Багровен (20 мг)

• русский
• қазақша

• Скачать инструкцию медикамента

Саудалық атауы

Багровен

Халықаралық патенттелмеген атауы

Лизиноприл

Дәрілік түрі

5 мг, 10 мг және 20 мг таблеткалар

Құрамы

Бір таблетканың құрамында

белсенді зат - 5,45 мг, 10,90 мг, 21,80 мг лизиноприл дигидраты

5 мг, 10 мг, 20 мг лизиноприлге шаққанда

қосымша заттар: маннитол, кальций гидрофосфатының дигидраты, желатинделген крахмал, магний стеараты, күн батар түстес сары лак

(5 мг доза үшін),

қосымша заттар: маннитол, кальций гидрофосфатының дигидраты, желатинделген крахмал, магний стеараты, темірдің сары тотығы (Е172)

(10 мг доза үшін),

қосымша заттар: маннитол, кальций гидрофосфатының дигидраты, желатинделген крахмал, магний стеараты (20 мг доза үшін).

Сипаттамасы

Дөңгелек пішінді, екі беті дөңес, бір жағында сызығы бар, бозғылт-қызғылт сары түсті біртектес таблеткалар (5 мг доза үшін).

Дөңгелек пішінді, екі беті дөңес, бір жағында сызығы бар, бозғылт-сары түсті біртектес таблеткалар (10 мг доза үшін).

Дөңгелек пішінді, екі беті дөңес, бір жағында сызығы бар, ақ түсті біртектес таблеткалар (20 мг доза үшін).

Фармакотерапиялық тобы

Ренин-ангиотензин жүйесіне әсер ететін препараттар. Ангиотензин-конвертациялаушы фермент (АКФ) тежегіштері. Лизиноприл.

АТХ коды С09 АА 03

Фармакологиялық қасиеттері

Фармакокинетикасы

Препарат биожетімділігі қабылданған дозаның 25-50% жуығын құрайды. Жедел миокард инфарктісімен науқастарда қан сарысуында жоғары шекті концентрациясына жетуге қажетті уақыттың аздап кідіру үрдісі байқалса да, қан плазмасындағы жоғары шекті концентрациясына ішу арқылы қабылдаудан кейін 7 сағат ішінде жетеді. Ас ішу лизиноприлдің сіңу жылдамдығына әсер етпейді. Абсолютті биожетімділігі жүрек жеткіліксіздігі бар пациенттерде шамамен 16% төмендейді. Лизиноприл қан плазмасы ақуыздарымен байланыспайды. Сіңірілген биологиялық белсенді зат толық және өзгеріссіз күйде бүйрек арқылы бөлініп шығады. Жартылай ыдырау кезеңі 12,6 сағат құрайды. Несепте қалыпқа келтіру негізінде лизиноприлдің орташа сіңу дәрежесі 6-60% субъектаралық ауытқумен шамамен 25% (зерттелген 5-80 мг дозалар диапазонында) құрайды. Дені сау пациенттерде лизиноприл клиренсі шамамен 50 мл/мин құрайды. Сарысуда концентрациясының төмендеуі ұзаққа созылатын соңғы фазада болады, ол препараттың жиналуына ықпал етпейді. Бұл соңғы фаза, ықтималды түрде, ангиотензин өзгертуші ферментпен (АӨФ) қаныққан байланысуы түрінде болады және дозаға пропорционалды емес. Лизиноприл плацента арқылы өтеді. Егеуқұйрықтарға жүргізілген зерттеулер лизиноприлдің гематоэнцефалдық бөгет арқылы нашар өтуін көрсетті.

Бауыр жеткіліксіздігі

Бауыр функциясының бұзылуы циррозға шалдыққан пациенттерде лизиноприл сіңуінің төмендеуіне әкелді (несеппен бөліну кезінде анықталғандай, шамамен 30%), екінші жағынан, дені сау волонтерлермен салыстырғанда, оның шығарылуы азаяды және лизиноприл тиімділігінің 50% артуына алып келеді.

Бауыр циррозынан зардап шегетін пациенттерде лизиноприлдің сіңуі бауыр функциясының бұзылуына қарай шамамен 30% (несеппен бөліну кезінде анықталғандай) баяулайды.

Бүйрек жеткіліксіздігі

Бүйрек функциясының бұзылуы организмнен бүйрек арқылы шығарылатын лизиноприлдің шығарылуын төмендетеді, бірақ бұл төмендеуі шумақтық сүзіліс жылдамдығы 30 мл/минуттан төмен болғанда ғана клиникалық мәнге ие болады. Жеңіл және орташа бүйрек жеткіліксіздігінде (креатинин клиренсі 30-80 мл/мин) AUC 13% ғана жоғары болды, ал ауыр бүйрек жеткіліксіздігінде (креатинин клиренсі 5-30 мл/мин) орташа AUC 4,5 есе жоғарылауы байқалды.

Лизиноприлді диализдің көмегімен шығаруға болады. Гемодиализдің 4 сағаты ішінде плазмада лизиноприл концентрациясы, орта есеппен, 60% төмендеген (диализ кезінде шығарылу жылдамдығы 40-55 мл/мин құрайды).

