Левебрейн (500 мг)

Левебрейн

Леветирацетам

Дәрілік түрі, дозалануы

Үлбірлі қабықпен қапталған таблеткалар, 250 мг, 500 мг, 1000 мг

Жүйке жүйесі. Эпилепсияға қарсы препараттар. Эпилепсияға қарсы басқа препараттар. Леветирацетам.

АТХ коды N03АX14

Левебрейн монотерапия ретінде бірінші рет диагностикаланған эпилепсиясы бар 16 және одан жоғары жастағы ересектер мен жасөспірімдерде екінші реттік генерализациясы бар немесе жоқ парциальді құрыспалы талмаларды емдеу үшін көрсетілген.

Левебрейн қосымша ем ретінде емдеу үшін көрсетілген:

- 1 айлық және одан жоғары жастағы балаларда, жасөспірімдер мен ересектерде эпилепсиямен қайталанған генерализацияланған немесе жоқ парциальді құрыспалы талмалар;

- ювенильді миоклониялық эпилепсиясы бар 12 және одан жоғары жастағы жасөспірімдер мен ересектерде миоклоникалық құрыспалы талмалар;

-ересектер мен жасөспірімдердің 12 жастағы және одан жоғары идиопатиялық генерализацияланған эпилепсиямен бастапқы-генерализацияланған тонико-клоникалық құрыспалы талмалар.

Қолдануды бастағанға дейін қажетті мәліметтер тізбесі

- белсенді затқа және пирролидиннің басқа туындыларына немесе препараттың кез келген қосымша заттарына аса жоғары сезімталдық

- 18 жасқа дейінгі балалар мен жасөспірімдер (250 мг дозасы бар таблеткалар үшін, қабығы құрамында индигокармин бар болуына байланысты (Е132))

Қолдану кезіндегі қажетті сақтық шаралары

Бүйрек функциясы бұзылған пациенттерде леветирацетам дозасын түзету қажет болуы мүмкін. Бауыр функциясы ауыр бұзылған пациенттерде дозалау режимін таңдау алдында бүйрек функциясын бағалау керек.

Басқа дәрілік препараттармен өзара әрекеттесуі

Эпилепсияға қарсы дәрілер

Тіркеуге дейінгі клиникалық зерттеулердің нәтижелеріне сәйкес ересектерде леветирацетам фенитоин, карбамазепин, вальпрой қышқылы, фенобарбитал, ламотриджин, габапентин және примидонды қоса алғанда, қан сарысуындағы эпилепсияға қарсы дәрілердің концентрациясына әсер еткен жоқ; жоғарыда көрсетілген эпилепсияға қарсы дәрілер леветирацетам фармакокинетикасына әсер еткен жоқ.

Ересектердегідей, балаларда леветирацетамның клиникалық маңызды дәрілік өзара әрекеттесулері туралы деректер (60 мг/кг/тәу. дейін дозаларда) жоқ. Балалар мен жасөспірімдерде эпилепсиямен фармакокинетикалық дәрілік өзара әрекеттесулер зерттеулерінің деректерін ретроспективті талдау нәтижелері (4-17 жас) леветирацетамды қосымша терапия ретінде пероральді қолдану кезінде қан сарысуындағы карбамазепин мен вальпроаттың тепе-тең концентрациялары өзгермегенін куәландырады. Алайда қолда бар деректерге сәйкес, бауыр ферменттерінің белсенділігін арттыратын, эпилепсияға қарсы дәрілермен ем қабылдаған балаларда леветирацетам клиренсі 20%-ға артты. Дәрілік заттың дозасын түзету қажет емес.

Пробенецид

Бүйректегі өзекшелік секреция процесін тежейтін пробенецид (тәулігіне 4 рет 500 мг) леветирацетам негізгі метаболитінің бүйрек клиренсін леветирацетам клиренсіне әсер етпей төмендетеді; бұл ретте жоғарыда көрсетілген метаболиттің қан плазмасындағы концентрациясы төмен.

