоқтату керек. Егер белгілер немесе симптомдар СДС/УЭН дамуын білдірсе, препаратты қабылдауы қайта жаңғыртпау керек, баламалы ем тағайындауды қарастырған жөн.

Қимыл үйлесімінің бұзылуы

Қимыл үйлесімінің бұзылуы (атаксия, жүрістің бұзылуы, немесе қимыл үйлесімінің болмауы) тез босап шығатын леветирацетам таблеткаларын қабылдаған кезде тіркелген. Бұл жағдайлар емдеудің алғашқы 4 аптасында бәрінен де жиі кездеседі.

Ұстамалардың тоқтауы

Эпилепсияға қарсы препараттарды, оның ішінде леветирацетамды, ұстамалардың жиілігінің ұлғаю әлеуетін азайту үшін біртіндеп тоқтату керек.

Гематологиялық бұзылулар

Леветирацетам гематологиялық бұзылуларды тудыруы мүмкін. Тіркелген жағдайлар қызыл қан жасушалары санының (ҚҚЖ), гемоглобиннің және гематокриттің төмендеуін, сондай-ақ эозинофилдер санының ұлғаюын қамтиды. Ақ қан жасушаларының (АҚЖ) және нейтрофилдердің азаюы да тіркелген. Агранулоцитоз жағдайлары постмаркетингтік кезеңде тіркелді.

Жүктілік кезінде ұстамаларды бақылау

Егер пациент әйелдер леветирацетаммен ем кезінде жүкті болып қалса немесе жүкті болуды жоспарласа, медицина қызметкерлеріне хабарлауы қажет.

Физиологиялық өзгерістер леветирацетамның плазмадағы деңгейін бүкіл жүктілік барысында біртіндеп азайтуы мүмкін. Бұл төмендеу үшінші триместрде айқынырақ болады. Мұндай пациенттерді жүктілік кезінде мұқият бақылау ұсынылады. Мұқият бақылау босанудан кейінгі кезеңде жалғасуы тиіс, әсіресе егер жүктілік барысында доза өзгертілген болса.

Балаларда қолданылуы

12 және одан үлкен жастағы науқас балаларда қауіпсіздігі мен тиімділігі анықталған. Алайда, препаратты қолданудың оқу қабілетіне, зерденің дамуына, өсуге, эндокриндік бездердің функциясына, жыныстық жетілуге және фертильділікке кейіннен болатын әсері белгісіз болып қалуда.

• 16 жасқа дейінгі балалар мен жасөспірімдерде монотерапия түріндегі қауіпсіздігі мен тиімділігі анықталмаған.

  Егде жаста қолданылуы

  Леветирацетамның негізінен бүйрекпен шығарылатыны белгілі, және бұл препаратқа жағымсыз реакциялардың даму қаупі бүйрек функциясы бұзылған пациенттерде жоғары болуы мүмкін. Сондықтан егде пациенттер, бүйрек функциясының бұзылуына неғұрлым бейім болатындықтан, дозаны таңдауға мән беруі тиіс, және бұл бүйрек функциясын бақылауға пайдалы болуы мүмкін.

  Бүйрек және бауыр жеткіліксіздігі

  Леветирацетам препаратын бүйрек немесе бауыр функциясының жеткіліксіздігі бар пациенттерге тағайындау препарат дозасын түзетуді қажет етуі мүмкін. Бауырдың ауыр дәрежедегі жеткіліксіздігі бар пациенттерде емдеуді бастар алдында бүйрек функциясына баға беру қажет.

  Жүктілік және лактация кезеңі

  Фертильділік

  Клиникалық деректер жоқ, адам үшін әлеуетті қаупі белгісіз.

  Жүктілік

• Жүкті әйелдердегі қауіпсіздігі жөнінде талапқа сай және қатаң бақыланатын клиникалық зерттеулер жүргізілмеген. Препаратты зерттеулер адамға арналған емдік дозамен бірдей немесе одан жоғары дозаларды қабылдаған кезде тератогендік әсерлерді қоса, эмбриофетальді уыттылықтың болуы мүмкін екенін көрсетті. Пре-және/немесе постнатальді кезеңдерде шарана қаңқасының елеусіз ауытқу жағдайларының дамуы және санының артуы және ұрпақтың өсуінің кідіруі мүмкін екені туралы хабарланды. Препараттың ұрпақ өрбітуге уыттылығы бар.

  Леветирацетамды жүкті әйелдерге және контрацепция әдістерін қолданбайтын бала туу жасындағы әйелдерге, әлеуетті пайдасы шарана үшін әлеуетті қаупін ақтайтын, клиникалық қажеттілік жағдайларын қоспағанда, қолдану ұсынылмайды.

  Постмаркетингтік проспективті тіркелімдерде жүкті әйелдерге алғашқы триместрде препаратты қолдану жағдайлары сипатталған. Жалпы осы деректердің нәтижелері бойынша, туа біткен ауытқулардың бақыланбағанына қарамастан, тератогендік қауіпті жоққа шығару мүмкін емес. Эпилепсияға қарсы бірнеше препараттарды бір мезгілде тағайындағанда туа біткен ауытқулар қаупі ұлғаяды, осыған байланысты монотерапия қарастырылуы тиіс.

  Эпилепсияға қарсы басқа препараттардағы сияқты, жүктілік кезіндегі физиологиялық өзгерулер леветирацетамның концентрациясына (қан сарысуындағы деңгейінің төмендеуі) ықпалын тигізуі мүмкін. Өте айқын (бастапқы концентрацияның 60%-на дейін) төмендеу үшінші триместрде байқалады.

  Жүктілік кезінде леветирацетам қабылдаған әйелдер тиісті клиникалық зерттеумен қамтамасыз етілуі тиіс. Эпилепсияға қарсы дәрілермен емдеудегі үзілістер аурудың өршуіне әкелуі мүмкін, ол ана мен шарананың денсаулығына зиян келтіреді.

  Лактация кезеңі

  Леветирацетам ана сүтіне өтеді. Емшектегі балаларда леветирацетамды қолданудан ауыр жағымсыз реакциялардың дамуы мүмкін болғандықтан, препаратты қолданудың ана үшін маңыздылығын ескере отырып емізуді тоқтату немесе препаратты қабылдауды тоқтату туралы шешім қабылдау қажет, препаратты қабылдаудың/тоқтатудың пайдасы мен қаупіне баға беру қажет.

  Дәрілік заттың көлік құралдарын немесе қауіптілігі зор механизмдерді басқару қабілетіне ықпал ету ерекшеліктері

  Препараттың автокөлік басқару немесе механизмдермен жұмыс істеу қабілетіне әсері арнайы зерттелмеген. Дегенмен орталық жүйке жүйесі жағынан препаратқа әртүрлі жеке сезімталдықтың болуына орай (бас айналуын және ұйқышылдықты тудыруы мүмкін), әсіресе емнің басында немесе дозаны жоғарылатқанда автокөлік басқарудан және жоғары зейінділікті және психомоторлық реакциялар жеделдігін талап ететін қауіпті болуы ықтимал жұмыстардан бас тартқан жөн.

Артық дозалануы

Клиникалық зерттеу жүргізу кезінде алынған левитирацетамның ең жоғары тіркелген дозасы күніне 6000 мг құраған.

Симптомдары: ұйқышылдық, қозу, сананың көмескіленуі, тыныстың тарылуы, кома.

Емі: жедел кезеңде – жасанды құстыру және әрі қарай белсенділендірілген көмір қолданумен асқазанды шаю. Леветирацетам үшін арнайы антидоты жоқ. Қажет болса симптоматикалық емдеу, клиникада гемодиализ қолданумен организм тіршілігінің негізгі көрсеткіштерін бақылау қамтамасыз етіледі (диализ тиімділігі леветирацетам үшін – 60 %, оның негізгі метаболиті үшін – 74 %).

• Шығарылу түрі және қаптамасы

  500 мг үшін алюминий фольгадан жасалған пішінді ұяшықты қаптамаға 10 таблеткадан салынған. 750 мг үшін алюминий фольгадан жасалған пішінді ұяшықты қаптамаға 6 таблеткадан салынған.

  500 мг үшін 3 пішінді ұяшықты қаптамадан және 750 мг үшін 5 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапқа салынған.

Сақтау шарттары

30 °С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды

Дәріханалардан босатылу шарттары

Рецепт арқылы

Өндіруші

Sun Pharmaceutical Industries Ltd.

Заңды мекенжайы:

Sun House, Plot No. 201 B/1,

Western Express Highway, Goregoan (E), Mumbai - 400 063, Maharashtra, Үндістан

Өндірістің орналасқан жері:

Halol-Baroda Highway,City: Halol – 389 350,

Dist: Panchmahal

Gujarat, Үндістан.

Тіркеу куәлігі иесінің атауы және елі

Sun Pharmaceutical Industries Ltd., Үндістан

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері

050004, Алматы қ., Манас к-сі 32 «А», «SAT» Бизнес орталығы

6-қабат, 602-кеңсе,

Тел. (727) 250-92-35, факс (727) 250-33-64

regulatory.kz@sunpharma.com

 

Стр. 18 из 18