Вильпрафен®

• русский
• қазақша

• Скачать инструкцию медикамента

Саудалық атауы

Вильпрафен®

Халықаралық патенттелмеген атауы

Джозамицин

Дәрілік түрі

Қабықпен қапталған таблеткалар, 500 мг

Құрамы

Бір таблетканың құрамында

белсенді зат - 500 мг джозамицин,

қосымша заттар: микрокристалды целлюлоза, полисорбат 80, сусыз коллоидты кремнийдің қостотығы, натрий карбоксиметилцеллюлозасы, магний стеараты

қабықтың құрамы: метилцеллюлоза, полиэтиленгликоль 6000, тальк, титанның қостотығы (Е 171), алюминий гидроксиді, метакрил қышқылы және оның эфирлері сополимері.

Сипаттамасы

Ұзынша, екі беті дөңес, екі жағында сызығы бар, қабықпен қапталған түсі ақ немесе ақ дерлік таблеткалар.

Фармакотерапиялық тобы

Микробтарға қарсы жүйелі пайдалануға арналған препараттар. Макролидтер, линкозамидтер және стрептограминдер. Макролидтер. Джозамицин

АТХ коды J01FA07

Фармакологиялық қасиеттері

Фармакокинетикасы

Джозамицин ішке қабылдағаннан кейін асқазан-ішек жолынан жылдам және толық сіңеді, ас қабылдау биожетімділігіне әсер етпейді.

Сарысуда джозамициннің ең жоғары концентрациясына қабылдағаннан кейін 1-2 сағаттан соң жетеді. Джозамициннің 15%-ға жуығы плазма ақуыздарымен байланысады. Заттың жоғары концентрациялары өкпеде, бадамша бездерінде, сілекейде, тер және көз жасы сұйықтығында анықталады. Қақырықтағы концентрация плазмадағы концентрациядан 8-9 есе асып түседі. Сүйек тінінде жинақталады. Плацентарлық бөгеттен өтеді, емшек сүтіне бөлінеді. Джозамицин бауырда белсенділігі аздау метаболиттерге дейін метаболизденеді және негізінен өтпен сыртқа шығарылады. Препараттың несеппен шығарылуы 20 %-дан аздау.

Фармакодинамикасы

Препарат бактериялық жұқпаларды емдеу үшін қолданылады; джозамициннің бактериостатикалық белсенділігі басқа макролидтер секілді бактерия ақуызын тежеуге негізделген. Қабыну ошағында жоғары концентрацияның құрылуы бактерицидтік әсер береді.

Вильпрафен® жасушаішілік микроорганизмдерге (Chlamydia trachomatis және Chlamydia pneumoniae, Mycoplasma pneumoniae, Mycoplasma hominis, Ureaplasma urealyticum, Legionella pneumophila); грамоң бактерияларға (Staphylococcus aureus, Streptococcus pyogenes және Streptococcus pneumoniae (pneumococcus), Corynebacterium diphteriae), грамтеріс бактерияларға (Neisseria meningitidis, Neisseria gonorrhoeae, Haemophilus influenzae, Bordetella pertussis) қатысты, сондай-ақ кейбір анаэробты бактерияларға (Peptococcus, Peptostreptococcus, Clostridium perfringens) қарсы белсенді. Энтеробактерияларға елеусіз әсер етеді, сондықтан асқазан-ішек жолының табиғи бактериялық флорасын аз өзгертеді. Эритромицинге төзімділік кезінде тиімді. Джозамицинге төзімділік макролидтер тобының антибиотиктеріне қарағанда сирек дамиды.

Қолданылуы

Препаратқа сезімтал микроорганизмдер туындатқан жедел және созылмалы жұқпалар:

- стоматологиялық жұқпаларда

- ЛОР-мүшелері жұқпаларында

- тыныс алу жолы жұқпаларында

- маститте

- жұмсақ тіндер жұқпаларында

- жыныс мүшелері жұқпаларында

- өт жолдары жұқпаларында

- пенициллиндерге аллергиялық реакцияларда

Қолдану тәсілі және дозалары

Вильпрафен® таблеткаларын тұтастай жұта отырып, судың аз мөлшерімен ішу керек.

Ересектер және 14 жастан асқан балалар – 1-ден 2 г дейінгі джозамицин. Тәуліктік доза 2-3 қабылдауға бөлінуі тиіс. Бастапқы ұсынылатын доза тәулігіне 1 г құрайды. Қажет болған жағдайда дозаны тәулігіне 3 г дейін арттыруға жол беріледі.

6 жастан 14 жасқа дейінгі балаларға – 3 қабылдауға бөле отырып, тәулігіне дене салмағына 30 - 50 мг/кг дозада тағайындайды.

Кәдімгі және шар тәріздес безеу жағдайында Вильпрафенді® алғашқы 2-4 апта бойы күніне екі рет 500 мг дозада, мұнан әрі –демеуші ем ретінде 8 апта бойы күніне бір рет 500 мг тағайындалады.

Әдетте емдеу ұзақтығын дәрігер белгілейді. Емдеу курсын симптомдары жоғалып, температура қалыпқа келгеннен кейін 48 сағат бойы жалғастыру қажет. Стафилококтық жұқпаның емдеу курсы дәрігердің кеңесінсіз 10 күннен аспауы тиіс.

Жағымсыз әсерлері

Сирек

- тәбеттің болмауы, жүрек айну, қыжыл, құсу, дисбактериоз, метеоризм, диарея, жалған жарғақшалы колит

- терінің аллергиялық реакциялары (есекжем)

- қан плазмасында, сирек жағдайларда өт ағып шығуының бұзылуы және сарғаюмен қатар жүретін бауыр ферменттері белсенділігінің транзиторлық жоғарылауы, холестатикалық гепатит

- естудің өтпелі бұзылуы

- кандидоз

- гиповитаминоз

Қолдануға болмайтын жағдайлар

• макролидтер тобының антибиотиктері мен препараттың басқа компоненттеріне жоғары сезімталдық

• бауыр қызметінің ауыр бұзылуы

Дәрілермен өзара әрекеттесуі

Вильпрафенді® линкомицинмен бірге тағайындамаған жөн, екеуінің де әсері төмендеуі мүмкін. Макролидтер тобы антибиотиктерінің кейбір өкілдері ксантиндердің (теофиллиннің) шығарылуын төмендетеді, бұл уыттанудың болуына әкелуі мүмкін. Клиникалық-эксперименттік зерттеулер макролидтің басқа антибиотиктеріне қарағанда Вильпрафеннің® теофиллин бөлінуіне аз әсер ететінін көрсетіп отыр.

Вильпрафен® және терфенадин, астемизол немесе цизаприд секілді антигистаминдік препараттарды бірге тағайындағаннан кейін соңғылардың шығарылуы баяулағаны байқалуы мүмкін, мұның өз кезегінде QT аралығының ұзаруы себепші болған өмірге қауіп төндіретін жүрек аритмиясының дамуына әкелуі мүмкін.

Пенициллинмен, цефалоспоринмен бір мезгілде қолдану джозамициннің әсерін төмендетеді. Қастауыш алкалоидтары мен макролид антибиотиктерін бірге тағайындағаннан кейін вазоконстрикцияның күшейгені туралы жекелей хабарламалар бар. Вильпрафенді® қабылдағанда емделушіде эрготаминге төзімділік болмаған бір жағдай байқалған. Сондықтан бұл препараттарды бірге қолдану ұдайы бақыланып отырылуы тиіс.

Вильпрафен® мен циклоспоринді бірге тағайындау қан плазмасындағы циклоспорин деңгейінің жоғарылауын және қанда циклоспориннің нефроуытты концентрациясының құрылуын туындатуы мүмкін. Плазмадағы циклоспорин концентрациясын ұдайы бақылап отырған жөн.

Вильпрафен® мен дигоксинді бірге тағайындаған кезде соңғысының қан плазмасындағы деңгейі жоғарылау мүмкіндігі бар.

Сирек жағдайларда гормондық контрацептивтердің ұрықтануға қарсы әсері макролидтермен емдеу уақытында жеткіліксіз болуы мүмкін. Бұл жағдайда контрацепцияның гормондық емес дәрілерін қосымша пайдалану ұсынылады.

Айрықша нұсқаулар

Бүйрек жеткіліксіздігімен емделушілерге бүйрек қызметін бақылап және тиісті зертханалық тест нәтижелерін ескере отырып жүргізген жөн.

Макролидтер тобы антибиотиктеріне айқаспалы төзімділіктің даму мүмкіндігін ескеру керек.

Өт-бауыр жеткіліксіздігі бар емделушілерді емдеген кезде 15 және одан көп күн бойы өт жүйесі қызметіне талдау жүргізу ұсынылады. Джозамицинмен, сонымен қатар макролид тобының басқа да антибиотиктерімен ұзақ емдеу кезінде сезімтал емес бактериологиялық және зеңдік қоздырғыштар пролиферациясы мүмкіндігін жоққа шығаруға болмайды. Мұндай жағдайда емдеу курсын тоқтатып, қажетті шара қабылдау қажет.

Балалар

Джозамицин таблеткалары 6 жасқа дейінгі балаларға ұсынылмайды. Жүктілік және лактация

Әйелдерге жүктілік және емшекпен емізу кезеңінде препаратты көрсетілімдер бойынша дәрігердің қатаң бақылауымен қабылдау керек.

Препараттың автокөлікті және басқа да қауіптілігі зор механизмдерді басқару қабілетіне әсер ету ерекшеліктері

Автомобиль жүргізу және күрделі механизмдерді басқару қабілетіне әсер етпейді.

Артық дозалануы

Симптомдары: жағымсыз әсерлердің күшеюі, әсіресе асқазан-ішек жолы тарапынан.

Емі: симптоматикалық.

Шығарылу түрі және қаптамасы

10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамада.

1 қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады.

Сақтау шарттары

Жарықтан қорғалған жерде, 25 ºС-ден аспайтын температурада сақтау керек.

Балалардың қолы жетпейтін жерде сақтау керек.

Сақтау мерзімі

4 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Теммлер Верке ГмбХ , Германия

81673 Мюнхен, Вайхенштефанер Штрассе 28

Тіркеу куәлігінің иесі

Астеллас Фарма Юроп Б.В., Нидерланды

Сильвиусвег 62, 2333 ВЕ Лейден, Нидерланды

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

«Астеллас Фарма Юроп Б.В.» ҚР өкілдігі

Алматы қ., 050559, Әл-Фараби даңғ. 15, «Нұрлы Тау» ПФО, 4В ғим., №20 кеңсе

Телефон (727) 311-13-89 Факс (727) 311-13-90

www.astellas.ru, e-mail astellas@com.kz