Депакин® Хроно (300 мг)

МНН: Вальпроевая кислота
Производитель: Санофи Винтроп Индустрия
Анатомо-терапевтическо-химическая классификация: Valproic acid
Номер регистрации в РК: № РК-ЛС-5№021135
Период регистрации: 12.01.2015 - 12.01.2020
Включено в Список бесплатного амбулаторного лекарственного обеспечения
АЛО (Включено в Список бесплатного амбулаторного лекарственного обеспечения)
Включено в Список ЛС в рамках ГОБМП, подлежащих закупу у Единого дистрибьютора
ЕД (Включено в Список ЛС в рамках ГОБМП, подлежащих закупу у Единого дистрибьютора)

Инструкция

Саудалық атауы

Депакин Хроно

Халықаралық патенттелмеген атауы

Вальпрой қышқылы

Дәрілік түрі

Қабықпен қапталған, әсер етуі ұзартылған, бөлінетін 300 мг таблеткалар

Құрамы

Бір таблетканың құрамында

белсенді заттар: натрий вальпроаты 199,8 мг

вальпрой қышқылы 87,0 мг,

(ол 300 мг натрий вальпроатына сәйкес келеді)

қосымша заттар: гипромеллоза 4000, этилцеллюлоза, натрий сахарині, коллоидты кремнийдің қостотығы,

қабықтың құрамы: гипромеллоза, макрогол 6000, тальк, титанның қостотығы (Е171), 30% полиакрилат дисперсиясы.

Сипаттамасы

Ақ түсті дерлік, жиектері жартылай сфералық, екі жақ беті дөңес, ұзынша пішінді, екі жағында да бөлетін сызығы бар, қабықпен қапталған таблеткалар.

Фармакотерапиялық тобы

Эпилепсияға қарсы препараттар. Май қышқылдарының туындылары.

Вальпрой қышқылы.

АТХ коды N03AG01

Фармакологиялық қасиеттері

Фармакокинетикасы

Сіңуі

Депакин Хроно препаратының қан плазмасындағы биожетімділігі пероральді түрде қабылдағанда 100%-ға жуық.

Депакин Хроно плазмада айналымда вальпрой қышқылы түрінде болады. Баяу босап шығатын Депакин Хроно таблеткаларының асқорыту жолында сіңуі дереу басталады, жүйелі және ұзақ болып табылады. Бұл вальпрой қышқылының плазмада ең жоғары шекте болмауына әкеледі және вальпрой қышқылының емдік концентрацияларын ұзақ уақыт бойы ұстап тұруға мүмкіндік береді.

Таралуы

Вальпрой қышқылы көбінесе қанға және жасушадан тыс сұйықтыққа таралады.

Ақуыздармен, негізінен, альбуминдермен байланысуы шектеулі, дозаға тәуелді және қаныққан. Вальпрой қышқылының плазмадағы жалпы концентрациясы 40-100 мг/л болған кезде байланыспаған фракциясы, әдетте, 6-15% құрайды.

Вальпрой қышқылының жұлын-ми сұйықтығындағы концентрациясы қан плазмасындағы байланыспаған фракциясының концентрациясына ұқсас болады (10%-ға жуық).

Вальпрой қышқылы диализге ұшырайды, бірақ диализденген фракциясының мөлшері альбуминмен (шамамен 10%) байланысатын болғандықтан едәуір төмендейді.

Натрий вальпроаты плацента арқылы өтеді. Вальпрой қышқылы Депакин Хроно препаратын қабылдаған әйелдерде лактация кезеңінде сүттен (сарысудағы жалпы концентрациясының 1-10%-ы) табылған.

Депакин Хроно препаратын (пероральді түрін) қолдана отырып ұзақ емдеудің бас кезінде вальпрой қышқылының сарысуда тепе-теңдік концентрацияға жетуі шамамен 3-4 күнге созылады, ал кейбір жағдайларда одан да ұзағырақ.

Вальпрой қышқылының (278-694 ммоль/л) 40-100 мг/л концентрациясы әдетте оның плазмадағы емдік концентрациясы болып саналады. Егер вальпрой қышқылының қан плазмасындағы жалпы концентрациясы 150 мг/л (1040 ммоль/л) асатын деңгейде сақталса, тәуліктік дозасы азайтылуы тиіс.

Метаболизмі

Депакин Хроно негізінен бауырда метаболизденеді. Метаболизденуінің негізгі жолдарына глюкурондануы және бета-тотығуы жатады. Эпилепсияға қарсы басқа да дәрілердің көпшілігіне қарағанда, натрий вальпроаты өз деградациясын да, эстроген және прогестерон сияқты басқа заттардың осындайын да жеделдетпейді. Бұл қасиеті, Р450 цитохромы жүйесінің ферменттерін қоса, ферменттерге индукциялаушы әсерінің жоқтығынан көрінеді.

Шығарылуы

Препаратты ұзақ уақыт қабылдағанда вальпрой қышқылының ересектердегі жартылай шығарылуының орташа кезеңі 10,6 сағатты құрайды (алайда 5-тен 20 сағатқа дейін ауытқып тұруы мүмкін), бұл препаратты тәулігіне екі рет қабылдауды талап етеді.

Шала туған балаларда жартылай шығарылу кезеңі 20-30 сағатты құрайды және, нәрестенің дамуына орай, ересектердегі мәндеріне біртіндеп жақындайды.

Вальпрой қышқылының экскрециясы, негізінен, бүйрек арқылы жүреді, мұндайда азғантай бөлігі өзгеріссіз күйінде шығарылады, ал көп бөлігі метаболиттер түрінде бөлініп шығады.

Емделушілердің жекелеген топтарындағы кинетикасы

Бүйрек қызметінің жеткіліксіздігі бар емделушілер: альбуминнің байланысуы төмендейді. Вальпрой қышқылының байланыспаған фракциясының сарысудағы концентрациясының артатынын ескеру, және препараттың дозасын сәйкесінше төмендету керек.

Егде жастағы емделушілер: фармакокинетикалық мәндердің өзгергені байқалған, алайда олар аса маңызды болып табылған жоқ; сондықтан дозасы клиникалық жауапқа (ұстамалардың бақылануына қол жеткізілуіне қарай) сәйкес анықталуы тиіс.

Фармакодинамикасы

Клиникаға дейінгі фармакологиялық зерттеулер, Депакин Хрононың эпилепсияның түрлі эксперименттік үлгілерінде (жайылған және фокальді ұстамалар) құрысуға қарсы қасиеттер танытатынын көрсетті.

Осыған ұқсас, клиникалық зерттеулерде, Депакин эпилепсияның түрлі формаларында эпилепсияға қатысты белсенділік танытты.

Әсер ету механизмі, сірә, разрядының таралуын болдырмайтын немесе шектейтін жоғары ГАМҚ-эргиялық белсенділігін қамтиды.

Бірнеше in vitro зерттеулерден, натрий вальпроатының АИВ-1 репликациясын стимуляциялауы мүмкін екені көрінген, алайда бұл әсер аса жоғары емес және зерттеулердің көпшілігінде қайта жаңғыртылмауы мүмкін еді. Бұл қадағалаулардың АИВ-1 жұқтырған емделушілер үшін клиникалық маңызы белгісіз. Натрий вальпроатын АИВ-1 жұқтырған емделушілерге тағайындағанда, бұл деректер вирустық жүктемеге мониторинг жүргізу нәтижелерін интерпретациялаған кезде назарға алынуы тиіс.

Қолданылуы

Монотерапия түрінде:

- алғашқы жайылған эпилепсияда: шағын эпилепсия ұстамасы/ абсанс, ауқымды екіжақты миоклония, миоклонуспен немесе онсыз үлкен эпилепсия ұстамасы, жарыққа сезімтал формалары.

Монотерапия түрінде немесе эпилепсияға қарсы басқа дәрілермен біріктіріп:

- салдарлы жайылған эпилепсияда, атап айтқанда, Веста синдромында (инфантильді түйілулер) және Леннокс-Гасто синдромында

- симптоматикасы элементарлық немесе күрделі (психосенсорлық формалары, психомоторлық формалары) парциальді эпилепсияда

- аралас формаларда (жайылған және парциальді эпилепсия)

- биполярлық бұзылыстармен астасқан маниакальді көріністерді емдеуде

- вальпроатпен емдеген кезде маниакальді көріністерге қатысты емге жауап байқалған, биполярлық бұзылысы бар ересек емделушілерде көңіл-күй бұзылыстары көріністерінің қайталануының алдын алуда.

Қолдану тәсілі және дозалары

Эпилепсия

Әдеттегі дозасы

Тәуліктік дозасы емделушінің жас шамасы мен салмағына қарай тағайындалуы тиіс. Дегенмен, вальпроатқа жекелей сезімталдық едәуір құбылып тұрады.

Оңтайлы дозасы алынған клиникалық жауапқа байланысты анықталуы тиіс; ұстамалардың қанағаттанарлық бақылануына қол жеткізілмеген немесе препаратты қабылдаудан жағымсыз әсерлердің дамуына күдіктенген жағдайларда, клиникалық қадағалауларға қосымша препараттың белсенді затының қан плазмасындағы концентрациясын анықтау қажет болады.

Пероральді түрде қабылдау тәсілінде бірінші желілі монотерапия ретінде

Ұзаққа созылатын әсерінің (Хроно) формуласы препаратты тәуліктік бір доза түрінде қабылдауға мүмкіндік береді. Препаратты тамақ ішудің басында қабылдаған дұрыс. Стандартты тәуліктік дозасы: жаңа туған нәрестелер мен балалар үшін 25 мг/кг; жасөспірімдер үшін 20-25 мг/кг; ересектер үшін 20 мг/кг, және егде жастағы адамдар үшін 15-20 мг/кг құрайды.

Депакин® Хрононы мүмкіндігінше біртіндеп, тәуліктік 10-15 мг/кг дозадан бастап, және әрі қарай дозасын әрбір 2-3 күн сайын біртіндеп, шамамен бір апта ішінде оңтайлы дозаға жеткізе отырып енгізген жөн. Препаратты монотерапия ретінде қабылдаған жағдайда белгілі бір дозаға, яғни егде жастағылар үшін тәулігіне 15 мг/кг, ересектер мен жасөспірімдер үшін тәулігіне 20 мг/кг, балалар үшін тәулігіне 25 мг/кг дозаға жеткенде қадағалау сатысын бастауға болады. Егер бұл сатыда қанағаттанарлық клиникалық тиімділігі байқалса, препаратты қабылдау осы дозада жалғастырылуы тиіс.

Егде жастағыларға арналған тәуліктік 25 мг/кг дозаны, ересектер мен жасөспірімдерге арналған 30 мг/кг дозаны, немесе балаларға арналған 35 мг/кг дозаны арттыру қажеттілігі тек сирек жағдайларда ғана, әсіресе препаратпен монотерапия кезінде туындайды.

Алайда егер препаратты мұндай дозаларда қабылдау ұстамалардың бақылануына қол жеткізуге мүмкіндік бермесе, дозаны арттыруды жалғастыруға болады; 50 мг/кг дозаны арттырғанда тәуліктік дозаны 3 қабылдауға бөлу, сондай-ақ клиникалық және биохимиялық бақылауды күшейту керек («Айрықша нұсқауларды» қараңыз).

Депакин Хроно препаратын эпилепсияға қарсы басқа дәрілермен біріктіру

Натрий вальпроаты, бірінші желілі монотерапия кезіндегідей қабылдануы тиіс. Орташа тәуліктік доза, әдетте, монотерапияда пайдаланылатын дозамен ұқсас. Алайда кейбір жағдайларда бұл доза 5-10 мг/кг дейін арттырылуы мүмкін.

Депакин препаратының эпилепсияға қарсы басқа дәрілерге әсерін де ескерген жөн («Дәрілермен өзара әрекеттесуін» қараңыз).

Эпилепсияға қарсы дәрілік затты Депакин препаратына ауыстыру

Егер Депакинді тағайындауда алдыңғы препаратты біртіндеп және толығымен алмастыру көзделсе, ол бірінші желілі монотерапиядағы сияқты жолмен енгізілуі тиіс. Кейбір алдыңғы препараттардың, атап айтқанда барбитураттардың дозасы дереу төмендетіліп, әрі қарай препарат біртіндеп сатылап тоқтатылуы тиіс. Препаратты тоқтату 2-8 аптаны құрауы тиіс.

Биполярлық бұзылыстары бар емделушілердегі маниакальді көріністер

Ұсынылатын старттық дозасы тәулігіне 20 мг/кг құрайды. Бұл доза қалаған клиникалық әсерге мүмкіндік беретін ең төмен емдік дозаға жеткізілуі үшін мүмкіндігінше тезірек арттырылуы тиіс.

Қалаған клиникалық әсерге әдетте плазмадағы вальпроат концентрациясы 45 және 125 г/мл арасы ауқымында болғанда жетеді.

Биполярлық бұзылысты емдеу үшін ұсынылатын демеуші доза тәулігіне 1000-2000 мг құрайды. Сирек жағдайларда доза тәулігіне ең жоғарғы 3000 мг дейін арттырылуы мүмкін. Дозаны түзету жекелей клиникалық жауапқа негізделуі тиіс.

Биполярлық бұзылыстармен байланысты маниакальді көріністердің қайталануының алдын алу

Қайталануының алдын алу үшін қолданылатын доза, бұл емделушіде жедел маниакальді синдром симптомдарын сәйкесінше бақылауды қамтамасыз ететін тиімді ең төмен дозаға сәйкес келеді. 3000 мг тең болатын ең жоғарғы тәуліктік дозадан асырмаған жөн.

Дозалау жөніндегі айрықша нұсқаулар

Сызығы бар таблеткалар түріндегі Депакин Хрононы жарты стақан таза сумен, сүтпен немесе басқа алкогольсіз сусынмен ішіп қабылдау керек.

Жағымсыз әсерлері

- туа біткен, отбасылық немесе генетикалық бұзылулар («Жүктілікті» қараңыз)

- сүйек кемігінде қан түзудің тежелуі, соның ішінде нақты эритроцитарлық аплазия

- агранулоцитоз. Оқулықта І типті Виллербанд ауруына сәйкес келетін коагуляция бұзылулары жөнінде айтылады. Егер емделушіге операция жасалатын болса немесе кездейсоқ қан кету немесе гематома жағдайында, емдеуді бастар алдында қан талдауын (тромбоциттерді қоса, жалпы қан талдауы, қан кету уақытын және, VIII факторын анықтауды қоса, коагуляцияға тестілер) жүргізу қажет.

- Квинке ісінуі, эозинофилиямен және жүйелі симптомдарымен (DRESS- синдром) бірге дәрілік бөртпе, аллергиялық реакциялар

- антидиуретикалық гормонның талапқа сай емес секрециясы синдромы (АГТЕСС)

- сананың шатасуы

- ас қорыту бұзылыстары (жүректің айнуы, іштің жоғарғы бөлігінің ауыруы, диарея) субъектілердің кейбірінде емдеудің бас кезінде туындауы мүмкін, бірақ әдетте бірнеше күн үзіліссіз емдеуден кейін жоғалады. Егер Депакиннің® баяу босап шығатын (Хроно), қабықпен қапталған таблеткаларын тіпті біртіндеп енгізсе, және препаратты тамақтанудың бас кезінде қабылдаса, мұндай бұзылулардың туындау жиілігін едәуір төмендетуге болады. Бұл жағдайларда симптоматикалық ем тағайындалуы мүмкін.

- емдеудің бас кезінде туындаған, әсіресе балалардағы аса жоғары белсенділік немесе ашушаңдықтың бірнеше жағдайлары білінген. Кейбір жағдайларда (≥0.1%-<1%), көбінесе қолдарда, ұсақ амплитудалы постуральді тремор байқалған; мұндай құбылыс уақытша болуы мүмкін. Дозасын төмендету қажет етілуі мүмкін.

- кейде өткінші комаға/энцефалопатияға әкеп соғатын мелшию мен летаргияның бірнеше жағдайлары туралы мәлімделді, бұл құбылыстар өздігінен болған немесе ем қабылдау кезінде құрысулардың туындау жиілігінің артуымен астасқан. Құбылыстар емдеуді тоқтатқанда немесе дозасын төмендеткенде азайған. Бұл жағдайлар негізінен, біріктірілген емді (атап айтқанда, фенобарбиталмен немесе топираматпен біріктірілімдерін) қабылдаған кезде немесе вальпроаттың дозасын күрт арттырғаннан кейін орын алған.

- өткінші және/немесе дозамен байланысты алопеция

- аменорея және дисменорея құбылыстары байқалған

- гипотермия құбылыстары

Жиі

- тромбоцитопения (≥ 1-<10%). Депакин Хроно препаратын қабылдау тромбоциттер санының 10000-нан 30 000/мм³ дейін төмендеп кетуіне әкеп соғуы мүмкін; көбінесе бұл төмендеу дозаға тәуелді және уақытша болып табылады. Препаратты қабылдаудың алдында, ал содан кейін 3-6 ай емдеуден кейін, сондай-ақ кез келген хирургиялық операцияның алдында, әсіресе егер препараттың қабылданатын дозасы тәулігіне 30 мг/кг асатын болса, тромбоциттер санына баға беру ұсынылады.

- тәбеттің ұлғаюы және салмақтың артуы (10,5% жағдайда), әсіресе жасөспірімдер мен жас әйелдерде. Салмақтың артуы аналық бездердің поликистоздық синдромының клиникалық симптомдарын ушықтыруы мүмкін болғандықтан, салмақ мұқият бақылануы тиіс («Сақтық шараларын» қараңыз).

- өткінші және/немесе дозаға тәуелді ұйқышылдық (≥ 1%- <10%)

- бас ауыруы

Кейде

- васкулит

- атаксия

Сирек

- анемия, лейкопенияның және панцитопенияның гематологиялық жағымсыз әсерлері

- қайтымды және қайтымсыз кереңдік

Өте сирек

- гипонатриемия

- оқшауланған гипераммониемия, бауырдың елеулі зақымдануынсыз, бұл қарапайым тестілерді пайдаланып бағаланған. Клиникалық көріністері болмаса, емдеуді тоқтату міндетті түрде қажет емес. Алайда егер гипераммониемия неврологиялық симптомдармен қатар жүрсе, әрі қарай зерттеулер жүргізу қажет етіледі («Сақтық шараларын» қараңыз).

- әдетте тез қайтымды, сананың көмескіленуі сияқты неврологиялық әсерлері натрий вальпроатын эпилепсияға қарсы басқа дәрілермен, атап айтқанда фенобарбиталмен біріктіріп қабылдаған, және препаратты емдеу сызбасына енгізу біртіндеп жүргізілмеген емделушілерде байқалған

- қайтымды ми атрофиясымен байланысты қайтымды деменция (<0,01%)

- панкреатит (<0,01%), кейде өліммен аяқталатын («Сақтық шараларын» қараңыз). Натрий вальпроатын /вальпрой қышқылын қабылдаған кезде іш тұсы қатты ауырған барлық емделушілер тез арада дәрігердің тексеруін қажет етеді (ұйқы безі ферменттерінің белсенділігін анықтау, басқа да тиісті тестілерді жүргізу).

- бауырдың ауыр зақымдануы (<0,01%), кейде өліммен аяқталатын.

Эпилепсияның ауыр түріне шалдыққан, атап айтқанда мидың зақымдануымен, ақыл-ойының қалыстығынан және шығу тегі генетикалық метаболикалық немесе дегенеративтік аурулары бар нәрестелер және 3 жасқа дейінгі кішкентай балалар аса жоғары қауіпке ұшырайды. Бауыр функциясы бұзылуының даму жиілігі 3 жастан асқаннан кейін едәуір азаяды және жас ұлғая келе біртіндеп төмендей береді.

Бауырдың зақымдануы көптеген жағдайларда емдеудің алғашқы 6 айы ішінде, көбінесе екі және он екі апта аралығында, және әдетте эпилепсияға қарсы бірнеше дәріні қабылдағанда байқалды.

Ескертпе белгілері және анықтау

Ауруды ерте анықтау негізінен клиникалық белгілеріне негізделеді.

Атап айтқанда, сарғаюдың дамуына жол ашуы мүмкін, әсіресе қауіп тобындағы емделушілердегі клиникалық көріністердің екі типі қатаң қадағалауға тұрарлық («Даму жағдайларын» қараңыз):

- әлсіздік, тәбеттің болмауы, депрессия және ұйқышылдық сияқты, кейде бірнеше рет құсумен және іштің ауыруымен қатар жүретін, жалпы, спецификалық емес, әдетте кенеттен басталатын белгілер

- эпилепсиялық ұстамалардың бақылануын жоғалту

Емделушілерге (немесе егер бұл балаларға қатысты болса, олардың отбасы мүшелеріне) симптомдар туындаса, дереу дәрігерге хабарласу қажет екендігі ескертілуі тиіс. Мұндай жағдайларда клиникалық тексеруден басқа, бауыр функциясына дереу талдау жүргізу керек.

Анағұрлым маңызды стандартты тестілерге ақуыз синтезін зерттеу, әсіресе протромбиндік индексті анықтау жатады. Егер протромбиндік индекс аномальді түрде төмен болып шықса, әсіресе егер бұл зерханалық көрсеткіштердің басқа аномальді мәндерімен (фибриноген концентрациясының және қанның ұю факторларының едәуір төмендеуімен, билирубин концентрациясының жоғарлауымен, трансаминазалар деңгейінің жоғарылауымен «Сақтық шараларын» қараңыз) қатар жүрсе, Депакин Хроно препаратын қабылдау тоқтатылуы тиіс.

- уытты эпидермальді некролиз, Стивенс-Джонсон синдромы және мультиформалы эритема.

- ауыр емес шеткергі ісінулер

- несепті ұстай алмау

Бірен-саран жағдайлар

- қайтымды паркинсонизм

- қайтымды Фанкони синдромы, бірақ бұл құбылыстың патофизиологиялық механизмі әзірге анық емес.

- қандағы фибриноген деңгейінің төмендеуі және протромбиндік индекстің жоғарылауы, әсіресе препараттың жоғары дозаларын қабылдағанда, алайда әдетте, қандай да бір клиникалық зардаптарсыз. Натрий вальпроаты тромбоциттер агрегациясының екінші сатысын тежейді.

Қолдануға болмайтын жағдайлар

- жедел және созылмалы гепатит

- отбасылық сыртартқысында әсіресе дәрілік препараттардан туындаған ауыр гепатиттің болуы

- натрий вальпроатына белгілі жоғары сезімталдық

- бауыр порфириясы

- мефлохинмен және шайқураймен біріктіріп қабылдау

- 6 жасқа дейінгі балаларға.

Дәрілермен өзара әрекеттесуі

Вальпроаттың басқа препараттарға әсері

Вальпрой қышқылы Р450 CYP2C9 және CYP3A цитохромы изоферменттерінің тежегіші болып табылады. Күтілетін метаболизмдік әсерлері туралы тұжырымды сәйкесінше сызбаның негізінде жасауға болады. Төмендегі өзара әрекеттесулері айрықша маңызды болып табылады:

- Нейролептиктер, моноаминоксидаза тежегіштері (МАОт), антидепрессанттар және бензодиазепиндер

Депакин Хроно нейролептиктер, моноаминоксидаза тежегіштері, антидепрессанттар және бензодиазепиндер сияқты басқа нейропсихотроптық препараттардың әсерін күшейтуі мүмкін; осыған орай клиникалық мониторинг жүргізу және емдеуді мүмкіндігінше түзету қажет.

- Фенобарбитал

Депакин Хроно бауырлық метаболизмге тежегіштік әсеріне байланысты, фенобарбиталдың қан плазмасындағы концентрациясын арттырады, бұл әсіресе балаларда ұйқышылдыққа әкеледі. Сондықтан емделушілер ұйқышылдық туындаған жағдайда, фенобарбиталдың дозасын дереу азайта отырып, біріктірілген ем қабылдаудың алғашқы 15 күні ішінде клиникалық мониторингтен өтуі тиіс, ал қажет болған жағдайда фенобарбиталдың плазмадағы концентрациясын да анықтау керек.

- Примидон

Депакин Хроно примидонның плазмадағы концентрациясын арттырады және оның жағымсыз әсерлерін (ұйқышылдық сияқты) күшейтеді. Бұл өзара әрекеттесуі ұзақ уақыт бойы емдегенде тоқтайды. Клиникалық мониторинг, әсіресе біріктірілген емнің басында, жүргізу, сондай-ақ қажет болған жағдайда примидонның дозасын түзету керек.

- Фенитоин

Депакин Хроно фенитоиннің плазмадағы жалпы концентрациясын төмендетеді. Атап айтқанда, ол фенитоиннің бос фракциясының, мүмкін болатын артық дозалану белгілерімен (вальпрой қышқылы фенитоинді оның плазма ақуыздарымен байланысатын учаскелерден ығыстырады және оның бауырлық катаболизмін төмендетеді) жоғарылауына әкеледі. Сондықтан клиникалық мониторинг жүргізу ұсынылады. Фенитоиннің плазмадағы концентрациясын анықтаған кезде байланыспаған түрінің концентрациясын өлшеу қажет.

- Карбамазепин

Натрий вальпроатын /вальпрой қышқылын карбамазепинмен бірге қабылдап жүрген емделушілерде, клиникалық уыттылық көріністері байқалған, бұл натрий вальпроатының/вальпрой қышқылының әсерінен карбамазепин уыттылығының күшеюімен байланысты. Сондықтан, әсіресе біріктірілген ем қабылдаудың бас кезінде клиникалық мониторинг жүргізу, сондай-ақ қажет болғанда дозаны түзету ұсынылады.

- Ламотриджин

Ламотриджинді вальпрой қышқылымен бірге қабылдағанда, егер ламотриджин вальпрой қышқылына қосылса, бөртпенің туындау қаупі артуы мүмкін.

Натрий вальпроатын қабылдау ламотриджиннің метаболизмін төмендетуі және оның жартылай шығарылуының орташа кезеңін арттыруы мүмкін. Қажет болған жағдайда ламотриджиннің дозасы төмендетілуі тиіс.

- Зидовудин

Натрий вальпроаты /вальпрой қышқылы зидовудиннің уыттылық қаупін арттыра отырып, зидовудиннің плазмадағы концентрациясын едәуір жоғарылатуы мүмкін.

Вальпрой қышқылына басқа препараттардың әсері

Фермент-индукциялаушы әсері бар эпилепсияға қарсы дәрілер (әсіресе фенитоин, фенобарбитал және карбамазепин) вальпрой қышқылының сарысудағы концентрацияларын азайтады. Біріктіріп емдеу жағдайында, препараттардың дозаларын клиникалық жауапқа және вальпрой қышқылының қандағы концентрациясына сәйкес түзету керек.

Фелбаматты натрий вальпроатымен біріктіргенде вальпрой қышқылының қандағы концентрациясының артуы байқалуы мүмкін. Плазмадағы концентрацияларына мониторинг жүргізу қажет.

Мефлохин вальпрой қышқылының метаболизмін күшейтеді; бұдан басқа, оның құрыстыру әсері бар, ол екі препаратты бір мезгілде қабылдағанда, эпилепсия ұстамаларының туындау қаупіне әкеп соғады.

Депакин Хроно препаратын ақуыздармен байланысуға қабілеті жоғары препараттармен (мысалы, ацетилсалицил қышқылымен) бір мезгілде қолдану, плазмадағы вальпрой қышқылының байланыспаған түрінің концентрациясының артуына алып келуі мүмкін.

Циметидинді немесе эритромицинді бір мезгілде қолдану, бәрінен бұрын, вальпрой қышқылы концентрациясының артуына әкеледі (бауырда вальпрой қышқылы метаболизмінің төмендеуі салдарынан).

Вальпрой қышқылының қандағы концентрациясының құрысулармен қатар төмендеуі кейде вальпроатты карбапенемдер тобының антибиотиктерімен (панипенем/меропенем/имипенем және т.б.) бір мезгілде қабылдаған емделушілерде байқалған. Егер бұл антибиотиктерді қабылдау қажет болса, плазмадағы вальпрой қышқылының концентрацияларын аса мұқият бақылау керек.

Рифампицин қандағы вальпроат деңгейін төмендетуі мүмкін, бұл емдік әсерінің жоқ болуына әкеп соғады. Вальпроатты рифампицинмен бір мезгілде қолданғанда вальпроаттың дозасын түзету қажет болуы мүмкін.

Басқа өзара әрекеттесулері

Вальпрой қышқылының әдетте фермент-индукциялайтын әсері болмағандықтан, ол гормональді контрацепцияны пайдаланып жүрген әйелдердегі эстроген және прогестеронның плазмадағы жалпы концентрациясын төмендетпейді. Осы себепті, вальпроат қан плазмасындағы К витамині антагонисттерінің жалпы концентрациясын төмендетпейді.

Алайда Депакин Хроно, альбуминмен бәсекелесе байланысуына байланысты, варфариннің бос фракциясының деңгейін арттыруы мүмкін. Осы себепті, К витамині антагонистерін қабылдап жүрген емделушілерде протромбиндік индексті мұқият бақылау қажет.

Вальпроат пен топираматты бір мезгілде қолдану энцефалопатиямен және/немесе гипераммонемиямен астасқан. Бұл екі препаратты қабылдап жүрген емделушілерде гипераммониемиялық энцефалопатия белгілері мен симптомдарының пайда болуын мұқият бақылаған жөн.

Айрықша нұсқаулар

Натрий вальпроаты иммунитет жүйесі тарапынан симптомдардың пайда болуын сирек туғызатын болса да, препаратты жүйелі қызыл жегісі бар емделушілерге тағайындар алдында пайда және қауіп арақатынасы мұқият екшелуі тиіс.

Емдеуді бастар алдында бауыр функциясына зерттеу («Жағымсыз әсерлерін» қараңыз) жүргізу керек, содан кейін, әсіресе қауіп тобының емделушілері үшін («Жағымсыз әсерлерін» қараңыз) 6 ай бойы жүйелі бақылау жүргізу қажет. Трансаминазалар белсенділігінің оқшауланған және транзиторлы жоғарылауы клиникалық көріністерсіз, әсіресе емдеудің бас кезінде жиі орын алатынын айта кеткен жөн. Бұл жағдайда зертханалық зерттеулердің толық жинағын (атап айтқанда, протромбиндік индексті анықтау) жүргізу қажет. Дозасын өзгерту қажет болуы мүмкін және, мәндердің өзгеруіне байланысты, бауыр функциясына қайта бақылау жүргізу керек болады.

Ауыр, кейде өліммен аяқталатын панкреатиттің өте сирек жағдайлары байқалған. Қауіп әсіресе кішкентай балалар үшін жоғары және жасы өсе келе төмендейді. Қауіп факторлары ретінде ауыр эпилепсия ұстамалары, неврологиялық тапшылық және, бірнеше препаратты қолдана отырып, құрысуға қарсы ем қарастырылуы мүмкін. Егер емделушіде панкреатиттің дамуымен бір мезгілде бауыр функциясының төмендеуі байқалса, өліммен аяқталу қаупі арта түседі.

Іш тұсының қатты ауыруын сезінген емделушілер, дәрігерге мүмкіндігінше тезірек қаралуы тиіс. Панкреатит бар болса, натрий вальпроатын қабылдауды тоқтатқан жөн.

3 жасқа дейінгі балаларға Депакин препаратын монотерапия ретінде ғана тағайындау қажет, мұндай кезде ем, препаратты қабылдаудың клиникалық пайдасы бұл жас тобындағы емделушілерде бауыр ауруларының немесе панкреатиттің даму қаупімен салыстырылмайынша, басталмауы тиіс.

Гепатоуыттылық қаупіне байланысты сақтық шарасы ретінде емделушілер салицил қышқылының туындыларын Депакин препаратымен бір мезгілде қабылдамауы тиіс.

Бүйрек функциясының бұзылулары бар емделушілерде қан сарысуындағы байланыспаған вальпрой қышқылының концентрациясы артуы мүмкін; бұл жағдайда дозаны азайтқан жөн.

Емделушіге хирургиялық операцияларды жүргізер алдында немесе кездейсоқ қан кету немесе гематомалар туындаса, емдеу басталғанға дейін қан талдауын жүргізу (тромбоциттер санын, қан кету уақытын және қанның ұю уақытын қоса, жалпы қан талдауы) қажет («Жағымсыз әсерлерін» қараңыз).

Мочевина цикліне қатысатын ферменттердің тапшылығына күдіктенгенде, вальпроаттың әсерінен гипераммониемияның даму қаупіне байланысты, емдеуді бастар алдында метаболизмдік функцияларға талдау жүргізу қажет.

Емделуші емдеудің басында салмақтың арту қаупі туралы хабардар болуы тиіс және бұл қауіпті төмендету үшін сәйкесінше шаралар қолданылуы керек («Жағымсыз әсерлерін» қараңыз).

Бала көтеретін жастағы әйелдер

Бала көтеретін жастағы әйелдерге Депакин Хроно препаратын қолдану туралы шешімді мұқият талдаудан өткізіп, егер бұл препаратты қабылдаудың пайдасы ұрықта туа біткен аномалиялардың даму қаупінен асып түсетін болса ғана қабылдау керек. Мұндай шешім Депакин Хроно препаратын алғаш тағайындар алдында, сондай-ақ препаратты бұрын қабылдаған әйел жүкті болуды жоспарлап жүрген жағдайда қабылдануы тиіс.

Суицидальді ойлар және мінез-құлық

Суицидальді ойлар мен мінез-құлық эпилепсияға қарсы дәрілерді бірнеше көрсетілім бойынша қабылдаған емделушілерде байқалған. Эпилепсияға қарсы препараттарды рандомизацияланған плацебо-бақыланатын зерттеулердің мета-талдауы да суицидтік ойлар мен мінез-құлықтың туындау қаупінің біраз артқанын көрсетті. Бұл әсерінің механизмі белгісіз.

Осылайша, емделушілерді суицидальді ойлар мен мінез-құлықтың болуына қатысты бақылауға алу және сәйкесінше ем тағайындау қажет. Емделушілер (және оларға күтім жасайтын адамдар), оларда суицидальді ойлар немесе мінез-құлық туындаса, дереу дәрігерге қаралу керектігі туралы хабардар болуы тиіс.

Жүктілік

Жүктілік кезінде гипоксиясы бар анасындағы тонико-клоникалық ұстамалар мен эпилепсиялық статус ана мен болашақ нәресте үшін аса жоғары өлім қаупін тудырады.

Препаратты жүктілік кезінде қабылдауға ұсыныс жасалмайды.

Вальпроатты қолданумен байланысты қауіп

Препараттың тератогендік әсері клиникаға дейінгі зерттеулерден көрінген.

Адамда: қолда бар мәліметтер елеусіз немесе елеулі даму ақауларының туындау жиілігінің, атап айтқанда, жүйке түтігі ақауларының, бассүйек-бет ақауларының, аяқ-қолдардың даму ақауларының, жүрек-қантамыр жүйесі ақауларының, сондай-ақ эпилепсиясы бар, вальпроатты қабылдаған аналардан туған балалар организмінің түрлі жүйелерінің қатысуымен болатын көптеген аномалиялардың, анасының кейбір басқа эпилепсияға қарсы препараттарды қабылдауынан кейін туындайтын даму ақауларының жиілігімен салыстырғанда анағұрлым жоғарылығы жөнінде болжам жасауға мүмкіндік береді.

Бұл мәліметтер эпилепсияға қарсы препараттармен, соның ішінде вальпроатпен политерапияны қолдану, тек вальпроатты қабылдаумен жүргізілетін монотерапияны қолдануға қарағанда тератогендік әсерінің жоғарырақ қаупін туғызады деп болжам жасауға мүмкіндік береді.

Кейбір мәліметтер бойынша, вальпроаттың құрсақішілік әсері мен дамудың тежелу қаупі арасында, әсіресе вербальді қабілеттіліктерге қатысты өзара байланыстылық бар. Дамудың тежелуі көбінесе даму ақауларымен және/немесе дисморфизм белгілерімен байланысты. Алайда анасының немесе әкесінің интеллект деңгейінің төмендігі, генетикалық, әлеуметтік және экологиялық факторлар, сондай-ақ жүктілік кезінде анасындағы ұстамалардың бақылануының жеткіліксіздігі сияқты қатар жүретін ықтимал факторлардың болуына байланысты, себеп-салдарлық байланысты анықтау қиынға соғады.

Ана құрсағында вальпроаттың әсеріне ұшыраған балаларда аутистикалық спектр бұзылыстары жөнінде де мәлімделді.

Жоғарыда келтірілген мәліметтерді ескере отырып

Бала көтеретін жастағы әйелдер вальпроатты қолданудың жүктілік кезіндегі қауіптері мен пайдасы туралы хабардар болуы тиіс.

Депакин Хроно препаратын алғаш тағайындар алдында, сондай-ақ егер Депакин Хрононы бұрыннан қабылдап жүрген әйел жүктілікті жоспарлап жүрсе, маманнан кеңес алуы қажет. Мұндайда дәрігерлер өз емделушілерімен репродуктивтік аспектілерді қатаң түрде талқылауы керек.

Егер әйел жүктілікті жоспарлап жүрсе, қолданылу көрсетілімдеріне қарамай-ақ, Депакин Хроно препаратымен емдеу қажеттілігіне қайта баға беру қажет. Препаратты биполярлық бұзылыстарды емдеу үшін қабылдағанда, Депакин Хроно препаратын алдын алу мақсатында қабылдауды тоқтату мүмкіндігін қарастыру қажет. Егер препараттың қандай-да бір қолданылуына қатысты қаупі мен пайдасына мұқият баға бергеннен кейін Депакин Хроно препаратын қабылдау жүктілік кезінде жалғастырыла беретін болса, Депакин Хрононы тиімді ең төмен дозада тәулік бойы бірнеше қабылдауға бөліп қабылдау ұсынылады. Белсенді затының ұзақ босап шығу формуласын пайдалану емдеудің кез келген басқа түрлері үшін дұрысырақ болуы мүмкін.

Бұдан өзге, қажет болған жағдайда жүктілікке дейін-ақ фолий қышқылын сәйкесінше дозаларда қабылдауды (мысалы, күніне 5 мг) бастауға ұсыныс жасалады, бұл жүйке түтігі ақауларының даму қаупін төмендетуі мүмкін.

Жүктілік кезінде вальпроатпен емдеуді пайдасы мен қаупінің арақатынасына қайта баға берусіз тоқтатуға болмайды.

Жүйке түтігі ақауларының немесе басқа даму ақауларының туындау мүмкіндігін анықтау мақсатында арнайы пренатальді мониторинг жүргізу ұсынылады.

Жаңа туған нәрестелердегі қаупі

Геморрагиялық синдромның ерекше жағдайлары жүктілік кезінде аналары натрий вальпроатын /вальпрой қышқылын қабылдаған жаңа туған нәрестелерде тіркелген. Геморрагиялық синдромның бұл жағдайлары гипофибриногенемиямен байланысты. Сондай-ақ афибриногенемия жағдайлары байқалған, олар кейде өліммен аяқталған. Алайда бұл синдромды фенобарбиталдың және ферменттер индукторларының әсерінен туындайтын К витаминіне тәуелді факторлар деңгейінің төмендеуінен ажырата білу қажет.

Сондықтан жаңа туған нәрестелерге тромбоциттер санына, қан плазмасындағы фибриноген деңгейіне зерттеулер жүргізу, сондай-ақ коагуляция және қанның ұю факторларына тестілер жүргізу қажет.

Лактация

Натрий вальпроатының емшек сүтіне бөлінуі сарысудағы концентрациясының 1-10%-ға жуығын құрайды. Препарат жаңа туған нәрестелерде фармакологиялық әсерлер беруі мүмкін. Бала емізуді тоқтатқан жөн.

Дәрілік заттың көлік құралын және қауіпті механизмдерді басқару қабілетіне ықпал ету ерекшеліктері

Депакин Хроно мүмкін болатын жағымсыз әсерлеріне байланысты, автомобильді басқару және механизмдермен жұмыс жасау қабілетіне ықпалын тигізеді.

Емделушілерге, әсіресе егер олар құрысуға қарсы препараттардың бірнешеуін немесе бензодиазепиндер тобының препараттарын қабылдап жүрсе («Дәрілермен өзара әрекеттесуін» қараңыз), ұйқышылдықтың туындау қаупі туралы да ескертілуі тиіс.

Артық дозалануы

Симптомдары: жедел ауқымды артық дозалану белгілеріне әдетте жеңіл немесе терең кома, бұлшықеттер гипотониясы, гипорефлексия, миоз, тыныс алу функциясының бұзылуы және метаболикалық ацидоз жатады.

Ауқымды артық дозалануы өліммен аяқталуы мүмкін, алайда, әдетте артық дозалануы кезіндегі болжам жағымды болып табылады.

Дегенмен, симптомдары ауытқып тұруы мүмкін, ал вальпроаттың плазмадағы концентрациясы өте жоғары болғанда құрысулар тіркелген.

Ми ісінуімен байланысты бассүйекішілік гипертензия жағдайлары сипатталған.

Емі: артық дозалануы кезінде стационарлық көмекке препаратты қабылдағаннан кейін 10-12 сағат ішінде тиімді болатын асқазанды шаю, сондай-ақ жүрек-қантамыр және тыныс алу жүйесінің жағдайын қадағалау қамтылуы тиіс.

Жекелеген жағдайларда Налоксон ойдағыдай қолданылған. Ауқымды артық дозаланған жағдайларда гемодиализ бен гемоперфузия да ойдағыдай қолданылған.

Шығарылу түрі және қаптамасы

Полиэтилен тығыны мен құрғатқышы бар полипропилен контейнерде 50 таблеткадан. 2 контейнерден медицинада қолданылуы жөнінде мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Құрғақ жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды

Дәріханалардан босатылу шарттары

Рецепт арқылы

Өндіруші

Санофи Винтроп Индустрия, Франция

Орналасқан мекенжайы: 1, Rue De La Vierge, Ambares Et Lagrave, 33565 Carbon Blanc Cedex, Франция

Қаптаушы

Нобел Алматы Фармацевтикалық Фабрикасы АҚ, Қазақстан Республикасы

Тапсырыс беруші

«Санофи-авентис Қазақстан» ЖШС, 050016 Қазақстан Республикасы, Алматы қ-сы, Қонаев к-сі 21Б

Тіркеу куәлігінің иесі

Санофи-авентис СА, Швейцария

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

«Санофи-авентис Қазақстан» ЖШС

Қазақстан Республикасы, 050016, Алматы, Қонаев к-сі, 21б

телефон: +7 (727) 244-50-96

факс: +7 (727) 258-25-96

e-mail: quality.info@sanofi.com

Прикрепленные файлы

351512061477976524_ru.doc 150.5 кб
608417171477977682_kz.doc 178.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники