Арифон® Ретард

• русский
• қазақша

• Скачать инструкцию медикамента

Саудалық атауы

Арифон Ретард

Халықаралық патенттелмеген атауы

Индапамид

Дәрілік түрі

Ұзақ әсер ететін үлбірлі қабықпен қапталған 1,5 мг таблеткалар

Құрамы

Бір таблетканың құрамында

белсенді зат - 1,5 мг индапамид,

қосымша заттар: гипромеллоза, лактоза моногидраты, магний стеараты, повидон, сусыз коллоидты кремнийдің қостотығы,

үлбірлі қабық құрамы: глицерол, гипромеллоза, макрогол 6000, магний стеараты, титанның қостотығы (Е171)

Сипаттамасы

Ақ түсті үлбірлі қабықпен қапталған дөңгелек таблеткалар.

Фармакотерапиялық тобы

Диуретиктер. Генле ілмегі кортикальді сегментіне әсер ететін тиазидті емес диуретиктер. Сульфонамидтер. Индапамид.

АТХ коды: С03ВА11

Фармакологиялық қасиеттері

Фармакокинетикасы

Индапамид 1,5 мг дәрілік зат негізіне таралған матрикс жүйесі негізінде әсер етуі ұзаққа созылатын дәрілік түрде шығарылады, бұл индапамидтің босап шығуының ұзаққа созылуын қамтамасыз етеді.

Сіңуі

Индапамидтің босап шығатын бөлігі асқазан-ішек жолдары арқылы жылдам және толық сіңіріледі. Тамақ ішу сіңу жылдамдығын елеусіз ұлғайтады, бірақ сіңірілетін препарат мөлшеріне әсер етпейді.

Сарысудағы ең жоғары концентрациясына бір рет қабылдағаннан кейін 12 сағаттан соң жетеді. Қайталап қабылдау 2 доза арасындағы сарысудағы құрамының ауытқуын төмендетеді.

Сіңуі пациенттің жеке дара ерекшеліктеріне қарай ауытқиды.

Таралуы

Индапамидтің плазма ақуыздарымен байланысуы 79% құрайды.

Плазмадан жартылай шығарылу кезеңі 14–тен 24 сағатқа дейінді (орташа 18 сағат) құрайды.

Тепе-тең концентрациясына 7 күннен кейін жетеді.

Препаратты қайта қабылдау оның организмде жинақталуына әкелмейді.

Метаболизмі

Белсенді емес метаболиттер түрінде несеппен (дозаның 70%-ы) және нәжіспен (22%-ы) шығарылады.

Қауіптің жоғары дәрежесі бар пациенттер

Бүйрек жеткіліксіздігі бар пациенттерде фармакокинетикалық параметрлері өзгеріссіз қалады.

Фармакодинамикасы

Әсер ету механизмі

Индапамид – бұл индолды сақинасы бар сульфонамид туындысы. Өзінің фармакологиялық қасиеттері бойынша ол тиазидтік диуретиктерге жақын, оның әсері Генле ілмегінің кортикальді сегментіндегі натрийдің кері сіңуін тежеуіне байланысты. Натрий және хлоридтің, аз дәрежеде калий және магнийдің несеппен бөлінуін ұлғайтады, сонымен бірге диурезді ұлғайтады және гипертензияға қарсы әсер етеді.

Фармакодинамикалық әсері

Монотерапияны қолданумен II және III фаза зерттеулерінде 24 сағат бойына сақталатын гипертензияға қарсы әсері айғақталды. Бұл диурездің орташа күшеюін туындататын дозада анықталды.

Индапамидтің гипертензияға қарсы әсері артериялық иілгіштіктің жақсаруына және артериялық және жалпы шеткері қан тамырларының кедергісі төмендеуіне байланысты.

Индапамид сол жақ қарыншаның гипертрофиясын төмендетеді.

Тиазидті және тиазидке ұқсас диуретиктер белгілі бір дозада емдік әсерінің платосына жетеді, сонымен бірге жағымсыз әсерлері ұлғаюы жалғасады. Егер ем тиімсіз болса, дозаны арттырудың қажеті жоқ.

Гипертензиясы бар пациенттерді индапамидпен қысқа мерзімді, орташа мерзімде және ұзақ емдеу оның:

• липидтердің: триглицеридтер, ТТЛП-холестерин және ТЖЛП-холестериннің метаболизміне әсер етпейтіндігін;

• тіпті гипертензиясы және диабеті бар пациенттерде де көмірсу алмасуларының параметрлерін өзгертпейтіндігін көрсетті.

Қолданылуы

- ересектердегі эссенциалдық артериялық гипертензияда

Қолдану тәсілі және дозалары

Қолдану тәсілі

Ішу арқылы қабылдауға арналған.

Дозалау режимі

Препаратты тәулігіне (24 сағат) бір таблеткадан бір рет, дұрысы таңертең қабылдау ұсынылады. Таблеткаларды шайнамай, сумен іше отырып, жұту керек.

Дозаның жоғарылауы Арифон® Ретард препаратының гипертензияға қарсы әсерінің ұлғаюына әкелмейді, бірақ несеп айдайтын әсерін күшейтеді.

Пациенттердің ерекше топтары

Бүйрек функциясының бұзылуы:

Егер пациентте ауыр бүйрек жеткіліксіздігі болса (креатинин клиренсі 30 мл/мин аз), онда емдеу қарсы көрсетілімде.

Тиазидті және тиазидке ұқсас диуретиктердің емдік әсерінің тиімділігі, тек егер бүйрек функциясы қалыпты болса немесе бұзылуы аздап болса ғана басым.

Бауыр функциясының бұзылуы:

Ауыр бауыр жеткіліксіздігінде ем қарсы көрсетілімде.

Егде жастағы пациенттер:

Егде жастағы пациенттерде плазмадағы креатинин құрамының көрсеткіші жасына, дене салмағына және жынысына қарай түзетілуі тиіс. Егде жастағы пациенттерді Арифон® Ретард препаратымен емдеу тек бүйрек функциясы қалыпты болса немесе аздаған бұзылуы болған жағдайда ғана мүмкін.

Балалар және жасөспірімдер:

Арифон® Ретард препаратының балалар мен жасөспірімдердегі қауіпсіздігі мен тиімділігі анықталмаған. Деректері жоқ.

Жағымсыз әсерлері

Аллергиялық және демікпелік реакцияларға және макулопапулезді бөртпеге бейімі бар пациенттердегі жиірек кездесетін жағымсыз реакциялар негізінен дерматологиялық сипатағы жоғары сезімталдық реакциялары болып табылады. Клиникалық зерттеулер уақытында гипокалиемия (плазмадағы калий деңгейі <3,4 ммоль/л) емнің 4-6 аптасынан кейін 10 % пациенттерде және < 3,2 ммоль/л 4 % пациенттерде бақыланды. Емнің 12 аптасынан кейін плазмадағы калий концентрациясының орташа төмендеуі 0,23 ммоль/л құраған.

Клиникалық немесе зертханалық параметрлерге қатысты жағымсыз реакциялардың көпшілігі дәрілік препараттың дозасына тәуелді.

Өте жиі (>1/10), жиі (>1/100, <1/10), жиі емес (>1/1000, <1/100), сирек (>1/10000, <1/1000), өте сирек (>1/10000), жиілігі анықталмаған (бар мәліметтер негізінде даму жиілігін бағалау мүмкін емес).

Жиі

(>1/10):

• қызыл, көтеріңкі тері бөртулері

• аллергиялық реакциялар

Жиі емес

(>1/100, <1/10):

• құсу

• терідегі қызыл дақты нүктелер (пурпура)

Сирек (>1/10000, <1/1000):

• шаршау сезімі, бас ауыру, денеде шаншуларды сезінулер (парестезия), бас айналуы;

• ас қорыту жүйесі тарапынан бұзылулар (жүрек айнуы, іш қатуы сияқты), ауыздың құрғауы

Өте сирек (>1/10000):

• тромбоцитопения (тромбоциттер мөлшерінің азаюы, бұл көгерулердің жеңіл пайда болуы мен мұрыннан қан кетулерге әкеледі), лейкопения (лейкоциттер мөлшерінің азаюы, бұл дене температурасының түсініксіз жоғарылауын, тамақ ауыруын немесе басқа да тұмауға ұқсас симптомдарды тудыруы мүмкін, олар туындаған жағдайда дәрігерге қаралыңыз), агранулоцитоз, апластикалық анемия, және гемолиздік анемия (эритроциттер мөлшерінің азаюы) сияқты қан жасушаларының өзгерістері

• гиперкальцемия

• аритмия, гипотензия

бауыр функциясының бұзылуы

• панкреатит

• ангионевроздық ісіну, есекжем, уытты эпидермальді некролиз, қатерлі экссудаттық эритема

• бүйрек жеткіліксіздігі

Жиілігі белгісіз

• естен тану

• егер сіз жедел жүйелі қызыл жегіден зардап шегуші болсаңыз (коллагендік аурудың бір түрі), оның нашарлауы мүмкін;

• күннің әсерінен немесе жасанды ультракүлгін сәулесінен кейін фотосезімталдық реакциялары туындаған жағдайлар туралы хабарламалар түскен (терінің сыртқы түрінің өзгерулері) («Айрықша нұсқаулар» бөлімін қараңыз

• алыстан көрмеу (миопия)

• анық көрмеу

• көрудің бұзылулары

• бауыр жеткіліксіздігі жаңдайында бауыр энцефалопатиясы дамуы мүмкін («Айрықша нұсқаулар»және «Қолдануға болмайтын жағдайлар» бөлімін қараңыз»)

• гепатит

• Кейбір зертханалық параметрлер өзгеруі мүмкін, сондықтан сіздің жай-күйіңізді тексеру үшін сіздің дәрігеріңіз қан талдауын жүргізуді тағайындауы мүмкін. Зертханалық параметрлердің келесі өзгерістері болуы мүмкін:

• қандағы калий деңгейінің төмен болуы, әсіресе тұрғындардың жоғары қауіппен кейбір топтарында елеулі («Айрықша нұсқаулар» бөлімін қараңыз)

• қандағы натрий құрамының төмен болуы («Айрықша нұсқаулар» бөлімін қараңыз)

• несеп қышқылы құрамының жоғарылауы, («Айрықша нұсқаулар» бөлімін қараңыз)

• қандағы глюкоза құрамының артуы («Айрықша нұсқаулар» бөлімін қараңыз)

• бауыр ферменттері деңгейінің жоғарылауы

- «пируэт» типті қарыншалық тахикардия (өліммен аяқталуы мүмкін), («Айрықша нұсқаулар» және «Дәрілермен өзара әрекеттесулері» бөлімін қараңыз)

- электрокардиограммадағы QT аралығының ұзаруы, («Айрықша нұсқаулар» және «Дәрілермен өзара әрекеттесулері» бөлімін қараңыз)

Қолдануға болмайтын жағдайлар

• индапамидке, басқа сульфонамидтерге немесе қосымша заттардың біреуіне жоғары сезімталдық

• ауыр бүйрек жеткіліксіздігі

• бауыр энцефалопатиясы немесе бауыр функциясының ауыр бұзылуы

• гипокалиемия

Дәрілермен өзара әрекеттесуі

Ұсынылмайтын біріктірілімдер

Литий:

Плазмадағы литий құрамының жоғарылауы артық дозалану белгілерімен бірге жүреді, бұл тұзсыз диета сақтағандағы сияқты (литийдің несеппен шығарылуының төмендеуі). Алайда егер диуретик қабылдау қажет болса, плазмадағы литий құрамына мұқият мониторинг және тиісінше дозаны өзгерту керек.

Пайдаланғанда сақтық талап ететін біріктірілімдер

«Пируэт» типті қарыншалық тахикардия туындатуға қабілетті дәрілік препараттар:

• I A класының аритмияға қарсы препараттары (хинидин, гидрохинидин, дизопирамид);

• аритмияға қарсы III класс препараттары (амиодарон, соталол, дофетилид, ибутилид);

• кейбір психозға қарсы препараттар:

фенотиазиндер (хлорпромазин, циамемазин, левомепромазин, тиоридазин, трифтороперазин);

бензамидтер (амисульприд, сульпирид, сультоприд, тиаприд);

бутирофенондер (дроперидол, галоперидол);

басқа да препараттар: бепридил, цизаприд, дифеманил, эритромицин в/і, галофантрин, мизоластин, пентамидин, спарфлоксацин, моксифлоксацин, винкамин в/і.

Вентрикулярлық аритмия қаупі жоғары, атап айтқанда «пируэт» типті қарыншалық тахикардия (гипокалиемия қауіп факторы болып табылады).

Бұл біріктірілімді қолдануды бастар алдында қан плазмасындағы калий құрамын анықтау керек және қажет болғанда оны түзету керек. Пациенттің клиникалық жай-күйін және плазмадағы электролиттер құрамын және ЭКГ бақылау.

Гипокалиемия болғанда «пируэт» типті қарыншалық тахикардия туындатпайтын препараттарды қолдану керек.

Қабынуға қарсы стероидты емес дәрілік препараттар (жүйелі қолдану), циклооксигеназа-2 селективті тежегіштерін (ЦОГ-2) және жоғары дозалардағы ( 3 г/күн) салицил қышылын қоса:

Индапамидтің гипертензияға қарсы әсері төмендеуі мүмкін.

Организмдегі сусыздануы бар пациенттерде (шумақтық сүзілу төмендеген) жедел бүйрек жеткіліксіздігі даму қаупі. Пациенттің су теңгерімін қалпына келтіру, ем басында бүйрек функциясын бақылау керек.

Ангиотензин өзгертуші фермент (АӨФ) тежегіштері:

Бұрыннан бар натрий жеткіліксіздігі аясындағы АӨФ тежегіштерін қолдану басында гипотензияның және/немесе жедел бүйрек жеткіліксіздігінің кенеттен болатын қаупі (әсіресе бүйрек артериясының стенозы бар пациенттерде).

Гипертензия жағдайында, егер диуретикпен бұрын жүргізілген ем натрий жеткіліксіздігіне әкелуі мүмкін болса:

• немесе АӨФ тежегіштерімен ем бастар алдында 3 күн бұрын диуретик қабылдауды тоқтату керек және қажет болғанда калий жинақтайтын қасиеті жоқ диуретик қабылдауды жаңғырту керек;

• немесе АӨФ тежегіштерінің аздаған дозасымен қабылдауды бастау және оның дозасын біртіндеп жоғарылату қажет.

Жүрек-тамыр жеткіліксіздігінде АӨФ тежегіштерімен емді өте төмен дозада бастау керек, калий жинақтайтын қасиеті жоқ қатар қабылданатын диуретиктің дозасын төмендетуден кейін болуы мүмкін.

Барлық жағдайларда, АӨФ тежегіштерімен емінің бірінші аптасында бүйрек функциясын (плазмадағы креатинин құрамы) бақылау керек.

Гипокалиемия туындататын басқа да препараттар: амфотерицин B (в/і), глюко- және минералокортикоидтар (жүйелі қолдану), тетракозактид, ішек моторикасын стимулияциялайтын іш жүргізетін дәрілер.

Гипокалиемия қаупі ұлғаяды (аддитивті әсер).

Плазмадағы калий құрамын мониторингтеу және қажет болғанда оны түзету керек. Бір мезгілде жүрек гликозидтерін қабылдайтын пациенттерге ерекше назар аудару керек. Ішек моторикасын стимуляцияламайтын іш жүргізетін дәрілер қолдану керек. Баклофен:

Гипертензияға қарсы әсерін күшейту.

Пациенттің су теңгерімін қалпына келтіру керек, ем басында бүйрек функциясын бақылау керек.

