Кандекор® НД 32

• русский
• қазақша

• Скачать инструкцию медикамента

Саудалық атауы

Кандекор® Н 8

Кандекор® Н 16

Кандекор® Н 32

Кандекор ®Нд 32

Халықаралық патенттелмеген атауы

Жоқ

Дәрілік түрі

8мг/12,5 мг, 16мг/12,5 мг, 32мг/12,5 мг, 32мг/25 мг таблеткалар

Құрамы

Бір таблетканың құрамында

белсенді заттар: 8 мг, 16 мг немесе 32 мг кандесартан цилексетилі,

12,5 мг немесе 25 мг гидрохлорoтиазид

қосымша заттар: лактоза моногидраты, жүгері крахмалы, гидроксипропилцеллюлоза, макрогол 8000, кальций кармеллозасы, магний стеараты, темірдің сары тотығы (Е172) (32мг/12,5 мг дозалар үшін) немесе темірдің қызыл тотығы (Е172) (16 мг/12.5 мг, 32 мг/25 мг дозалар үшін)

Сипаттамасы

Сопақша пішінді, ақ түсті, екі жақ беті дөңес және бір жақ бетінде сызығы бар таблеткалар (8 мг/12.5 мг дозалар үшін).

Капсула пішінді, бозғылт-қызғылт түсті, екі жақ беті дөңес және бір жақ бетінде сызығы бар таблеткалар (16 мг/ 12.5 мг дозалар үшін).

Сопақша пішінді, бозғылт-сары түсті, екі жақ беті дөңес және бір жақ бетінде сызығы бар таблеткалар (32 мг/12.5 мг дозалар үшін).

Сопақша пішінді, бозғылт-қызғылт түсті, екі жақ беті дөңес және бір жақ бетінде сызығы бар таблеткалар (32 мг/25 мг дозалар үшін).

Фармакотерапиялық тобы

Ренин-ангиотензин жүйесіне ықпал ететін препараттар. Диуретиктермен біріктірілген ангиотензин II антагонистері. Диуретиктермен біріктірілген кандесартан

АТХ коды С09DА06

Фармакологиялық қасиеттері

Фармакокинетикасы

Кандесартан цилексетилі

Ішке қабылдағаннан кейін кандесартан цилексетилі белсенді зат кандесартанға айналады. Ішке қабылдағаннан кейін кандесартан таблеткасының абсолюттік биожетімділігі 14% құрайды. Сарысуда орташа ең жоғары концентрацияға (Cmax) таблетканы қабылдағаннан кейін 3 - 4 сағаттан соң жетеді. Қан сарысуындағы кандесартан концентрациясы дозалардың емдік аралығында дозаларды арттырумен байланысты өседі. Қан сарысуындағы кандесартанның фармакокинетикалық қисығы астындағы аудан (AUC) тамақтануға байланысты емес. Кандесартанның фармакокинетикасында гендерлік айырмашылықтар байқалмайды.

Кандесартан плазма ақуыздарымен (99%-дан астам) тез байланысады. Кандесартанның шамамен алынған таралу көлемі әр кг-ға шаққанда 0,1 л құрайды.

Кандесартан, негізінен, организмнен несеппен және өтпен бірге өзгермеген күйінде және тек аздаған дәрежеде бауырлық метаболизм (CYP2C9) арқылы шығарылады. Канденсартанның жартылай шығарылу кезеңі (Т1/2) 9 сағатқа жуықты құрайды. Кандесартанның жартылай шығарылу кезеңі кандесартан цилексетилін гидрохлоротиазидпен біріктіріп қабылдағаннан кейін де өзгермеген күйінде қалады. Препаратты көп рет қабылдағаннан кейін жиналып қалу байқалған жоқ. Біріктірілген дозаларын қайталағаннан кейін, монотерапиямен салыстырғанда, кандесартанның қосымша жиналып қалу жағдайы орын алмайды.

Кандесартанның қандағы жалпы клиренсі 0.37 мл/мин/кг жуықты, бүйректік клиренсі 0,19 мл/мин/кг жуықты құрайды. Кандесартан бүйректер арқылы, шумақтық сүзілу және белсенді өзекшелік секреция жолымен шығарылады. Кандесартан цилексетилін қабылдағаннан кейін несеппен бірге өзгермеген күйінде дозаның шамамен 26%-ы және белсенділігі төмен метаболитінің 7%-ы шығарылады, сонымен қатар нәжіспен бірге дозаның 56%-ы өзгермеген күйінде және 10%-ы белсенді емес метаболиттер түрінде шығарылады.

