Дезаминоокситоцин (Demoxytocin)

• русский
• қазақша

• Скачать инструкцию медикамента

Саудалық атауы

Дезаминоокситоцин

Халықаралық патенттелмеген атауы

Демокситоцин

Дәрілік түрі

50 ХБ таблеткалар

Құрамы

Бір таблетканың құрамында

белсенді зат – 50 ХБ дезаминоокситоцин,

қосымша заттар: сахароза, лактоза моногидраты, метилцеллюлоза, кальций стеараты, картоп крахмалы

Сипаттамасы

Дөңгелек, жалпақ цилиндр тәрізді, бір жағында ойығы мен сызығы бар ақ түсті таблеткалар

Фармакотерапиялық тобы

Жүйелі пайдалануға арналған гормоналдық препараттар.

Гипоталямдық-гипофизарлық гормондар және оның аналогтары.

Гипофиздің артқы бөлігінің гормондары. Окситоцин және оның аналогтары.

AТЖ коды Н01ВВ01

Фармакологиялық қасиеттері

Фармакокинетикасы

Дезаминоокситоцин ауыз қуысының шырышты қабығы арқылы жүйелі қан ағымына жылдам сіңіріледі.

Дезаминоокситоцин сілекей ферменттерімен бұзылысқа ұшырамайды. Препарат окситоцинді бұзатын окситоциназаларға төзімді. Препараттың осы қасиеттерінің бәрі оны трансбуккальді қолдануға мүмкіндік береді.

Препаратты босануды қоздыру немесе көтермелеу мақсатында трансбуккальді қолданғанда физиологиялыққа жақын толғақ препарат дозасына және босанушы әйелдің жатырының жекелей сезімталдығына қарай, орташа алғанда, 20‑60 минут өткенде пайда болады. Препаратты қолданғаннан кейін босанудың орташа ұзақтығы: алғашқы босанушыларда – 15 сағат, қайталап босанушыларда – 7,5 сағат, орташа алғанда – 6-6,5 сағат.

Дезаминоокситоциннің жартылай шығарылу кезеңі 3-5 минут құрайды. Препарат бауырда метаболизденеді, бүйрекпен шығарылады.

Фармакодинамикасы

Дезаминоокситоцин гипофиздің артқы бөлігінің гормоны - окситоциннің синтетикалық аналогы болып табылады. Құрылымы жағынан ол табиғи гормоннан молекуланың N ұштық бөлігінде α‑амин тобының болмауымен ерекшеленеді. Дезаминоокситоцин өзінің фармакологиялық қасиеттері жағынан окситоцинге жақын, сондай-ақ ол жатырдың тегіс бұлшықеттерінің және сүт безінің миоэпителийлік жасушаларының жиырылуын көтермелейді. Сондықтан препарат окситоцинге ұқсас әсер ету механизмін иеленген. Дезаминоокситоциннің ықпал етуімен кальций және натрий иондарына тән жасушалардың өткізгіштігі күшейеді. Осының нәтижесінде кальций иондарының тегіс бұлшықеттік жасушалар ішіне түсуінің артуы байқалады. Жасушаішілік кальций жатырдың тегіс бұлшықеттерінің және миоэпителийлік жасушалардың механикалық белсенділігін реттейді. Миоплазмада кальций, көрініп тұрғандай, тропониннің реттегіш ақуызымен байланысады және жиырылуды туындатады.

Утеротоникалық белсенділігі бойынша дезаминоокситоцин окситоциннен 1,5 есе асып түседі, жатырдың жиырылу қабілеті дозаға тікелей тәуелділікте болып табылады.

Препарат, альвеолалар мен сүт ағындары қоршап тұрған миоэпителийлік жасушалардың жиырылуын туындатып, сүттің ірі ағымдарға түсуін және емізік арқылы бөлінуін шарттайды. N ұштық α-амин тобының болмауымен шартталған ферментативтік белсенділіктің жойылуына жоғары төзімділігінің арқасында дезаминоокситоцин, окситоцинмен салыстырғанда, мейлінше күшті және ұзақ лактогендік әсер иеленеді, окситоцинге қарағанда, дезаминоокситоциннің лактогендік әсері жылдам (бірнеше минут ішінде) басталады.

Босанудан кейінгі кезеңде препарат жатырдың инволюциясын жылдамдатады және босанудан кейінгі қан кетулердің тоқтауына ықпал етеді.

Дезаминоокситоцин лактация үдерісін қалыптандырады, босанудан кейінгі 3-5-ші күндері басталатын сүт бездерінің патологиялық тұрпайылануын жояды, сүт бездерінің лактогендік және сүт шығару қызметін көтермелейді, маститтің дамуының алдын алады.

Дезаминоокситоцин вазопрессорлық және диуретикке қарсы әсерден іс жүзінде айрылған, бұл оны артериялық қысымы жоғары, жүктілердің кешеуілдеген токсикозы мен бүйрек қызметінің бұзылулары бар әйелдерде қолдануға мүмкіндік береді.

Қолданылуы

- босанған кездегі күшенудің алғашқы және салдарлы әлсіздігінде босану әрекетін көтермелеуде

- босанудан кейінгі кезеңдегі жатырдың субинволюциясында және лактацияны көтермелеуде

Қолдану тәсілі мен дозалары

Препаратты трансбуккальді қолданады: таблетканы ұртқа салып, шайнамастан және жұтпастан, ол толық еріп кеткенше ауызда ұстайды.

Босану әрекетін қоздыру және босануды көтермелеу үшін әр 30 минут сайын 50 ХБ (1 таблеткадан) тағайындайды.

Ұдайы және күшті толғақты келтіргеннен кейін препараттың дозасын екі есеге азайтады (0,5 таблетка) немесе босану әрекетін демеу үшін 1 сағаттық аралықпен береді.

Босануды қоздыруға және көтермелеуге арналған ең жоғарғы доза 500 ХБ, сирек жағдайларда 900 ХБ құрайды.

Жатырдың субинволюциясында күніне 5 рет 25-50 ХБ (0,5-1 таблеткадан) тағайындайды.

Лактацияны көтермелеу үшін босанудан кейінгі кезеңнің 2-6 күндері аралығында сәбиді күніне 2-ден 4 ретке дейін емізгенше 5 минут бұрын 25-50 ХБ (0,5-1 таблеткадан) тағайындайды.

Жағымсыз әсерлері

- препараттың жоғары дозаларын тағайындағанда ұрықта – гипоксия, асфиксия, брадикардия, амниотикалық сұйықтықтың мекониймен боялуы

- жатырдың тетаникалық жиырылуына немесе жыртылуына дейін апаратын жатырдың гипертонусы, үйлесімі бұзылған босану әрекеті, плацентаның мерзімінен бұрын ажырауы, жүрек ырғағының бұзылуы

- сирек жағдайларда – жүрек айнуы, құсу, гиперсаливация, артериялық қысымның көтерілуі, тахикардия, аритмиялар, фатальді афибриногенемия, жоғары сезімталдық реакциялары, анафилактикалық шок

Қолдануға болмайтын жағдайлар

- препаратқа немесе оның құрамдас бөліктеріне жоғары сезімталдық

- ұрық маңындағы сумен эмболия

- II –III дәрежелі созылмалы жүрек жеткіліксіздігі, артериялық гипертензия

- преэклампсиялық токсемия

- жамбас пен ұрық өлшемдерінің сәйкессіздігі

- клиникалық тар жамбас

- жатырдың салдарлы әлсіздігі

- ұрықтың орналасу аномалиялары

- жатырдың созылуы (көпұрықты жүктілік, көпсулылық)

- жатырдың жыртылуымен қауіпті жатырдың гипертонусы

- жасалған операциялардан кейін жатырда тыртықтың болуы (кесарь тілігін қоса)

- ұрықтың құрсақішілік гипоксиясы

- плацентаның мерзімінен бұрын ажырауы

- плацентаның немесе кіндіктің алдынан жатуы

- нефропатия

Дәрілермен өзара әрекеттесуі

β-адреномиметиктер (симпатомиметиктер) дезаминоокситоциннің тиімділігін төмендетеді.

Дезаминоокситоцинді қолданған кезде жатырдың жиырылуын көтермелейтін басқа дәрілерді тағайындаудың қажеті жоқ.

Айрықша нұсқаулар

Жасы 35-тен асқан әйелдерде сақтықпен қолдану керек.

Босануды дәрі-дәрмекпен қоздыру тек қатаң медициналық көрсетілімдер бойынша аурухана жағдайында медициналық қызметкерлер құрамының бақылауымен жүргізіледі.

Ұрықтың жүректік жиырылу жиілігінің, сондай-ақ жатырдың жиырылу жиілігінің тиянақты мониторингі дезаминоокситоцин дозасын босанушының жеке реакциясына қарай іріктелуіне мүмкіндік жасау үшін қажет.

Артериялық қысымды қадағалау қажет. Жатырдың асқын белсенділігі немесе ұрықтың тіршілік қызметінің бұзылыстары жағдайында таблеткаларды қабылдауды тоқтата тұрады.

Жүрек-қан тамырлары жүйесінің аурулары бар әйелдердегі босануды қоздыру кезінде ерекше сақтық шараларын қадағалау керек.

Дезаминоокситоциннің бір таблеткасының құрамында 233,12 мг сахароза мен 132,24 мг лактоза бар. Оны туа біткен галактозаны көтере алмаушылығы, Лапп лактазасының тапшылығы және глюкоза/галактоза мальабсорбциясы синдромы бар науқастарға немесе сахароза-изомальтаза тапшылығында, галактоземияда қолдану ұсынылмайды.

Жүктілік және лактация

Босану әрекетін қоздыруды босанушы мен ұрық үшін асқынулардың пайда болу қатері ұлғайып кететіндіктен тек қатаң көрсетілімдер бойынша жүргізу керек.

Дезаминоокситоцин лактацияны көтермелеу үшін көрсетілген. Дезаминоокситоциннің ана сүтімен аздаған мөлшерде бөлініп шығатынын жоққа шығаруға болмайды. Дегенмен, оның жартылай шығарылу кезеңі 3-5 минут құрап, препарат сәбидің асқазан-ішек жолының ферменттерімен ыдырап кететіндіктен, оның жаңа туған нәрестеге жағымсыз әсер ету ықтималдығы аз.

Дәрілік заттың көлік құралдарын және қауіптілігі зор механизмдерді басқару қабілетіне әсер ету ерекшеліктері

Препарат клиникалық жағдайларда ғана қолданылады, сондықтан оны көлік құралдарының жүргізушілеріне және потенциалды қауіпті механизмдер жүргізушілеріне тағайындамайды.

Артық дозалануы

Қазіргі уақытқа дейін дезаминоокситоцин таблеткаларын қолдану кезінде улану жағдайлары жөнінде хабарланған жоқ. Препарат, пептидтік сипатына орай, асқазан-ішек жолында белсенділігін жылдам жоғалтады.

Шығарылу түрі мен қаптамасы

10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамада.

1 пішінді ұяшықты қаптамадан қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Құрғақ, жарықтан қорғалған жерде, 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін қолдануға болмайды!

Дәріханалардан босатылу шарттары

Рецепт арқылы

Өндіруші

«Гриндекс» АҚ, Крустпилс к-сі, 53, Рига, LV-1057, Латвия

Тіркеу куәлігінің иесі

«Гриндекс» АҚ, Латвия

 

Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы:

«Гриндекс» АҚ өкілдігі

Алматы қ., Достық д-лы, 63-65/13, Шевченко к-нің бұрышы

т./ф: 291-88-77, 291-13-84

электрондық пошта: grindeks.asia.kz@mail.ru