Жүрек жеткіліксіздігі

Жүрек жеткіліксіздігі бар пациенттер, несептен лизиноприлдің кері қалыпқа келуі есебінен, дені сау тұлғалармен салыстырғанда, лизиноприлге көбірек бейімділік танытады (орта есеппен, 125% AUC жоғарылауы білінеді), әйтсе де, дені сау тұлғалармен салыстырғанда, сіңуінің шамамен 16% азаюы білінген.

Егде жастағы тұлғалар

Егде жастағыларда, жастармен салыстырғанда, қанда лизиноприлдің едәуір жоғары деңгейлері және плазмада концентрация қисығы астындағы ауданының аса жоғары көрсеткіштері (шамамен 60% артуы) болады.

Лизиноприл плацента арқылы өтеді.

Фармакодинамикасы

Багровен ангиотензин өзгертуші фермент (АӨФт) тежегіші болып табылады. Әсер етуші заты – лизиноприл эналаприл метаболиті (эналаприлат) түрінде болады. Багровен, АӨФ тежеумен, ангиотензин I-ден ангиотензин II түзілуін бәсеңдетеді; плазмада ангиотензин II және альдостерон деңгейін бір мезгілде брадикинин вазодилататоры концентрациясын арттыра отырып төмендетеді. Тамырлардың шеткері кедергісінің және артериялық қысымның төмендеуін туындатады, жүректің минуттық көлемі жүректің жиырылу жиілігі өзгермегенде артуы мүмкін. Лизиноприл бүйректе қан айналымын жақсартуға қабілетті. Гипергликемиясы бар пациенттерде зақымданған гломерулалық эндотелий функциясының қалыпқа түсуіне ықпал етеді. Лизиноприлдің гипотензиялық әсер етуі, әдетте, қабылдаудан кейін 1 сағаттан соң көрініс беріп, 6 сағат өткенде жоғары шегіне жетеді. Әсер ету ұзақтығы дозаға байланысты және 24 сағат құрайды. Гипотензиялық әсері препаратты ұзақ уақыт қолданғанда азаяды. Препаратты күрт тоқтатқанда артериялық қысымның көп түсіп кетуі байқалмайды (тоқтату синдромы).

Негізгі әсерінің ренин-ангиотензин-альдостерон жүйесімен жүзеге асуына қарамастан, плазмадағы ренин мөлшері төмен гипертензиядан зардап шегетін пациенттерде тиімділігі расталды.

Қан қысымын тікелей төмендетуден тыс, Багровен бүйректің гломерула аппаратының гистологиясы мен гемодинамикасын өзгерту есебінен альбуминурияны азайтады. Қант диабетімен науқастарда қандағы қант деңгейінің ауытқуы да, гипогликемияның жиілеуі де байқалмаған.

Қолданылуы

- артериялық гипертензияда

- созылмалы жүрек жеткіліксіздігінде (біріктірілген ем құрамында)

- жүрек жеткіліксіздігінде (біріктірілген ем құрамында)

- алғашқы 24 сағаттағы тұрақты гемодинамикамен жедел миокард инфарктісінде сол жақ қарынша дисфункциясы мен жүрек жеткіліксіздігі дамуының профилактикасы үшін, сондай-ақ тіршілік қабілетін арттыру мақсатында (6 апта бойы қысқа мерзімді біріктірілген ем құрамында)

- диабеттік нефропатиямен асқынған 2 типті қант диабеті бар пациенттерде артериялық гипертензияны емдеуде

Қолдану тәсілі және дозалары

Препарат ас ішуге байланыссыз, бірақ жеткілікті сұйықтық мөлшерімен, дұрысы, белгілі бір уақытта тәулігіне 1 рет ішке қабылданады.

Дозаны қолданылy көрсетіліміне және артериялық қысым реакциясына сәйкес әркімде жеке таңдау қажет. Багровенді монотерапия ретінде немесе гипертензияға қарсы басқа дәрілік препараттармен біріктіріп қолдануға болады.

Артериялық гипертензия – емдеу күн сайын таңертеңгілік 10 мг-ден басталуы тиіс. Доза артериялық қысым деңгейінің ұтымды бақылануын қамтамасыз ететіндей белгіленуі тиіс. Ренин-ангиотензин-альдостерон жүйесі күшті белсенділенген (атап айтқанда реноваскулярлық гипертензия, тұз тапшылығы және/немесе айналымдағы сұйықтық көлемінің азаюы (сусыздануы), жүрек жеткіліксіздігі немесе ауыр гипертензиясы бар) пациенттерде бастапқы дозадан кейін артериялық қысым шектен тыс төмендеп кетуі мүмкін. Ондай пациенттер үшін бастапқы 2.5-5 мг доза ұсынылады және емдеудің басында олар дәрігердің қадағалауында болуы тиіс. Бүйрек жеткіліксіздігі бар болса, ең төмен бастапқы дозасы талап етіледі. Дозаны арттырулар арасында уақыт аралығы кемінде 2-3 апта құрауы тиіс. Әдеттегі демеуші доза күніне 1 рет 10-20 мг, ең жоғары тәуліктік дозасы күніне 1 рет 40 мг Багровен препаратын құрайды. Егер қалаулы емдік әсеріне 2-4 апта ішінде жетпесе, препаратты басқа гипотензиялық препараттармен біріктіруге болады.

Диуретиктер қабылдайтын пациенттер: диуретиктермен емдеу Багровенмен ем басталуынан 2-3 күн бұрын тоқтатылуы тиіс. Диуретиктерді тоқтату мүмкін болмаса, Багровенмен емдеу 5 мг дозадан басталады. Емдеу кезінде бүйрек функциясына және қандағы калий деңгейіне мониторинг өткізу керек. Әріқарай дозалануы артериялық қысым деңгейіне қарай түзетілуі тиіс. Қажет болса, диуретиктермен емді жаңғыртуға болады.

Бүйрек жеткіліксіздігінде доза креатинин клиренсі деңгейіне қарай түзетілуі тиіс.

Креатинин клиренсі (мл / мин) Старттық доза (мг / тәулігіне)

10 мл/мин аз 2.5 мг*

(диализдегі пациенттерді қоса)

10 - 30 мл/мин 2.5 – 5 мг

31 - 80 мл/мин 5 – 10 мг

Жүрек жеткіліксіздігі: Багровен диуретиктермен және дигиталиспен бұрынғы емдеуге қосымша тағайындалады. Бастапқы доза таңертеңгілік 2,5 мг Багровен құрайды. Демеуші дозасы 2 апта аралықта 2,5 мг сатылы арттырумен белгіленуі тиіс. Әдеттегі демеуші доза күніне 1 рет 5-20 мг құрайды. Багровен препаратын күніне 35 мг ең жоғары дозасынан асыруға болмайды.

Егда жастағы пациенттер: егде жастағы пациенттерде дозалануы препараттың шығарылу жылдамдығының баяулауы есебінен түзетілуі тиіс және емдеуді тәулігіне 2,5 мг-ден бастау қажет.

Жедел миокард инфарктісі біріктірілген ем құрамында: Багровенмен емдеуді инфаркт стандартты еміне (тромболитикалық дәрілер, ацетилсалицил қышқылы, бета-адреноблокаторлар, нитраттар) қосымша, тұрақты гемодинамика жағдайында (бүйрек дисфункциясы белгілерінсіз, 100 мм сын. бағ. жоғары систолалық қысым) симптомдар білінген соң 24 сағат ішінде бастауға болады. Бастапқы дозасы 5 мг Багровен, 24 сағаттан соң тағы 5 мг, 48 сағат өткенде 10 мг Багровен құрайды. Артынан доза күніне 1 рет 10 мг Багровен құрайды. Систолалық қысымы төмен пациенттер (≤ 120 мм сын. бағ.) емдеуді бастар алдында немесе инфарктіден кейін алғашқы 3 күн ішінде емделу үшін төменірек емдік дозаны – 2,5 мг Багровен алуы тиіс. Егер систолалық қысым 1 сағаттан аса 90 мм сын. бағ. төмен болса, Багровеннен бас тарту керек. Емдеу 6 апта бойы жалғасуы тиіс. Ең төмен демеуші доза күніне 5 мг Багровен құрайды.

Диабеттік нефропатиямен астасқан артериялық гипертензияны емдеу

Багровен препаратының дозасы 2 типті қант диабетінің және басталып келе жатқан нефропатия аясындағы гипертониялық аурумен науқастар үшін күніне бір рет 10 мг құрайды, қажет болған жағдайда, оны күніне бір рет 20 мг дейін арттыруға (90 мм сын. бағ. төмен диастолалық артериялық қысымға жету мақсатында) болады. Бүйрек жеткіліксіздігі (креатинин клиренсі < 80 мл/мин) болғанда, препараттың бастапқы дозасы пациенттің креатинин клиренсіне сәйкес түзетілуі тиіс.

Жағымсыз әсерлері

Лизиноприлмен (таблеткаларда) және басқа АӨФ тежегіштерімен емделу кезеңінде келесі жағымсыз әсерлері мынадай жиілікте байқалды: өте жиі (≥10%), жиі (≥1%, <10%), жиі емес (≥ 0,1%, <1 %), сирек (≥0.01%, <0,1%), өте сирек (<0,01%), жекелеген хабарламаларды қоса, жиілігі белгісіз (қолда бар деректер бойынша анықтау мүмкін емес).

Жиі:

- бас айналу, бас ауыру

- ортостатикалық әсерлер (гипотензияны қоса)

- жөтел

- құсу, диарея

- бүйрек функциясының бұзылуы.

Жиі емес:

- көңіл-күйдің өзгеруі, парестезиялар, бас айналу, дәм сезудің бұзылуы, ұйқының бұзылуы

- миокард инфарктісі немесе инсульт, жоғары қауіп тобындағы пациенттерде айқын гипотензияда екіншілік болуы мүмкін, жүректің жиі соғуы, тахикардия, Рейно феномені

- ринит

- жүрек айну, іштің ауыруы, диспепсия

- бөртпе, қышыну

- импотенция

- шаршау, астения

- қан мочевинасының, сарысулық креатининнің, бауыр ферменттерінің жоғарылауы, гиперкалиемия (клиникалық зерттеулерде).

Сирек:

- есекжем, алопеция, псориаз, аса жоғары сезімталдық/ангионевроздық ісіну (бет, аяқ-қол, ерін, тіл, дауыс саңылауы және/немесе көмейдің ангионевроздық ісінуін қоса)

- сарысулық билирубиннің жоғарылауы, гипонатриемия (клиникалық зерттеулерде)

- гемоглобин, гематокрит төмендеуі

- сананың шатасуы

- ауыздың кеберсуі

- уремия, жедел бүйрек жеткіліксіздігі

- гинекомастия

- пархон синдромы (SIADH).

Өте сирек:

- сүйек кемігінің бәсеңдеуі, анемия, тромбоцитопения, лейкопения, нейтропения, агранулоцитоз, гемолиздік анемия, лимфаденопатия, аутоиммундық аурулар

- гипогликемия

- олигурия/анурия

- бронх түйілуі, синусит, аллергиялық альвеолит/эозинофильді пневмония

- панкреатит, ішек ангиодистрофиялары, гепатит (гепатоцеллюлярлы немесе холестаздық), сарғаю және бауыр жеткіліксіздігі

- тершеңдік, сулы бөртпе, уытты эпидермалық некролиз, Стивенс-Джонсон синдромы, мультиформалы эритема, лимфоцитоманың терілік түрі

- өзінде бір немесе бірнеше симптомдарды қамтуы мүмкін симптомдар кешені: қызба, васкулит, миалгия, артралгия, артрит, ядроға қарсы оң антиденелер (AНA), эритроциттердің шөгу жылдамдығының (ЭШЖ) жоғары деңгейі, эозинофилия, лейкоцитоз, бөртпе, фотосезімталдық немесе басқа дерматологиялық көріністер.

Жиілігі белгісіз:

- естен танулар, депрессиялық симптомдар.

Қолдануға болмайтын жағдайлар

- белсенді затқа, басқа АӨФ, сульфаниламидтерге, препараттың қосымша компоненттеріне жоғары сезімталдық

- бүйрек артериялары стенозы (екіжақты немесе жалғыз бүйрекпен біржақты)

- анамнездегі АӨФ препараттарымен бұрынғы ем салдарынан болатын ангионевроздық ісіну және тұқым қуалайтын/өздігінен болатын ангионевроздық ісіну

- бүйрек функциясының ауыр бұзылулары (креатинин клиренсі < 30 мл/мин), анурия

- қолқаның немесе митральді клапанның гемодинамикалық релевантты стенозы немесе гипертрофиялық кардиомиопатия

- гемодинамикасы тұрақсыз пациенттердегі жедел миокард инфарктісі

- емнің басталуына дейінгі ≤ 100 мм сын. бағ. систолалық қысым

- жүктілік және лактация кезеңі

- кардиогенді шок

- балалар мен 18 жасқа дейінгі жасөспірімдерге

- алғашқы гиперальдостеронизм

- бүйрек трансплантациясынан кейінгі жағдай

- бауырдың ауыр жеткіліксіздігі

- қант диабеті немесе бүйрек жеткіліксіздігі (ШСЖ < 60 мл / мин / 1,73 м2) бар пациенттерде алискиренмен қатарлас қолдану

Сақтықпен қолдану керек:

қолқа стенозы/гипертрофиялық кардиомиопатия, артериялық гипотензия, сүйек кемігі гипоплазиясы, гипонатриемияда (тұзы аз немесе тұзсыз диетада жүрген пациенттерде артериялық гипотензияның жоғары даму қаупі), гиповолемиялық жай-күйлерде (соның ішінде диарея, құсу), дәнекер тін ауруларында (жүйелі қызыл жегі, склеродермия), подагра, гиперурикемия, гиперкалиемия, ишемиялық жүрек ауруы, цереброваскулярлы ауруларда (соның ішінде ми қан айналымы жеткіліксіздігі), ауыр созылмалы жүрек жеткіліксіздігі, егде жастағы тұлғаларда.

Дәрілермен өзара әрекеттесуі

Гипотензиялық препараттар

Багровен препаратын гипертензияға қарсы басқа дәрілермен (мысалы, нитроглицерин, басқа нитраттар немесе басқа вазодилататорлар) біріктіріп қолданғанда артериялық қысым айқынырақ төмендеуі мүмкін.

Клиникалық зерттеулер деректері АӨФ тежегіштерін, ангиотензин II рецепторлары блокаторларын немесе алискиренді біріктіріп қолдану салдарынан ренин-ангиотензин-альдостерон жүйесінің (РААЖ) қосарлы бөгелісінің дамуы, РААЖ әсер ететін бір агент қолданумен салыстырғанда, гипотензия, гиперкалиемия және бүйрек функциясының төмендеуі (соның ішінде жедел бүйрек жеткіліксіздігінің дамуы) сияқты жағымсыз реакциялардың жоғарырақ даму деңгейімен байланысты екенін көрсетті.

Диуретиктер

Пациентті Багровен препаратымен емдеуге несеп айдайтын препарат қосылған жағдайда, әдетте, гипотензиялық әсер күшейеді.

Диуретиктер алып жүрген және, әсіресе, диуретиктерді таяуда қолдана бастаған пациенттерде Багровен препараты қосылғанда артериялық қысымның айқын төмендеуі дамуы мүмкін. Багровен препаратын қолдану кезінде симптоматикалық гипотонияның даму мүмкіндігін несеп айдағыштарды Багровенмен емнің басталуына дейін тоқтатқанда жоққа тән азайтуға болады.

Құрамында калий бар қоспалар, калий жинақтаушы диуретиктер немесе құрамында калий бар тұз алмастырғыштар

Клиникалық зерттеулерде қан сарысуындағы калий әдеттегі қалып шегінде қалса да, кейбір пациенттерде гиперкалиемия білінген. Гиперкалиемияны дамытатын қауіп факторларына бүйрек жеткіліксіздігі, қант диабеті және калий жинақтаушы диуретиктерді (мысалы, спиронолактон, триамтерен немесе амилорид), калий қоспаларын немесе құрамында калий бар тұз алмастырғыштарын қатарлас қолдану жатады. Калий қоспаларын, калий жинақтаушы диуретиктерді немесе құрамында калий бар тұз алмастырғыштарын, әсіресе, бүйрек функциясы бұзылған пациенттерде қолдану қан сарысуында калий деңгейін елеулі жоғарылатуы мүмкін.

Егер Багровен препараты калийдің шығарылуын туындататын несеп айдағыштармен бір мезгілде қабылданса, несеп айдағыштармен индукцияланған гипокалиемияны бәсеңсітуге болады.

Литий

Литий АӨФ тежегіштерімен бір мезгілде тағайындалған уақытта қан сарысуында литий концентрациясының қайтымды жоғарылауы және онымен уыттану көріністері тіркелді. Тиазидті диуретиктерді бір мезгілде қолдану литийдің уыттылық қаупін арттыруы және АӨФ тежегіштерін қабылдау аясында литиймен уыттануды жоғарылатуы мүмкін. Багровен препаратын литиймен бір мезгілде қолдану ұсынылмайды, бірақ егер осындай біріктірілім қажет болса, қан сарысуында литий деңгейіне міндетті түрде мұқият мониторинг жасау талап етіледі.

Қабынуға қарсы стероидты емес препараттар (ҚҚСП), күніне 3 грамнан көп дозадағы ацетилсалицил қышқылын қоса

АӨФ тежегіштері қабынуға қарсы стероидты емес препараттармен (мысалы, ацетилсалицил қышқылымен қабынуға қарсы препараттар тұсында, ЦOГ-2 тежегіштерімен және іріктелмеген ҚҚСП) бір мезгілде қабылданатын жағдайларда гипертензияға қарсы әсердің әлсіреуі болуы мүмкін. Бір мезгілде АӨФ және ҚҚСП қолдану жедел бүйрек жеткіліксіздігінің даму мүмкіндігін қоса, бүйрек функциясы нашарлауының жоғары қаупіне, сонымен бірге, әсіресе, бүйрек функциясы әлсіреген пациенттерде қан сарысуында калийдің көбеюіне әкелуі мүмкін. Бұл әсерлер, әдетте, қайтымды. Аталған біріктірілімді, әсіресе егде жастағы адамдарда абайлап қолдану керек. Пациенттерде сусыздану болмауы тиіс, сондай-ақ қатарлас ем басталған соң және әріқарай мезгіл-мезгіл бүйрек функциясына мониторинг өткізу мүмкіндігін қарастыру керек.

Алтын

Инъекциялық алтын (мысалы, натрий ауротиомалаты) енгізуден болатын нитритоидты реакциялар (вазодилатация симптомдары, жүрек айнуды, бас айналу мен гипотонияны қоса) өте күрделі болуы мүмкін және АӨФ тежегіштерімен ем алатын пациенттерде жиірек білінген.

Үш циклды антидепрессанттар/Психозға қарсы препараттар/ анестетиктер

Ауыруды басатын кейбір дәрілік препараттарды, үш циклды антидепрессанттарды және психозға қарсы дәрілерді АӨФ тежегіштерімен бір мезгілде қолдану артериялық қысымның айқын төмендеуіне әкелуі мүмкін.

Симпатомиметиктер

Симпатомиметиктер АӨФ тежегіштерінің гипертензияға қарсы әсерін азайтуы мүмкін.

Диабетке қарсы препараттар

Фармако-эпидемиологиялық зерттеулер АӨФ тежегіштері мен диабетке қарсы дәрілік препараттарды (инсулиндер, ішуге арналған гипогликемиялық препараттар) бір мезгілде қолданудың қанда глюкоза деңгейінің артуын, сондай-ақ гипогликемияның даму қаупімен әсерінің төмендеуін туындатуы мүмкін екенін көрсетті. Бұл ықтималдығы зор құбылыс біріктірілген емнің алғашқы апталарында және бүйрек функциясы бұзылған пациенттерде болуы мүмкін.

Тіндік плазминоген белсендіргіштері

Тіндік плазминоген белсендіргіштерімен қатарлас емдеу ангионевроздық ісінудің даму қаупін арттыруы мүмкін.

Ацетилсалицил қышқылы, тромболитиктер, бета-блокаторлар, нитраттар

Багровен препаратын ацетилсалицил қышқылымен (кардиологиялық дозаларда), тромболитиктермен, бета-блокаторлармен және/немесе нитраттармен бір мезгілде қолдануға болады.

Багровен препаратын бір мезгілде антацидтермен және холестираминмен қолданғанда асқазан-ішек жолында сіңуінің төмендеуі, эстрогендермен қолданғанда оның гипотензиялық әсерінің төмендеуі мүмкін. Лизиноприл аллопуринолмен, цитостатиктермен, иммунодепрессанттармен, жүйелі кортикостероидтармен, прокаинамидпен қолданылғанда лейкопенияның даму қаупі артады. Лизиноприл теофиллиннің әсерін әлсіретеді. Лизиноприл әсерін циметидин ұзартады, ал фенобарбитал төмендетеді.

Айрықша нұсқаулар

Құрамында алискирен бар препараттармен қабылдау кезіндегі ренин-ангиотензин-альдостерон жүйесінің (РААЖ) қосарлы бөгелісі

Гипотония, гиперкалиемия және бүйрек функциясының өзгерісімен көрініс беретін ренин-ангиотензин-альдостерон жүйесінің (РААЖ) қосарлы бөгелісінің даму мүмкіндігіне байланысты лизиноприлді алискиренмен бір мезгілде қолдану ұсынылмайды.

Симптоматикалық гипотензия

Созылмалы жүрек жеткіліксіздігі және бүйрек жеткіліксіздігі бар немесе онсыз науқастарда симптоматикалық артериялық гипотензияның дамуы мүмкін, бұл бүйрек функциясының төмендеуіне әкелуі мүмкін. Симптоматикалық артериялық гипотензия диуретиктердің үлкен дозаларын қолдану, гипонатриемия, диарея, құсу, айқын гипертензия (ренин-ангиотензин жүйесінің белсенділігімен байланысты) жағдайында, диализ немесе бүйрек функциясының бұзылуында жиірек білінді. Ондай науқастарда емдеуді дәрігердің қатаң бақылауымен бастау керек (препарат пен диуретиктер дозаларын таңдау сақтықпен жүргізіледі). Препарат артериялық қысымның күрт төмендеуі миокард инфарктісіне немесе инсультке әкелуі мүмкін ишемиялық жүрек ауруы, цереброваскулярлық жеткіліксіздігі бар науқастарға тағайындалғанда осындай ережелерді ұстанған дұрыс. Гипотензия туындағанда пациентті жатқызып, міндетті шаралар ретінде вена ішіне сұйықтық құю (физиологиялық ерітінді құю) ұсынылған. Өтпелі гипотензия, әдетте, әріқарай емдеуге қарсы көрсетілім болып табылмайды; дегенмен де, препаратты уақытша тоқтату немесе дозасын азайту қажет болуы мүмкін.

Гипотензия немесе жедел жүрек жеткіліксіздігі

Артериялық қысымы қалыпты немесе төмен болатын жүрек жеткіліксіздігі бар кейбір пациенттерде лизиноприл қолдану аясында жүйелі артериялық қысымның қосымша төмендеуі болуы мүмкін. Бұл әсер күтіледі және әдетте емдеуді тоқтатуға себеп болмайды. Симптоматикалық гипотонияда кейбір жағдайларда Багровен дозасын азайту немесе қабылдауды тоқтату қажет болуы мүмкін.

Жедел миокард инфарктісі кезіндегі гипотония

Тамыр кеңейтетін препараттармен емдеу кезінде әріқарай гемодинамиканың күрделі нашарлау қаупіне байланысты, миокард инфарктісінің жедел кезеңіндегі науқастарға Багровен препаратымен емдеуді тағайындауға болмайды (систолалық артериялық қысым 100 мм сын. бағ. дейін және одан төмен түсіп кетуі, кардиогенді шок дамуы мүмкін). Егер миокард инфарктісінен кейінгі алғашқы 3 күнде систолалық артериялық қысым 120 мм сын. бағ. немесе одан төмен құраса, Багровен препаратының дозасы азайтылуы тиіс. Егер систолалық артериялық қысым 100 мм сын. бағ. деңгейінде немесе одан төмен сақталып тұрса, демеуші дозаны 5 мг дейін немесе уақытша 2,5 мг дейін азайту керек. Гипотония сақталғанда (систолалық артериялық қысым 1 сағаттан аса 90 мм сын. бағ. аз болса), Багровен препараты тоқтатылуы тиіс.

Қолқа стенозы және митральді клапан стенозы/гипертрофиялық кардиомиопатия

Басқа АӨФ тежегіштерін қабылдау кезіндегідей, Багровен митральді клапан стенозы және сол жақ қарынша шығу жолының обструкциясы, мысалы, қолқа стенозы немесе гипертрофиялық кардиомиопатиясы бар пациенттерге сақтықпен тағайындалу керек.

Бүйрек функциясының бұзылуы

Бүйрек жеткіліксіздігі бар пациенттерде (креатинин клиренсі < 80 мл/мин), Багровеннің бастапқы дозасы креатинин клиренсіне сәйкес, ал артынан пациенттің емдеуге реакциясына қарай түзетілуі тиіс. Бұл пациенттерде калий мен креатининнің ағымдағы мониторингін өткізу қажет. Жүрек жеткіліксіздігі, артериялық гипотензиясы бар пациенттерде АӨФ тежегіштерімен емдеу бүйректің кейбір функцияларының әріқарай нашарлауына әкелуі мүмкін. Жедел бүйрек жеткіліксіздігінің дамуы жөнінде жекелеген хабарламалар бар, бірақ ол әдетте қайтымды. Ангиотензин өзгертуші фермент тежегіштері препараттарымен ем алатын бүйрек артерияларының екіжақты стенозы немесе жалғыз бүйрек артериясының стенозы бар кейбір пациенттерде, әдетте, емді тоқтатудан кейін қайтымды болатын қан сарысуындағы мочевина мен креатининнің жоғарылауы білінді. Бұл, әсіресе, бүйрек жеткіліксіздігі бар пациенттерге қатысты. Реноваскулярлы гипертониясы бар пациенттерде ауыр гипотензия мен бүйрек жеткіліксіздігінің жоғары даму қаупі бар. Бұл науқастарға емдеуді кіші дозалардан бастап, дәрігердің қатаң бақылауымен дозаны мұқият таңдау қажет. Диуретиктермен емдеу ауырлататын фактор болуы ықтимал, мүмкіндігінше, ол Багровенмен емдеудің алғашқы апталарында тоқтатылуы тиіс, бұл жағдайда бүйрек функциясын бақылап отыру қажет. Гипертониялық ауруы және бұрын диагностикаланған бүйректің тамырлық аурулары бар кейбір пациенттерде (әсіресе, лизиноприл несеп айдағыш препараттармен қатар тағайындалғанда) қан сарысуында мочевина мен креатининнің артуы білінді, әдетте, бұл өзгерістер болымсыз және өткінші болды. Бұл бүйрек жеткіліксіздігі бар пациенттерге көбірек тән. Осындай жағдайларда несеп айдағыштар дозасын азайту / немесе оларды қабылдауды тоқтату / немесе Багровенді тоқтату қажет болуы мүмкін. Миокард инфарктісінің жедел кезеңінде бүйрек дисфункциясы белгілері бар пациенттерге, қан сарысуындағы креатининнің 177 мкмоль/л-ден асып кететін концентрациясында және/немесе 24 сағатта 500 мг-ден асатын протеинурияда Багровенмен емдеуді бастауға болмайды. Егер бүйрек дисфункциясы Багровенмен емдеу аясында дамыса (қан сарысуында креатинин концентрациясы 265 мкмоль/л-ден артық болса немесе бастапқы деңгейінен екі есе жоғарыласа), дәрігер Багровенді тоқтату мәселесін қарастыруы тиіс.

Ангионевроздық ісіну

Беттің, еріннің ангионевроздық ісінуі дамығанда гистаминге қарсы дәрілер тағайындалады. Тілдің, дауыс саңылауының және/немесе көмейдің ісінуі өмірге қатер төндіруі мүмкін, сондықтан дереу тері астына салынатын 0,3-0,5 мг эпинефрин инъекциясымен немесе вена ішіне 0,1 мг эпинефринді баяу енгізумен (сұйылту жөніндегі нұсқауды қадағалаңыз), ЭКГ және қан қысымына мониторинг өткізумен шұғыл емдеу жүргізіледі.

Емделу кезеңінде алкогольді ішімдіктер ішуге тыйым салынады, өйткені алкоголь препараттың гипотензиялық әсерін күшейтеді.

Гемодиализде жүрген науқастардағы анафилаксиялық реакциялар

Анафилаксиялық реакциялар АӨФ тежегіштерін бір мезгілде қабылдайтын және жылдамдығы жоғары жарғақшалар пайдаланылатын (мысалы, AN 69) гемодиализ алатын науқастарда тіркелді. Бұл науқастарға диализ үшін басқа жарғақша типін қолдану немесе басқа класты гипертензияға қарсы препараттарды тағайындау керек.

Тығыздығы төмен липопротеиндер (ТТЛП) аферезі кезіндегі анафилаксиялық реакциялар

АӨФ тежегіштерін алған пациенттерде декстран сульфатымен тығыздығы төмен липопротеиндер (ТТЛП) аферезі кезінде өмірге қауіпті анафилаксиялық реакциялар сирек білінді. Бұл реакцияларды әрбір аферез сеансының алдында АӨФ тежегіштерімен емдеуді уақытша тоқтату арқылы болдырмауға болады.

Десенсибилизация

АӨФ тежегіштерін алатын пациенттерде десенсибилизациялаушы ем (мысалы, жарғақ қанаттылар уымен) кезінде анафилаксиялық реакциялар болды. Егер АӨФ тежегіштерін қабылдау уақытша тоқтатылса, бұл реакцияларға жол бермеуге болады, бірақ олар дәрілік препаратты кездейсоқ қайта қабылдаудан кейін білінуі мүмкін.

Бауыр жеткіліксіздігі

Өте сирек, АӨФ тежегіштері холестаздық сарғаюдан басталған синдромның дамуын туындатты және бауырдың шұғыл дамитын некрозына (ал кейде өлімге) алып келді. Осы синдром механизмі айқын емес. Багровен қолдану аясында сарғаю немесе бауыр ферменттерінің жоғарылауы болатын пациенттерге препарат қабылдауды тоқтатып, емдеуші дәрігерге қаралу керек.

Нейтропения/агранулоцитоз

Нейтропения/агранулоцитоз, тромбоцитопения және анемия АӨФ тежегіштерін алатын пациенттерде тіркелген. Бүйрек функциясы қалыпты және қандай да бір басқа асқындырушы факторлары болмайтын пациенттерде нейтропения сирек дамиды. Нейтропения мен агранулоцитоз АӨФ тежегіштерін қабылдауды тоқтатудан кейін қайтымды сипатта болады. Иммунодепрессанттар, аллопуринол немесе прокаинамид алатын коллагеноздары, тамыр аурулары бар пациенттерде немесе осы асқындырушы факторлар біріккенде, әсіресе, егер бүйрек функциясының ағымдағы бұзылулары бұрыннан бар болса, Багровен препаратын ерекше сақтықпен қолдану керек. Кейбір пациенттерде антибиотиктермен қарқынды емдеуге үнемі жауап бермеген күрделі инфекциялар дамыды. Егер ондай пациенттерде Багровен препараты қолданылса, қанның ақ денелеріне мезгіл-мезгіл мониторинг өткізу ұсынылады, пациенттерге инфекцияның кез келген белгілері туралы дәрігерді хабардар ету қажеттілігі жөнінде нұсқау берілуі тиіс.

Нәсіл

Ангиотензин өзгертуші фермент тежегіштері қара нәсіл өкілдерінде, басқаларымен салыстырғанда, ангиодистрофияның аса жоғары деңгейін туындатуы мүмкін. Басқа АӨФ тежегіштері сияқты лизиноприлдің, өзге нәсіл өкілдеріне қарағанда, қара нәсілді пациенттерде артериялық қысымды төмендету тиімділігі аз болуы ықтимал, бұл олардың арасында жиі кездесетін төмен ренин деңгейімен байланысты болуы мүмкін.

Жөтел

АӨФ тежегіштерін қолданғанда пациенттер емді тоқтатудан кейін басылатын сипаттас, өнімсіз, қайтпайтын жөтелдің болатынын жиі атап өтеді. Жөтелді дифференциациялық диагностикалау үшін АӨФ тежегіштерін тоқтату қажет.

Хирургия/Жалпы анестезия

Артериялық қысымды төмендететін дәрілер қолданылғанда, науқастардағы ауқымды хирургиялық араласу немесе жалпы анестезия кезінде лизиноприл рениннің компенсаторлық бөлінісіне қатысты екіншілік ангиотензин II түзілуін бөгеуі мүмкін. Осы механизмнің салдары саналатын артериялық қысымның айқын төмендеуін айналымдағы қан көлемін арттырумен жоюға болады. Хирургиялық араласу алдында (стоматологиялық хирургияны қоса) АӨФ тежегішін қолдану жөнінде хирург/анестезиологты хабарландыру керек.

Біріктірілген ем құрамындағы жедел миокард инфарктісі

Багровен препаратымен емдеуді инфаркт стандартты еміне (тромболитикалық дәрілер, ацетилсалицил қышқылы, бета-адреноблокаторлар, нитраттар) қосымша жүргізуге болады.

Гиперкалиемия

АӨФ тежегіштерін, соның ішінде Багровен қабылдайтын кейбір пациенттерде қан сарысуында калийдің көбеюі білінді. Гиперкалиемияның даму қаупі бар пациенттерге бүйрек жеткіліксіздігі, қант диабеті бар немесе калий жинақтаушы диуретиктерді, калий қоспаларын немесе құрамында калий бар тұз алмастырғыштарын бір мезгілде қолданатын пациенттер немесе қан сарысуындағы калийді арттыратын басқа препараттарды (мысалы, гепарин) қабылдайтын пациенттер жатады. Егер жоғарыда аталған дәрілерді бір мезгілде қолдану қажет болса, қан сарысуындағы калийге жүйелі мониторинг өткізу ұсынылады.

Қант диабетімен науқастар

Ішуге арналған диабетке қарсы препараттар немесе инсулин қабылдайтын диабеті бар пациенттерде АӨФ тежегішімен емделген алғашқы айдың ішінде мұқият гликемиялық бақылау өткізу керек.

Литий

Литий мен Багровен біріктірілімі, әдетте, ұсынылмайды.

Жүктілік және лактация кезеңі

Багровен препаратын жүктілік және лактация кезеңінде қолдану қарсы көрсетілімді. Жүктілік анықталғанда препарат қабылдауды мүмкіндігінше ертерек тоқтату қажет, жүктіліктің II және III триместрінде АӨФ тежегіштерін қабылдау шаранаға жайсыз әсерін тигізеді (АҚ айқын төмендеуі, бүйрек жеткіліксіздігі, гиперкалиемия, бассүйек гипоплазиясы, құрсақ ішіндегі өлім болуы мүмкін).

Дәрілік препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Артериялық қысым деңгейін бақылау қажет, өйткені кейбір пациенттерде жекелеген ерекшеліктерімен байланысты гипотензияның (бас айналу) дамуы, соның салдарынан, автокөлік басқару және қозғалмалы механизмдер қызметін көрсету қабілеті бұзылуы мүмкін.

Артық дозалануы

Симптомдары: ауыр гипотония, шок, брадикардия.

Емі: пациент, дұрысы, қарқынды ем бөлімінде қатаң дәрігерлік қадағалауда болуы тиіс. Қан сарысуындағы электролиттер мен креатинин деңгейін бақылап отыру керек. Асқазанды шаю, адсорбенттер мен натрий сульфатын тағайындау сияқты сіңірілуді бөгейтін шаралар препарат қабылдаудан кейін 30 минут ішінде қолға алынуы тиіс. Багровен гемодиализ кезінде шығарылады.

Шығарылу түрі және қаптамасы

Полиамид/алюминий/поливинилхлоридті үлбірден жасалған пішінді ұяшықсыз қаптамаға 10 таблеткадан салады.

Пішінді 2 және 3 қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Сақтау шарттары

Құрғақ, жарықтан қорғалған жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші ұйымның атауы және елі

Реплек Фарм Лтд, Македония Республикасы

Тіркеу куәлігі иесі

Belinda Laboratories, Ұлыбритания

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта):

«Cepheus Medical» (Цефей Медикал) ЖШС, 050000, ҚР, Алматы қ., Панфилов к-сі 98, «OLD SQUARE» БО, 807 кеңсе.

тел: +7 (727) 300 69 71, e-mail: cepheusmedical@gmail.com