Егде жастағы (65 жастан асқан) адамдарда, жас емделушілермен салыстырғанда, кандесартанның Cmax және AUC тиісінше шамамен 50%-ға және 80%-ға артады. Дегенмен, Кандекор® H немесе Кандекор® HД препаратының енгізілген дозасынан кейін артериялық қысым реакциясы және жағымсыз әсерлер жиілігі жас және егде жастағы емделушілерде бірдей болады.

Дозаны қайталағанда бүйрек қызметінің жеңіл және орташа дәрежелі жеткіліксіздігі бар емделушілерде кандесартанның Cmax және AUC тиісінше шамамен 50%-ға және 70%-ға артады, бірақ жартылай шығарылу кезеңі (Т ½), бүйрек қызметі қалыпты емделушілермен салыстырғанда, өзгермейді. Бүйрек қызметінің ауыр дәрежелі жеткіліксіздігі бар емделушілерде тиісті өзгерулер шамамен 50% және 110% құрайды. Бүйрек қызметінің ауыр дәрежелі жеткіліксіздігі бар емделушілерде кандесартанның жартылай шығарылу кезеңі (Т ½) екі еселенді.

Гемодиализде жүрген емделушілердегі фармакокинетикасы бүйрек қызметінің ауыр дәрежелі жеткіліксіздігі бар емделушілердегідей күйінде қалады.

Бауыр қызметінің ауыр дәрежелі жеткіліксіздігі бар емделушілерге қолдану тәжірибесі жоқ.

Гидрохлоротиазид

Гидрохлоротиазид асқазан-ішек жолынан тез сіңіп, абсолютті биожетімділігі 70%-ға жуықты құрайды. Аспен бір мезгілде қабылдау оның сіңуін шамамен 15%-ға арттырады. Биожетімділігі жүрек қызметінің жеткіліксіздігі бар және ісінуі айқын емделушілерде төмендеуі мүмкін. Гидрохлортиазидтің плазма ақуыздарымен байланысуы 60%-ға жуықты құрайды. Таралуының болжамды көлемі шамамен 0,8 л / кг құрайды.

Гидрохлоротиазид метаболизденбейді және толық дерлік өзгермеген күйінде шумақтық сүзілу және белсенді өзекшелік секреция жолымен шығарылады. Гидрохлортиазидтің жартылай шығарылу кезеңі (Т ½) 8 сағатқа жуықты құрайды. Пероральді дозаның 70%-ға жуығы несеппен бірге 48 сағат ішінде шығарылады. Гидрохлортиазидті кандесартан цилексетилмен біріктіріп қабылдағаннан кейін гидрохлортиазидтің жартылай шығарылу кезеңі өзгермеген күйінде (8 сағатқа жуық) қалады. Кандесартан цилексетилмен біріктірілімінің дозаларын қайталап қабылдағаннан кейін, монотерапиямен салыстырғанда, гидрохлортиазидтің қосымша жиналып қалуы орын алмайды.

Бүйрек қызметінің жеткіліксіздігі бар емделушілерде гидрохлоротиазидтің жартылай шығарылу кезеңі ұзарады.

Фармакодинамикасы

Ангиотензин ІІ ренин-ангиотензин-альдостерон жүйесінің негізгі вазобелсенді гормоны болып табылады және артериялық гипертензия патогенезінде және жүрек-қантамырдың басқа да ауруларында белгілі бір рөлді атқарады. Ол сондай-ақ гипертрофия және аяқ-қолдардың зақымдану патогенезінде маңызды рөл атқарады. Ангиотензин ІІ негізгі физиологиялық әсерлері, мысалы, қантамырлардың тарылуы, альдостеронды стимуляция, тұз бен су гомеостазасының реттелуі және жасушаның өсуін стимуляциялау, олар 1 типті AT1 рецептор арқылы беріледі.

Кандесартан дәрілердің тегі болып табылады, асқазан-ішек жолынан сіңген кезде ол эфирдің гидролизі нәтижесінде белсенді зат кандесартанға тез айналады. Кандесартан мықты байланысатын және рецептордан баяу диссоциацияланатын ангиотензин ІІ рецепторының, AT1 рецепторының селективті антагонисі болып табылады. Оның рецепторға ұқсастығы жоқ.

Кандесартан ангиотензин-конвертирлеуші фермент (АКФ) деңгейіне немесе АКФ тежегіштерін пайдаланумен байланысты болатын басқа да ферменттік жүйелерге ықпалын тигізбейді. Кандесартанды АКФ тежегіштерімен салыстырғанда, кандесартан цилексетилін қабылдаған емделушілерде жөтелдің пайда болу жиілігі төмен болды.

Кандесартан гормондардың басқа рецепторларымен немесе жүрек-қантамыр жүйесін реттеуде маңызды рөл атқаратын иондық өзекшелермен байланыспайды және бөгемейді. Ангиотензин ІІ рецепторларының (AT1) антагонизм плазмада ренин деңгейінің, ангиотензин І және ангиотензин ІІ деңгейінің дозаға байланысты артуына және плазмада альдостерон концентрациясының төмендеуіне әкеледі.