Метотрексат

Леветирацетам мен метотрексатты бір мезгілде қолданған кезде соңғысының клиренсі төмендейді, бұл қан плазмасындағы Метотрексат концентрациясының әлеуетті уытты деңгейге дейін жоғарылауына, оның ішінде оны осы деңгейде ұзақ ұстауға әкеп соғады. Леветирацетам және метотрексатпен біріктірілген ем алатын пациенттерде қан плазмасындағы дәрілік заттардың концентрациясын мұқият бақылау керек.

Пероральді контрацептивтер және басқа фармакокинетикалық өзара әрекеттесулер

Леветирацетам 1000 мг тәуліктік дозада пероральді контрацептивтердің (этинилэстрадиол және левоноргестрел) фармакокинетикасына әсер еткен жоқ; эндокриндік функцияның көрсеткіштері (қан плазмасындағы лютеиндейтін гормон мен прогестеронның концентрациясы) да өзгерген жоқ.

Леветирацетам 2000 мг тәуліктік дозада Дигоксин мен варфариннің фармакокинетикасына әсер еткен жоқ; протромбин уақытының мәні өзгерген жоқ.

Дигоксин, пероральді контрацептивтер мен варфарин Леветирацетам фармакокинетикасына әсер еткен жоқ.

Іш жүргізетін дәрілер

Осмостық іш жүргізетін дәрімен макроголмен бір мезгілде пероральді қабылдау кезінде Леветирацетам тиімділігі төмендеген. Сондықтан Левебрейнді макроголды пероральді қабылдағанға дейін бір сағат бұрын немесе бір сағаттан кейін қабылдау керек.

Тамақ және алкоголь

Ас ішу леветирацетам сіңу дәрежесіне әсер етпейді, алайда оның сіңу жылдамдығы азырақ төмендейді.

Леветирацетамның алкогольмен өзара әрекеттесуі туралы деректер жоқ.

Арнайы ескертулер

Бүйректің жедел зақымдануы

Өте сирек жағдайларда леветирацетам қолданған кезде бүйректің жедел зақымдануы байқалды (бірнеше күннен бірнеше айға дейін дамиды).

Қанның формалық элементтерінің саны

Леветирацетамды пайдалану кезінде, әсіресе емнің басында, қанның формалық элементтері (нейтропения, агранулоцитоз, лейкопения, тромбоцитопения және панцитопения) санының төмендеуі туралы сирек хабарланған. Айқын әлсіздік байқалатын пациенттерде дене температурасы жоғарылайды, қайталанатын инфекциялық аурулар немесе қан ұюының бұзылуы бар пациенттерде қан талдауын (қанның нысанды элементтерінің санын) бақылау ұсынылады.

Суицид

Леветирацетамды қоса алғанда, эпилепсияға қарсы дәрілермен ем қабылдаған пациенттерде өзіне-өзі қол жұмсау, оның ішінде өліммен аяқталған, суицидтік ойлау және мінез-құлық жағдайлары байқалды. Эпилепсияға қарсы құралдарды қолданудың рандомизацияланған плацебо-бақыланатын зерттеулерінің деректерін мета-талдау нәтижелері суицидалды ойлау мен мінез-құлықтың пайда болу тәуекелінің елеусіз жоғарылағанын куәландырады қауіпті арттырумен байланысты механизмі белгісіз.

Сондықтан Левебрейнді пайдалану кезінде депрессия және/немесе суицидалды ойлау және мінез-құлық белгілерін анықтау мақсатында пациенттерді мұқият бақылауды қамтамасыз ету және қажет болған жағдайда тиісті ем жүргізу қажет. Пациенттер (және оларды күтуді қамтамасыз ететін адамдар) депрессия және/немесе суицидалды ойлау немесе мінез-құлық белгілері пайда болған жағдайда оларға дәрігерге жүгіну керек екендігі туралы хабардар болуы тиіс.

