Гикамтин®

МНН: Топотекан
Производитель: ГлаксоСмитКляйн Мэньюфэкчуринг С.п.А.
Анатомо-терапевтическо-химическая классификация: Topotecan
Номер регистрации в РК: № РК-ЛС-5№016187
Период регистрации: 23.10.2015 - 23.10.2020

Инструкция

Саудалық атауы

Гикамтин®

Халықаралық патенттелмеген атауы

Топотекан

Дәрілік түрі

Инфузия үшін ерітінді дайындауға арналған 4 мг лиофилизат

Құрамы

Бір құтының ішінде

белсенді зат – топотекан гидрохлориді 4 мг (топотекан-негізге шаққанда),

қосымша заттар: шарап қышқылы, маннитол, хлорлы сутегі қышқылы немесе натрий гидрототығы.

Сипаттамасы

Ашық-сарыдан жасылдау түске дейінгі күлше нан түріндегі лиофилизацияланған масса.

Қалпына келтірілген ерітінді: сарыдан сары-жасыл түске дейінгі мөлдір ерітінді.

Фармакотерапиялық тобы

Ісікке қарсы препараттар. Ісікке қарсы басқа да препараттар. Топоизомераза-I тежегіші. Топотекан.

АТХ коды L01XX17

Фармакологиялық қасиеттері

Фармакокинетикасы

Топотеканды бес күн бойы күнделікті 30 минуттық инфузия түрінде 0,5-1,5 мг/м2 дозада көктамыр ішіне енгізгеннен кейін плазмалық клиренсі 64 л/сағатты құрайды, бұл бауыр қан ағысының 2/3 құрайды. Топотеканның таралу көлемі 132 л құрайды. Жартылай шығарылу кезеңі - 2-3 сағат. 5 күндік курс динамикасындағы фармакокинетикалық параметрлерін салыстыру қандай да бір өзгерістерін анықтамады. «Концентрация-уақыт» қисығы астындағы аудан дозаның артуына пропорционалды артады. Топотеканның плазма ақуыздарымен байланысуы төмен, 35%-ды құрайды, қан жасушалары және плазма арасындағы таралуы біркелкі.

Топотекан бауырда метаболизденеді. Топотекан метаболизмінің негізгі жолы ашық сақиналы гидроксикарбон қышқылы түзілетін лактонды сақинаның рН-тәуелді гидролизі болып табылады.

Топотекан Р450 цитохромы жүйесіне енетін Р450 цитохромы жүйесінің ферменттерін: CYP1A2, CYP2A6, CYP2C8/9, CYP2C19, CYP2D6, CYP2E, CYP3A немесе CYP4А, сондай-ақ цитозольді ферментер дигидропиримидин немесе ксантиноксидазаны тежемейді.

Топотеканның енгізілген дозасының 20-60%-ы өзгермеген күйде немесе метаболиттер түрінде несеппен шығарылады.

Топотеканнның плазмалық клиренсі бүйрек жеткіліксіздігі бар (креатинин клиренсі 41-60 мл/мин) пациенттерде шамамен 67%-ға дейін төмендейді. Таралу көлемі елеусіз азаяды және осылайша жартылай шығарылу кезеңі тек 14%-ға ғана ұзарады.

Бүйрек жеткіліксіздігі орташа пациенттерде топотеканның плазмалық клиренсі 34%-ға дейін азаяды. Таралу көлемі шамамен 25%-ға төмендейді, бұл жартылай шығарылу кезеңінің 1,9-дан 4,9 сағатқа дейін ұзаруына әкеледі.

Бауыр жеткіліксіздігі бар пациенттерде топотеканның плазмалық клиренсі пациенттердің бақылау тобымен салыстырғанда 67%-ға дейін төмендейді. Топотеканның жартылай шығарылу кезеңі 30%-ға жоғарылайды, дегенмен таралу көлемінің айқын өзгерісі болмайды. Бауыр жеткіліксіздігі бар пациенттерде жалпы плазмалық клиренсі бақылау тобымен салыстырғанда тек 10 %-ға ғана төмендейді.

Педиатрияда қолданылуы

Топотеканды үздіксіз 24 сағаттық инфузия түрінде 2-ден 7,5 мг/м2 дейінгі дозада және 72 сағаттық үздіксіз инфузия түрінде тәулігіне 0.75-тен 1.95 мг/м2 дозада балаларға тағайындаған кезде олардағы топотекан клиренсі препараттың осындай дозасын алып жүрген ересектердегі осы көрсеткіштерге ұқсас болған.

Фармакодинамикасы

Топотеканның ісікке қарсы әсері ДНҚ репликациясына тікелей қатысушы фермент топоизомеразы-I тежеумен байланысты (топоизомераза-I орын ауыстырып отыратын репликациялық тармақтанудың алдында туындайтын торзионды ширығуды әлсіретеді). Топотекан катализдік механизмнің аралық тізбегі болып табылатын ковалентті фермент пен спиральді ыдыраған ДНҚ кешенін тұрақтандырады.

Топоизомераза-1-ді тежеу бір спиральді ДНҚ-ның үзілуіне және ДНҚ репликациясының тоқтауына әкеледі.

Қолданылуы

Монотерапия:

- бірінші желіде немесе одан кейінгі сәтсіз емдеуден соң аналық бездердің метастаздық обырында;

- бірінші желінің препараттарымен қайталап емдеу талапқа сай емес деп бағаланған ұсақ жасушалы өкпе обырының қайталануында.

Гикамтин® цисплатинмен бірге сәулемен емдеуден кейін жатыр мойны обыры қайталанған және аурудың IVB сатысы бар пациент әйелдер үшін қолданылады. Бұрын цисплатинмен емделген пациенттер біріктірілген емді бағалау үшін демеуші емде үзілістің болғанын қажет етеді.

Қолдану тәсілі және дозалары

Гикамтин® препаратын қолдану цитоуытты химиялық ем жасауға мамандандырылған бөлімшелерде және химиотерапия жүргізуде тәжірибесі бар дәрігердің бақылауымен жүргізілуі тиіс.

Цисплатинмен біріктіріп тағайындағанда препаратты медициналық қолдану жөніндегі толық нұсқаулықпен танысып шығу қажет.

Гикамтин® препаратын енгізудің алдында бастапқы гематологиялық көрсеткіштер:

  • нейтрофильді гранулоциттер – 1,5 × 109/л кем емес,

  • тромбоциттер - 100 × 109/л кем емес,

  • гемоглобиннің деңгейі  9 г/дл құрауы тиіс (соның ішінде қажет болғанда гемотрансфузия жүргізгеннен кейін).

Қолданар алдында Гикамтин® қалпына келтірілуі және сұйылтылуы тиіс.

Аналық бездер обыры және өкпенің ұсақ жасушалы обыры

Бастапқы доза

Топотеканның ұсынылатын дозасы әр курсты бастар алдында 3 апта аралықпен 5 күн қатарынан күнделікті 30 минут бойы көктамырішілік инфузия түрінде дене беткейінің аумағына шаққанда тәулігіне 1.5 мг/м2.

Кейінгі дозалары

Гикамтин® препаратының кейінгі дозалары 3 апта аралықпен 5 күн бойы қатарынан күніне 1,5 мг/м2 құрайды. Гикамтин® препаратын гематологиялық көрсеткіштер:

нейтрофильді гранулоциттер- 1,0 × 109/л астам,

тромбоциттер - 100 × 109/л,

гемоглобин > 9 г/дл (егер қажет болса қан құюдан кейін) құрамайынша қайталап тағайындауға болмайды.

Гематологиялық бұзылуларды түзету мақсатында курстың 6-шы күнінен бастап (Гикамтин® препаратымен емдеуді аяқтағаннан кейін) гранулоцитарлық колониястимуляциялаушы фактордың (G-CSF) профилактикалық курсы тағайындалуы мүмкін.