Гидрохлоротиазид, негізінен, бүйрек өзекшелерінің дистальді бөлімдерінде натрийдің белсенді реабсорбциясын тежейді, натрийдің, хлордың және судың шығарылуына мүмкіндік береді. Калий мен магнийдің бүйректік экскрециясы дозаға байланысты ұлғаяды, ал кальций үлкен дәрежеде сіңеді. Гидрохлоротиазид қан плазмасы мен жасушадан тыс сұйықтықтың көлемін азайтады, қанның жүрекпен тасымалдану қарқындылығын азайтады және артериялық қысымды төмендетеді. Гидрохлоротиазидті ұзақ қолданған кезде шеткергі кернеудің төмендеуі артериялық қысымның төмендеуіне мүмкіндік береді.

Гидрохлоротиазидті ұзақ уақыт қолданғанда жүрек-қантамыр ауруларының қаупі және өлімге ұшырау азаяды.

Кандесартан мен гидрохлоротиазидтің қосымша антигипертензиялық әсері бар.

Артериялық гипертензиясы бар емделушілерде Кандекор® H немесе Кандекор®HД қолдану жүректің жиырылу жиілігін рефлекторлы түрде арттырмай-ақ, артериялық қысымның дозаға байланысты және ұзақ төмендеуіне әкеледі. Бастапқы дозада ауыр немесе асыра сілтенген гипотензия жағдайының белгілері немесе емдеуді тоқтатқаннан кейін қайтымды әсері байқалған жоқ.

Кандекор® H немесе Кандекор® HД бір реттік дозасын қабылдағаннан кейін гипертензияға қарсы әсері әдетте 2 сағат ішінде басталады. Үздіксіз емдегенде, кез келген дозада қабылдағанда артериялық қысымның төмендеуінің көптеген жағдайлары алғашқы төрт аптаның ішінде болады және ұзақ емдеген кезде сақталады.

Кандекор®H немесе Кандекор®HD препаратын тәулігіне бір рет қолдану, дозалау аралығының ең жоғары және қалдық әсері арасында аздаған айырмашылықпен, 24 сағат ішінде артериялық қысымның тиімді және бірқалыпты төмендеуін қамтамасыз етеді.

32 мг кандесартан цилексетилін тәулігіне бір рет 12,5 мг немесе 25 мг гидрохлоротиазидпен біріктіру артериялық қысымның қосымша төмендеуіне әкеледі. Кандесартан цилексетилі/ гидрохлоротиазидті 32 мг /25 мг дозаларда біріктіру, 32 мг /12.5 мг дозаларда біріктірумен салыстырғанда едәуір тиімдірек, және артериялық қысымның жалпы орташа төмендеуі тиісінше 16/10 мм с.б. және 13/9 мм с.б. құрайды.

Кандесартан цилексетилі/гидрохлоротиазид біріктірілімі емделушінің жасына және жынысына қарамай-ақ, тиімді.

Қазіргі таңда кандесартан цилексетилі/гидрохлоротиазид біріктірілімін бүйрек аурулары/нефропатиясы бар, сол жақ қарынша қызметі төмендеген/жүрек қызметінің іркілген жеткіліксіздігі бар емделушілерде және миокард инфарктісінен кейінгі емделушілерге қолдану жөнінде деректер жоқ.

Қолданылуы

• эссенциальді гипертензияда, кандесартан цилексетилімен немесе гидрохлоротиазидпен монотерапия тиімділігі жеткіліксіз болғанда

Қолдану тәсілі және дозалары

Кандекор®Н немесе Кандекор®HД таблеткаларын ішке, ас қабылдауға қарамай-ақ, судың аздаған мөлшерімен ішіп қабылдайды.

Кандекор®H немесе Кандекор®HД ұсынылатын дозасы тәулігіне 1 таблетканы құрайды.

Жекелеген компоненттердің (кандесартан цилексетилі және гидрохлоротиазид) дозасын түзету керек. Клиникалық мақсатта монопрепараттарды қолданудан тікелей біріктірілген Кандекор®H немесе Кандекор®НД препаратына көшірілуі мүмкін. Кандесартан цилексетилінің дозасын гидрохлоротиазид монотерапиясынан көшкен кезде түзету керек. Кандекор®H немесе Кандекор®НД препаратын кандесартан цилексетилімен немесе гидрохлоротиазидпен монотерапияда, немесе Кандекор®H немесе Кандекор® HД препаратының төмен дозаларымен артериялық қысымы тиісінше бақылауға келмейтін емделушілерге қолдануға болады.