Мінез-құлық бұзылысы және озбырлық

Леветирацетаммен ем алатын пациенттерде тітіркенгіштік пен озбырлықты қоса алғанда, психотикалық симптомдар мен мінез-құлық бұзылысы байқалуы мүмкін. Осыған байланысты Левебрейнді қолданған кезде көңіл-күйдің және/немесе жеке сипаттаманың маңызды өзгеруін көрсететін психикалық симптомдарды анықтау мақсатында пациенттерге мұқият мониторинг жүргізу керек. Мұндай симптомдар анықталған кезде дозалау режимін тиісті түрде түзету немесе препаратты қабылдауды біртіндеп тоқтату қажет.

Балалар

Таблеткаланған дәрілік түрі 6 жасқа толмаған балаларда қолдануға арналмаған.

Балаларда леветирацетамды қолдану туралы қолда бар деректер дәрілік заттың өсуі мен жыныстық дамуына әсер етпейтінін көрсетеді. Дегенмен, балалардың оқыту қабілетіне, интеллектісіне, өсуіне, эндокриндік функциясына, жыныстық жетілуіне және бала туу потенциалына қатысты ұзақ мерзімді әсерлер белгісіз.

Жүктілік және лактация кезеңі

Бала туатын жастағы әйелдер

Бала туатын жастағы әйелдерге Левебрейнмен емдеуді бастамас бұрын дәрігермен кеңесу керек. Жүктілікті жоспарлау кезінде леветирацетаммен емдеуді қайта бағалау керек. Басқа эпилепсияға қарсы дәрілер қолданылған жағдайда сияқты, ол аурудың асқынуына әкелуі және әйел мен шарана/бала үшін ауыр зардаптарға әкеп соқтыратындықтан, леветирацетаммен емдеуді кенеттен тоқтатуға болмайды. Бірнеше эпилепсияға қарсы дәрілермен емдеу монотерапияға қарағанда туа біткен даму кемістіктерінің (дәрілік заттардың біріктіріліміне байланысты) пайда болу қаупімен байланысты, осының салдарынан жүкті әйелдерде монотерапия (мүмкін болған жағдайда) неғұрлым қолайлы болып табылады.

Жүктілік

Жүкті әйелдерде леветирацетаммен емді пайда/қауіп арақатынасын мұқият бағалағаннан кейін және бұл өте қажет деп саналатын жағдайларда ғана жүргізуге болады. Мұндай жағдайларда дәрілік затты ең төменгі тиімді дозада пайдалану керек.

Жүкті әйелдің ағзасындағы физиологиялық өзгерістер қан плазмасындағы Леветирацетам концентрациясының өзгеруін тудыруы мүмкін; жүктілік кезінде қан плазмасындағы дәрілік зат концентрациясының төмендеуі байқалды. Қан плазмасындағы Леветирацетам деңгейі жүктіліктің үшінші триместрінде әйелдерде (бастапқы концентрациядан жүктілікке дейін 60%-ға дейін) төмендейді. Леветирацетаммен ем алатын жүкті әйелдерді жүргізу тиісті түрде жүзеге асырылуы тиіс.

Лактация

Леветирацетам адамда емшек сүтімен бөлінеді, сондықтан Левебрейнді пайдалану кезінде бала емізу ұсынылмайды.

Бала емізу кезеңінде препаратты қолдану қажет болған жағдайда балаға емшекпен емізудің артықшылықтарын ескере отырып, пайда/қауіп арақатынасын мұқият бағалау керек.

Дәрілік заттың көлік құралын және қауіптілігі зор механизмдерді басқару қабілетіне әсер ету ерекшеліктері

Леветирацетам автокөлікті жүргізу және механизмдерді басқару қабілетіне шамалы немесе орташа айқын әсер етеді. Леветирацетаммен емдеу аясында жекелей сезімталдықтың ықтимал айырмашылықтарына байланысты кейбір пациенттерде ұйқышылдық немесе орталық жүйке жүйесі тарапынан, әсіресе емдеудің басында немесе дәрілік заттың дозасын арттырғаннан кейін басқа симптомдар туындауы мүмкін. Мұндай пациенттерге жоғары көңіл бөлуді және психомоторлық реакцияларды жылдамдатуды талап ететін міндеттерді орындау кезінде сақтық сақтау ұсынылады. Пациенттер осындай әрекеттерді орындау қабілеті бұзылмағандығы анықталғанға дейін автокөлікті жүргізуден немесе механизмдерді басқарудан бас тартқан жөн.

Қолдану жөніндегі нұсқаулар

Дозалану режимі

16 және одан жоғары жастағы ересектер мен жасөспірімдерде монотерапия ретінде қолдану

Емдеудің басында ұсынылған доза тәулігіне 2 рет 250 мг Леветирацетам құрайды, 2 аптадан кейін доза тәулігіне 2 рет 500 мг леветирацетамға дейін артуы мүмкін (бастапқы терапиялық доза). Кейіннен емге клиникалық жауапқа байланысты леветирацетамның бір реттік дозасын әрбір 2 апта сайын 250 мг-ге (қабылдау жиілігі - тәулігіне 2 рет) ұлғайтуға болады. Леветирацетамның ең жоғары дозасы 1500 мг тәулігіне 2 рет.

Дене салмағы 50 кг және одан жоғары ересектер мен жасөспірімдерде (12-17 жастағы) қосымша терапия ретінде қолдану

Бастапқы терапиялық доза тәулігіне 2 рет 500 мг леветирацетамды құрайды (бұл дозаны емдеудің 1-күнінен бастап қолдануға болады).

Клиникалық жауабына және емнің төзімділігіне байланысты леветирацетамның дозасы тәулігіне 2 рет 1500 мг-ға дейін ұлғайтылуы мүмкін. Леветирацетамның бір реттік дозасын әр 2-4 апта сайын 500 мг-ге (қабылдау жиілігі - тәулігіне 2 рет) ұлғайтуға немесе азайтуға болады.

Балалар мен жасөспірімдер

Пациенттің жасына және дене салмағына, сондай-ақ леветирацетам дозасына байланысты дәрілік препаратты тиісті дозалау режимін сақтауға мүмкіндік беретін тиісті дозада және дәрілік түрде пайдаланған жөн.

Таблеткаланған дәрілік түрі 6 жасқа толмаған балаларда қолдануға арналмаған. Мұндай пациенттерде және таблеткаларды жұта алмайтын немесе дене салмағы 25 кг-нан кем пациенттерде, сондай-ақ леветирацетам дозасы 250 мг-нан кем болған жағдайларда дәрілік препаратты тиісті дозалау режимін сақтауға мүмкіндік беретін тиісті доза мен дәрілік түрде пайдалану керек.

16 жастан кіші балалар мен жасөспірімдерде монотерапия ретінде қолдану

16 жасқа толмаған балалар мен жасөспірімдерде монотерапия ретінде препаратты қолданудың қауіпсіздігі мен тиімділігі белгіленбеген; деректер жоқ.

Дене салмағы 50 кг кем балалар мен жасөспірімдерде (12-17 жастағы) қосымша терапия ретінде қолдану

6 жасқа толмаған балаларда және таблеткаларды жұта алмайтын балаларда, сондай-ақ леветирацетам дозасы 250 мг-нан аз немесе 250 мг еселенбеген жағдайларда, оның ішінде, егер әр түрлі дозалары бар бірнеше таблеткаларды пайдалану мүмкін болмаса, тиісті дозалау режимін сақтауға мүмкіндік беретін тиісті дозалау мен дәрілік түрде дәрілік препаратты қабылдау керек.

Препаратты ең аз тиімді дозада қолданған жөн. Дене салмағы 25 кг асатын балалар мен жасөспірімдердің бастапқы дозасы тәулігіне 2 рет 250 мг леветирацетамды құрайды; ең жоғары дозасы тәулігіне 2 рет 750 мг леветирацетамды құрайды. Дене салмағы 50 кг және одан жоғары балалар мен жасөспірімдерде леветирацетамды дозалау режимі ересектерге ұқсас.

Егде жастағы пациенттер (65 жас және одан жоғары)

Бүйрек функциясы бұзылған егде жастағы пациенттерде препараттың дозасын тиісінше түзету ұсынылады.

Бүйрек функциясы бұзылған пациенттер

Бүйрек функциясы бұзылған пациенттерде бүйректің функционалдық жай-күйіне байланысты препараттың жеке тәуліктік дозасын таңдау қажет.

Бүйрек функциясы бұзылған, дене салмағы 50 кг және одан жоғары ересектер мен жасөспірімдерде леветирацетамды дозалау бойынша ұсыныстар. Дәрілік заттың дозасын креатинин клиренсін (Clcr, мл/мин) ескере отырып дене салмағы 50 кг және одан жоғары ересектер мен жасөспірімдер үшін таңдайды.

Бүйрек функциясы бұзылған балаларда леветирацетам дозасын бүйректің функционалдық жағдайын ескере отырып түзету қажет, өйткені дәрілік заттың клиренсі бүйрек функциясына байланысты.

Бауыр функциясы бұзылған пациенттер

Бауыр функциясы жеңіл және орташа дәрежедеі бұзылған пациенттерде препараттың дозалау режимін түзету талап етілмейді. Бауыр функциясының ауыр бұзылыстары бар пациенттерде Clcr бүйрек функциясы бұзылуының ауырлық дәрежесін толық көрсете алмайды. Егер мұндай пациенттерде Clcr 60 мл/мин/1,73 м2 кем болса, леветирацетамның тәуліктік демеуші дозасын 50%-ға төмендету ұсынылады.

Енгізу жолы және тәсілі

Таблеткаларды ас қабылдауға қарамастан, жеткілікті мөлшердегі сұйықтықпен ішке қабылдайды. Леветирацетамның тәуліктік дозасын тең мөлшерде екі қабылдауға бөледі.

Препаратты ішке қабылдағаннан кейін ауызда ащы дәм қалуы мүмкін.

Артық дозалану жағдайында қабылдануы қажеті шаралар

Симптомдары: ұйқышылдық, ажитация, озбырлық, сананың көмескіленуі, тыныс алудың тарылуы және кома.

Емі: құстыру немесе асқазанды шаю керек (асқазанды босату мақсатында). Арнайы антидоты жоқ. Артық дозаланғанда симптоматикалық ем жүргізу керек, оның ішіне гемодиализ кіруі мүмкін. Гемодиализ жүргізу кезінде ағзадан 60% леветирацетам және оның негізгі метаболитінің 74% шығарылады.

Тоқтату симптомдарының болу қаупіне нұсқау

Левебрейнмен емдеуді тоқтату қажет болған жағдайда леветирацетам дозасын біртіндеп төмендету (мысалы, дене салмағы 50 кг және одан жоғары ересектер мен жасөспірімдерде - бір реттік дозаны әр 2-4 апта сайын 500 мг-ға төмендеу (қабылдау жиілігі - тәулігіне 2 рет); дене салмағы 50 кг-дан аз балалар мен жасөспірімдерде - бір реттік дозаны әр 2 апта сайын 10 мг/кг-нан асырмай төмендеу (қабылдау жиілігі-тәулігіне 2 рет); 6 айдан төмен жастағы балаларда - дозаны әр 2 апта сайын 7 мг/кг-нан асырмай төмендету (қабылдау жиілігі-тәулігіне 2 рет) ұсынылады.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар

Жағымсыз реакциялар жиілігінің параметрлері мынадай түрде анықталады: өте жиі (≥ 1/10); жиі (≥ 1/100, бірақ < 1/10); жиі емес (≥ 1/1000, бірақ < 1/100); сирек (≥ 1/10000, бірақ < 1/1000); өте сирек (< 1/10000); жиілігі белгісіз (қолда бар деректер бойынша бағалануы мүмкін емес). Әрбір жиіліктік топ шегінде жағымсыз реакциялар олардың ауырлығын азайту тәртібімен берілген.

