Клавунат для детей

Клавунат балаларға арналған

Жоқ

Дәрілік түрі, дозалануы

Ішке қабылдау үшін суспензия дайындауға арналған ұнтақ, 125 мг/31.25 мг

Жүйелі пайдалануға арналған инфекцияға қарсы препараттар. Жүйелі қолданылатын бактерияға қарсы препараттар. Бактерияға қарсы бета-лактамды препараттар, пенициллиндер. Пенициллиндер бета-лактамаза тежегіштерімен біріктірілімде. Амоксициллин және бета-лактамаза тежегіші

АТХ коды J01CR02

Балаларға арналған Клавунат келесі инфекцияларды емдеуге арналған:

- жедел бактериялық синусит (расталған диагноз кезінде)

- жедел ортаңғы отит

- созылмалы бронхиттің өршуі (расталған диагноз кезінде)

- ауруханадан тыс пневмония

- цистит

- пиелонефрит

- тері мен жұмсақ тіндердің инфекциялары (атап айтқанда, теріасты шелінің қабынуы целлюлит, жануарлардың тістеуі, жедел абсцесс және жақсүйек-бет аймағының флегмоналары)

- сүйектер мен буындардың инфекциялары (соның ішінде, остеомиелит)

Бактерияға қарсы дәрілерді тиімді қолдану жөніндегі тиісті ұсынымдарды назарға алған жөн.

Қолданудың басталуына дейінгі қажетті мәліметтер тізбесі

- әсер етуші заттарға, пенициллиндерге немесе қосымша заттарының кез келгеніне аса жоғары сезімталдық

• анамнездегі басқа бета-лактамды антибиотиктерге (цефалоспориндерге, карбапенемдерге, монобактамдарға) аса жоғары сезімталдықтың ауыр реакциясы

• анамнезінде амоксициллин/клавулан қышқылының біріктірілімін қабылдау аясында дамыған сарғаю немесе бауыр функциясының бұзылуы

Қолдану кезіндегі қажетті сақтандыру шаралары

Балаларға арналған Клавунат препаратымен емді бастар алдында пенициллиндерге, цефалоспориндерге немесе басқа бета-лактамды антибиотиктерге аса жоғары сезімталдықтың алдыңғы реакцияларына қатысты анамнезді мұқият жинау қажет.

Пенициллиндер қабылдайтын пациенттерде аса жоғары сезімталдықтың ауыр және кейде өлімге әкелетін реакциялары (анафилактоидты және терінің ауыр жағымсыз реакцияларын қоса) сипатталған. Бұл реакциялар анамнезінде пенициллинге аса жоғары сезімталдығы бар пациенттерде, сондай-ақ атопиялық жағдайы бар пациенттерде жиі туындайды. Аллергиялық реакция туындаған кезде балаларға арналған Клавунат препаратымен емдеуді тоқтату және тиісті баламалы ем тағайындау керек.

Егер инфекция амоксициллинге сезімтал организмдерден туындағаны дәлелденген жағдайда, ресми ұсынымдарға сәйкес амоксициллин/клавулан қышқылынан амоксициллинге ауысу мүмкіндігін қарастыру керек.

Балаларға арналған Клавунат препаратының бұл дәрілік түрі болжамды патогендердің бета-лактамдық препараттарға төзімділігі жоғары қаупі бар кезде қолдануға жарамсыз, яғни клавулан қышқылының тежелуіне сезімтал бета-лактамазалармен байланысты болмайды. Препараттың бұл түрі пенициллинге төзімді S. pneumoniae емдеу үшін қолданылмауы керек.

Бүйрек функциясы бұзылған пациенттерде және препараттың жоғары дозаларын қабылдайтын пациенттерде құрысулар пайда болуы мүмкін.

Егер инфекциялық мононуклеозға күдік болса, балаларға арналған Клавунат препаратын қабылдаудан аулақ болу керек, өйткені амоксициллинді қолданғаннан кейін де байқалатын инфекциялық мононуклеоздан туындаған қызылша тәрізді бөртпе пайда болуы мүмкін.

Амоксициллинмен емдеу кезінде аллопуринолды бір мезгілде қабылдау тері тарапынан аллергиялық реакциялардың туындау ықтималдығын арттырады.

Кейбір жағдайларда ұзақ уақыт қолдану сезімтал емес микроорганизмдердің көбеюіне әкелуі мүмкін.

Емдеудің басында пустулалардың пайда болуымен байланысты қызбамен бірге жалпыланған эритеманың пайда болуы жедел жалпыланған экзантематозды пустулездің (AGEP) симптомы болуы мүмкін. Көрсетілген реакция балаларға арналған Клавунат препаратын қолдануды тоқтатуды талап етеді және амоксициллинді кейіннен қолдануға қарсы көрсетілім болып табылады.

Бауыр функциясының бұзылу белгілері бар пациенттерде амоксициллин/клавулан қышқылын сақтықпен қолданған жөн.

Бауыр тарапынан бұзылулар туралы, негізінен, ерлер мен егде жастағы пациенттерде хабарланды, бұл ұзақ емдеумен байланысты болуы мүмкін. Балаларда аталған бұзылулар туралы өте сирек хабарланды. Пациенттердің барлық топтарында симптомдар әдетте емдеу кезінде немесе одан кейін көп ұзамай пайда болады, алайда сирек жағдайларда емдеу аяқталғаннан кейін бірнеше аптадан соң ғана пайда болуы мүмкін. Мұндай құбылыстар, әдетте, қайтымды болады. Бауыр тарапынан бұзылулар ауыр болуы, өте сирек жағдайларда өлімге әкелуі мүмкін. Мұндай құбылыстар әрдайым дерлік ауыр негізгі ауруы бар немесе бауырға белгілі ықтимал жағымсыз әсері бар препараттарды қабылдаған пациенттерде байқалды.

Ауырлығы жеңілден өмірге қауіптіге дейін өзгеруі мүмкін амоксициллинді қоса алғанда, барлық дерлік бактерияға қарсы дәрілерді қолдану кезінде антибиотикпен терапиямен байланысты жалған жарғақшалы колиттің дамуы туралы хабарланды. Сондықтан диареяға шалдыққан пациенттерде осы патологияның туындау мүмкіндігін есте ұстаған жөн. Антибиотикпен астасқан колит пайда болған кезде балаларға арналған Клавунат препаратын қолдануды дереу тоқтатып, көмекке жүгіну және тиісті емді бастау керек. Бұл жағдайда перистальтиканы басатын препараттарды қолдануға болмайды.

Балаларға арналған клавунат препаратын бүйрек немесе бауыр функциясы бұзылған пациенттерді емдеу кезінде сақтықпен қолданған жөн. Ұзақ мерзімді терапия кезінде бауыр, бүйрек және қан өндіру функцияларын мезгіл-мезгіл бағалау керек.

Амоксициллин/клавулан қышқылын қабылдаған пациенттерде сирек жағдайларда протромбин индексінің ұлғаюы туралы хабарланды. Антикоагулянттарды бір мезгілде қолданған кезде тиісті бақылау жүргізу керек. Антикоагуляцияның қажетті деңгейін ұстап тұру мақсатында пероральді антикоагулянттардың дозасын түзету қажет болуы мүмкін.

Бүйрек функциясы бұзылған пациенттерде дозаны бұзылу дәрежесіне қарай түзету керек.

Диурезі төмендеген пациенттерде өте сирек, негізінен парентеральді ем кезінде кристаллурия байқалды. Амоксициллиннің жоғары дозаларын қабылдаған кезде амоксициллинмен байланысты кристаллурияның ықтималдығын азайту үшін сұйықтықты жеткілікті мөлшерде қабылдау және диурезді қадағалау керек. Қуыққа катетеризация жасалған пациенттерде катетерлердің өткізгіштігін үнемі тексеріп отыру керек.

Амоксициллинмен емдеу кезінде несепте глюкозаның бар-жоғын зерттеу кезінде глюкооксидазаны анықтаудың ферментативті әдістерін қолданған жөн, өйткені ферментативті емес әдістерді қолдану кезінде жалған оң нәтижелер ықтималдығы бар.

Балаларға арналған Клавунат препаратында клавулан қышқылының болуы IgG мен альбуминді эритроциттер жарғақшаларымен спецификалық емес байланыстыруға әкелуі мүмкін, бұл Кумбс сынамасының жалған оң нәтижелеріне әкелуі мүмкін.

Амоксициллин/клавулан қышқылын қабылдаған және кейіннен Aspergillus тудырған инфекцияның жоқтығы мойындалған пациенттерде Bio-Rad Laboratories өндірген Platelia Aspergillus қолданумен ферменттік иммуноанализдің оң нәтижелері туралы хабарламалар болды. Bio-Rad Laboratories өндірген Platelia Aspergillus пайдалану арқылы ферменттік иммуноанализ жүргізу кезінде Aspergillus жатпайтын полисахаридтермен және полифуранозалармен айқаспалы реакциялар туралы хабарланды. Сондықтан амоксициллин/клавулан қышқылымен ем алатын пациенттердегі талдаулардың оң нәтижелерін сақтықпен түсіндіру және басқа диагностикалық әдістермен растау керек.

Басқа дәрілік  препараттармен өзара әрекеттесуі

Пероральді антикоагулянттар

Пероральді антикоагулянттар мен пенициллин қатарының антибиотиктері практикада өзара әрекеттесу туралы хабарламаларсыз кеңінен қолданылды. Алайда, аценокумарол немесе варфарин қабылдаған және амоксициллинмен емдеу курсы тағайындалған пациенттерде халықаралық қалыпқа келтірілген қатынастардың арту жағдайлары сипатталған. Егер осы препараттарды бір мезгілде қолдану қажет болса, амоксициллинді қосу немесе қабылдауды тоқтату кезінде протромбин уақытын немесе халықаралық қалыпқа келтірілген қатынасты мұқият бақылау керек. Сонымен қатар, пероральді антикоагулянттардың дозасын түзету қажет болуы мүмкін.

Метотрексат.

Пенициллиндер метотрексаттың шығарылуын төмендетуі мүмкін, бұл уыттылықтың ықтимал артуына әкеледі.

Пробенецид

Пробеницидті бір мезгілде қолдану ұсынылмайды. Пробенецид амоксициллиннің бүйректік өзекшелік секрециясын азайтады. Пробенецидті бір мезгілде қолдану амоксициллин (бірақ клавулан қышқылы емес) деңгейінің жоғарылауына және қанда болу ұзақтығының артуына әкелуі мүмкін.

Микофенолат мофетил.

Микофенолат мофетилмен ем алатын пациенттерде клавулан қышқылымен пероральді амоксициллинді қолдану басталғаннан кейін микофенол қышқылының белсенді метаболитінің дозаға дейінгі концентрациясы шамамен 50% төмендеуі мүмкін. Доза алдындағы деңгейдің бұл өзгерісі микофенол қышқылының жалпы экспозициясының өзгеруіне толық сәйкес келмеуі мүмкін. Демек, егер трансплантат дисфункциясы клиникалық расталмаса, микофенолат мофетилінің дозасын өзгерту әдетте талап етілмейді. Дегенмен, біріктірілім кезінде және антибиотиктермен емдеуден кейін көп ұзамай мұқият мониторинг жүргізу керек.

Арнайы сақтандырулар

Педиатрияда қолдану

Препарат балаларға көрсетілген дозалау режиміне сәйкес қолданылады.

2 жасқа дейінгі балаларда тәулігіне 40 мг/10 мг/кг жоғары дозаларға қатысты амоксициллин мен клавулан қышқылының қатынасы 4:1 болатын Клавунаттың дәрілік түрлерінің дозалары туралы клиникалық деректер жоқ.

Жүктілік немесе лактация кезеңінде

Адамда жүктілік кезінде амоксициллин/клавулан қышқылын қолдану бойынша шектеулі деректер дамудың туа біткен даму ақаулары туындауының жоғары қаупін көрсетпейді. Ұрық қабықшаларының мерзімінен бұрын жарылуы бар әйелдерде жүргізілген жалғыз зерттеуде амоксициллин/клавулан қышқылымен профилактикалық емдеу жаңа туған нәрестелерде некротикалық энтероколиттің даму қаупінің жоғарылауымен байланысты болуы мүмкін екендігі айтылды. Дәрігер қажет деп санайтын жағдайларды қоспағанда, препаратты жүктілік кезінде қолданудан аулақ болу керек.

Бала емізу

Екі зат да емшек сүтіне бөлінеді (клавулан қышқылының емшек еметін нәрестеге әсері туралы мәліметтер жоқ). Осылайша, емшек еметін нәрестеде диарея және шырышты қабықтардың зең инфекциясы пайда болуы мүмкін, сондықтан препаратты қабылдау кезінде бала емізуді тоқтату керек. Аллергиялық реакциялардың пайда болу мүмкіндігін ескеру керек. Бала емізу кезінде дәрігер қауіп/пайда арақатынасын бағалағаннан кейін ғана амоксициллин/клавулан қышқылын қолдану мүмкін болады.

Натрий

Бұл препараттың құрамында бір дозаға 1 ммоль аз натрий (23 мг) бар, яғни құрамында натрий жоқ деуге болады.

Препараттың көлік құралын немесе қауіптілігі зор механизмдерді  басқару қабілетіне әсер ету ерекшеліктері

Көлік құралдарын басқару және басқа механизмдермен жұмыс істеу кезінде препараттың реакция жылдамдығына әсер ету қабілетіне зерттеу жүргізілмеген. Алайда, көлік құралын басқару және басқа механизмдермен жұмыс істеу қабілетіне әсер етуі мүмкін жағымсыз әсерлердің (аллергиялық реакциялар, бас айналу, құрысулар сияқты) пайда болуы мүмкін

Қолдану жөніндегі нұсқаулар

Дозалау режимі

Дозаның әрбір компоненті үшін жеке көрсетілетін жағдайларды қоспағанда, доза біріктірілімдегі амоксициллин мен клавулан қышқылының мөлшерлік бірліктерінде көрсетіледі.

Балаларға арналған Клавунат препаратының дозасын таңдау кезінде келесі факторларды ескеру керек:

- ықтимал патогендер және олардың бактерияға қарсы препараттарға күтілетін сезімталдығы

- инфекцияның ауырлық дәрежесі және орналасуы

- пациенттің жасы, дене салмағы және бүйрек функциясының жағдайы.

Қажет болған жағдайда Клавунат препаратының баламалы дәрілік түрлерін (мысалы, амоксициллиннің неғұрлым жоғары дозаларын және/немесе амоксициллин мен клавулан қышқылының әртүрлі арақатынасын қамтамасыз ететін) қолдануды қарастыру керек.

Салмағы 40 кг-дан аз балалар үшін балаларға арналған Клавунат препаратының осы құрамы төмендегі ұсынымдарға сәйкес қолданған кезде 2400 мг амоксициллин/600 мг клавулан қышқылының ең жоғары тәуліктік дозасын қамтамасыз етеді.

Егер амоксициллиннің неғұрлым жоғары тәуліктік дозасын қабылдау туралы шешім қабылданса, клавулан қышқылының артық жоғары тәуліктік дозаларын енгізбеу үшін басқа Клавунат препаратын таңдау ұсынылады.

Емнің ұзақтығы пациенттің жүргізілген емге реакциясымен анықталуы тиіс. Кейбір инфекциялар (мысалы, остеомиелит) ұзақ емдеуді қажет етеді. Емдеу клиникалық жағдайды қайта қараусыз 14 күннен артық жалғаспауы тиіс (ұзартылған терапияға қатысты «Қолдану кезіндегі қажетті сақтандыру шаралары» бөлімін қараңыз).

Ересектер мен салмағы >40 кг балалар

Бұл топ үшін ересектерге арналған басқа Клавунат препараттарын қолдану қажет.

Пациенттердің ерекше топтары

Балалар

Салмағы 45 кг-дан аз балалар

Төмен доза: тәулігіне 20 мг/5 мг/кг-дан тәулігіне 40 мг/10 мг/кг-ға дейін, үш қабылдауға бөлінген.

Жоғары доза: тәулігіне 40 мг/10 мг/кг-дан тәулігіне 60 мг/15 мг/кг-ға дейін, үш қабылдауға бөлінген.

ҰМ — ұсынылмайды. 2 жасқа дейінгі балаларда тәулігіне 40 мг/10 мг/кг жоғары дозаларға қатысты амоксициллин мен клавулан қышқылының қатынасы 4:1 болатын Клавунаттың дәрілік түрлерінің дозалары туралы клиникалық деректер жоқ.

Дозалау жөніндегі ұсынымдарды сақтау үшін ішке қабылдау үшін Клавунат препаратының баламалы дәрілік формаларын қарастыру керек.

Балаларда препаратты таблетка, суспензия немесе педиатриялық саше түрінде қолдану ұсынылады. 6 жастағы және одан кіші балаларға Клавунат препаратын суспензия түрінде қолдану ұсынылады.

Тәулігіне үш рет қолданылатын енгізілетін доза (мл) да мынадай формула бойынша есептелуі мүмкін:

* Есептеу кезінде тек амоксициллин компонентін ескеру қажет.

Мысалы, тәулігіне 20 мг/5 мг/кг дозада ем қабылдайтын салмағы 6 кг бала:

Егде жастағы пациенттер

Дозалау режимін түзету қажет емес. Бұл топ үшін ересектерге арналған басқа Клавунат препараттарын қолдану қажет.

Бауыр  функциясының жеткіліксіздігі бар пациенттер

Сақтықпен дозалау және бауыр функциясын үнемі бақылау.

Бүйрек  функциясының жеткіліксіздігі бар пациенттер

Дозаны түзету амоксициллиннің ең жоғары ұсынылған деңгейіне негізделеді.

Креатинин клиренсі (CrCl) 30 мл мин астам пациенттерде дозаны түзету талап етілмейді.

Салмағы 45 кг-дан аз балалар

Енгізу әдісі мен жолы

Ішке қабылдау үшін.

Асқазан-ішек жолы тарапынан ықтимал жағымсыз реакцияларды барынша азайту үшін препаратты тамақтану кезінде қабылдау керек.

Суспензияны дайындау тәсілі

Балаларға арналған Клавунат 156,25 мг препаратын ішке қабылдау үшін суспензия дайындау үшін құтының жартысына дейін су қосып, жақсылап сілку керек. Суспензияның біртекті дисперсиясын алу үшін бірінші сұйылту кезінде құтыны 5 минут қоя тұру керек. Әрі қарай құтыдағы белгіге дейін су қосып, қайтадан сілку керек.

Дайындалған суспензия тоңазытқышта сақталған кезде 10 күн бойы белсенділігін сақтайды. Әрбір қабылдау алдында құтының ішіндегісін мұқият шайқау керек.

Құтыны мұздатып қатыруға болмайды.

Артық дозалану жағдайында қабылдау қажет болатын шаралар

Симптомдары: асқазан-ішек бұзылулары және су-электролит теңгерімінің бұзылуы мүмкін. Амоксициллинді қабылдаумен байланысты кристаллурия байқалды, бұл жекелеген жағдайларда бүйрек жеткіліксіздігінің дамуына әкелді.

Бүйрек функциясы бұзылған пациенттерде және жоғары дозаларды қабылдайтын пациенттерде құрысулар пайда болуы мүмкін.

Амоксициллиннің қуықтың катетерлерінде, негізінен препараттың жоғары дозаларын вена ішіне енгізгеннен кейін шөгуі мүмкін.

Емі: симптоматикалық ем жүргізу, су-электролит теңгерімін түзету. Амоксициллин/клавулан қышқылы гемодиализ арқылы қанағымынан шығарылады.

Дәрілік препараттың бір немесе бірнеше дозасын өткізіп алған кезде қажетті шаралар

Дозаны өткізіп алған жағдайда өткізіп алған дозаның орнын толтыру үшін қос дозаны қабылдауға болмайды. Емдеуші дәрігермен кеңесу керек.

Дәрілік препаратты қолдану тәсілін түсіндіру үшін медицина қызметкеріне консультацияға жүгіну бойынша ұсынымдар

Егер осы дәрілік препаратты қолдану туралы қосымша сұрақтар туындаса, емдеуші дәрігерге қаралыңыз.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар

Препараттың жиі кездесетін жағымсыз реакциялары - диарея, жүрек айну және құсу.

Жиі (≥ 1/100-ден < 1/10-ға дейін)

• тері және шырышты жабындардың кандидозы

• диарея, жүректің айнуы, құсу

Жүрек айнуы жоғары дозаларды пероральді қабылдау кезінде жиі туындайды. Егер асқазан-ішек реакциясы айқын болса, оларды амоксициллин / клавулан қышқылын тамақтану кезінде қабылдау арқылы азайтуға болады.

Жиі емес (≥ 1/1000-нан < 1/100-ге дейін)

• бас айналу, бас ауыру

• ас қорытудың бұзылуы

• АЛТ/АСТ бауыр ферменттері деңгейінің орташа жоғарылауы; Бета-лактамды антибиотиктер қабылдаған пациенттерде АСТ және / немесе АЛТ деңгейінің орташа жоғарылауы байқалды, бірақ бұл құбылыстың маңыздылығы белгісіз.

• тері бөртпесі, қышыну, есекжем

Сирек (≥1/10000 < 1/1000 дейін)

• қайтымды лейкопения (нейтропенияны қоса), тромбоцитопения

• мультиформалы эритема

Белгісіз (қолда бар деректер негізінде бағалау мүмкін емес)

• сезімтал емес микроорганизмдердің жылдам өсуі

• қайтымды агранулоцитоз, гемолиздік анемия

• қан кету уақыты мен протромбин уақытының ұлғаюы

• ангионевроздық ісіну, анафилаксия; сарысу құю ауруы, аллергиялық васкулит

• қайтымды жоғары белсенділік, құрысулар (құрысулар бүйрек функциясы бұзылған пациенттерде, сондай-ақ препараттың жоғары дозаларын алатын адамдарда байқалуы мүмкін), асептикалық менингит

• антибиотикпен астасқан колит( жалған жарғақшалы және геморрагиялықты қоса), қара түкті тіл, тіс эмалі түсінің өзгеруі (тіс щеткасымен тазалау кезінде оңай кетеді)

• сезімтал емес микроорганизмдердің өсуі;

• гепатит, холестаздық сарғаю, бұл реакциялар басқа пенициллиндер мен цефалоспориндерді қолданғанда байқалады

Бауыр тарапынан жағымсыз реакциялар негізінен ерлер мен егде жастағы пациенттерде байқалды және ұзақ еммен байланысты болуы мүмкін. Бұл жағымсыз реакциялар балаларда өте сирек кездеседі. Аталған белгілер мен симптомдар әдетте емдеу процесінде немесе аяқталғаннан кейін бірден пайда болады, алайда жекелеген жағдайларда терапия аяқталғаннан кейін бірнеше апта ішінде байқалмауы мүмкін. Жағымсыз реакциялар, әдетте, қайтымды. Бауыр тарапынан жағымсыз реакциялар ауыр болуы мүмкін, өте сирек жағдайларда өліммен аяқталғаны туралы хабарламалар тіркелген. Мұндай құбылыстар әрдайым дерлік ауыр негізгі ауруы бар немесе бауырға белгілі ықтимал жағымсыз әсері бар препараттарды қабылдаған пациенттерде байқалды.

• Стивенс-Джонсон синдромы

• уытты эпидермалық некролиз

• буллезді эксфолиативті дерматит, жедел жайылған экзантематозды пустулез. Осы симптомдар дамыған кезде препаратты тоқтату керек.

• интерстициальді нефрит, кристаллурия

• эозинофилиямен және жүйелі симптомдармен дәрілік реакция (Drug reaction with eosinophilia and systemic symptoms – DRESS синдром).

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препарат құрамы

5 мл суспензияның құрамында

белсенді заттар: амоксициллин тригидраты 150.65 мг (125 мг амоксициллинге баламалы),

калий клавуланаты: силоид (1:1) 78.55 мг (31,25 мг клавулан қышқылына баламалы)

қосымша заттар: гидроксипропилметилцеллюлоза, силоид AL-1 типті (кремнийдің қостотығы), ксантан шайыры, кристалды натрий сахаринаты, аэросил 200, таңқурай ұнтағы.

Сыртқы түрінің, иісінің, дәмінің сипаттамасы

Сарғыш - ақ түсті, біртекті, сусымалы, таңқурай иісі бар ұнтақ.

Суспензия сарғыш-ақ түсті, таңқурай иісі бар, біркелкі болуы керек.

Шығарылу түрі және қаптамасы

Препаратты мойыны бұралатын және тығыздығы жоғары полиэтиленнен жасалған қақпағы бар, сыйымдылығы 125 мл кәріптас түсті шыны құтыларға салады.

1 құтыдан сыйымдылығы 5 мл 1 пластик қасықпен, медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салады.

2 жыл.

Жарамдылық мерзімі өткеннен кейін қолдануға болмайды!

Құрғақ жерде 25 ºС-ден аспайтын температурада сақтау керек.

Дайын суспензияны тоңазытқышта сақтаңыз (2-8° C) және 10 күн ішінде қолданыңыз.

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

АТАБАЙ КИМЬЯ САН. ВЕ ТИДЖ. А.С

Dilovası Organize Sanayi Bölgesi

4.kısım, Sakarya Caddesi No:28

Gebze, Коджаэли, Түркия

тел.: + 90 262 724 85 41

факс: + 90 262 724 85 43

info@atabay.com

Тіркеу куәлігінің ұстаушысы

АТАБАЙ КИМЬЯ САН. ВЕ ТИДЖ. А.С

Acibadem, Koftuncu sok. No:1

34718 Kadıkoy, Стамбул,Түркия

тел: +90 (216) 326 69 65

факс: +90 (216) 340 13 77

info@atabay.com

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«WHITE SAIL басқарушы компаниясы» ЖШС

Қазақстан Республикасы, Алматы қ., 1 ш. а., 61/1 үй

Тел/факс: +7 777 727 27 07

Электронды пошта: whitesail20@mail.ru