Гипертензияға қарсы өте айқынырақ әсерге әдетте емді бастағаннан кейін 4 апта ішінде жетеді.

Егде жастағы емделушілерде дозаны түзетудің қажеті жоқ.

Кандесартан цилексетилі дозасын гипотензияның пайда болу қаупі бар емделушілерде, мысалы, сұйықтық тапшы болуы мүмкін емделушілерде түзету керек (осы емделушілерге кандесартан цилексетилінің бастапқы 4 мг дозасын қолдануды қарастыруға болады).

Бүйрек қызметінің жеткіліксіздігі бар емделушілерде ілмектік диуретиктерді қолдану тиазидтерді қолдануға қарағанда дұрысырақ болып табылады.

Кандесартан цилексетилінің дозасын бауыр және бүйрек қызметтерінің жеңіл және орташа дәрежелі жеткіліксіздігі бар емделушілерде (креатинин клиренсі ≥ 30 мл/мин/1.73 м2 дене сыртының ауданы (BSA)) Кандекор®Н немесе Кандекор®НД препаратымен емдеуді бастағанға дейін түзету керек (бұл емделушілерде кандесартан цилексетилінің ұсынылатын бастапқы дозасы 4 мг құрайды).

Кандекор®H немесе Кандекор®HД препаратын бүйрек қызметінің ауыр жеткіліксіздігі бар (креатинин клиренсі КК <30 мл/мин/1.73 м2 BSA) емделушілерге қолдануға болмайды.

Жағымсыз әсерлері

Жиі (1/100–ден <1/10-ға дейін)

• тыныс жолдарының жұқпасы

• бас айналу / вертиго, бас ауыру

Өте сирек (<1/10,000).

• лейкопения, нейтропения және агранулоцитоз

• гиперкалиемия, гипонатриемия

• жөтел

• жүректің айнуы

• бауыр ферменттері белсенділігінің жоғарылауы, бауыр қызметінің бұзылуы немесе гепатит

• Квинке ісінуі, бөртпе, есекжем, қышыну

• арқаның ауыруы, артралгия, миалгия

• бүйрек қызметінің жеткіліксіздігі, оның ішінде бейім емделушілерде бүйрек қызметінің бұзылуы

Әдетте 25 мг және одан жоғары дозалардағы гидрохлоротиазид монотерапиясымен байланысты жағымсыз реакциялар:

Сирек ( 1/10,000–нан <1/1,000-ға дейін)

• лейкопения, нейтропения/агранулоцитоз, тромбоцитопения, апластикалық анемия, сүйек кемігінің депрессиясы, гемолитикалық анемия

• анафилактикалық реакциялар

• ұйқының бұзылуы, депрессия, мазасыздық

• парестезия

• көрудің әдетте өткінші көмескіленуі

• жүрек ырғағының бұзылулары

• некроздаушы ангиит (васкулит, тері васкулиті)

• респираторлы дистресс (пневмонитті және өкпенің ісінуін қоса есептегенде)

• панкреатит

• сарғаю (бауырішілік холестатикалық сарғаю)

• уытты эпидермальді некролиз, терінің қызыл жегісі, реакция ретінде, терінің қызыл жегісі реактивациясы

• глюкозурия

• бүйрек қызметінің бұзылуы және интерстициальді нефрит

• бұлшықеттің түйілуі

• қызба

• сарысудағы азот мочевинасының және креатининнің жоғарылауы

Жиі ( 1/100–ден <1/10-ға дейін)

• гипергликемия, гиперурикемия, электролиттік тепе-теңдіктің бұзылуы

(соның ішінде гипонатриемия және гипокалиемия)

• бас айналу, вертиго

• әлсіздік

• холестерин және триглицеридтер деңгейінің жоғарылауы

Жиі емес ( 1/1,000–нан <1/100-ге дейін)

• постуральді гипотензия

• анорексия, тәбеттің жоғалуы, асқазанның тітіркенуі, диарея, іш қату

• бөртпе, есекжем, фотосезімталдық реакциялары

Қолдануға болмайтын жағдайлар

- белсенді заттарға және қосымша заттарға инемесе сульфониламидтер тобының белсенді заттарына жоғары сезімталдық

- жүктілік және лактация кезеңі

- бүйрек қызметінің ауыр жеткіліксіздігі (креатинин клиренсі <30 мл/мин/

1.73м2 BSA)

- бауыр қызметінің ауыр жеткіліксіздігі және/немесе холестаз

- рефракторлы гипокалиемия және гиперкальциемия

- подагра

- балалар және 18 жасқа дейінгі жасөспірімдер (тиімділігі және қауіпсіздігі анықталған жоқ)

Дәрілермен өзара әрекеттесуі

Варфаринмен, дигоксинмен, пероральді контрацептивтермен (мысалы, этинилэстрадиол/левоноргестрел), глибенкламидпен және нифедипинмен клиникалық тұрғыдан маңызды өзара әрекеттесу байқалған жоқ.

Гидрохлоротиазидті қолданудан болатын гипокалиемия әсері калийдің жоғалуымен және гипокалиемиямен астасатын басқа да дәрілік заттармен (мысалы, басқа калийуретикалық диуретиктермен, іш жүргізетін дәрілермен, амфотерицинмен, карбеноксолонмен, натрий бензилпенициллинімен, салицил қышқылының туындыларымен, стероидтармен, АКТГ) күшейеді деп күтуге болады.

Кандекор®H немесе Кандекор® HД препаратын калий жинақтаушы диуртиктермен, калий қоспаларымен, тұз алмастырғыштармен немесе калий деңгейін арттыруы мүмкін басқа да дәрілік заттармен (мысалы, натрий гепарині) бір мезгілде қолдану қан плазмасындағы калий деңгейінің жоғарылауына әкеп соғуы мүмкін. Қажетіне қарай, калий деңгейіне мониторинг жүргізген жөн.

Гипокалиемия, диуретиктердің әсерінен болған, және гипомагниемия дигиталис гликозидтерінің және аритмияға қарсы дәрілердің болуы мүмкін кардиоуыттылығын потенциялайды. Кандекор® H немесе Кандекор® HД препаратын осы дәрілік заттармен және «пируэт» типті полиморфты қарыншалық тахикардияны туынтата алатын төменде көрсетілген басқа да дәрілік заттармен бірге қолданғанда қан плазмасындағы калий деңгейін әлсін-әлсін бақылап отыру керек:

- аритмияға қарсы Ia класқа жататын препараттар (мысалы, хинидин, гидрохинидин, дизопирамид), аритмияға қарсы IІІ класқа жататын препараттар (мысалы, амиодарон, соталол, дофетилид, ибутилид); кейбір нейролептиктер (мысалы, тиоридазин, хлорпромазин, левомепромазин, трифлуоперазин, циамемазин, сульпирид, сультоприд, амисульприд, тиаприд, пимозид, галоперидол, дроперидол); басқа да препараттар (мысалы, бепридил, цизаприд, дифеманил, эритромицин көктамыр ішіне, галофантрин, кетансерин, мизоластин, пентамидин, спарфлоксацин, терфенадин, винкамин көктамыр ішіне).

Литийді ангиотензин-конвертирлеуші фермент (АКФ) тежегіштерімен немесе гидрохлоротиазидпен бір мезгілде қолданғанда қан плазмасындағы литий концентрацияларының және оның уыттылығының қайтымды жоғарылауы жөнінде мәлімдемелер бар. Ангиотензин ІІ рецепторының антагонистерін қолданғанда да осыған ұқсас әсер жөнінде мәлімделді. Кандесартан мен гидрохлоротиазидті литиймен бірге пайдалануға болмайды. Біріктіріп қолдану қажет болғанда қан плазмасындағы литий деңгейін мұқият бақылап отыру керек.

Ангиотензин ІІ рецепторларының антагонистерін қабынуға қарсы стероидты емес препараттармен (ҚҚСП) (мысалы, ЦОГ-2 селективтік тежегіштері, ацетилсалицил қышқылы (тәулігіне > 3 г) және селективтік емес ҚҚСП) бір мезгілде қолданған жағдайда гипертензияға қарсы әсерін төмендетуі мүмкін.

АКФ тежегіштерін қолданған кездегідей, ангиотензин ІІ рецепторларының антагонистері мен ҚҚСП бір мезгілде қолдану, бүйрек қызметінің жедел жеткіліксіздігін, сондай-ақ гиперкалиемияны қоса есептегенде, әсіресе сыртартқыда бүйрек қызметінің бұзылуы бар болғанда, бүйрек қызметі жеткіліксіздігінің пайда болу қаупін арттыруы мүмкін. Бұл біріктірілімді әсіресе егде жастағы адамдарға абайлап қолданады. Емделушілер сұйықтықтың жеткілікті мөлшерін қабылдауы тиіс; қатар жүретін емді бастағаннан кейін және емдеу кезінде әлсін-әлсін бүйрек қызметін бақылап отыру қажет. ҚҚСП гидрохлортиазидтің диуретикалық, натрийуретикалық және гипертензияға қарсы әсерін төмендетеді.

Колестипол немесе колестирамин гидрохлоротиазидтің сіңуін азайтады.

Гидрохлоротиазид поляризацияланбайтын миорелаксанттардың, мысалы, тубокурариннің әсерін потенциялауы мүмкін.

