Кораксан® (таблетки 7,5мг)
Инструкция
-
русский
-
қазақша
Саудалық атауы
Кораксан
Халықаралық патенттелмеген атауы
Ивабрадин
Дәрілік түрі
Қабықпен қапталған 5 мг және 7,5 мг таблеткалар
Құрамы
Бір таблетканың құрамында
белсенді зат – 5 мг немесе 7,5 мг ивабрадин (сәйкесінше 5,390 мг немесе 8,085 мг ивабрадин гидрохлоридіне баламалы),
қосымша заттар: лактоза моногидраты, магний стеараты, жүгері крахмалы, мальтодекстрин, сусыз кремнийдің қостотығы,
үлбірлі қабығы: глицерин, гипромеллоза, темірдің сары тотығы Е172, темірдің қызыл тотығы Е172, макрогол 6000, магний стеараты, титанның қостотығы Е171
Сипаттамасы
Қызыл сары-қызғылт түсті қабықпен қапталған, ұзынша пішінді, бүйірінде (қабырғасында) бөлуге арналған белгісі бар, бір жақ бетінде “5” өрнегі, келесі бетінде таңбасы бар таблеткалар (5 мг доза үшін).
Қызыл сары-қызғылт түсті қабықпен қапталған, үшбұрыш пішінді, бір жақ бетінде “7.5” өрнегі, келесі бетінде таңбасы бар таблеткалар (7.5 мг доза үшін).
Фармакотерапиялық тобы
Жүрек ауруларын емдеуге арналған препараттар. Жүрек ауруларын емдеуге арналған басқа да препараттар. Басқа да кардиотонустық препараттар. Ивабрадин
АТХ коды С01ЕВ17
Фармакологиялық қасиеттері
Фармакокинетикасы
Сіңуі және биожетімділігі
Ішу арқылы қабылдағаннан кейін ивабрадин асқазан-ішек жолында тез және толық дерлік сіңеді. Аш қарынға қабылдаған кезде препараттың плазмадағы концентрациясы ең жоғарғы шегіне шамамен 1 сағаттан кейін жетеді. Абсолютті биожетімділігі ішек және бауыр арқылы алғаш өту әсері салдарынан 40%-ға жуықты құрайды. Ас қабылдау сіңуді шамамен 1 сағатқа баяулатады және плазмадағы экспозицияны 20-30%-ға арттырады. Таблетканы тамақтану кезінде қабылдау экспозицияның ауытқуларын төмендеуге мүмкіндік жасайды.
Таралуы
Ивабрадин плазма ақуыздарымен шамамен 70%-ға байланысады, таралу көлемі 100 л-ге жуық. 5 мг дозаны күніне 2 рет ұдайы қабылдаған кезде плазмадағы ең жоғары концентрациясы (Cmax) 22 нг/мл құрайды (ауытқу коэффициенті (СV) = 29%). Плазмадағы орташа концентрациясы 10 нг/л құрайды (ауытқу коэффициенті СV) = 38%).
Биотрансформациясы
Ивабрадин Р450 3А4 (СYР3А4) цитохромымен тотығу жолымен бауырда және ішекте елеулі дәрежеде метаболизденеді. Негізгі метаболиті N-деметилденген метаболит (S 18982) болып табылады, оның экспозициясы бастапқы қосылыстың шамамен 40%-ын құрайды. Бұл белсенді заттың метаболизміне де СYР3А4 қатысады.
Шығарылуы
Ивабрадиннің плазмадан негізгі жартылай шығарылу кезеңі 2 сағатты (фармакокинетикалық қисық астындағы ауданның (АUС) 70-75%-ы), ал ақырғы жартылай шығарылу кезеңі – 11 сағатты құрайды. Жалпы клиренсі шамамен минутына 400 мл, бүйректік клиренсі – минутына 70 мл-ге жуықты құрайды. Метаболиттердің шығарылуы несеппен және нәжіспен бірге бірдей дәрежеде жүреді. Ішу арқылы қабылданатын дозаның 4%-ға жуығы несеппен бірге өзгермеген күйінде шығарылады.
0,5 мг-ден 24 мг-ге дейінгі дозаларда ивабрадиннің кинетикасы дозаға байланысты болып табылады.