Жүрек гликозидтері:

Гипокалиемия жүрек гликозидтерінің уытты әсерін ұлғайтады. Плазмадағы калийге мониторинг, ЭКГ және қажет болғанда емді түзету.

Назарада ұстау керек біріктірілімдер

Калий жинақтаушы диуретиктер (амилорид, спиронолактон, триамтерен):

Кейбір пациенттерде бұл біріктірілім нәтижелі болса да, гипокалиемия немесе гиперкалиемия (әсіресе бүйрек жеткіліксіздігі немесе диабеті бар пациенттерде) дамуы мүмкін. Плазмадағы калий құрамын және ЭКГ көрсеткіштерін бақылау керек және қажет болған жағдайда емді түзету керек.

Метформин:

Диуретиктер және әсіресе ілмекті диуретиктер қолдануға байланысты туындаған, бүйрек функциясының болжамды бұзылуына байланысты метформиннен туындаған сүт қышқылды ацидоздың жоғары қаупі. Егер плазмадағы креатинин еркектерде 15 мг/л (135 мкмоль/л) және әйелдерде 12 мг/л (110 мкмоль/л) астам болса метформин қолдануға болмайды.

Құрамында йод бар рентген контрастылық заттар:

Диуретиктер қабылдау аясындағы организм сусыздануы, әсіресе жоғары дозаларда құрамында йод бар рентген контрастылық заттар қолданғанда жедел бүйрек жеткіліксіздігі дамуы қаупін ұлғайтады.

Құрамында йод бар заттар енгізер алдында регидратациялау.

Имипраминге ұқсас антидепрессанттар, нейролептиктер:

Гипертензияға қарсы әсерін күшейту және ортостазды гипотензия қаупінің жоғарылауы (аддитивтік әсер).

Кальций (тұздар):

Несеппен кальций шығарылуының төмендеуі нәтижесіндегі гиперкальциемия қаупі.

Циклоспорин, такролимус:

Айналымдағы циклоспорин деңгейінде қандай да бір өзгерістерсіз, тіпті су/натрий құрамы төмендеуі болмағанда да, плазмада креатинин құрамының ұлғаю қаупі.

Кортикостероидтар, тетракозактид (жүйелі қолдану):

Гипертензияға қарсы әсер азаюы (кортикостероидтар сұйықты және натрий іркілуін туындатады).

Айрықша нұсқаулар

Арнайы ескертулер

Бауыр функциясы бұзылуында тиазид тобының диуретиктері, әсіресе электролиттік теңгерім бұзылуында бауыр энцефалопатиясына әкелуі мүмкін. Бұл жағдайда диуретиктер қабылдау дереу тоқтатылуы тиіс.

Фотосезімталдығы:

Тиазидті және тиазидке ұқсас диуретиктер қолданғанда фотосезімталдық жағдайлары анықталды (4.8 бөлімін қараңыз). Егер емдеуде жоғары фотосезімталдық анықталса, препарат қабылдауды тоқтату ұсынылады. Диуретиктерді қайта тағайындау қажет болғанда теріні күннен және жасанды UVA-сәулелерден қорғау ұсынылады

Қосымша заттар:

Бұл препаратты сирек кездесетін тұқым қуалайтын лактоза жақпаушылығы, Лапп лактаза тапшылығы мәселелері бар немесе глюкоза-галактоза сіңуі нашар пациенттерге тағайындауға болмайды.

Қолданудағы ерекше сақтық шаралары

Су-электролиттік теңгерім:

• • Плазмадағы натрий құрамы:

Плазмадағы натрий құрамы ем бастағанға дейін анықталуы тиіс және содан кейін жүйелі аралықтағы ем уақытында өлшенуі тиіс. Плазмадағы натрий құрамы төмендеуі бастапқыда асимптоматикалық болуы мүмкін, сондықтан оның құрамын егде пациенттерде және бауыр циррозы бар пациенттерде тексеруді жоғарырақ жиілікпен ұдайы бақылау талап етіледі. Барлық диуретиктер, кейде өте күрделі салдарлары болатын гипонатриемияға әкелуі мүмкін. гиповолемиясы бар гипонатриемия дегидратацияға және ортостаздық гипотензияға әкелуі мүмкін.

Хлор иондарын қатарлас жоғалту салдарлы компенсаторлық метаболизмдік алкалоз туындатуы мүмкін: туындау жиілігі және бұл әсердің дәрежесі елеусіз.

• • Плазмадағы калий құрамы:

Соңынан гипокалиемияға ұласуы мүмкін калий құрамының төмендеуі тиазидтің және басқа да оның негізіндегі диуретиктерді қабылдаудың негізгі қаупі болып табылады. Жоғары қауіптің кейбір топтарында:егде адамдар, жеткіліксіз тамақтанатын және/немесе бірнеше препаратты бір мезгілде қабылдайтын адамдар, ісінулері мен асциті болған бауыр циррозы бар пациенттер, жүректің ишемиялық ауруы және жүрек жеткіліксіздігі бар пациенттер гипокалиемия (< 3,4 ммоль/л) туындау қаупінен аулақ болу керек. Бұл жағдайда гипокалиемия жүрек гликозидтерінің уытты әсерін және аритмия туындау қаупін ұлғайтады.

Сондай-ақ QT аралығы үлкен пациенттер оның туа біткен немесе ятрогенді

шығу тегіне байланыссыз қауіпке ұшырайды.

Гипокалиемия, ондай-ақ брадикардия ауыр аритмияның, атап айтқанда «пируэт» типті потенциалды өлімге жеткізетін қарыншалық тахикардияның туындауына бейімдегіш фактор болып табылады.

Жоғарыда көрсетілген барлық жағдайларда плазмадағы калий құрамының

жиірек мониторингілеу керек. Плазмадағы калий құрамын бірінші өлшеу ем басындағы бірінші аптада орындалуы тиіс. Гипокалиемия анықталғанда бұл жай-күйді түзету керек.

• • Плазмадағы кальций құрамы:

Тиазидтерді және оның негізіндегі диуретиктерді қолдану несеппен кальций шығарылуының азаюына әкелуі мүмкін және плазмадағы кальций құрамының аздап уақытша жоғарылауын туындатуы мүмкін. Айқын көріністі гиперкальциемия бұрын танылмаған гиперпаратиреоздан болуы мүмкін.

Бұл жағдайда ем қалқанша без маңы бездерінің функциясын зерттегенге дейін тоқтатылуы тиіс.

Қандағы глюкоза деңгейі:

Диабетте, әсіресе гипокалиемия бар болған жағдайда қандағы глюкоза құрамын бақылау маңызды.

Несеп қышқылы:

Гиперурикемиясы бар пациенттерде подагра туындауының ықтималдығы жоғары.

Бүйрек функциясы және диуретиктер:

Тиазидтерді және оның негізіндегі диуретиктердің толық тиімділігіне бүйрек функциясы қалыпты (плазмадағы креатинин құрамы ересек пациенттер үшін 25 мг/л, яғни 220 мкмоль/л болжамды деңгейден төмен ) болғанда немесе бұзылуы елеусіз болғанда ғана жетеді. Егде пациенттердегі плазмадағы креатинин құрамының деңгейі пациенттің жасына, салмағына және жынысына қарай түзетілуі тиіс.

Ем басындағы диуретиктерден туындаған сұйықтық және натрий жоғалтуға байланысты гиповолемия шумақтық сүзіліс төмендеуіне әкеледі. Бұл қандағы мочевина құрамының және плазмадағы креатининнің

жоғарылауына әкелуі мүмкін. Бүйрек функциясының бұндай уақытша жеткіліксіздігінің бүйрек функциясы қалыпты пациенттер үшін салдары болмайды, алайда бұрыннан бүйрек жеткіліксіздігі бар пациенттің жай-күйін нашарлатуы мүмкін.

Спорт шеберлері:

Спорт шеберлері бұл дәрілік препаратта допинг тесттеріне оң нәтиже беруі мүмкін дәрілік заттың болуына назар аударуы керек.

Жүктілік, лактация және фертильділігі

Жүктілік

Жүкті әйелдерде индапамид қолдану бойынша деректер жоқ немесе шектеулі. Жүктіліктің үшінші триместрінде тиазидтердің ұзақ әсері барысында анасының қан плазмасы, сондай-ақ фетоплацентарлық ишемия дамуына және шарананың дамуының іркілісіне әкелуі мүмкін жатырлық-плацентарлық қан ағымы көлемінің төмендеуінің ықтималдығы бар.

Жануарлардағы зерттеулер ұрпақ өрбітуге уыттылығына қатысты тікелей немесе жанама зиянды әсерін анықтамады.

Сақтық шаралары ретінде жүктілік уақытында индапамид пайдаланудан аулақ болу керек.

Лактация

Индапамид және оның метаболиттерінің әйел сүтіне өтуі туралы ақпарат жеткіліксіз. Сульфонамид туындыларына және гипокалиемияға жоғары сезімталдық туындауы мүмкін. Жаңа туған нәрестелер/сәбилер үшін қаупі жоққа шығарылмайды.

Индапамид өзінің қасиеттері жағынан тиазидті диуретиктерге жақын, бала емізу кезінде оларды қолдану лактация азаюымен немесе тіпті толық бәсеңдеуімен астасқан.

Арифон Ретард препаратын бала емізу кезеңінде қолдануға болмайды.

Фертильділігі

Ұрпақ өрбітуге уыттылығының зерттеулерінде егеуқұйрықтардың аталығы мен аналығында фертильділігіне әсері болмағаны анықталды. Адам фертильділігіне ешбір әсері күтілмейді.

Дәрілік заттың автокөлік құралын және қауіптілігі зор механизмдерді басқару қабілетіне әсер ету ерекшеліктері

Арифон® Ретард реакциялар жылдамдығы азаюын туындатпайды, алайда жеке жағдайларда, әсіресе ем басында немесе жүргізілетін емге гипертензияға қарсы басқа дәрілік препараттарды қосқанда артериялық қысым төмендеуінен әртүрлі реакциялар туындауы мүмкін. Осының нәтижесінде көлік құралдарын немесе механизмдерді басқару мүмкіндігі төмендеуі туындауы мүмкін.

Артық дозалануы

Симптомдары

Индапамид 40 мг дейінгі, яғни емдік дозадан 27 есе астам дозада уытты әсер етпейді.

Жедел уланудың белгілері бірінші кезекте су-электролиттің теңгерімі бұзылуынан (гипонатриемия, гипокалиемия) білінеді. Клиникалық симптомдарынан жүрек айнуы, құсу, гипотензия, құрысулар, бас айналуы, ұйқышылдық, сананың шатасуы, полиурия немесе тіпті анурияға дейін болатын (гиповолемия салдарынан) олигурия болуы мүмкін.

Емі

Шұғыл шаралар соңынан су-электролитті теңгерімі мамандандырылған орталықта қалпына келтірілетін асқазан-ішек жолдарын шаю және/немесе белсендірілген көмір тағайындау арқылы препараттың организмнен тез шығарылуына бағытталған.

Шығарылу түрі және қаптамасы

Поливинилхлоридті үлбірден және алюминий фольгадан жасалған пішінді ұяшықты қаптамаға 15 таблеткадан салынған.

2 пішінді қаптамадан медициналық қолдануы жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Сақтау шарттары

30оС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Les Laboratoires Servier Industrie, Франция

Тіркеу куәлігінің иесі

Les Laboratoires Servier, Франция

Қазақстан Республикасы аумағында тұтынушылардан өнім сапасына қатысты шағымдарды қабылдайтын, сондай-ақ дәрілік заттың қауіпсіздігін тіркеуден кейінгі бақылауға жауапты ұйымның мекенжайы:

« Сервье Қазақстан» ЖШС

050020, Алматы қ., Достық даңғ. 310 г, Бизнес орталығы, 3 қабат

Тел.: (727) 386 76 62/63/64/70/71

Факс: (727) 386 76 67

Электронды поштасы: kazadinfo@kz.netgrs.com