Глюкоза 200 мл (10%)

• русский
• қазақша

• Скачать инструкцию медикамента

Саудалық атауы

Глюкоза

Халықаралық патенттелмеген атауы

Жоқ

Дәрілік түрі

Инфузияға арналған 5%, 10% 200 мл, 400 м ерітінді

Құрамы

1 л ерітіндінің құрамында

Осмолялділігі

266-дан 326 мОсм/кг дейін (5% концентрация үшін)

541-дан 662 мОсм/кг дейін (10% концентрация үшін)

Сипаттамасы

Мөлдір түссіз сұйықтық

Фармакотерапиялық тобы

Плазманың орнын алмастыратын және перфузиялық ерітінділер.

Парентеральді түрде қоректендіруге арналған ерітінділер. Көмірсулар.

АТХ коды В05ВА03

Фармакологиялық қасиеттері

Фармакокинетикасы

Организмге толық сіңеді, бүйректер арқылы шығарылмайды (несепте пайда болуы патологиялық белгі болып табылады)

Фармакодинамикасы

Глюкоза организмде тотығу-тотықсыздану үдерістерін күшейтеді, бауырдың уыттануға қарсы қызметін жақсартады, организмнің энергетикалық шығындарының бір бөлігін жабады. Глюкоза ерітіндісін енгізу су тапшылығының орнын толтырады. Тіндерге түсе отырып, фосфорланып, глюкозо-6-фосфатқа айналады, ол организмде зат алмасудың көптеген тізбектеріне белсенді түрде қамтылады.

Изотониялық 5% глюкоза ерітіндісі уытсыздандырғыш, метаболитикалық әсер береді, айналымдағы қан көлемін қалпына келтіреді, жеңіл қорытылатын қоректік заттардың көзі болып табылады. Тіндерде глюкоза метаболизденген кезде организмнің тіршілігі үшін қажетті қуаттың едәуір мөлшері бөлініп шығады.

Гипертониялық 10% глюкоза ерітіндісі қанның осмостық қысымын арттырады, зат алмасуды жақсартады, миокардтың жиырылғыштығын арттырады; бауырдың уыттануға қарсы қызметін жақсартады, қантамырларын кеңейтеді, диурезді ұлғайтады.

Қолданылуы

- гипогликемияда, тамақта көмірсу жеткіліксіз болғанда

- бауыр ауруларында уытты жұқпаларда, уыттануда (гепатит, дистрофия және бауыр атрофиясы, соның ішінде бауыр қызметінің жеткіліксіздігі)

- геморрагиялық диатезде

- дегидратацияда (құсу, диарея, операциядан кейінгі кезең)

- коллапста, шокта

- көктамыр ішіне енгізуге арналған дәрілік заттардың ерітінділерін дайындау үшін

Қолдану тәсілі және дозалары

Глюкозаның изотониялық (5 %) ерітіндісін көктамыр ішіне (тамшылатып) минутына 150 тамшыға дейін енгізеді, ең жоғары тәуліктік дозасы – 2000 мл.

Гипертониялық ерітіндіні (10%) көктамыр ішіне минутына 60 тамшыға дейін енгізеді; ең жоғары тәуліктік дозасы ересектер үшін – 1000 мл.

Көктамыр ішіне сорғалатып – 10-50 мл 5 % және 10 % ерітінді.

Зат алмасу қалыпты болатын ересектерде енгізілетін глюкозаның тәуліктік дозасы тәулігіне дене салмағының әр кг-на шаққанда 4-6 г-нан аспауы тиіс, яғни тәулігіне 250-450 г-ға жуықты құрайды (зат алмасу қарқындылығы төмендегенде тәуліктік дозаны 200-300 г-ға дейін азайтады), мұндайда енгізілетін сұйықтықтың көлемі – тәулігіне дене салмағының әр кг-на шаққанда 30-40 мл.

Парентеральді түрде тамақтандыру үшін балаларға, майлармен және амин қышқылдарымен қатар, алғашқы күні тәулігіне дене салмағының әр кг-на шаққанда 6 г, кейін 15 г-ға дейін глюкоза енгізеді. Глюкозаның 5% және 10% ерітінділерін енгізген кезде дозаны есептеу үшін енгізілетін сұйықтық көлеміне көңіл бөлу керек: дене салмағы 2-10 кг үшін – тәулігіне 100-165 мл/кг, дене салмағы 10-40 кг балалар үшін – тәулігіне 45-100 мл/кг.

Енгізу жылдамдығы: зат алмасудың қалыпты жағдайында енгізудің ең жоғары жылдамдығы ересектерде – сағатына 0,25-0,5 г/кг (зат алмасу қарқындылығы төмендеген кезде енгізу жылдамдығын сағатына 0,125-0,25 г/кг дейін төмендетеді). Балаларда енгізу жылдамдығы тәулігіне дене салмағының әр кг-на шаққанда 0,5 г-нан аспауы тиіс; ол 5% ерітінді үшін минутына 10 мл-ге жуықты – минутына 200 тамшыны құрайды (20 тамшы = 1 мл).

Организм күрт сусызданған жағдайда 3-5 л глюкозаның изотониялық ерітіндісі енгізілуі мүмкін.

Диабеті бар науқастарға глюкозаны оның қандағы және несептегі мөлшеріне бақылау жасай отырып, енгізеді.

Жағымсыз әсерлері

- гипергликемия, иондық теңгерімнің бұзылуы

- қызба

- гиперволемия, сол жақ қарынша қызметінің жедел жеткіліксіздігі

- енгізу жылдамдығын арттырған кезде – суды, электролиттерді жоғалтатын және гиперосмостық кома пайда болатын осмостық диурез

- енгізілген жерде – жұқпаның пайда болуы, тромбофлебит

- ұйқы безінің инсулярлы аппаратының әлсіреуі

Қолдануға бомлайтын жағдайлар

- асқын сезімталдық

- гипергликемия

- гиперлактацидемия

- гипергидратация

- глюкозаны қайта өңдеудің операциядан кейінгі бұзылулары

- мидың ісінуі

- өкпенің ісінуі

- сол жақ қарынша қызметінің жедел жеткіліксіздігі

- гиперосмолярлы кома

Сақтықпен

- жүрек қызметінің декомпенсацияланған созылмалы жеткіліксіздігі

- қандағы қант деңгейі бақылануда болатын қант диабеті

- бүйрек қызметінің созылмалы жеткіліксіздігі (олиго-, анурия)

- гипонатриемия

Дәрілермен өзара әрекеттесуі

Глюкоза ерітінділерін алкалоидтармен (олар ыдырайды), жалпы анестетиктермен араластырмаған жөн (белсенділігі төмендейді). Глюкоза жансыздандыратын, адреномиметикалық дәрілердің әсерін бәсеңдетеді.

Басқа дәрілік заттармен біріктірген кезде үйлесімділігін көзбен бақылап көру қажет (көзге көрінбейтін химиялық немесе емдік үйлесімсіздік болуы мүмкін).

Глюкоза аминофилинмен, еритін барбитураттармен, гидрокортизонмен, канамицинмен, еритін сульфаниламидтермен, цианокобаламинмен ерітінділерде үйлеспейді.

Глюкоза барынша күшті тотықтырғыш болып табылатындықтан, оны бір еккіште гексаметилентетраминмен бірге енгізбеген жөн. Гемотрансфузия алдында немесе одан кейін жалған агглютинация пайда болуы мүмкін екендігіне байланысты, бір жүйеде бір мезгілде қолдануға болмайды.

Тиазидтік диуретиктермен және фуросемидпен бір мезгілде қолданған кезде олардың қан сарысуындағы глюкоза деңгейіне ықпал ету қабілетін ескерген жөн.

Инсулин глюкозаның шеткергі тіндерге түсуіне мүмкіндік береді.

Глюкоза ерітінділері пиразинамидтің бауырға уытты әсерін төмендетеді. Глюкоза ерітіндісінің үлкен көлемін енгізу гипокалиемияның пайда болуына мүмкіндік береді, ол бір мезгілде қабылданған оймақгүл препараттарының уыттылығын арттырады.

Глюкоза ерітіндісі келесі біріктірулермен үйлеспейді:

- бевацизумаб

- бенфотиамин + пиридоксин

- кладрибин – кладрибиннің дегидратациясын күшейтеді

- пиридоксин + тиамин + цианокобаламин + [лидокаин]

- тиокт қышқылы

Темір (III) ерітіндісі – декстран гидроксидін 5% декстроза ерітіндісімен араластыруға болады.

Линезолид инфузияға арналған ерітінді түрінде 5% декстроза ерітіндісімен үйлеседі.

Айрықша нұсқаулар

Глюкозаның барынша толық және өте тез сіңуі үшін 4-5 г глюкозаға қысқа әсер ететін 4-5 ӘБ инсулинді тері астына енгізуге болады.

Глюкоза ерітіндісін енгізген кезде электролиттік теңгерімге, қандағы және несептегі глюкоза мөлшеріне бақылау жасау қажет.

Ерітіндіні көп рет енгізген кезде бауыр қызметінің жағдайы бұзылуы және ұйқы безінің инсулярлы аппаратының әлсіреуі мүмкін.

Диабеті бар науқастарға глюкозаны абайлап, қандағы және несептегі қант мөлшерін бақылай отырып, енгізеді.

Осмолярлығын арттыру үшін 5% глюкоза ерітіндісін 0,9 % натрий хлориді ерітіндісімен біріктіруге болады.

Жүктілік және лактация кезеңі

Препарат жүктілік және лактация кезеңінде ана үшін пайдасы ұрық үшін қаупінен басым болған жағдайда ғана қолданылуы мүмкін (талапқа сай және қатаң бақыланатын зерттеулер жүргізілген жоқ).

Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері

Препарат көлікті басқару және қауіпті механизмдермен жұмыс жасау қабілетіне ықпалын тигізбейді.

Артық дозалануы

Симптомдары: гипергликемия, глюкозурия, гипергликемиялық гиперосмолярлық кома, асқын гидратация, су-электролиттік теңгерімнің бұзылуы, липонеогенездің күшейіп, көмір қышқыл газдың ұлғаюы, бұл минуттық тыныс алу көлемінің күрт артуы және мұның салдары ретінде тыныс алудың жиілеуі; бауырдың майлы инфильтрациясы.

Емдеу: глюкозаны енгізуді тоқтату керек, қысқа әсер ететін инсулин енгізу, симптоматикалық ем.

Шығарылу түрі және қаптамасы

Инфузияға арналған 5%, 10% ерітінді.

Резеңке тығынмен тығындалған және алюминий қалпақшалармен көмкерілген, қанға, трансфузиялық және инфузиялық препараттарға арналған, сыйымдылығы 250 мл және 450 мл шыны бөтелкелерде препарат, тиісінше, 200 мл-ден және 400 мл-ден.

Әрбір бөтелкеге заттаңбалық немесе жазу қағазынан жасалған немесе өздігінен желімденетін заттаңба жапсырылған.

Төсеніші және торлары бар гофрирленген картон жәшікке 200 мл-лік 24, 28 бөтелке немесе 400 мл-лік 12, 15 бөтелке қолданылуы жөнінде мемлекеттік және орыс тілдеріндегі нұсқаулықпен тең мөлшерде бірге салынған (стационарлар үшін).

Сақтау шарттары

5°С-ден 30°С-ге дейінгі температурада сақтау керек.

Балалардың қолы жетпейтін жерде сақтау керек!

Бөтелкенің герметикалығы сақталған жағдайда препаратты мұздатып қатыру оны қолдануға қарсы көрсетілім болып табылмайды.

Бөтелкенің ішкі бетінің дымқылданбауы препаратты қолдануға қарсы көрсетілім деп саналмайды.

Сақтау мерзімі

3 жыл.

Жарамдылық мерзімі өткеннен кейін қолдануға болмайды.

Дәріханадан босатылу шарттары

Рецепт арқылы.

Өндіруші

«Биосинтез» ААҚ, Ресей Федерациясы.

440033, Пенза қ-сы, Дружба к-сі, 4, тел/факс (8412) 57-72-49

e-mail: certificate@biosintez.com

Тіркеу куәлігі иесінің атауы және елі

«Биосинтез» ААҚ, Ресей Федерациясы.

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

«Биосинтез» ААҚ, Ресей Федерациясы

440033, Пенза қ-сы, Дружба к-сі, 4, тел/факс (8412) 57-72-49

e-mail: certificate@biosintez.com