Инфекциялық және паразиттік аурулар

өте жиі – назофарингит

сирек - инфекция.

Қан және лимфа жүйесі тарапынан

жиі емес - тромбоцитопения, лейкопения

сирек - панцитопения, нейтропения, агранулоцитоз.

Иммундық жүйе тарапынан

сирек - эозинофилиямен және жүйелік симптомдармен (DRЕSS) дәрілік реакция, аса жоғары сезімталдық (ангионевроздық ісінуді және анафилаксияны қоса алғанда).

Зат алмасу және тамақтану тарапынан

жиі – анорексия

жиі емес - дене салмағының артуы, дене салмағының төмендеуі

сирек - гипонатриемия.

Психиканың бұзылуы

жиі - депрессия, дұшпандық/озбырлық, үрей, ұйқысыздық, күйгелектік/ашушаңдық

жиі емес - өз-өзіне қол жұмсау әрекеті, өз-өзіне қол жұмсауды ойлауы, психотикалық бұзылыстар, мінез-құлықтың бұзылуы, елестеулер, ашулану, сананың шатасуы, паникалық шабуылдар, эмоциональді құбылмалылық /көңіл-күйдің ауытқуы, ажитация

сирек - суицид, тұлғалық бұзылыстар, ойлаудың бұзылуы, делирий.

Жүйке жүйесі тарапынан

өте жиі - ұйқышылдық, бас ауруы

жиі - құрысулар, тепе-теңдіктің бұзылуы, бас айналу, әлсіздік, тремор; жиі емес - амнезия, жадының бұзылуы, қозғалыс үйлесімінің бұзылуы/атаксия, парестезия, зейіннің бұзылуы

сирек - хореатетоз, дискинезия, гиперкинезия, жүрістің бұзылуы, энцефалопатия.

Көру мүшесі тарапынан: жиі емес - диплопия, көру айқындылығының бұзылуы.

Есту ағзалары тарапынан және лабиринтті бұзылулар

жиі - вертиго (бас айналу)

Тыныс алу жүйесі, көкірек қуысы және көкірек ортасы ағазалары тарапынан

жиі - жөтел.

Асқазан-ішек жолы тарапынан

жиі - іштің ауыруы, диарея, диспепсия, құсу, жүрек айнуы

сирек - панкреатит.

Бауыр және өт шығару жолдары тарапынан

жиі емес - бауырдың функционалдық көрсеткіштері тарапынан бұзылулар

сирек - бауыр жеткіліксіздігі, гепатит.

Бүйрек және несеп шығару жолдары тарапынан

сирек - бүйректің жедел зақымдануы.

Тері және тері асты тіндері тарапынан

жиі – бөртпе

жиі емес - алопеция, экзема, қышу

сирек - уытты эпидермальді некролиз, Стивенс-Джонсон синдромы, мультиформалы эритема.

Қаңқа-бұлшықет және дәнекер тіндері тарапынан

жиі емес - бұлшықет әлсіздігі, миалгия

сирек - рабдомиолиз және қан плазмасындағы креатинфосфокиназа деңгейінің жоғарылауы (жапондықтарда басқа ұлт өкілдеріне қарағанда едәуір жиі байқалады).

Енгізу орнындағы жалпы бұзылыстар мен бұзылулар

жиі - астения/шаршау.

Жарақат, интоксикация және манипуляцияның асқынулары

жиі емес - жарақаттар.

Жекелеген жағымсыз реакциялардың сипаттамасы

Леветирацетамды топираматпен бір мезгілде қолданғанда анорексияның пайда болу қаупі жоғарылайды.

Бірқатар жағдайларда алопеция кезінде леветирацетамды пайдалануды тоқтатқаннан кейін шаш жабындарының қалпына келуі байқалды.

Кейбір жағдайларда панцитопения кезінде сүйек кемігінің тежелуі байқалды.

Леветирацетамды қолданған кезде, көбінесе емнің басында (бірнеше күннен бірнеше айға дейін), дәрілік затты қолдануды тоқтатқаннан кейін қайтымды сипатта болған энцефалопатияның даму жағдайлары туралы хабарланған.

Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз:

Қазақстан Республикасы Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір таблетканың құрамында

белсенді зат - 250 мг, 500 мг немесе 1000 мг леветирацетам,

қосымша заттар: сусыз коллоидты кремнийдің қостотығы, тальк, повидон K30, ішінара желатинделген жүгері крахмалы, магний стеараты,

Қабықтың құрамы:

Левебрейн 250 мг: Опадри® II көк 85F20400 (ішінара гидролизделген поливинил спирті, макрогол, титанның қостотығы (Е171), тальк, индигокармин алюминий лагы (Е132).

Левебрейн 500 мг: Опадри® II сары 85F220095 (гипромеллоза, титанның қостотығы (Е171), макрогол 6000, темірдің сары тотығы (Е172), тальк)

Левебрейн 1000 мг: Опадри® II ақ 85F18422 (ішінара гидролизделген поливинил спирті, макрогол, титанның қостотығы (Е171), тальк).

Сыртқы түрінің, иісінің, дәмінің сипаттамасы

Левебрейн 250 мг: сопақша пішінді, екі беті дөңес, көк түсті үлбірлі қабықпен қапталған, бір жағында бөлетін сызығы бар таблеткалар.

Левебрейн 500 мг: сопақша пішінді, екі беті дөңес, сары түсті үлбірлі қабықпен қапталған, бір жағында бөлетін сызығы бар таблеткалар.

Левебрейн 1000 мг: сопақша пішінді, екі беті дөңес, ақ түсті үлбірлі қабықпен қапталған, бір жағында бөлетін сызығы бар таблеткалар.

Шығарылу түрі және қаптамасы

10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салынады.

3 немесе 5 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

3 жыл

Жарамдылық мерзімі өткеннен кейін қолдануға болмайды.

25°С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы.

Өндіруші туралы мәліметтер

«УОРЛД МЕДИЦИН ИЛАЧ САН. ВЕ ТИДЖ. А.Ш.», ТҮРКИЯ

Багджылар Илчеси, Гюнешли, Эврен Махаллеси, Джами Йолу Джад. №50 К. 1В Земин 4-5-6, Стамбул.

«Уорлд Медицин Илач Сан. ве Тидж. А.Ш.», Түркия

Квартал 15 Теммюз, Джамийолу к-сі, No.50, WM-Плаза, Гюнещли-Багджылар, Стамбул, 34212, Түркия

Тел: +90 212 474 70 50 Факс: +90 212 474 09 01

http://www.worldmedicine.com.tr

Қазақстан Республикасы аумағында тұтынушылардан дәрілік заттарға қатысты шағымдар (ұсыныстар) қабылдайтын ұйымның атауы, мекенжайы және байланыс деректері (телефон, факс, электронды пошта)

«РИН Фарм» ЖШС, ҚР, Алматы, Түрксіб ауданы, Сүйінбай д-лы, 222 б, Тел/факс: 8(7272) 529090

е-mail: rin_pharma@mail.ru

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«TROKA-S PHARMA» ЖШС, Алматы, Сүйінбай даңғылы 222-б

Ұялы тел +7 701 786 33 98.

е-mail: pvpharma@worldmedicine.kz