ИПИГРИКС® (15 мг/мл)

• русский
• қазақша

• Скачать инструкцию медикамента

Саудалық атауы

ИПИГРИКС®

Халықаралық патенттелмеген атауы

Ипидакрин

Дәрілік түрі

Инъекцияға арналған 5 мг/мл және 15 мг/мл ерітінді

Құрамы

1 мл препараттың құрамында

белсенді зат: ипидакрин гидрохлориді (сусыз затқа шаққанда) – 5 мг немесе 15 мг;

қосымша заттар: хлорсутек қышқылы 1 М pH 2,8-4,0 дейін, инъекцияға арналған су 1 мл-ге дейін.

Сипаттамасы

Мөлдір түссіз ерітінді

Фармакотерапиялық тобы

Жүйке жүйесін емдеуге арналған басқа да препараттар.

Антихолинэстеразалық препараттар.

АТХ коды N07AA

Фармакологиялық қасиеттері

Фармакокинетикасы

Парентеральді енгізгеннен кейін ипидакрин гидрохлориді жылдам сіңеді. Әсер етуші зат қан плазмасындағы ең жоғары концентрациясына 25-30 минуттан кейін жетеді. Ипидакрин қаннан тінге жылдам өтеді, гематоэнцефалдық бөгеттен өтеді.

Тепе-тең таралуға жеткеннен кейін қан плазмасында 2%-ға жуық белсенді зат қалады. Гидроксилдену арқылы негізінен бауырда метаболизденеді. Метаболиттер әсер етудің сол бейінін сақтайды, алайда әсерлерінің айқындылығы әлсіз. Шығарылуы ренальді және экстраренальді жүреді, негізінен несеппен өзекшелік сөлініс арқылы шығарылуы басым, және дозаның тек қана 1/3 шумақтық сүзіліс арқылы бөлінеді. Жартылай шығарылуының ақырғы кезеңі 2-3 сағат. Парентеральді енгізгеннен кейін дозаның 20-35% несеппен өзгермеген күйде шығарылады; жинақталмайды.

Фармакодинамикасы

Ипидакрин холинэстеразаның қайтымды тежегіші болып табылады. Ипидакрин жарғақшалардың калийлік өзекшелерін бөгеп, ОЖЖ-де және жүйке-бұлшықет синапстарында импульстердің өтуін тікелей стимуляциялайды. Ипидакрин ацетилхолин медиаторының ғана емес, адреналиннің, серотониннің, гистаминнің және окситоциннің де тегіс бұлшықеттерінің әсерін күшейтеді.

Ипидакриннің басты фармакологиялық әсерлері:

• жүйке-бұлшықет өткізуін қалпына келтіру және стимуляциялау

• кейбір факторлардан (жарақат, қабыну, жергілікті анестезиялаушы дәрілердің, кейбір антибиотиктердің, калий хлоридінің және т.б. әсері.) туындаған блокададан кейін шеткері жүйке жүйесіне импульстердің өткізілуін қалпына келтіру

• калий хлоридінен басқа, барлық агонистердің ықпалымен тегіс бұлшықетті ағзалардың жиырылғыштығын күшейту

• тыныштандырғыш әсердің жекелеген көріністерімен бірге ОЖЖ арнайы орташа стимуляциясы

• жадыны жақсарту

Бұл дәріні балаларға қолданудың қауіпсіздігін клиникалық зерттеудің жеткілікті деректері жоқ.

Қолданылуы

Кешенді ем құрамында

- шеткері жүйке жүйесінің аурулары: моно- және полинейропатия, полирадикулопатия, миастения және түрлі этиологиядағы миастениялық синдром

- орталық жүйке жүйесінің аурулары: бульбарлы салдану және парездер

- қозғалыстың бұзылуымен қатар жүретін орталық жүйке жүйесінің органикалық зақымдануы кезінде қалпына келу кезеңі.

