Гроприносин®

МНН: Инозин пранобекс
Производитель: Гедеон Рихтер Польша ООО
Анатомо-терапевтическо-химическая классификация: Inosine pranobex
Номер регистрации в РК: № РК-ЛС-5№017934

Инструкция

Саудалық атауы

Гроприносин®

Халықаралық патенттелмеген атауы

Жоқ

Дәрілік түрі

Таблеткалар, 500 мг

Құрамы

Бір таблетканың құрамында

белсенді зат - 500 мг инозин пранобекс,

қосымша заттар: картоп крахмалы, повидон К-25, магний стеараты.

Сипаттамасы

Ақ түстен крем түске дейін болатын, екі жақ беті дөңес сопақша пішінді, бір жақ бетінде бөлетін сызығы бар, ұзындығы 17 мм және ені 7 мм таблеткалар.

Фармакотерапиялық тобы

Вирусқа қарсы тікелей әсер ететін препараттар. Вирусқа қарсы басқа да препараттар. Инозин Пранобекс

ATХ коды J05AX05

Фармакологиялық қасиеттері

Фармакокинетикасы

Сіңуі: инозин пранобекс ішке қабылдағанда асқазан-ішек жолынан жылдам және толық сіңеді, препарат биожетімділігі шамамен 90% құрайды.

Таралуы: ішке қабылдағаннан кейін плазмада инозин ең жоғары концентрацияға 1 сағаттан соң жетеді, фармакологиялық әсері шамамен 30 минуттан соң білінеді және 6 сағатқа дейін сақталады.

Биотрансформациясы және элиминациясы: Инозин пуринді нуклеозидтерге тән цикл бойынша метаболизденіп, несеп қышқылын түзеді, басқа компоненттері бүйректер арқылы глюкурон және тотықтырылған туындылар түрінде, сондай-ақ өзгермеген күйінде шығарылады. Организмде жиналып қалғаны байқалған жоқ. Препараттың және оның метаболиттерінің шығарылуы 48 сағаттан кейін басталады.

Фармакодинамикасы

Гроприносин® препаратының белсенді заты – инозин пранобексі, вирусқа қарсы тікелей әсер етеді және иммуномодуляциялаушы әсер береді. Вирусқа қарсы тікелей әсері вируспен зақымданған жасуша рибосомдарымен байланысуымен жүзеге асады, ол вирус және РНҚ синтезін баяулатады (транскрипцияның және трансляцияның бұзылуы) және РНҚ мен ДНҚ-геномдық вирустардың репликациясын басады; жанама әсері интерферон түзілуінің индукциясымен түсіндіріледі.

Иммуномодуляциялаушы әсері Т-лимфоциттерге ықпалымен (цитокиндер синтезінің белсенділенуі) және макрофагтардың фагоцитарлы белсенділігінің жоғарылауымен жүзеге асырылады. Препараттың ықпал етуімен пре-Т-лимфоциттердің саралануы күшейеді, митогендермен индукцияланған Т- және В-лимфоциттердің пролиферациясы стимуляцияланады, Т-лимфоциттердің қызмет ету белсенділігі, соның ішінде олардың лимфокиндер синтезіне қабілеті жоғарылайды, Т-хелперлер мен Т-супрессорлар субпопуляциялары арасындағы қарым- қатынас қалыпқа келеді. Гроприносин® 2-интерлейкиннің лимфоциттермен өндірілуін едәуір күшейтеді және лимфоидты жасушалардағы осы интерлейкин үшін рецепторларының экспрессиясына ықпал етеді. Дені сау адамдарда табиғи киллерлердің (NK-жасуша) белсенділігін стимуляциялайды, макрофагтардың фагоцитозға, процессингке белсенділігін және антигеннің презентациясын стимуляциялайды, ол емнің алғашқы күнінен-ақ организмде антиденені өндіретін жасушалардың артуына мүмкіндік береді. Сондай-ақ 1-интерлейкин синтезін, микробицидтілікті, жарғақша рецепторларының экспрессиясын және лимфокиндер мен  хемотаксис факторларына әрекет ету қабілетін жақсартады. Герпес инфекцияларында герпеске қарсы ерекше антиденелердің өндірілуі жеделдейді, клиникалық біліністер және аурудың қайталану жиілігі азаяды.

Қолданылуы

- иммунитеті әлсіреген және жоғарғы тыныс жолдарының қайталанатын

инфекциялары бар адамдарды емдеудің қосымша әдісінде.

Қолдану тәсілі және дозалары

Тек ішке қабылдауға арналған. Таблетка қабылдауды жеңілдету үшін ұсатып, судың аздаған мөлшерінде ерітуге болады.

Дозасы пациенттің дене салмағына және аурудың ауырлығына байланысты анықталады. Тәуліктік доза күніне бірнеше рет қабылдау үшін бірдей бөліктерге бөлінуі тиіс. Емдеу ұзақтығы, әдетте 5-14 күн болады. Симптомдар айқындығы азайғаннан кейін 1-2 күн бойы препарат қабылдауды тағы да жалғастыру керек.

Ересек пациенттерде, оның ішінде егде жастағы адамдарда ұсынылатын тәуліктік доза кг дене салмағына 50 мг құрайды, яғни 6-дан 8 таблеткаға дейін немесе 2 таблеткадан тәулігіне 3-4 рет.

Ең жоғары доза тәулігіне 4 г құрайды.

6 жастан асқан балаларда бірнеше қабылдауға тағайындалатын тәуліктік доза кг дене салмағына 50 мг құрайды.

Жағымсыз әсерлері

Жиі (≥1/100 <1/10 дейін)

- жүйке жүйесі тарапынан бұзылулар: бас ауыруы, бас айналу, қажу, әлсіздік

- ас қорыту жүйесі тарапынан бұзылулар: тәбеттің төмендеуі, жүрек айну, құсу, эпигастральді аймақтың ауыруы- тері және тері асты шелі тарапынан бұзылулар: қышыну, бөртпе

- тірек-қимыл аппараты мен дәнекер тіндер тарапынан бұзылулар: артралгия- гепатобилиарлық жүйе тарапынан бұзылулар: трансаминазалар, сілтілі фосфатаза белсенділігінің артуы немесе қан мочевина азоты (ҚМА) мөлшерінің артуы

Жиі емес (≥1/1 000 <1/100 дейін)

- жүйке жүйесі тарапынан бұзылулар: күйгелектік, ұйқышылдық немесе ұйқысыздық

- ас қорыту жүйесі тарапынан бұзылулар: диарея, іш қату

- бүйрек және несеп шығару жолдарының бұзылулары: полиурия (шығарылатын несеп көлемінің ұлғаюы)

- аллергиялық реакциялар: теңбілді-папулезді бөртпе, есекжем, ангионевроздық ісіну

Қолдануға болмайтын жағдайлар

- препараттың кез келген компонентіне аса жоғары сезімталдық

- подагра, сондай-ақ қанында және несебінде несеп қышқылының концентрациясы ұлғайған пациенттер

- несептас ауруы

- жүктілік және лактация кезеңі (қолдану тәжірибесінің жоқ болуына байланысты)

- 6 жасқа дейінгі балаларға.

Дәрілермен өзара әрекеттесуі

Гроприносин® бір мезгілде ксантиноксидаза тежегіштерін (мысалы, аллопуринол), несеп қышқылының несеппен бөлінуін ұлғайтатын препараттар, оның ішінде, тиазидтік де (мысалы, гидрохлоротиазид, хлорталидон, индапамид), әрі ілмектік те (фуросемид, торасемид, этакрин қышқылы) диуретиктерді қабылдайтын пациенттерде сақтықпен қолданған жөн.

Иммуносупрессорлармен ем кезінде және оны тоқтатқаннан кейін бірден Гроприносин® қолданбаған жөн, өйткені оларды бір мезгілде қолдану оның фармакокинетикасын өзгерту арқылы Гроприносин® препаратының емдік әсеріне ықпал етуі мүмкін.

Гроприносин® препараты мен азидотимидинді бір мезгілде қолдану кезінде азидотимидин әсерінің күшеюі есебінен, мысалы, азидотимидин биожетімділігінің жоғарылауы моноциттерде жасушаішілік фосфорланудың ұлғаюы салдарынан нуклеотидтердің түзілуі артады.

Айрықша нұсқаулар

Гроприносин® қан сарысуы мен несепте, әдетте қалыпты диапазон шегінде (0,18-0,42 ммоль/л), әсіресе ер адамдар мен екі жыныстағы егде адамдарда несеп қышқылы концентрациясының уақытша жоғарылауын туындатуы мүмкін. Несеп қышқылы концентрациясының жоғарылауы инозиннің оның түзілуіне қатысуына негізделген, бірақ ферменттің негізгі функциясы немесе бүйрек клиренсі өзгеруімен байланысты емес. Сондықтан Гроприносин® препаратын бүйрек функцияның бұзылуы бар науқастарда сақтықпен қолданған жөн. Бұл пациенттерде емдеу кезінде несеп қышқылы деңгейін мұқият бақылау керек.

Гроприносин® препаратымен (3 ай және одан ұзақ) ұзақ емдеген кезде әр пациенттің қан сарысуы мен несептегі несеп қышқылы концентрациясын, жалпы қан көрсеткіштерін, бауыр мен бүйрек функциясын (трансаминазалар белсенділігін, креатинин деңгейін) ұдайы бақылап отыру қажет.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Көлікті немесе басқа да механизмдерді басқарған кезде препараттың реакция шапшаңдығына ықпалы зерттелген жоқ. Инозин пранобекс фармакодинамикасын ескере отырып, осы дәрілік препараттың автомобиль және механизмдерді пайдалану қабілетіне әсер ету ықтималдығы аз.

Артық дозалануы

Гроприносин® артық дозалануының бірде-бір жағдайы тіркелген жоқ. Симптомдары: артық дозаланған жағдайда қан сарысуында және несепте несеп қышқылы концентрациясының жоғарылағаны байқалады.

Емі: асқазанды шаю, симптоматикалық ем.

Шығарылу түрі және қаптамасы

10 таблеткадан ПВХ/ПЭ/ПВДХ үлбірден және алюминий фольгадан жасалған пішінді ұяшықты қаптамаға салынады.

2 немесе 5 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

25 °C-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецептісіз

Өндіруші ұйымның атауы мен елі

«Гедеон Рихтер Польша» ЖШҚ, Польша

Тіркеу куәлігі иесінің атауы мен елі

«Гедеон Рихтер» ААҚ, Венгрия

Қаптаушы ұйымның атуы мен елі

«Гедеон Рихтер Польша» ЖШҚ, Польша

Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы:

«Гедеон Рихтер» ААҚ ҚР өкілдігі

E-mail: info@ richter.kz

Телефон: 8-(7272)-58-26-22, 8-(7272)-58-26-23

 

Прикрепленные файлы

614034891477976226_ru.doc 69 кб
477424101477977474_kz.doc 63 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники