ГЛАТАНОСТ-Т

ГЛАТАНОСТ-Т

Жоқ

Дәрілік түрі, дозасы

(0,05мг + 5мг)/мл, көзге тамызатын дәрі

Сезім мүшелері. Офтальмологиялық препараттар. Глаукомаға қарсы препараттар және миотиктер. Бета - блокаторлар. Басқа препараттармен біріктірілген тимолол.

ATХ коды S01ED51

ГЛАТАНОСТ-Т ашық бұрышты глаукомасы бар ересек пациенттерде (қарттарды қоса) және көзішілік гипертензия кезінде, жергілікті бета-адреноблокаторларға немесе простагландиндер аналогтарына сезімталдық жеткіліксіз болғанда жоғары көзішілік қысымды (КІҚ) төмендету үшін қолданады.

Қолдануды бастағанға дейін қажетті мәліметтер тізбесі

- әсер етуші затқа (заттарға) немесе 6.1 бөлімде атап көрсетілген қосымша заттардың кез келгеніне аса жоғары сезімталдық

- тыныс алу жолдарының реактивті аурулары, соның ішінде бронх демікпесі немесе бұрынғы бронх демікпесін, ауыр, созылмалы, обструктивті өкпе ауруын қоса

- синустық брадикардия, синустық түйіннің әлсіздік синдромы, сино-жүрекшелік блокада, кардиостимулятормен бақыланбайтын ІІ немесе ІІІ дәрежелі атриовентрикулярлық блокада, айқын жүрек жеткіліксіздігі, кардиогенді шок

- 18 жасқа дейінгі балалар мен жасөспірімдер

Қолданған кездегі қажетті сақтандыру шаралары

ГЛАТАНОСТ-Т препаратын тек ересек ерлер мен әйелдерде (соның ішінде қарттарда) қолдануға болады.

Басқа дәрілік препараттармен өзара әрекеттесуі

Дәрілік заттардың ГЛАТАНОСТ-Т препаратымен өзара әрекеттесуіне зерттеу жүргізілген жоқ.

Егер сіз немесе сіздің балаңыз бұрын көзге тамызатын дәріні қоса, қандай да бір басқа дәрілік препараттарды, қабылдасаңыз немесе қабылдаған болсаңыз, өзіңіздің емдеуші дәрігеріңізге хабарлаңыз.

Көзге простагландиндердің екі аналогын бір мезгілде енгізгеннен кейін көзішілік қысымның ықтималды айқын жоғарылауына байланысты простагландиндер тобынан, простагландиндер аналогтарынан немесе простагландиндер туындыларынан екі немесе одан да көп препаратты қолдану ұсынылмайды.

ГЛАТАНОСТ-Т препаратын қан қысымын төмендету үшін қолданылатын пероральді препараттармен және жүрек ырғағының бұзылуында (кальций өзекшелері блокаторларымен), сондай-ақ бета-адреноблокаторлармен, аритмияға қарсы препараттармен (амиодаронды қоса), жүрек дәрілерімен (оймақгүл гликозидтерімен), парасимпатомиметиктермен, гуанетидинмен бір мезгілде қолданғанда, қан қысымының және/немесе өте сирек жүрек ырғағының айқын төмендеуі дамуы мүмкін.

Тимололдың хинидинмен, флуоксетинмен, пароксетинмен біріктірілімін қолданған кезде препараттың организмге жалпы әсері сирек жүрек жиырылуы, депрессия немесе басқа да көріністер түрінде күшеюі мүмкін.

Бета-адреноблокаторлар тобынан пероральді препаратты қабылдап жүрген пациенттерде ГЛАТАНОСТ-Т препаратының көзішілік қысымға әсері күшеюі немесе ішкі ағзалар тарапынан жағымсыз әсерлердің дамуы мүмкін. Бета-адреноблокаторлар тобынан екі немесе одан да көп препаратты жергілікті қолдану ұсынылмайды.

ГЛАТАНОСТ-Т мен адреналинді (эпинефрин) бір мезгілде қолданғанда қарашықтың кеңеюі мүмкін.

ГЛАТАНОСТ-Т препаратын қолдану кезеңінде клонидинді күрт тоқтатқанда, қан қысымының айқын жоғарылауы мүмкін.

ГЛАТАНОСТ-Т препараты диабетке қарсы препараттардың әсерін күшейтуі және қандағы глюкозаның айқын төмендеуін тудыруы, сондай-ақ осы жағдайдың (гипогликемия) симптомдарын бүркемелеуі мүмкін

Арнайы ескертулер

Организмге жалпы әсері: көзге арналған басқа жергілікті препараттар сияқты, ГЛАТАНОСТ-Т ішкі ағзалардың жұмысына әсер етуі мүмкін, сондықтан препараттың компоненті-тимолол жүрек – қантамыр, өкпе және басқа да жағымсыз реакцияларды тудыруы мүмкін. Көзге жергілікті қолданған кезде ішкі ағзалар тарапынан жағымсыз реакциялардың жиілігі осы топтың препараттарын қолданудың басқа тәсілдеріне қарағанда төмен. Мұндай реакциялардың даму ықтималдығын азайту үшін препаратты қолдану әдісі бойынша барлық ұсыныстарды орындау қажет.

Жүрек бұзылыстары: жүрек-қантамыр аурулары бар пациенттерде (мысалы, жүректің ишемиялық ауруы, Принцметал стенокардиясы және жүрек жеткіліксіздігі), сондай-ақ қан қысымының жоғарылауы кезінде ГЛАТАНОСТ-Т тағайындау қажеттілігін дәрігер жеке анықтайды. Тағайындалған жағдайда, осы аурулардың өршу белгілері мен жағымсыз әсерлерін ерте анықтау үшін дәрігердің бақылауы қажет. Сирек жүрек ырғағының даму мүмкіндігіне байланысты I дәрежелі жүрек блокадасы кезінде ГЛАТАНОСТ-Т сақтықпен қолдану қажет. Тимололды қолданғаннан кейін жүрек реакциялары және сирек жағдайларда жүрек жеткіліксіздігінен болатын өлім туралы хабарланды.

Тамыр бұзылыстары: шеткері қан айналымының ауыр бұзылулары бар пациенттерде (мысалы, ауыр Рейно ауруы немесе Рейно синдромы) сақ болу керек.

Тыныс алудың бұзылуы: бронх демікпесі бар пациенттерде тыныс алу жолдары тарапынан реакциялар дамуы мүмкін (бронх түйілуіне байланысты өлімді қоса). Өкпенің жеңіл/орташа айқын созылмалы обструктивті ауруы (ӨСОА) бар пациенттерде ГЛАТАНОСТ-Т препаратын сақтықпен қолдану қажет.

Қандағы қанттың төмендеуі / қант диабеті: ГЛАТАНОСТ-Т препаратын қандағы глюкозаның күрт айқын төмендеуіне бейім болған кезде немесе лабильді қант диабеті кезінде сақтықпен қолдану керек, өйткені осы топтағы препараттар (бета-адреноблокаторлар) қандағы глюкозаның күрт төмендеу көріністерін бүркемелеуі мүмкін.

Бета-адреноблокаторлар тобының препараттары (ГЛАТАНОСТ-Т препаратын қоса) қалқанша без гормондарының (гипертиреоз) артық болуынан туындаған аурудың белгілерін жасыруы мүмкін.

Көздің алдыңғы мөлдір аймағының (мөлдір қабықтың) аурулары: көздің құрғауы дамуы мүмкін болғандықтан, мөлдір қабық аурулары кезінде сақ болу керек.

Басқа бета-адреноблокаторлар: тимололды сол топтың препараттарымен (жергілікті әсер етпейтін бета-адреноблокаторлар) бір мезгілде қолданған жағдайда, көзішілік қысымға немесе ішкі ағзаларға әсері күшеюі мүмкін, сондықтан организмнің реакциясын мұқият бақылау қажет. Бета-адреноблокаторлар тобынан екі препаратты жергілікті қолдану ұсынылмайды.

Ауыр аллергиялық реакциялар: бета-адреноблокаторлар тобының препараттарын (ГЛАТАНОСТ-Т қоса) қолданған кезде, бұрын адамдардың көпшілігінде жағымсыздық тудырмайтын заттарға (атопия) әдеттен тыс реакциялар немесе түрлі аллергендерге ауыр аллергиялық реакциялар байқалған пациенттер осындай аллергендермен қайта кездесуге аса сезімтал болуы мүмкін және аллергиялық реакцияларды емдеу үшін қолданылатын адреналиннің әдеттегі дозаларына реакция бермеуі мүмкін.

Тамырлы қабықтың ажырауы: көзішілік қысымның жоғарылауына байланысты операциядан кейін тимолол, ацетазоламид ерітінділерін қолдану нәтижесінде көздің торқабығының ажырауы дамуы мүмкін.

Операция кезінде ауырсынуды басу: бета-адреноблокаторлар тобындағы көзге арналған препараттар (ГЛАТАНОСТ-Т қоса) адреналин сияқты препараттың емдік әсерін тежеуі мүмкін, сондықтан тимололды қолданған кезде бұл туралы анестезиологқа хабарлау керек.

Құрамында бета-адреноблокаторлары бар басқа препараттармен бір мезгілде емдеу: тимолол басқа дәрілік препараттармен өзара әрекеттесуі мүмкін.

Простагландиндердің басқа аналогтары: бір мезгілде екі немесе одан да көп простагландиндерді, простагландиндердің аналогтарын немесе олардың туындыларын қабылдау ұсынылмайды.

Көздің боялған бөлігінде (нұрлы қабықта) қоңыр пигмент мөлшерінің ұлғаюына байланысты ГЛАТАНОСТ-Т препаратын қолданған кезде көз түсінің біртіндеп қайтымсыз өзгеруі мүмкін. Егер сіздің көзіңіздің түсі аралас болса (қоңыр-көгілдір, сұр-қоңыр, сары-қоңыр немесе жасыл-қоңыр), бұл өзгерістер көздің біртекті түсіне (көгілдір, сұр, жасыл немесе қоңыр) қарағанда ықтималдығы жоғары. Әдетте қарашықтың айналасындағы қоңыр бояу көздің шетіне таралады және бүкіл нұрлы қабық немесе оның бөліктері қоңыр түске айналуы мүмкін. Көз түсінің өзгеруі әдетте баяу дамиды және бірнеше ай немесе жылдар бойы байқалмауы мүмкін, егер препарат тек бір көзге тамызылса байқалады. Көздің түсінің өзгеруі, әдетте, денсаулыққа ешқандай проблемалар туғызбайды және емдеуді тоқтатқаннан кейін нұрлы қабықтың қоңыр түсінің одан әрі жоғарылауы байқалмады, бірақ болашақта түс өзгеруі сақталуы мүмкін.

Препарат көздің түрлі-түсті (нұрлы қабық) қабығындағы қоңыр немесе ашық қоңыр дақтарға әсер етпейді.

Қабақтар мен кірпіктердің өзгеруі: препаратты қолданған кезде емделіп жатқан көз айналасындағы терінің айналасындағы кірпіктер мен ұсақ түктердің біртіндеп өзгеруі байқалуы мүмкін. Мұндай өзгерістерге кірпіктердің ұзаруы, қалыңдауы, түсінің күңгірттенуі, кірпіктердің немесе түктердің қалыңдығының артуы және кірпіктердің өсу бағытының өзгеруі жатады. Кірпіктердің өзгеруі қайтымды сипатқа ие және емдеуді тоқтатқаннан кейін олар біртіндеп бастапқы түріне оралады.

Глаукома: көз ішіндегі басқа өзгерістерден (созылмалы жабық бұрышты глаукома, псевдофакиясы бар ашық бұрышты глаукома, пигментті глаукома, қабыну және неоваскулярлық глаукома) туындаған көзішілік қысымның жоғарылауы кезінде препаратты қолдану тәжірибесі шектелген. ГЛАТАНОСТ-Т көз қарашығына іс жүзінде әсер етпейді, жабық бұрышты глаукоманы емдеу тәжірибесі жоқ, сондықтан мұндай жағдайларда ГЛАТАНОСТ-Т қолданған кезде сақ болу керек.

Көздің алдыңғы мөлдір бөлігінің (мөлдір қабықтың) герпестік қабынуы: егер бұрын бұл ауру байқалса, ГЛАТАНОСТ-Т сақтықпен қолдану керек. Препаратты қарапайым герпес вирусынан туындаған мөлдір қабықтың қабынуының белсенді фазасында, сондай-ақ өткен кезеңде, әсіресе простагландиндердің аналогтарын қолданумен байланысты аурудың қайталанатын ағымында қолдануға болмайды.

Көздің торқабығының орталық аймағының ісінуі (сары дақ): кисталық ісінуді қоса, көз торқабығының орталық аймағының ісінуі мүмкін. Бұл өзгерістер негізінен көзде табиғи көзбұршағы жоқ пациенттерде, көз бұршағының артқы капсуласы зақымдалуымен жасанды көзбұршағы кезінде және сары дақтар ісінуінің дамуы бойынша қауіп факторлары болған кезде байқалды. Мұндай пациенттерде ГЛАТАНОСТ-Т сақтықпен қолдану қажет.

Консервант: ГЛАТАНОСТ-Т құрамында консервант ретінде бензалконий хлориді бар. Бензалконий хлориді көздің алдыңғы мөлдір қабығының (мөлдір қабықтың) нүктелік бұлыңғырлануын және/немесе көздің тітіркенуімен көрінетін қабақтың уытты ойық жаралы зақымдануын тудыруы мүмкін деген хабарламалар бар. Құрғақ көз синдромы бар немесе мөлдір қабық аурулары бар пациенттерде ГЛАТАНОСТ-Т жиі немесе ұзақ қолданғанда мұқият бақылау қажет.

Жанаспалы линзалар: жанаспалы линзалар бензалконий хлоридін сіңіруі мүмкін, сондықтан оларды ГЛАТАНОСТ-Т көзге тамызатын дәрі ерітіндісін қолданар алдында алып тастау және препаратты тамызғаннан кейін 15 минуттан кейін қайта орнату қажет.

Педиатрияда қолдану: 18 жасқа дейінгі балалар мен жасөспірімдерде дәрілік препаратты қолданудың қауіпсіздігі мен тиімділігі туралы деректер жоқ.

Жүктілік немесе лактация кезінде

Латанопрост пен тимололмен дәрілік препараттарды жүкті әйелдерде қолдану жөнінде деректер жеткіліксіз. Бұдан басқа, босанғанға дейін бета-адреноблокаторлар тобынан препараттарды (тимололды қоса) қолданғанда, жаңа туған нәрестелерде сирек жүрек ырғағы, қан қысымының төмендеуі, тыныс алудың ауыр бұзылуы және қандағы глюкозаның төмендеуі байқалды. Егер ГЛАТАНОСТ-Т туылғанға дейін қолданылса, жаңа туған нәрестені өмірдің алғашқы бірнеше күнінде мұқият бақылау қажет. Препарат емшек сүтімен шығарылуы мүмкін және баланың жағдайына әсер етуі мүмкін. Жоғарыда айтылғандардың бәрін ескере отырып, ГЛАТАНОСТ-Т препаратын жүктілік кезінде және баланы емізу кезінде қолдануға болмайды. Егер сіз жүкті болсаңыз, бала емізетін болсаңыз немесе жүкті болуыңыз мүмкін деп ойласаңыз немесе жүктілікті жоспарласаңыз, осы препаратты қолданар алдында дәрігермен кеңесіңіз.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

ГЛАТАНОСТ-Т көзге тамызатын тамшыларын қолдану анық көру қабілетінің уақытша жоғалуына әкелуі мүмкін. Көру қабілеті анық болғанша автокөлікті басқаруға немесе қозғалыстағы механизмдермен жұмыс істеуге болмайды.

Қолдану жөніндегі нұсқаулар

Дозалау режимі

Ересектерге (қарттарды қоса) ұсынылатын доза: зақымданған көзге(дерге) бір тамшы, тәулігіне бір рет. Доза зақымдалған көзге/көздерге күніне бір тамшыдан аспауы тиіс. Препаратты кешке тамызу ұсынылады. ГЛАТАНОСТ-Т препаратын емдеуші дәрігердің нұсқауларына сәйкес қолдану қажет.

Жанаспалы линзаларды пайдаланушылар

Егер сіз жанаспалы линзаларды тағып жүрсе, оларды ГЛАТАНОСТ-Т қолданар алдында шешу қажет. ГЛАТАНОСТ-Т қолданғаннан кейін жанаспалы линзаларды қайтадан киместен бұрын 15 минут күте тұру керек.

Қолдану жөніндегі нұсқаулар

Егер ГЛАТАНОСТ-Т көзге тамызатын басқа дәрілермен бірге қолданылса

ГЛАТАНОСТ-Т және басқа көзге тамызатын тамшыларды қолдану аралығында кемінде 5 минут өтуі тиіс.

Қабылдау уақыты көрсетілген қолдану жиілігі

ГЛАТАНОСТ-Т препаратын тәулігіне 1 реттен жиі қолданбаңыз.

Емдеу ұзақтығы

Дәрігер препаратты тоқтатқанға дейін, ГЛАТАНОСТ-Т қолдана беріңіз.

Артық дозалану жағдайында қабылдануы қажетті шаралар

Симптомдары: тимололмен артық дозалану кезінде сирек жүрек ырғағының дамуы, қан қысымының төмендеуі, бронх түйілуі және жүректің тоқтап қалуы мүмкін. Латанопростпен артық дозаланғанда көздің тітіркенуі және көздің шырышты қабығының қызаруы байқалды.

Емі: симптоматикалық және демеуші. Егер сіз немесе сіздің балаңыз ГЛАТАНОСТ-Т препаратын кездейсоқ жұтып қойса, мүмкіндігінше тезірек дәрігерге қаралыңыз.

Дәрілік препараттың бір немесе бірнеше дозаларын өткізіп алған кезде қажетті шаралар

Егер бір дозаны өткізіп алсаңыз, онда одан әрі емдеу әдеттегі дозада және әдеттегі уақытта жалғасады. Өткізіп алған дозаны толтыру үшін екі есе дозаны тамызуға болмайды.

Тоқтату симптомдарының қаупі бар екенін көрсету

Егер сіз ГЛАТАНОСТ-Т қолдануды тоқтатқыңыз келсе, алдын ала емдеуші дәрігермен кеңесіп алу керек.

Дәрілік препараттың қолдану тәсілін түсіндіру үшін медициналық қызметкерге кеңес алуға жүгіну жөніндегі ұсынымдар

Дәрілік препаратты қолдану тәсілін түсіндіру үшін медициналық қызметкерге кеңес алу үшін жүгіну ұсынылады

ДП стандартты қолданған кезде байқалатын жағымсыз реакциялардың сипаттамасы және осы жағдайда қабылдауға тиісті шаралар

Өте жиі

- көздің боялған бөлігінде (нұрлы қабық) қоңыр пигмент мөлшерінің көбеюі арқылы көздің түсінің біртіндеп өзгеруі.

Жиі

- көздің ауыруы және тітіркенуі (түйілуін, ашытуын, қышынуын, көздегі бөгде дененің сезілуін қоса).

Жиі емес

- бас ауыруы

- көздің алдыңғы мөлдір бөлігінің (мөлдір қабық) қабынуы, көздің шырышты қабығының қабынуы (конъюнктивит), қабақ жиектерінің қабынуы, көздің қызаруы, көздің бұлыңғырлануы, көп жас ағу

• Бөртпе және терінің қышынуы.

Латанопростпен препараттарды қолдану кезіндегі жағымсыз реакциялар

- көздің алдыңғы мөлдір бөлігінің (мөлдір қабықтың) герпестік қабынуы

- бас айналуы

- препаратпен емдеу жүргізілетін кірпіктердің және көз айналасындағы ұсақ түктердің біртіндеп өзгеруі (кірпіктердің ұзындығының, қалыңдығының және санының артуы, түсінің күңгірттенуі)

- ұсақ нүктелі беткейлік ақаулары бар көздің алдыңғы мөлдір бөлігінің қабынуы, көз айналасындағы ісінулер, көздің нұрлы қабығының қабынуы (увеит), көздің алдыңғы боялған бөлігінің қабынуы (увеит), торқабықтың орталық бөлігінің ісінуі (кисталық ісінуді қоса), көздің құрғауы, көздің алдыңғы мөлдір бөлігінің қабынуы, көздің алдыңғы мөлдір бөлігінің (мөлдір қабық) ісінуі немесе эрозиясы, кірпіктердің көз алмасына қарай дұрыс өспеуі (трихиаз), көздің нұрлы қабығының кистасы, көздің қарығуы, көз айналасындағы және қабақ аймағындағы өзгерістер (салыңқы көз түрі), қабақтың ісінуі, қабақтың орнықты тері реакциясы, көздің шырышты қабығының тыртықталуы және қатпарлануы (бензалконий хлоридіне болуы мүмкін), қабақ терісінің күңгірттенуі

- жүрек тұсындағы ауырсыну ұстамалары (стенокардия), дәрілік препараттармен нашар бақыланатын жүрек тұсындағы ауырсыну ұстамалары (тұрақсыз стенокардия), жүрек қағысының жиілеуі

- демікпе, демікпенің өршуі, ентігу, кеуде ауыруы

- бұлшықет ауыруы, буын ауыруы.

Тимололмен препараттарды қолдану кезіндегі жағымсыз реакциялар

- ауыр жалпы аллергиялық реакциялар, оның ішінде өмірге қауіп төндіретін жедел ауыр аллергиялық реакциялар (анафилаксиялық реакция), терінің терең қабаттарының және тері астындағы тіндердің тығыз, асимметриялық, ауыртпалықсыз ісінуі (ангионевроздық ісіну), күйіктен болатын күлдіреуікке ұқсас, тез өршитін, қатты қышитын, терідегі бозғылт қызғылт күлдіреуіктер, (есекжем), ошақты және кең таралған бөртпе, қышыну

- қандағы глюкозаның төмендеуі

- есте сақтау қабілетінің жоғалуы, ұйқысыздық, депрессия, түнгі қорқынышты түстер, елестеулер

- ми қан айналымының бұзылуы, мидың қанмен қамтамасыз етілуінің нашарлауы (ишемия), бас айналуы, бұлшықеттердің патологиялық тез қажу (миастения) симптомдарының күшеюі, күйдіру, шаншу, жыбырлату сезімдерімен сезімталдықтың бұзылуы, бас ауыруы, естен тану

- КІҚ төмендету үшін операциядан кейін көз торқабығының ажырауы, көздің алдыңғы мөлдір бөлігінің (мөлдір қабықтың) эрозиясы және қабынуы, көзге қосарланып көріну, мөлдір қабықтың сезімталдығының төмендеуі, көздің тітіркенуінің белгілері мен симптомдары (мысалы, ашыту, шаншу, қышыну, жас ағу және қызару), көздің құрғауы, үстіңгі қабақтың түсуі, Қабақ шеттерінің қабынуы, көрудің бұлыңғырлануы

- құлақтың шыңылдауы

- жүректің тоқтап қалуы, жүрек жеткіліксіздігі, жүрекішілік блокада (жүрек импульсінің бұзылуы), іркілісті жүрек жеткіліксіздігі, кеудедегі ауыруы, жүрек ырғағының бұзылуы, сирек жүрек ырғағы, ісінулер, жүректің соғуы

- қол мен аяқтың суынуы, қан қысымының төмендеуі, аяқ-қол саусақтарының қан тамырларының тарылуымен көрінетін ауру, бұл саусақтардың терісінің ауыруы мен түсінің өзгеруіне әкеледі (Рейно феномені)

- бронх түйілуі (көбінесе бронх түйілуі ауруы бар пациенттерде), жөтел, ентігу

- іштің ауыруы, құсу, жиі және сұйық нәжіс, ауыздың құрғауы, дәмнің бұзылуы, іштің жоғарғы бөлігіндегі ауырсыну немесе жайсыздық, жүрек айнуы

- тері бөртпесі, псориаз тәрізді бөртпе, псориаздың өршуі, бастағы шаштың ішінара немесе толық түсуі

- жыныстық функцияның бұзылуы, жыныстық құмарлықтың төмендеуі

- созылмалы шаршау синдромы (астения), қажу, бұлшықет ауыруы

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттарды және медициналық бұйымдарды сараптау ұлттық орталығы» ШЖҚ РМК» http://www.ndda.kz

Қосымша мәліметтер

Дәрілік препараттың құрамы

1 мл препараттың құрамында, миллиграммен

белсенді заттар: латанопрост 0,050 мг, тимолол малеаты 6,830 мг (5,000 мг тимололға баламалы),

қосымша заттар: бензалконий хлориді, натрий хлориді, сусыз натрий гидрофосфаты, натрий дигидрофосфаты моногидраты, 1 М натрий гидроксиді ерітіндісі немесе 1 М хлорсутек қышқылы (рН 6,0 дейін), инъекцияға арналған су.

Сыртқы түрінің, иісінің, дәмінің сипаттамасы

Мөлдір түссіз ерітінді.

Шығарылу түрі және қаптамасы

2.5 мл препараттан тығыздығы төмен полиэтиленнен жасалған ақ түсті тамшылатқыш-ұштығы және тығыздығы жоғары полиэтиленнен жасалған ақ түсті бұрандалы қақпақшасы бар сыйымдылығы 5 мл ақ құтыларға салынған.

1 құтыдан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады.

2 жыл.

Жарамдылық мерзімі өткеннен кейін қолдануға болмайды!

Жарықтан қорғалған жерде 2 ºС-ден 8 ºС-ге дейінгі температурада сақтау керек.

Құтыны ашқаннан кейін 4 апта ішінде пайдаланады, 25 °C-ден аспайтын температурада сақтайды.

Балалардың қолы жетпейтін жерде сақтау керек!

Рецепт арқылы.

Өндіруші туралы мәліметтер

RAFARM S.A.,

Thesi Pousi –Xatzi Agiou Louka, Пеания Аттика, 19002, 37, Греция.

Тел: 210 6643835, 210 6776550-1

Е-mail: factory@rafarm.gr

Тіркеу куәлігінің ұстаушысы

Belinda Laboratories LLP,

Unit 18, 53 Norman Road, Greenwich Centre Business Park,

Лондон, Ұлыбритания, SE10 9QF

Тел: +44-203-598-2050

E-mail: info@belinda.uk.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

"Cepheus Medical" ЖШС (Цефей Медикал): 050045, Қазақстан Республикасы, Алматы қ., Әл-Фараби даңғылы, 7 үй, ЖК «Нурлы Тау», блок 5А, офис 247,

телефон: +7(727) 300 69 71, +7 777 175 00 99 (тәулік бойы), электронды пошта:drugsafety@evolet.co.uk