Варфалан

Варфалан

Варфарин

Қан және қан түзу ағзалары. Тромбозға қарсы препараттар. К дәруменінің антагонистері. Варфарин.

АТХ коды В01АА03

Тереңдегі тромбофлебитке және тромбоэмболиялық асқынуларға профилактика және ем жүргізу үшін

Қолдануды бастағанға дейінгі қажетті мәліметтер тізімі

- варфаринге немесе «Дәрілік препараттың құрамы» бөлімінде берілген қосымша заттардың кез келгеніне жоғары сезімталдық

- жүктілік (жүктіліктің бірінші және үшінші триместрі)

- 18 жасқа дейінгі балалар мен жасөспірімдерге

- бауырдың ауыр жеткіліксіздігі

- кез келген жергілікті жедел қан кету

- қан кетулердің жоғары қаупі (геморрагиялық диатездері, өңеш веналарының варикоздық кеңеюі, артериялық аневризмдері бар, жұлын-ми пункциясынан кейін, ойық жара ауруы, ауқымды жаралары (операциялықты қоса), цереброваскулярлық аурулары, бактериялық эндокардиті және қатерлі артериялық гипертензиясы бар пациенттерді қоса)

- сирек тұқым қуалайтын бұзылулар – галактоза жақпаушылығы, лактоза жеткіліксіздігі немесе глюкозо-галактоза мальабсорбциясы.

Қолдану кезіндегі қажетті сақтық шаралары

Варфаринді қабылдап жүрген пациенттер құрамында hypericum perforatum (шілтерлі шайқурай) бар халық медицинасының өнімдерін/заттарын пайдаланбауы керек, өйткені бір мезгілде қабылдау плазмадағы варфариннің концентрациясын төмендетеді, оның салдары емдеуден емдік әсерінің төмендеуі болып табылады.

Басқа дәрілік препараттармен өзара әрекеттесуі

Варфариннің емдік индексі қысқа және бірқатар дәрілік заттармен өзара әрекеттеседі. Емдеуші дәрігердің кеңесінсіз басқа дәрілік заттарды, биологиялық тұрғыдан белсенді тағамдық қоспаларды және дәрумендерді қабылдауды бастау немесе тоқтату, сондай-ақ қолданыстағы препараттардың дозаларын өзгерту ұсынылмайды. Емдеуді мониторингілеу кезеңдерін, таңдап алынған дозаның дұрыстығына дәрігердің және пациенттің сенімділігінің артуына қарай, біртіндеп ұзартуға болады. Басқа дәрілік заттарды қабылдауды бастағанда немесе тоқтатқанда варфариннің дозасын түзету мақсатында антикоагуляцияға мониторингті өте жиі жүргізу ұсынылады.

Варфарин бауыр ферменттерімен метаболизденеді. Басқа препараттарды бір мезгілде тағайындағанда варфариннің әсерін басқа дәрілік заттармен индукциялаудың және/немесе тежеудің әсерлерін ескеру қажет. Бұл қан плазмасында варфарин деңгейлерінің жоғарылауына немесе төмендеуіне әкелуі мүмкін.

Дәрілік заттар варфаринмен фармакодинамикалық және/немесе фармакокинетикалық өзара әрекеттесуге түсуі мүмкін. Варфарин ақуыздармен елеулі дәрежеде байланысады және дәрілермен өзара әрекеттесу механизмдерінің бірі варфаринді осы байланыстан ығыстыруы болуы мүмкін.

Варфариннің әсерін төмендететін препараттар (ХҚҚ азаюы)

Арнайы ескертулер

Кальцифилаксия қантамырлық кальцификацияның және терінің ойық жара болуының сирек синдромы болып табылады, ол өлім-жітімнің жоғарылауымен астасады. Кальцифилаксия негізінен диализде жүрген бүйрек функциясының созылмалы ауруының терминальді сатысындағы пациенттерде немесе С немесе S протеин тапшылығы, гиперфосфатемия, гиперкальциемия, гипоальбуминемия сияқты белгілі қауіп факторлары бар пациенттерде байқалады. Кальцифилаксияның сирек жағдайлары бүйректің қатар жүретін аурулары жоқ болғанда варфарин қабылдаған пациенттерде тіркелді. Кальцифилаксия байқалған жағдайда тиісті емді жүргізуді бастау және варфарин қабылдауды тоқтату туралы мәселені қарастыру керек.

Пациенттер теріде ауыртатын бөртпелер түріндегі жағымсыз реакциялар пайда болған кезде дәрігерге дереу хабарлауы керек. Сирек жағдайларда варфарин терінің күрделі ауруларының, соның ішінде кальцифилаксияның туындауына әкелуі мүмкін, ол теріде ауыртатын бөртпенің пайда болуынан басталуы және басқа күрделі асқынуларға әкелуі мүмкін. Бұл жағымсыз реакция бүйректің созылмалы аурулары бар пациенттерде жиі кездеседі.

Тромбоэмболиялық ауруларды профилактикалаудың пайдасы мен қан кетулер қаупінің жоғарылауы арақатынасына берілген бағадан кейін пациенттің тағайындалған емді қатаң орындау қабілетіне баға беру қажет. Нашақорлықтан, маскүнемдіктен немесе деменциядан зардап шегіп жүрген пациенттер Варфалан препаратын қабылдаудың жазып берген режимін орындауға қабілетсіз.

Дәрілермен өзара әрекеттесу Варфалан препаратының әсерін өзгертуі мүмкін. Сондықтан варфарин қабылдауды бақылауды емнің бас кезінде, соңында немесе басқа дәрілік заттармен емдеуді өзгерткенде күшейту қажет.

Жедел аурулар, гипертиреоз, гипотиреоз, құсу, диарея, сондай-ақ бауырда қан іркілісі бар жүрек функциясының жеткіліксіздігі сияқты әртүрлі жағдайлар варфариннің антикоагулянтты әсеріне ықпалын тигізуі мүмкін. Тамақтану сипатының өзгерулері (мысалы, вегетариандық диета) К дәруменінің сіңуіне және варфариннің әсері шамасының өзгеруіне ықпалын тигізуі мүмкін. Мұндай жағдайларда пациенттерге өте мұқият бақылау жүргізу керек.

Дәрігерлер және пациенттер ҚҚСД және ацетилсалицил қышқылымен бір мезгілде емдеу кезінде әсіресе АІЖ-дан қан кетулердің жоғары қаупі бар екендігін ұғынуы тиіс.

CYP2С9 кодтайтын ген мутациясы бар пациенттерде варфариннің жартылай шығарылу кезеңі ұзағырақ болады. Бұл пациенттерге препараттың көбірек төмен дозалары қажет болады, өйткені әдеттегі емдік дозаларды қабылдаған кезде қан кетулер қаупі ұлғаяды.

VKORC1 үшін генінде белгілі бір мутациялары бар пациенттерде варфаринге жоғары сезімталдық бар және ол төмендетілген демеуші дозада болуы тиіс.

Операциядан бірнеше күн бұрын варфарин қабылдауды тоқтату мүмкіндігін қарастыру керек. Операцияға дейін (стоматологиялық операцияларды қоса), ең кемінде, ХҚҚ-ны бақылау және түзету қажет.

Тромбозға қарсы С протеинінің жеткіліксіздігі бар пациенттерде варфаринмен емдеудің бас кезінде тері некрозының туындау қаупі бар. Мұндай ем, тіпті гепаринді қолданғанда да, варфариннің жүктеме дозасынсыз басталуы тиіс. S протеинінің жеткіліксіздігі бар пациенттер де осы қауіпке ұшырауы мүмкін, және де осы жағдайларда варфаринмен емдеуді баяуырақ бастау ұсынылады.

Бүйрек функциясының жеткіліксіздігі бар пациенттерге ерекше көңіл бөлу қажет. Гиперкоагуляция қаупі жоғарылаған пациенттерде, мысалы, ауыр артериялық гипертензияда, бауыр немесе бүйрек ауруларында ХҚҚ-ны өте мұқият тексеру қажет.

Препараттың құрамында лактоза бар, галактоза жақпаушылығы, лактазаның жалпы тапшылығы немесе глюкоза-галактоза мальабсорбциясы сияқты сирек тұқым қуалайтын бұзылулары бар пациенттер бұл дәрілік препаратты қабылдамаулары тиіс.

Жүктілік немесе лактация кезінде

Ұрпақ өрбіту жасындағы әйелдер варфаринді қабылдау кезеңінде тиімді контрацепция әдісін пайдалануы тиіс.

Варфарин плацента арқылы тез өтеді және шарананың ақауын және өлуін туындатуы мүмкін, шаранаға тератогендік әсерін тигізеді. Жүктіліктің алғашқы және соңғы үш айында варфарин препаратын қолдануға болмайды. Осы кезеңдер арасындағы аралықта варфарин аса қажеттілік болған жағдайда қолданылады. Варфарин шаранада мальформацияны, қан кетулерді және шарананың іште өлуін туындатуы мүмкін. Жүктілік кезінде варфаринді қолдану шаранада нүктелік хондродисплазияға ұқсас варфариндік синдромның дамуына әкелуі мүмкін. Осы синдромның көрініс беруі: назальді гипоплазия (мұрынның ершік тәріздес деформациясы және басқа да шеміршектік өзгерістер), рентгенологиялық зерттеулерде нүктелік хондродисплазия (әсіресе омыртқада және ұзын жіліктерде), қысқа қолұштары және қол саусақтар, көру жүйкесінің атрофиясы, толық немесе ішінара соқырлыққа әкелетін катаракта, психикалық және физикалық дамудың кідіруі және микроцефалия.

Варфарин емшек сүтімен бірге бөлініп шығады, бірақ варфариннің емдік дозаларын қабылдаған кезде емшек еміп жүрген нәрестеге ықпалын тигізеді деп күтілмейді. Варфарин емшек емізу кезінде пайдаланылуы мүмкін.

Көлік құралын немесе потенциалды қауіпті механизмдерді басқару қабілетіне препараттың ықпал ету ерекшеліктері

Автокөлікті немесе басқа механизмдерді басқару қабілетіне Варфалан препаратының ықпалы жоқ немесе елеусіз аз болып табылады.

Қолдану жөніндегі нұсқаулар

Дозалау режимі

Емдеу кезінде бақылау:

Емдеуді бастар алдында коагулограмманы, Халықаралық қалыптасқан қатынасты (ХҚҚ) анықтайды. Варфариннің емдік индексі төмен, сондықтан емдеу кезінде ұдайы бақылау жүргізу керек. Варфаринге сезімталдық әртүрлі пациенттерде және сол бір пациентте де өзгеріп отырады. Жекелеген пациенттерде сезімталдық генетикалық факторлардың, бауыр функциясының бұзылулары, жүрек функциясының іркілген жеткіліксіздігі немесе дәрілік өзара әрекеттесулер салдарынан жоғары болуы мүмкін.

Бұрын варфарин қабылдамаған пациенттер:

Бастапқы доза алғашқы 4 күн ішінде тәулігіне 5 мг (күніне 2 таблетка) құрайды. Емдеудің 5-ші күні ХҚҚ анықталады және осы көрсеткіштерге сәйкес дозаларды жекелей таңдайды. Әдетте препараттың демеуші дозасы күніне 2,5-7,5 мг (күніне 1-3 таблетка) құрайды.

Бұрын варфаринді қабылдаған пациенттер:

Ұсынылатын бастапқы доза препараттың белгілі демеуші дозасының екі есе дозасын құрайды және алғашқы 2 күн ішінде тағайындалады. Содан кейін емдеуді белгілі демеуші дозаның жәрдемімен 5-ші күні ХҚҚ алғаш өлшеуге дейін жалғастырады.

Жоғарыда сипатталғандардан асатын дозалар ұсынылатын немесе көптеген клиникалық жағдайларға негізделген болып табылмайды. Көбірек жоғары дозалар коагуляцияға қарсы әсерлер дамығанға дейінгі уақытты қысқартпайды, алайда қан кетулердің даму қаупін арттырады.

Емдік ХҚҚ деңгейлері

Веналық тромбозға және өкпе артерияларының эмболияларына, жүрекшелердің фибрилляциясына (клапан кемістіктерімен астаспаған), ауыр дилятациялық кардиомиопатияларға, жүректің асқынған кемістіктеріне профилактика және ем жүргізген, жүрек клапандарын биопротездермен протездеу жағдайында ХҚҚ-ның 2-ден 3-ке дейінгі көрсеткішін демеу ұсынылады. Жүрек клапандарын механикалық протездермен протездегенде және асқынған жедел миокард инфарктісінде ХҚҚ-ның 2,5-тен 3,5-ке дейінгі өте жоғары көрсеткіштері ұсынылады.

Егде жастағы пациенттер:

Егде жастағы пациенттерде варфариннің дозасын түзетудің қажеті болмайды. Алайда егде жастағы пациенттер мұқият бақылауда болуы тиіс, өйткені оларда жағымсыз реакциялардың (қан кетулердің) даму қаупі өте жоғары болады.

Бауыр функциясының жеткіліксіздігі бар пациенттер:

Бауыр функциясының бұзылуы варфаринге сезімталдықты арттырады, өйткені бауыр қанның ұю факторын жасайды, сондай-ақ варфаринді метаболиздейді. Пациенттердің осы тобында ХҚҚ көрсеткіштеріне мұқият мониторинг жүргізу қажет.

Бүйрек функциясының жеткіліксіздігі бар пациенттер:

Бүйрек функциясы бұзылған пациенттерде варфариннің дозасын төмендету және мұқият мониторинг жүргізу қажет болады.

Енгізу әдісі және жолы

Варфалан тәулігіне 1 рет пероральді түрде тағайындалады, оны белгілі бір уақытта қабылдау керек.

Емдеу ұзақтығы

Емдеу ұзақтығын дәрігер қолдану көрсетілімдеріне сәйкес белгілейді.

Артық дозаланған жағдайда қабылдау қажет шаралар

Варфариннің артық дозалануының негізгі әсері ХҚҚ-ның және қан кетулер қаупінің жоғарылауы болып табылады. ХҚҚ-ның жоғарылауы VII факторының жартылай әрекет жасау уақытымен өзара байланысты. Әдетте мұндай жоғарылау варфаринді қабылдағаннан кейін 24 сағат ішінде дамып, ең жоғары шегіне 36-72 сағаттан соң жетеді.

Симптомдары препаратты қабылдағаннан кейін бірнеше күн немесе апта өткен соң пайда болады. Оларға мыналар жатады: мұрыннан қан кетулер, қызылиектен қан кетулер, бозару, буын маңындағы және бөксе аймағындағы гематомалар, несепте және нәжісте қанның пайда болуы. Болуы мүмкін басқа симптомдарға арқаның ауыруы, еріннен немесе шырышты қабықтардан қан кету, іштің ауыруы, құсу және петехиялар жатады. Кейінірек миға қан құйылу салдарынан салдану басталуы және, ақырында, геморрагиялық шок және өлім болуы мүмкін.

Артық дозалануды емдеу негізінен демеуші және симптоматикалық болып табылады.

Қабылдағаннан кейін 1 сағат ішінде пациенттерге белсенділендірілген көмір қабылдауды қарастыруға болады. Фитоменадион (К1 дәрумені) антидотын тағайындау, қажет болғанда, вена ішіне концентрацияланған ұю факторларын, жаңадан қатырылған плазманы енгізу немесе қан құю қажет болуы мүмкін. Варфариннің жартылай шығарылу уақыты ұзақ (20-60 сағат) болғандықтан, пациенттер ұзақ бақылануы тиіс.

Дәрілік препаратты қабылдамас бұрын кеңес алу үшін дәрігерге немесе фармацевтіге барыңыз.

ДП стандартты қолдану кезінде көрініс беретін жағымсыз реакциялардың сипаттамасы және осы жағдайда қабылдау керек шаралар

Әртүрлі ағзалардан қан кетулер болуы мүмкін: мысалы, мұрыннан қан кетулер, қан түкіру, гематурия, қызылиектен қан кету, теріде қанталаулар, қынаптық қан кетулер, субконъюнктивальді қан кету, тік ішектен және АІЖ басқа бөлімдерінен қан кету, миға қан құйылу, жарақаттан немесе операциядан кейін ұзаққа созылатын немесе ағыл-тегіл қан кету. Қан кету, соның ішінде ауыр қан кету, кез келген ағзада дамуы мүмкін. Антикоагулянттармен ұзақ ем қабылдаған пациенттерде ауырлығы өлімге дейінгі әртүрлі дәрежедегі қан кетулердің дамуы туралы мәлімделді.

