Иматиниб -Тева (400 мг)

• русский
• қазақша

• Скачать инструкцию медикамента

Саудалық атауы

Иматиниб-Тева

Халықаралық патенттелмеген атауы

Иматиниб

Дәрілік түрі

Үлбірлі қабықпен қапталған 100 мг, 400 мг таблеткалар

Құрамы

Бір таблетканың құрамында

белсенді зат – иматиниб мезилаты 119.469 мг немесе 477.877 мг (тиісінше

100 мг немесе 400 мг иматинибке баламалы),

қосымша заттар: кальций гидрофосфаты, кросповидон, А типі, магний стеараты,

қабық: Опадри II 85F97369 (поливинилді спирт ішінара гидролизделген, макрогол, темірдің сары тотығы (Е172), тальк, титанның қостотығы (Е171), темірдің қызыл тотығы (Е172)).

Сипаттамасы

Дөңгелек пішінді, үлбірлі қабықпен қапталған, күңгірт сарыдан қоңыр-қызыл-сары түске дейінгі, бір жақ бетінде сызықпен бөлінген «IT» және «1» өрнектері бар (100 мг доза үшін) таблеткалар.

Сопақша пішінді, үлбірлі қабықпен қапталған, күңгірт сарыдан қоңыр- қызыл-сары түске дейінгі, бір жақ бетінде сызықпен бөлінген «IT» және «4» өрнектері бар (400 мг доза үшін) таблеткалар.

Фармакотерапиялық тобы

Ісікке қарсы препараттар. Басқа да ісікке қарсы препараттар. Протеинкиназа тежегіштері. Иматиниб.

ATХ коды L01XЕ01

Фармакологиялық қасиеттері

Фармакокинетикасы

Иматинибтің фармакокинетикалық параметрлері 25 мг-ден 1000 мг дейінгі доза диапазонында бағаланды. Фармакокинетикалық бейіні қолданудың 1–ші күні талданған, сондай-ақ иматинибтің плазмадағы тепе теңдік концентрациясына (Css) 7-ші немесе 28-ші күні қол жеткенде талданған.

Сіңуі

Ішке қабылдағаннан кейін иматинибтің биожетімділігі орташа алғанда 98% құрайды. "Концентрация-уақыт" (AUC) қисығы астындағы аудан көрсетікіштері үшін ауытқу коэффициенті 40-60% құрайды. 25 мг-ден 1000 мг дейінгі доза диапазонында AUC мәнінің доза шамасына тікелей сызықтық байланыстылығы белгіленген.

Иматинибті ашқарынға қабылдаумен салыстырғанда май құрамы жоғары тамақпен қабылдағанда сіңу дәрежесі елеусіз төмендегені (иматинибтің қан плазмасындағы ең жоғары концентрациясының (Cmax) 11 %-ға, AUC – 7.4 % -ға азаюы) және сіңу жылдамдығының баяулағаны (иматинибтің қан плазмасындағы ең жоғары концентрациясына жету уақытының 1.5 сағатқа артуы) анықталды.

Таралуы иматинибтің 95 %-ға жуығы плазма ақуыздарымен (негізінен, альбуминмен және қышқыл альфа-гликопротеиндерімен, елеусіз дәрежеде - липопротеиндермен) байланысады.

Метаболизм

Иматиниб негізінен қан арнасында айналымда жүретін негізгі метаболитті (N-деметилденген пиперазин туындысы) түзе отырып, бауырда метаболизденеді.

In vitro иматинибтің метаболиті бастапқы заттың белсенділігіне ұқсас фармакологиялық белсенділікке ие. Метаболиттің AUC мәні иматинибтің AUC-ның 16 % -ын құрайды. Метаболиттің плазма ақуыздарымен бйланысуы иматинибтің сондай байланысуына ұқсас.

Шығарылуы

Иматиниб бір дозасын қабылдағаннан кейін организмнен 7 күн бойы шығарылады, көбіне метаболиттер түрінде (68 % - ішекпен және 13 % - бүйрекпен).

Өзермеген түрде дозаның 25%-ға жуығы (20% - нәжіспен және 5% - несеппен) шығарылады. Иматинибтің дені сау адамдардағы жартылай шығарылу кезеңі 18 сағатқа жуықты құрайды.

Иматинибті тәулігіне 1 рет қайталап қабылдағанда фармакокинетикалық параметрлері өзгермейді, ал иматинибтің Css бастапқыдан 1,5-2,5 есе астам болады. 65 жастан асқан емделушілердегі таралу көлемі елеусіз ұлғаяды(12 %-ға).

Дене салмағы 50 кг емделушілер үшін иматиниб клиренсінің орташа шамасы

8,5 л/сағаатты, ал дене салмағы 100 кг емделушілер үшін – 11,8 л/ сағатты құрайды. Алайда бұл айырмашылық емделушінің дене салмағына қарай иматиниб дозалануын түзетуді талап ететіндей елеулі емес.

Иматиниб фармакокинетикасы жынысқа байланыссыз.

Иматинибті басқа дәрілік заттармен бір мезгілде қолданудағы клиренс көрсеткіштерінің және таралу көлемінің өзгерістері елеусіз және доза өзгерісін талап етпейді.

Ересектердегі сияқты, 18 жасқа дейінгі балалар мен жасөспірімдерде иматинибті ішке қабылдағанда сіңуі жылдам жүреді. Емделушілердің аталған тобында 260 және 340 мг/м2 диапазонындағы дозаларда AUC ересектердегі тиісінше осындай 400 мг және 600 мг диапазонындағы дозалардағыға ұқсас.

Иматинибті тәулігіне 1 рет 340 мг/м2 дозада қайталап қабылдаудан кейін 1-ші және 8-ші күндеріндегі AUC(0-24) мәнімен салыстырғанда иматинибтың 1,7-есе жинақталуы анықталды.

Бауыр функциясының әртүрлі дәрежедегі бұзылуы бар емделушілерде AUC орташа мәні ұлғаймайды.

Иматинибті бүйрек функциясының жеңіл немесе орташа бұзылуы бар емделушілерде (креатинин клиренсі (КК) 30 мл/мин астам) қолданғанда иматинибтың плазмадағы экспозициясының 1,5-2,0 есе артатыны, осыған сәйкес қышқыл альфа-гликопротеиндердің (иматинибпен байланысатын плазманың негізгі ақуыздары) концентрациясы артатыны анықталды. Иматиниб бүйрекпен мардымсыз шығарылатындықтан, бос иматинибтің клиренсі дені сау еріктілер мен бүйрек функциясының бұзылуы бар емделушілерде бірдей болды. Иматиниб экспозициясы мен бүйрек бұзылуының ауырлығы арасындағы өзара байланыстылық анықталмаған. Фармакодинамикасы

Иматиниб Bcr гені (breakpoint cluster region) бөлігімен протоонкоген Abl (Abelson) бірігуінде түзілетін Bcr-Abl-тирозинкиназа ферментіне іріктеп тежегіш әсер етеді, пролиферацияны жасушалық деңгейде бәсеңдетеді және филадельфия хромосомасы бойынша оң созылмалы миелолейкозды және жедел лимфобласты лейкозы бар емделушілерде түзілетін жетілмеген лейкоз жасушаларын қоса, Bcr-Abl-тирозинкиназаны экспрессиялаушы жасушалық линия апоптозын туындатады.

Иматиниб созылмалы миелолейкозды науқастар қанының жасушаларынан алынған Bcr-Abl-позитивті колонияларды іріктеп тежейді.

Иматиниб пролиферацияны тежейді және асқазан-ішек жолдарының стромальді ісіктерінің тирозинкиназаны c-Kit рецептор мутациясымен экспрессиялаушы жасуша апоптозын индукциялайды.

Тромбоциттердің өсу факторына немесе тирозинкиназаның Abl-фрагментіне рецепторларды белсендіру миелодиспластикалық/миелопролиферативтік аурулардың, сондай-ақ гиперэозинофильдік синдромның, және созылмалы эозинофильдік лейкоздың, және дөңесті дерматофибросаркоманың даму себебі болуы мүмкін.

Тирозинкиназаның c-Kit рецепторын және тромбоциттердің өсу факторына рецепторларды белсендіру жүйелік мастоцитоз патогенезі негізі болуы мүмкін. Иматиниб тромбоциттердің өсу факторының және діңдік жасушалардың, c-Kit рецепторының және тирозинкиназа Abl-фрагменті белсенділігінің реттелу бұзылысы нәтижесінде туындайтын жасушалардағы дабыл берілісін және жасушалық пролиферацияны тежейді.

Қолданылуы

- ересектер мен 2 жастан асқан балалардағы алғаш анықталған филадельфия хромосомасы бойынша оң созылмалы миелоидты лейкозда

- акселерация, бласты криз фазасындағы сондай-ақ созылмалы фазадағы филадельфия хромосомасы бойынша оң созылмалы миелоидты лейкозда; ересектер мен 2 жастан асқан балалардағы альфа интерферонымен бұрынғы ем тиімсіз болғанда

- ересектердегі бірінші рет диагностикаланған филадельфия хромосомасы бойынша оң жедел лимфобласты лейкозда химиотерапиямен біріктірілімде

- қайталанған немесе филадельфия хромосомасы бойынша оң рефрактерлі жедел лимфобласты лейкозда ересектерде монотерапия ретінде

- ересек емделушілердегі тромбоциттер (PDGFR) өсу факторы рецепторларын белсендірумен байланысты миелодиспластикалық/миелопролиферативтік ауруларда

- ересек емделушілердегі гиперэозинофильдік синдром және/немесе созылмалы эозинофильдік лейкозда

- ересек емделушілердегі операция жасауға болмайтын қайталанған және/немесе метастаздық дөңес дерматофибросаркомада

- ересек емделушілердегі D816V c-Kit мутациясынсыз немесе статусы анықталмаған c-Kit мутациясымен жүйелік мастоцитозда

- ересек емделушілердегі операция жасауға болмайтын Kit+ (CD117) және/немесе асқазан-ішек жолдарының метастаздық қатерлі стромальдық ісігінде

- ересек емделушілердегі АІЖ Kit-позитивті стромальдық ісігіне резекция жасалғаннан кейінгі адъювантты емде

Қолдану тәсілі және дозалары

Ішке, тамақтану кезінде, толық стақан сумен іше отырып қабылдайды.

Тәулігіне 400 мг және 600 мг дозаларын 1 рет қабылдау керек; 800 мг тәуліктік дозасын 2 рет қабылдауға бөлу керек – таңертең және кешке 400 мг-ден.

Таблетканы тұтас жұтуға мүмкіндігі жоқ емделушілер үшін, мысалы балаларға, таблеткаларды дәл қолданар алдында сумен немесе алма шырынына ерітеді. Таблетканың қажетті мөлшерін стақанға салып, сұйықтық құяды (шамамен 100 мг таблетка үшін 50 мл сұйықтық және 100 мл сұйықтық - 400 мг таблеткалар үшін) және қасықпен араластырады. Алынған суспензияны дайындалған соң дереу ішке қабылдау керек.

Созылмалы миелоидты лейкозда (СМЛ)

Иматинибтің ұсынылатын дозасы аурудың фазасына байланысты.

СМЛ созылмалы фазасында доза тәулігіне 1 рет 400 мг, акселерация фазасында және бластты кризде - тәулігіне 1 рет 600 мг құрайды.

Емді клиникалық әсері сақталғанша жалғастырады.

Лейкозға байланыссыз айқын жағымсыз әсер және нейтропения немесе тромбоцитопения болмағанда аурудың созылмалы фазасындағы емделушілерде дозаны тәулігіне 400 мг-ден 600 мг немесе 800 мг дейін жоғарылатуға болады, және акселерация және бластты криз фазасындағы емделушілерде тәулігіне 600 мг-ден 800 мг дейін жоғарылатуға болады. Дозаны бұлай жоғарылату СМЛ үдеуінде (кез келген сатысында), 3 ай емнен кейін қанағаттанарлық гематологиялық жауап болмағанда, 12 ай емнен кейінгі цитогенетикалық жеткіліксіз жауапта немесе бұрынғы қол жеткізілген гематологиялық және/немесе цитогенетикалық жауаптың жойылуында қажет болуы мүмкін.

2 жастан асқан балалардағы дозалау режимінің есебі дене беткейінің аумағына негізделеді. СМЛ созылмалы фазасы және акселерация фазасы бар балаларда тәулігіне 340 мг/м2 доза ұсынылады. Жалпы тәуліктік доза 800 мг аспауы тиіс. Тәуліктік дозаны бір рет қабылдауға болады немесе 2 рет қабылдауға бөліп – таңертең және кешке қабылдауға болады.

Филадельфия хромосомасы бойынша оң (Ph) жедел лимфобласты лейкозда (ЖЛЛ)

Тәулігіне ұсынылатын дозасы 600 мг.

Миелодиспластикалық/миелопролиферативтік ауруларда (МДА/МПА)

Препараттың тәулігіне ұсынылатын дозасы 400 мг.

Гиперэозинофильді синдромда және/немесе созылмалы эозинофильді лейкозда (ГЭС/СЭЛ)

Тәулігіне ұсынылатын дозасы 400 мг.

Аномальді FIP1L1-PDGFR альфа-тирозинкиназадан болған ГЭС/СЭЛ бар емделушілерде тәулігіне ұсынылатын бастапқы доза 100 мг. Тиімділігі жеткіліксіз болғанда және айқын жағымсыз әсерлер болмаған жағдайда тәуліктік дозасы 400 мг дейін арттырылуы мүмкін.

Операция жасауға болмайтын қайталанған және/немесе метастаздық дөңес дерматофибросаркомада (ДДФС)

Тәулігіне ұсынылатын дозасы 1 рет қабылданатын 800 мг.

Жүйелік мастоцитоздағы дозалануы (ЖМ)

D816V c-Kit мутациясынсыз жүйелік мастоцитозбен ауыратын, сондай-ақ осы мутация статусы анықталмаған немесе басқа емдік дәрілерді қолданғанда қанағаттанарлық жауапқа қол жеткізе алмаған ересек емделушілер үшін тәулігіне ұсынылатын доза 400 мг құрайды.

Эозинофилиямен астасқан жүйелік мастоцитоздан зардап шегуші емделушілерді емдеу үшін егер клональді гематологиялық патология FIP1L1-PDGFR-альфакиназа синтезімен байланысты болған жағдайда тәулігіне 100 мг бастапқы дозаны пайдалану ұсынылады. Егер бағалау нәтижелері бойынша емге жауап реакциясы жеткіліксіз болса, дәрілік препаратқа жағымсыз реакциялар болмаған бұндай емделушілерде дозаны 100 мг-ден 400 мг дейін арттыруға болады.

АІЖ стромальді ісіктеріндегі дозалау

АІЖ операция жасауға болмайтын және/немесе метастаздық қатерлі стромальді ісіктері бар емделушілерді емдеу үшін иматинибтің тәулігіне ұсынылатын дозасы 400 мг құрайды.

Егер бағалау нәтижелері бойынша емге жеткіліксіз жауап реакциясы алынса дәрілік препаратқа жағымсыз реакциялар болмаған бұндай емделушілерде дозаны 400 мг-ден 600 мг немесе 800 мг дейін арттыруға болады.

Ересек емделушілердегі АІЖ стромальдық ісігіне резекция жасалғаннан кейінгі адъювантты ем үшін иматинибтің тәулігіне ұсынылатын дозасы 400 мг құрайды.

Емнің ұсынылатын ең аз ұзақтығы 36 айды құрайды.

Бұл препаратты адъювантты ем үшін қолданудың оңтайлы ұзақтығы туралы деректер алынбаған.

Бауыр функциясы бұзылуы бар емделушілер

Иматиниб негізінен бауырда метаболизденетіндіктен, бауырдың жеңіл, орташа немесе ауыр бұзылуы бар емделушілерге емді тәулігіне 400 мг ең төмен дозадан бастайды. Қолайсыз уыттылық әсерлері дамығанда дозаны азайту керек. Бауыр функциясының ауыр бұзылуы бар емделушілерде сақтықпен қолдану керек.

Бүйрек функциясы бұзылуы бар емделушілер

Иматинибтің және оның метаболиттерінің шығарылуында бүйрек елеулі рөл атқармайды. Бүйрек функциясының жеңіл және орташа бұзылуында (КК 20 мл/мин артық) емді ең төмен тиімді дозадан – тәулігіне 1 рет 400 мг бастайды.

Бүйрек функциясының ауыр бұзылуы (КК 20 мл/мин төмен) бар емделушілерде немесе гемодиализ емшарасын ұдайы жүргізуде иматинибті қолданудың тәжірибесі шектеулі болса да, иматинибті бұл емделушілерде, сондай-ақ ең төменгі тиімді – тәулігіне 1 рет 400 мг дозадан бастап қолдануға болады. Жағымсыз реакциялар дамыған кезде доза төмендетілуі мүмкін, тиімділігі жеткіліксіз болғанда – доза ұлғайтылуы мүмкін. Бүйрек функциясының ауыр бұзылуы кезінде иматинибті қолдануда сақ болу керек.

Егде жастағы емделушілерде дозалау режимін түзету талап етілмейді.

Гематологиялық емес жағымсыз реакциялардың дамуында дозалау режимін түзету

Иматиниб қабылдауға байланысты кез келген күрделі гематологиялық емес жағымсыз реакциялардың дамуында емді науқастың жай-күйі жақсарғанға дейін тоқтатады. Одан кейін емді бақыланған жағымсыз әсерлердің ауырлығына қарай алынатын дозада жаңғыртады.

Билирубин деңгейінің 3 есе артуында және «бауыр» трансаминазасы белсенділігінің артуы норманың жоғарғы шегінен (НЖШ) 5 есе жоғарылауында, емді билирубин концентрациясы 1,5 х НШЖ азға төмендегенше және «бауыр» трансаминазасы белсенділігі 2,5 х НШЖ төмендегенше уақытша тоқтатады.

Емді азайтылған тәуліктік дозада жаңғыртады: ересек емделушілерде дозаны тәулігіне 400-ден 300 мг дейін азайтады, немесе тәулігіне 600 мг-ден 400 мг дейін, немесе тәулігіне 800 мг-ден 600 мг дейін азайтады; балаларда - тәулігіне 340 мг/м2 ден 260 мг/м2 дейін азайтады.

Қан түзу жүйесі тарапынан (ауыр тромбоцитопения, нейтропения)күрделі жағымсыз әсерлер дамуы кезінде дозалау режимін түзету

Нейтропения және тромбоцитопения туындағанда иматинибті уақытша тоқтату немесе оның дозасын бұл қолайсыз реакциялардың (ҚР) айқындығы дәрежесіне қарай төмендегі 1 кестеде көрсетілгендей азайту талап етіледі.

1кесте Нейтропения және тромбоцитопенияда дозаны түзету

Жағымсыз әсерлері

Қатерлі аурудың өрістеген сатысында иматинибтің жағымсыз әсерін бағалау көптеген қатарлас бұзылулармен байланысты бірқатар симптомдардан, олардың үдеуінен және әртүрлі дәрілік препараттар қабылдаудан қиындайды.

Ішке күн сайын ұзақ уақыт қабылдауда СМЛ бар ересек емделушілерде және балаларда иматиниб негізінен жақсы көтерімді. Жағымсыз әсерлердің көпшілігі жеңіл немесе айқындығы орташа болды. Жағымсыз әсерлер әртүрлі көрсетілімдер бойынша иматиниб қабылдаушы барлық емделушілерде іс жүзінде ұқсас болды. Көбіне жеңіл өтпелі жүрек айнуы, құсу, диарея, миалгиялар, бұлшықет құрысулары, жеңіл басылатын тері бөртпелері байқалды.

Ауырлығы әртүрлі дәрежедегі жағымсыз әсерлердің жалпы жиілігі (ісікті қоспағанда) және күрделі жағымсыз әсерлер даму жиілігі тәулігіне 400 мг және 800 мг дозада ем қабылдаған емделушілерде ұқсас болды.

Өте жиі (≥ 1/10)

• нейтропения, тромбоцитопения, анемия

• бас ауыруы

• жүрек айнуы, құсу, диарея, диспепсия, іш ауыруы

• периорбитальді ісінулер, дерматит, экзема, тері бөртпесі

• бұлышқет түйілулері және құрысулар, бұлшықет және қаңқа ауырулары, оның ішінде миалгия, артралгия, сүйектердің ауыруы6

• сұйықтықтың іркілуі, ісінулер, қажығыштық

• дене салмағының артуы

Жиі (≥ 1/100, < 1/10)

• панцитопения, фебрильді нейтропения

• анорексия

• ұйқысыздық

• бас айналуы, парестезиялар, дәм сезудің бұзылуы, гипестезия

• қабақ ісінуі, көз жасы бөлінуінің артуы, конъюнктиваға қан құйылу, конъюнктивит, көз шырышының құрғақтығы, анық көрмеу

• «құйылулар»2, қан кету2

• ентігу, мұрыннан қан кету, жөтел

• метеоризм, іш кебуі, гастроэзофагеальді рефлюкс, іш қатуы, ауыз құрғауы, гастрит

• «бауыр» трансаминаза белсенділігі жоғарылауы

• тері қышынуы, бет ісінуі, тері құрғақтығы, эритема, алопеция, түнгі тершеңдік, фотосезімталдық реакциясы

• буындар ісінуі

• әлсіздік, қызба, анасарка, қалтырау, тремор

• дене салмағының төмендеуі

Жиі емес (≥ 1/1000, < 1/100)

• белдемелік герпес, қарапайым ұшық, назофарингит, пневмония1, синусит, целлюлит, жоғарғы тыныс жолдарының жұқпалары, тұмау, несеп шығару жолдарының жұқпалары, гастроэнтерит, сепсис

• тромбоцитемия, лимфопения, сүйек кемігінің функциясы бәсеңдеуі, эозинофилия, лимфаденопатия

• гипокалиемия, тәбет жоғарылауы, гипофосфатемия, тәбет төмендеуі, дегидратация, подагра, гиперурикемия, гиперкальциемия, гипергликемия, гипонатриемия

• депрессия, үрейлену, либидо төмендеуі

• бас сақинасы, ұйқышылдық, естен тану, шеткергі нейропатия, есте сақтау қабілетінің бұзылуы, бел-сегізкөз радикулиті, «мазасыз аяқ» синдромы, тремор, геморрагиялық инсульт, ми ісінуі

• көздің тітіркенуі, көздің ауыруы, көз айналасының ісінуі, көздің ақ қабығына қан құйылу, торлы қабыққа қан құйылу, блефарит, макула ісінуі

• вестибулярлық бас айналуы, құлақтағы шуыл, есту қабілетінің жойылуы

• жүректің қатты қағуы, тахикардия, іркілісті жүрек жеткіліксіздігі3, өкпе ісінуі

• гипертензия2, гематома2, субдуральды гематома, аяқ-қолдың мұздауы2, гипотензия2, Рейно синдромы 2

• плевралық жалқық4, жұтқыншақтың немесе көмейдің ауыруы, фарингит, жедел тыныс алу жеткіліксіздігі7, өкпенің интерстициальді ауруы

• стоматит, ауыз қуысының ойық жарасы, асқазан-ішектен қан кетуі, кекіру, мелена, эзофагит, асцит, асқазанның ойық жарасы, қан аралас құсу, хейлит, дисфагия, панкреатит

• гипербилирубинемия, гепатит, сарғаю

• пустулезді бөртпе, жоғары тершеңдік, есекжем, экхимоздар, қанталаудың пайда болуына бейімділік, гипотрихоз, терінің гиперпигментациясы/гипопигментациясы, эксфолиативті дерматит, тырнақ сынғыштығы, фолликулит, петехиялар, псориаз, пурпура, буллезді бөртпе, алақан-табан эритродизэстезиясы синдромы, фотосенсибилизация

• буындар мен бұлшықеттердегі сіресулер, ишиас

• бүйрек аумағы ауыруы, гематурия, жедел бүйрек жеткіліксіздігі, несеп шығару жиілігінің артуы

• гинекомастия, эректильді дисфункция, меноррагия, етеккір оралымының бұзылуы, сексуалдық дисфункция, емшек ұшының ауыруы, сүт безінің ұлғаюы, ұманың ісінуі

• кеуде қуысының ауыруы, дімкәстік

• қандағы креатинин деңгейінің артуы, қандағы креатинфосфокиназа деңгейінің жоғарылауы, қандағы лактатдегидрогеназа деңгейінің жоғарылауы, қандағы сілтілік фосфатаза жоғарылауы

Сирек (≥ 1/10 000, < 1/1000)

• зеңдік жұқпа

• гемолитикалық анемия

• гиперкалиемия, гипомагниемия

• сана шатасу жағдайы

• бассүйекішілік қысымның артуы, құрысулар, көру жүйкесінің невриті

• катаракта, глаукома, көру жүйкесі дискісі ісінуі, шыны сияқты денеге қан құйылуы

• аритмия, жүрекше фибрилляциясы, жүректің кенет тоқтауы, миокард инфарктісі, стенокардия, перикардиальді жалқық, жүрек тампонадасы

• плевралық ауыру, өкпе фиброзы, өкпе гипертензиясы, өкпеден қан кету

• колит, салданған/обтурациялық ішек бітелуі, ішектегі қабыну үдерісі, асқазан-ішек жолдарының перфорациясы8, дивертикулит, ісіктен қан кету/ ісік некрозы

• бауыр жеткіліксіздігі 5

• жедел фебрильді нейтрофильді дерматоз (Свита синдромы), тырнақ түсінің өзгеруі, ангионевротикалық ісінуі, везикулярлық бөртпе, мультиформалы эритема, лейкоцитокластық васкулит, Стивенс-Джонсон синдромы, жедел жайылған экзантематозды пустулезді бөртпе (ЖЖЭПБ), лихеноидты кератоз, жалпақ қызыл теміреткі

• бұлшықет әлсіздігі, артрит, рабдомиолиз немесе миопатия, балаларда бой өсуінің іркілуі

• қан плазмасындағы амилаза белсенділігі жоғарылауы

• ісік лизисі синдромы

• қандағы амилаза деңгейінің артуы

Өте сирек (<1/10 000)

• бауыр некрозы5

• анафилактикалық шок

• уытты эпидермальді некролиз

• геморрагиялық сары дене /геморрагиялық аналық без кистасы

1 – пневмония СМЛ бар емделушілерде акселерация және бласты криз фазасында жиірек анықталған

2 – көрсетілген симптомдар СМЛ бар емделушілерде акселерация фазасында және бласты кризде жиірек анықталған

3 – жүректің іркілісті жеткіліксіздігін қоса, жүрек тарапынан болатын жағымсыз әсерлер созылмалы фазасындағы СМЛ бар емделушілермен салыстырғанда (бақылау ұзақтығы 1 жыл) акселерация фазасындағы және бластық криздегі СМЛ бар емделушілерде жиірек анықталған.

4 – плевралық жалқық созылмалы фазасындағы СМЛ бар емделушілермен салыстырғанда (бақылау ұзақтығы 1 жыл) акселерация фазасындағы және бластық криздегі СМЛ бар емделушілерде жиірек анықталған.

5 – өліммен аяқталған бауыр жеткіліксіздігі жағдайлары туралы бірен-саран хабарламалар бар

6 - СМЛ бар емделушілерде бұлшықет-қаңқа ауырулары жиірек анықталған

7 – аурудың терминальді сатысы, ауыр жұқпалары, айқын нейтропениясы және басқа да күрделі қатар жүретін аурулары бар емделушілерде өліммен аяқталғаны туралы мәлімдеулер болды

8 – АІЖ перфорациясы дамуы кезінде өліммен аяқталған бірнеше хабарламалар бар

Қолдануға болмайтын жағдайлар

- иматинибке және препараттың басқа компоненттеріне жоғары сезімталдық

- жүктілік және лактация кезеңі

- 2 жасқа дейінгі балалар

Дәрілермен өзара әрекеттесуі

Иматинибті CYP3A4 изоферменті тежегіштерімен (кетоконазол, итраконазол, эритромицин, кларитромицин) бір уақытта қолдануда иматинибтің метаболизмі баяулауы және оның қан плазмасындағы концентрациясы ұлғаюы мүмкін. CYP3A4 изоферменті тежегіш препараттарымен бір уақытта қолдануда сақтық жасау керек.

CYP3A4 изоферменті индукторларымен (дексаметазон, фенитоин, фосфенитоин, рифампицин, фенобарбитал, шілтерлі шайқурай препараты, карбамазепин, окскарбазепин, примидон) бір уақытта қолдануда иматиниб метаболизмі күшеюі мүмкін және оның плазмадағы концентрациясы төмендеуі мүмкін.

Симвастатинмен бір уақытта қолдануда симвастатиннің Сmax және AUC тиісінше 2 және 3,5 есе артқаны анықталды, бұл иматинибпен CYP3A4 тежеудің салдары болып табылады.

Иматинибті және CYP3A4 субстраттары болып табылатын және емдік концентрациясының диапазоны шағын препараттарды, оның ішінде циклоспорин, пимозидты бір уақытта қолдануда сақ болу керек.

Иматиниб CYP3A4 изоферменттерімен (триазоло-бензодиазепиндер, дигидропиридин, кальций өзекшелерінің блокаторлары, ГМГ-КоА-редуктаза тежегіштерінің көпшілігі) метаболизденетін басқа препараттардың сарысулық концентрациясын арттыруы мүмкін.

Иматиниб сондай-ақ in vitro CYP2С9 және CYP2С19 изоферментін тежейді.

Варфаринмен бір уақытта қолдануда протромбиндік уақыттың ұзарғаны бақыланды. Емнің басында және аяғында кумариндік туындылармен бір уақытта қолдануда және сондай-ақ иматинибтің дозалау режимі өзгеруінде протромбиндік уақыттың қысқа мерзімді мониторингі керек.

Альтернативті түрде гепариннің төменмолекулярлық туындыларын пайдалану туралы мәселені қарастыру керек.

Иматинибті жоғары дозалардағы химиотерапиялық препараттармен біріктіруде «бауыр» трансаминазасы белсенділігі жоғарылауы және гипербилирубинемия түріндегі транзиторлы бауыр уыттылығы дамуы мүмкін.

Иматинибті және бауыр функциясының бұзылуын потенциалды туындатуы мүмкін химиотерапия режимін біріктіргенде емдеу уақытында бауыр функциясын ұдайы бақылауды қарастыру керек.

In vitro иматиниб CYP2D6 изоферментін өзінің CYP3A4 тежейтін концентрацияларында тежейді.

Иматинибті 400 мг дозада тәулігіне 2 рет метопрололмен, CYP2D6 изоферменті субстратымен қолдануда Сmax және AUC шамамен 21%-ға жоғарылауымен қатар жүретін метопролол метаболизмінің орташа төмендеуі анықталады.

CYP2D6 изоферментінің субстраты болып табылатын (мысалы, метопрололдың) препараттар әсерінің орташа күшеюін ескере отырып, оларды иматинибпен бірге қолдануда дозалау режимін өзгерту талап етілмейді.

In vitro иматиниб парацетамол/ацетаминофен О-глюкуронизациясын тежейді. Иматиниб пен парацетамолды бір уақытта қолдануда емделушілерде өліммен аяқталатын жедел бауыр жеткіліксіздігі дамыған жағдайлар сипатталған.

Иматинибті парацетамолмен/ацетаминофенмен бірге қолдануда сақ болу керек.

Левотироксин қабылдаушы емделушілерде тиреоидэктомиядан кейін иматиниб тағайындағанда левотироксиннің плазмадағы концентрациясы төмендейді.

Айрықша нұсқаулар

Иматинибпен емді тек ісікке қарсы препараттармен жұмыс тәжірибесі бар дәрігер бақылауында жүргізу керек.

Иматинибті қабылдағанда оның теріге және көзге тиюінен, сондай-ақ препарат ұнтағының тыныс жолына түсуінен абайлау керек.

Иматинибті СМЛ бар 2 жастан кіші балаларда қолданудың тиімділігі мен қауіпсіздігі анықталмаған. Препаратты 18 жасқа дейінгі емделушілерде басқа көрсетілімдер бойынша қолдану тәжірибесі шектеулі. Иматинибтің бой өсуіне ұзақ әсер етуінің ұзақ мерзімдік тиімділігі белгісіз. Бірақ бой іркілісі жағдайлары туралы хабарламалар болғандықтан, иматиниб қабылдаушы балаларда бой өсуіне мұқият бақылау жүргізу ұсынылады. Иматинибті әсіресе бауыр ауруы бар емделушілерде қолдануда шеткергі қанға клиникалық зерттеулерді және бауыр функциясына бақылауды («бауыр» трансаминазалары белсенділігіне, сілтілік фосфатаза және билирубин концентрациясына) ұдайы жүргізу ұсынылады.

Жүрек ауруы бар емделушілерге мұқият бақылауды қамтамасыз ету керек.

Иматинибті қолдануда 1-2% жағдайларда айқын сұйықтық іркілісі анықталғандықтан, барлық емделушілерді ұдайы бақылау ұсынылады. Дене салмағының күтпеген жерде тез артуы жағдайында емделушіні зерттеу керек және қажет болғанда иматинибпен емді уақытша тоқтату керек және/немесе диуретиктер тағайындау керек. Сұйықтық іркілісі дамуының көбірек жиілігі жүрек –қан тамырлары аурулары бар егде емделушілерде анықталды.

Жекелеген жағдайларда айқын сұйықтық іркілісі ауыр ағымда болып, өліммен аяқталуы мүмкін.

Бласты кризі және плевралық жалқық, іркілісті жүрек жеткіліксіздігі және бүйрек жеткіліксіздігі сияқты симптомдар кешені болған емделушінің өлім жағдайы туралы хабарламалар бар.

Тиреоидэктомияны бастан өткерген және левотироксинмен орын басушы ем алған емделушілерде иматинибті қолдану аясында гипотиреоз дамығаны туралы хабарламалар болғандықтан, емделушілердің аталған категориясында тиреотроптық гормон концентрациясын анықтауды ұдайы жүргізу керек.

Гиперэозинофилия синдромы және жүрек ауруы бар емделушілерде иматинибпен емнің басында кардиогендік шоктың/сол жақ қарынша жеткіліксіздігі дамуының бірен-саран жағдайлары анықталды. Бұл қолайсыз құбылыстар глюкокортикостероидтар (ГКС) енгізумен, қан айналымын демеп тұруға бағытталған шарлар қолданумен, және иматинибті уақытша тоқтатумен басылады.

МДА/МПА бар және эозинофилдер деңгейі жоғары емделушілерде электрокардиографиялық зерттеу жүргізу керек және тропониннің сарысулық концентрациясын анықтау керек. Нормадан ауытқуы анықталғанда, ем басында ГКС (1-2 мг/кг) 1-2 апта бойына иматинибпен бір уақытта профилактикалық қолдану мүмкіндігін қарастыру керек.

Иматинибпен ем уақытында және ең кемінде емнен кейін 3 ай бойында ұрпақ өрбіту жасындағы емделушілер контрацепцияның тиімді әдісін пайдалануы тиіс.

«Бауыр» трансаминазасы белсенділігі немесе билирубин концентрациясының айқын жоғарылауы СМЛ бар емделушілердің 3 %-дан азында анықталды және әдетте бұл көрсеткіштер препарат дозасын төмендеткенде немесе емді уақытша үзгенде азайған (бұндай эпизодтардың орташа ұзақтығы 1 аптаға жуықты құрады).

Операция жасауға болмайтын және/немесе метастаздық АІЖСІ бар емделушілерді зерттегенде асқазан-ішектен қан кетулері және ісік ошақтарынан қан кетулер туралы хабарланған. Қолда бар деректерге сәйкес, АІЖСІ бар емделушілерде қан кетудің одан жоғары қаупіне ұшырататын ешбір бейімділік факторлары (ісік мөлшері, оның орналасуы, қан ұюының бұзылуы сияқты) анықталмаған. Васкуляризацияның жоғарылығы және қан кетуге бейімділік АІЖСІ клиникалық барысының бөлігі болып табылатындықтан барлық емделушілерде қан кетудің стандартты практикасын және мониторинг шарасын және емді пайдалану керек.

Ісік лизисі синдромы туындау мүмкіндігіне байланысты Иматиниб-Тева препаратын қабылдауды бастағанға дейін клиникалық елеулі сусыздануды және несеп қышқылының жоғары деңгейін түзетуді жүргізу ұсынылады.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Бас айналуы және көрудің бұлыңғырлануы сияқты иматинибтің жағымсыз әсерлері жоғары зейін шоғырландыруды және психомоторлық реакциялардың шапшаңдығын талап ететін автомобиль басқару және қауіптілігі зор қызмет түрлерін атқару қабілетіне теріс әсер етуі мүмкін.

Артық дозалануы

Симптомдары: СМЛ бар емделушілерде бластық криз фазасында 1-10 күн бойына 1200 мг-ден 1600 мг дейінгі иматиниб қабылдауда жүрек айнуы, құсу, диарея, тері бөртпесі, эритема, ісінулер, буындар аумағы ісінуі, қатты қажығыштық,бұлшықет түйілуі, тромбоцитопения, панцитопения, абдоминалды ауыру,бас ауыруы, тәбет төмендеуі байқалған. Иматинибті

1800-3200 мг дозада қабылдағанда (ең көбірек доза тәулігіне 6 күн бойына 3200 мг құрайды) әлсіздік, миалгия, асқазан-ішек ауырулары, қан сарысуында КФК және билирубин концентрациясының артқаны анықталды. Иматинибты 6400 мг дозада бір рет қолдануда емделушілерде жүрек айнуы, құсу, абдоминалды ауыру, қызба, бет ісінуі, нейтрофилдер мөлшерінің төмендеуі, «бауыр» трансаминазалары белсенділігінің артуы дамыған. Иматинибті 8-10 г дозада бір рет қолдануда құсу, асқазан-ішек ауырулары анықталды. Иматинибті 3 жастағы балада 400 мг дозада бір рет қабылдауда құсу, диарея және анорексия білінген. Иматинибті 3 жастағы балада 980 мг дозада бір рет қабылдаған басқа бір жағдайда диарея және лейкоциттер мөлшерінің төмендеуі бақыланған.

Емі: симптоматикалық терапия.

Шығарылу түрі және қаптамасы

Үлбірлі қабықпен қапталған 100 мг, 400 мг таблеткалар.

ПВХ/ПЭ/ПВДХ/ПЭ/ПВХ//Ал немесе ОПА/Ал/ПВХ//Ал жасалған пішінді ұяшықты қаптамаға 10 таблеткадан (100 мг доза үшін) немесе 10 және 6 таблеткадан (400 мг доза үшін) салынады.

6 және 12 пішінді қаптамадан (100 мг доза үшін) немесе 3, 6 және 5 пішінді қаптамадан (400 мг доза үшін) медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Құрғақ, жарықтан қорғалған жерде, 250С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

Плива Хрватска д.о.о., Хорватия

Тіркеу куәлігінің иесі

Teva Pharmaceutical Industries Ltd, Израиль

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

«ратиофарм Қазақстан» ЖШС

050040 Қазақстан Республикасы

Алматы қ., Әл-Фараби даңғылы 19,

Нұрлы Тау бизнес орталығы 1 Б, 603 кеңсе

Телефон, факс (727) 311-09-15; 311-07-34

E-mail teva@teva.co.il