КОНФУНДУС®

КОНФУНДУС®

Жоқ

Дәрілік түрі, дозалануы

Таблеткалар

Жүйке жүйесі. Паркинсон ауруына қарсы препараттар. Допаминэргиялық препараттар. Допа және оның туындылары. Леводопа және карбидопа.

АТХ коды N04BA02

Паркинсон ауруы мен паркинсонизм синдромын емдеу үшін.

Қолданудың басталуына дейінгі қажетті мәліметтер тізбесі

- белсенді заттарына немесе қосымша заттарының кез келгеніне аса жоғары сезімталдық

- МАО іріктелмеген тежегіштерімен бір мезгілде қолдану (Б типті моноаминоксидазаның жекелеген тежегіштерінің, мысалы, селегилин гидрохлоридінің ұсынылған дозаларын қоспағанда)

- жабық бұрышты глаукома

- меланома немесе анамнезде меланоманың болуы

- этиологиясы белгісіз тері аурулары

- бауыр мен бүйректің ауыр жеткіліксіздігі

- ауыр психоздар

- жүктілік, лактация кезеңі

- балалар мен 18 жасқа дейінгі жасөспірімдерге

Қолдану кезіндегі қажетті сақтандыру шаралары

КОНФУНДУС® дәрілік препараттардан туындаған экстрапирамидалық бұзылыстарды емдеу үшін ұсынылмайды.

КОНФУНДУС® препаратын анамнезінде жүрек-қантамыр жүйесі мен өкпенің ауыр аурулары, бронх демікпесі, құрысулар болған, бүйрек, бауыр және эндокриндік жүйенің аурулары бар немесе анамнезінде асқазан мен он екі елі ішектің ойық жарасы болған (асқазан-ішек жолының жоғарғы бөлігінен қан кетуі мүмкін болғандықтан) пациенттерге сақтықпен тағайындау керек.

Леводопаны қолданған жағдайлардағы сияқты, КОНФУНДУС® препаратын миокард инфарктісін бастан өткерген немесе резидуальді жүрекшелік, түйінді немесе қарыншалық аритмиясы бар пациенттерге тағайындағанда, алдын-ала мұқият тексеру жүргізу қажет. Ондай пациенттерде жүрек қызметін, алғашқы дозасын тағайындағанда және дозаларын таңдау кезеңінде – аса мұқият қадағалау қажет.

Леводопаны қабылдағанда ұйқышылдық және қалғып кету жағдайлары сияқты жағымсыз құбылыстар білінген. Күнделікті қызмет барысында кенеттен, кей жағдайларда аңдаусыз немесе ескерту белгілерінсіз ұйықтап кету туралы хабарламалар аса сирек түсті. Пациенттерді бұдан хабардар ету және леводопамен емделу кезінде көлік құралдарын басқарғанда немесе қауіптілігі зор механизмдерді пайдаланғанда сақтық танытуға кеңес беру қажет.

Препаратты қабылдап жүрген пациенттердің барлығы, психикалық өзгерістерді, суицидтік пиғылдармен қатар жүретін депрессия синдромын анықтау үшін мұқият қадағалауда болуы тиіс. Психикалық бұзылыстары және мінез-құлық бұзылыстары бар (соның ішінде анамнезінде) пациенттер ерекше көңіл бөлуді керек етеді. Психоздық симптоматика күшейген жағдайда КОНФУНДУС® препаратын тоқтату қажет.

Бұрын леводопаны қабылдаған пациенттерде дискинезия байқалуы мүмкін, өйткені, карбидопа миға леводопаның көп мөлшерінің жетуіне мүмкіндік береді, және сол арқылы, дофаминнің көп мөлшері түзіледі. Дискинезияның пайда болуы дозасын төмендетуді қажет етуі мүмкін.

Леводопа сияқты, КОНФУНДУС® еріксіз қимыл-қозғалыстар мен психикалық бұзылыстарды туғызуы мүмкін. Бұл реакцияларға мидағы дофамин мөлшерінің артуы түрткі болады деп шамаланады. Ол құбылыстар дозасын төмендетуді қажет етуі мүмкін. Емдеуді күрт тоқтатқан жағдайда қатерлі нейролептиктік синдромға ұқсас, бұлшықеттің сіресуімен, дене температурасының жоғарылауымен, психикалық бұзылыстармен және қан сарысуындағы креатинфосфокиназа деңгейінің жоғарылауымен көрініс беретін симптомдар кешені дамуы мүмкін. Сондықтан, препараттың дозасын күрт азайтқан немесе тоқтатқан жағдайда, әсіресе егер пациентер психозға қарсы дәрілерді қабылдап жүрсе, олардың жай-күйін мұқият бақылауға алу қажет.

Психотроптық дәрілік заттар мен КОНФУНДУС® препаратын бір мезгілде тағайындағанда сақтық шараларын қадағалау керек.

Леводопамен жағдайдағы сияқты, КОНФУНДУС® препаратымен ұзақ емдеу кезінде бауыр, қан түзу, жүрек-қантамыр жүйесі мен бүйрек функциясын мезгіл-мезгіл бақылап отыру ұсынылады.

Созылмалы ашық бұрышты глаукомасы бар пациенттерге препаратты сақтықпен және, емдеу кезінде көзішілік қысым ұдайы бақыланатын жағдайда тағайындау керек.

Егер жалпы анестезия қажет болса, онда КОНФУНДУС® препаратын пациентке сұйықтық пен дәрілерді пероральді қабылдауға рұқсат етілетін уақыт ішінде қабылдай беруіне болады.

Егер емдеу уақытша тоқтатылса, онда КОНФУНДУС® препаратын қабылдауды, пациент препаратты пероральді қабылдауға жағдайы келетіндей болғанда, әдеттегі дозасында қайта бастауға болады.

Эпидемиологиялық зерттеулер Паркинсон ауруы бар пациенттердің жалпы популяциямен салыстырғанда меланоманың даму қаупіне көбірек (шамамен 2-6 есе жиірек) ұшырайтындығын көрсетті. Қауіптің жоғарылауы Паркинсон ауруымен немесе осы ауруды емдеу үшін қолданылатын дәрілік препараттар сияқты басқа факторлармен байланысты-байланыссыз екендігі белгісіз.

Жоғарыда аталған себептер бойынша, пациенттер мен олардың қамқоршыларына меланомаларды анықтау үшін пациенттерді жүйелі түрде тексеріп отыру ұсынылады (КОНФУНДУС® препаратымен емдеуде), теріні мұндай тексерулерді білікті мамандар (мысалы, дерматологтар) мезгіл-мезгіл жүргізуі тиіс.

Кейбір зертханалық тестілердің нәтижелері

Леводопа мен карбидопа көптеген зертханалық тестілердің көрсеткіштерінде ауытқулар туғызады. Сондай-ақ, бұл КОНФУНДУС® препаратын қолданғанда да байқалуы мүмкін және атап айтқанда: сілтілік фосфатаза, аспартат-аминотрансфераза, аланин-аминотрансфераза, лактатдегидрогеназа, билирубин, мочевина, креатинин, несеп қышқылы деңгейлерінің өзгерістерін, сондай-ақ, Кумбстың оң тестісін қамтиды.

Бұдан өзге, гемоглобин мен гематокрит деңгейінің төмендеуі, қандағы глюкоза деңгейінің жоғарылауы, несепте лейкоциттер мен қанның пайда болуы байқалуы мүмкін.

Кетонурияны анықтау үшін тест жолақтары пайдаланылса, леводопа/карбидопа кетондық денелердің болуына қатысты жалған оң реакция тудыруы мүмкін.

Глюкозурияны анықтаудың глюкозооксидазалық әдісін пайдаланғанда жалған теріс нәтиже көрініс беруі мүмкін.

Дофамин реттелісінің бұзылуы синдромы (ДРБС) аддиктивтік бұзылыстарға жатады және леводопамен/карбидопамен ем қабылдап жүрген кейбір пациенттерде препаратты жоғары дозаларында пайдаланған кезде көрініс береді. Емдеуді бастар алдында пациенттерге және оларға күтім жасайтын адамдарға ДРБС даму қаупінің ықтималдығы жөнінде ескерту қажет (4.8 бөлімін қараңыз).

Импульс бақылануының бұзылулары

КОНФУНДУС® препаратымен емдеу кезінде пациенттерге импульс бақылануы бұзылуларының дамуына қатысты жүйелі түрде мониторинг жүргізілуі тиіс.

КОНФУНДУС® препаратымен емделу кезінде пациенттер ниеттерін бақылауда ұстау бұзылыстарының дамуына қатысты жүйелі түрде бақылануы тиіс. Пациенттер мен олардың қамқоршыларын, дофамин агонистерін және/немесе құрамында леводопа бар препараттарды, соның ішінде КОНФУНДУС® препаратын қолданып басқа дофаминергиялық емді қабылдаған пациенттерде тіркелген, импульсті бақылаудың бұзылуларының мінез-құлықтық симптомдары (мысалы, ойынқұмарлық, гиперсексуалдылық, либидо жоғарылауы, компульсивтік шығынданулар немесе сатып алулар, ішімдік ішу/шамадан тыс ас ішу) туралы хабардар ету қажет. Ондай симптомдар дамыған жағдайда емді түзету ұсынылады.

Басқа дәрілік препараттармен өзара әрекеттесуі

КОНФУНДУС® препараты мен келесі дәрілік препараттарды бір мезгілде қолданғанда сақтық таныту керек:

Гипертензияға қарсы препараттар

Гипотензиялық дәрілерді қабылдап жүрген пациенттерде КОНФУНДУС® препаратын қосу ортостатикалық гипотензияны туғызуы мүмкін. Сондықтан, КОНФУНДУС® препаратымен емдеудің басында гипотензиялық препараттың дозасын түзету қажет.

Антидепрессанттар

МАО тежегіштерін қабылдау КОНФУНДУС® препаратымен ем басталғанға дейін 2 апта бұрын тоқтатылуы тиіс. Леводопаны МАО тежегіштерімен (МАО-В іріктелген тежегішін қоспағанда) бір мезгілде қолданғанда қанайналым бұзылулары болуы мүмкін. Бұл леводопаның әсерінен допамин мен норадреналиннің жиналуына байланысты, олардың белсенділігінің жойылуын МАО тежегіштері тежейді. Соның нәтижесінде, қозудың, қан қысымы жоғарылауының, тахикардияның, беттің қызаруының, бас айналуының даму ықтималдығы жоғары.

Трициклдық антидепрессанттар мен КОНФУНДУС® препаратын біріктіріп қолданған жағдайларда артериялық қысымның жоғарылағаны және дискинезия туралы жекелеген хабарламалар бар.

Антихолинергиялық дәрілер

Антихолинергиялық дәрілер леводопаның сіңірілуіне және, сәйкесінше, пациенттің емге жауабына әсер етуі мүмкін.

Темір препараттары

Карбидопаның және/немесе леводопаның биожетімділігі темір сульфатын немесе темір глюконатын бір мезгілде қолданғанда төмендейді.

Басқа дәрілік заттар

Допаминнің D2-рецепторларының антагонистері (мысалы, фенотиазиндер, бутирофенондар, рисперидон), сондай-ақ, изониазид леводопаның емдік әсерін төмендетуі мүмкін.

Паркинсон ауруы кезінде фенитоин мен папаверинді қабылдаудың нәтижесінде леводопаның оң емдік әсерінің бөгелгені туралы деректер бар. Осы дәрілерді КОНФУНДУС® препаратымен бір мезгілде қабылдап жүрген пациенттер емдік әсерінің төмендеуін дер кезінде анықтау үшін мұқият бақылауды қажет етеді.

КОНФУНДУС® препаратын тубокураринмен, селегилинмен бір мезгілде қолданғанда артериялық гипотензияның туындау қаупі жоғарылайды.

Леводопа кейбір амин қышқылдарымен бәсекелесетіндіктен, ақуыз мөлшері жоғары диета ұстап жүрген кейбір пациенттерде оның сіңірілуі бұзылуы мүмкін.

Препаратты паркинсонизмге шалдыққан, құрамында пиридоксин гидрохлориді (В6 дәрумені) бар дәруменді препараттарды қабылдап жүрген пациенттерге қолдануға болады.

Арнайы сақтандырулар

Жүктілік және лактация кезеңі

Жүкті әйелдерде леводопа/карбидопаны қолдану туралы деректер жеткіліксіз. Жануарларға жүргізілген зерттеулердің нәтижелері ұрпақ өрбітуге уыттылығын көрсетті, адам эмбрионы мен шарана үшін ықтимал қаупі белгісіз. Сондықтан, препарат жүктілік кезінде тағайындалмайды.

Лактация кезеңінде леводопа/карбидопаны қолдану туралы деректер жеткіліксіз. Көптеген дәрілік заттар емшек сүтімен бөлінетіндіктен және емшек жасындағы балаларда елеулі жағымсыз реакциялардың туындау қаупі бар болғандықтан, препаратты лактация кезеңіндегі әйелге тағайындау қажет болған жағдайда, емшек емізуді немесе препаратпен емдеуді тоқтатудың мақсатқа сай болатындығына қатысты мәселені шешіп алу керек.

Фертильділік

Леводопа/карбидопаның зерттеулерінде фертильділікке жағымсыз реакциялары байқалған жоқ.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Ұйқышылдықтың және күтпеген жерден қалғып кету көріністерінің мүмкіндігіне байланысты, зейін қоюды талап ететін және көлік құралдары мен қозғалмалы механизмдерді басқаруды қажет ететін қызметпен шұғылдану ұсынылмайды.

Қолдану жөніндегі нұсқаулар

Дозалану режимі

КОНФУНДУС® препаратының оңтайлы тәуліктік дозасы әрбір пациент үшін мұқият таңдау арқылы анықталуы тиіс. Таблеткалардың құрамында 1:10 арақатынаста карбидопа мен леводопа бар.

Жалпы ережелер

Зерттеулер, шеткері дофа-декарбоксилаза карбидопамен, соңғысын тәулігіне шамамен 70-100 мг дозада қабылдағанда қанығатынын көрсетіп отыр. Карбидопаны азғантай мөлшерде қабылдап жүрген пациенттер жүрек айнуы мен құсуды бастан өткеруі мүмкін.

КОНФУНДУС® препаратын тағайындаған жағдайда, құрамында бір ғана леводопа барларын қоспағанда, паркинсонизмді емдеуге арналған стандартты дәрілерді қабылдауды жалғастыруға болады, бұл ретте олардың дозалары қайта таңдалуы тиіс.

Леводопаға қарағанда, біріктірілген КОНФУНДУС® препаратын қолданғанда емдік, және жағымсыз әсерлері жылдамырақ туындайтындықтан, дозасын таңдау кезеңінде пациенттерді мұқият қадағалау қажет. Атап айтқанда, леводопаға қарағанда КОНФУНДУС® еріксіз қимыл-қозғалыстарды жиірек туғызады. Олардың пайда болуы КОНФУНДУС® препаратының дозасын азайтуды қажет етуі мүмкін. Кейбір пациенттерде дозасының шамадан тыс болғандығының бастапқы белгісі блефароспазм болуы мүмкін.

Леводопамен емделген пациенттерді ауыстыру

Леводопаны қабылдау КОНФУНДУС® препаратымен емдеу басталғанға дейін кемінде 12 сағат бұрын тоқтатылуы тиіс (әсер етуі ұзартылған леводопа препараттарын қолдану жағдайында - 24 сағат бұрын). КОНФУНДУС® препаратының тәуліктік дозасы леводопаның алдыңғы тәуліктік дозасының шамамен 20%-ын қамтамасыз етуі тиіс.

1500 мг-ден астам леводопаны қабылдаған пациенттердің көпшілігі үшін ұсынылатын бастапқы дозасы тәулігіне 3 немесе 4 рет КОНФУНДУС® препаратының бір таблеткасын құрайды.

Демеуші ем

Емдеу жекелей жүргізілуі және жүргізілген емнен қажетті нәтиже алынатындай етіп таңдалуы тиіс. Егер леводопаның көп мөлшері қажет болса, дозасын тәулігіне 3-4 рет 1 таблеткаға дейін арттыруға болады.

Қажет болған жағдайда, КОНФУНДУС® препаратының дозасын күн сайын 1 таблеткаға немесе күнара ең жоғарғы дозасына – тәулігіне 8 таблеткаға жеткенге дейін арттыруға болады. Карбидопаның 200 мг-ден асатын тәуліктік дозасын қолдану тәжірибесі шектеулі.

Леводопаны декарбоксилазаның басқа тежегішімен қабылдап жүрген пациенттер

Пациенттерді декарбоксилазаның басқа тежегіштерімен біріктірілген леводопадан КОНФУНДУС® препаратына көшіргенде, дозасын КОНФУНДУС® препаратын қабылдағанға дейін кемінде 12 сағат бұрын тоқтату керек. КОНФУНДУС® препаратын басқа леводопа препараттарының, декарбоксилаза тежегіштерінің құрамындағы леводопаның дәл осындай мөлшерін қамтамасыз ететін дозасынан бастау қажет.

Паркинсон ауруына қарсы басқа агенттерді қабылдап жүрген пациенттер

Паркинсон ауруына қарсы басқа препараттарды (леводопадан басқасын) КОНФУНДУС® препаратымен бірге қолдануға болады, дозасын өндірушінің ұсынымдарына сәйкес түзету қажет.

Пациенттердің ерекше топтары

Балалар

КОНФУНДУС® препаратын кішкентай және орта жастағы балаларда қолданудың қауіпсіздігі мен тиімділігі анықталмаған және оны 18 жасқа дейінгі балаларды емдеу үшін қолдану ұсынылмайды.

Егде жастағы пациенттер

Егде жастағы пациенттерде леводопа мен карбидопаны қолданудың тәжірибесі зор. Препаратты егде жастағы пациенттерге тағайындайды.

Енгізу әдісі және жолы

Ішке қабылдауға арналған.

Артық дозалану жағдайында қабылдау қажет болатын шаралар

Симптомдары: жағымсыз әсерлердің күшеюі.

Емі - симптоматикалық (леводопаның артық дозалануы кезіндегі сияқты), алайда пиридоксин препараттың әсерін бейтараптандыру үшін тиімсіз. ЭКГ бақылауы, қажет болған жағдайда — аритмияға қарсы ем жүргізу керек.

Пациенттің басқа да препараттарды қолдануы мүмкіндігін ескеру керек. Диализді пайдалануға қатысты деректер жоқ.

Дәрілік препараттың бір немесе бірнеше дозасын өткізіп алған кезде қажетті шаралар

КОНФУНДУС® препаратының дозасын күрт төмендету кезеңінде пациенттерді мұқият бақылау қажет.

Тоқтату симптомдары қаупінің барын көрсету

Паркинсон ауруына қарсы препараттарды кенеттен тоқтатқанда, бұлшықеттердің сіресуін, дене температурасының жоғарылауын, психикалық бұзылуларды және сарысу креатинфосфокиназасы концентрациясының артуын қамтитын қатерлі нейролептиктік синдромды еске салатын симптомдар кешені сипатталды. Сондықтан оны тоқтату кезеңінде, әсіресе егер пациент нейролептиктерді қабылдап жүрсе, пациенттерді мұқият бақылау қажет.

Дәрілік препаратты қолдану тәсілін түсіну үшін медицина қызметкерінен кеңес алуға бару жөнінде нұсқаулар

Дәрілік препаратты қабылдамас бұрын дәрігердің немесе фармацевтің кеңесіне жүгініңіз.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар (қажет болса)

КОНФУНДУС® препаратын қолданғанда туындайтын жағымсыз әсерлері дофаминнің орталықтық нейрофармакологиялық әсерімен байланысты. Бұл реакцияларды әдетте, дозасын төмендету арқылы азайтуға болады. Анағұрлым көп таралған жағымсыз әсерлердің арасында хорея тәрізді түрін қоса, дискинезия, дистониялық және басқа да еріксіз қимыл-қозғалыстар, сондай-ақ, жүрек айнуы байқалады. Солардың негізінде дозасын төмендету туралы шешім қабылдануы мүмкін бастапқы белгілері, бұлшықеттердің тартылуы және блефароспазм болып табылады.

Клиникалық зерттеулер мен тіркеуден кейінгі кезеңнің деректері:

Жүрек-қантамыр жүйесі тарапынан бұзылулар: жүрек қағуы, артериялық гипотензия көріністерін қоса, ортостатикалық әсерлер, жүрек функциясының бұзылулары, артериялық гипертензия, флебиттер

Асқазан-ішек жолы тарапынан бұзылулар: диарея, құсу, асқазан-ішектен қан кетулер, он екі елі ішектің ойық жарасының дамуы, сілекейдің күңгірттенуі

Қан және лимфа жүйесі тарапынан бұзылулар: лейкопения, анемия (гемолиздік және гемолиздік емес), тромбоцитопения, агранулоцитоз

Тері және теріасты тіндері тарапынан бұзылулар: есежем, тері қышынуы, Шенлейн-Генох ауруы, қызару, алопеция, бөртпе, тер бездері секретінің қараюы, ангионевроздық ісіну, тершеңдік

Көру мүшесі тарапынан бұзылулар: диплопия, анық көрмеу, қарашықтың кеңеюі, окулогирлік криздер

Психика бұзылулары: ұйқының бұзылуы, елестеулер, суицидтік үрдістермен немесе оларсыз депрессия, сананың шатасуы, қозу, психоз жағдайларының көріністері (еліру мен параноидтық ойлауды қоса), патологиялық құмарлық, либидо жоғарылауы, гиперсексуалдылық, әсіресе, препаратты жоғары дозаларда қолданғанда (ол көріністер дозасын төмендеткен кезде немесе препаратпен емдеуді тоқтатқанда жоғалған), деменция, ұйқының бұзылулары

Тыныс алу, кеуде қуысы ағзалары және көкірек ортасы тарапынан бұзылулар: диспноэ

Бүйрек және несеп шығару жолдары тарапынан бұзылулар: несептің күңгірттенуі, несеп шығарудың іркілуі, несепті ұстай алмау, приапизм

Жалпы бұзылыстар: әлсіздік, естен танулар, қажу, кеуденің ауыруы, анорексия, бас ауыруы, дауыстың қарлығуы, дімкәстану, қан тебулер, қозу сезімі, тыныс алудың әдеттен тыс сипаты, қатерлі меланома

Келесі қосымша жағымсыз реакциялар леводопаны немесе леводопа / карбидопа біріктірілімін пероральді қабылдағанда байқалған және КОНФУНДУС® препаратын қолданған кезде туындауы мүмкін болды:

Асқазан ішек жолы тарапынан бұзылулар: ауыздың құрғауы, сілекей ағу, дисфагия, іш ауыруы және жайсыздық, іш қатуы, метеоризм, диспепсия, тілді ашыту сезімі, ауыздағы кермек дәм, кекіру, жүрек айнуы

Метаболизм және тамақтану бұзылулары: дене салмағының азаюы немесе артуы, ісінулер

Психика бұзылулары: астения, көру жітілігінің төмендеуі, бағдарсыздық, атаксия, ұю, қолдың дірілдеуінің күшеюі, бұлшықет құрысулары, тризм, жасырын Бернар-Горнер синдромының белсенуі, ұйқысыздық, мазасыздық, эйфория, құлап қалу, жүріс-тұрыстың бұзылулары және дофамин реттелісінің бұзылуы синдромы.

Леводопамен/карбидопамен ем қабылдап жүрген кейбір пациенттерде, дофамин реттелісінің бұзылуы синдромы (ДРБС) дамығаны байқалады, ол аддиктивтік бұзылыстарға жатады. Ол дофаминергиялық препаратты моторлық симптомдарды бақылауға алу үшін қажетті шамалардан артық дозаларда қолданғандағы компульсивтік бұзылыспен көрініс береді, бұл кей жағдайларда, ауыр дискинезиялардың пайда болуына алып келуі мүмкін.

Импульс бақылануының бұзылыстары

Дофамин агонистерін және/немесе КОНФУНДУС® препаратын қоса, құрамында леводопа бар басқа дофаминергиялық препараттарды қабылдап жүрген пациенттерде құмар ойындарға патологиялық құмарлық, либидо жоғарылауы және гиперсексуалдылық, компульсивтік шығынданулар немесе сатып алулар, шамадан тыс ас ішу және ас ішудегі компульсивтік мінез-құлық байқалуы мүмкін.

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек:

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препарат құрамы

Бір таблетканың құрамында

белсенді заттар: 250.0 мг леводопа, 25.0 мг карбидопа

қосымша заттар: желатинделген крахмал, микрокристалды целлюлоза PH 101, кросповидон, төмен орын басқан гидроксипропилцеллюлоза, микрокристалды целлюлоза РН 102, магний стеараты

Сыртқы түрінің, иісінің, дәмінің сипаттамасы

Дөңгелек пішінді, жалпақ, шеттері кертілген, ақтан ақ дерлік түске дейінгі, бір жағына «» өрнегі салынған және келесі жағы тегіс таблеткалар.

Шығарылу түрі және қаптамасы

Алюминий- алюминий фольгадан жасалған пішінді ұяшықты қаптамада 10 таблеткадан.

Пішінді ұяшықты 10 қаптамадан медициналық қолдану жөніндегі қазақ және орыс тілдеріндегі нұсқаулықпен бірге картоннан жасалған қорапшаға салынған.

2 жыл.

Жарамдылық мерзімі өткеннен кейін қолдануға болмайды.

Құрғақ, жарықтан қорғалған жерде, 25 ºС-ден аспайтын температурада.

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

Кусум Хелткер Пвт. Лтд.,

СП 289 (А), РИИКО Индл. Ареа Чопанки, Бхивади (Радж.), Үндістан

Тел: +91-11-41005147

факс: +91-11-40527575

Электронды пошта: info@kusum.com

Тіркеу куәлігінің ұстаушысы

Кусум Хелткер Пвт. Лтд.,

СП 289 (А), РИИКО Индл. Ареа Чопанки, Бхивади (Радж.), Үндістан

Тел: +91-11-41005147

факс: +91-11-40527575

Электронды пошта: info@kusum.com

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттардың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Дәрі-Фарм (Қазақстан)» ЖШС, Алматы қ., Қажымұқан к-сі, 22/5, «Хан-Тәңірі» БО, Қазақстан.

Тел/факс: 8(727) 295-26-50 

Электронды пошта: phv@kusum.kz