Егер:

  • пациенттерде 7 және одан да көп күн сақталатын және/немесе қызбамен немесе инфекциямен қатар жүретін айқын нейтропения (нейтрофильді гранулоциттер саны 0,5 х 109/л) орын алса,

  • тромбоциттер саны 25 × 109/л аз болса,

  • нейтропенияға байланысты емдеуді тоқтату керек болған жағдайда Гикамтин® препаратының дозасы тәулігіне 1,25-1,0 мг/м2 дейін азайтылуы мүмкін.

Жатыр мойны обыры

Бастапқы доза

Гикамтин® препаратының ұсынылатын дозасы – үш күн бойы күнделікті 30 минуттан көктамырішілік инфузиялар түрінде тәулігіне 0.75 мг/м2. Цисплатин Гикамтин® препаратымен бірге тәулігіне 50 мг/м2 дозада емдеудің бірінші күні көктамырішілік инфузия түрінде тағайындалады. Бұл реттілік әр 21 күн сайын қайталанады, барлығы 6 курс жүргізіледі.

Кейінгі дозалар

Гикамтин® препаратын гематологиялық көрсеткіштер:

нейтрофильді гранулоциттер- 1,5 х 109/л кем емес,

тромбоциттер - 100 х 109/л кем емес,

гемоглобин > 9 г/дл (егер қажет болса қан құюдан кейін) құрамайынша қайталап тағайындауға болмайды.

Стандартты онкологиялық практикада нейтропенияны түзету үшін Гикамтин® препаратын гранулоцитарлық колониястимуляциялаушы фактормен (Г-КСФ) бір уақытта қолданады немесе нейтрофилдердің қолайлы санын ұстап тұру үшін дозаны төмендетеді.

Егер жеті немесе одан да көп күн бойы ауыр нейтропениясы бар пациенттерде дозаны төмендету таңдалса (нейтрофилдер саны 0,5×109/л аз) немесе қызбамен немесе инфекциямен қатар жүретін ауыр нейтропениясы бар пациенттерде немесе нейтропения себепті емі кейінге қалдырылған пациенттерде доза кейінгі курстар бойы тәулігіне 0,60 мг/м2 дейін 20%-ға төмендетілуі тиіс (немесе кейіннен қажет болса тәулігіне 0,45 мг/м2 төмендетілуі тиіс).

Дозалар тромбоциттер саны 25×109/л төмендегенде осыған ұқсас түрде төмендетілуі тиіс.

Бүйрек функциясы бұзылған пациенттер

Монотерапия (аналық бездер обыры және өкпенің ұсақ жасушалы обыры) Креатинин клиренсі  40 мл/мин пациенттер үшін дозалау режимін түзету қажет емес.

Креатинин клиренсі 20-дан 39 мл/мин дейінгі пациенттер үшін Гикамтин® дозасы қатарынан бес күн бойы тәулігіне 0,75 мг/м2 құрайды.

Креатинин клиренсі  20 мл/мин пациенттер үшін деректер саны жеткіліксіз болғандықтан ұсынылатын дозалар жоқ.

Біріктірілген ем (жатыр мойны обыры)

Цисплатинмен бірге Гикамтин® препаратын плазмадағы креатинин деңгейі 1,5 мг/дл-ден артпағанда тағайындау ұсынылады. Егер емдеу барысында плазмадағы креатинин деңгейі 1,5 мг/дл асатын болса, оның дозасын азайту/қабылдауды тоқтату бойынша цисплатинді қолдану жөнінде нұсқаулық ұсынымдарын орындау керек. Жатыр мойнының обыры бар пациенттерде цисплатинді қабылдауды тоқтатқаннан кейін топотеканмен монотерапияны жалғастыруға қатысты деректер жеткіліксіз.

Бауыр функциясы бұзылған пациенттер

Бауыр функциясы бұзылған пациенттер үшін (жалпы билирубин 1,5-тен 10 мг/дл дейін) дозаны түзетудің қажеті жоқ.