Ерекше клиникалық жағдайлардағы фармакокинетикасы
Егде жастағы пациенттер: ≥ 60 жас пен ≥ 75 жастағы пациенттер және тұтас популяциялар арасында фармакокинетикалық айырмашылықтар (АUС және Cmax) байқалған жоқ.
Препаратты бүйрек жеткіліксіздігі бар (креатинин клиренсі - 15-60 мл/мин) пациенттерге тағайындаған кезде, ивабрадиннің және оның негізгі S 18982 метаболитінің жалпы шығарылуына бүйректік клиренсінің қатысуының төмен (20%-ға жуық) болуына байланысты, фармакокинетикалық көрсеткіштеріндегі өзгерістер өте шектеулі.
Бауыр жеткіліксіздігі жеңіл (Чайлд-Пью шкаласы бойынша 7 балға дейін) пациенттерде ивабрадиннің және оның негізгі белсенді метаболитінің байланыспаған АUС мәні, бауыр функциясы қалыпты адамдардағыға қарағанда, шамамен 20% жоғары.
Фармакодинамикасы
Кораксан – синустық-жүрекшелік түйін жасушаларының кездейсоқ диастолалық деполяризациясында негізгі рөл атқаратын және жүректің жиырылу жиілігін реттейтін жүрек ырғағы жетекшісінің If өзекшесін іріктеп және арнайы тежейтін брадикардиялық препарат. Жүрекке әсері синустық түйінге ерекше әсер етуіне негізделеді. Препарат жүрекшеішілік, атриовентрикулярлық немесе қарыншаішілік өткізу уақытына, миокардтың жиырылу белсенділігіне (теріс инотропты әсерсіз) және қарыншалық реполяризацияға ықпалын тигізбейді.
Адамда ивабрадиннің негізгі фармакодинамикалық қасиеттері жүректің жиырылу жиілігінің (ЖЖЖ) өзіне тән ерекше, дозаға байланысты төмендеуі болып табылады. Күніне 2 рет 20 мг-ден асатын дозаларында ЖЖЖ төмендеуіне талдама жасау плато әсерінің басталуына үрдісін көрсетеді, бұл ауыр брадикардияның басталу қаупін қысқартады (минутына 40 рет соғудан аз). Ұсынылған дозаларда қабылдаған кезде ЖЖЖ азаюы тыныштық және дене жүктемесі кезінде де шамамен минутына 10 рет соғуды құрайды. Бұл жүрекке түсетін жүктеменің және миокардтың оттегіні пайдалануының төмендеуіне әкеледі.
Кораксан көздің торқабығының Ih өзекшесімен өзара әрекеттесуі мүмкін, ол If өзекшесіне көп жағынан ұқсас. Ол көру жүйесінің уақытша шешімді қабілетіне қатысады, өйткені торқабықтың жарқыраған жарықпен стимуляциялануына реакциясын ықшамдайды. Белгілі бір жағдайларда (мысалы, жарықтың тез өзгерулерінде) Кораксан Ih электрлік импульсін ішінара тежейді, ол кейде кейбір пациенттерде жарықты сезінудің (фосфендердің) пайда болуына әкеледі, олар көру өрісінің шектеулі бөлігінде күшті жарқырауларды қысқа мерзімдік сезінулер түрінде сипатталады.
Препараттың күніне 2 рет 5 мг дозадағы тиімділігі емдеуді бастағаннан кейін 3-4 аптаның ішінде білінеді. Тәулігіне екі рет 7,5 мг доза үшін де тиімділігі расталған. Препарат белсенділігінің өте төмен кезінде дене жүктемесінің жалпы ұзақтығы күніне 2 рет 5 мг дозаны бір ай қабылдағаннан кейін шамамен 1 минутқа артады; одан кейінгі 25 секундқа дерлік артуы күніне 2 рет 7,5 мг-ге дейін жеделдетілген титрмен бірге қосымша үш айлық кезеңнен кейін болады. Күніне 2 рет қабылдаған кезде 5 және 7,5 мг дозалардың тиімділігі дене жүктемесімен бірге тестілеу параметрлері (жүктеменің жалпы ұзақтығы, шектеулі стенокардияның басталуына дейінгі уақыт, стенокардия басталғанға дейінгі уақыт және ST сегментінің 1 мм-ге депрессиясы пайда болғанға дейінгі уақыт) бойынша байқалады. Бұл тиімділік стенокардия ұстамалары жиілігінің шамамен 70%-ға төмендеуімен қатарлас жүреді. Препаратты күніне 2 рет қабылдаған кезде 24 сағат ішінде әсер етуінің біркелкі тиімділігін қамтамасыз етеді.
Кораксан препаратын күніне 1 рет 50 мг атенололмен біріктіріп қабылдағанда препараттың ең төмен белсенділігі кезінде (ішу арқылы қабылдағаннан кейін 12 сағаттан соң) дене жүктемесінің жағымдылығына жүргізілген тесттің параметрлерінде қосымша әсер білінеді.
Кораксан 3-4 айлық емдеу курсының ішінде өзінің тиімділігін толық сақтайды. Емделу кезінде фармакологиялық төзімділіктің даму белгілері немесе емдеуді кенеттен тоқтатқан кезде тоқтату синдромы байқалмайды.
ЖЖЖ-нің дозаға байланысты төмендеуіне және қос туынды деп аталатынның (систолалық артериялық қысымға (САҚ) көбейтілген ЖЖЖ-ның) тыныштық күйде және дене жүктемесі кезінде едәуір азаюына Кораксан препаратының жүрек қыспасына қарсы және ишемияға қарсы әсері түрткі болады. Препараттың артериялық қысымға (АҚ) және қантамырлардың шеткергі кедергілеріне ықпалы өте аз.
Қант диабеті бар пациенттерде жүрек қыспасына және ишемияға қарсы тиімділігі сақталады, мұндай кездегі қауіпсіздік бейіні қант диабетінен зардап шекпейтін пациенттердегі қауіпсіздік бейініне ұқсас.
ЖЖЖ-нің ұзақ уақытқа төмендеуі кем дегенде 1 жыл бойы қабылдаған кезде байқалады. Глюкоза мен майлардың метаболизміне ықпалы болмайды.
Фатальді және фатальді емес миокард инфарктісіне байланысты ауруханаға жатқызу жиілігінің 36%-ға (р=0,001), коронарлы реваскуляризация қажеттілігі жиілігінің 30%-ға (р=0,016), тұрақты стенокардиясы бар пациенттердің жүрек-қантамыр ауруларынан өлім жиілігінің 24%-ға (р=0,05) төмендеуі және жедел миокард инфарктісіне байланысты ауруханаға жатқызу деңгейінің 42%-ға (р=0,021) дейін едәуір төмендегені айқын дәлелденді. Жедел фатальді және фатальді емес миокард инфарктісіне байланысты ауруханаға жатқызу қаупінің бұл төмендеуі стенокардиясы бар және ЖЖЖ минутына >70 рет болатын пациенттерде бұдан да жоғары болды (73%, р=0,002).
Жүректің созылмалы жеткіліксіздігінің орташа және ауыр симптомдары бар, сол жақ қарыншадан лықсыту фракциясы төмендеген (LVEF ≤35%), стандартты ем (β-блокаторлар, АКФ тежегіштері және/немесе ангиотензин ІІ рецепторларының антагонистері, диуретиктер, антиальдостеронды препараттар) қабылдап жүрген пациенттерде ивабрадинді қосқан кезде жүрек-қантамырдан өлудің және жүрек жеткіліксіздігінің өршуіне байланысты ауруханаға жатқызудың статистикалық тұрғыдан маңызды 18%-ға төмендеуі байқалатыны дәлелденді (ивабрадин/плацебо қаупінің арақатынасы: 0,82, СА 95% [0.75;0.90] – р<0.0001). Қауіптің абсолютті төмендеуі 4,2% құрады. Емдеу әсері емдеуді бастағаннан кейін 3 ай ішінде білінді. Қауіп пациенттің жасына, жынысына, NYHA класына, β-блокаторлар қабылдауына, ишемиялық немесе ишемиялық емес этиологиясына, жүрек қызметінің жеткіліксіздігіне және сыртартқыдағы диабетке немесе гипертензияға қарамай-ақ, біртіндеп төмендеді. Ивабрадинмен 1 жыл бойы емдеу жүрек-қантамырлық бір өлімді немесе әрбір 26-шы пациентте жүрек қызметінің жеткіліксіздігімен ауруханаға жатқызылуын болдырмауға жәрдемдеседі. Бұдан басқа, ивабрадин қабылдап жүрген пациенттерде (887 (28%)), плацебо қабылдаған пациенттермен 776 (24%) салыстырғанда, NYHA класы бойынша едәуір жақсару байқалды (р=0,001).
Ивабрадинмен емдеу ЖЖЖ бастапқы, минутына 80 соғу мәнінен орташа алғанда минутына 15 соғуға төмендеуімен қатар жүрді, ол емдеу кезеңі бойы сақталды.
Қолданылуы
-
жүректің коронарлық ауруынан зардап шегіп жүрген, синустық ырғағы қалыпты және ЖЖЖ ырғағы минутына ≥ 70 соғатын пациенттерде созылмалы тұрақты стенокардияны емдеуде:
– бета-блокаторлар жақпағанда немесе қолдануға болмайтын жағдайларда
– жағдайының бета-блокаторлардың оңтайлы дозасымен бақылануы талапқа сай болмаған (жеткіліксіз болған) пациенттерде бета-блокаторлармен біріктіріп, NYHA (Нью-Йорк кардиологиялық ассоциациясы) жіктемесі бойынша, систола дисфункциямен жүретін жүректің II-IV дәрежелі созылмалы жеткіліксіздігін емдеуде, синустық ырғағы, жүректің созылмалы жеткіліксіздігінің клиникалық симптомдары бар және ЖЖЖ минутына ≥ 75 соғатын пациенттерде бета-блокаторларды қоса, стандартты еммен бірге, сондай-ақ бета-блокаторлар жақпағанда немесе қолдануға болмайтын жағдайда
Қолдану тәсілі және дозалары
Созылмалы тұрақты стенокардияны емдеу
Бастапқы ұсынылатын дозасы 75 жастан кіші пациенттерде күніне 2 рет 5 мг құрайды. 3-4 апта қолданғаннан кейін егер пациентте әлі де симптомдары болмаса, егер бастапқы дозасының жағымдылығы жақсы болса және тыныштық кезіндегі ЖЖЖ минутына 60 реттен артық соғатын болса, тәулігіне екі рет 2,5 мг немесе тәулігіне екі рет 5 мг қабылдап жүрген пациенттерге, дозасын келесі белгіленгенге дейін арттыруға болады. Демеуші дозасы тәулігіне екі рет 7,5 мг аспауы тиіс.
Егер емдеу басталғаннан кейінгі 3 ай ішінде стенокардия симптомдары жақсармаса, ивабрадинді тоқтату керек.
Таблеткаларды күніне 2 рет – таңертең және кешке тамақтану кезінде ішу арқылы қабылдаған жөн.
Егер емдеу кезінде ЖЖЖ тыныштық кезінде минутына 50 рет соғудан аспаса немесе пациентте брадикардияға байланысты симптомдар (бас айналуы, шаршау, гипотензия) байқалса, дозасы күніне 2 рет 2,5 мг дейінгі ең төменгі дозасына жеткенше азаю жағына қарай титрленуі тиіс (5 мг 1/2 таблетка күніне екі рет). Дозасын төмендеткеннен кейін ЖЖЖ бақылауды жалғастыра беру керек.
Егер жүректің жиырылу жиілігі минутына 50 рет соғудан төмен болып қалса немесе брадикардия симптомдары қайтпаса, емдеуді тоқтатқан жөн.
Созылмалы жүрек жеткіліксіздігін емдеу
Бастапқы ұсынылатын дозасы күніне 2 рет 5 мг құрайды. 2 апта емдегеннен кейін доза, егер тыныштық кезінде ЖЖЖ минутына 60 соғудан тұрақты түрде төмендемесе, доза күніне 2 рет 7,5 мг дейін арттырылуы мүмкін. Егер ЖЖЖ минутына 50 соғудан тұрақты түрде аспаса немесе бас айналу, шаршау немесе гипотензия сияқты брадикардияның қатар жүретін симптомдары байқалған жағдайда, доза күніне 2 рет 2,5 мг дейін азайтылуы мүмкін (5 мг 1/2 таблетка күніне екі рет).
Егер ЖЖЖ минутына 50 бастап 60 рет соғуды құраса, күніне 2 реттік 5 мг доза өзгермеген күйінде қалады.
