Диане® 35

МНН: Ципротерон, Этинилэстрадиол
Производитель: Байер Веймар ГмбХ и Ко.КГ
Анатомо-терапевтическо-химическая классификация: Ципротерон и эстрогены
Номер регистрации в РК: № РК-ЛС-5№014401
Период регистрации в РК: 15.05.2014 - 15.05.2019
Номер регистрации в РБ: 1332/95/2000/05/10/13/15/18/20

Инструкция

Саудалық атауы

Диане® 35

Халықаралық патенттелмеген атауы

Жоқ

Дәрілік түрі

Драже

Құрамы

Бір драженің құрамында

белсенді заттар: 2,0 мг ципротерон ацетаты

0,035 мг этинилэстрадиол,

қосымша заттар: лактоза моногидраты, жүгері крахмалы, повидон 25 000, тальк, магний стеараты,

драже қабығы: сахароза, повидон 700 000, макрогол 6000, кальций карбонаты, тальк, глицерин 85%, титанның қостотығы (E171), темірдің сары тотығы (Е172), монтагликоль балауызы.

Сипаттамасы

Дөңгелек, екі жақ беті дөңес, ақшыл сары түсті драже

Фармакотерапиялық тобы

Жыныс гормондары және жыныс жүйесінің модуляторлары. Антиандрогендер. Антиандрогендер және эстрогендер. Ципротерон және эстрогендер

АТХ коды G03HВ01

Фармакологиялық қасиеттері

Фармакокинетикасы

Ципротерон ацетаты

Сіңірілуі

Ішу арқылы қабылданған ципротерон ацетаты тез және толық сіңеді. Қан сарысуындағы 15 нг/мл тең ең жоғары концентрациясына шамамен 1,6 сағаттан соң жетеді. Биожетімділігі 88% жуық құрайды.

Таралуы

Ципротерон ацетаты сарысу альбуминімен толық дерлік байланысады. Ципротерон ацетатының жалпы сарысулық деңгейінің 3,5-4,0% ғана еркін түрде болады. Этинилэстрадиолмен индукцияланған жыныс гормондарын байланыстырушы глобулин (ЖГБГ) деңгейінің жоғарылауы ципротерон ацетатының қан сарысуы ақуыздарымен байланысуына әсер етпейді. Ципротерон ацетатының болжамды таралу көлемі шамамен 986±437 л тең.

Метаболизмі

Ципротерон ацетаты толық дерлік метаболизденеді.

Адамның қан плазмасындағы негізгі метаболиті – 15β-гидроксил туындысы, ол P450 цитохромы жүйесі CYP 3A4 ферментінің қатысуымен түзіледі. Қан сарысуынан клиренс жылдамдығы шамамен 3,6 мл/мин/кг құрайды.

Шығарылуы

Қан сарысуында ципротерон ацетатының мөлшері 0,8 сағатқа және 2,3-3,3 күнге жуық жартылай шығарылу кезеңімен сипатталатын екі фазалық азаюға ұшырайды. Ципротерон ацетаты ішінара өзгеріссіз күйде шығарылады. Ципротерон ацетаты метаболиттері 43,2 сағатқа жуық жартылай шығарылу кезеңімен 1:2 арақатынасында несеппен және өтпен шығарылады.

Тепе-тең концентрациясы

Ципротерон ацетаты фармакокинетикасына қан сарысуындағы ЖГБГ деңгейі ықпал етпейді. Препаратты күнделікті қабылдау нәтижесінде сарысудағы зат құрамының деңгейі шамамен 2,5 есе артады, тепе-тең концентрациясына курстың екінші жартысында жетеді.

Этинилэстрадиол

Сіңірілуі

Этинилэстрадиол ішке қабылданған соң тез және толық сіңеді. Қан сарысуындағы шамамен 71 пг/мл тең ең жоғары концентрациясына 1 сағат 40 минутта жетеді. Сіңу кезінде және бауыр арқылы алғашқы пассажда этинилэстрадиол бұрынғы қарқында метаболизденеді, соның нәтижесінде ішке қабылдау кезінде оның биожетімділігі, орта есеппен, 45% жуық құрайды, осы орайда 20-65% шегінде жекеше елеулі айырмашылықтары білінеді.

Таралуы

Этинилэстрадиол, спецификалық түрде болмаса да, альбуминмен толық дерлік (98%) байланысады. Этинилэстрадиол ЖГБГ синтезін индукциялайды. Этинилэстрадиолдың болжамды таралу көлемі 2,8-8,6 л/кг тең.

Метаболизмі

Этинилэстрадиол аш ішек шырышты қабығында және бауырда жүйе алдындағы конъюгациялануға ұшырайды. Этинилэстрадиол бастапқыда хош иісті гидроксилдену жолымен метаболизденеді, осы орайда еркін метаболиттер түрінде де, глюкурон және күкірт қышқылдарымен конъюгаттар түрінде де болатын алуан түрлі гидроксилденген және метилденген метаболиттер түзіледі.

Этинилэстрадиолдың метаболизмдік клиренс жылдамдығы 2,3-тен 7,0 мл/мин/кг дейін ауытқиды.

Шығарылуы

Қан сарысуында этинилэстрадиол мөлшері, тиісінше, 1 сағатқа және 10-20 сағатқа жуық жартылай шығарылу кезеңімен сипатталатын екі фазалық азаюға ұшырайды. Организмнен өзгермеген күйде шығарылмайды. Этинилэстрадиол метаболиттері 24 сағатқа жуық жартылай шығарылу кезеңімен 4:6 арақатынасында бүйрекпен және бауырмен шығарылады.

Тепе-тең концентрациясы

Тепе-тең концентрациясына қан сарысуындағы препарат деңгейі, бір реттік дозамен салыстырғанда, 60% жоғары болғанда шамамен емдеу циклының екінші жартысында жетеді.

Фармакодинамикасы

Май безі мен шаш фолликулынан тұратын май-шаш кешені терінің андрогенге сезімтал компоненті болып табылады. Акне және себоррея бір жағынан май бездерінің дисфункциясынан болады, олар андрогендерге жоғарғы сезімталдықтың немесе плазма андрогендерінің жоғары деңгейлерінің әсер етуінен туындауы мүмкін. Диане® 35 екі белсенді заты да оң емдік әсерге ие болады.

Диане® 35 құрамындағы ципротерон ацетаты андрогенді рецепторлардың бәсекеге қабілетті антагонисі болып, нысана жасушаларында андрогендер синтезін тежеу әсерін иеленеді және, гонадотропқа қарсы әсеріне орай, қанда андрогендер концентрациясының төмендеуіне ықпал етеді.

Препараттың гонадотропқа қарсы әсері ЖГБГ синтезін де арттыратын этинилэстрадиолмен күшейеді, бұл сонысымен қандағы андрогендердің еркін биологиялық белсенді деңгейінің азаюына ықпал етеді.

Диане® 35 емі, әдетте, 3-4 ай емделуден соң бұрыннан бар акне бөртулерінің жазылуына әкеледі. Шаш пен терінің шектен тыс майлылығы, әдетте, одан бұрын басылады. Андрогенге тәуелді шаштың түсуі де азаяды. Алайда, гирсутизмнен зардап шегетін әйелдерде нәтижелер бірнеше ай қабылдаудан соң ғана көріне бастайды.

