Дифметра®
Инструкция
-
русский
-
қазақша
Саудалық атауы
Дифметра®
Халықаралық патенттелмеген атауы
Жоқ
Дәрілік түрі
Көпіршитін таблеткалар
Құрамы
белсенді заттар: 25 мг индометацин, 2 мг прохлорперазин малеаты,
75 мг кофеин,
қосымша заттар: сусыз лимон қышқылы, натрий гидрокарбанаты, сорбитол, натрий сахарині Е954, лимон хош иістендіргіші, макрогол 6 глицерол каприлокапраты, диметикон Е900.
Сипаттамасы
Дөңгелек пішінді, беті тегіс, диаметрі 18 мм-ге жуық, ақ немесе сәл сарғыш түсті таблеткалар
Фармакотерапиялық тобы
Анальгетиктер. Бас сақинасына қарсы препараттар. Бас сақинасына қарсы басқа да препараттар
ATХ коды NO2CX
Фармакологиялық қасиеттері
Фармакокинетикасы
Индометацин
Индометацин ішу арқылы қабылдағанда асқазан-ішек жолынан жылдам сіңеді; биожетімділігі ішке қабылдағаннан кейін 100% дерлік құрайды, плазмадағы ең жоғары концентрациясына (Tmax) дозаны қабылдағаннан кейін 0,5-2 сағаттан соң жетеді; ақуызбен жалпы байланысуы 90%-дан асады; таралу көлемі 0,34-тен 1,57 л/кг-ге дейінді құрайды. Индометацин бауырда белсенді емес қосылыстарға метаболизденеді. Түпкілікті жартылай шығарылу кезеңі (t1/2) 2-ден 8 сағатқа дейін аралықта ауытқиды. Шығарылуы, негізінен, несеппен, көбіне глюкуронидтер түрінде, сондай-ақ (аз дәрежеде) нәжіспен жүзеге асады.
Кофеин
Ішке қабылдағаннан кейін кофеин жылдам сіңеді және шамамен 1 сағаттан соң (Tmax) ең жоғары концентрациясына жетеді. 35%-ға жуық кофеин плазма ақуыздарымен байланысады. Таралу көлемі 0,53 л/кг құрайды. Кофеин бауырда белсенді метаболиттерге қарқынды метаболизденеді, олардың негізгісі параксантин болып табылады. Жартылай шығарылу кезеңі 4-5 сағат құрайды. Кофеин 1-метилнесеп қышқылы және 1-метилксантин түрінде несеппен шығарылады.
Прохлорперазин
Прохлорперазин асқазан-ішек жолынан оңай сіңеді. Ішке қабылдағаннан кейін плазмадағы концентрациясы жоғары емес. Tmax қабылдағаннан кейін 1,5-5 сағаттан соң жеткізіледі; таралу көлемі 12,9-ден 17,7 л/кг дейінгі аралықты құрайды. Прохлорперазин бауырда қарқынды метаболизденеді. Жартылай шығарылу кезеңі 6,8-9 сағат құрайды; метаболиттер түрінде несеппен және нәжіспен шығарылады.
Бекітілген біріктірілім
Дифметраның® фармакокинетикалық сипаттамалары әрқайсысы жеке алынған белсенді құрамдас бөліктерінің сипаттамаларынан ерекшеленбейді. Бір реттік дозасын қабылдағаннан кейінгі индометацин, кофеин және прохлорперазинге тән Tmax, тиісінше, 1.2/1.1/2.3 сағат және жартылай шығарылу кезеңі 7,5 сағатқа жуық құрады.
Фармакодинамикасы
Дифметраның® үш белсенді компоненті бас сақинасын және бас ауыруын емдеуге бағытталған өзінің айрықша белгісі бар фармакологиялық әсерін танытады.
Басқа қабынуға қарсы стероидты емес дәрілерден (ҚҚСП) ерекшелігі, индометацин құрылымы жағынан серотонинге ұқсас және ауыруды басу әсерін жүзеге асырып, ми тамырларын тарылтады.
Кофеин орталық холинергиялық анальгетик болып табылады, ҚҚСП-ға қосқан кезде талап етілетін ҚҚСП дозасын тең бағаланатын ауыруды басу әсерімен 40%-ға азайтады.
Прохлорперазин орталық холинергиялық ауыруды басатын әсері бар фенотиазин қатарының құсуға қарсы дәрісі болып табылады.
Осы үш белсенді компоненттің қосылуы, әрбір компоненттің жекеше әсерімен салыстырғанда, айтарлықтай едәуір жоғары тиімділікке қол жеткізуге мүмкіндік береді. Оның үстіне, индометацин Дифметраның басқа белсенді компонентімен қосылғанда бас сақинасының ұстамасы кезінде орын алатын орталық және шеткергі сенсибилизацияны төмендетеді.
Қолданылуы
- аурасы бар немесе онсыз бас сақинасының жедел ұстамаларында; әсіресе, бас сақинасының ұстамалары кезінде жүрек айнуы мен құсуы болатын пациенттерге ұсынылады
- эпизодтық бастың кернеп ауыруы ұстамаларын емдеуде.
Қолдану тәсілі және дозалары
Дифметраны® бас ауыру басталғаннан кейін, мүмкіндігінше, ертерек қабылдау ұсынылады, бірақ препарат одан кеш қабылданған жағдайда да тиімді әсер етеді.
Ұсынылатын доза бас ауыру ұстамасы басталғанда ішке қабылданатын бір таблетканы құрайды. Ауыру синдромының айқындылығына, сондай-ақ пациенттің өзіндік ерекшеліктеріне байланысты дозаланады.
Реакция болмағанда: Егер алғашқы дозаны қабылдағаннан кейін 2 сағат ішінде бас ауыру жеткілікті дәрежеде басылмаса, бас ауыруының сол ұстамасын басу үшін қайталап 1 таблетка қабылдауға болады.
Клиникалық зерттеулер бас ауыру ұстамасында Дифметра® препаратының алғашқы қабылдануына реакция болмағанда, келесі бас ауыру ұстамасы кезінде реакцияның қабылдағаннан кейін басталуы мүмкін екенін көрсетті.
24-48 сағат ішінде қайталанған бас ауыру ұстамасында: егер алғашқы ұстаманы басқаннан кейін 24-48 сағат ішінде бас ауыру қайталанса, Дифметраның® дәл сол дозасын қайталап қабылдау нәтижесін береді.
Ең жоғары тәуліктік доза 8 таблеткадан аспауға тиіс.
Егде жастағы пациенттер
Дифметра® препаратын 65 жастан асқан пациенттерге қолдану тәжірибесі жеткіліксіз.
Балалар мен 18 жасқа дейінгі жасөспірімдер
Препараттың қауіпсіздігі мен тиімділігі бойынша жеткілікті деректердің болмауына орай, Дифметра® балаларға және 18 жастан кіші жасөспірімдерге ұсынылмайды.
Жағымсыз әсерлері
Клиникалық зерттеулер барысында Дифметра® 250-ден астам пациенттерге тағайындалды, олар бас сақинасының 1-2 ұстамасы немесе бастың кернеп ауыруы кезінде 48 сағат ішінде 1-2 доза қабылдады. Ең көп таралған жағымсыз әсерлері (<3%) вестибулярлық бұзылулар, бас айналу және дірілдеу болды. Дифметраның® клиникалық зерттеулер барысында жағымсыз әсерлер, әдетте, препаратты қабылдағаннан кейін дереу орын алып, әлсіз немесе орташа айқын сипат иеленді және бірнеше сағаттан соң өздігінен тоқтады. Алайда бұл жағымсыз әсерлер Дифметраның® тиімділігіне нұқсан келтірген жоқ, ал олардың пайда болу ықтималдығын «жатқан» қалыппен немесе одан кейінгі ұстамада дозаны төмендетумен азайтуға болады. Білінген жағымсыз әсерлердің кейбіреулерін нақтылы түрде бас сақинасының симптомдары деп санауға болады. Төменде клиникалық зерттеулер барысында Дифметраны® қабылдаумен байланысты саналған жағымсыз әсерлер тізбеленген:
Жиі (>1/100, < 1/10):
- бас айналу, дірілдеу, вестибулярлық бас айналу
- тахикардия, жүрек айнуы
Жиі емес (>1/1000, < 1/100):
- тұмау
- қозу, мазасыздану,
- парестезия, мелшею, естен тану, ұйқышылдық, бастың сынып ауыруы, зейін шоғырландырудың төмендеуі
- көру бұзылысы
- гипотензия
- ентігу
- құсу, диспепсия, гастрит, іштің жоғарғы аймағындағы ауыру
- қарқынды тер бөлінісі
- астения, дімкәстік, қалтырау
Постмаркетингтік кезеңде хабарланған басқа да жағымсыз әсерлер: гематологиялық талдаудың қалыптағыдай емес нәтижелері, сананың шатасуы, аритмия, гипертония, диарея, ауыздың кеберсуі, бөрту.
Индометацин
Тек индометацин қабылдайтын пациенттерде келесі жағымсыз әсерлер байқалды:
- пептикалық ойық жара, тесілу немесе кейде өліммен аяқталатын асқазан-ішектік қан кету, әсіресе жасы ұлғайған пациенттер жағдайында
- жүрек айну, құсу, диарея, метеоризм, іш қату, диспепсия, іш аймағындағы ауыру, мелена, қан аралас құсу, ойық жаралы стоматит, колит пен Крон ауруының өршуі, сирек гастрит байқалды.
ҚҚСП қабылдаумен байланысты ісіну, гипертензия және жүрек жеткіліксіздігі туралы хабарланған. Клиникалық зерттеулердің нәтижелері мен эпидемиологиялық деректерге қарағанда, кейбір ҚҚСП (әсіресе үлкен дозаларда және ұзақ уақыт) қабылдағанда, артериялық тромбоздардың түзілу қаупі (мысалы, миокард инфарктісіне және инсультке шалдығу қаупі) артуы мүмкін. Буллезды реакциялар, соның ішінде Стивенс–Джонсон синдромы және уытты эпидермалды некролиз (өте сирек) туралы хабарлар болған.Прохлорперазин
Теориялық тұрғыда прохлорперазин антихолинергиялық симптомдар (тыныштандырғыш әсер, іш қату, ауыздың кеберсуі) немесе экстрапирамидалық бұзылыстар туындатуы мүмкін. Дегенмен прохлорперазиннің 40 мг-ге дейінгі тәуліктік дозалары қандай да бір күрделі ұнамсыз зардаптар туындатпайды.
Басқа нейролептиктер Басқа нейролептиктерді қабылдағанда, мынадай жағымсыз әсерлері байқалған: QT аралығы артуының сирек жағдайлары, torsades de pointes типіне сәйкес қарыншалық аритмиялар, қарыншалық тахикардия, қарыншалар фибрилляциясы, жүрек қызметінің тоқтауы. Өте сирек -кенеттен болатын өлім жағдайлары.Кофеин
Кофеиннің асқын көтермелеу әсерінің нәтижесінде қозу, ұйқысыздық, мазасыздық, дірілдеу, жүрек соғуының жиілеуі, тахикардия, гипертензия байқалуы мүмкін. Бұдан басқа, құрамында кофеин бар дәрілік препараттарды үнемі қабылдау, негізінен, бас ауырулармен сипатталатын абстиненция реакциясын туғызуы мүмкін.
Қолдануға болмайтын жағдайлар
- препараттың қандай да бір компоненттеріне жоғары сезімталдық
- сыртартқыдағы белсенді түрдегі қабынуға қарсы стероидты емес препараттарды (ҚҚСП) қолданумен байланысты асқазан-ішектік қан кетулер немесе тесілулер немесе асқазан мен он екі елі ішектің қайталанған ойық жарасы/қан кетулер (дәлелденген ойық жара түзілуінің немесе қан кетудің екі немесе одан көп айқын көріністері)
- сыртартқыдағы ацетилсалицил қышқылына немесе басқа ҚҚСП-ға аллергиялық реакциялар
- ауыр жүрек жеткіліксіздігі
- психикалық аурулар, эпилепсия немесе паркинсонизм
- жүктіліктің үшінші триместрі
Дәрілермен өзара әрекеттесуі
Ұсынылмайтын бір мезгілде қабылдау
Прохлорперазин сияқты нейролептиктерді QT аралығының ұзаруына ықпал ететін препараттармен бір мезгілде қолданғанда жүрек аритмиясының даму қаупі артады.
Электролиттік теңгерімнің бұзылуын туындататын препараттарды бір мезгілде қабылдаудан аулақ болу керек: прохлорперазин сияқты нейролептиктер осындай препараттармен өзара әрекеттесуге түсуі мүмкін.
Сақтық талап ететін бір мезгілде қабылдау
Кортикостероидтар: асқазан-ішек жолында ойық жараның түзілу немесе қан кету қаупі.
Антикоагулянттар: ҚҚСП варфарин сияқты антикоагулянттардың әсерін күшейтуі мүмкін.
Антиагреганттар және серотонинді кері қармайтын іріктелген тежегіштер: асқазан-ішек жолынан қан кету қаупінің жоғарылауы.
Диуретиктер, АӨФ тежегіштері және ангиотензин II антагонистері: ҚҚСП диуретиктер мен гипертензияға қарсы дәрілердің әсерін әлсіретуі мүмкін. Бүйрек жеткіліксіздігі бар кейбір пациенттерде (мысалы, организмнің сусыздануында немесе бүйрек функциясы әлсіреген егде пациенттерде) препаратты АӨФ тежегішімен немесе ангиотензин II антагонисімен және циклооксигеназаны бәсеңдететін заттармен бір мезгілде қабылдау бүйрек функциясының әріқарай нашарлауын, соның ішінде, әдетте, қайтымды болатын жедел бүйрек жеткіліксіздігін туғызады. Осы өзара әрекеттесулерді АӨФ тежегіштерімен немесе ангиотензин II антагонистерімен бір мезгілде ҚҚСП қабылдайтын пациенттерді емдегенде ескеру қажет. Сондықтан препараттардың осындай қосылымын қолданғанда, әсіресе жасы ұлғайған пациенттерді емдегенде сақ болған дұрыс. Мұндай жағдайда пациенттер жеткілікті су мөлшерін қабылдауға тиіс, және одан басқа бір мезгілде қабылдағанда бүйрек функциясын қадағалау қажет.
Дигоксин мен литий: дигоксин немесе литиймен бір мезгілде қолдану плазмада осы препараттар концентрациясының жоғарылауын туындатады.
Ескерілуге тиісті бір мезгілде қабылдау
Дифметраны® антихолинергиялық препараттармен бір мезгілде қабылдағанда сақтық таныту керек, өйткені антихолинергиялық қолайсыз жағымсыз әсерлерді күшейтуі мүмкін, сондай-ақ паркинсонға қарсы дәрілерді қабылдағанда да абайлаған жөн, өйткені өзара әрекеттесу нәтижесінде Паркинсон ауруын емдеу тиімділігі төмендеуі мүмкін.
Бір мезгілде қабылдағанда бензодиазепиндердің тыныштандырғыш және анксиолитикалық әсері төмендеуі мүмкін. Жоғары дозаларды қабылдағанда плазмадағы теофиллин деңгейінің жоғарылауы ықтимал.
Айрықша нұсқаулар
Дифметраның® құрамында қабынуға қарсы стероидты емес препараттарға (ҚҚСП) жататын индометацин бар.
Егер симптомдарды жою үшін қажетті уақыт кезеңінде ең аз тиімді доза қабылданатын болса, жағымсыз әсерлерді жоққа тән азайтуға болады. Дифметра® препаратын басқа ҚҚСП-мен, соның ішінде 2 циклооксигеназаның іріктелген тежегіштерімен бір мезгілде қабылдаудан аулақ болу керек.
Егде жастағы пациенттер
Егде пациенттерде ҚҚСП-ға болатын жағымсыз реакциялар, ішінара асқазан-ішектен қан кетулер және ойық жараның тесілуі жиі байқалады, бұл өлімге әкелуі мүмкін.
Асқазан-ішектен қан кету, ойық жараның түзілуі, тесілуі
Асқазан-ішектен қан кету және ойық жараның түзілуі мен тесілуі, соның ішінде олардың өліммен аяқталатын жағдайлары, емдеу сатысына қарамастан, кез келген ҚҚСП қолданған кезде хабарланды; бұл жағдайлар алдын ала білінетін симптомдармен және күрделі асқазан-ішек ауруларының сыртартқысымен қатар жүруі де немесе қатар жүрмеуі де мүмкін. Асқазан-ішектен қан кету мен ойық жараның түзілу және тесілу қаупі сыртартқысында, әсіресе, қан кетумен немесе тесілумен асқынған асқазанының ойық жарасы бар пациенттерде, сондай-ақ егде жастағыларда ҚҚСП дозалануының артуымен жоғарылайды. Мұндай пациенттерді емдеуді ең аз дозадан бастаған дұрыс.
Қан кету қаупі жоғары пациенттер, сонымен қатар аспириннің немесе асқазан-ішек ауруларының қатерін арттыратын басқа препараттардың онша жоғары емес дозаларын қабылдайтындар үшін Дифметрамен® емдегенде қорғағыш дәрілермен (мысалы, мизопростол немесе протон сорғысының тежегіштерімен) қосылған біріктірілген ем қолдану мүмкіндігін қарастыру керек.
Асқазан-ішек аурулары сыртартқысында бар, әсіресе егде жастағы пациенттер құрсақ қуысының кез келген симптомдары жөнінде, айрықша түрде, асқазан-ішектен қан кету симптомдарын жіберіп алмау үшін емдеудің бастапқы сатыларында дәрігерге хабарлауға тиіс.
Дифметраны® ойық жараның түзілу немесе қан кету қаупін жоғарылататын препараттармен, мысалы кортикостероидтармен, антикоагулянттармен (мысалы, варфарин), серотонинді кері қармайтын іріктелген тежегіштермен, сондай-ақ антиагреганттармен, мысалы, аспиринмен бір мезгілде қабылдағанда ерекше сақтық таныту керек.
Дифметраны® қабылдайтын пациенттерде асқазан-ішектен қан кету және ойық жара пайда болған жағдайда препаратты қабылдауды тоқтату қажет.
Дифметраны® ойық жаралы колит, Крон ауруы сияқты ішек аурулары бар пациенттерге абайлап тағайындайды, өйткені олардың жай-күйі өршіп кетуі мүмкін.
Жедел және орташа дәрежелі гипертониялық және/немесе іркілісті жүрек жеткіліксіздігінен зардап шегетін пациенттерге ерекше қадағалау және кеңес алу қажет болады, өйткені сұйықтық іркілуі мен ісінудің дамуы ықтимал.
Дифметраны® бақыланбайтын гипертониясы, жүрек жеткіліксіздігі, жүректің ишемиялық ауруы, шеткергі артериялардың атеросклерозы және/немесе цереброваскулярлық ауруы бар пациенттерге аса абайлап тағайындау қажет, өйткені ұзақ уақыт ҚҚСП қабылдау артериялық тромбоздың және оның асқынулары (мысалы, миокард инфарктісі немесе инсульт) қаупінің болымсыз артуына ықпал етеді. Индометацин қабылдаған кездегі осыған ұқсас қатерді жоққа шығаратын деректер жеткіліксіз. Сондықтан жүрек-қан тамырлары ауруларының қауіп факторлары (мысалы, гипертония, гиперлипидемия, қант диабеті, шылым шегу) бар пациенттер үшін де препаратты ұзақ уақыт қабылдағанда осындай ұстанымды пайдаланған дұрыс.
Дифметра® қабылдауды тері бөртпесінің алғашқы белгілері, шырыштың зақымданулары немесе аса жоғары сезімталдық реакциясының кез келген басқа белгілері білінгенде тоқтату керек: өте сирек жағдайларда ҚҚСП қабылдаумен байланысты күрделі аллергиялық, соның ішінде өліммен аяқталған реакциялар (эксфолиативті дерматит, Стивенс-Джонсон синдромы және уытты эпидермалық некролиз) байқалды. Осындай асқынулардың ең жоғары қаупі емдеудің алғашқы айының ішінде көрініс береді.
Дифметра® препаратының құрамында нейролептиктер класына жататын прохлорперазин бар. Препаратты отбасындағы жүрек-қан тамырларының аурулары немесе QT аралығының ұзару жағдайлары бар пациенттерге тағайындағанда сақтық таныту керек. Басқа нейролептик дәрілермен бір мезгілде қабылдаудан аулақ болу қажет.
Дифметраны® тек бас ауыруының жедел ұстамаларын басу үшін қолданған жөн; препарат созылмалы ауруларды емдеу үшін ұсынылмайды. Жиі қолданған кезде гематологиялық көрсеткіштерді және бүйрек пен бауыр функциясын қадағалау қажет.
Көпіршитін таблеткалар сирек кездесетін тұқым қуалаған фруктозаны көтере алмаушылық ауруынан зардап шегетін пациенттерге қарсы көрсетілімді.
Жүктілік
Индометацин сияқты ҚҚСП-мен простагландин синтезін тежеу жүктілік ағымына, эмбрион мен ұрық дамуына жайсыз ықпалын тигізуі мүмкін. Эпидемиологиялық зерттеулердің деректері жүктіліктің ерте сатыларында простагландин синтезі тежегішін пайдаланған кезде жүктіліктің үзілуі, ұрықта жүрек ақауы және гастрошизис даму қауіптерінің жоғарылауын айғақтайды. Жүрек ақауының абсолютті даму қаупі 1%-дан азынан шамамен 1,5%-ға дейін ұлғайды. Қатер дозаның көбеюімен және емнің ұзаққа созылуымен арта түседі деп саналады. Жануарларға простагландин синтезі тежегішінің енгізілуі имплантацияға дейін және одан кейін эмбрион/ұрықтың жоғалуы мен өлуіне әкелді. Бұдан басқа, органогенез кезеңінде простагландин синтезінің тежегіші енгізілген жануарларда әртүрлі, соның ішінде жүрек ақауларының даму жағдайларының жиілеуі жөнінде хабарланды. Жүктіліктің алғашқы және екінші триместрі кезінде индометацинді тек аса қажет болған жағдайда ғана тағайындауға болады. Индометацинді әйелдерге болжамды ұрықтану кезеңінде, сондай-ақ жүктіліктің алғашқы және екінші триместрі кезінде тағайындағанда доза мен қабылдау ұзақтығы, мүмкіндігінше, аз болуға тиіс.
Жүктіліктің үшінші триместрі кезінде простагландин синтезінің кез келген тежегіштері ұрықта мынадай зардаптар туғызуы мүмкін:
- кардиопульмональді уыттану (артериялық түтіктердің мерзімінен бұрын бөгеуімен және өкпе гипертензиясымен);
- су аздығы бар бүйрек жеткіліксіздігіне әкелуі мүмкін бүйрек дисфункциясы;
- ана мен ұрықта, жүктілік соңында:
- қан кету уақытының ұзаруы, мардымсыз дозаларда антиагрегациялық әсер болуы мүмкін;
- босану уақытының кідіруіне немесе ұзаруына әкелетін жатыр жиырылуларының тежелуі.
Дифметра® жүктіліктің үшінші триместрінде қарсы көрсетілімді.
Емшекпен қоректендіру
Индометацин, кофеин және прохлорперазин емшек сүтіне бөлінеді. Еметін сәбиге болатын зиянды, препаратты қабылдағаннан кейін 24 сағат ішінде емшек емізуді қоя тұрып, жоққа тән азайтуға болады.
Дәрілік заттың көлік құралдарына немесе қауіптілігі зор механизмдерді басқару қабілетіне әсер ету ерекшеліктері
Дифметра® ұйқышылдық шақыруы мүмкін. Қабылдағаннан кейін автокөлікті және басқа механизмдерді басқарғанда сақ болу қажет.
Артық дозалануы
Симптомдары: индометацинмен едәуір артық дозаланудың клиникалық көріністері асқазан-ішек жолы мен орталық жүйке жүйесі тарапынан болатын симптомдармен көріністеледі. Кофеиннің артық дозалануы, әдетте, жеңіл улану симптомдарын туындатады. Жедел уыттану жүрек айнуын, құсуды, қозуды, дірілдеуді, түйілуді, тахикардияны, аритмияны, гипотензияны, гипокалиемияны, метаболизмдік ацидозды туғызуы мүмкін. Прохлорперазинмен артық дозаланудың болжамды зардаптары (дозаның мардымсыз екеніне орай ықтималдығы өте аз): мазасыздық, ұйқышылдық немесе қозу, сондай-ақ бейжайлық, түйілулер түрінде көрініс беретін экстрапирамидалық бұзылыстарды немесе электрокардиографиялық өзгерістерді қамтиды.
Емі: симптоматикалық, демеуші. Мүмкіндігінше, асқазанды жылдам босату қажет. Дистония қаупіне орай, тыныс алу жолдары бос болуға тиіс. Гипотензия жағдайында өкпені жақсы желдетумен қамтамасыз ету қажет; пациентті жатқан қалыпқа көшіріп, сосын баяу норадреналин немесе метараминол енгізген жөн. Адреналинді қолдануға болмайды. Гемодиализ тиімсіз.
Шығарылу түрі және қаптамасы
10 таблеткадан полипропиленнен жасалған цилиндр тәрізді тубаға салады.
1 немесе 2 тубадан медициналық қолдану жөнінде мемлекеттік және орыс тілдеріндегі нұсқаулықпен бірге картон қорапшаға салынады.
Тубаға арналған көпіршитін таблеткалар: қақпақтың жоғарғы жағында көрсетілген бойынша тубаны басып ашу керек. Көпіршитін таблетканы суда толық ерігеннен кейін қабылдау керек.
Сақтау шарттары
30°C-ден аспайтын температурада, ауызы тығыз жабылған түпнұсқалық қаптамасында сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Қаптамасы ашылғаннан кейін сақтау мерзімі 2 ай
Дәріханалардан босатылу шарттары
Рецепт арқылы
Өндіруші
И-Фарма Тренто С.п.А., Италия
Фрационе Равина, Виа Провина, 2, 38123 Тренто (ТН)
Тіркеу куәлігінің иесі
Абботт Лабораториз ГмбХ, Ганновер, Германия
Қаптаушы ұйымның атауы мен елі
И-Фарма Тренто С.п.А., Италия
Фрационе Равина, Виа Провина, 2, 38123 Тренто (ТН)
Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы
«Абботт Казахстан» ЖШС
050059 Алматы қ., Қазақстан Республикасы
Достық даңғылы 117/6, «Хан Тәңірі-2» бизнес орталығы,
Тел.: +7 727 244 75 44, факс: +7 727 244 76 44.
E-mail: pv.kazakhstan@abbott.com