Зульбекс® (20 мг)

• русский
• қазақша

• Скачать инструкцию медикамента

Саудалық атауы

ЗУЛЬБЕКС®

Халықаралық патенттелмеген атауы

Рабепразол

Дәрілік түрі

Ішекте еритін қабықпен қапталған 10 мг және 20 мг таблеткалар

Құрамы

Бір таблетканың құрамында

белсенді зат - 10.0 мг (9.420 мг рабепразолға баламалы) немесе 20.0 мг (рабепразолға баламалы 18.850 мг) натрий рабепразолы

қосымша заттар: маннитол, жеңіл магний оксиді, гидроксипропилцеллюлоза, орынбасу дәрежесі төмен гидроксипропилцеллюлоза, магний стеараты,

қабығының құрамы: этилцеллюлоза, жеңіл магний оксиді, гипромеллоза фталаты, диацетилденген моноглицеридтер, тальк, титанның қостотығы (Е 171), темірдің қызыл тотығы (Е 172), темірдің сары тотығы (Е 172).

Сипаттамасы

Дөңгелек пішінді, екі беті дөңес, қызғылт-сары түсті үлбірлі қабықпен қапталған, ойығы бар (10 мг доза үшін) таблеткалар.

Дөңгелек пішінді, екі беті дөңес, ақшыл-қоңырлау-сары түсті үлбірлі қабықпен қапталған (20 мг доза үшін) таблеткалар.

Фармакотерапиялық тобы

Ойық жараға қарсы препараттар және гастроэзофагеальді рефлюксті емдеуге арналған препараттар. Протондық сорғы тежегіштері.

АТЖ коды А02ВС04

Фармакологиялық қасиеттері

Фармакокинетикасы

ЗУЛЬБЕКС® ішекте еритін (асқазанда төзімді) қабықпен қапталған натрий рабепразолы таблеткалары түрінде келеді. Бұл формасы рабепразолдың қышқыл ортаға төзімсіздігіне негізделген. Сондықтан рабепразолдың сіңуі ішекте басталады. Тағам да, препаратты қабылдау да натрий рабепразолының сіңуіне әсер етпейді. Тағаммен клиникалық маңызды өзара әрекеттесулері жоқ.

Тез сіңеді; рабепразол плазмадағы ең жоғарғы концентрациясына 20 мг дозасын қабылдағаннан кейін шамамен 3,5 сағаттан соң жетеді. Рабепразолдың плазмадағы ең жоғарғы концентрациялары (Cmax) мен «концентрация-уақыт» (AUC) қисық астындағы ауданы 10 мг-ден 40 мг дейінгі дозалар ауқымында дозаға тәуелді сипатта. Пероральді қабылданған 20 мг дозасының абсолюттік биожетімділігі (көктамыр ішіне енгізгенмен салыстырғанда) көбінесе жүйеалды метаболизмінің есебінен, шамамен 52% құрайды.

Плазмадан жартылай шығарылу кезеңі шамамен бір сағатты (0,7-ден 1,5 сағатқа дейін), ал жалпы клиренсі – 283 ± 98 мл/минутты құрайды.

Плазма ақуыздарымен рабепразол шамамен 97% байланысады.

Метаболизмі мен шығарылуы

Натрий рабепразолы, протондық сорғы тежегіштері класының басқа да өкілдері сияқты, бауырда P450 цитохромының (CYP450) қатысуымен метаболизденеді. Натрий рабепразолы CYP450 изоферменттерімен (CYP2C19 және CYP3A4) метаболизденеді. Рабепразол күтілетін плазмалық концентрацияларында CYP3A4 бәсеңдетпейді және көтермелемейді.

Плазмадан табылатын негізгі метаболиттері тиоэфир (M1) мен карбоксильді қышқыл (M6) болып табылады, ал сульфонды (M2), десметил-тиоэфир (M4) және меркаптурин қышқылы бар (M5) коньюгат азғантай мөлшерде анықталады. Тек десметилді метаболитінің ғана (M3) азғантай антисекреторлық белсенділігі бар, бірақ ол плазмада анықталмайды.

Бір рет 20 мг пероральді қабылдағаннан кейін өзгеріссіз препарат несепте анықталмайды. Қабылданған дозасының шамамен 90%-ы несеппен екі метаболит: меркаптурин қышқылды коньюгат (M5) пен карбоксиль (M6) түрінде және тағы екі белгісіз метаболит түрінде шығарылады. Енгізілген препараттың қалған бөлігі нәжіспен шығарылады.

Жыныс

Жасы мен дене салмағының өзгеретінін ескере отырып, 20 мг дозадағы рабепразолдың фармакокинетикалық параметрлерінде жыныстық айырмашылықтар анықталған жоқ.

Бүйрек қызметінің бұзылуы

Бүйрек жеткіліксіздігінің ақырғы сатысы тұрақты, гемодиализді қажет ететін (креатинин клиренсі  5 мл/мин/1,73 м2) емделушілерде рабепразолдың таралуы дені сау еріктілердегі таралуымен өте ұқсас болды. Мұндай емделушілердегі AUC және Cmax дені сау еріктілердегі сәйкесінше көрсеткіштерден 35% төмен болды. Рабепразолдың жартылай шығарылуының орташа кезеңі дені сау еріктілерде 0,82 сағатты, гемодиализ аясындағы емделушілерде 0,95 сағатты және гемодиализден кейін – 3,6 сағатты құрайды. Демеуші гемодиализді қажет ететін бүйрегі ауыратын емделушілердегі препараттың клиренсі дені сау еріктілерге қарағанда шамамен екі есе көп болды.

Бауыр қызметінің бұзылуы

20 мг рабепразолды бір рет енгізгеннен кейін бауырдың созылмалы жеңіл немесе орташа аурулары бар емделушілерде дені сау еріктілермен салыстырғанда AUC екі есе ұлғайды және рабепразолдың жартылай шығарылу кезеңі 2-3 есе ұлғайды, дегенмен 20 мг дозасын 7 күн бойы күн сайын қабылдағаннан кейін AUC тек 1,5 есеге, ал Cmax – тек 1,2 есеге артты. Бауыры ауыратын емделушілерде рабепразолдың жартылай шығарылу кезеңі клиникалық салыстырмалы фармакодинамикалық жауап (асқазан pH-ын бақылау) кезінде дені сау еріктілердегі 2,1 сағатпен салыстырғанда 12,3 сағатты құрады.

Егде жастағылар

Егде жастағыларда рабепразолдың шығарылуы біраз азайған. Натрий рабепразолын 7 күн бойы 20 мг тәуліктік дозада қабылдағаннан кейін AUC шамамамен екі есе, ал Cmax 60% -ға артты, t½ дені сау ерікті жастармен салыстырғанда 30%-ға ұлғайды. Алайда рабепразолдың жинақталу белгілері анықталған жоқ.

CYP2C19 полиморфизмі

CYP2C19 –метаболизмі баяу емделушілерде рабепразолдың 20 мг пероральді дозасын 7 күн бойы қабылдағаннан кейін AUC пен t½ метаболизмі белсенді тұлғалардағы сәйкесінше параметрлерден шамамен 1,9 және 1,6 есе жоғары болды, бұл кезде Cmax тек 40%-ға ғана артқан.

Фармакодинамикасы

ЗУЛЬБЕКС® орынбасқан бензимидазолдардың антисекреторлық препараттары класына жатады, олар H+/K+-АТФ-аза ферментін (протондық сорғы) тежеу арқылы асқазан сөлінісін бәсеңдетеді. Препараттың әсері дозасына байланысты болады және көтермелеуші факторларға байланыссыз асқазандағы тұз қышқылының базальді және стимуляцияланған сөлінісінің бәсеңдеуіне алып келеді. Әлсіз негіз бола отырып, ЗУЛЬБЕКС® барлық дозаларында тез сіңеді және асқазанның париетальді жасушаларының қышқылды ортасында жинақталады. ЗУЛЬБЕКС® протондалу жолымен сульфенамидтік түрге конверсияланады, сосын протондық помпа цистеинінің қолжетімді молекулаларымен өзара әрекеттеседі.

ЗУЛЬБЕКСТІ® 20 мг дозада ішу арқылы қабылдағаннан кейін антисекреторлық әсері 1 сағат ішінде дами бастайды, 2-4 сағаттан соң ең жоғарғысына жетеді. Базальді және тағаммен стимуляцияланған асқазандағы тұз қышқылының сөлінісі натрий рабепразолының бірінші дозасын қабылдағаннан кейін 23 сағаттан соң 69% және сәйкесінше 82% құрайды және 48 сағатқа дейін созылады. Натрий рабепразолының тұз қышқылының сөлінісіне қатысты тежегіштік әсері екінші дозаларын қабылдағанда біраз ұлғаяды, 3 күннен кейін тепе-теңдік жағдайына жетеді. Препаратты тоқтатқаннан кейін асқазанның секреторлық белсенділігі 2-3 күннен кейін қалпына келеді.

Сарысу гастриніне әсері

ЗУЛЬБЕКСТІ® тәулігіне бір рет 10 мг немесе 20 мг дозада ұзақ уақыт (43 айға дейін) қабылдағанда, сарысудағы гастрин деңгейлері қабылдаудың бастапқы 2 - 8 аптасында, қышқыл сөлінісіне бәсеңдеткіш әсерін тигізе отырып артады, сосын емдеуді жалғастырғанда тұрақты болып қалады. Гастрин концентрацияларының көрсеткіштері әдетте, емдеуді тоқтатқаннан кейін 1-2 апта ішінде бастапқы мәніне қайтып келген.

Рабепразолды 8 аптаға дейін қабылдаған және 36 ай емделгендердің асқазанының антральді бөлігі мен түбінен алынған биопсиялық үлгілерден ECL-жасушалық және гистологиялық құрылымының, гастрит дәрежесінің, атрофиялық гастрит дамуының жиілігінің, интестинальді метаплазияда немесе H. Pylori жұқпасының таралуында өзгерістер анықталған жоқ.

Басқа әсерлері

Натрий рабепразолының ОЖЖ-ға, жүрек-қантамыр және тыныс алу жүйелеріне қатысты жүйелік әсерлері бүгінгі күні анықталған жоқ. ЗУЛЬБЕКСТІ® 2 апта бойы 20 мг дозада ішу арқылы қабылдау қалқанша без қызметіне, көмірсу алмасуына немесе паратгормонның, кортизолдың, эстрогендердің, тестостеронның, пролактиннің, холецистокининнің, секретиннің, глюкагонның, фолликулостимуляциялаушы гормонның (ФСГ), лютендеуші гормонның (ЛГ), рениннің, альдостерон немесе соматотропты гормонның циркуляцияланатын деңгейлеріне ықпалын тигізбейді.

ЗУЛЬБЕКС® амоксициллинмен клиникалық өзара әрекеттестікке түспейді және бұл препараттарды асқазан-ішек жолының үстіңгі бөліктеріндегі H. pylori эрадикациясы үшін бір мезгілде қабылдағанда амоксициллиннің немесе кларитромициннің плазмадағы концентрацияларына әсер етпейді.

Қолданылуы

- асқазан немесе он екі елі ішектің өршу сатысындағы ойық жаралы ауруында

- гастроэзофагеальді рефлюкстік ауруда (ГЭРА): эрозивтік рефлюксте, эзофагитте, ГЭРА симптоматикалық емдеуде (яғни, ЭЕРА – эрозивті емес рефлюкстік ауруда)

- Золлингер-Элисон синдромы немесе патологиялық гиперсекрециямен сипатталатын басқа жағдайларда

- асқазанның ойық жаралы ауруы немесе созылмалы гастритпен емделушілерде Helicobacter pylori эрадикациясында бактерияға қарсы препараттармен біріктіріп

Қолдану тәсілі мен дозалары

ЗУЛЬБЕКС® таблеткаларын тұтастай жұту қажет; оларды шайнауға және сындыруға болмайды.

Ересектер, егде жастағылар

Асқазанның немесе 12 елі ішектің өршу сатысындағы ойық жаралы ауруы: ЗУЛЬБЕКСТІҢ® ұсынылатын дозасы тәулігіне бір рет, таңертең 20 мг құрайды.

Емделушілердің көпшілігінде 12 елі ішектің белсенді ойық жарасы төрт апта ішінде жазылады. Алайда, кейбір емделушілерге ойық жараның толық жазылуы үшін тағы 4 апта қажет болуы мүмкін. Асқазанның қатерлі емес белсенді ойық жарасы емделушілердің көпшілігінде алты апта ішінде жазылады. Алайда емделушілердің азғантай бөлігінде толық жазылуы үшін тағы алты апта қажет болуы мүмкін

Эрозиялы-ойық жаралы немесе гастроэзофагеальді рефлюкстік ауру (ГЭРА): ЗУЛЬБЕКСТІҢ® бұл жағдайда ішке қабылдауға ұсынылатын дозасы төрттен сегіз аптаға дейін тәулігіне бір рет 20 мг құрайды.

Гастроэзофагеальді рефлюкстік ауруды ұзақ уақыт емдеу (ГЭРА демеуші ем): Ұзақ уақыт емдегенде емделушіні емдеуге реакциясына байланысты ЗУЛЬБЕКСТІҢ® тәулігіне бір рет 20 мг немесе 10 мг демеуші дозасы қолданылуы мүмкін.

Орташадан ауыр дәрежеге дейінгі гастроэзофагеальді рефлюкстік ауруды симптоматикалық емдеу (симптоматикалық ГЭРА): эзофагитпен ауырмайтын науқастарда тәулігіне бір рет 10 мг. Егер апта ішінде симптомдарын бақылауға алу мүмкін болмаса, емделушіні қосымша тексеруден өткізу қажет. Жағдайы жақсарғаннан кейін симптомдарын ары қарай қадағалау қажеттілігіне қарай тәулігіне бір рет 10 мг қабылдау арқылы жүргізуге болады.

Золлингер-Эллисон синдромы немесе патологиялық гиперсекрециямен сипатталатын басқа жағдайлар: ересектер үшін ұсынылатын старттық дозасы тәулігіне бір рет 60 мг құрайды. Дозасын емделушінің жеке қажеттіліктеріне байланысты тәулігіне 120 мг дейін ұлғайтуға болады. 100 мг дейінгі тәуліктік дозасын бір рет қабылдау режимімен тағайындауға болады. 120 мг дозасы тәулігіне екі рет 60 мг-ден бөліп қабылдауды қажет етеді. Сәйкесінше клиникалық көрсеткіштер бар кезге дейін емдеу жалғаса береді.

H. pylori эрадикациясы: H. Pylori жұқтырған емделушілер эрадикациялық емдеуден өтуі тиіс. Препараттардың төмендегі біріктірілімі 7 күндік курспен ұсынылады.

ЗУЛЬБЕКС® тәулігіне екі рет 20 мг дозада + кларитромицин тәулігіне екі рет 500 мг дозада және амоксициллин тәулігіне екі рет 1 г.

Егер эрадикация сызбалары препаратты тәулігіне бір рет қабылдауды талап етсе, ЗУЛЬБЕКС® таблеткаларын таңертең, таңғы асты ішер алдында қабылдау қажет; бірақ тәулік мезгілі де, ас ішу де натрий рабепразолының сіңуіне әсер етпейді, препаратты қабылдаудың мұндай режимі емдеудің жақсы болуына ықпал етеді.

Бауыр немесе бүйрек қызметінің бұзылулары

Бауыры немесе бүйрегі ауыратын науқастарда дозасын түзету қажет емес.

 

Жағымсыз әсерлері

Жиі (³1/100-ден <1/10 дейін):

• үйқысыздық

• бас ауыруы, бас айналуы

• жөтел, фарингит, ринит

• диарея, құсу, жүрек айнуы, іштің ауыруы, іштің қатуы, метеоризм

• спецификалық емес ауыру, арқаның ауыруы

• астения, тұмау тәрізді ауру

Жиі емес (³1/1,000-ден <1/100 дейін):

• ашушаңдық

• ұйқышылдық

• бронхит, синусит

• диспепсия, ауыздың құрғауы, кекіру

• бөртпе, эритема

• миалгия, аяқтардың құрысуы, артралгия

• несеп жолының жұқпасы

• кеуденің ауыруы, қалтырау, температураның жоғарылауы

• бауыр ферменттері белсенділігінің артуы

Сирек: (³1/10000-ден <1/1000 дейін):

- нейтропения, лейкопения, тромбоцитопения, лейкоцитоз

- жоғары сезімталдық реакциялары (беттің ісінуі, гипотензия, ентігу),

эритема, буллёздік реакциялар, ол әдетте препаратты тоқтатқаннан кейін жоғалады

• анорексия

• депрессия

• көрудің бұзылуы

• гастрит, стоматит, дәм сезудің өзгеруі

• гепатит, сары ауру, бауыр циррозымен науқастарда бауыр энцефалопатиясы

• қышу, тершеңдік

• интерстициальді нефрит

• дене салмағының артуы

Өте сирек (<1/10000):

- мультиформалы эритема, уытты-эпидермальді некроз (УЭН),

Стивен-Джонсон синдромы

Жиілігі белгісіз (қолда бар мәліметтер бойынша анықталмайды):

- гипонатриемия

- сананың шатасуы

- шеткергі ісінулер

- гинекомастия

Қолдануға болмайтын жағдайлар

- рабепразолға немесе препараттың қосымша заттарына жоғары сезімталдық

- жүктілік және лактация кезеңі

- 18 жасқа дейінгі балалар мен жасөспірімдер (қауіпсіздігі мен тиімділігі анықталмаған)

Дәрілермен өзара әрекеттесуі

Натрий рабепразолы асқазандағы қышқыл сөлінісінің тұрақты және ұзақ бәсеңдеуін тудырады. Сіңуі pH деңгейімен байланысты препараттармен өзара әрекеттесуі туындауы мүмкін. Натрий рабепразолын кетоконазолмен немесе итраконазолмен бір мезгілде қабылдау плазмадағы зеңге қарсы концентрациялардың айтарлықтай төмендеуіне алып келуі мүмкін. Сондықтан жекелеген емделушілерге Зульбекс® пен бұл препараттарды бір мезгілде тағайындағанда дозасын өзгерту қажет болуы мүмкіндігін қадағалау керек.

Клиникалық зерттеулерде антацидтер рабепразолмен бір мезгілде қолданылды. Дәрілермен өзара әрекеттесуі бойынша арнайы зерттеуде де рабепразол мен сұйық антацидтер арасында өзара әрекеттестік анықталған жоқ.

Дені сау еріктілердің 300 мг атазанавир /10 мг ритонавир және омепразолды (тәулігіне бір рет 40 мг) немесе 400 мг атазанавир және ланзопразолды (тәулігіне бір рет 60 мг) бір мезгілде қабылдауы атазанавир әсерінің едәуір азаюымен қатар жүрді. Атазанавирдің сіңуі pH деңгейіне байланысты. Арнайы зерттеулер жүргізілген жоқ, бірақ басқа протондық помпа тежегіштері үшін де ұқсас нәтижелер болуы мүмкін. Сондықтан рабепразолды қоса алғанда, протондық помпа тежегіштерін, атазановирмен бір мезгілде қолданбаған жөн.

Айрықша нұсқаулар

Рабепразолмен емдеу аясындағы симптомдар айқындығының азаюы асқазанда немесе өңеште қатерлі түзілімдердің болуын жоққа шығармайды, сондықтан Зульбекспен® емдеуді бастар алдында онкологиялық үдерістерді жоққа шығару мақсатында зерттеу жүргізу керек.

Препаратпен ұзақ емделетін емделушілер (әсіресе бір жылдан артық) ұдайы тексеруден өтіп отыруы тиіс.

Протондық помпаның басқа тежегіштерімен немесе орынбасқан бензоимидазолдармен айқаспалы реакциялар қаупін жоққа шығаруға болмайды.

Емделушілерге Зульбекс® таблеткаларын тұтастай жұту қажеттігін ескерту керек; оларды шайнауға және сындыруға болмайды.

Зульбексті® балаларға тағайындау ұсынылмайды, өйткені препаратты емделушілердің бұл тобында қолдану тәжірибесі жоқ.

Рабепразолды маркетингтен кейін қан дискразиялары дамығанда қолданылғаны (тромбоцитопения және нейтропения жағдайлары) туралы хабарламалар бар. Көпшілік жағдайларда, бұл жағдайлардың баламалы себептерін анықтау мүмкін болмаса, олар асқынулар тудырған жоқ және рабепразолды тоқтатқаннан кейін басылды.

Клиникалық зерттеулерде маркетингтен кейінгі қолдану барысында бауыр ферменттері белсенділігінің өзгергені білінді. Көпшілік жағдайларда, бұл жағдайлардың баламалы себептерін анықтау мүмкін болмаса, олар асқынулар тудырған жоқ және рабепразолды тоқтатқаннан кейін басылды.

Бауыр қызметінің жеңіл және орташа дәрежелі бұзылуы бар емделушілердегі зерттеулерде жынысы мен жасы сәйкес келетін бақылау тобындағы сау емделушілермен салыстырғанда препаратты қолданудың қауіпсіздігіне байланысты елеулі қиындықтар білінген жоқ. Рабепразолды бауыр қызметінің ауыр бұзылуы бар емделушілерде қолданудың клиникалық мәліметтері жоқ болғандықтан, Зульбексті® мұндай емделушілерге бірінші рет тағайындағанда сақтық шараларын сақтау ұсынылады.

Атазанавир мен Зульбексті® бір мезгілде қабылдау ұсынылмайды

Дәрілік заттың көлік құралдарын немесе қауіпті механизмдерді басқару қабілетіне ықпал ету ерекшеліктері

Әсері туралы хабарланған жоқ, бірақ болуы мүмкін жағымсыз әсерлері – бас ауыруы, бас айналуын ескере отырып, зейін шоғырландыруды қажет ететін жұмыстарды орындағанда сақ болу керек.

 

Артық дозалануы

Симптомдары: белгісіз. Препараттың ең жағарғы анықталған қабылданған мөлшері тәулігіне екі рет 60 мг немесе тәулігіне бір рет 160 мг асқан жоқ. Әсерлері әлсіз анықталады, қандай-да бір қосымша медициналық араласуларсыз өздігінен өтетін, жағымсыз реакциялардың белгілі профиліне сәйкес келеді.

Емі: қажет болса – симптоматикалық ем және жалпы демеу шаралары. Арнайы у қайтарғысы жоқ. Натрий рабепразолы ақуыздармен белсенді байланысады, сондықтан диализ арқылы шығарылмайды.

Шығарылу түрі мен қаптамасы

14 немесе 15 таблеткадан үш қабатты үлбір (бағдарлы полиамид/алюминий/поливинилхлорид) мен алюмининй фольгадан жасалған пішінді ұяшықты қаптамаға салады.

1 немесе 2 пішінді ұяшықты қаптамадан мемлекеттік және орыс тілдеріндегі медицинада қолданылуы жөніндегі нұсқаулықпен бірге картоннан жасалған пәшкеге салады.

Сақтау шарттары

Түпнұсқалық қаптамасында 30 ºС-ден аспайтын температурада, жарықтан қорғалған жерде сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Сақтау мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

КРКА, д.д. Ново место, Словения

Шмарьешка 6, 8501 Ново место, Словения

Тіркеу куәлігі иесінің атауы мен елі

КРКА, д.д., Ново Место, Словения

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

ҚР-дағы «KRKA, tovarna zdravil, d.d., Novo mesto» өкілдігі

ҚР, 050059, Алматы қ-сы, Әл-Фараби д-лы 19, 1б корпусы, 2 қабат.

тел. 8 (727) 311-08-09

факс 8 (727) 311-08-12

www.krka.si