Ципротерон ацетаты этинилэстрадиолмен біріктіріп қолдану кезінде контрацептивтік әсерге ие болатын күшті әсер ететін прогестоген болып табылады. Осы әсер негізінде орталық және шеткергі механизмдердің өзара әрекеттесуі жатыр, олардың ең маңыздысы овуляцияны бәсеңдету және цервикальді секрет қасиеттерін өзгерту болып саналу керек. Бұдан басқа, эндрометрийдің морфологиялық және ферментативтік өзгерістерінің нәтижесінде имплантация үшін аса қолайсыз жағдайлар туындайды.

Контрацептивтік қорғаныс препарат қабылдаудың бірінші күні басталады.

Қолданылуы

- акненің орташа және ауыр андрогенге тәуелді түрлерін (себореясыз немесе себореямен қатар жүретін) және/немесе ұрпақ өрбіту жасындағы әйелдерде гирсутизмді емдеуде.

Акнені емдеу үшін Диане® 35 препаратын жергілікті емдеу немесе жүйелі антибиотиктермен емдеу тиімді болмаған жағдайларда қолдану керек.

Диане 35 препаратын гормональді контрацептив болып табылатындықтан, оны басқа гормональді контрацептивтермен біріктіріп қолдануға болмайды («Қолдануға болмайтын жағдайлар» бөлімін қараңыз).

Қолдану тәсілі және дозалары

Диане® 35 овуляцияны кедергілейді және, осылайша, контрацептивтік әсерге ие болады. Диане® 35 қабылдайтын пациент әйелдер қосымша ұрықтануға қарсы гормональді дәрілер пайдалануы тиіс, өйткені бұл гормондардың артық дозалануына алып келеді және тиімді контрацептивтік әсер үшін қажет болып табылмайды.

Осы себепті, жүкті болып қалғысы келмейтін әйелдерге Диане® 35 препаратын қолдануға болмайды.

Диане® 35 қабылдау қажетті емдік тиімділігіне және қалаулы контрацептивтік қорғанысқа жету үшін жүйелі болуы тиіс.

Қолдану тәсілі

Ішке қабылдау үшін.

Дражені қаптамада көрсетілген тәртіп бойынша күн сайын шамамен белгілі бір уақытта аздаған су мөлшерімен қабылдау керек. 21 күн бойы үзіліссіз тәулігіне бір дражеден қабылданады. Келесі қаптаманы қабылдау тоқтату қан кетуі (етеккір тәрізді қан кету) байқалатын 7 күндік үзілістен кейін басталады. Ол, әдетте, соңғы драже қабылдаудан кейін 2-3 күндері басталып, жаңа қаптаманы қабылдау басталғанша аяқталмауы мүмкін. Контрацептивтік қорғаныс драже қабылдаған бірінші күні басталады және препарат қабылданбайтын 7 күн бойы да сақталады. Гормональді контрацептивтерді бір мезгілде қолдануды тоқтату керек.

Медициналық тексеру / дәрігер кеңесі

Препарат қолдануды бастар алдында толық жалпы медициналық тексеруден өтуге кеңес беріледі (қажет болса, дене салмағын, артериялық қысымды өлшеу, жүрек, аяқ және теріні тексеру, диабетке жасалатын несеп талдауы, бауыр тестілері), сондай-ақ гинекологиялық тексеру (сүт бездерін қарап тексеру мен жатыр мойнының қынаптық бөлігінен және жатыр мойнынан алынған цервикальді шырышты цитологиялық зерттеу) қажет, емдеуді талап ететін аурулар мен болжамды қауіптерді анықтау үшін толық отбасылық медициналық сыртартқы жинаған жөн. Жүктілікті жоққа шығару қажет. Препаратты қолдану кезінде әр алты ай сайын бақылау тексерулерін өткізу ұсынылады.

Егер қандас туыстардың ертерек жасында тромбоэмболиялық асқынулар (мысалы, терең көктамырлар тромбозы, инсульт, жүрек ұстамасы) білінсе, қан ұю жүйесінің тарапынан болатын бұзылуларды жоққа шығару керек. Ішуге арналған контрацептивтердің АИТВ инфекциясынан (ЖИТС) және жыныс жолымен берілетін басқа аурулардан қорғамайтынына да көңіл бөлу қажет.

Диане® 35 қабылдауды қалай бастау керек

- алдыңғы айда қандай да бір гормональді контрацептивтер қабылдау болмағанда

Диане® 35 қабылдау етеккір оралымының алғашқы күні (яғни, етеккірлік қан кетудің бірінші күні) басталады. Қабылдауды етеккір оралымының 2-5 күні бастауға болады, бірақ бұл жағдайда дражені бірінші қаптамадан қабылдаудың алғашқы 7 күні ішінде контрацепциялық бөгеу әдісін қосымша пайдалану ұсынылады.

Аменореясы бар әйелдер препарат қабылдауды дәрігердің тағайындауынан кейін бірден бастай алады; ондай жағдайда бірінші дражені қабылдау күні етеккір оралымының алғашқы күніне сәйкес келеді, әріқарай қабылдау нұсқауларға сай жалғасады.

- біріктірілген гормональді контрацептивтерден (біріктірілген ішуге арналған контрацептивтен, қынаптық сақинадан, трансдермальді бұласырдан) ауысқанда

Диане® 35 қабылдауды алдыңғы қаптамадан құрамында гормон бар соңғы дражені қабылдаудан кейінгі келесі күні, бірақ ешбір жағдайда қабылдау барысындағы әдеттегі 7 күндік үзілістен кейінгі келесі күннен кешіктірмей (құрамында 21 драже бар препараттар үшін) немесе құрамында гормон жоқ соңғы дражені қабылдаудан кейін (қаптамадағы құрамында 28 драже бар препараттар үшін) бастаған дұрыс. Қынаптық сақинадан немесе трансдермальді бұласырдан ауысқанда Диане® 35 қабылдауды соңғы сақинаны немесе циклдық қаптама бұласырын алып тастаған күннен, бірақ келесі сақина немесе бұласыр қолданылуы тиіс күннен кешіктірмей бастаған дұрыс.

- құрамында тек гестагендер ғана бар контрацептивтерден (мини-пили, инъекциялық түрлер, имплантант) немесе гестагенді босатып шығаратын жатырішілік жүйеден (ЖІЖ) ауысқанда

Әйел мини-пилиден Диане® 35-ке кез келген күні (үзіліссіз), имплантанттан немесе гестагені бар жатырішілік жүйеден (ЖІЖ) – оны алып тастаған күні, инъекциялық түрден – келесі инъекция жасалуы тиіс күннен бастап ауыса алады. Барлық жағдайларда драже қабылдаудың алғашқы 7 күні ішінде қосымша контрацепциялық бөгеу әдісін пайдалану қажет.

- жүктіліктің бірінші триместріндегі жасанды түсіктен соң

Әйел препарат қабылдауды дереу бастай алады. Осы шарт қадағаланғанда әйелге қосымша контрацептивтік қорғаныс қажет емес.

- жүктіліктің екінші триместріндегі босанудан немесе жасанды түсіктен соң

Әйелге жүктіліктің екінші триместріндегі босанудан немесе жасанды түсіктен соң 21-28 күні препарат қабылдауды бастау ұсынылуы тиіс. Егер қабылдау кешірек басталса, драже қабылдаудың алғашқы 7 күні ішінде қосымша контрацепциялық бөгеу әдісін пайдалану қажет. Алайда, егер әйел жыныстық қатынаста болып үлгерсе, Диане® 35 қабылдау басталғанша жүктілік жоққа шығарылуы тиіс немесе алғашқы етеккірді күте тұру қажет.

Қолдану ұзақтығы

Ауру симптомдарының жеңілдеуіне дейінгі уақыт кемінде үш ай құрайды.

Емдеуді жалғастыру қажеттілігін анықтау үшін емдеуші дәрігер жүйелі тексерулер өткізу қажет.

Диане® 35 препаратын қабылдау ұзақтығы аурудың ауырлығына және емдеу тиімділігіне қарай белгіленеді. Акне мен себореяны емдеудегі әсері, әдетте, гирсутизмді емдеу кезіндегіден ертерек басталады. Симптомдар қарқындылығы азайғаннан кейін кемінде тағы 3 немесе 4 цикл бойы Диане® 35 қабылдау ұсынылады.

Емге әсері болмаған жағдайда немесе емдеуге әсері жеткіліксіз болған жағдайда

  • алты айдан кем емес уақыт ішіндегі акне немесе себореяның ауыр түрлерінде немесе

  • 12 айдан кем емес уақыт ішіндегі гирсутизмде

Диане-35 препараттарын және Андрокур® 10 мг таблеткаларын немесе Андрокур® 50 мг таблеткаларын бір мезгілде қабылдау мүмкіндігін қарастыру; немесе, ең дұрысы, емдеу әдістемесін қайта қарау керек.

Андрогенделу симптомдары әлсіресе, бірақ ұрыққа қарсы әсері әлі де қажет болса, төмен дозаланған ішуге арналған контрацептивті қолдануға көшу керек. Андрогенді симптомдар қайталап көрініс берген жағдайда Диане-35 препаратымен емді жаңғыртуға болады.

Диане® 35 қабылдауды жаңғыртқан жағдайда (препаратты 4 апта және одан да көп уақыт қабылдаулар арасындағы үзілістен соң) көктамыр тромбоэмболиясының жоғары даму қаупін ескеру керек («Айрықша нұсқаулар» бөлімін қараңыз).

Өткізіп алған дражені қабылдау

Егер драже қабылдаудағы кешігу 12 сағаттан аз болса, контрацепцивтік қорғаныс төмендемейді. Әйел дражені мүмкіндігінше тезірек қабылдауы тиіс, келесі драже әдеттегі уақытта қабылданады.

Егер драже қабылдаудағы кешігу 12 сағаттан көп болса, контрацепцивтік қорғаныс төмендеуі мүмкін. Осы орайда мына негізгі екі ережені жетекшілікке алуға болады:

• Драже қабылдау ешқашан 7 күннен артық үзілмеуі тиіс.

• Гипоталамус-гипофизарлы-аналық без жүйесін бәсеңдетуге жету үшін дражені 7 күн үзіліссіз қабылдау талап етіледі.

Тиісінше, драже қабылдаудағы кешігу 12 сағаттан көп (соңғы дражені қабылдау сәтінен бастап аралық 36 сағаттан артық) болса, мынадай кеңестер беруге болады:

- препарат қабылдаудың бірінші аптасы

Әйел өткізіп алынған соңғы дражені еске түсірген бойда (тіпті, егер екі дражені бір мезгілде қабылдауға тура келсе де) мүмкіндігінше тезірек қабылдауы тиіс. Келесі драже әдеттегі уақытта қабылданады. Келесі 7 күн ішінде қосымша контрацепциялық бөгеу әдісі (мысалы, мүшеқап) пайдаланылуы тиіс. Егер өткізіп алған драженің алдындағы бір апта ішінде жыныстық қатынастар орын алған болса, жүкті болу ықтималдығын ескеру қажет. Дражені қанша көбірек өткізіп алса, ал олар белсенді заттар қабылдаудағы үзіліске неғұрлым жақын болса, жүкті болып қалу ықтималдығы соғұрлым жоғары.

- препарат қабылдаудың екінші аптасы

Әйел соңғы өткізіп алған дражені еске түсірген бойда (тіпті, егер екі дражені бір мезгілде қабылдауға тура келсе де) қабылдауы тиіс. Келесі драже әдеттегі уақытта қабылданады.

Әйел өткізіп алған алғашқы драженің алдындағы 7 күн ішінде дражені дұрыс қабылдаған жағдайда, қосымша контрацептивтік шаралар пайдалану қажет емес. Керісінше жағдайда, сондай-ақ екі немесе одан да көп дражені өткізіп алса, 7 күн ішінде қосымша контрацепциялық бөгеу әдістерін (мысалы, мүшеқап) пайдалану қажет.

- препарат қабылдаудың үшінші аптасы

Драже қабылдауда үзіліс болатындықтан сенімділіктің төмендеу қаупі талассыз.

Әйел келесі екі нұсқаның біреуін қатаң ұстануы тиіс. Осы орайда, егер бірінші өткізіп алған драженің алдындағы 7 күнде барлық дражелер дұрыс қабылданса, қосымша контрацептивтік әдістер пайдалану қажет емес.

  • Әйел соңғы өткізіп алған дражені (тіпті, егер екі дражені бір мезгілде қабылдауға тура келсе де) мүмкіндігінше тезірек қабылдауы тиіс. Келесі драже ағымдағы қаптамадағы драже біткенше әдеттегі уақытта қабылданады. Келесі қаптаманы бірден бастап кету керек. Екінші қаптама біткенше тоқтату қан кетуінің ықтималдығы аз, бірақ дражелер қабылдау кезінде жағынды бөліністер немесе құйылған қан кетулер білінуі мүмкін.

  • Әйел ағымдағы қаптамадан драже қабылдауды үзе алады. Одан кейін ол, драже өткізіп алған күнді қоса, 7 күнге үзіліс жасап, сосын жаңа қаптамадан қабылдауды бастауы тиіс.

    Егер әйел драже қабылдауды өткізіп алса, ал соңынан драже қабылдаудағы үзіліс кезінде онда тоқтату қан кетуі болмаса, жүктілікті жоққа шығару қажет.

    Тоқтату қан кетуінің болмауы

    Тоқтату қан кетуі болмаса, жүктілік жоққа шығарылғанша препарат қабылдауды тоқтату керек.

    Етеккіраралық қан кету жағдайындағы кеңестер

    Етеккіраралық қан кету жағдайында Диане-35 препаратын қабылдауды жалғастыру аса қажет. Аздаған қанды бөліністер, әдетте, өздігінен тоқтайды немесе бір мезгілде қосымша 20-50 мкг этинилэстрадиол қолдану нәтижесіндегі етеккірлік қан кету кезіндегідей (яғни, Диане-35 қаптамасынан соңғы дражені қабылдаудан кейін емес), осындай қарқындағы етеккіраралық қан кету кезінде де 4-5 күн ішінде жоғалады.

    Егер құйылған қан кету тоқтамаса немесе қайталанса, органикалық себебін жоққа шығару үшін мұқият тексеру, соның ішінде кюретаж өткізу қажет.

    Жоғарыда баяндалған жайт бірнеше бірізді цикл бойына жүйесіз уақыт аралықтары сайын болатын қанды бөліністерге де қатысты немесе Диане-35 препаратын ұзақ қабылдаудан кейін алғаш рет болады. Ондай жағдайларда қан кету, әдетте, дәрілік препарат әсерінің емес, органикалық өзгерістердің салдарынан болады.

    Асқазан-ішек бұзылыстары жағдайындағы кеңестер

    Ауыр құсуда немесе диареяда препараттың белсенді заттарының сіңуі толық болмауы мүмкін. Бұл жағдайда қосымша контрацепция шараларын қабылдау керек.

    Егер әйелде Диане® 35 дражесін қабылдаудан кейін 3-4 сағат ішінде құсу байқалса, дражені өткізіп алуға қатысты кеңестерді бағдарға алу қажет. Егер әйел препарат қабылдаудың қалыпты режимін өзгерткісі келмесе, қажеттілігіне қарай, ол басқа қаптамадан қосымша драже (немесе бірнеше дражені) қабылдауы тиіс.

    Бауыр аурулары

    Вирустық гепатитке шалдығу жағдайында сауығудан соң (бауыр сынамалары қалыпты көрсеткіштерге оралғанда) шамамен алты ай өткенше Диане-35 сияқты препараттарды қолдануға болмайды.

    Пациенттердің ерекше санаттары үшін қосымша ақпарат

    Балалар мен жасөспірімдер

    Диане® 35 препараты менархе басталуынан соң ғана көрсетілімді.

    Егде жастағы пациенттер

    Қолданылмайды. Диане® 35 препараты әйелдерде менопауза басталуынан кейінгі әйелдерге көрсетілімді емес.

    Бауыр тарапынан бұзылулары бар пациенттер

    Диане® 35 препараты ауыр сипатты бауыр аурулары бар әйелдерге бауыр функциясының көрсеткіштері қалыпқа келгенше қарсы көрсетілімді.

    Бүйрек тарапынан бұзылулары бар пациенттер

    Диане® 35 препараты бүйрек функциясының бұзылуы бар пациенттерде арнайы зерттелмеген. Қолда бар деректерде ондай пациенттерде емдеуді өзгерту көзделмейді.

Жағымсыз әсерлері

Диане® 35 препаратын қабылдайтын әйелдердің бәрінде тромбоэмболияның даму қаупі артады.

Қосымша факторлар (шылым шегу, артериялық гипертензия, қан ұюдың бұзылуы немесе липидтік метаболизм бұзылулары, семіздік, көктамырлардың варикозды кеңеюі, бұрын шалдыққан флебит және тромбоз) қауіпті күшейтуі мүмкін, «Айрықша нұсқаулар» бөлімін қараңыз.

Бауыр ісіктері, жатыр мойны обыры және сүт бездері обыры сияқты басқа да жағымсыз әсерлер туралы ақпаратты «Айрықша нұсқаулар» бөлімінен қараңыз.

Келесі жағымсыз әсерлер Диане® 35 қабылдайтын әйелдерде сипатталған және олардың препаратпен өзара байланысы расталған да, теріске шығарылған да жоқ.

Жиі (≥1/100):

- жүрек айну, іштің ауырулары

- дене салмағын қосу

- бас ауыру, депрессиялық көңіл-күй, көңіл-күйдің өзгеруі

- сүт бездерінің ауырсынуы және кернелуі, етеккіраралық қан кету

Жиі емес (≥1/1000, <1/100):

- құсу, диарея

- сұйықтық іркілісі

- бас сақинасы

- либидоның төмендеуі

- сүт бездерінің ұлғаюы

- бөртпе, есекжем, хлоазма (бетте пигментті дақтардың білінуі)

Сирек(<1/1000)

- аса жоғары сезімталдық реакциялары

- жанаспалы линзалардың нашар жағымдылығы

- тромбоэмболия

- дене салмағының кемуі

- либидоның жоғарылауы

- қынаптық бөліністер, сүт бездерінен бөліністер

- түйінді эритема, мультиформалы эритема

Постмаркетингтік бақылаулар деректері

- артериялық қысымның көтерілуі

Диане® 35 қолданатын әйелдерде «Айрықша нұсқаулар» бөлімінде сипатталған келесі күрделі жағымсыз әсерлер жөнінде хабарланған:

- көктамырлық тромбоэмболиялық бұзылулар

- артериялық тромбоэмболиялық бұзылулар

- цереброваскулярлы бұзылулары

- артериялық гипертензия

- гипертриглицеридемия

- глюкозаға төзімділіктің нашарлауы немесе шеткергі инсулиндік төзімділік әсерлері

- бауыр ісіктері (қатерсіз және қатерлі)

- бауыр функциясының бұзылулары

- хлоазма

- біріктірілген ішуге арналған контрацептивтер қабылдаумен байланысты мына жай-күйлердің білінуі немесе нашарлауы дәлелді анықталмаған: сарғаю және/немесе холестазбен байланысты қышыну; өт қалтасында тастардың түзілуі; порфирия; жүйелі қызыл жегі; гемолиздік уремиялық синдром; Сиденгам хореясы (кіші хорея), жүктілер герпесі; отосклерозбен байланысты естімей қалу, Крон ауруы және спецификалық емес ойық жаралы колит, жатыр мойнының обыры.

- тұқым қуалайтын ангионевроздық ісінуі бар әйелдердегі экзогенді эстрогендердің әсер етуімен аурулар симптомдарының қозуы немесе өршуі

Сүт безі обыры диагнозының жиілігі ішілетін контрацептивтер қабылдайтын әйелдер арасында біршама жоғары. Сүт безінің обыры 40 жасқа толмаған әйелдерде сирек білінетіндіктен диагноздар санының артуы осы аурудың жалпы даму қаупіне қатысты мардымсыз. Толық ақпарат «Айрықша нұсқаулар» және «Қолдануға болмайтын жағдайлар» бөлімінде мазмұндалады.

Сүт безі тініне әсері

Жыныс гормондары, оның басқа канцерогенді факторлар әсеріне сезімталдығын арттыруы ықтимал болғандықтан, сүт безінің тініне ықпалын көрсетеді. Жыныс гормондары, шын мәнінде, ішуге арналған контрацептивтер қабылдаумен байланыссыз болжанатын әртүрлі қауіп факторларының тек біреуі түрінде болады. Ұрықтануға қарсы гормональді препараттар қолдану мен сүт безі обырының дамуы арасында болуы мүмкін байланыс талданатын эпидемиологиялық зерттеулерде атап көрсетілген аурудың жас кезінен бастап ұзақ уақыт бойы контрацептивтер қолданатын әйелдерде орта жас басталғанша едәуір жиі біліне ме деген сұраққа талассыз жауап берудің сәті түспеді.

Біріктірілген ішуге арналған контрацептивтер қабылдау кезінде де эндогенді депрессия мен эпилепсияның күшеюі білінген.

Егер гирсутизмнен зардап шегетін әйелдерде симптомдардың едәуір күшеюі байқалатын жағдайда дифференциациялық диагноз қою кезінде басқа себептерді (андроген өндіретін ісік, бүйрек үсті безі қыртысындағы ферментопатия) ескеру қажет.

Клиникалық биохимиялық талдау көрсеткіштерінің қалып шегінен ауытқуы

Эритроциттердің шөгу жылдамдығы ауру болмаса да артуы мүмкін. Қан сарысуында мыс және темір деңгейлерінің жоғарылау жағдайлары, сондай-ақ лейкоциттердің сілтілік фосфатаза белсенділігінің күшею жағдайлары аталған.

Басқа да метаболизмдік функциялар

Фолий қышқылы мен триптофан метаболизмінің сирек бұзылулары білінуі мүмкін.

Диане® 35 препараты жүйелі қолданылғанда, өз құрамына орай, ұрықтануға қарсы әсер көрсетеді. Жүйесіз Диане® 35 қабылдау етеккір оралымының бұзылуына алып келуі мүмкін. Диане® 35 қабылдау кезіндегі жүйеліліктің қадағалануы етеккір оралымының бұзылуын болдырмау үшін де, жүктіліктен сақтану үшін де (ципротерон ацетатының дамып келе жатқан сәбиге әсерін тигізуі мүмкін екендіктен) өте маңызды.

Қолдануға болмайтын жағдайлар

Төменде тізбеленген жағдайлардың қандай да бірі болғанда құрамында эстроген/гестаген біріктірілімдері бар препараттар пайдаланылмауы тиіс. Егер осы жай-күйлердің қандай да бірі қабылдау аясында алғаш дамитын болса, препарат дереу тоқтатылуы тиіс:

- препарат компоненттерінің кез келгеніне аса жоғары сезімталдық

- қазіргі уақыттағы немесе сыртартқыдағы көктамырлық тромбоз (мысалы, терең көктамырлар тромбозы, өкпе артериясының тромбоэмболиясы)

- жеке немесе отбасылық сыртартқысында белгілі идиопатиялық көктамырлық тромбоэмболияның болуы (КТЭ), отбасылық сыртартқысында туған ағалары, апалары немесе ата-анасының салыстырмалы жас кезінде КТЭ қатысы болатын)

- қазіргі уақыттағы немесе сыртартқыдағы артериялық тромбоз (мысалы, миокард инфарктісі) немесе осының алдындағы бұзылулар (мысалы, стенокардия және транзиторлы ишемиялық шабуылдар)

- қазіргі уақыттағы немесе сыртартқыдағы цереброваскулярлы бұзылулар

- көктамырлық және артериялық тромбозды дамытатын айқын немесе көптеген қауіп факторларының болуы («Айрықша нұсқаулар» бөлімін қараңыз), мысалы:

    • тамырлық асқынулары бар қант диабеті

    • айқын артериялық гипертензия

    • айқын дислипопротеинемия

  • көктамырлық немесе артериялық тромбоэмболияға тұқым қуалаудан болатын немесе жүре пайда болатын бейімділік (мысалы, белсенділенген С протеиніне төзімділік (АРС төзімділік), антитромбин III, С протеині, S протеині тапшылығы, гипергомоцистеинемия және фосфолипидке қарсы антиденелер (кардиолипинге антиденелер және жегілік антикоагулянт)

  • орақ тәріздес-жасушалы анемия

  • бауырдың ауыр аурулары, соның ішінде бауыр функциясы қалып шегіне келетін сәтке дейінгі Дубин-Джонсон және Ротор синдромы сияқты экскреторлық жүйе бұзылулары

- қазіргі уақыттағы немесе сыртартқыдағы бауыр ісіктері (қатерсіз немесе қатерлі)

- шығу тегі түсініксіз қынаптық қан кету

- сыртартқыдағы ошақтық неврологиялық симптомдарымен болатын бас сақинасы

- шылым шегу

- анықталған гормонға тәуелді (мысалы, жыныс ағзаларының немесе сүт бездерінің) қатерлі аурулар немесе олардан күдіктену

- сыртартқыда жүктілердің идиопатиялық сарғаюының, ауыр қышынудың немесе жүктілер герпесінің болуы, алдыңғы жүктіліктер кезіндегі отосклероз нашарлауы

- қалаулы жүктілік, жүктілік және бала емізу кезеңі

Диане® 35 ерлерде қолданылмайды.

Дәрілермен өзара әрекеттесуі

Басқа препараттардың Диане 35-ке әсері

Бауырдың микросомалық ферменттерін индукциялайтын препараттармен өзара әрекеттесуі мүмкін, бұл жыныс гормондары клиренсінің арта түсуіне және құйылған қан кетулерге және/немесе препараттың контрацептивтік тиімділігінің төмендеуіне әкелуі мүмкін.

Ондай препараттарды қабылдау кезінде әйел Диане 35-ке толықтыру ретінде контрацепциялық бөгеу әдісін қосымша пайдалану немесе қонтрацепцияның басқа әдісін таңдау керек. Бұл орайда контрацепциялық бөгеу әдісін препараттарды қатарлас қабылдау кезеңінде және оларды тоқтатудан кейін 28 күн ішінде пайдалану керек.

Егер сақтанудың бөгеттік әдісін пайдалану кезеңі қаптамадағы таблеткалардан кешірек аяқталса, келесі Диане 35 қаптамасына таблеткалар қабылдаудағы әдеттегі үзіліссіз көшу керек.

Диане 35 клиренсін арттыратын (бауыр ферменттері индукциясының салдарынан тиімділігін төмендететін) заттар, мысалы:

барбитураттар, рифампицин және эпилепсияға қарсы препараттар (барбексаклон, карбамазепин, фенитоин, примидон сияқты); сонымен қатар, окскарбазепин, топирамат, фелбамат, гризеофульвин және құрамында шайқурай бар препараттарға қатысты болжамдар бар.

Диане 35 клиренсіне әртүрлі әсерлері бар заттар

Диане35-пен біріктіріп қолданғанда көптеген АИТВ/HCV-протеаза тежегіштері және кері транскриптазаның нуклеозидті емес тежегіштері қан плазмасында эстрогендер мен прогестиндер концентрациясын арттыруы немесе төмендетуі мүмкін. Атап көрсетілген өзгерістердің кейбір жағдайларда релевантты мәні болуы мүмкін.

Эстроген/прогестаген біріктірілімінің басқа препараттарға ықпалы

Диане® 35 сияқты эстроген/прогестаген біріктірілімдері кейбір басқа препараттардың метаболизміне ықпал етуі мүмкін, бұл олардың қан плазмасындағы және тіндердегі концентрацияларының көтерілуіне (мысалы, циклоспориннің) немесе кемуіне (мысалы, ламотриджиннің) әкеледі.

Глюкозаға төзімділігіне ықпал етуін ескеріп, қант төмендететін препараттардың дозасын түзету қажет болуы мүмкін.

Басқа өзара әрекеттесулер

Зертханалық тестілер

Диане® 35 сияқты препараттарды қабылдау бауыр, бүйрек, қалқанша без, бүйрек үсті бездері функциясының көрсеткіштерін, плазмадағы тасымал ақуыздарының, мысалы, кортикостероид-байланыстырушы глобулин мен липид/липопротеидтер фракцияларының деңгейін, көмірсу алмасу көрсеткіштерін, коагуляция және фибринолиз параметрлерін қоса, кейбір зертханалық тестілердің нәтижелеріне әсер ете алады. Алайда, бұл өзгерістер әдетте қалыпты мәндер шегінен шығып кетпейді.

Әйелге басқа гормональді контрацептивтермен қосымша Диане® 35 қолдануға болмайтынын ескерту керек. Ондай препараттарды қабылдауды Диане® 35 препаратымен емдеуді бастар алдында тоқтату қажет.

Айрықша нұсқаулар

Сақтану шаралары және ескертулер

Диане® 35 препаратының құрамында прогестаген ципротерон ацетаты және эстроген этинилэстрадиол бар және ол айлық оралымның 21 күні бойына қолданылады. Препараттың құрамы басқа біріктірілген ішуге арналған контрацептивтермен ұқсас.

Қолдану ұзақтығы

Ауру симптомдарының жеңілдеуіне дейінгі уақыт кемінде үш ай құрайды. Емдеуші дәрігер емдеуді жалғастыру қажеттілігін анықтау үшін жүйелі тексерулер өткізуі тиіс.

Егер төменде көрсетілген жағдайлар/қауіп факторларының қандай да бірі қазіргі уақытта орын алса, әр жекеше жағдайда Диане® 35 емінің әлеуетті қаупі мен күтілген пайдасын мұқият таразылап, оның препаратты қабылдай бастауды ұйғаруына дейін әйелмен талқылап алу керек. Осы жағдайлардың немесе қауіп факторларының кез келгені күшейген немесе алғаш көрініс берген жағдайда емдеуші дәрігермен кеңесу керек. Препаратты қашан тоқтату туралы шешімді дәрігер қабылдау қажет.

Айналымдық бұзылулар

Диане® 35 препаратын қабылдайтын пациент әйелдерде, аталған препаратты қабылдамайтын әйелдермен салыстырғанда, көктамыр тромбоэмболиясының (КТЭ) даму қаупі артады. Диане® 35 қабылданған бірінші жыл ішінде немесе қабылдауды жаңғыртқанда, сондай-ақ қабылдаудағы кемінде бір ай үзілістен кейін осы препаратқа ауысқанда ең көп қосымша КТЭ қаупі білінеді. Көктамыр тромбоэмболиясы 1-2% жағдайда өліммен аяқталуға әкелуі мүмкін.

Эпидемиологиялық зерттеулер нәтижелері Диане® 35 пайдаланушылар арасында КТЭ даму жиілігі құрамында левоноргестрел бар біріктірілген гормональді контрацептивтер пайдаланатын әйелдердегіден 1.5-2 есе жоғары екенін айғақтайды және құрамында дезогестрел/гестоден/дроспиренон бар біріктірілген ішуге арналған контрацептивтер қабылдау аясындағы қауіпке ұқсас болды.

Диане® 35 препаратын қолданған әйелдер арасында, мысалы, аналық бездер поликистозы синдромымен байланысты жүрек-қантамыр ауруларының туа біткен жоғары даму қаупі бар пациент әйелдер болуы мүмкін ықтималдық бар.

Бұдан басқа, эпидемиологиялық зерттеулер деректері гормональді контрацептивтер қолдану мен миокард инфарктісі, транзиторлы ишемиялық шабуылдар сияқты артериялық тромбоэмболияның жоғары даму қаупі арасында өзара байланыс барын көрсетеді.

Біріктірілген ішуге арналған контрацептивтер қабылдайтын әйелдерде басқа қан тамырларының, мысалы, бауырлық, мезентериальді, бүйректік, церебральді артериялардың және көктамырлардың, сондай-ақ торқабық тамырлары тромбозының аса сирек жағдайлары сипатталған.

Көктамырлық немесе артериялық тромбоз немесе цереброваскулярлы бұзылулар симптомдары мыналар болуы мүмкін:

аяқтың әдеттен тыс біржақты ауыруы және/немесе ісінуі, сол жаққа берілуіне байланыссыз кеуденің кенеттен қатты ауыруы, күрт жөтел шабуылы, кез келген әдеттен тыс ауыр немесе ұзаққа созылатын бас ауыру, кенеттен жартылай немесе толық көрмей қалу, диплопия, сөйлеудің бұзылуы немесе сөйлей алмай қалу, бас айналу, жергілікті эпилепсия талмасымен немесе онсыз санадан айрылу немесе естен тану, дененің бір жағында немесе дененің бір бөлігінде кенет пайда болатын әлсіздік немесе айқын ұю, қозғалыс бұзылулары, «жедел іштеспе» симптомдары.

Көктамырлық тромбоэмболия бұзылуларының даму қаупі артады:

- жас ұлғаюымен

- шылым шегушілерде (әріқарай қауіп, әсіресе, 35 жастан асқан әйелдерде темекілер санының көбеюімен немесе жас ұлғаюымен артады. Диане® 35 пайдаланғысы келетін 35 жастан асқан әйелдерде қатаң түрде шылым шегуден бас тартуға кеңес беріледі);

- отбасылық сыртартқы болғанда (жақын туыстарының немесе ата-анасының салыстырмалы жас кезіндегі көктамыр тромбоэмболиясы). Егер тұқым қуалайтын бейімділігі белгілі болса немесе жорамалданса, әйел гормональді контрацептив қабылдау мүмкіндігі мәселесін шешу үшін дәрігермен кеңесуі қажет.

- ұзаққа созылатын иммобилизация, күрделі хирургиялық араласу, аяққа жасалған кез келген операция немесе ауқымды жарақаттарда. Бұл жағдайларда біріктірілген ішуге арналған контрацептивтер пайдалануды тоқтатып (операция жоспарланған жағдайда, кем дегенде, оған дейінгі төрт апта бұрын), иммобилизация аяқталған соң екі апта ішінде қабылдауды жаңғыртпаған дұрыс. Егер Диане® 35 препаратын тоқтату бұрын алдын ала жүргізілмеген болса, тромбозға қарсы ем тағайындау қажеттілігін қарастыру керек.

- семіздікте (дене салмағы индексі 30 кг/м2 көп);

Артериялық тромбоэмболия асқынуларының немесе цереброваскулярлы бұзылулардың даму қаупі артады:

- жас ұлғаюымен

- шылым шегушілерде (әріқарай қауіп, әсіресе, 35 жастан асқан әйелдерде темекілер санының көбеюімен немесе жас ұлғаюымен артады. Диане® 35 пайдаланғысы келетін 35 жастан асқан әйелдерде шылым шегуден бас тартуға қатаң түрде кеңес беріледі);

- дислипопротеинемияда

- семіздікте (дене салмағы индексі 30 кг/м2 көп)

- артериялық гипертензияда

- бас сақинасында

- жүрек клапандары ауруларында

- жүрекшелер фибрилляциясында

- отбасылық сыртартқы болғанда (жақын туыстарының немесе ата-анасының салыстырмалы жас кезіндегі артериялық тромбоз). Егер тұқым қуалайтын бейімділігі белгілі болса немесе жорамалданса, әйел гормональді контрацептив қабылдау мүмкіндігі мәселесін шешу үшін дәрігермен кеңесуі қажет.

Айналымдық бұзылулар сонымен бірге:

қант диабетінде, жүйелі қызыл жегіде, гемолиздік уремиялық синдромда, ішектің созылмалы қабыну ауруларында (Крон ауруы немесе спецификалық емес ойық жаралы колит) және орақ тәріздес-жасушалы анемия кезінде білінуі мүмкін.

Босанудан кейінгі кезеңде тромбоэмболияның жоғары даму қаупін ескеру керек («Жүктілік және лактация» бөлімін қараңыз).

Диане® 35 қолдану кезінде бас сақинасының жиілігі мен ауырлығының артуы (бұл цереброваскулярлы бұзылуларға жол ашуы мүмкін) осы препараттарды қабылдауды дереу тоқтатуға негіз бола алады.

Диане® 35 қабылдайтын әйелдерге болуы мүмкін тромбоз симптомдары білінгенде емдеуші дәрігеріне қаралу қажеттілігі жөнінде ерекше нұсқау беру керек. Тромбоз күдік тудырғанда немесе расталғанда Диане® 35 қабылдауды тоқтату қажет. Антикоагулянттардың (кумариндік қатардағы) тератогенді әсерін ескеріп, тиісті контрацепция әдістерін пайдалану керек.

Артериялық тромбоэмболия үдерістері өмірге қатер төндіруі немесе өліммен аяқталуға әкелуі мүмкін.

Бірнеше қауіп факторларының бірігуі немесе қауіп факторларының біреуінің жоғарырақ айқындылығы бар әйелдерде тромбоздың жоғары синергиялық қаупінің ықтималдығын ескеру керек.

Осындай жағдайларда, барлық факторлар есепке алынатын жай қауіп жиынтығына қарағанда, қауіптің артуы жоғары болуы мүмкін.

Қауіп/артықшылық арақатынасы теріс бағаланған жағдайда Диане® 35 тағайындауға болмайды («Қолдануға болмайтын жағдайлар» бөлімін қараңыз).

Ісіктер

Жатыр мойны обырын дамытатын ең елеулі қауіп факторы вирустық инфекция - персистирленетін адам папиломасы (НРV) болып табылады. Біріктірілген ішуге арналған контрацептивтерді ұзақ уақыт қолданғанда жатыр мойны обырының даму қаупінің аздап артуы туралы хабарламалар бар, алайда оның басқа факторлармен, соның ішінде жатыр мойнын тексеру жиілігімен және контрацепциялық бөгеу әдістерін пайдалануды қоса, жыныстық мінез-құлық ерекшеліктерімен қандай дәрежеде байланысты болуы мүмкін екені туралы деректер қарама-қайшы күйде қалады.

Зерттелген тұста біріктірілген ішуге арналған контрацептивтер пайдаланған әйелдерде диагностикаланған сүт безі обырының салыстырмалы даму қаупі (RR=1.24) біршама жоғары екені 54 эпидемиологиялық зерттеудің мета-талдауында көріністелді. Жоғары қауіп осы препараттарды қабылдауды тоқтатудан кейінгі 10 жыл ішінде біртіндеп жоғалады. Сүт безі обырының 40 жасқа толмаған әйелдерде сирек білінуімен байланысты қазіргі уақытта біріктірілген ішуге арналған контрацептивтер қабылдап жүрген немесе таяуда қабылдаған әйелдерде сүт безі обыры диагноздары санының көбеюі, осы аурудың жалпы даму қаупіне қатысты, мардымсыз болып табылады. Оның біріктірілген ішуге арналған контрацептивтер қабылдаумен байланысы дәлелденбеген. Байқалған қауіп жоғарылауы біріктірілген ішуге арналған контрацептивтер қолданатын әйелдердегі сүт безі обырының ертерек диагностикалану, біріктірілген ішуге арналған контрацептивтердің биологиялық әсерлерінің немесе екі фактордың бірігу салдарынан болуы мүмкін. Біріктірілген ішуге арналған контрацептивтерді қашан болса да пайдаланған әйелдерде, оларды ешқашан қолданбаған әйелдерге қарағанда, сүт безі обырының ертерек сатылары анықталады.

Сирек жағдайларда біріктірілген ішуге арналған контрацептивтер қолдану аясында бауырдың қатерсіз ісіктерінің дамуы және одан да сирек жағдайларда бауырдың қатерлі ісіктерінің дамуы байқалды. Жекелеген жағдайларда бауыр ісіктері өмірге қатерлі интраабдоминальді қан кетулерге әкелуі мүмкін. Іштің жоғарғы бөлігінде қатты ауырулар, бауыр ұлғаюы немесе интраабдоминальді қан кету белгілері білінген жағдайда дифференциациялық диагноз қою кезінде бауыр ісігін есепке алу керек.

Қатерлі ісіктер өмірге қатер төндіруі немесе өліммен аяқталуға әкелуі мүмкін.

Басқа жай-күйлер

Гипертриглицеридемиясы бар әйелдерде (немесе осы жағдай отбасылық сыртартқыда болса) біріктірілген ішуге арналған контрацептивтер қабылдау кезінде панкреатиттің даму қаупі жоғарылауы мүмкін.

Біріктірілген ішуге арналған контрацептивтер немесе Диане® 35 қабылдайтын көптеген әйелдерде артериялық қысымның аздап көтерілуі сипатталса да, клиникалық мәнді жоғарылаулар сирек аталған. Дегенмен де, егер Диане® 35 кезінде артериялық қысымның тұрақтанған, клиникалық мәнді көтерілуі дамыса, Диане® 35 қабылдауды тоқтатып, артериялық гипертензияны емдеуді бастау керек. Егер гипотензиялық ем көмегімен артериялық қысымның қалыпты мәндеріне жеткізілсе, Диане® 35 қабылдауды жалғастыруға болады.

Жүктілік кезінде байқалатын келесі жай-күйлер біріктірілген ішуге арналған контрацептивтер қабылдау кезінде де білінуі немесе нашарлауы мүмкін: сарғаю және/немесе холестазбен байланысты қышыну; өт қалтасында тастардың түзілуі; порфирия; жүйелі қызыл жегі; гемолиздік уремиялық синдром; Сиденгам хореясы; жүктілер герпесі; отосклерозбен байланысты естімей қалу. Алайда, көрсетілген жай-күйлердің дамуы мен біріктірілген ішуге арналған контрацептивтер қабылдау арасындағы өзара байланыс дәлелденбеген.

Тұқым қуалайтын ангионевроздық ісінуі бар әйелдерде экзогенді эстрогендер осы ауру симптомдарын қоздыруы немесе өршітуі мүмкін.

Бауыр функциясының жедел және созылмалы бұзылулары болғанда бауыр функциясының көрсеткіштері қалып шегіне оралғанша Диане® 35 қабылдауды тоқтату мәселесін шешу қажет. Жүктілік кезінде немесе алдыңғы жыныстық гормондар қабылдау кезінде алғаш дамитын қайталамалы холестаздық сарғаю дамығанда Диане® 35 қабылдауды тоқтату керек.

Біріктірілген ішуге арналған контрацептивтер инсулинге төзімділікке және глюкозаға төзімділікке әсер тигізуі мүмкін болса да, төмен дозаланған біріктірілген ішуге арналған контрацептивтер (<0,05 мг этинилэстрадиол) пайдаланатын қант диабетімен науқастарда емдік режимді өзгерту қажеттілігі жоқ. Соның өзінде, біріктірілген ішуге арналған контрацептивтер қабылдаған уақытта қант диабеті бар әйелдер мұқият қадағалануы тиіс.

Біріктірілген ішуге арналған контрацептивтер қолдану аясында Крон ауруының және спецификалық емес ойық жаралы колиттің көріністері байқалған.

Диане® 35 қабылдау кезінде хлоазмаға бейім әйелдер күн астында ұзақ аялдамауы және ультракүлгінді сәулелену әсеріне ұшырамауы тиіс.

Тиімділіктің төмендеуі

Диане® 35 контрацептивтік тиімділігі драже қабылдаудағы өткізіп алу кезінде, асқазан-ішек жолының бұзылуларында немесе белгілі бір препараттарды бірге қабылдағанда төмендеуі мүмкін.

Жүйесіз қан кетулер

Егер жүйесіз қан кетулер осының алдындағы жүйелі айналымдардан кейін қайталанса немесе өршісе, тиянақты тексеру, соның ішінде қатерлі жаңа түзілімдерді немесе жүктілікті жоққа шығару үшін диагностикалық қырнау жүргізілуі керек.

Кейбір әйелдерде драже қабылдаудағы 7 күндік үзіліс кезінде тоқтату қан кетуі дамымауы мүмкін. Егер Диане® 35 қабылдау нұсқаулыққа сай орындалса, әйелдің жүкті болу ықтималдығы аз. Дегенмен де, тоқтату қан кетуінің бірінші болмауына дейін Диане® қабылдау нұсқаулыққа сәйкес орындалмаса немесе егер тоқтату қан кетуі қатарынан екі рет болмаса, препарат қабылдауды жалғастырғанша жүктілік жоққа шығарылуы тиіс. Лактоза

Диане® 35 препаратының бір дражесінде 31 мг лактоза моногидраты және 19 мг сахароза бар. Галактозаны немесе фруктозаны көтере алмаушылық, лактаза тапшылығы, глюкоза-галактоза мальабсорбциясы немесе сахараза-изомальтаза тапшылығы сияқты сирек тұқым қуалайтын бұзылулары бар пациент әйелдерге Диане® 35 қабылдауға болмайды.

Егер гирсутизмнен зардап шегетін әйелдерде симптомдар таяуда дамыса немесе елеулі күшейсе, дифференциациялық диагноз қою кезінде андроген өндіретін ісік, бүйрек үсті бездері қыртысының туа біткен дисфункциясы сияқты басқа себептерді ескеру керек.

Жүктілік және лактация

Жүктілікті жоққа шығару қажет. Жүктілік кезінде Диане® 35 қарсы көрсетілімді. Егер препаратты қабылдау кезінде жүктілік анықталса, оны қабылдауды бірден тоқтату қажет.

Диане® 35 лактация кезінде де қарсы көрсетілімді, өйткені ципротерон ацетаты сүтпен бөлінуі мүмкін. Ана қабылдайтын дозаның 0,2% жуығы жаңа туған сәби организміне түсуі мүмкін, бұл 1 мкг/кг жуық дозаға сәйкес. Ана қабылдайтын этинилэстрадиолдың тәуліктік 0,02% дозасы орныққан лактация кезінде жаңа туған нәресте организміне емшек сүтімен түсуі мүмкін.

Клиникаға дейінгі қауіпсіздік туралы деректер

Этинилэстрадиол

Этинилэстрадиолдың уыттылық бейіні жақсы зерттелген. Препаратты медициналық қолдану жөніндегі нұсқаулықтың басқа бөлімдерінде көрсетілген этинилэстрадиол қауіпсіздігіне қатысты ақпаратты толықтыратын клиникаға дейінгі деректер жоқ.

Ципротерон ацетаты

Жүйелі уыттылық

Ципротерон ацетатын көп рет қолдану кезіндегі уыттанудың клиникаға дейінгі стандартты зерттеулерінің деректері адамдар үшін спецификалық қауіп барын көрсетпейді.

Эмбриоуыттылық/тератогенділік

Препараттың екі белсенді затын біріктіру кезіндегі эмбриоуыттану зерттеулері сыртқы жыныс мүшелерінің дамуына дейінгі органогенез сатысында тератогендік әсерлерінің болатынын көрсетпейді.

Жыныс ағзалары дифференциациясының гормонға сезімтал фазасында ципротерон ацетатын жоғары дозаларда қабылдау ер жынысты ұрықтарда әйел жынысты белгілердің пайда болуына әкеледі. Аналары жүкті кезінде ципротерон ацетатын қабылдаған жаңа туған ұлдарды бақылағанда оларда қандай да бір әйел жынысты белгілердің дамуы анықталмаған. Соның өзінде, жүктілік кезінде Диане® 35 қабылдау қарсы көрсетілімді.

Геноуыттылық және канцерогенділік

Ципротерон ацетатының геноуыттылығына өткізілген негізгі стандартты тестілер теріс нәтижелі болды. Алайда, қосымша сынақтардың нәтижелері ципротерон ацетатының ДНҚ-мен аддукт түзу қабілеті барын көрсетті, бұл егеуқұйрықтар мен маймылдардың бауыр жасушаларында, сонымен бірге адамның жаңа ажыратылған гепатоциттерінде ДНҚ репарациясының артуына әкеледі, осы орайда ДНҚ-мен аддукт деңгейі иттердің бауыр жасушаларында тіптен төмен болды.

ДНҚ-мен аддукт түзілуі ципротерон ацетатының ұсынылған дозаларында болжамды күтілген жүйелі әсер ету кезінде дамыған. Ципротерон ацетаты егеуқұйрық ұрғашыларына in vivo енгізілгенде жасушалық ферменттер өзгерісі бар фокальді, бәлкім пренеопластикалы ошақтар жиілігінің артуы және мутация үшін нысана ретіндегі бактериялық генді тасымалдайтын трансгенді тышқандардағы мутациялар жиілігінің жоғарылауы байқалды.

Препарат клиникалық қолданылған уақыт ішінде және эпидемиологиялық зерттеулерде адамдағы бауыр ісіктерінің даму жиілігінің артуы анықталмаған. Кеміргіштерде жүргізілген зерттеулерде препараттың канцерогенді қасиеттері анықталмаған. Соның өзінде, жыныс стероидтарының кейбір гормонға тәуелді ісіктер мен тіндердің өсуін көтермелей алатынын ескеру қажет.

Жалпы, қолда бар деректер бойынша оны қолдану жөніндегі нұсқаулық пен ұсынылған дозалары қадағаланғанда Диане® 35 препаратының адамда қолданылуына қатысты қарсы көрсетілімдері жоқ.

Пациенттердің ерекше санатындағылар үшін қосымша ақпарат

Балалар мен жасөспірімдер

Диане® 35 препараты тек менархе басталуынан кейін ғана көрсетілімді.

Егде жастағы пациенттер

Қолданылмайды. Диане® 35 препараты әйелдерге менопауза басталуынан кейін көрсетілімді емес.

Бауыр тарапынан бұзылулары бар пациенттер

Диане® 35 препараты бауыр функциясының көрсеткіштері қалыпқа келгенше ауыр сипатты бауыр аурулары бар әйелдерге қарсы көрсетілімді.

Бүйрек тарапынан бұзылулары бар пациенттер

Диане® 35 препараты бүйрек тарапынан бұзылулары бар пациенттерде арнайы зерттелмеген. Қолда бар деректерде ондай пациенттерді емдеуді өзгерту болжанбайды.

Дәрілік заттың автокөлікті және қауіптілігі зор механизмдерді басқару қабілетіне әсер ету ерекшеліктері.

Анықталмаған.

Артық дозалануы

Артық дозалану кезіндегі күрделі жағымсыз әсерлер туралы хабарланбаған.

Симптомдары: жүрек айну, құсу және жас қыздардағы болымсыз қынаптық қан кету.

Емі: ешқандай арнайы у қайтарғысы жоқ; симптоматикалық ем жүргізілу керек.

Шығарылу түрі және қаптамасы

Поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамада 21 дражеден.

Пішінді 1 қаптаманы қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Сақтау шарттары

30º С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Байер Веймар ГмбХ және Ко. КГ, Германия

Тіркеу куәлігінің иесі

Байер Фарма АГ, Берлин, Германия

Қаптаушы

Байер Веймар ГмбХ және Ко. КГ, Германия

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы

«Байер КАЗ» ЖШС

Тимирязев көшесі, 42, «Экспо-Сити» бизнес орталығы, 15 павильон

050057 Алматы, Қазақстан Республикасы,

тел. +7 727 258 80 40, факс: +7 727 258 80 39,

e-mail: kz.claims@bayer.com

 

Прикрепленные файлы

015595651477976716_ru.doc 244 кб
661964881477977865_kz.doc 232.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники