Гепарин-Биолек (5000 МЕ/мл)

• русский
• қазақша

• Скачать инструкцию медикамента

Саудалық атауы

Гепарин-Биолек

Халықаралық патенттелмеген атауы

Натрий гепарині

Дәрілік түрі

Инъекцияға арналған 5000 ХБ/мл ерітінді

Құрамы

1 мл ерітіндінің құрамында

белсенді зат – 5000 ХБ натрий гепарині,

қосымша заттар: бензил спирті, натрий хлориді, инъекцияға арналған су.

Сипаттамасы

Мөлдір, түссіз немесе ашық-сары түсті сұйықтық.

Фармакотерапиялық тобы

Антикоагулянттар. Әсері тікелей антикоагулянттар (гепарин және оның туындылары). Гепарин

АТХ коды В01АВ01

Фармакологиялық қасиеттері

Фармакокинетикасы

Гепарин тез, бірақ біршама қысқа уақыт әсер етеді. Плазмада ең жоғары шектегі концентрацияға көктамырға енгізгеннен кейін тез арада, тері астына енгізгеннен кейін 40-60 минуттан соң жетеді. Препараттың 95%-ы плазма ақуыздарымен байланысады. Жартылай шығарылу кезеңі 1-2 сағат. Антикоагулянттық белсенділігінің ұзақтығы емделушінің жеке ерекшеліктеріне байланысты. Гепарин белсенді емес метаболиттер түрінде бүйрек арқылы шығарылады. Ана сүтіне өтпейді. Жоғары дозаларды қолданғанда метаболизмге ұшырамаған гепарин несептен табылады.

Фармакодинамикасы

Гепарин – тікелей әсер ететін антикоагулянт, гемокоагуляцияның барлық кезеңдерінде қанның ұю факторларына тікелей әсер етеді. Шошқаның ішегінің шырышты қабығынан алынады. Гепариннің үлкен дозалары, әдеттегідей, фибролизді тежейді. Гепарин тромбоциттердің агрегациясын азайтады, қантамырлардың өткізгіштігін арттырады, коллатералдық қан айналымды стимуляциялайды, спазмолитикалық әсері бар. Препарат гиалуронидазаның белсенділігін тежейді және, липопротеиндік липаза белсенділігінің артуы салдарынан, қан сарысуындағы холестериннің, триглицеридтердің мөлшерін азайтады.

Қолданылуы

• әртүрлі тромбоэмболиялық жағдайларды және олардың асқынуларын емдеуге және алдын алуға

• жедел миокард инфарктісінде, магистральді көктамырлардың және артериялардың, ми, көз қантамырларының тромбоздарында және эмболияларында, тромбоздық үдерістер орныққан жерде тромбтың түзілуіне жол бермеу үшін

• жүрекке және қантамырларына жасалатын операцияларда

• тікелей құйған кезде және зертханалық зерттеулерде қанның ұюына жол бермеу үшін

• аяқ-қолдардың жедел және созылмалы тромбофлебиттерінде

Мыналарды емдеген кезде кешенді ем құрамында

• тұрақсыз стенокардиясы бар науқастар

• жүректің ишемиялық аурулары

• церебральді қантамырларлың атеросклерозы

• пневмониялар

• пародонтоздың қабыну-дистрофиялық түрінің бастапқы сатысы.

Қолдану тәсілі және дозалары

Емдеу мақсатында ересектерге сағатына 15 ХБ/кг дозада (денесінің орташа салмағы (70 кг) ересектерге шамамен сағатына 1000 ХБ) көктамыр ішіне, тамшылатып енгізеді. Антикоагулянттық әсерге тез жету үшін тура инфузия жасар алдында 1 мл препаратты (5000 ХБ) көктамыр ішіне сорғалатып енгізеді. Емнің антикоагулянттық әсері, егер қанның ұю уақыты нақты науқастағы қалыпты көрсеткіштермен салыстырғанда 2-3 есеге ұзарса, тиімді болып табылады. Бұл көрсеткішті препаратпен инъекцияны әрбір қайталаудан 0,5-1 сағат бұрын бақылап отыру керек. Белсенділенген парциальді тромбопластиндік уақытты ұдайы бақылап отыру қажет, өйткені соңғысының 1,5-2 есе ұзаруы Гепарин-Биолектің антикоагулянттық әсерінің тиімді екендігін көрсетеді. Артық дозаланудан алдын ала сақтану мақсатында қанның кететіндігін (шырышты қабықтардан қан кету, гематурия т.б.) көрсетуі мүмкін клиникалық симптомдарды ұдайы бақылап отыру қажет.

Егер препаратты көктамырішілік енгізу мүмкін болмаса, Гепарин-Биолекті ересектерге тері астына 4 рет 2 мл-ден (10000 ХБ) тәулігіне (4 рет 10000 ХБ) қолданады. Келесі дозаны белгілеу үшін ұю уақытын қайталанатын инъекциядан ½-1 сағат бұрын бақылау қажет. Егер ұю уақыты нақты науқастағы қалыпты көрсеткіштерден екі еседен асатын болса, Гепарин-Биолек дозасын азайту керек, керісінше жағдайда – дозаны арттыру қажет. Препараттың тәуліктік дозасы ересектер үшін 60000-80000 ХБ-дан аспауы тиіс, препараттың ең жоғары дозасын тек амалсыз жағдайларда ғана 10 күннен астамға қолдануға болады.

Препарат дозасын коагулограмма көрсеткіштерін, ауру барысын, емделушінің жасын, дене салмағын және препаратқа сезімталдығын есепке ала отырып белгілейді. Хирургиялық араласымдар жүргізген кезде тромбоэмболияның алдын алу мақсатында операциядан 1-2 сағат бұрын ересектерге тері астына 5000-7500 ХБ Гепарин-Биолек енгізеді. Операциядан кейін науқас белсенді режимге көшкенше препараттың сол бір дозасын әрбір 6-8 сағат сайын енгізеді. Ұзақ уақыт төсекке таңылған емделушілерде, тромбоз қаупі жоғарылайтын ауруларда тромбоэмболиялық асқынулардың алдын алу үшін ересектерге тері астына әрбір 8-12 сағат сайын 5000-7500 ХБ енгізеді. Миокард инфарктісінде ересектерге тері астына тәулігіне 2-3 рет 5000-7500 ХБ немесе тәулігіне 2 рет 12000-12500 ХБ енгізеді. Көктамырлық және артериялық тромбоэмболияларда Гепарин-Биолекті көктамыр ішіне енгізеді. Ересектерге алдымен көктамыр ішіне 5000-10000 ХБ сорғалатып енгізеді, содан кейін перфузор арқылы тәулігіне 25000-40000 ХБ енгізеді; балаларға алдымен көктамыр ішіне 50 ХБ/кг сорғалатып енгізеді, содан кейін перфузор арқылы сағатына 20 ХБ/кг енгізеді. Гепарин-Биолек дозасы балалар үшін, әдеттегідей, тәулігіне 4-6  енгізуге бөлінген 300 ХБ/кг құрайды.

Көктамыр ішіне ұзақ енгізу мүмкін болмағанда интермиттирленген немесе теріастылық енгізуді қолдануға болады.

ДВС-синдромда (алғашқы фазасы) ересектерге қанның зертханалық көрсеткіштеріне байланысты тәуліктік 2500-4000 ХБ дозада енгізеді.

ДВС-синдромда балаларға арналған доза 4 енгізілетін 100-150 ХБ/кг құрайды.