Егер емдеу кезінде тұрақты түрде ЖЖЖ тыныштық күйінде минутына 50 соғу деңгейінен жоғары немесе пациентте брадикардия симптомдары байқалған жағдайда және одан көбірек соғу деңгейінде қалса, препараттың күніне 2 рет 7,5 мг немесе 5 мг дозасын азаю жағына қарай 1 қадам титрлеу қажет.
Егер препаратты күніне екі рет 2,5 немесе күніне екі рет 5 мг дозада алатын пациенттерде тыныштық күйінде ЖЖЖ минутына 60 рет соғу деңгейінде тұрақтап қалса, препарат дозасы көбею жағына қарай бір қадам титрленуі мүмкін.
Егер ЖЖЖ минутына 50 рет соғудан төмен күйінде қалса немесе брадикардия симптомдары кетпесе, емдеуді тоқтатады.
Егде жастағы пациенттер
75 жас шамасындағы және одан үлкен пациенттерге төменірек бастапқы дозасын – күніне 2 рет 2,5 мг тағайындаған жөн (5 мг 1/2 таблетка күніне екі рет). Ары қарай препараттың дозасын арттыруға болады.
Бүйрек жеткіліксіздігі
Бүйрек жеткіліксіздігі бар және креатинин клиренсі минутына 15 мл-ден астам болатын пациенттер үшін дозасын түзетудің қажеті жоқ. Препаратты бүйрек жеткіліксіздігі бар, креатинин клиренсі минутына 15 мл-ден төмен болатын пациенттерге қолданғанда сақ болған жөн.
Бауыр жеткіліксіздігі
Бауыр жеткіліксіздігінің жеңіл дәрежесі бар пациенттер үшін дозасын түзету қажет емес. Препаратты орташа дәрежелі бауыр жеткіліксіздігі бар пациенттерге тағайындағанда сақ болған жөн.
Педиатриялық популяция
Ивабрадиннің балалар мен 18 жасқа дейінгі жасөспірімдердегі қауіпсіздігі мен тиімділігінің зерттелуі жеткіліксіз. Препаратты пациенттердің осы санатында қолданылуы жөнінде деректер жоқ.
Жағымсыз әсерлері
Өте жиі (≥1/10)
– әдетте, емнің алғашқы 2 айында пайда болатын жарықты сезіну (фосфендер) («Фармакодинамикасы» бөлімін қараңыз), содан кейін қайтадан пайда болуы мүмкін. Фосфендер емдеу кезеңінде (көп жағдайларда (77,5%)) немесе ол аяқталғаннан кейін тоқтайды
Жиі (≥1/100, <1/10)
– брадикардия, әсіресе емнің алғашқы 2-3 айында
– І дәрежелі атриовентрикулярлық блокада
– қарыншалық экстрасистолалар
– жүрекшелердің фибрилляциясы
– көру жітілігінің бұзылуы
– бақыланбайтын артериялық қысым
– бас ауыруы, әдетте емнің алғашқы айы ішінде
– брадикардиямен байланысты болуы мүмкін бас айналуы
Жиі емес (≥1/1000, <1/100)
– жүректің жиі қағуы, қарыншаүстілік экстрасистолалар
– вертиго
– ентігу
– гипотензия, брадикардиямен байланысты болуы мүмкін
– бұлшықет құрысулары
– жүрек айнуы, іштің қатуы, диарея
– гиперурикемия, эозинофилия
– естен тану, брадикардиямен байланысты болуы мүмкін
– ангионевроздық ісіну
– тері бөртпесі
– көзге қос көріну, көрудің бұзылуы
– астения, брадикардиядан туындауы мүмкін
– қажу, брадикардиямен байланысты болуы мүмкін
– қандағы креатинин деңгейінің жоғарылауы
– ЭКГ-да QT аралығының ұзаруы
Сирек (³1/10000, <1/1000)
– эритема, қышыну, есекжем
– жайсыздық, брадикардиядан болуы мүмкін
Өте сирек (<1/10000)
– жыпылықтағыш аритмия
– ІІ дәрежелі атриовентрикулярлық блокада
– ІІІ дәрежелі атриовентрикулярлық блокада
– синустық түйіннің әлсіздігі синдромы
Қолдануға болмайтын жағдайлар
– белсенді затына немесе қосымша заттардың біріне жоғары сезімталдық
– емді бастағанға дейін ЖЖЖ тыныштық күйде минутына 70 соғудан төмен
– кардиогенді шок
– жедел миокард инфарктісі
– ауыр гипотензия ( 90/50 мм с.б.)
– бауырдың ауыр жеткіліксіздігі
– синустық түйін әлсіздігі синдромы
– синоатриальді блокада, тұрақсыз немесе жедел жүрек жеткіліксіздігі
– электрокардиостимулятордың болуы (егер ЖЖЖ электрокардиостимуляторға ғана байланысты болса)
– тұрақсыз стенокардия
– ІІІ дәрежелі атриовентрикулярлық блокада
– Р450 3А4 цитохромының күшті тежегіштерімен: зеңге қарсы азольді препараттар (кетоконазол, итраконазол), макролидті антибиотиктер (кларитромицин, ішу арқылы қабылданатын эритромицин, джозамицин, телитромицин), АИТВ-протеаза тежегіштері (нелфинавир, ритонавир), және нефазодонмен біріктірілген ем
-
ЖЖЖ төмендететін CYP3A4 орташа тежегіштері болып табылатын верапамилмен немесе дилтиаземмен біріктірілген ем
– жүктілік және лактация кезеңі, контрацептивтік дәрілер қолданбайтын бала туатын жастағы әйелдер
– балалар және 18 жасқа дейінгі жасөспірімдер
Дәрілермен өзара әрекеттесуі
Ивабрадинді QT аралығын ұзартатын, мысалы, мына препараттармен біріктіріп қолдануға болмайды:
– жүрек-қантамыр препараттары: хинидин, дизопирамид, бепридил, соталол, ибутилид, амиодарон
– жүрек-қантамырлары жүйесі ауруларын емдеуге арналмаған препараттар (пимозид, зипразидон, сертиндол, мефлокин, галофантрил, пентамидин, сизаприд, көктамыр ішіне енгізуге арналған эритромицин)
Калий жинақтаушы диуретиктер (тиазидтік және ілмектік диуретиктер): гипокалиемия аритмияның пайда болу қаупін арттыруы мүмкін. Ивабрадин брадикардияны туындататын болғандықтан, гипокалиемия мен брадикардияның алынған біріктірілімі, туа біткендігіне немесе дәрілерден туындағандығына байланыссыз QT аралығының ұзару синдромы бар пациенттерде ауыр аритмияның көріністеріне бейім факторлар болып табылады.
Мұндай біріктірілімдерді тағайындау қажет болған кезде жүректің жұмысына мұқият мониторинг жүргізген жөн.
Ивабрадинді, плазмада ивабрадин концентрациясының жоғарылауына және брадикардияның шамадан тыс пайда болу қаупіне байланысты, СYР3А4 ферментінің күшті тежегіштерімен (зеңге қарсы азольді препараттар (кетоконазол, итраконазол), макролидті антибиотиктер (кларитромицин, ішу арқылы қабылданатын эритромицин, джозамицин, телитромицин), АИТВ-протеаза тежегіштері (нелфинавир, ритонавир), нефазодон) біріктіріп қолдануға болмайды.
CYP3A4 изоферментінің күшті тежегіштері - кетоконазол (200 мг тәулігіне бір рет) және джозамицин (1 г тәулігіне екі рет) - плазмада ивабрадин орташа экспозициясының 7-8 есе ұлғаюына әкелген.
Препаратты СYР3А4 орташа тежегіштерімен (дилтиазем, верапамил, флуконазол) біріктіріп қолдануға болмайды. Тыныштық кезінде ЖЖЖ минутына 60 рет соғудан көбірек болған жағдайда, ЖЖЖ-ны бақылай отырып, күніне 2 рет 2,5 мг бастапқы дозада біріктіріп қабылдауға болады.
СYР3А4 индукторлары (рифампицин, барбитураттар, фенитоин, шілтерлі шайқурай (Hypericum perforatum) препараттары) плазмада ивабрадин концентрациясының төмендеуіне және белсенділігінің азаюына әкеледі. Бір мезгілде қабылдау ивабрадин дозасын түзетуді немесе жоғарыда аталған СYР3А4 индукторларының дозасын қысқартуды қажет етуі мүмкін. Ивабрадинмен емдеу кезінде шілтерлі шайқурай препараттарын қабылдауды қысқарту қажет.
Грейпфрут шырынын бір мезгілде қабылдау ивабрадиннің экспозициясын 2 есе арттырады, осыған байланысты ивабрадинмен емдеу кезінде грейпфрут шырынын пайдалануды азайту қажет.
Протонды насос тежегіштері (омепразол, лансопразол), силденафил, гидроксиметилглутарил-кофермент А-редуктаза тежегіштері (симвастатин), гидропиридиндер тобының кальций өзекшелерінің блокаторлары (амлодипин, лацидипин), дигоксин және варфарин ивабрадиннің фармакокинетикалық және фармакодинамикалық параметрлеріне клиникалық тұрғыдан маңызды өзара әсерін тигізбейді.
Ангиотензин өзгертуші фермент тежегіштерін, ангиотензин ІІ рецепторларының антагонистерін, диуретиктерді, әсер етуі қысқа және ұзаққа созылатын нитраттарды, фибраттарды, диабетке қарсы ішу арқылы қабылданатын препараттарды, аспиринді және басқа да антиагрегантты дәрілерді біріктіріп қабылдауға шектеулер жоқ.
Айрықша нұсқаулар
Кораксан созылмалы, тұрақты стенокардияны симптоматикалық емдеу үшін ғана тағайындалады, өйткені ол жүрек-қантамырлық нәтижелерге жағымды әсер етпейді.
ЖЖЖ уақыт өте келе айтарлықтай өзгеруі мүмкін екендігіне байланысты, ивабрадинмен емдеуді бастағанға дейін, сондай-ақ ивабрадинді қабылдауды бастап кеткен, бірақ дозасын титрлеу керек пациенттер жағдайында тыныштық күйіндегі ЖЖЖ анықтаған кезде жүрек ырғағының сериялық өзгерістерінің, ЭКГ немесе амбулаториялық 24 сағаттық мониторинг нәтижелері ескерілуі тиіс. Бұл, әсіресе ЖЖЖ минутына 50 реттен аз немесе дозасын төмендеткеннен кейінгі, жүректің жиырылу жиілігі төмен пациенттерге де қатысты.
Кораксан аритмиялардың емі мен профилактикасы үшін тиімсіз. Тахиаритмия дамыған жағдайда (мысалы, қарыншаүстілік немесе қарыншалық пароксизмальді тахикардия) оның өзінің тиімділігін жоғалту ықтималдылығы зор. Сондықтан препаратты жүрекшелердің фибрилляциясы бар немесе аритмиялардың синустық түйін функциясының төмендеуіне алып келетін басқа түрлері бар пациенттерге тағайындау ұсынылмайды.
Ивабрадинмен ем қабылдап жүрген пациенттерде жүрекшелер фибрилляциясының даму қаупі жоғары. Жүрекшелердің фибрилляциясы көбінесе амиодарон немесе аритмияға қарсы I класты күшті препараттарды біріктіріп қабылдап жүрген пациенттерде кездеседі.
Кораксан препаратын қабылдап жүрген пациенттерде жүйелі түрде жүрекшелердің фибрилляциясын (тұрақты немесе пароксизмальді) анықтауға арналған мониторинг жүргізіп отыру ұсынылады, клиникалық көрсетілімдері бар болса, мониторингке ЭКГ кірістірілуі тиіс.
Пациенттерге жыпылықтағыш аритмияның белгілері мен симптомдары туралы ескертіп қою және ондайлар туындаған жағдайда дәрігерге қаралуға кеңес беру керек.
Егер жыпылықтағыш аритмия емдеу кезінде басталса, ивабрадинмен емдеуді жалғастырудың пайдасы мен қаупінің арақатынасын мұқият саралау керек.
Қарыншаішілік өткізгіштіктің бұзылуымен (Гисс шоғырының сол жақ блокадасы, Гисс шоғырының оң жақ блокадасы) жүретін созылмалы жүрек жеткіліксіздігі және қарыншалық диссинхрониясы бар пациенттер талапқа сай бақылануы тиіс.
Препаратты ІІ дәрежелі атриовентикулярлық блокадасы бар пациенттерге тағайындау ұсынылмайды.
Кораксанды бастан өткерген инсульттен кейін бірден қабылдау ұсынылмайды.
Кораксан препаратын жеңіл немесе орташа артериялық гипотензиясы бар пациенттерге абайлап тағайындайды.
Жүрекшелердің фибрилляциясы немесе аритмиялардың басқа да түрлері бар пациенттерде, брадикардияның шамадан тыс пайда болуына қатысты деректер санының жеткіліксіздігін ескеріп, Кораксанның соңғы дозасын қабылдағаннан кейін 24 сағат ішінде тікелей токпен кардиоверсияны асығыс емес тәртіппен жүргізу мүмкіндігін қарастырған жөн.
Созылмалы жүрек жеткіліксіздігі
Ивабрадинмен емдеу алдында жүрек жеткіліксіздігі тұрақты болуы тиіс. Ивабрадин NYHA (Нью-Йорк кардиологиялық ассоциациясы) жіктемесі бойынша IV дәрежелі жүрек жеткіліксіздігі бар пациенттерде, осы санаттағы пациенттердегі деректер шектеулі болғандықтан, сақтықпен қолданылуы керек.
Ивабрадин көздің торқабығы функциясына әсерін тигізеді және қазіргі таңда торқабыққа уытты әсер етуіне айғақтамалар жоқ, бірақ ивабрадиннің ұзақ уақыт (бір жылдан астам) қабылдағандағы әсері белгісіз. Препаратты пигментті ретиниті (retinitis pigmentosa) бар пациенттерге тағайындаған кезде сақ болған жөн.
Кораксан препаратын жеңіл немесе орташа гипотензиясы бар пациенттерге тағайындағанда, деректердің жеткіліксіз болуына байланысты, сақ болған жөн.
Туа біткен QT синдромы бар пациенттерге немесе QT аралығын ұзартатын препараттарды қабылдап жүрген пациенттерде жүрек жұмысына мұқият мониторинг жүргізген жөн.
Ивабрадиннен туындаған жүректің жиырылу жиілігінің төмендеуі QT аралығының қосымша ұзаруын туғызуы, бұл ауыр аритмияға, оның ішінде екі бағыттағы тахикардияға әкелуі мүмкін.
Препараттың құрамында лактоза бар, осыған байланысты оны тұқым қуалайтын лактоза жақпаушылығы, Лапп лактаза тапшылығы бар немесе глюкоза мен галактозаның сіңуі бұзылған пациенттердің қабылдамағаны жөн.
Педиатрияда қолданылуы
Препаратты балаларға және 18 жасқа дейінгі жасөспірімдерге тағайындау ұсынылмайды.
Дәрілік заттың автокөлікті және қауіптілігі зор механизмдерді басқару қабілетіне ықпал ету ерекшеліктері
Препаратпен емдеу кезеңінде уақытша жарықты сезінулер, негізінен, фосфендер түрінде, болуы мүмкін, осыған байланысты, әсіресе түнгі уақытта, жарықтың кенеттен өзгеруі мүмкін болатын жағдайларда автокөлікті жүргізгенде немесе механизмдерді басқарғанда сақ болған жөн.
Артық дозалануы
Симптомдары: ауыр және ұзаққа созылған брадикардия.
Емі: симптоматикалық емдеу (изопреналинді көктамыр ішіне енгізу), қажет болған кезде – уақытша электрокардиостимуляция.
Шығарылу түрі және қаптамасы
14 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салады.
2 және 4 пішінді қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.
Сақтау шарттары
30°С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Қаптамасында көрсетілген жарамдылық мерзімі өткеннен кейін қолдануға болмайды.
Босатылу шарттары
Рецепт арқылы
Өндіруші
Les Laboratoires Servier Industrie (Ле Лаборатуар Сервье Индастри), Франция
Тіркеу куәлігінің иесі
Les Laboratoires Servier (Ле Лаборатуар Сервье), Франция
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы
«Les Laboratoires Servier SAS» компаниясының ҚР өкілдігі
050020, Алматы қ., Достық д-лы 310г, Бизнес орталығы, 3 қабат
Тел.: (727) 386 76 62, 386 76 63, 386 76 64, 386 76 70, 386 76 71
Факс: (727) 386 76 67
Электронды поштасы: kazadinfo@kz.netgrs.com