Қолдану тәсілі және дозалары

ИПИГРИКС® 5 мг/мл және ИПИГРИКС® 15 мг/мл инъекцияға арналған ерітінділерін бұлшықет ішіне немесе тері астына енгізеді. Дозасын және емдеу ұзақтығын аурудың ауырлық деңгейіне байланысты жеке анықтайды.

Шеткері жүйке жүйесінің аурулары:

- түрлі генездегі моно- және полиневропатия: құрамында 5 мг/мл немесе 15 мг/мл (5 мг немесе 15 мг) бар инъекцияға арналған 1 мл ерітінділерді күніне 1-2 рет бұлшықет ішіне немесе тері астына енгізеді. Емдеу курсы − 10–15 күн (ауыр жағдайларда – 30 күнге дейін).

- миастения және миастениялық синдром: құрамында 5 мг/мл немесе 15 мг/мл (5 мг немесе 15 мг) бар инъекцияға арналған 1 мл ерітінділерді күніне 1-3 рет бұлшықет ішіне немесе тері астына енгізеді. Жалпы емдеу курсы 1-2 айды құрайды. Қажет болған жағдайда емдеуді курстар арасында 1-2 ай үзіліс жасап, бірнеше рет қайталауға болады.

Орталық жүйке жүйесінің аурулары

- бульбарлы салдану және парездер: құрамында 5 мг/мл немесе 15 мг/мл (5 мг немесе 15 мг) бар инъекцияға арналған 1 мл ерітінділерді күніне 1-2 рет бұлшықет ішіне немесе тері астына, емдеу курсы – 10-15 күнді құрайды.

Орталық жүйке жүйесінің органикалық зақымдануы кезінде қалпына келу кезеңі: құрамында 5 мг/мл немесе 15 мг/мл (5 мг немесе 15 мг) бар инъекцияға арналған 1 мл ерітінділерді күніне 1-2 рет бұлшықет ішіне, 15 күнге дейін қолданады.

Жағымсыз әсерлері

Жиі

- гиперсаливация, жүрек айнуы

- жүрек қағуы, брадикардия

- қатты терлеу

Жиі емес

- бронх сөлінісі бөлініп шығуының күшеюі

- жоғары дозаларды қолданудан кейін – бас айналу, бас ауыру, әлсіздік, ұйқышылдық, бұлшықет құрысулары, аллергиялық реакциялар (терінің қышынуы, бөртпе), құсу

- тыныс алу жүйесінің бұзылыстары

Сирек

- эпигастриядағы ауыру, диарея

Белгісіз (қолда бар деректер бойынша анықтау мүмкін емес)

- бронх түйілуі

- миоз

- тремор

- гипотермия, кеуденің ауыруы

Бұл жағдайларда дозаны төмендетеді немесе препаратты енгізуді аз уақытқа (1-2 күнге) тоқтатады. Аталған жағымсыз әсерлер сирек байқалады және әдетте препаратты тоқтатуға себеп болмайды.

Гиперсаливацияны және брадикардияны м‑холиноблокаторлармен (атропин және басқалармен) азайтуға болады.

Қолдануға болмайтын жағдайлар

- ипидакринге немесе препараттың қосымша заттарына жоғары сезімталдық

- эпилепсия

- гиперкинезі бар экстрапирамидтік аурулар

- стенокардия

- айқын брадикардия

- бронх демікпесі

- ішектің немесе несеп шығаратын жолдың бітелуі

- вестибулярлық бұзылыстарға бейімділік

- өршу сатысындағы асқазанның немесе он екі елі ішектің ойық жаралы ауруы

- жүктілік және емшек емізу кезеңі

- 18 жасқа дейінгі балалар мен жасөспірімдер (дәрілік заттың балаларға қауіпсіздігін анықтау жөнінде талапқа сай зерттеулер жүргізілген жоқ).

Дәрілермен өзара әрекеттесуі

Ипидакрин белсенділігінің ауқымында седативті әсері бар болғандықтан үлкен дозалардағы ұйықтататын препараттардың (гексенал, хлоралгидрат) әсерін біршама көтермелеуге әкеледі, ал төмен дозаларда ипидакрин ұйықтататын дәрілерге не әсер етпейді, не әсерін төмендетеді.

Басқа холинэстераза тежегіштерімен және м-холиномиметикалық дәрілермен бірге қолданған кезде әсері және жағымсыз әсерлері күшейеді.

Миастениямен ауыратын науқастарда басқа холиномиметикалық дәрілерді қолдану аясында холинергиялық криздің даму қаупі артады.

Егер ипидакринмен емдеуді бастағанға дейін ß-адреноблокаторлар қолданылса, брадикардияның даму қаупі артады.

Церебролизин препараттың тиімділігін арттырады.

Ипидакрин жергілікті анестетиктердің, антибиотиктердің әсерін төмендетеді.

Алкоголь препараттың жағымсыз әсерлерін күшейтеді.

Айрықша нұсқаулар

Егер кезекті доза енгізілмесе, оны мүмкіндігінше жылдам енгізу керек, дегенмен тағайындалған бір реттік дозадан көп емес. Енгізілмеген дозаның орнын толтыру үшін екі есе дозаны енгізуге болмайды.

Тиреотоксикозда, жүрек-қантамыр жүйесі ауруларында, сондай-ақ анамнезде тыныс алу жолының аурулары бар пациенттерге немесе тыныс алу жолының жедел ауруларында сақтықпен тағайындау керек.

Дәрілік заттың көлік құралдарын немесе қауіптілігі зор механизмдерді басқару қабілетіне ықпал ету ерекшеліктері

Ипидакрин седативті әсер етуі мүмкін, сондықтан көлік құралын басқарудан және қауіпті механизмдермен жұмыс істеуден тартыну керек.

Артық дозалануы

Ауыр артық дозалану кезінде мынадай симптомдармен «холинергиялық криздің» дамуы мүмкін: бронх түйілуі, көзден жас ағу, қатты тершеңдік, қарашықтардың тарылуы, нистагм, өздігінен болатын дефекация және несеп шығару, құсу, брадикардия, жүрек блокадасы, аритмия, гипотензия, мазасыздық, үрей, қозу, қорқыныш сезімі, атаксия, конвульсиялар, кома, түсініксіз сөйлеу, ұйқышылдық және әлсіздік. Симптомдары әлсіз байқалуы мүмкін.

Емі: препаратты тоқтату, симптоматикалық ем, м-холиноблокаторларды (атропин және циклодол) қолдану, олар артық дозалану симптомдарының айқындылығын төмендетеді.

Шығарылу түрі және қаптамасы

Сары және қызыл (5 мг/мл дозасы үшін) немесе жасыл және қызыл (15 мг/мл дозасы үшін) түсті екі таңбалау сақиналары және сындыратын сызығы немесе нүктесі бар І гидролитикалық кластағы түссіз шыныдан жасалған 1 ампулададан.

5 ампуладан поливинилхлоридті үлбірден жасалған жабыны жоқ (тұғыр) пішінді ұяшықты қаптамада.

2 пішінді ұяшықты қаптамадан (тұғырдан) медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Сақтау шарттары

25 С-ден аспайтын температурада сақтау керек.

Мұздатып қатыруға болмайды!

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

ХБМ Фарма с.р.о.

Склабинск к-сі, 30, Мартин, 036 80, Словакия

Тіркеу куәлігінің иесі

«Гриндекс» АҚ. Крустпилс к-сі, 53, Рига, LV-1057, Латвия

Қазақстан Республикасы аумағында тұтынушылардан өнімнің сапасына қатысты шағымдарды қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы

«Гриндекс» АҚ өкілдігі

050010, Алматы қ., Достық даңғылы, Бөгенбай батыр к-сі. қиылысы, 34а/87а үй, №1 кеңсе

т./ф. 291-88-77, 291-13-84

эл. почта: grindeks.asia.kz@mail.ru