Жағымсыз әсерлері

• жергілікті реакциялар: қан құйылулар (тері астылық және шырышты қабықта), сондай-ақ инъекция жасалған жерде аздаған гематомалар

• бас айналу, бас ауыру, дімкәстік

• қызба

• жүректің айнуы, құсу, диарея

• тромбоцитопения

Сирек

• остеопороз

• гипоальдостеронизм, метаболизмдік ацидоз

• аллергиялық реакциялар: жалпы да және жергілікті де: қантамырлық түйілулер, есекжем, дене температурасының жоғарылауы, ринит, конъюнктивит, бронхтың түйілуі, анафилактоидтық реакциялар, анафилактикалық шок

• геморрагиялар, гематурия, қызыл иектердің қанағыштығы, мұрыннан қан кету, бүйректерге, бүйрек үсті бездеріне қан құйылу, қан түкіру

• трансаминазалар деңгейінің жоғарылауы

• алопеция

• приапизм

Кейде

- емнің бас кезінде өткінші тромбоцитопения (тромбоциттер саны 80000/мкл ‑ 150000/мкл болатын І тип)

Бірен-саран жағдайларда

• ауыр иммундық тромбоцитопения (II тип – ақ тромбтың түзілу синдромы – тромбоциттер саны 80000/мкл-ден төмен, немесе олардың саны бастапқы деңгейдің 50%-нан көпке тез төмендейді)

• бос май қышқылдарының және тироксиннің көбеюі, калийдің қайтымды іркілуі, қанда холестерин деңгейінің төмендеуі және глюкоза деңгейінің артуы

Қолдануға болмайтын жағдайлар

• препаратқа жоғары сезімталдық, оның ішінде сыртартқылық деректер немесе гепарин индукцияланған иммундық тромбоцитопенияға күдіктену

• қан кетуге бейімдік (мысалы, гемофилия, тромбоцитопения, қылтамырлардың жоғары өткізгіштігі)

• геморрагиялық инсульт, энцефаломаляция, жедел бассүйекішілік қан кету

• орталық жүйке жүйесіне және көзге хирургиялық араласымдар

• пролиферативтік диабеттік ретинопатия

• пептикалық ойық жаралар, асқазан-ішектен қан кету

• висцеральді карцинома

• өкпеден қан кету

• туберкулездің белсенді түрі

• бауыр мен ұйқы безінің ауыр аурулары

• бүйректің ауыр паталогиясы және бүйректен қан кету

• ІІІ дәрежелі артериялық гипертония

• бактериялық эндокардит

• жүктілік және босану кезеңі

• жедел және созылмалы лейкоз

• апластикалық және гипопластикалық анемия

• 3 жасқа дейінгі балалар

Дәрілермен өзара әрекеттесуі

Пероральді антикоагулянттар (дикумарин) мен антитромбоцитарлық препараттарды (ацетилсалицил қышқылы, дипиридамол) кез келген хирургиялық араласымдардың алдында кемінде 5 күн бұрын тоқтатқан жөн, өйткені олар операция кезінде немесе операциядан кейінгі кезеңде қан кетуге бейімділікті күшейтуі мүмкін. Аскорбин қышқылын, антигистаминдік дәрілерді, дигиталисті, никотин тәріздес заттарды немесе тетрациклиндерді бір мезгілде қабылдағанда гепариннің әсері тежелуі мүмкін. Декстран, фенилбутазон, индометацин, ибупрофен, сульфинпиразол, пробеноцид, этакрин қышқылының, пенициллиннің және цитостатиктердің инъекциялық түрлері гепарин әсерін потенциялауы мүмкін. Гепарин фенитоиннің, квинидиннің, пропранололдың, бензодиазепиндердің және билирубиннің ақуыздармен байланысатын жерлерінде олардың орнын алмастырады. Үшциклдік антидепрессанттар гепаринмен байланысуы мүмкін, бұл олардың тиімділіктерінің өзара төмендеуіне әкеп соғады.

Айрықша нұсқаулар

Гепарин-Биолекті бұлшықет ішіне енгізуге рұқсат етілмейді

Гепарин-Биолек препаратымен емдер алдында және емдеу кезінде қанның ұю көрсеткіштерін, тромбоциттер санын, әсіресе емді бастағаннан кейін 6-ші және 14-ші күндер арасында бақылау қажет. Егер тромбоциттер санының күрт төмендегені байқалса, емдеуді дереу тоқтатқан жөн.

60 жастан асқан әйелдерде гепарин қанағыштықты арттыруы мүмкін.

Артериялық гипертензиясы бар науқастарда артериялық қысымды бақылау қажет.

Мүмкіндігінше, сондай-ақ биопсияларды, эпидуральді анестезияларды және диагностикалық люмбальді пункцияларды болдырмаған жөн.

Гепарин-Биолек препаратының дозасын коагуляциялық тест нәтижелеріне байланысты түзеткен жөн, өйткені гепариннің артық мөлшері қан кетуді өршітуі мүмкін.

Гепарин-Биолек препаратын қолдану операциядан кейінгі және босанғаннан кейін алғашқы 3-8 күн ішінде сақ болуды қажет етеді (қантамырларына жасалған операцияларды және гепаринмен емдеу өмір көрсетілімдері бойынша қажет болған жағдайларды қоспағанда).

Препаратты тоқтату біртіндеп жүргізілуі тиіс.

Жүктілік және лактация кезеңі

Жүктілік және босану кезеңдерінде қолдануға болмайды. Босанғаннан кейінгі кезеңдерде (босанғаннан кейін 36 сағат ішінде) аса сақ болған жөн. Лактация кезеңінде қолдануға болмайды.

Дәрілік заттың көлік құралын немесе қауіпті механизмдерді басқару қабілетіне ықпал ету ерекшеліктері

Гепарин-Биолек препаратының жағымсыз әсерлерін ескеріп, көлік құралын басқарғанда және зейінді жұмылдыруды және психомоторлы реакциялар шапшаңдығын қажет ететін қызмет түрлерімен айналысқанда сақ болған жөн.

Артық дозалануы

Симптомдары: ауыр геморрагиялық асқынулар, қан кетулер.

Емі: геморрагиялық асқынулардың ауырлығына байланысты Гепарин-Биолек препаратының дозасын не төмендету керек, немесе оны тоқтату керек. Егер Гепарин-Биолек препаратын тоқтатқан соң қан кету жалғасатын болса, көктамыр ішіне гепариннің антагонисі – протамин сульфатын (немесе хлоридін) енгізеді (1 мл протамин сульфаты 100 ХБ гепаринді бейтараптандырады). Гепарин-Биолек препаратын көктамыр ішіне енгізгеннен кейін 90 минут ішінде протамин сульфатының есептелген дозасының 50%-ын, кейінгі 3 сағатта 50%-ын енгізеді.

Жекелей жақпаушылық немесе аллергиялық асқынулар пайда болғанда Гепарин-Биолекті тоқтатады және десенсибилизациялаушы дәрілерді тағайындайды. Антикоагуляциялық емді жалғастыру қажет болған жағдайда әсері тікелей емес антикоагулянттарды қолданады.

Шығарылу түрі және қаптамасы

Резеңке тығынмен тығындалған және алюминий қалпақшамен қаусырылған түссіз шыны құтыларда 5 мл-ден.

5 құты медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеде.

Сақтау шарттары

Жарықтан қорғалған жерде, 15°С-ден 25°С-ге дейінгі температурада сақтау керек.

Балалардың қолы жетпейтін жерде сақтау керек. Ашқаннан кейін сақтауға келмейді.

Сақтау мерзімі

2 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханадан босатылу шарттары

Рецепт арқылы

Өндіруші

«Фармстандарт-Биолек» ЖАҚ

Померки,  Харьков қ-сы, Украина, 61070

Тіркеу куәлігінің иесі

«Фармстандарт-Биолек» ЖАҚ, Украина

Тұтынушылардан өнім сапасы жөнінде шағымдарды Қазақстан Республикасы аумағында қабылдайтын ұйымның мекенжайы

«Қарағанды фармацевтикалық кешені» ЖШС

100009, Қазақстан Республикасы, Қарғанды қ-сы, Ботаническая к-сі, үй 12

Тел.: + 7 (7212) 507322; e-mail: kphk@kphk.kz