Коаксил®

• русский
• қазақша

• Скачать инструкцию медикамента

Саудалық атауы

Коаксил®

Халықаралық патенттелмеген атауы

Тианептин

Дәрілік түрі

Қабықпен қапталған 12,5 мг таблеткалар

Құрамы

Бір таблетканың құрамында

белсенді зат: натрий тианептині, 12,5 мг,

қосымша заттар: жүгері крахмалы, магний стеараты, маннитол, тальк,

қабықтың құрамы: натрий гидрокарбонаты, натрий-кармеллоза, араның ақ балауызы, титанның қостотығы (Е171), этилцеллюлоза, глицерол моноолеаты, полисорбат 80, повидон, сахароза, сусыз коллоидты кремнийдің қостотығы, тальк.

Сипаттамасы

Сопақша пішінді, ақ түсті қабықпен қапталған таблеткалар.

Фармакотерапиялық тобы

Психоаналептиктер. Басқа да антидепрессанттар. Тианептин

АТХ коды N06AX14

Фармакологиялық қасиеттері

Фармакокинетикасы

Ішке қабылдағаннан кейін тианептин асқазан-ішек жолынан тез және толығымен сіңіріледі.

Тианептин организмде жақсы таралады. Қан плазмасы ақуыздарымен елеулі түрде (94% жуық) байланысады.

Тианептин бауырда метаболизмге ұшырайды (бета-оксидация және N-деметилдену). Тианептиннің Т1/2 кезеңі 2,5 сағат құрайды, егде жастағы емделушілерде – 3,5 сағат.

Тианептин организмнен бүйрек арқылы шығарылады: негізгі бөлігі метаболиттер түрінде, 8% - өзгермеген түрде шығарылады.

Ерекше клиникалық жағдайлардағы фармакокинетикасы

Бүйрек жеткіліксіздігінде, сондай-ақ 70 жастан асқан емделушілерде және созылмалы ауруларға байланысты тұрақты дәрілік терапия алатын адамдарда Т1/2 1 сағатқа ұзарады.

Бауыр жеткіліксіздігінде (созылмалы алкоголизмі бар науқастарда бауыр циррозы болған кезде де) препараттың фармакокинетикалық параметрлері айтарлықтай өзгермейді.

Фармакодинамикасы

Коаксил® - трициклді туындылар тобының антидепрессаны. Коаксил® әсер ету механизмін ми қыртысы және гиппокамптың нейрондарымен серотониннің нейрональді кері қармауы жоғарылауымен байланыстырады. Пирамидалық жасушалардың өздігінен жүретін белсенділігін арттырады және функционалдық басылудан кейінгі олардың қалпына келу жылдамдығын жоғарылатады.

Көңіл-күйдің бұзылуына әсер ету сипаты бойынша седативтік және көтермелегіш антидепресанттардың арасында аралық орынды иеленеді. Коаксилді® қолдану кезінде соматикалық симптомдардың (атап айтқанда, эпигастрия аймағындағы ауырулар, жүрек айнуы, бас айналуы, бас ауыруы, жүрек қағуы, ыстықты сезіну, бұлшықеттердің ауыруы) азайғаны байқалады.

Коаксил® мінез-құлықты қалпына келтіреді және абстиненция кезеңінде созылмалы алкоголизмі бар емделушілер мінезі бұзылуларын түзетуге жағымды әсер етеді. Препарат жадыға, ұйқыға және зейін шоғырландыру қабілетіне теріс әсер етпейді, жүрек-қантамыр жүйесі функциясына әсер етпейді. Антихолинергиялық әсері жоқ, дағдылануды туындатпайды.

Қолданылуы

• ауырлығы әр түрлі дәрежедегі депрессиялық жағдайда

Қолдану тәсілі және дозалары

Ұсынылатын доза: 1 таблеткадан күніне 3 рет, таңертең, күндіз және кешке, негізгі тамақтанудың алдында.

70 жастан асқан емделушілерде препараттың дозасы күніне 2 таблеткадан аспауы тиіс. Емдеу курсының ұзақтығын емдеуші дәрігер белгілейді.

Жағымсыз әсерлері

Жиі

• анорексия, эпигастрия аймағының ауыруы, іштің ауыруы, ауыздың құрғауы, жүрек айнуы, құсу, іш қатуы, метеоризм,

• «шым-шытырық» түс көру, ұйқысыздық, ұйқышылдық, сананың шатасуы, елестеулер, экстрапирамидалық симптомдар, дискинезия

• бас ауыруы, бас айналуы, вертиго, липотимия, тремор

• тахикардия, экстрасистолия, кеуденің ауыруы, кенеттен қан кернеуі

• тыныстың тарылуы

• миалгиялар, омыртқа бел-сегізкөз бөлігінің ауыруы

• жалпы дімкәстік, тамақтағы «түйінді» сезіну

Жиі емес:

• макуло-папулездік немесе эритематозды бөртпе, тері қышынуы, есекжем, бірлі-жарым буллезді дерматит жағдайлары

Сирек:

• шамадан тыс қолдану және дәріге тәуелділік, әсіресе сыртартқыда есірткіге немесе алкогольге тәуелділігі бар 50 жасқа дейінгі адамдарда

Жиілігі анықталмаған:

• емдеу барысында немесе емдеуді тоқтатқаннан кейін қысқа мезгілде суицидтік ойлардың және суицидтік мінез-құлықтың туындауы

• гипонатриемия

• бауыр ферменттері деңгейінің жоғарылауы, гепатит, бірлі-жарым жағдайларда ауыр түрінде

Қолдануға болмайтын жағдайлар

• тианептинге немесе препарат қосымша заттарының біріне жоғары сезімталдық

• іріктелмеген МАО тежегіштерімен бір мезгілде қабылдау

• 15 жасқа дейінгі балаларда

• жүктілік, лактация кезеңі

Дәрілермен өзара әрекеттесуі

Жүрек-қантамырлық коллапс немесе пароксизмальді гипертензия, гипертермия, құрысулар және өліммен аяқталатын жағдайлардың даму қаупіне байланысты Коаксилді® іріктелмеген МАОТ бір мезгілде қабылдауға болмайды. МАОТ емдеуінің аяқталуы мен Коаксил® қабылдауды бастаудың арасындағы кезең 2 аптаны құрауы тиіс. Коаксилден® МАОТ ауысқан кезде өту кезеңі 24 сағатты құрайды. Антагонистік әсерін ескере отырып, Коаксилді® миансеринмен үйлестіру ұсынылмайды.

Айрықша нұсқаулар

Суицидтік әрекеті қаупінің болуы депрессия жағдайына тән болғандықтан, өзіне-өзі дене жарақатын салу және қол жұмсауға бейімділігі бар емделушілерге, сонымен қатар мұндай жағдайлар сыртартқыда болғанда, тұрақты ремиссия басталғанға дейін, әсіресе емнің басында ұдайы бақылап отыру қажет. Жалпы анестезия қажет болған кезде анестезиологты Коаксил® қабылдауы туралы хабардар етіп, препаратты операцияға дейін 24 немесе 48 сағат бұрын тоқтату керек.

Жедел жағдайларда оперативтік араласуды препаратпен емді алдын-ала тоқтатпай, бірақ операциядан бұрын және операция жүргізіліп жатқан кезде қатал бақылаумен жүргізуге болады.

Емді тоқтатқан кезде препараттың дозасын 7-14 күннің ішінде біртіндеп төмендету ұсынылады.

Препарат дозасын өздігінен арттырудың алдын алу мақсатында сыртартқыда есірткілік немесе алкогольдік тәуелділігі бар емделушінің жағдайын мұқият бақылап тұрған жөн.

Ұсынылған дозаны жоғарылатуға болмайды.

Препараттың құрамында сахароза бар, сондықтан фруктозаны көтере алмаушылық, мальабсорбцияның глюкоза-галактозалық синдромы, сондай-ақ сахараза-изомальтаза тапшылығы кезінде оны қабылдауға болмайды

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Дәріні қабылдау кезінде кейбір емдеушілерде зейін қою және реакция жылдамдығының бәсеңдеуі байқалуы мүмкін. Емделушілерге жоғары зейін қою және жылдамдығы жоғары психомоторлық реакцияларды талап ететін қауіптілігі зор жұмыс түрлерімен айналысудан тартына тұрған жөн.

Артық дозалануы

Артық дозалаудың барлық жағдайында препаратпен емдеуді дереу тоқтатып, емделушінің жағдайына бақылау жүргізіп тұру қажет (жүрек, өкпе, бүйрек функциясын, метаболизм жағдайын бақылау). Қажет болғанда асқазанды шаю және симптоматикалық ем жүргізу керек (ӨЖЖ, бүйрек функциясын және метаболизм бұзылуларын түзету).

Шығарылу түрі және қаптамасы

Поливинилхлоридті үлбірден және баспалы, лакталған алюминий фольгадан жасалған пішінді ұяшықты қаптамаға 30 таблеткадан салынған.

1 пішінді қаптамадан медицинада қолданылуы жөніндегі мемлекеттік және орыс тіліндегі нұсқаулықпен бірге картон пәшкеге салынған.

Сақтау шарттары

30°С-ден аспайтын температурада сақтау керек,

Балалардың қолы жетпейтін жерде сақтау керек!

Сақтау мерзімі

3 жыл

Дәрілік заттың сыртқы қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші ұйымның атауы мен елі

Les Laboratoires Servier Industrie (Ле Лаборатуар Сервье Индастри), Франция

Тіркеу куәлігі иесінің атауы мен елі

Les Laboratoires Servier, Франция