Балалар Балаларды емдеу үшін Гикамтин® препаратын пайдалану ұсынылмайды, өйткені препаратты балаларға қолданудың қолда бар тәжірибесі шектеулі.

Ерітінді дайындау

Лиофилизацияланған ұнтақты инъекцияға арналған 4 мл суда ерітеді. Қалпына келтірілген ерітіндінің құрамында 1 мл суда 1 мг топотекан бар. Алынған ерітіндіні инъекцияларға арналған 160 мл 0.9% натрий хлориді ерітіндісімен немесе 25 мкг/мл топотекан концентрациясын алу үшін көктамырішілік инфузияларға арналған 5% декстроза ерітіндісімен немесе 50 мкг/мл концентрациясын алу үшін тиісінше 80 мл декстроза ерітіндісімен сұйылту керек.

Ісікке қарсы препараттарды қолданудың тиісті ережелерін қатаң сақтау қажет, атап айтқанда:

- қызметкерлер препаратты сұйылтуды үйренуі тиіс

- жүкті қызметкерлер бұл препаратпен жұмыс істеуге жіберілмеуі тиіс

- Гикамтин® препаратын осы препаратты сұйылтуды жүргізетін қызметкерлер бетперделерді, көзілдіріктер мен қолғаптарды қоса қорғағыш киімдерді киіп жүруі тиіс.

Ерітіндіні дайындау мен оны енгізу үшін немесе қолғаптарды қоса жинау кезінде қолданылатын барлық заттар айрықша қауіпті қалдықтарға арналған бір реттік қапшықтарға салынуы және артынан жоғары температурада өңделуі тиіс. Төгілген ерітіндіні мол мөлшердегі сумен жуып тастау керек.

Препарат теріге немесе көзге кездейсоқ түскен жағдайда мол мөлшердегі сумен шаю керек.

Жағымсыз әсерлері

Аналық без обыры қайталанатын 523 пациенттің және ұсақ жасушалы өкпе обыры қайталанатын 631 пациенттің қатысуымен дозаны іріктеу зерттеулерінде топотеканмен монотерапияның дозаны лимиттеуші уыттылығы гематологиялық уыттылықпен анықталатынын байқалған. Уыттылығы болжамды және қайтымды болды. Жинақталатын гематологиялық немесе гематологиялық емес уыттылық белгілері анықталған жоқ.

Цисплатинмен біріктірілімде топотеканмен емдеген кезде жағымсыз құбылыстар бейіні клиникалық зерттеулерде жатыр мойнының обыры бар пациенттердің қатысуымен топотеканмен монотерапия кезінде байқалған бейінге сәйкес келді. Жалпы гематологиялық уыттылық топотеканмен монотерапия жүргізумен салыстырғанда цисплатинмен біріктірілімде топотекан қабылдаған пациенттерде төмен, бірақ цисплатинмен монотерапия кезінде жоғары.

Қосымша жағымсыз құбылыстар топотеканды цисплатинмен біріктіріп қолданғанда байқалған, алайда бұл құбылыстар цисплатинмен монотерапияда байқалған және топотеканмен байланысты болмады. Цисплатинді қолдану жөніндегі ақпараттың ішінде цисплатинді қолданумен байланысты жағымсыз әсерлердің толық тізбесі болуы тиіс.

Монотерапия ретінде қолданғанда топотеканның қауіпсіздігі жөніндегі біріктірілген деректер төменде келтірілген.

Жағымсыз реакциялар ағзалар жүйесінің класына және кездесу жиілігіне сәйкес атап көрсетілген (барлық тіркелген құбылыстар). Кездесу жиілігі төмендегідей анықталады: өте жиі (>1/10), жиі (>1/100-ден <1/10 дейін); жиі емес (>1/1 000-нан <1/100 дейін), сирек (>1/10 000-нан < 1/1 000 дейін); және өте сирек (<1/10 000), жекелеген және белгісіз хабарламаларды қоса (қолда бар деректер бойынша бағалауға болмайды).

