Клопилет

• русский
• қазақша

• Скачать инструкцию медикамента

Саудалық атауы

Клопилет

Халықаралық патенттелмеген атауы

Клопидогрел

Дәрілік түрі

Үлбірлі қабықпен қапталған 75 мг таблеткалар

Құрамы

Бір таблетканың құрамында

белсенді зат – 97.857 мг клопидогрел гидросульфаты

(75 мг клопидогрелге баламалы),

қосымша заттар: маннитол, миркокристалды целлюлоза (Avicel РН 101), гидроксипропилцеллюлоза (Klucel LF), кросповидон (Полиплаздон XL), орын алмастыруы төмен гидроксипропилцеллюлоза (LН-11), гидрогенизирленген майсана майы (Cutine HR PH), полиэтиленгликоль 6000 (уақ ұнтақ), қабығы: полиэтиленгликоль 6000 (уақ ұнтақ), гипромеллоза Е-5 2910 (Метоцел Е-5), тальк, титанның қостотығы (Е 171), темірдің (III) қызыл тотығы (E172).

Сипаттамасы

Дөңгелек пішінді, екі жақ беті дөңес, қызыл сары-қызғылт түсті үлбірлі қабықпен қапталған, бір жақ бетінде бөлетін сызығы бар таблеткалар.

Фармакотерапиялық тобы

Антикоагулянттар. Тромбоциттер агрегациясының тежегіштері.

АТЖ коды В01АС04

Фармакологиялық қасиеттері

Фармакокинетикасы

Күніне 75 мг дозаны бір рет және қайталап ішу арқылы қабылдағаннан кейін клопидогрел тез сіңеді. Өзгермеген клопидогрелдің орташа ең жоғары плазмалық концентрациясы (75 мг дозасын бір рет ішу арқылы қабылдағаннан кейін шамамен 2,2-2,5 нг/мл) препаратты қабылдағаннан кейін шамамен 45 минуттан соң байқалды. Несеппен бірге бөлініп шығатын клопидогрелдің метаболиттерінің негізінде сіңуі кем дегенде 50% құрайды.

Клопидогрел және қан айналымдағы негізгі (белсенді емес) метаболит плазма ақуыздарымен қайтымды байланысқа in vitro (тиісінше, 98% және 94%) түседі. Іn vitro жағдайында байланыс концентрацияның ауқымды диапазонында қанықпаған болып табылады.

Клопидогрел бауырда елеулі дәрежеде метаболизденеді. Іn vitro оқшауланатын белсенді тиол метаболиті тромбоциттердің рецепторларымен тез және қайтымды байланысып, осылайша тромбоциттердің агрегациясын басады. Негізгі метаболит – карбоксил қышқылының белсенді емес туындысы плазмада айналымдағы қосылыстың 85%-ға жуығын құрайды. Ол АДФ-нің (аденозиндифосфат) тромбоциттердің рецепторларымен байланысуын селективті түрде және қайтымсыз бөгеп, олардың белсенділенуін басады, қызмет атқарып тұрған АДФ-рецепторлардың мөлшерін азайтады, фибриногеннің сіңуіне кедергі жасайды және тромбоциттердің агрегациясын тежейді. Осы метаболиттің қан плазмасындағы ең жоғары концентрациясы (Сmax) препаратты қабылдағаннан кейін 1 сағаттан соң анықталады және қайталап қабылдағаннан кейін клопидогрел 3 мг/л-ге жуықты құрайды. Негізгі айналымдағы метаболиттің фармакокинетикасы (плазмадағы концентрация деңгейі дозаларға байланысты артады) клопидогрелдің 50 мг-нан 150 мг-ға дейінгі шектегі дозасына байланысты.

75 мг дозаны ішу арқылы қабылдағаннан кейін клопидогрелдің жартылай шығарылу кезеңі шамамен 6 сағатты құрайды. Негізгі айналымдағы (белсенді емес метаболиттің) жартылай шығарылу кезеңі (Т1/2) препаратты бір рет және қайталап қабылдағаннан кейін 8 сағатты құрайды.

Фармакодинамикасы

Клопидогрелдің метаболиттерінің біреуі тромбоциттердің агрегациясының тежегіші болып табылады. Клопидогрел тромбоциттердің агрегациясын төмендететін белсенді метаболит түзілуі үшін CYP450 ферменттерімен метаболизденуі тиіс. Клопидогрелдің белсенді метаболиті аденозиндифосфаттың (AДФ) тромбоцитте орналасқан өзінің P2Y12 рецепторымен, және кейін GPIIb/IIIa гликопротеинді кешенінің АДФ белсенділенуі арқылы байланысқа түсуіне селективті түрде кедергі жасайды, осылайша тромбоциттердің агрегациясын төмендетеді. Пайда болған байланыстың қайтымсыздығы салдарынан әсерге ұшыраған тромбоциттер өзінің тіршілігінің барлық қалған кезеңінде (шамамен 7-10 күн) зақымданады, тромбоциттердің қалыпты қызметінің қалпына келуі тромбоциттердің жаңару жылдамдығына сай жылдамдықпен жүреді. АДФ-ден айырмашылығы бар агонистер әсерінен тромбоциттердің агрегациясы да АДФ-нің босап шығуынан тромбоциттердің таралу белсенділігінің бөгелуі арқылы басылуы мүмкін.

Клопидогрелдің күніне 75 мг дозасын қайталап қабылдау алғашқы күннен бастап-ақ АДФ әсерінен тромбоциттердің агрегациясының едәуір төмендеуін қамтамасыз етті; бұл әсері үдеп күшейді және 3 және 7 күн арасында тепе-тең жағдайдағы сатыға жетті. Тепе-тең жағдайдағы сатыда күніне 75 мг дозада байқалған тежелудің орташа дәрежесі 40%-дан 60%-ға дейінді құрады. Тромбоциттердің агрегациясы және қан кету уақыты емдеуді тоқтатқаннан кейін, әдеттегідей, 5 күннен соң бастапқы қалпына біртіндеп оралды.

Қолданылуы

Ересектерде атеротромботикалық бұзылулардың алдын алу үшін қолданылады:

- миокард инфарктісі (бірнеше күннен 35 күннен азға дейін), ишемиялық инсульті (7 күннен бастап 6 айдан азға дейін) бар науқастарға, немесе шеткергі артериялар аурулары анықталған науқастарға;

- жедел коронарлы жеткіліксіздігі синдромы бар науқастарға:

• • ST сегменті жоғарыламайтын жедел коронарлы жеткіліксіздік синдромында (тұрақсыз стенокардия немесе Q тісшесінсіз миокард инфарктісі), соның ішінде тері арқылы коронарлы араласым барысында коронарлы стент орналастырылатын науқастарға ацетилсалицил қышқылымен (АСҚ) бірге,

  • ST сегменті жоғарылайтын жедел миокард инфарктісінде, тромболитикалық ем жүргізу үшін жарамды дәрі-дәрмекпен емделетін науқастарда АСҚ-мен біріктіріп.

Қолдану тәсілі және дозалары

Ересектерге. Клопилеттің ұсынылатын дозасы ас қабылдауға қарамай-ақ тәулігіне 1 таблетканы (75 мг) құрайды.

Ең жоғары бір реттік және тәуліктік доза – 75 мг.

Емдеу курсының ұзақтығын емдеуші дәрігер анықтайды.

Егде жастағы емделушілер немесе бүйрек қызметі бұзылған емделушілер үшін дозаны ерекше таңдаудың қажеттілігі жоқ.

Бүйрек қызметінің бұзылуы

Клопилет бүйрек қызметінің бұзылуы ауыр науқастар қабылдамауы тиіс. Бүйрек қызметінің әлсіз және орташа дәрежелі жеткіліксіздігі бар науқастарды емдеу тәжірибесі шектеулі, сондықтан препарат бұл науқастарға сақтықпен қолданылуы тиіс.

Бауыр қызметінің бұзылуы

Клопилетті бауыр қызметінің бұзылуы ауыр науқастардың қабылдауына болмайды. Бауырдың орташа айқын аурулары бар, геморрагиялық диатез болуы ықтимал науқастарды емдеу тәжірибесі шектеулі, сондықтан препарат бұл науқастарға сақтықпен қолданылуы тиіс.

Жағымсыз әсерлері

• қан кетулер: асқазан-ішектік, бассүйекішілік, перитонеальді, өкпеден, мұрыннан, гематурия

• нейтропения, тромбоцитопения, эозинофилия

• қан кету уақытың ұзаруы

• жүректің айнуы, құсу, іштің ауыруы, диарея, диспепсия, іш қату, метеоризм

• гастрит, асқазан мен он екі елі ішектің ойық жарасы

• бас ауыру, бас айналу, ұйқысыздық

• тері бөртпесі, есекжем, қышу, пурпура

Сирек

• брадикардия

• әлсіздік

• вертиго

• аяқтардың құрысуы, парестезиялар, гипостезиялар

• подагра, гиперурикемия

• артрит, артроз

• цистит

• конъюнктивит, катаракта, көзішілік қан құйылулар (конъюнктивальді, окулярлы, ретинальді)

Өте сирек

• гемартроз, гематурия, қан түкіру, аллергиялық пурпура

• асқазан ойық жарасының тесілуі және қан кетуі

• ауыр тромбоцитопения (тромбоциттер саны <30х109/л), агранулоцитоз

• тромбоздық тромбоцитопениялық пурпура (ТТП)

• васкулит, артериялық гипотензия, шеткергі ісінулер

• колит (соның ішінде ойық жаралы немесе лимфоцитарлы), панкреатит, дәм сезімінің өзгеруі, стоматит

• бауыр қызметінің жедел жеткіліксіздігі, «А» гепатиті

• бауыр ферменттері белсенділігінің жоғарылауы, гипербилирубинемия

• апластикалық анемия, гипохромды анемия, гранулоцитопения, лейкопения, агронулоцитоз

• гемоторакс

• бөртпе: көпіршікті, эритематозды, дақты

• сарысулық ауру, анафилактоидтық реакциялар

• елестеулер, сананың шатасуы

• дәм сезімінің бұзылуы

• бронхтың түйілуі, интерстициальді пневмонит

• буллёзді дерматит (уытты эпидермальді некролиз, Стивенс-Джонсон синдромы, көп пішінді эритема), ангионевротикалық ісіну, эритематозды бөртпе, экзема, жалпақ теміреткі

• қаңқа-бұлшықеттен қан кету (гемартроз), артрит, артралгия, миалгия

• гломерулонефрит, қан сарысуында креатининнің жоғарылауы.

Қолдануға болмайтын жағдайлар

• клопидогрелге және препараттың басқа да компоненттеріне жоғары сезімталдық

• патологиялық қан кетулер немесе қанағыштықтың белсенді сатысы (асқазанның және он екі елі ішектің ойық жарасы, бассүйекішілік қан кету)

• бауыр қызметінің ауыр жеткіліксіздігі

• жүктілік және лактация кезеңі

• балаларға және 18 жасқа дейінгі жасөспірімдерге. 

Дәрілермен өзара әрекеттесуі

Ацетилсалицил қышқылы

Ацетилсалицил қышқылы Клопилеттің әсерінен туындайтын тромбоциттердің агрегациясын өзгертпейді, Клопилет ацетилсалицил қышқылының тромбоциттердің коллаген-индуцирленіп агрегациялануы бойынша әсерін күшейтеді. 500 мг ацетилсалицил қышқылын тәулігіне екі рет қатарластыра қолдану қанағыштық уақытының ұзақтығын елеусіз арттырады. Клопилет пен ацетилсалицил қышқылы арасында фармакодинамикалық өзара әрекеттесу болуы мүмкін, және ол қан кету қаупінің артуына әекледі, сондықтан осы екі препаратты ұзақ уақыт бірге қолданғанда сақ болған жөн.

Тромболитикалық дәрілер

Жедел миокард инфарктісі бар науқастардағы клиникалық тұрғыдан маңызды қан кету жиілігі тромболитикалық дәрілерді және гепаринді ацетилсалицил қышқылымен бірге қолданған кезде байқалған жиілікке ұқсас.

Ішілетін антикоагулянттар

Клопилетті ішілетін антикоагулянттармен бір мезгілде қолдануға болмайды, өйткені бұл қан кетуді күшейтуі мүмкін.

Варфарин

Клопилетті варфаринмен бірге қолдануға болмайды, өйткені мұндай біріктіру қан кету қарқындылығын күшейтуі мүмкін.

IIb/IIIа гликопротеин тежегіштері

Клопилетпен бірге емдеу сақтықты қажет етеді.

Гепарин

Клопилет гепарин дозасының коагуляцияға ықпалын өзгертпейді, гепаринді бір мезгілде қолдану клопидогрелдің әсерінен туындаған тромбоциттердің агрегациясын тежеу әсері болған жоқ, алайда клопигрел мен гепаринді бірге тағайындағанда сақ болу керек.

Қабынуға қарсы стероидты емес дәрілер

Қабынуға қарсы стероидты емес дәрілермен (ҚҚСД), соның ішінде напроксенмен бірге қабылдау этиологиясы асқазан-ішектік жасырын қан жоғалтуды арттырады. ҚҚСП Клопилетпен бірге абайлап тағайындалуы тиіс.

Омепразол, эзомепразол, флувоксамин, флуоксетин, моклобемид, вориконазол, флуконазол, тиклопидин, ципрофлоксацин, циметидин, карбамазепин, окскарбамазепин және хлорамфеникол және CYP2С19 мәнін төмендететін басқа да препараттар

Клопилетпен бірге қолдану, препараттың өзінің белсенді метаболитіне дейін метаболизденуіне жәрдемдесетін CYP2С19 ферментінің басылуына байланысты, Клопилеттің белсенді затының дәрілік концентрациясының төмендеуіне және оның клиникалық тиімділігінің азаюына әкеп соғады. Клопилетті осы препараттармен бір мезгілде қолданбаған жөн.

Протонды помпа тежегіштері

Клопилет пен осы топқа жататын барлық препараттар арасында, протонды помпа тежегіштері тобының ішінде CYP2С19 басылуында айырмашылықтың болу фактісіне қарамастан, өзара әрекеттесу орын алуы мүмкін. Демек, егер бұның қажеттілігі абсолютті емес болса, протонды помпа тежегіштерін бір мезгілде қолданбаған жөн. Асқазанның қышқылдылығын төмендететін басқа да, мысалы Н2 бөгегіштері мен антацидтер сияқты дәрілік заттардың Клопилеттің антитромбоцитарлы белсенділігіне ықпалына дәлелдер жоқ.

Біріктіріп емдеудің басқа да түрлері

Клопилетті атенололмен, нифедипинмен немесе екеуімен бірге қабылдағанда клиникалық фармакологиялық елеулі өзара әрекеттесулер байқалған жоқ. Препараттың фармакодинамикалық белсенділігі оны фенобарбиталмен, циметидинмен немесе эстрогенмен бірге қабылдаған кезде елеулі өзгеріске ұшыраған жоқ.

Клопилетпен бірге қабылдаған кезде дигоксиннің немесе теофилиннің фармакокинетикасы өзгерген жоқ.

Клопилеттің концентрациясы жоғары болған кезде ол Р450 (2С9) тежейді. Демек, препарат фенитоинның, тамоксифеннің, вальфариннің, торземидтің, флувастатиннің және қабынуға қарсы стероидты емес басқа да агенттердің метаболизміне кедергі жасауы мүмкін, ол осы энзимнің қатысуымен жүреді, бірақ осы өзара әрекеттесудің масштабын болжайтын деректер жоқ. Осы дәрілік заттардың кез келгенін Клопилетпен бірге қолданғанда сақтық керек.

Көрсетілген өзара әрекеттесуге қосымша

Науқастар Клопилетті және әртүрлі дәрілік заттарды, мысалы диуретиктерді, бета-бөгегіш агенттерді, ангиотензинді, ферменттердің конвертирлеуші тежегіштерін, кальций өзекшелерінің антагонистерін, қандағы холестеринді төмендететін препараттарды, диабетке қарсы препараттарды (инсулинді қоса есептегенде), орнын алмастыру емінің гормондарын, эпилепсияға қарсы дәрілерді, GPIIb/IIIa антагонистерін қоса есептегенде, біріктіріп қабылдаған. Клопилетпен өзара әрекеттескен кезде клиникалық тұрғыдан маңызды жағымсыз реакция жағдайлары байқалған жоқ.

Айрықша нұсқаулар

Қан кету қаупіне және гематологиялық жағымсыз әсерлерге байланысты, емдеу барысында осыны көрсететін клиникалық симптомдар пайда болған жағдайда қанға дереу талдама жасау қажет.

Басқа да антитромбоцитарлы препараттар сияқты, Клопилетті жарақаттанумен, хирургиялық араласыммен немесе басқа да патологиялық жағдайлармен байланысты қан кету қаупі жоғарылаған науқастарға, сондай-ақ клопидогрелді ацетилсалицил қышқылымен, қабынуға қарсы стероидты емес препараттармен, соның ішінде ЦОГ-2 тежегіштерімен, гепаринмен, немесе IIb/IIIа гликопротеин тежегіштерімен біріктірген жағдайда абайлап қолданған жөн. Науқаста қан кету белгілерінің, жасырын қан кетуді қоса есептегенде, бар-жоқтығын, әсіресе емдеудің алғашқы аптасында және/немесе инвазивті жүрек емшарасынан немесе хирургиялық араласымнан кейін мұқият бақылауға алған жөн.

Қарқынды қан кету ұлғаюы мүмкін болғандықтан, Клопилетті ішу арқылы қабылданатын антикоагулянттармен біріктіріп қолдану ұсынылмайды.

Клопилетпен емдеу жоспарлы операциялық араласымнан кем дегенде 7 күн бұрын тоқтатылуы тиіс (стоматологиялық емшараларды қоса есептегенде).

Егер операциялық араласым жасау керек болса немесе дәрігер емделуші үшін жаңа дәрілік зат тағайындайтын болса, науқас дәрігерге және стоматологқа препаратты қабылдағаны жөнінде айтуы керек.

Клопилет қан кету уақытын ұзартады. Ол жарақаттан, операциядан кейін немесе басқа да патологиялық жағдайлар нәтижесінде қан кету қаупі жоғарылаған емделушілерге, сондай-ақ қан кетуге (әсіресе асқазан-ішектік және көзішілік қан құйылуларға) бейім емделушілерге абайлап тағайындалуы тиіс.

Өте сирек, Клопилетті қолданғаннан кейін кейде ұзаққа созылмайтын тромбоздық және тромбоцитопениялық пурпура (ТТП) жағдайлары байқалды. Олар неврологиялық бұзылулармен, бүйрек қызметінің бұзылуымен немесе гипертермиямен қабысқан тромбоцитопениямен және микроангиопатиялық гемолитикалық анемиямен сипатталады. ТТП плазмаферезді қоса есептегенде дереу араласымды қажет ететін жағдай болып табылады.

Деректер жоқ болғандықтан, Клопилет жедел ишемиялық инсульттан кейінгі алғашқы 7 күн ішінде тағайындалмауы тиіс.

Бүйрек қызметі бұзылған науқастарға препаратты абайлап тағайындаған жөн.

Бауыр қызметінің жеткіліксіздігі орташа емделушілерге, қан кету қаупі жоғары болғандықтан, Клопилетті сақтықпен тағайындау қажет.

Клопилеттің құрамында гидрогенизирленген майсана майы бар, ол асқазанның бұзылуы мен диареяға себеп болуы мүмкін.

Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері

Препараттың жағымсыз әсерін ескеріп, көлікті немесе қауіпті механизмдерді басқарған кезде сақ болған жөн.

Артық дозаланғанда

Симптомдары: қан кету уақытының ұзаруы және кейінгі асқынуларға ұласуы.

Емдеу: егер қан кету уақытын тез түзету қажет болса, онда тромбоцитарлы масса құю керек. Өзіне тән арнайы у қайтарғысы жоқ.

Шығарылу түрі және қаптамасы

Үлбірлі қабықпен қапталған 75 мг таблеткалар.

Алюминий фольгадан жасалған пішінді ұяшықсыз қаптамаға 10 таблеткадан салынған.

Пішінді ұяшықсыз 3 қаптама медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Құрғақ, жарықтан қорғалған жерде, 30С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Босатылу шарттары

Рецепт арқылы

Өндіруші

Sun Pharmaceutical Industries Ltd.

Заңды мекенжайы:

Acme Plaza, Andheri-Kurla Road,

Andheri (E), Mumbai 400 059, Үндістан

Өндірістің мекенжайы::

Survey №214, Plot №20, Government Industrial Area,

Phase II, Silvassa-396 230, U.T of D&NH, Үндістан.

Тіркеу куәлігі иесінің атауы және елі

Sun Pharmaceutical Industries Ltd., Үндістан

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы:

050004, Алматы қ-сы, Төлебаев к-сі, 38, 5-қабат

Тел. (727) 250-92-35, факс (727) 250-33-64

sunreports@intelsoft.kz, sunalmaty@intelsoft.kz