Тиазидтік диуретиктер қан плазмасында кальций деңгейін, оның шығарылуының төмендеуіне байланысты, арттыруы мүмкін. Кальций қоспаларын немесе Д витаминін тағайындағанда қан плазмасындағы кальций деңгейін бақылаған және дозасын тиісінше түзеткен жөн.

Тиазидтер бета-блокаторлардың және диазоксидтің гипергликемиялық әсерін күшейтуі мүмкін.

Антихолинергиялық препараттар (атропин, бипериден) тиазидтік диуретиктердің биожетімділігін арттырып, асқазан-ішек жолының жиырылуын және асқазанның босау жылдамдығын төмендетуі мүмкін.

Тиазидтер амантадинді қолданған кезде жағымсыз әсерлердің пайда болу қаупін арттыруы мүмкін.

Тиазидтер цитоуытты дәрілік препараттардың (циклофосфамид, метотрексат сияқты) бүйректік экскрециясын төмендетуі және олардың миелосупрессивтік әсерін күшейтуі мүмкін.

Алкогольді, барбитураттарды немесе анестетиктерді бір мезгілде қабылдау постуральді гипотензияны тудыруы мүмкін.

Тиазидтік диуретиктермен емдеу глюкозаға төзімділікті төмендетуі мүмкін. Инсулинді қоса есептегенде, диабетке қарсы дәрілердің дозасын түзету қажеттілігі туындауы мүмкін. Метформинді гидрохлоротиазидті қолдануға байланысты бүйрек қызметінің жеткіліксіздігі пайда болу мүмкіндігіне байланысты, лактоацидоздың пайда болу қаупіне байланысты сақтықпен қолданған жөн.

Гидрохлоротиазид прессорлы аминдерге (мысалы, адреналин сияқты) артериялардың реакциясын төмендетуі мүмкін, бірақ прессорлы әсерін жоққа шығаруға болмайды.

Гидрохлоротиазид, әсіресе құрамында йоды бар рентгенконтрастты заттарды жоғары дозаларда қолданған кезде бүйрек қызметінің жедел жеткіліксіздігінің пайда болу қаупін арттырады.

Циклоспоринмен бір мезгілде емдеу гиперурикемияның және подаграның асқыну қаупін арттыруы мүмкін.

Баклофенмен, амифостинмен, үшциклді антидепрессанттармен немесе нейролептиктермен бір мезгілде емдеу гипертензияға қарсы әсерін күшейтуі және гипотензияны туындатуы мүмкін.

Айрықша нұсқаулар

Бүйрек қызметінің жеткіліксіздігі /бүйрек трансплантациясы

Емделушілердің осы категорияларына ілмектік диуретиктерді қолдану, тиазидтерді қолдануға қарағанда, дұрысырақ болып табылады. Кандекор® H немесе Кандекор® HД препаратын бүйрек қызметі бұзылған емделушілерге қолданған жағдайда калий, креатинин және несеп қышқылы деңгейлерін әлсін-әлсін бақылап отыру керек.

Бүйрегі жақын арада алмастырылған емделушілерге Кандекор® H немесе Кандекор® HД препаратын қолдану тәжірибесі жоқ.

Бүйрек артерияларының тарылуы

Бүйрек артерияларының екі жақты тарылумен немесе жалғыз бүйрек артериясы тарылған емделушілерде ренин-ангиотензин-альдостерон жүйесіне әсер ететін дәрілік препараттар, соның ішінде ангиотензин ІІ рецепторларының антагонистері де қандағы мочевина деңгейін және қан сарысуындағы креатинин деңгейін арттыруы мүмкін.

Қантамырішілік көлемнің азаюы

Қантамырішілік көлемі және/немесе натрий азайған емделушілерде ренин-ангиотензин-альдостерон жүйесіне ықпалын тигізетін басқа препараттарда сипатталғандай, симптоматикалық гипотензия болуы мүмкін. Сондықтан Кандекор® H немесе Кандекор® HД препаратын, мұндай жағдай жоғалғанша, қолдануға болмайды.

Анестезия және хирургиялық араласым

Ангиотензин ІІ рецепторлары антагонистерімен ем қабылдап жүрген емделушілерде анестезия және хирургиялық араласым кезінде, ренин-ангиотензин жүйесінің блокадасы салдарынан, гипотензия пайда болуы мүмкін. Өте сирек жағдайларда гипотензия соншалықта ауыр болуы мүмкін, бұл көктамырішілік сұйықтықтарды және/немесе вазопрессорларды қолдануды қажет етеді.

Бауыр қызметінің жеткіліксіздігі

Тиазидтерді бауыр қызметі бұзылған немесе бауыр ауруы өршіген емделушілерге қолданғанда сақ болған жөн, өйткені су-электролиттік тепе-теңдіктің аздаған өзгерісі бауыр комасын өршітуі мүмкін. Бауыр қызметінің жеткіліксіздігі бар емделушілерде Кандекор® H немесе Кандекор® HД қолданудың клиникалық тәжірибесі жоқ.

Қолқаның және митральді клапанның стенозы (обструктивті гипертрофиялық кардиомиопатия)

Қантамырларды кеңейтетін басқа дәрілердегі жағдай сияқты, гемодинамикалық тұрғыдан маңызды қолқа немесе митральді клапан стенозы, немесе обструктивті гипертрофиялық кардиомиопатиясы бар емделушілерді емдеген кезде сақ болу қажет.

Алғашқы гиперальдостеронизм

Алғашқы гиперальдостеронизмі бар емделушілер әдетте ренин-ангиотензин-альдостерон жүйесі арқылы әсер ететін гипертензияға қарсы дәрілік заттарға реакция бермейді. Сондықтан емделушілердің осы тобында Кандекор® H немесе Кандекор® HД қолдануға болмайды.

Электролиттік теңгерімнің бұзылуы

Қан сарысуындағы электролиттерді әлсін-әлсін анықтап отыруды тиісті уақыт аралығында жүргізген жөн. Тиазидтер, гидрохлоротиазидті қоса есептегенде, сұйықтықтың немесе электролиттік теңгерімнің бұзылуын (гиперкальциемия, гипокалиемия, гипонатриемия, гипомагниемия және гипохлоремиялық алкалоз) тудыруы мүмкін.

Тиазидтік диуретиктер кальцийдің несеппен бірге шығарылуын төмендетуі және қан сарысуындағы кальций концентрациясының үзік-үзік және аздап жоғарылатуы мүмкін. Елеулі гиперкальциемия жасырын гиперпаратиреоздың белгісі болуы мүмкін, сондықтан тиазидтік диуретиктерді қалқанша маңы бездері қызметін зерттегенге дейін тоқтату керек.

Гидрохлоротиазид калийдің несеппен бірге шығарылуын дозаға байланысты арттырады, бұл гипокалиемияға әкелуі мүмкін. Гидрохлоротиазидтің бұл әсері оны кандесартан цилексетилімен біріктіріп қолданғанда аз білінеді. Гипокалиемияның пайда болу қаупі бауыр циррозы бар, диурезі ұлғайған, электролиттердің аспен бірге түсуі жеткіліксіз емделушілерде және кортикостероидтармен немесе адренокортикотроптық гормондармен (АКТГ) қатар емдегенде жоғарылауы мүмкін.

Кандесартан цилексетилімен емдеу әсіресе жүрек және/немесе бүйрек қызметінің жеткіліксіздігі бар болғанда гиперкалиемияны туындатуы мүмкін. Кандекор®H немесе Кандекор® HД және калий жинақтаушы диуретиктерді, калий қоспаларын, тұз алмастырғыштармен немесе қан плазмасында калий деңгейін арттыратын басқа да дәрілік препараттармен (мысалы, натрий гепарині) бір мезгілде қолдану қан плазмасында калий деңгейін арттыруы мүмкін. Қажетіне қарай, калий деңгейіне мониторинг жүргізген жөн. Бақылауда көрсетілгендей, тиазидтер магнийдің несеппен бірге шығарылуын арттырады, бұл гипомагниемияға әкеп соғуы мүмкін.

Метаболизмге және эндокриндік жүйеге ықпал етуі

Тиазидтік диуретиктермен емдеу глюкозаға төзімділікті бұзуы мүмкін. Диабетке қарсы дәрілердің, инсулинді қоса есептегенде, дозасын түзету керек болуы мүмкін. Тиазидтермен емдеу кезінде жасырын қант диабеті білінуі мүмкін. Холестерин мен триглицеридтер деңгейлерінің жоғарылауы тиазидтік диуретиктермен емдеумен астасады. Кандекор®H немесе Кандекор®HД бар дозаларда барынша өте аз әсерлер ғана мәлімделді. Тиазидтік диуретиктер қан плазмасында несеп қышқылының концентрациясын арттырады және тиісінше бейім емделушілерде подаграның пайда болуын өршітуі мүмкін.

ФотосезімталдықТиазидтік диуретиктерді қабылдағанда фотосезімталдық реакциялары жағдайлары жөнінде мәлімдемелер болды. Егер емдеу кезінде фотосезімталдық реакциясы пайда болса, емдеуді тоқтату керек. Қайталап қолдану қажет болған жағдайда осал жерлерді күннен немесе жасанды ультракүлгін сәулелерден қорғау керек.

Жалпы мәліметтер

Қантамырлық тонусқа және бүйрек қызметіне (мысалы жүрек қызметінің іркілген ауыр жеткіліксіздігінде немесе бүйрек ауруларында, бүйрек артерияларының тарылуын қоса есептегенде) ренин-ангиотензин-альдостерон жүйесі белсенділігінің белгілі мәнінде осы жүйеге ықпал ететін басқа дәрілік заттармен, ангиотензин ІІ рецепторлары антагонистерін қоса есептегенде, емдеу жедел гипотензиямен, азотемиямен, олигуриямен және кейде бүйрек қызметінің жедел жеткіліксіздігімен астасты. Гипертензияға қарсы басқа да препараттармен бірге қолданған жағдайдағыдай, артериялық қысымның айқын төмендеуі жүректің ишемиялық ауруы немесе атеросклероздық цереброваскулярлы ауруы бар емделушілерде миокард инфарктісіне немесе инсультқа әкеп соғуы мүмкін. Гидрохлоротиазидке асқын сезімталдық реакциялары аллергиясы бар немесе аллергиясыз және сыртартқысында бронх демікпесі бар емделушілерде пайда болуы мүмкін, бірақ көбіне осы емделушілерде жиі пайда болады. Тиазидтік диуретиктерді қолданғанда жүйелік қызыл жегінің өршігені немесе белсенділенуі жөнінде мәлімделді.

Кандекор®H немесе Кандекор® HД препаратының гипертензияға қарсы әсері басқа антигипертензиялық препараттар есебінен жоғарылауы мүмкін.

Кандекор®H немесе Кандекор®HД таблеткаларында лактоза бар. Сирек тұқым қуалайтын галактоза жақпаушылығы, Лапп лактаза жеткіліксіздігі немесе глюкоза-галактоза мальабсорбциясы бар емделушілерде бұл препаратты қолданбаған жөн.

Дәрілік заттың автокөлікті және қауіпті механизмдерді басқару қабілетіне ықпал ету ерекшеліктері

Автомобильді және қауіпті механизмдерді басқару қабілетіне ықпал етуіне зерттеулер жүргізілген жоқ. Көлікті басқарғанда немесе механизмдермен жұмыс жасағанда, кейде Кандекор® H немесе Кандекор® HД препаратымен емдеу кезінде бас айналудың немесе шаршағыштықтың пайда болуы мүмкін екендігін ескерген жөн.

Артық дозалануы

Симптомдары: Препараттың артық дозалануынан (672 мг-ға дейінгі кандесартан цилексетилі) емделушілердің ауыр зардаптарсыз жазылуымен аяқталған жекелеген жағдайлардың болғаны сипатталған.

Гидрохлортиазидтің артық дозалануының негізгі біліністері сұйықтықтың және электролиттердің жедел жоғалуы болып табылады. Сондай-ақ бас айналу, АҚ төмендеуі, ауыз ішінің құрғауы, тахикардия, қарыншалық аритмия, седация, сананың жоғалуы және бұлшықет құрысулары сияқты симптомдар байқалды.

Емі: құстыру немесе асқазанды шаю, симптоматикалық ем және өмір үшін маңызды қызметтерге мониторинг жүргізу. Емделушіні, аяғын сәл көтеріңкіреп, шалқасынан жатқызған жөн. Қажет болғанда – су-электролиттік тепе-теңдікті қалпына келтіруге бағытталған шаралар, симптоматикалық дәрілер тағайындалуы мүмкін. Гидрохлоротиазидтің гемодиализ жәрдемімен қандай дәрежеде шығарылатыны белгісіз. Кандесартан гемодиализ көмегімен шығарылмайды.

Шығарылу түрі және қаптамасы

Поливинилхлоридті/поливинилдихлоридті үлбірден және алюминий фольгадан жасалған пішінді ұяшықты қаптамаға 10 немесе 14 таблеткадан салынған.

Пішінді ұяшықты 2, 4 (14 таблеткасы бар) немесе 3, 6 (10 таблеткасы бар) қаптамадан медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Түпнұсқалық қаптамасында, 30ºС-ден аспайтын температурада, ылғалдан қорғалған жерде сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Препаратты қаптамасында көрсетілген жарамдылық мерзімі өткеннен кейін қолдануға болмайды.

Дәріханадан босатылу шарттары

Рецепт арқылы

Өндіруші

КРКА, д.д. Ново место, Словения

Шмарьешка 6, 8501 Ново место, Словения

Қаптаушы ұйымның атауы және елі

КРКА, д.д., Ново место, Словения

Тіркеу куәлігі иесінің атауы және елі

КРКА, д.д., Ново место, Словения

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

«КРКА Қазақстан» ЖШС, ҚР, 050059, Алматы қ-сы, Әл-Фараби д-лы, 19,

корпус 1б, 2-ші қабат, 207 кеңсе

тел. 8 (727) 311-08-09

факс 8 (727) 311-08-12

info.kz@krka.biz