Варфалан препаратын қолдану кезінде қан кету қаупінің тәуелді емес факторларына мыналар жатады: егде жас, антикоагуляцияның жоғары деңгейі, анамнезінде инсульт, анамнезінде асқазан-ішектік қан кету, қатар жүретін аурулар және жүрекшелердің фибрилляциясы. Кейбір пациенттерде CYP2C9 және VKORC1 полиморфизмі болуы мүмкін, мұндай жағдайларда гемоглобин және ХҚҚ деңгейлеріне мұқият мониторинг жүргізу керек.

Өте жиі

• әртүрлі ағзалардан қан кету

Жиі

• ұзақ қолданудан кейін варфаринге жоғары сезімталдық

• аса жоғары сезімталдық

Жиі емес

• құсу, жүректің айнуы, диарея

Сирек

• васкулит, некроз, алопеция, бөртпе, есекжем, терінің қышуы

• күлгін саусақ синдромы

• бауыр ферменттерінің жоғарылауы, сарғаю

Өте сирек

• мелена, холестериндік эмболия

Жиілігі белгісіз

• іштің ауыруы (қан кетуге қатысты салдарлық) және гематемезис

• кальцифилаксия, терінің эритематоздық ісінген жерлерінің экхимозға әкелуі

• пирексия

Жағымсыз дәрілік реакциялар туындаған жағдайда медицина қызметкеріне, фармацевтикалық қызметкерге немесе, дәрілік препараттардың тиімді еместігі туралы мәлімдемелерді қоса, дәрілік препараттарға жағымсыз реакциялар (әсерлер) жөнінде деректердің ақпараттық базасына тікелей хабарлау керек

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір таблетканың құрамында

белсенді зат – натрий варфарині (кристалды клатрат түрінде), 2,5 мг

қосымша заттар: сусыз лактоза (Lactopress Anhydrous 250/Super Tab 21AN), желатинделген крахмал (Unigel 270), натрий лаурилсульфаты,

натрий крахмалы гликоляты (Primogel) (А типі), сусыз коллоидты кремнийдің қостотығы, магний стеараты.

Сыртқы түрінің, иісінің, дәмінің сипаттамасы

Ақтан ақ дерлік түске дейінгі, екі жақ беті дөңес, дөңгелек пішінді, екі жағы да тегіс таблеткалар.

Шығарылу түрі және қаптамасы

10 таблеткадан янтарь түсті поливинилиденхлоридті үлбірден және лакталған баспалы алюминий фольгадан жасалған пішінді ұяшықты қаптамаға салынған.

5 немесе 10 пішінді ұяшықты қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынған.

2 жыл.

Жарамдылық мерзімі өткеннен кейін қолдануға болмайды.

25°C-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

Аджио Фармацевтикалз Лтд

А-38, Найджиот Индастриал Эстейт,

Курла-Андхери Роуд, Сейфдпул, Мумбаи 400072

Үндістан

тел/факс: +91-9520-40730000, +91-22-2851 8206/7

эл. пошта: agio@agio-pharma.com

Тіркеу куәлігінің ұстаушысы

«Аргументум» ЖШҚ, Ресей

Заңды мекенжайы: 121471, Мәскеу қ., Можайское шоссе, 29 үй, 1 қабат, VI орынжай, 39 бөлме, 62 кеңсе

Поштасы: 142717, Мәскеу облысы, Ленин ауданы, Развилковское ауылдық қонысы, Развилка ауылы, 12 меншігі, 1 құрылыс, 3 қабат, 6-7 кеңсе

тел/факс +7 727 389 95 45

эл. пошта: safety@euroservice-east.kz

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта):

«Фирма Евросервис-Ист» ЖШС

нақты мекенжайы: 041609, Қазақстан, Алматы облысы, Талғар ауданы, Бесағаш ауылдық округі, Бесағаш ауылы, Түркiстан көшесі, 1 ғимарат

тел/факс +7 727 389 95 45

e-mail: safety@euroservice-east.kz