Кездесу жиілігінің әр тобы шегінде жағымсыз әсерлер күрделілігінің азаюы тәртібінде ұсынылған.

Қан және лимфа жүйесі тарапынан болатын бұзылулар

Өте жиі:

- фебрильді нейтропения, нейтропения (Асқазан-ішек жолы тарапынан болатын бұзылуларды қараңыз), тромбоцитопения, анемия, лейкопения

Жиі

- панцитопения

Белгісіз

- ауыр қан кету (тромбоцитопениямен байланысты)

Тыныс алу жүйесі, кеуде қуысы және көкірекорта ағзалары тарапынан болатын бұзылулар

Сирек

- интерстициальді өкпе ауруы (өлімге әкелетін жағдайлар сипатталған)

Асқазан-ішек жолы тарапынан болатын бұзылулар

Өте жиі

- жүрек айнуы, құсу және диарея (бәрі ауыр болуы мүмкін)

- іштің қатуы, іштің ауыруы1

- ауыз қуысының шырышты қабығының қабынуы (стоматит)

1 Топотеканды қолданумен туындаған нейтропения асқынулары сияқты өліммен аяқталатын жағдайларды қоса, нейтропениялық колиттің дамуы туралы хабарламалар алынған.

Тері және теріасты тіндері тарапынан болатын бұзылулар

Өте жиі

- алопеция

Жиі

- терінің қышынуы

Зат алмасуы және тамақтану тарапынан болатын бұзылулар

Өте жиі

- анорексия (ауыр болуы мүмкін)

Инфекциялық және паразиттік аурулар

Өте жиі

- инфекция

Жиі

- сепсис2

2 Топотеканмен ем қабылдаған пациенттерде өліммен аяқталатын сепсис жағдайлары туралы хабарламалар алынған.

Жалпы бұзылыстар және енгізген жердегі бұзылулар

Өте жиі

- гипертермия, астения, қажу

Жиі

- дімкәстану

Өте сирек

- экстравазация3

3Экстравазация өте сирек сипатталған. Реакциялар әлсіз болған және арнайы емді талап етпеген.

Иммунитет жүйесі тарапынан болатын бұзылулар

Жиі

- тері бөртпесін қоса, аса жоғары сезімталдық реакциялары

Сирек

- анафилактикалық реакциялар, ангионевроздық ісіну, есекжем

Бауыр және өт шығару жолдары тарапынан болатын бұзылулар

Жиі

- гипербилирубинемия

Төменде атап көрсетілген жағымсыз құбылыстардың даму жиілігі жалпы жай-күйі нашар пациенттерде жоғары болуы мүмкін.

Төменде келтірілген гематологиялық және гематологиялық емес жағымсыз құбылыстарға жататын кездесу жиілігі топотеканмен емдеумен байланысты/байланысты болуы мүмкін ретінде бағаланған жағымсыз құбылыстар туралы хабарламаларды білдіреді.

Гематологиялық жағымсыз құбылыстар

Нейтропения

Ауыр нейтропения (нейтрофилдер саны <0,5x109/л) 1 курс кезінде 55% пациентте және 20%-да ≥ 7 күн ұзақтықпен, ал жалпы алғанда 77% пациентте байқалды (39% курс). Ауыр нейтропениямен, қызбамен немесе инфекциямен бірге нейтропения 1 курс кезінде 16% пациентте және жалпы алғанда 23% пациентте дамыды (6% курс). Ауыр нейтропенияның дамуына дейінгі уақыт медианасы тоғыз күнді құрады, ұзақтық медианасы жеті күнді құраған. Ауыр нейтропения жалпы алғанда курстардың 11%-ы жеті күннен артық уақытқа созылды. Клиникалық зерттеулерде ем қабылдаған пациенттердің (ауыр нейтропениясы бар пациенттерді және ауыр нейтропения дамымаған пациенттерді қоса) 11%-да (4% курс) қызба өршіген және 26%-да (9% курс) инфекция дамыған. Бұдан бөлек, ем қабылдаған пациенттердің 5%-да (1% курс) сепсис өршіген.

Тромбоцитопения

Ауыр тромбоцитопения (тромбоциттер саны 25 x 109/л-ден аз) 25% пациентте (8% курс), орташа (тромбоциттер саны 25,0 - 50,0 x 109/л) 25% пациентте (15% курс). Ауыр тромбоцитопения дамығанға дейін уақыт медианасы 15 күнді құраған және ұзаққа созылу медианасы бес күнді құраған. Тромбоциттер трансфузиясы курстың 4%-ына жүргізілген. Ісіктен қан кету салдарынан өліммен аяқталатын жағдайларды қоса, тромбоцитопениямен байланысты маңызды асқынулар туралы хабарламалар жиі түскен жоқ.

Анемия

Орташа және ауыр анемия (Hb ≤ 8,0 г/дл) 37% пациентте байқалды (14% курс). Эритроциттер трансфузиясы 52% пациентке жүргізілді (21% курс).

Гематологиялық емес жағымсыз құбылыстар

Жиі сипатталатын гематологиялық емес әсерлер жүрек айнуы (52%), құсу (32%) және диарея (18%), іштің қатуы (9%) және ауыз қуысының шырышты қабығының қабынуы (14%) сияқты асқазан-ішек жолы тарапынан болатын құбылыстарды қамтыған. Ауыр (3 немесе 4 дәреже ) жүрек айнуы, құсу, диарея және ауыз қуысының шырышты қабығының қабынуының даму жиілігі тиісінше 4, 3, 2 және 1% құраған.

Жеңіл іш ауыруының дамуы 4% пациентте байқалды.

Топотеканмен емдеген кезде қажу 25% пациентте, астения 16% пациентте байқалды. Ауыр (3 немесе 4 дәреже) қажу және астения дамуының жиілігі тиісінше 3 және 4% құраған.

Толық немесе айқындалған алопеция 30% пациентте, ішінара алопеция 15% пациентте анықталды.

Топотеканмен емдеумен байланысты немесе байланысты болуы мүмкін деп тіркелген басқа да ауыр жағымсыз құбылыстарға анорексия (12%), жайсыздық сезімі (3%) және гипербилирубинемия (1%) кіреді.

Бөртпе, есекжем, ангионевроздық ісіну және анафилактикалық реакцияларды қоса, аса жоғары сезімталдық реакциялары туралы сирек хабарланды. Клиникалық зерттеулерде бөртпе 4% пациентте, қышыну 1,5% пациентте анықталды.

Күдікті жағымсыз реакциялар туралы хабарлама дәрілік препаратты тіркегеннен кейін маңызды болып табылады. Бұл дәрілік препаратты қолданған кезде пайда/қауіп арақатынасын мониторингілеуді жалғастыруға мүмкіндік береді. Медицина қызметкерлеріне ҚР аумағындағы өкілетті ұйымға кез келген болжамды жағымсыз құбылыстары туралы хабарлау ұсынылады (нұсқаулықтың соңындағы Қазақстан Республикасы аумағында тұтынушылардан шағымдарды қабылдайтын ұйымның байланыс деректерін қараңыз).

Қолдануға болмайтын жағдайлар

- топотеканға немесе препараттың құрамына кіретін басқа компоненттерге жоғары сезімталдық

- бірінші курсты тағайындағанға дейін сүйек кемігі функциясының айқын бәсеңдеуі (нейтрофилдер санының төмендеуі <1,5х109/л және/немесе тромбоциттер санының төмендеуі <100 х 109/л)

- жүктілік және лактация кезеңі

- 18 жасқа дейінгі балалар

Дәрілермен өзара әрекеттесуі

Топотекан адамдағы Р450 цитохромы жүйесінің изоферменттерін тежемейді және гранисетронмен, ондасетронмен, морфинмен немесе кортикостероидтармен біріктіріп тағайындау Гикамтин® препаратының фармакокинетикасына сенімді әсер көрсеткен жоқ.

Гикамтин® препаратын басқа цитоуытты заттармен (мысалы, паклитакселмен немесе этопозидпен) біріктіріп қолданған кезде миелосупрессияның айқындылығы артуы мүмкін, бұл топотекан дозасын төмендетуді талап етеді.

Топотеканды басқа да химиотерапиялық препараттармен біріктіргенде көтере алушылықты жақсарту үшін әр дәрілік препараттың дозасын азайту қажет болуы мүмкін. Алайда платина препараттарымен біріктіргенде топотеканмен емдеудің 1-ші немесе 5-ші күндері платина препараттарын қолданған-қолданбағанына қарай бірізділікке байланысты белгілі бір өзара әрекеттесу бар. Егер цисплатин немесе карбоплатин топотеканмен емдеудің 1-ші күні енгізсе, көтерімділігін жақсарту үшін егер платина препаратын топотеканмен емдеудің 5-ші күні енгізетін болғанда қолдануға болатын әр препараттың дозасымен салыстырғанда әр препараттың барынша төмен дозасын қолдану керек.

Топотеканды (қатарынан 5 күн бойы тәулігіне 0,75 мг/м2) және цисплатинді (1 күні тәулігіне 60 мг/м2) қолданған кезде аналық без обыры бар 13 пациентте 5-күні AUC (12%, n=9) және Cmax (23%, n=11) азғана жоғарылауы байқалды. Мұндай жоғарылаудың клиникалық маңызды болып табылу ықтималдығы аз.

Айрықша нұсқаулар

Гикамтин® препаратын цитоуытты препараттармен жұмыс істеу тәжірибесі бар дәрігерлер тағайындауы тиіс.

Емнің бірінші желісі ретінде Гикамтин® препаратымен монотерапия тағайындауға болмайды.

Гикамтин® препаратының гематоуыттылығы дозаға байланысты және тромбоциттер санын қамтитын қанның толық талдауы ұдайы жүргізіліп отыруы тиіс.

Басқа да цитоуытты препараттар сияқты Гикамтин® сепсисті және сепсиске байланысты өлімге алып келетін ауыр миелосупрессияны туғызуы мүмкін.

Топотеканмен емдеу салдарынан болған нейтропения нейтропениялық колиттің дамуына әкелуі мүмкін. Топотеканды клиникалық зерттеу кезінде нейтропениялық колит себепті өліммен аяқталатын жағдайлар тіркелген. Қызбасы, нейтропениясы және тиісті сипаттағы іш ауыруы бар пациенттерде нейтропениялық колиттің болу мүмкіндігін қарастыру керек.

Топотеканды қолдану кейбір жағдайларда өліммен аяқталған интерстициальді өкпе ауруы (ИӨА) жағдайлары туралы хабарламамен байланысты болды.

Қауіп факторларына мыналар жатады: сыртартқысында ИӨА, өкпе фиброзы, өкпе обыры болуы, кеуде қуысының радиациялық сәулеленуге ұшырауы және пневмоуытты препараттарды және/немесе колонистимуляциялайтын факторларды қолдану. Пациенттер өкпенің күдікті симптомдары немесе өкпенің интерстициальді ауруларына (жөтел, қызба, диспноэ және/немесе гипоксия) бақылаудан өтуі тиіс және ИӨА-ның жаңа диагнозы расталғанда Гикамтин® препаратын қабылдауды тоқтату қажет.

Гикамтин® цисплатинмен үйлестірілгенде тромбоцитопениямен жиі астасады, мұны қан кету қаупі жоғары пациенттерді емдеген жағдайда қаперге алу керек.

Күтілгендей, әлсіреген пациенттерде қызба, инфекция және сепсис түріндегі асқынулар жиілігінің жоғарылауы және жауап деңгейінің барынша төмендеуі болды.

Бүйрек функциясы айқын төмендеген (креатинин клиренсі < 20 мл/мин) немесе бауыр функциясы төмендеген (сарысулық билирубині > 10 мг/дл) пациенттерге Гикамтин® препаратын қолдану жөніндегі тәжірибе жеткіліксіз. Пациенттердің бұл тобына Гикамтин® препаратын қолдану ұсынылмайды.

Гикамтин® препаратын басқа да цитоуытты препараттармен үйлестірген кезде оның дозасын түзету қажет.

Айқын нейтропения өршіген кезде инфекциялық асқынуларды дер кезінде диагностикалау үшін мұқият қадағалау керек.

Ұрпақ өрбіту жасындағы әйелдер мен еркектер Гикамтин® препаратымен емдеу кезінде контрацепцияның сенімді құралдарын қолданулары керек.

Жүктілік және лактация

Гикамтин® эмбриоуытты және фетоуытты әсер етеді. Жүкті әйелдерге қолданған кезде Гикамтин® ұрыққа зиян тигізуі мүмкін, осыған байланысты контрацепцияның сенімді тәсілдерін қолдану керек. Егер жүктілік басталса, бұл туралы дереу дәрігерге хабарлау керек.

Гикамтин® препаратын бала емізу кезінде қолдануға болмайды.

Көлік құралдары мен механизмдерді басқару қабілетіне әсер етуі

Препараттың жағымсыз әсерлерін (қатты қажу мен әлсіздік) ескере отырып, автокөлікті басқару мен жоғары зейін шоғырландыру мен психомоторлық реакция жылдамдығын талап ететін қауіптілігі зор қызмет түрлерімен айналысуды тоқтата тұру қажет.

Артық дозалануы

Симптомдары: сүйек кемігінің супрессиясы, мукозит, стоматит бастапқы асқынулары болуы мүмкін.

Емі: Гикамтин® препараты артық дозаланғанда у қайтарғысы белгісіз. Емі симптоматикалық.

Шығарылу түрі мен қаптамасы

4 мг топотекан гидрохлоридінен (топотекан негіз түрінде) сұр түсті бутилді каучук тығынмен герметикалық тығындалған және пластик қақпағы бар алюминий қалпақшалармен қаусырылған көлемі 17 мл шыны құтыға салынған.

Пластик тұғырдағы 1 немесе 5 құтыдан медициналық қолдану жөніндегі мемлекеттік және орыс тілдеріндегі нұсқулықпен бірге картон қорапшада.

Сақтау шарттары

Жарықтан қорғалған жерде, 30°С-ден аспайтын температурада сақтау керек.

Препарат қалпына келтірілгеннен кейін шұғыл қолданылуы тиіс, өйткені оның құрамында микробқа қарсы қорғаныстық компоненттер жоқ. Қалпына келтіру және сұйылту кезінде асептиканы қатаң сақтағанда (мысалы, ауаның ламинарлы тасқынында) бөлме температурасында сақтағанда препаратты 12 сағаттың ішінде немесе құтыны алғаш тескеннен кейін 2-8°С температурада сақтағанда 24 сағаттың ішінде пайдалануға болады.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін препаратты қолдануға болмайды.

Дәріханалардан босатылу шарттары

Рецепт арқылы

Өндіруші/қаптаушы

ГлаксоСмитКляйн Мэньюфэкчуринг С.п.А., Италия

(Strada Provinciale Asolana 90, 43056 San Polo di Torrile, Parma, Italy).

Тіркеу куәлігінің иесі

Новартис Фарма АГ, Базель, Швейцария

Қазақстан Республикасы аумағында тұтынушылардан өнім (тауар) сапасы жөнінде шағымдарды қабылдайтын және дәрілік заттың қауіпсіздігін тіркеуден кейінгі бақылауға жауапты ұйымның мекенжайы

Қазақстандағы Новартис Фарма Сервисэз АГ филиалы

050051 Алматы қ., Луганский, к-сі 96 үй

тел.: (727) 258-24-47 

факс: (727) 244-26-51

e-mail: drugsafety.cis@novartis.com

 

 

Прикрепленные файлы

556265661477976369_ru.doc 103.5 кб
526472491477977565_kz.doc 138 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники